Blog

Iyi nama yabereye ku cyicaro cya RDB kuri uyu wa Gatatu, tariki ya 2 Nzeri 2026. Yibanze ku kurebera hamwe ibikorwa by'uru rwego mu gukurura no korohereza ishoramari, guteza imbere ibyoherezwa mu mahanga, ubukerarugendo ndetse no kongera ubushobozi bw'u Rwanda mu guhangana ku rwego mpuzamahanga.

Mu biganiro byabaye, Perezida Kagame yashimangiye ko hakenewe gukomeza kwita ku ishyirwa mu bikorwa ry'ibikorwa bigamije kuzamura ubukungu bw'igihugu, asaba ko habaho gukorera ku ntego, kubazwa inshingano no gukomeza kunoza imikorere hagamijwe kohereza ibikorwa by'ubucuruzi n'abashoramari.

Inama y'Ubutegetsi ya RDB iyobowe na Itzhak Fisher, uri ku mwanya wa Perezida wayo.

Igizwe kandi na Evelyn Kamagaju, uri ku mwanya wa Visi Perezida.

Abandi bayigize barimo Alice Nkulikiyinka, umuyobozi mukuru wa Business Professionals Network (BPN) Rwanda; Ivan Kagame, usanzwe ukora ibijyanye n'ishoramari n'imari; Liban Soleman Abdi; Dr Diane Karusisi, Umuyobozi Mukuru wa Banki ya Kigali; Eric Kacou na Kassahun Kebede.

RDB ni urwego rushinzwe ibikorwa birimo guteza imbere ishoramari, ubukerarugendo, ibyoherezwa mu mahanga no gufasha abashoramari kubona serivisi zituma bashora imari mu Rwanda.

Ni inama yitabiriwe kandi n'Umuyobozi Mukuru wa RDB, Jean Guy Afrika ndetse na Juliana Kangeli Muganza umwungirije.

Ikigo cy'Igihugu gishinzwe Ibibuga by'Indege (Rwanda Airports Company – RAC) cyatangaje ko imirimo y'ubwubatsi iri gukorwa ku muhanda uhuza Prince House na Cyamitsingi ishobora kugira ingaruka ku buryo abantu bagera ku Kibuga Mpuzamahanga cy'Indege cya Kigali.

RAC yavuze ko iyi mirimo yatangiye ku wa 31 Kanama 2026 kandi ko ikomeje, aho igice kimwe cy'umuhanda cyafunzwe kugira ngo imirimo ikorwe. Ibi bishobora gutuma habaho ubwinshi bw'ibinyabiziga ku muhanda ukoreshwa cyane ugana ku kibuga, cyane cyane mu masaha y'umuvundo.

Mu itangazo ryayo, RAC yasabye abakoresha ikibuga cy'indege kuzinduka bakajya ku rugendo kare kugira ngo bagire umwanya uhagije wo kugera ku kibuga, gukora igenzura ry'ibyangombwa, umutekano no kwinjira mu ndege nta gihunga.

Abagenzi kandi basabwe gukoresha indi mihanda ibashobokeye mu gihe bagana ku kibuga, kongera igihe bagenera urugendo rwo kujyana cyangwa kwakira abagenzi, ndetse no gukurikiza amabwiriza atangwa n'abashinzwe kuyobora urujya n'uruza rw'ibinyabiziga aho imirimo iri gukorerwa.

Iyi gahunda ijyanye n'imirimo yo kwagura no kuvugurura umuhanda wa Prince House-Giporoso-Masaka, yatangiye ku wa 30 Kanama 2026, ikaba iteganyijwe kumara amezi 30.

Uyu muhanda uzavugururwa hakorwa ibikorwa birimo kubaka ibiraro binyura hejuru y'indi mihanda, inzira zinyura munsi y'imihanda, kuvugurura amasangano, gushyiramo kaburimbo, kubaka imiyoboro y'amazi no gushyiraho amatara yo ku muhanda.

Umuhanda wa Prince House-Giporoso-Masaka ufite uburebure bwa kilometero 10,3, ukazahabwa ibice bine by'ibinyabiziga, ndetse hakazongerwamo igice cyo hejuru gifite uburebure bwa kilometero 1,3 mu rwego rwo kugabanya umuvundo ukunze kuwugaragaraho.

Mu rwego rwo kugabanya ingaruka z'iyi mirimo ku bagenzi, inzego zirimo Umujyi wa Kigali, RTDA na Polisi y'u Rwanda zateganyije imihanda y'ingoboka ishobora gukoreshwa inyura cyangwa ihuza uduce nka Giporoso, Sonatube, Kimironko, Zindiro, Ndera, Gasogi, Kabuga, Kicukiro na Busanza.

RAC yasabye abakoresha ikibuga cy'indege gukomeza gukurikira amabwiriza azajya atangwa mu gihe imirimo ikomeje, kuko uburyo bwo kuyobora ibinyabiziga bushobora guhinduka bitewe n'aho ibikorwa by'ubwubatsi bigeze.

Ni ikizamini cyatangiye gusubirwamo kuri uyu wa 2-4 Nzeri 2026 nyuma y'umwanzuro wa Minisiteri y'Uburezi watangajwe ku wa 30 Kanama 2026 hamaze gukorwa iperereza ku banyeshuri bakoreye ikizamini mu byumba 254.

Ni iperereza ryagaragaje ko abanyeshuri 7.188 bakoze ikizamini cya Leta gisoza amashuri abanza cy'umwaka wa 2025/26 bagomba kugisubiramo nyuma yo gukekwaho gukopera ibizamini.

Abana baganiriye na RBA bavuze ko gusubiramo iki kizamini babifata nk'amahirwe yatanzwe aho kugira ngo basibizwe.

Umwe yagize ati 'Kuba bagaruye ikizamini kugira ngo batadusibiza ni bwo bwa mbere njye nari mbyumvise bibayeho. Twabyakiriye neza umuntu wabiteguje turamushimira kuko atadusibije. Njye nta bwoba mbifite kuko nsanzwe ndi umuhanga nabaga uwa mbere.'

Undi ati 'Ubu nabanje kwiga Imibare n'Ikinyarwanda kuko ari byo duheraho. Niteguye neza kuko nari nabanje kureba ibindi bizamini uburyo biba biteye, ndumva nta kibazo mfite. Ndashimira Minisiteri y'Uburezi ko itadusibije.'

Ababyeyi b'aba bana na bo bagaragaje ko basanga icyemezo cyafashwe ari cyo cyari gikwiriye.

Iyamuremye Jean Bosco ati 'Tumaze kumva ko bahawe amahirwe njye nk'umubyeyi nabishimiye Imana kandi nshimira na Leta y'ubumwe bw'Abanyarwanda yahaye aba bana amahirwe kugira ngo badacikanwa. Ababakopeje rwose bakwiye ibihano kuko bari barimo bahemukira abana.'

Inzobere mu burezi, Dr. Sebaganwa Alphonse, yavuze ko gukopera ikizamini bigira ingaruka ku hazaza mu burezi bw'umwana ku buryo bikwiye kurwanywa mu buryo bugaragara.

Ati 'Bamwe mu bantu bakuru bafashije abana gukopera bituma babatakariza icyizere kuko baba babonye ko bashobora kubashyira mu kaga. Umwana ubwe na we ntiyigirira icyizere cy'uko hari icyo ashoboye gukora.'

'Ashobora kandi kujya atinya ibizamini kuko niba yafashwe akopera ikizamini ubu, icy'ubutaha kizaza umutima ugahagarare agikore nabi, avuga ko ibyabamubayeho ubushize bishobora kongera kumubaho.'

Uretse abana batangiye gusubiramo ikizamini bya Leta nk'igihano, Minisiteri y'Uburezi igaragaza ko abarimu n'abandi babigize uruhare mu kubakopeza na bo bagomba guhanwa hakurikijwe amategeko abigenga ndetse hari abatangiye gukurikiranwa.

Mu butumwa Inteko y'umuco yacishije ku mbuga nkoranyambaga ku wa 1 Nzeri 2026 yashyizeho amashusho y'ikiganiro cya Ambasaderi Robert Masozera, ivuga ko 'Hashize imyaka itatu iki kiganiro gitanzwe n'Intebe y'Inteko Amb. Masozera, ariko ubutumwa yatanze icyo gihe buracyafite agaciro kugeza n'ubu.'

Ni ubutumwa Masozera yatanze mu kiganiro yagiranye na IGIHE mu 2022 ubwo imyambarire y'abitabiriye igitaramo cy'umuhanzi w'Umufaransa ukomoka muri Cameroun, Tayc, yakoreye mu Mujyi wa Kigali yatezaga impaka zikomeye ku mbuga nkoranyambaga.

Icyo gihe Masozera yavuze ko kutavuga rumwe ku myambarire ari ibintu bisanzwe kuko atari ibintu abantu babona kimwe. Hari abumva ko ari uburenganzira bw'umuntu kwambara uko ashatse, abandi bakumva bigomba kujyana n'umuco, gusa agaragaza ko hari ibyo bakwiye guhuriraho.

Ati 'Twumva ko hari ibyo bakwiriye kuvugaho rumwe cyane cyane ku ndangagaciro zigaragarira mu myambarire. Mu myambarire hagaragaramo indangagaciro yo kwiyubaha, kwiha agaciro, kwitwararika, kutiyandarika, kwanga umugayo. Izo ndangagaciro nubwo abantu batavuga rumwe mu myambarire yindi ariko icyo cyo twemera ko twagihuriraho.'

Yakomeje avuga ko 'Imyambarire ibangamira umuco w'u Rwanda ni myinshi ariko navuga nk'ibintu nka bitatu cyangwa bine. Icya mbere ni ya myambarire iteza cyangwa ishobora guteza uyambaye ikinegu. Icya kabiri ni ya myambarire igaragaza ubwambure bw'uyambaye ikaba yamwambika ubusa kuko mu muco w'u Rwanda, nta muntu wambara ubusa. Icya gatatu ni imyambarire idahesha nyirayo icyubahiro n'agaciro.'

Agaragaza ko abavuga ko mu muco mbere abantu basaga n'abambaye ubusa bitari ubushake ahubwo cyari ikibazo cy'amikoro.

Ati 'Buriya nubwo bigaragara ko abantu bo hambere basaga n'abambaye ubusa ariko buriya mu buryo bari bafite, mu mikoro bari bafite ntako batabaga bagize kugira ngo bikingire cya kinegu, birinde ubwambure, biheshe icyubahiro.'

'Amateka agaragaza ko hari igihe abantu babayeho bambara ubusa buriburi, nyuma bagenda bishakira ibisubizo baza kugera aho bashyiraho imyambaro bashingiye ku bimera no ku mpu. Ubwo bari bamaze kubona iyo myambaro bigoranye, ikintu cya mbere bihutiye ni uguhisha ubwambure, ahantu ha ngombwa cyane cyane igice cyo hepfo kubera bwa bushobozi bari bafite icyo gihe.'

Akomeza ati 'Aho imyambaro y'imyenda iziye, Abanyarwanda bari mu bantu bayobotse byihuse batangira kwambara bikwije. Abantu ntabwo bakwiriye kwitiranya umuco n'amateka. Ya myambarire bavuga ngo umuntu ntabwo yabaga yambaye hejuru cyangwa hasi, buriya kiriya gihe mu bushobozi bwariho, mu ngorane zari ziriho ngo umuntu abone icyo yambara, ikintu cya mbere bihutiraga kwari uguhisha ubwambure. Iyo babishobora bari no kwikwiza bakambara'

Ibi bitangajwe nyuma y'uko havutse impaka ku mbuga nkoranyambaga zaturutse ku isubizwa inyuma rya bamwe mu bakobwa bitabiriye igitaramo cy'umuhanzi Diamond Platnumz, bivugwa ko batambaye ngo bikwize.

Imyaka itanu irashize, umuraperi, umunyabigwi mu muziki Nyarwanda, umwami wa Hip Hop nk’uko yakundaga kwiyita ‘Kabaka’, Tuyishime Joshua wamamaye nka Jay Polly yitabye Imana.

Uyu muraperi wari ufashe ibendera rya rap nyarwanda yapfuye ku wa 2 Nzeri 2021, afite imyaka 33, asiga amateka akomeye mu muziki cyane cyane mu njyana ya Hip-Hop.

Ijwi rye, ubutumwa buri mu ndirimbo ze, ni byo byatumye yigarurira imitima ya benshi mu Rwanda kugera no hanze aho umuhanzi ukomoka muri Nigeria, Davido yaje mu Rwanda avuga ko umuhanzi yemera ari Jay Polly.

Ubutumwa bwiganje mu ndirimbo ze, iyo uzumvishe bwakundaga kugaruka ku guhumuriza abari mu bihe bitoroshye ababwira ko uyu munsi nubwo bitameze neza ariko ejo byakunda, yakundaga kuririmba yisanisha n’abari mu buzima bugoye nk’abana bo ku muhanda n’abandi.

Yamenyekanye cyane mu itsinda Tuff Gang yari ahuriyemo na begenzi be bari bahuje umurongo wo gutanga ubutumwa bumwe binyuze mu ndirimbo barimo Green P, Bull Dogg, Fireman na P Fla.

Yakoze indirimbo nyinshi ku giti cye zakunzwe cyane zirimo Ndacyariho, Ibyo Ubona, Umupfumu n’izindi zamufashije kuba igishyitsi muri rap nyarwanda.

Kuba yari akunzwe ntabwo byagarukiye mu magambo gusa kuko yanabiherewe ibihembo aho mu 2014, Jay Polly yegukanye irushanwa rya Primus Guma Guma Super Star ryabaga ku nshuro ya kane, intsinzi yamuzamuriye izina cyane mu muziki Nyarwanda. Yari umwe mu bahanzi bari bafite abafana benshi kandi bakurikirwaga cyane mu bitaramo.

Urupfu rwe rwashenguye cyane abakunzi b’umuziki n’abahanzi bagenzi be. Yitabye Imana nyuma yo kujyanwa mu bitaro bya Muhima ubwo yari afunzwe. Raporo y’ubuvuzi yaje kuvuga ko yapfuye azize methanol intoxication.

Imyaka itanu nyuma y’urupfu rwe, indirimbo n’amateka ya Jay Polly biracyibukwa n’abakunzi ba Hip-Hop Nyarwanda.

Mu gitondo cyo kuri uyu wa Gatatu tariki ya 2 Nzeri 2026, umuryango we urangajwe imbere n’abarimo mukuru we akaba n’umuvugizi wungirije wa Guverinoma y’u Rwanda, Uwera Jean Maurice, bazindukiye i Rusororo aho ashyinguye, bagiye kumwunamira no gushyira indabo ku mva ye.

Jay Polly yasize umurage mu muziki Nyarwanda utagarukira ku ndirimbo ze gusa, ahubwo no ku ruhare yagize mu gukomeza kuzamura Hip-Hop Nyarwanda no kuyigira imwe mu njyana zikomeye mu gihugu.

Uyu munsi, imyaka itanu irashize, ariko izina Jay Polly riracyumvikana mu mateka ya Hip-Hop Nyarwanda kandi aracyakunzwe n’abakunda Hip Hop. Yasize abana babiri b’abakobwa.

ISIMBI yaguteguriye indirimbo 10 z’ibihe byose za Jay Polly, tuzumvane tunazirebane

Amakuru avuga ko APR FC yafashe umwanzuro wo kuzajya gukina na Aigles du Congo ku munsi w’umukino ndetse ikanagenda n’indege yihariye.

Mu itangazo iyi kipe iheruka gushyira hanze, yavuze ko amakuru avuga ko izagenda muri DR Congo n’indege yihariye atari yo ndetse ko bategereje amakuru azava aho bazakinira.

Hari nyuma y’uko umunyamabanga wa APR FC akaba na Chairman w’agateganyo yemereye ISIMBI ko bazajya gukina Lubumbashi ariko ibyo kugenda n’indege yihariye atari byo.

Kuri ubu amakuru ISIMBI yamenye ni uko APR FC yafashe umwanzuro wo kuzagenda n’indege yayo yihariye ndetse ukagenda ku Cyumweru tariki ya 6 Nzeri 2026 ari nawo munsi uyu mukino uzaberaho.

Amakuru avuga ko APR FC izahaguruka mu Rwanda mu gitondo cyo ku Cyumweru, igere Lubumbashi ihita yerekeza ku kibuga, ikine umukino n’urangira ihite ifata indege igaruke mu Rwanda.

Izaba yitwaje ibyo ikenera byose yaba ibyo kurya no kunywa. APR FC yasabye ko uyu mukino utabera muri iki gihugu kubera ikibazo cya Ebola ndetse n’ikibazo cy’umutekano muke uri muri iki gihugu hakiyongeraho n’umubano utari mwiza hagati ya DR Congo n’u Rwanda ariko CAF irabyanga.

Umukino wo kwishyura bikaba biteganyijwe ko uzabera mu Rwanda tariki ya 11 Nzeri 2026.

APR FC izajya muri DR Congo n’indege yihariye

Umuvugizi wungirije wa Guverinoma y’u Rwanda, akaba n’umuvandimwe wa Jay Polly, Uwera Jean Maurice yunamiye uyu muraperi umaze imyaka itanu yitabye Imana.

Kuri uyu wa 2 Nzeri 2026, umuraperi wakunzwe na benshi, Tuyishime Joshua wamamaye nka Jay Polly amaze imyaka itanu yitabye Imana.

Uyu muraperi wapfuye ubwo yari akuwe mu igororero rya Mageregere ajyanywe ku Bitaro bya Muhima akaba ari ho yaguye, urupfu rwe rwababaje benshi.

Mukuru we aka n’umuvugizi wungirije wa Guverinoma y’u Rwanda, Uwera Jean Maurice yamwifurije gukomeza kuruhukira mu mahoro kandi avuga ko kuva yapfa Isi yahindutse.

Ati “Komeza uruhukire mu mahoro muvandi, Isi ntabwo ikimeze nk’uko yahoze kuva wagenda.”

Uwera Jean Maurice, ari kumwe n’abo mu muryango we bagiye kwibuka uyu muraperi aho ashyinguye mu irimbi rya Rusororo.

Ni igikorwa cyamaze iminota itarenze 15, buri wese agenera ubutumwa Jay Polly, basoza bashyira indabo ku mva.

Uwera Jean Maurice yunamiye Jay Polly

Bashyize indabo ku mva ya Jay Polly

Jay Polly amaze imyaka itanu yitabye Imana

Urukiko rw’Ibanze rwa Nyarugenge rwemeje ko perezida w’ishyirahamwe ry’Umupira w’Amaguru mu Rwanda, Shema Ngoga Fabrice ufunzwe akurikiranyweho icyaha cyo gutanga sheki itazigamiye no kwihesha ikintu cy’undi hakoreshejwe uburiganya afungwa iminsi 30 y’agateganyo akazaburana mu mizi afunzwe.

Shema yatawe muri yombi n’Urwego rw’Igihugu rw’Ubugenzacyaha (RIB) tariki ya 11 Kanama 2026 aho yari afungiwe kuri Sitayo ya Kicukiro.

Ku wa Gatatu tariki ya 26 Kanama 2026 nibwo Shema Ngoga Fabrice ukurikiranyweho icyaha cyo gutanga sheki itazigamiye no kwihesha ikintu cy’undi hakoreshejwe uburiganya yatangiye kuburana ku ifungwa n’ifungurwa ry’agateganyo aho atemeraga ibi byaha aregwa.

Kuri uyu wa Gatatu yariki ya 2 Nzeri 2026 ni bwo umwanzuro ku rubanza rwe ku ifunguwa n’ifungurwa ry’agateganyo rwasomwe aho Urukiko rwasanze hari impamvu zikomeye zituma akomeza gufungwa iminsi 30 kandi izi mpamvu zishobora gutuma atinya ingaruka z’icyaha akaba yatoroka ubutabera, azaburana mu mizi afunzwe.

Uko iburana ryagenze

Ku gicamunsi cyo kuri uyu wa Gatatu tariki ya 26 Kanama 2026 nibwo Shema Ngoga Fabrice ukurikiranyweho icyaha cyo gutanga sheki itazigamiye no kwihesha ikintu cy’undi hakoreshejwe uburiganya yatangiye kuburana ku ifungwa n’ifungurwa ry’agateganyo.

Shema yatawe muri yombi n’Urwego rw’Igihugu rw’Ubugenzacyaha (RIB) tariki ya 11 Kanama 2026.

Mu Rukiko rw’Ibanze rwa Nyarugenge, Ubushinjacyaha bwagaragaje ko yatanze sheki 2 zitazigamiye, ibihumbi 400, ibihumbi 200 zombi z’amadorali zogombaga kubikuzwa tariki ya 5 Kanama 2025 aho zikomoka ku masezerano ya Africa Medical Supply icuruza ibikoresho by’ubuvuzi ya Shema Ngonga Fabrice yagiranye na ABZL General Trading LLC.

Aya masezerano yari afite agaciro k’arenga miliyoni y’Amayero yasinywe ku wa 23 Mutarama 2024 agomba kwishyurwa mu minsi 60.

Ubushinjacyaha bwakomeje buvuga ko habayeho kutubahiriza amasezerano, Shema akajya abasiragiza, rimwe akajya abizeza kubishyura kugeza aho yabahaye sheki 2 zitazigamiye zavuzwe hejuru zo muri I&M Bank.

Bwakomeje buvuga ko Banki ya I&M yemeje ko izi sheki zitari zizigamiye aho kuva tariki ya 1 kugeza 10 Kanama 2025 konti ya Africa Medical Supplier yariho amadorali 1183.

Ubwo Shema Ngoga Fabrice yabazwaga mu Bugenzacyaha ngo, yemeje ko koko hagati ya tariki ya 1 na 10 Kanama 2025 ayo mafaranga atari ariho.

Shema yahakanye ibi byaha akurikiranyweho. Yemeye ko Afitanye amasezerano n’iyi Kompanyi ya ABZL General Trading LLC yo muri Leta Zunze Ubumwe z’Abarabu isanzwe itanga serivisi z’ubufasha mu by’imari (Trade Finance).

Yakomeje avuga ko ibi bicuruzwa bamuhaga byajyaga muri Congo ariko anemeza ko hari andi masezerano bagiranye mbere kandi yagenze neza.

Yavuze ko muri Gicurasi 2024 bishyuye igice cya mbere kingana n’ibihumbi 400 by’amadorali muri Konti ya ABZL iri Abu Djabi nk’uko byari biri mu masezerano.

Mu Kuboza 2024 yongeye kwishyura andi bihumbi 400 by’amadorali kuri ya konti n’ubundi ariko amafaranga aramugarukira bamubwira ko iyo konti ifite ikibazo.

Yarabibamenyesheje abasaba ko bahindura amasezerano bakamubwira indi konti bakwishyuraho amafaranga.

Aha niho haje kuba ikibazo kuri aba banyamiganane aho buri umwe yashakaga ko aye bayashyira kuri konti ye.

Yakomeje avuga ko mu gihe bari batarumvikana konti bishyuraho, yasinye sheki 2 ariko ntiyashyiraho amatariki.

Yavuze ko umwe mu banyamigabane ari na we watanze ikirego yafashe izo sheki yiyongereraho amagambo ye ko igomba kwishyurwa muri konti yo muri Amerika yitwa US Bank yongeraho n’amatariki kandi nta burenganzira yabahaye.

Ni mu gihe inyandiko ya Shema Ngonga Fabrice y’ubwishingizi ko azishyura iyi Kompanyi ya ABZL bamaze kumvikana yayibasinyiye tariki ya 8 Gicurasi 2025.

Yagaragaje ko bitumvikana ko yakwandika sheki igomba kujya i Dubai muri Leta Zunze Ubumwe z’Abarabu, ngo nyuma yisange muri Amerika.

Yavuze ko Ubushinjacyaha budashobora kugaragaza sheki iteyeho kashe ya banki igaragaza itazigamiye bakaba ari bwo bubyemeza.

Yanagaragaje ko atari ku rutonde rwa ba bihemu kimwe na Kompanyi ye

Ntabwo yemera ko yatanze sheki ebyiri zitazigamiye. Yasabye ko yafungurwa agakurikiranwa ari hanze kuko Sociyete ya Africa Medical Supply iri ku isoko ry’imari n’imigabane y’u Rwanda aho bafite abantu 28 babagiriye icyizere, ikindi akaba yaba CRB ye n’iya kompanyi nta kibazo ifite, kuba yaragiriwe icyizere cyo kuyobora FERWAFA akaba atatoroka ubutabera.

Yanavuze habaye hari ikibazo cy’amafaranga yatanga ingwate y’imitungo ye ifite agaciro k’arenga miliyari 5 Frw.

Yavuze ko banafite ubushake bwo kwishyura ndetse banatangiye kwicarana n’umunyamategeko wo ABZL General Trading yahaye uburenganzira bwo kubikurikirana aho yanemeje ko ubu amafaranga bayafite barebye kuri konti babibona ariko bakaba batemerewe kuba bayakuraho, RIB ibafashije kuko ari yo yafunze iyo konti bahita bishyura.

Umwunganizi mu mategeko wa Fabrice, yavuze ko amategeko y’u Rwanda abiteganya nta muntu wemerewe gufungwa mu gihe atabashije kwishyura amasezerano y’ubucuruzi, kandi iki kibazo kikaba kiri hagati y’amasosiyete abiri y’ubucuruzi, Africa Medical Supply ABZ General Trading zagiranye ikibazo bishingiye ku masezerano bagiranye.

Yakomeje asaba urukiko kuzasuzuma neza kuko izi sheki bavuga ko zitazigamiye kuko I&M Bank yazitesheje agaciro tariki ya 16 Nyakanga 2026 hari nyuma y’uko muri Kamena 2026 US Bank bari batwayemo iyi sheki nayo yari yazitesheje agaciro.

Ikindi hatumva ni uburyo izi sheki zateshejwe agaciro muri Kamena na Nyakanga 2026, bavuga ko bavuga ko yazisinye tariki ya 5 Kanama 2025, ibintu bavuga ko bidashoboka.

Ikindi kandi yavuze ko ubu kuri konti ya Africa Medical Supply ayo mafaranga ariho ndetse banashyize muri sisiteme uburyo bwo kwishyura ibyo bihumbi 600 by’amadorali bakaba basaba RIB ko yabafasha bakabasha gukura ayo mafaranga kuri konti bishyura.

Umucamanza yavuze ko ikibazo kiri kuri sheki ebyiri zihuje nimero ariko iy’umwimerere (originale) ikaba idafite itariki, kopi yayo ikagira itariki zishobora kuba iya 8 Kanama 2025 cyangwa iya 5 Kanama 2025.

Yasobanuye ko izi sheki ziri mu mabaruwa yashyizwe muri sisitemu y’urukiko kandi ko zashyizweho umukono na Shema.

Umushinjacyaha yavuze ko ubwo RIB yandikiraga banki iyibaza niba icyo gihe sheki zari zizigamye, banki yasubije ko zitari zizigamiye kuko konti ya Africa Medical Supply yariho Amadolari asaga 1000.

Ubushinjacyaha bwasabye ko nk’uko amategeko abiteganya atari itegeko ko ingwate Urukiko ruyishingiraho rurekura umuntu by’agateganyo.

Ikindi ngo kuba bari mu nzira zo kwishyura bo bareba ko yakoze icyaha cyo gutanga sheki itazigamiye bityo ko bamusabira gufungwa iminsi 30 y’agateganyo.

Shema Fabrice asoza kwisobanura, yasabye ko Ubushinjacyaha bwanusobanurira ukuntu sheki yatanze mu kwezi kwa 8/2025 azateshejwe agaciro muri Kamena na Nyakanga 2025.

Ati “Ubushinjacyaha budusobanurire uburyo watanga sheki mu kwa Munani, ikisanga yateshejwe agaciro na banki mu kwa 6 Gatandatu. Nta masezerano nari mfitanye na US Bank ku buryo nayishura. Ubushake bwo kwishyura burahari, mu isaha imwe byaba bikunze.'

Yavuze ko atuye mu Rwanda afite umugore ukora n’abana biga rero atatoroka ngo asige umuryango we.

Urukiko rwavuze ko umwanzuro ku ifungwa n’ifungurwa ry’agateganyo uzasomwa tariki ya 2 Nzeri 2026.

Shema Fabrice, Urukiko rwategetse ko afungwa iminsi 30 y’agateganyo