Blog

Uru rubyiruko rwakanguriwe kubikoresha neza kugira ngo rukomeze gukura bagana mu buhinzi bw'umwuga.

Ni ibikoresho bahawe ku wa 04 Mata 2024, babishyikirizwa n'abagize Ikigo cya Yalla Yalla Group gikora ibijyanye n'ubuhinzi cyiganjemo abize ubuhinzi mu mahanga mu bihugu birimo Israel na Koreya y'Amajyepfo.

Ibikoresho bahawe birimo ibyo kuhira bizwi nka 'arrosoirs' ndetse n'amasuka, maze ababihawe batangaza ko biteguye kubyaza umusaruro iyi mpano bahawe.

Bunani Vuguziga wahawe ibi bikoresho yagize ati 'Ndashimira abatugeneye ibi bikoresho, tuzifashisha twiteza imbere. Nkanjye aho ntuye hera ibigori n'ibirayi ngiye gushyiramo imbaraga nanakoreshe ubumenyi ku buhinzi nungukiye mu kigo ngororamuco nabagamo. Mfite icyizere ko nzagera aheza.'

Mugenzi witwa Nsanzabarinda Vénuste ati ''Tugiye gukora cyane twiteze imbere kuko imirima turayifite, icyo tuzajya tubura, ubuyobozi bwatwijejeje ko buzakomeza kudushyigikira mu rugendo rwo kwiteza imbere no kwigira.'

Umuyobozi Wungirije wa Yalla Yalla Group, Ishimwe Emmanuel, yavuze ko ibi bikoresho babihaye nk'igerageza kugira ngo barebe ko bazabifata neza, noneho nyuma bahabwe ibyisumbuyeho bizabafasha kuba abahinzi b'umwuga.

Ati 'Twaje kubaganiriza ngo tubereke ko bakora ubuhinzi bakiteza imbere badasubiye mu byo bahozemo bibi. Ibi twabahaye ni ukugira ngo batwereke ko bafite ubushake bwo gukora, kuko nyuma duteganya kuzabaha imashini bajya bakoresha mu bikorwa by'ubuhinzi mu kwiteza imbere.'

Umuyobozi w'Akarere ka Nyaruguru, Dr. Murwanashyaka Emmanuel, avuga ko bafite uburyo bwo gukurikirana umunsi ku wundi uru rubyiruko rwavuye mu bigo ngororamurmco ku buryo amahirwe bahabwa azabagirira akamaro, bijyanye n'ubujyanama bazakomeza guhabwa.

Ati 'Tuzi umuntu wese wavuye mu kigo ngororamuco aho ahari, tuzi icyo tugomba kumufasha bijyanye n'icyo yahisemo, kandi noneho twiyemeje kurushaho kubegera kugira amahirwe yose agenda aboneka tuyabagezeho. Ni ukugira ngo batunganye ejo hazaza habo heza, kurusha gutekereza bya bintu bibi byari byatumye bajya kugororwa.'

Mu Karere ka Nyaruguru habarurwa urubyiruko rugera ku 162 ruherutse kuva mu bigo ngororamuco byiganjemo Iwawa na Gatare.

Rwagiye rwihugura mu myuga itandukanye irimo ububaji, ubuhinzi n'indi byitezwe kuzabafasha gusubira mu buzima busanzwe.

Yalla Yalla Group mu Karere ka Nyaruguru isanzwe ifatanya n'abahinzi mu guteza imbere ubuhinzi mu byanya bine biri mu bishanga Agatorove muri Kibeho, Agatorove ko mu Murenge wa Mata.

Agatobwe n'Urwonjya bifite ubuso busaga hegitari 350 bigahuriramo abahinzi 4.326, aho bahinga ibirayi, ibigori,imboga n'ibindi.

Yalla Yalla yijeje urubyiruko rwavuye mu buzererezi ko rikomeza kwitwara neza bazabaha ibikoresho byisumbuyeho byazajya byifashishwa mu buhinzi bunini

Meya Dr.Murwanashyaka ashyikiriza umwe mu bavuye kugororwa ibikoresho by’ubuhinzi yagenewe

Bamwe mu bashyikirijwe ibi bikoresho bahize ko bagiye kwitwara neza bakabibyaza umusaruro

Ubuyobozi bw’Akarere ka Nyaruguru busanganywe ubufatanye na Yalla Yalla Group bugamije guteza imbere ubuhinzi

Aba bahawe ibi bikoresho bavuze ko bazakoresha ubumenyi bungukiye mu bigo ngororamuco bagahinga kijyambere

---

Source : http://igihe.com/amakuru/u-rwanda/article/nyaruguru-abaherutse-kuva-mu-bigo-ngororamuco-bashyikirijwe-ibikoresho-by

Rwatangijwe na Gashonga Tresor agamije gukora urusenda rwujuje ubuziranenge. Ni urusenda uzabone no mu maguriro yubatse izina nka Simba Supermarket na Sawa Citi.

Mu 2021 Gashonga Tresor washinze uru ruganda yakoraga mu bijyanye no guhuza abaguzi n'abahinzi.

Icyo gihe ubwo yerekezaga i Rwamagana mu Karere avukamo, yahuye n'umuhinzi wari ufite urusenda rwa piripiri rungana na toni 10 ariko rwabuze abarugura, biba igitekerezo cy'ubucuruzi, ahera ko ashinga uruganda.

Gashonga Tresor wize ibijyanye no gutunganya ibiribwa yakoze ubushakashatsi atangira gukora irusenda rwo gusuzuma, rurakundwa.

Yaje guhamagara inshuti ye, Gatsinzi Rafiki amusangiza igitekerezo cye, batangira gukorana, hashibuka uru ruganda rwa Incuti Food LTD.

Mu kiganiro na Gatsinzi Rafiki ushinzwe ibikorwa by'uru ruganda yagiranye na IGIHE, yasobanuye ko baje kwisuganya bashaka amakuru y'isoko nko kumenya insenda zikunda gukoreshwa, uburyo izihari zikorwamo, bo bihangira agashya ko gukora iz'amoko atandukanye zakundwa na bose.

Kugeza ubu bakora amoko ane y'insenda. Ntizibamo amavuta menshi ndetse zikozwe mu mwimerere wazo.

Ubwoko bumwe bw'uru rusenda ni urukoranwa n'inanasi, mu rwego rwo kugabanya ubukare bwarwo, n'abatinya ko rubarya bakabona andi mahitamo.

Gatsinzi ati 'Twumvaga abantu bavuga ko batarya urusenda kubera rubarya cyane ndetse bakabona inyinshi zikoranwa amavuta menshi bigatuma batarurya. Ni yo mpamvu twakoze urusenda rudafite amavuta, n'ururimo inanasi zitaryana cyane, gusa n'abakeneye urukarishye bakarubona.'

Yavuze ko Leta yashyigikiye ibikorwa byabo kuko yabishyuriye 50% by'ikiguzi cya servisi z'ubuziranenge, bagabanyiriza ikiguzi cyo gupimisha muri laboratwari.

Ikindi ni uko bahabwa amahugurwa ku kubahiriza amabwiriza y'ubuziranenge.

Bitabira kandi amamurikagurisha atandukanye muri bihugu nka Kenya, Tanzania ndetse n'ingendoshuri mu Bushinwa no muri Bostwana.

Kuri ubu iki kigo gifite abakozi 20 barimo 12 bahoraho n'abandi umunani ba nyakabyizi. Bafite abahinzi 50 bakorera mu turere twa Ngoma, Rwamagana na Kayonza.
Abahinzi bahabwa ibyo bakeneye byose nk'ifumbire, imiti ikenerwa, bamara kweza ikiguzi cyabyo kigakurwa ku mafaranga bari kwishyurwa.

Uru ruganda rwahaye akazi abagore barokotse Jenoside yakorewe Abatutsi mu 1994. Rukoresha abagore bangana na 60%, mu gihe abagabo ari 40%.

Mu mbogamizi bahura na zo harimo impinduka z'ikirere, imvura ikaba yabura cyangwa izuba rikaba ryinshi, bigatuma umusaruro wari witezwe mu bahinzi uba muke.

Indi ikomeye ni iy'ibiciro by'ubwikorezi biri hejuru kandi bafite abantu baba mu bihugu bya kure bakunze urusenda rwabo, ariko wabara igiciro cyo kubyohereza, wongeyeho n'ibindi byatakajwe mu kurutunganya, bikabasaba kuruhenda cyane.

Gatsinzi agira inama urubyiruko ko rugomba kubanza gushaka ubumenyi, ariko rukabanza kumenya icyo rushoboye n'icyo rushaka, rwamara guhitamo ibyo rukora rukagerageza kugira umwihariko mu bikorwa byarwo.

Incuti Food Ltd itunganya toni 60 z’urusenda ku mwaka

Incuti Food Ltd itunganya amoko atandukanye y’urusenda. Ni urusenda rukundwa na buri wese bijyanye n’ibyifuzo bye

Gatsinzi Rafiki ashinzwe ibikorwa mu ruganda rwa Incuti Food Ltd

Urusenda rwa Incuti Food Ltd ruzwiho kutagira amavuta menshi

Incuti Food Ltd imashini zitandukanye zifashishwa mu gutunganya urusenda

Urusenda rwa Incuti Food Ltd rukundwa n’abo mu bihugu bitandukanye

Trasor Gashonga ni umwe mu bari kugira uruhare mu bukangurambaga 'Empower30' bwatangijwe na Carcarbaba

---

Source : http://igihe.com/amakuru/u-rwanda/article/rutunganya-toni-60-z-urusenda-ibyihariye-ku-ruganda-incuti-food-ltd-rwashibutse

Aya marushanwa yasojwe ku wa 2 Mata 2025, yitabiriwe n'ibigo by'amashuri 44. Ishuli ryabaye irya kabiri ni College du Christ Roi de Nyanza.

Ikigo cy'ishuri cyabaye icya mbere gihabwa igikombe, na 'certificat', mu gihe itsinda ry'abanyeshuri bacyo ryitabiriye amarushanwa, buri wese yahawe mudasobwa, ibihumbi 400 Frw ariko BNR ihita iyabagurira impapuro mpeshamwenda za Leta.

Ikigo cy'ishuri cya kabiri na cyo cyahawe igikombe na 'certificat', abanyeshuri bacyo bahabwa mudasobwa kuri buri wese n'ibihumbi 200 Frw yahise agurwa impapuro mpeshamwenda za Leta.

Abarimu bafashije abanyeshuri mu rugendo rw'amarushanwa bo mu ishuri ryabaye irya mbere bahawe ibihumbi 400 Frw, mu gihe abo mu ishuri rya kabiri bahawe ibihumbi 300 Frw, yose ashorwa mu mpapuro mpeshamwenda za Leta.

Guverineri wa Banki Nkuru y'u Rwanda, Soraya Hakuziyaremye yatangaje ko aya marushanwa agamije gufasha iyi banki gusobanura neza ibyo ikora.

Ati 'Binyuze muri aya marushanwa, tuba tugamije gusobanura neza ibyo dukora ariko tukanatanga ibishoboka byose ngo basobanukirwe ibijyanye n'ubukungu n'imyanzuro ku bijyanye n'ubukungu igira ingaruka ku buzima bwawe bwa buri munsi. Twizera ko ubumenyi mu by'imari ari ubumenyi bufasha kubaka ikiragano gikomeye.'

Hakuziyaremye yavuze ko ibyo bakora ari nko kubiba imbuto y'amatsiko mu by'imari ariko banafasha urubyiruko kugira intego mu byo rukora.

Ati 'Twifuza kubakundisha iby'ubukungu n'imari tugategura Abanyarwanda bazi iby'ubukungu n'abayobozi b'ejo hazaza. Tunizera ko n'abari kurangiza uyu munsi harimo abazakorera Banki Nkuru y'u Rwanda mu gihe kizaza.'

Aya marushanwa agaragaza imyumvire y'abanyeshuri ku ruhare rwa Banki Nkuru y'u Rwanda ndetse n'ibitekerezo byagutse ku bukungu ariko akanerekana uruhare rw'abarimu mu gutegura abo barera.

Minisitiri w'Uburezi, Joseph Nsengimana yatangaje ko ibibazo abanyeshuri babajijwe bimwe byari bikomeye cyane ariko bagaragaje ubumenyi buhanitse mu kubisubiza.

Ati 'Ubu ni uburyo bumwe bwo gushishikariza abanyeshuri gukunda ibintu bitandukanye byerekeye ubukungu bw'igihugu no kubashishikariza kwiga cyane ngo bazagire uruhare mu iterambere ry'igihugu.'

Minisitiri Nsengimana yavuze ko nubwo hari amashuri atabaye aya mbere ariko bose bungutse ubumenyi ku mikorere y'ubukungu bw'igihugu.

Lauren Keza w'imyaka 18, wiga muri St Ignatius High School yavuze ko amarushanwa ya BNR amwongerera imbaraga nk'umunyeshuri wiga ibijyanye n'ubukungu.

Ati 'Byamfashije gusobanukirwa birushijeho uko BNR ikora binatuma nshaka gukomeza kwiga ubukungu no mu byiciro bikurikira kandi nizeye ko umunsi umwe nzakora muri BNR.'

Amarushanwa yatangiye ku wa 10 Gashyantare mu cyiciro cy'ibanze cyahuje ibigo by'amashuri byo mu ntara zose na ho ibyiciro bisoza (kimwe cya kane na kimwe cya kabiri) biba ku wa 12 Werurwe 2025.

St Ignatius Gigh School ni yo yabaye iya mbere

Abo muri Christ Roi de Nyanza babaye aba kabiri

Abakemurampaka babaga bungurana ibitekerezo igihe irushanwa ryabaga

Minisitiri Joseph Nsengimana yavuze ko amashuri yose yitabiriye yungutse ubumenyi

Guverineri wa BNR, Soraya Hakuziyaremye yavuze ko amarushanwa aha abakiri bato ubumenyi buzatuma bashobora gufata imyanzuro inoze mu by’ubukungu

Guverineri wa BNR, Hakuziyaremye, Guverineri Wungirije wa BNR, Dr. Justin Nsengiyumva na Minisitiri w’Uburezi, Nsengimana Joseph baganira ku marushanwa yahuje amashuri

---

Source : http://igihe.com/amakuru/u-rwanda/article/st-ignatius-high-school-yahize-andi-mashuri-mu-marushanwa-ya-bnr-mu-by-imari

Mukuralinda wari Umuvugizi Wungirije wa Guverinoma y'u Rwanda yitabye Imana ku wa 4 Mata 2025, mu bitaro byitiriwe Umwami Faisal, afite imyaka 55 y'amavuko.

Igitaramo cyo kwizihiza ubuzima bwe cyo giteganyijwe ku wa 9 Mata 2025 kuva Saa Kumi n'Imwe z'umugoroba, mu rugo rwe mu Karere ka Kicukiro.

Mukuralinda yavukiye mu Karere ka Rulindo mu 1970, gusa umuryango we wahise wimukira i Kigali, ubwo yari afite imyaka ibiri.

Uyu mugabo wabaye Umushinjacyaha ndetse akaba n'Umuvugizi w'Ubushinjacyaha, yari uzwiho gusabana na bose, kuko usibye ibikorwa by'ubutabera na politiki, yari azwi kandi mu bijyanye n'imyidagaduro, aho yabaye umuhanzi w'ikirangirire akoresha izina rya 'Alain Muku' akanagira sosiyete ifasha abahanzi izwi nka Boss Papa.

Yakundaga kandi umupira w'amaguru cyane ko yari afite n'ikipe y'abato.

Ni we wahimbye indirimbo y'Ikipe y'Igihugu Amavubi yitwa 'Tsinda batsinde' ndetse yahimbye n'izindi zakunzwe z'andi makipe.

Alain Mukuralinda yakoze imirimo itandukanye mu gihugu

Gahunda yo guherekeza Alain Mukuralinda yashyizwe hanze

---

Source : http://igihe.com/amakuru/u-rwanda/article/hatangajwe-umunsi-n-aho-alain-mukuralinda-azashyingurwa

Umukinnyi wa filime Glen Powell yinjiye ku mugaragaro mu ruganda rw'ubucuruzi bw'ibiribwa, atangiza sosiyete ye nshya yise Smash Kitchen. Uyu mukinnyi w'imyaka 36 uzwi cyane muri Top Gun: Maverick yizihije iki gikorwa mu buryo bwa Hollywood, atumira ibyamamare n'inshuti ze mu birori byabereye ku busitani bwihariye i Los Angeles, ku wa Gatanu, tariki 4 Mata.

Ibirori byitabiriwe n'ibyamamare byinshi n'inshuti za hafi bashyigikiye Glen hamwe n'abandi bashinze sosiyete barimo Sean Kane na Sameer Mehta, ubwo batangazaga ku mugaragaro ibicuruzwa bya mbere bya Smash Kitchen—ibiribwa by'ibanze byo mu gikoni bifite isuku kandi byujuje ubuziranenge. Mu bitabiriye harimo ibyamamare nka Leonardo DiCaprio, Josh Duhamel n'umugore we Audra Mari, Aaron Paul n'umugore we Lauren, Anthony Ramos, Angela Kinsey, Dylan Sprouse na Barbara Palvin, Ashley Greene, Sasha Pieterse, Katherine McNamara, Jake Shane, n'abandi benshi. Ababyeyi ba Glen, Glen Sr. na Cyndy Powell, na bo bari bahari bishimiye umusaruro w'umuhungu wabo.

Smash Kitchen ni bwo bwa mbere Glen Powell yinjira mu bucuruzi bwo kugurisha ibicuruzwa by'abaguzi, aho yifuza guhindura isura y'isoko abinyujije mu gutanga ibiribwa bifite ubuziranenge, ku giciro gito, bitarimo isukari y'ibinyampeke (high fructose corn syrup), ibirungo by'ubukorano, amabara y'inyongera, cyangwa ibindi birinda bikunze gukoreshwa mu bicuruzwa. Muri iki cyiciro cya mbere, hariho ibirungo bisanzwe nk'agashya (ketchup), inyongeramusaruro y'umuhondo (yellow mustard), mayonnaise, na BBQ sauce, hakiyongeraho n'ibindi bifite uburyo bushya nka Organic Hot Honey Ketchup, Organic Spicy Mayonnaise, na Organic Hot Honey BBQ Sauce.

Ibicuruzwa byose biri munsi ya $5, bikaba bigamije kwegereza abaturage ibisukuye kandi bifite ubuziranenge ku giciro gito. Ubu, ibicuruzwa bya Smash Kitchen biboneka mu maduka ya Walmart yose mu gihugu ndetse no kuri Walmart.com.

Ibi byose bibaye nyuma y'icyumweru gikomeye kuri Glen, aho yari i Las Vegas muri CinemaCon, ashishikariza abafana kureba filime ye nshya yitwa The Running Man. Muri ibyo birori, yahawe n'igihembo cy'icyubahiro cya Star of the Year Award mu birori bya CinemaCon Big Screen Achievement Awards.

Ubu ibicuruzwa bya Smash Kitchen byageze ku isoko kandi filime nshya iri mu nzira, Glen Powell yerekanye ko atari umunyamwuga mu gukina filime gusa—ahubwo ni umucuruzi w'indashyikirwa ufite uburyo n'impano bitangaje.

 

Source : https://kasukumedia.com/glen-powell-yatangije-ku-mugaragaro-smash-kitchen-mu-birori-bikomeye-byabereye-i-los-angeles/

Waruziko umutima w'umuntu utera inshuro zirenga 100,000 ku munsi? Ibi bivuze ko buri munsi, iyi mashini y'ingenzi mu mubiri wacu ikora akazi gakomeye, gashobora kugereranywa n'imashini idahagarara gukora ni nk'uruganda rucana amanywa n'ijoro!

Umutima ni igice cy'ingenzi mu mubiri kigizwe n'imikaya ikomeye cyane, kikarangwa n'akazi gakomeye ko gutemberaza amaraso mu bice byose by'umubiri.

Ibi bikorwa byose biba nta kuruhuka, ndetse mu gihe turyamye, umutima uba ugikora kugira ngo ibice byose by'umubiri bikomeze kubona umwuka mwiza wa oxygen n'ibindi bikenewe.

Iyo dutekereje ku nshuro umutima utera ku munota hagati y'iminota 60( ubwo ni isaha ) na 100( ubwo ni isaha n'iminota 40 ) ku bantu bakuru, ibyo bigatanga igiteranyo cy'inshuro ziri hagati ya 86,000 na 144,000 ku munsi, bitewe n'imiterere y'umubiri n'uko umuntu ameze.

Iyo umuntu akora siporo cyangwa akagira igihangayiko, inshuro z'umutima ziriyongera, bigatuma urushaho gukora cyane.

Umutima w'umuntu ushobora gutera ibinyuranye bitewe n'ibintu byinshi: imyitozo ngororamubiri, ibyiyumvo (nko kugira ubwoba, umunezero, n'amarangamutima akomeye), kurya ibirimo intungamubiri, ndetse n'imiti runaka. Ibi byose bigira uruhare mu mikorere y'uyu mwanya w'ingenzi.

Kurinda umutima bisaba kugira imibereho myiza, kwirinda ibiribwa birimo ibinure byinshi, kunywa amazi ahagije, gukora imyitozo ngororamubiri buri gihe, no kwirinda itabi. Kubera ko umutima ari nk'imashini itajya iruhuka, kuwufata neza ni inshingano ya buri wese.

Rero ubutaha wumva umutima wawe utera cyane, ujye uwihanganira! Kuko ni igitangaza cy'ubuzima gikora nta mpamvu yo kwishyuzwa, kigatuma uguma uriho buri segonda.

Source : https://kasukumedia.com/waruziko-umutima-wumuntu-utera-inshuro-zirenga-100000-ku-munsi/

Ubuyobozi bw'abapolisi ba Kenya buri mu butumwa bw'Umuryango Mpuzamahanga w'Ubufasha mu Mutekano (MSS — Multinational Security Support) bwamaganye amakuru yacicikanye avuga ko hari abapolisi ba Kenya benshi bakomerekeye bikomeye bari mu kazi i Haiti.

Mu kiganiro yahaye televiziyo ya NTV ku mugoroba wo ku wa Gatandatu, Umuvugizi wa MSS, Jack Ombaka, yahakanye ibivugwa mu itangazamakuru ko imitwe yitwaje intwaro iri kugirira nabi abapolisi ba Kenya, nyuma y'uko hagaragaye amakuru y'undi mupolisi wa Kenya wapfuye ubwo yari mu kazi i Haiti.

Ombaka yavuze ko hari abantu bari gukwirakwiza ibihuha ku mikorere y'abapolisi ba Kenya bari i Haiti, ndetse bakanabasabira ibyago bari mu butumwa—ibintu yaburiye ko bishobora kugira ingaruka mbi ku butumwa bari bashinzwe.

'Ibyo bavuga by'uko hari abakomeretse bikomeye ni inzozi zabo, kandi biteye agahinda kubona hari abantu bifuriza abapolisi bacu gukomereka bikomeye. Ukuri ni uko ntawe dukomeretse bikomeye,' Ombaka yabisobanuye atyo.

Yavuze ko igihe cyose hari umupolisi ukomerekejwe muri ubwo butumwa bwo gushyigikira amahoro, ahita yoherezwa kwivuriza muri Repubulika ya Dominikani, anahakana ibivugwa ko abo bakomeretse baba bagize igihombo gikomeye ku butumwa.

Yongeyeho ko abapolisi bose bakomeretse muri Haiti nyuma y'igitero giherutse kugabwe n'imitwe yitwaje intwaro, bamaze gukira ndetse basubijwe ku cyicaro cyabo mu kazi.

Ariko kandi, ubwo yabazwaga umubare nyawo w'abapolisi bakomeretse, Ombaka yavuze ko ari bake cyane, yemeza ko batarenze batatu, ariko ntiyatangaza umubare nyir'izina.

'Umubare wabo nturenga batatu. Irya tsinda ryabo batatu ryaherukaga, ubu ryageze hano kandi ryasubiye ku kazi, bivuze ko kugeza ubu nta bakomeretse dufite,' yakomeje.

Ku wa Mbere w'iki cyumweru, ikigo cy'amakuru cya Reuters cyatangaje inkuru yavugaga ko hari umupolisi wa Kenya uri mu butumwa i Haiti wakomeretse bikomeye mu mutwe nyuma yo kuraswa ubwo bahuraga n'imitwe yitwaje intwaro mu mirwano ikomeye yabaye mu cyumweru gishize.

Ibyo byatangajwe n'abapolisi batatu batifuje ko amazina yabo atangazwa, bavuga ko uwo mupolisi yarashwe mu mutwe isasu rinjiye mu gapfukamunwa ke (casque), naho undi akarasa mu gutwi isasu rinjiye mu modoka y'icyuma (armored vehicle).

Nyuma y'uko hakwirakwiye amashusho y'umugabo bivugwa ko ari umupolisi wa Kenya witwa Benedict Kabiru wabuze, uri mu gace karimo imitwe yitwaje intwaro, MSS yamaganye ayo makuru, ivuga ko ugaragara muri ayo mashusho atari uwo mupolisi.

MSS yavuze ko ayo mashusho ari igice cy'ubukangurambaga bw'imitwe yitwaje intwaro muri Haiti bugamije guharabika izina ry'iyo gahunda yo kugarura umutekano.

'Ikintu kimwe kizwi neza i Haiti ni uko imitwe myinshi yitwaje intwaro iharanira kubaho ibinyujije mu itangazamakuru rishingiye ku buhimbano. Ayo mashusho yakwirakwiye, cyane cyane muri ibi bihe bya tekinoloji ya AI, si ay'umupolisi Benedict,' Ombaka yongeyeho.

Kugeza muri Mata 2025, abapolisi ba Kenya bagera kuri 750 bari bamaze koherezwa muri Haiti mu butumwa bushyigikiwe n'Umuryango w'Abibumbye, mu rwego rwa MSS. Kenya yiyemeje kohereza abagera ku 1,000 muri Haiti mu rwego rwo gufasha kugarura umutekano muri icyo gihugu cyo mu Karere ka Karayibe.

Source : https://kasukumedia.com/ubuyobozi-bwa-mss-bwa-kenya-bwanyomoje-amakuru-ya-reuters-ku-bikomere-bikomeye-ku-bapolisi-bari-mu-butumwa-i-haiti/

Mu gitero gikomeye cy'indege cyatangiye ku wa Gatanu, indege z'intambara za Isiraheli zateye ibisasu inzu y'amagorofa atatu mu gace ka Al-Manara ka Khan Younis, mu majyepfo ya Gaza, ihitana byibuze Abanyapalestine 17 abandi benshi barakomereka. Amakuru aturuka mu bitaro yemeje ko abagize umuryango umwe bari mu bapfuye.

Ibi byabaye mu gihe ingabo za Isiraheli zakomeje kugaba ibitero ku butaka mu majyaruguru ya Gaza no kwagura ibikorwa bya gisirikare mu karere kose.

Umubare w'abapfa ukomeje kwiyongera, aho ku wa Kane honyine Abanyapalestine barenga 100 bishwe, nk'uko bitangazwa n'amakuru y'aho.

Umuryango w'Abibumbye watangaje ko abaturage ba Gaza bagera ku 280,000 bamaze kwimurwa n'intambara, mu gihe Isiraheli yashyizeho ukwezi kumwe guhagarika ibiribwa, lisansi n'imfashanyo, bikaba byarateje inzara n'ubukene bukabije. Imiryango iharanira uburenganzira bwa muntu ivuga ko ibyo ari icyaha cy'intambara.

Mu gihe intambara ikomeje kwiyongera, umutwe wa Hamas watangaje ko ushobora kurekura ingwate 59 zisigaye mu gihe Isiraheli yemeye guhagarika intambara burundu, ikava muri Gaza ndetse ikanarekura imfungwa nyinshi z'Abanyapalestine.

Ku wa Gatanu, imyigaragambyo yahitanye abantu 16 mu gihe inzu y'umuryango umwe yasenywe burundu. Abavandimwe barimo Ismail Al-Aqqad barwaniye kugarura ibisigazwa by'abo bakundaga, bacitsemo ibice.

Isiraheli nayo yatangaje ko yishe Hassan Farhat, umuyobozi mukuru wa Hamas, i Libani, imushinja kuba ari inyuma y'ibitero birimo n'icyo muri Gashyantare cyahitanye umusirikare wabo.

Minisiteri y'ubuzima ya Gaza itangaza ko kuva imirwano yatangira mu Kwakira 2023, Abanyapalestine barenga 50,000 bamaze kuhasiga ubuzima, mu gihe Isiraheli ivuga ko muri bo harimo abarwanyi 20,000 ba Hamas, nubwo nta bimenyetso bifatika bitangwa. Amakimbirane akomeje kwimura abaturage no gusenya ibikorwaremezo mu karere.

Source : https://kasukumedia.com/ibitero-bya-isiraheli-byahitanye-abanyapalestine-17-mu-gace-ka-khan-younis-hamas-isaba-ihagarikwa-ryintambara/

Perezida wa Repubulika yunze Ubumwe ya Tanzaniya, Nyakubahwa Dr. Samia Suluhu Hassan, yongeye gushimangira akamaro k'inkiko cyane cyane iz'ibanze, asaba ko zidakwiye kuzitirwa n'amategeko y'amasigarakicaro mu gutanga ubutabera, kugira ngo bigabanye inzitizi mu kubona ubutabera no gukomeza kubaka icyizere cy'abaturage ko inkiko ari zo ntwaro nyamukuru zo kubarengera.

Ibi Perezida Dr. Samia yabigarutseho kuri uyu wa Gatandatu tariki ya 6 Mata 2025, ubwo yatangizaga ku mugaragaro inyubako nshya y'Ibiro Bikuru by'Inkiko za Tanzaniya, biherereye mu gace ka Tambukareli mu murwa mukuru wa Dodoma.

Iyo nyubako yatwaye miliyari 129.7 z'amashilingi ya Tanzaniya, Perezida Dr. Samia yasabye ko yajya yitabwaho, igakoreshwa neza, kandi serivisi zitangirwamo zikaba nziza ku rwego rwo guhuza n'ishoramari rikomeye ryashyizwemo.

Uretse iyo nyubako y'Inkiko, Perezida Dr. Samia yanatangije ku mugaragaro indi mishinga ibiri ikomeye irimo inyubako ya etaje esheshatu ya Komisiyo y'Abakozi b'Inkiko, ndetse n'inzu zigezweho 48 zo guturamo zatanzwe ku bacamanza bo mu murwa wa Dodoma.

Mu rwego rwo gukomeza guharanira ko ubutabera bugera kuri bose kandi ku gihe, Perezida Dr. Samia yagaragaje ko ari ngombwa ko Urukiko Rukuru rwa Tanzaniya rukomeza gushora imari mu ikoranabuhanga (ICT/TEHAMA), kugira ngo serivisi z'inkiko zijyanye n'igihe, zitangwe mu buryo bwihuse kandi bunogeye abaturage.

Yavuze ko ikoranabuhanga rizafasha cyane mu kwihutisha iburanisha, kurushaho gutanga ubutabera kuri bose, no guhuza ibikorwa by'inkiko n'iterambere ry'isi.

Perezida Dr. Samia kandi yagaragaje ko inkiko zihariye zifite inshingano mu bibazo by'imitungo, imiryango, n'ubucuruzi zigomba gutezwa imbere ku buryo zitanga serivisi zinoze, zifasha mu iterambere ry'amategeko ajyanye n'ibyo byiciro.

Mu gusoza ijambo rye, Perezida Dr. Samia yashimiye Perezida w'Urukiko Rukuru rwa Tanzaniya, Prof. Ibrahim Juma, kubera umurava, ubunyamwuga n'ubwitange agaragaza mu kuyobora inkiko no guteza imbere impinduka nziza zagiye zigaragara mu mikorere yazo.

Ku nshuro ya mbere mu mateka y'imyaka 104 y'inkiko muri Tanzaniya, izo nkiko zibonye ibiro bikuru bifite agaciro n'icyubahiro bikwiye. Ibi kandi bikaba bifasha ko inzego zose eshatu z'ubutegetsi bw'igihugu — ubutegetsi bukuru, inteko ishinga amategeko n'ubucamanza — ziba zikorera hamwe mu murwa mukuru, Dodoma, bityo bigafasha imiyoborere myiza ishingiye ku bufatanye bw'inzego.

 

Source : https://kasukumedia.com/perezida-samia-yatangije-ku-mugaragaro-inyubako-nshya-yibiro-bikuru-byinkiko-muri-tanzaniya/

Ikipe ya Chelsea yatangaje ko myugariro w'Ubufaransa, Wesley Fofana, azaba ari hanze y'ikibuga kugeza umwaka w'imikino urangiye, nyuma yo kongera kugira imvune ikomeye ya hamstring yatumye ajyanwa kubagwa.

Ni inkuru ibabaje ku bakunzi ba Chelsea ndetse n'umutoza Enzo Maresca, bitewe n'uruhare runini Fofana yari yitezweho mu mpera z'iyi shampiyona.

Uyu musore w'imyaka 23 y'amavuko, umaze igihe kitarenze imyaka ibiri mu ikipe ya Chelsea, yakunze guhura n'ibibazo by'imvune kuva yagera ku kibuga cya Stamford Bridge.

Muri Nyakanga 2023, Fofana yari amaze kubagwa ivi (knee injury). Iyi mvune nshya ya hamstring yabaye nko kongeraho ku bibazo asanganywe, ibintu bituma ahura n'igihe kirekire cyo kutagaragara mu kibuga.

Itangazo rya Chelsea ryemeje ko Fofana yabazwe kuri uyu wa Gatandatu, ndetse ibikorwa by'ubuvuzi byagenze neza, ariko ntazaboneka mu mikino isigaye ya shampiyona.

Nubwo atazakina, ikipe ivuga ko izakomeza kumuba hafi mu rugendo rwo gukira neza no kongera gusubira ku rwego rwo hejuru.

Uyu mukinnyi wahoze akinira Leicester City, yageze muri Chelsea mu mpeshyi ya 2022 aguzwe amafaranga menshi cyane, ariko kugeza ubu ibibazo by'imvune bimaze kumubuza kugaragaza impano ye uko bikwiye.

Benshi mu bafana ba Chelsea bari bategereje kumubona akina hamwe na Benoît Badiashile cyangwa Axel Disasi, ariko birasa n'aho bazongera gutegereza kugeza umwaka utaha.

Gusa ku rundi ruhande, iyi mvune iha andi mahirwe abakinnyi nka Levi Colwill cyangwa Trevoh Chalobah kwigaragaza mu mikino ya nyuma y'uyu mwaka.

Chelsea iracyarwana no guhatanira umwanya mwiza muri Premier League no gushaka uko yasoza shampiyona ifite icyizere cyo gusubira mu marushanwa yo ku rwego rwo hejuru mu mwaka utaha. Gusa kubura Fofana ni igihombo gikomeye, ndetse bikomeza gutuma ikibazo cy'imvune mu ikipe gikomeza kuba umutwaro kuri Enzo Maresca.

Source : https://kasukumedia.com/wesley-fofana-yongeye-guhura-nakaga-gakomeye-kimvune-azasiba-imikino-yose-isigaye-yuyu-mwaka-wimikino/