Blog

Abagore bo mu Karere ka Huye basuzumye uko barushaho kubaka umuryango utekanye uzira ihohoterwa rikorerwa abana

Ibyo barabivuga mu gihe ubushakashatsi bw’Ishami ry’Umuryango w’Abibumbye ryita ku bana (UNICEF) buragaragaza ko 1/3 cy’abana b’abangavu batwara inda baba barasambanyijwe batabishaka naho 2/3 bagakora imibonano mpuzabitsina babishaka.

Ubushakashatsi bw’ishami ry’umuryango w’abibumbye ryita ku bana (UNICEF) bugaragaza ko hafi 50% by’abakobwa bari munsi y’imyaka 18 baba barakoze imibonano mpuzabitsina, bikaviramo bamwe gutwara inda zitifuzwa.

Ubushakashatsi kandi bugaragaza ko abakobwa batanu ku 10 baba barahohotewe, naho mu bahungu 10 batandadu bakaba barakorewe ihohoterwa rishingiye ku gitsina, ku mubiri no ku marangamutima.

Ihohoterwa rishingiye ku gitsina kandi rirahangayikishije kuko rigira ingaruka ku muryango no ku gihugu muri rusange kuko abana bakuriye mu ihohoterwa nta cyizere cyo gushinga imiryango ikomeye baba bafite.

Mu rwego rwo gukomeza gukumira no kurwanya ihohoterwa rikorerwa abana by’umwihariko abakobwa batarageza ku myaka 18, abagore bo mu Karere ka Huye, binyuze mu nama y’igihugu y’abagore bo muri ako karere baherutse guhurira mu mwiherero, baganira uko barushaho kwita ku miryango yabo kugira ngo bagire uruhare mu kubaka umuryango muzima uzira ihohoterwa rikorewe abana.

Umuyobozi w’Inama y’Igihugu y’abagore mu Karere ka Huye avuga ko nyuma yo kuganira no gusesengura ibibazo biri mu bana b’abangavu bazarushaho gukumira ko batwara inda zitifuzwa kuko byagaragaye ko abana batwara inda harimo ababa bahohotewe n’ababa bishoye ku bushake mu mibonano mpuzabitsina.

Avuga ko inshingano z’umubyeyi ari ukurushaho kwegera umwana no kumusobanurira uko akwiye kwitwara kugira ngo atangiza ejo he kandi ejo h’umwana ari ho ejo h’igihugu.

Agira ati “Aha turasesengura buri kibazo gishobora kuba gitera abangavu kwishora mu busambanyi, nitumara kumenya buri kibazo hazakurikiraho kwegera abana tubaganiriza dukurikije imiterere ya buri kibazo aho ni ho tuzahera twubaka umuryango nyarwanda kandi n’abana bakabigiramo uruhare”.

Impuguke mu by’uburenganzira bw’abana, Aimable Nsengiyumva, avuga ko iyo usesenguye ubushakashatsi bwa UNICEF usanga hari ibitajya bivugwa ku ihohoterwa rikorerwa abana bigatuma abantu badafata ingamba zihamye mu kurinda abana ihohoterwa.

Avuga ko abakorera abana ihohoterwa ari: abaturanyi babo, abarimu babo, ababyeyi babo cyangwa abana ubwabo bagahohoterana, kuko byagaragaye ko no mu bana harimo abasambanya bagenzi babo.

Avuga kandi ko usanga umwihariko w’ibihugu n’umuco wabyo hari aho uha icyuho guhohotera abana by’umwihariko ugasanga nko kubasambanya bidahanwa cyane n’amategeko cyangwa ngo usange gusambanya abana bifatwa cyane nk’ikizira.

Ibyo bikagaragara mu bihugu byo mu burengerazuba bw’Isi no ku mugabane w’i Burayi n’ibyo byakoronije.

Nsengiyumva avuga ko aho ibibazo bigeze ari ngombwa ko abagize umuryango bibaza ku hazaza h’abana babo igihe ihohoterwa ribakorerwa rikomeje kwiyongera kuko byagira ingaruka mbi cyane ku muryango w’ejo hazaza”.

Agira ati “Hanze aha hari uburyo bwinshi bugezweho burimo n’ubucuruzi no kwamamaza imico itari myiza igamije kwinezeza bigoye kubigenzura, abana rero ni ho bagendera kuko iyo mico isanga batiteguye guhangana na yo bwaba mu buryo bw’imyemerere cyangwa n’indangagaciro zibibabuza”.

Yongeyeho ati “Umubyeyi ni we ukwiye gufata iya mbere agafata umwana we nk’urupapuro rutanditseho akamenya uko atangira kwandika indangagaciro nzima kuri urwo rupapuro umwana akamenya uko yitwara, akubakwamo ubushobozi burimo n’ubumenyi ku buzima bwe bw’imyororokere”.

Nsengiyumva avuga ko abana b’abakobwa bari hagati y’imyaka 13 na 17 ari bo bahohoterwa cyane kuko baba bataragira ugukomera mu bitekerezo gutuma bifatira imyanzuro, kandi baba bageze mu gihe cyo gukurura abagabo no kwiyumvamo gushaka gukora imibonano mpuzabitsina ibyo bigatuma bahuriramo n’ihohoterwa.

Ubwo yamurikaga uko imihigo ya 2019/2020 yashyizwe mu bikorwa ndetse n’ibikorwa by’ingenzi bizibandwaho mu mihigo y’umwaka wa 2020/2021, Minisitiri w’Intebe, Dr Edouard Ngirente, yatangaje ko imihigo ya 2019/20 yitaye ku mahame arimo ko buri mwaka hazajya hasuzumwa ibyagezweho, hanyuma buri myaka itatu hagasuzumwa ibyakorewe abaturage.

Umuyobozi w’Akarere ka Nyaruguru yahishuye ibanga ryatumye akarere ayoboye ka Nyaruguru kaza ku isonga mu mihigo ya 2019-2020.

Video: Richard Kwizera

Yagize ati “Nafashe icyemezo cyo gufata umurongo mwiza, ntozwa indagagaciro na kirazira. Ubu ndi umwe mu rubyiruko ruharanira gukomeza kubaka u Rwanda.”

Ibi yabitangarije mu Ihuriro rya 13 rya Unity Club Intwararumuri, ryateranye hifashishijwe uburyo bw’ikoranabuhanga rigakurikirwa n’Abanyarwanda bari hirya no hino ku isi, aho bahuriye kuri za Ambasade z’u Rwanda mu bihugu barimo.

Video: Richard Kwizera

Minisitiri Hakuziyaremye yasabye iyi sosiyete gukora ibikoresho byinshi bagahaza isoko ryo mu Rwanda

Minisitiri w’Ubucuruzi n’Inganda, Hakuziyaremye Soraya, akaba yarasabye iyo sosiyete ikora ibyo bikoresho kongera umusaruro w’ibyo bakora, kugira ngo bihaze isoko riri mu gihugu.

Tuyisenge Desire ushinzwe ibikorwa muri iyo sosiyete ikora firigo n’amashyiga ya gaz bikorewe mu Rwanda (made in Rwanda), avuga ko iyo sosiyete yavutse nyuma y’urugendo Perizida wa Repubulika y’u Rwanda yakoreye muri Quatar rugamije gushishikariza Abanya-Quatar gushora imari mu Rwanda.

Ni cyo cyatumye abashoramari babiri ari bo Ahmed Mohammed Ahmed Hezam na Saleh Mohammed H Shajea, biyemeza gushora imari mu Rwanda, bashinga sosiyete bise ‘Almaha for industry Co Ltd’, muri 2018 bayandikisha mu Rwego rw’Igihugu rw’Iterambere (RDB).

Muri uwo mwaka kandi, binyuze mu masezerano yari ifitanye na Minisiteri y’Ubucuruzi n’Inganda, iyo sosiyete yabonye ikibanza mu cyanya cyahariwe inganda mu Karere ka Bugesera.

Mu mwaka wa 2019, iyo sosiyete yatangiye kubaka, izana imashini n’ibindi bikoresho izakenera mu kazi kayo no guhugura abatekinisiye, ku buryo mu kwezi k’Ukuboza 2019, yari yatangiye gukora. Gusa kubera icyorezo cya Covid-19, iyo sosiyete yatangiye gushyira ku isoko ibyo ikora ku itariki 4 Gicurasi 2020.

Ibikoresho by’iyi sosiyete byitezweho guhenduka

Kugeza ubu uruganda rwa sosiyete ya ‘Almaha for industry Co Ltd’, rushobora gukora Firigo 50 n’amashyiga ya gaz 50 ku munsi (mu masaha icyenda y’akazi). Ubu iyo sosiyete ifite abakozi 80 bakoraho (54 bakora mu ruganda rukora za Firigo ndetse na 26 bakora mu byo gukora amashyiga ya Gaz).

Hari kandi n’abandi bakorana n’iyo sosiyete, mu buryo butandukanye nko gucuruza ibyo bakora n’indi, kandi nk’uko Tuyisenge abisobanura 99% by’abakorana n’iyo sosiyete ni Abanyarwanda.

Iyo sosiyete ifite aho icuririza ibyo ikora mu igorofa rya MIC mu Mujyi wa Kigali, kandi nk’uko Tuyisenge abivuga, ibikoresho byabo birahendutse ugereranyije n’ibisanzwe biboneka ku masoko, kuko iyo sosiyete yo yinjiza ibikoresho bitandukanye yasonewe imisoro, bitewe n’uko ifite uruganda kandi rukorera mu Rwanda, bityo rero ngo bajya gushyiraho ibiciro bazirikanye ibyo basonerwa.

Ibiciro bya Firigo zikorwa na ‘Almaha for industry Co Ltd’ biri hagati ya 230,000Frw na 350,000Frw, bitewe n’ubunini bwayo, ndetse n’ubushobozi ifite. Ibiciro by’amashyiga ya Gaz na byo biri ya 250,000Frw na 18,000 Frw bitewe n’umubare w’amashyiga kandi ziba zifite n’ifuru (oven).

Iyo sosiyete kandi ngo ifite n’imishinga yo gukora ibindi bintu bitandukanye mu gihe kizaza, harimo ibyitwa ‘paper cups’ ni udukombe dukozwe mu mpapuro zabugenewe, tukaba dukoranwa ubuhanga ku buryo badusukamo ibyo kunywa nk’ikawa n’ibindi, umuntu afata akaba yajya kubinywera ahandi adafite umwanya wo kwicara hamwe ngo abanze anywe (uwo mushinga ngo uzatangira umwaka utaha wa 2021).

Undi mushinga iyo sosiyete ifite ni uwo gukora ibikoresho by’amadongo (Ceramics products), harimo amasahane, amatasi n’ibindi, ubu ngo bakaba baramaze kugeza dosiye isaba gucukura ibumba rigenewe gukora ibyo bikoresho mu Kigo cy’Igihugu gishinzwe Ubucukuzi bw’Amabuye y’Agaciro (Rwanda Mining Board-RMB).

Bafite uruganda i Bugesera

Iyo sosiyete kandi ifite umushinga wo gukora ibyitwa ‘alcohol pad’ (utwo ni udupamba tuba dukoranye na ‘alukoro’ dukoreshwa cyane cyane kwa muganga, ku buryo umuntu agafungura mu gapapuro ahita agakoresha, bidasabye guca ipamba no kujya kuritumbika muri alukoro nyuma.

Hari kandi n’umushinga wo gukora ibyuma byishyushya amazi, byifashisha ingufu zituruka ku mirasire y’izuba (Solar water heaters), uwo bakazawutangira umwaka utaha wa 2021, mu cyanya cyahariwe inganda mu Karere ka Rwamagana.

Inka bahawe bamwe bazibonamo urufunguzo rw’ubukire, abandi zizababera abaraza

Izo nka bazishyikirijwe ari 14, tariki 27 Ukwakira 2020. Ni inka z’icyororo kivuguruye, zitanga umukamo. Bazakira bazibonyemo urufunguzo rw’ubukire, kubera ko babonye bagenzi babo bazihawe kera bageze kure bagana mu bukire, kuko ubukene bwo bamaze kubuvamo.

Jean Claude Iyakaremye utuye mu Mudugudu wa Rushubi, akimara kwakira inka, yagize ati “Iyi nka ndabona ari urufunguzo rw’ubukire, nkaba ngiye kuyibyaza umusaruro, nkayifata neza ndetse nkazanitura abandi na bo zikazabageraho tukorozanya”.

Inka yahawe kuri we ngo ni urufunguzo rw’ubukire kuko iziyikomokaho azazigurisha akikenura, ariko akanabona ifumbire yo gufumbiza imirima ye.

Annonciata Mukeshimana utuye mu Mudugudu w’Akagera, we ati “Nari umugore w’umupfakazi ntagira inka, none nishimiye ko bampaye umugabo uzajya andaza, akampa n’ifumbire ngahinga, ngatunga abana mfite, bakava mu mirire mibi bakazagira ubuzima bwiza”.

Ibi byose babyiteze ku nka bahawe, kuko babonye ari ko byagendekeye abaturanyi bahawe inka mbere muri gahunda ya Girinka.

Emmanuel Ruhigangoga na we wo mu Kagari ka Ngeri, ni umwe mu bo bareberaho. Inka yahawe mu mwaka wa 2007 ngo imaze kumubyarira gatanu, kandi ayikesha kuba atakibarirwa mu bakennye cyane kuko yamufashije gukenura urugo rwe.

Agira ati “Girinka rwose yazamuye abantu benshi, sinjye gusa. Iyi nka yagiye impa ifumbire none ibirayi ndeza, ibigori ndeza, mfite amasambu mpinga harimo n’iyo naguze ibihumbi 300 mbikuye ku nka nagurishije”.

Inka Emmanuel Ruhigangoga yahawe imaze kumubyarira gatanu kandi yamukuye mu bukene

Yungamo ati “Iyi nka yandereye abana, nta warwaye bwaki kandi barantoranyije mu bakene. Iyi nka yanshyingirije abakobwa babiri. Iyi nka nayubakiyemo umuhungu, yarihiye umwana amashuri y’imyuga”.

Ngo yanamurereye umwuzukuru wazanywe n’umuhungu we, umukobwa bamubyaranye i Kigali amumusigiye undi akamuzanira ababyeyi, inakamirwa abana b’abaturanyi babaga bavutse ari indahekana hataraduka Shisha Kibondo.

Asoza agira ati “Iyi nka yarankenuye ku mubiri, simbuze imyenda n’amakositimu ndayafite. Nararwaye njya kwivuza iyo za Butare, ndivuza ndakira ari yo mbikesha”.

Umuyobozi w’Akarere ka Nyaruguru, François Habitegeko, avuga ko kugeza muri Nzeri 2020, mu karere ayobora hari hamaze gutangwa inka 15,380 muri gahunda ya Girinka. Icyakora muri rusange, i Nyaruguru habarirwa inka zigera ku bihumbi 50.

Inyubako y’urwibutso rwa Kiziguro izaba igaragaza amateka ya Jenoside yakorewe Abatutsi mu cyahoze ari komini Murambi

Mu cyahoze ari komini Murambi yayoborwaga na Gatete Jean Baptiste, ni hamwe mu hakorewe ubwicanyi ndengakamere by’umwihariko i Kiziguro.

Aha i Kiziguro, Abatutsi bari bahungiye mu Kiliziya ya Paruwasi Gatolika ya Kiziguro, batangiye kwicwa kuwa 11 Mata 1994, bakajugunywa mu rwobo bikekwa ko ruri hagati ya metero 30 na 50 z’ubujyakuzimu.

Mu kwica Abatutsi hifashishwaga intwaro gakondo zirimo amahiri, amacumu, imihoro n’ibindi ndetse n’intwaro za gisirikare harimo gerenade n’imbunda.

Umuyobozi wa Ibuka mu Karere ka Gatsibo Sibomana Jean Nepomscene, avuga ko Interahamwe zo muri komini Murambi zari zifite ubugome bukabije, aho zicaga abantu zigategeka abo bafitanye isano kubajugunya mu mwobo mbere y’uko na bo bicwa.

Avuga ko by’umwihariko ubwicanyi bw’i Kiziguro bwari bukabije kuko ntawashoboraga kurokoka, bitewe n’uko bateraniweho n’Interahamwe zo muri komini Murambi, izaturutse muri komini Muvumba ndetse n’impunzi z’intambara zaturutse i Kiyombe.

Ikindi cyatumye mu cyahoze ari komini Murambi hakorwa ubwicanyi bukomeye, ngo ni uko uwari Burugumesitiri Mwangi yifashishije abacuruzi barimo uwitwa Nkundabazungu ndetse n’umwicanyi ukomeye cyane wahoze ayobora iyi komini, Gatete Jean Baptiste, bategura neza Interahamwe ku buryo zicaga zihereye iruhande.

Ati “Ibyabereye hano byari bikomeye cyane, Gatete Jean Baptiste ni ho yakomokaga akaba umwicanyi ukomeye cyane, yaje gufasha Burugumesitiri yari yarimitse ndetse n’abacuruzi, bahiga abantu ku buryo ntaho umuntu yashoboraga kwihisha kuko bahigaga bakurikije lisiti banditse kera”.

Sibomana avuga ko Interahamwe nanone zatijwe umurindi n’ingabo za EX-FAR zari zihunze zimaze gutsindwa urugamba i Gabiro ndetse n’abajandarume bari muri komini Murambi.

Umuyobozi w’Akarere ka Gatsibo Gasana Richard, avuga ko kubera ubwicanyi ndengakamere bwabereye mu cyahoze ari komini Murambi, batekereje kubaka urwibutso ruzagaragaza ayo mateka kuko hari abatayazi.

Agira ati “Hari ibyumba tuzashyiramo amateka, hari abadufatira amashusho n’amafoto ndetse n’ubuhamya cyane kuri ruriya rwobo. Iyi nyubako rero izaba ari amateka, turashaka ko izaba inyubako ivuga kuri Jenoside yakorewe Abatutsi mu cyahoze ari komini Murambi”.

Akomeza agira ati “Umuntu uzagenda kuri uyu musozi muri aka karere azamenya uko Jenoside yakozwe no mu Rwanda mu buryo bwa rusange. Na ruriya rwobo nubwo amateka yarwo azashyirwa muri iriya nyubako, na rwo ruzagira ikimenyetso cyarwo kihariye”.

Gasana Richard avuga ko iyi nzu izaba irimo amafoto ya bamwe mu bazize Jenoside, amashusho n’ubuhamya ku barokotse harimo n’abakuwe mu rwobo ari bazima.

Izashyirwamo kandi amwe mu mazina ndetse n’ahazashyirwa bimwe mu bice by’imibiri y’abazize Jenoside.

Avuga ko iyi nzu irimo kubakwa izaba igizwe n’ibyiciro bibiri, harimo inzu ubwayo izuzura itwaye miliyoni 620 z’amafaranga y’u Rwanda, ndetse n’icyiciro cyo gushyiramo ibikoresho ku buryo batekereza ko izuzura byose birimo ihagaze miliyari y’amafaranga y’u Rwanda.

Avuga ko hazaba harimo n’ibitabo, ku buryo abifuza kumenya amateka ya Jenoside yakorewe Abatutsi mu cyahoze ari komini Murambi bazajya baza bakabisoma, bityo n’abazavuka nyuma y’imyaka 100 bazamenya amateka y’igihugu cyane ajyanye na Jenoside yakorewe Abatutsi.