Blog

Izi mpanuro bazihawe kuri uyu wa Gatanu ubwo bari mu gikorwa cyo guhabwa miliyoni 8 n’igice nk’ubwasisi bwavuye ku nyungu yabonetse ku musaruro wabo ku nshuro ya mbere.

Aba bahinzi ba kawa bavuze ko bishimiye kuba babonye ubwasisi ku nshuro ya mbere bahiga kongera umusaruro.

Gakuru Francine yavuze ko yishimye kuba abashije kubona ishimwe ku nshuro ya mbere asaba bagenzi be kwita ku ikawa zabo.

Ati “Ku myaka yange 68 ndishimye cyane bampembye kuko nakoreye kawa zanjye ni ishimwe z’ingufu z’amaboko nakoresheje, ubu ngiye kongera imbaraga ndebe ko ubutaha bazampa amafaranga yisumbuyeho ndasaba bagenzi banjye kwita kuri kawa bakazisasira kuko ubu tubonye ko zifite akamaro.’’

Munyagisenyi Eric nawe uhinga kawe yavuze ko ashimishijwe n’ubwasisi ahawe ashimangira ko agiye kongera umusaruro ubutaha akazabona ayisumbuyeho.

Ati “maze guhabwa ibihumbi 30 500Frw kuri toni ebyiri nagemuye tubyakiriye neza isomo biduhaye ni ukurushaho gukorera kawa kugira ngo irusheho kuduteza imbere ndangira inama bagenzi banjye yo guharanira kongera umusaruro kugira ngo nabo biteze imbere.’’

Umuyobozi w’uruganda Hobe Coffe Company Ltd rumaze imyaka ibiri rukorana n’aba baturage, Sugira Jean Claude yavuze ko nubwo abahinzi baba barishyuwe ariko nk’uruganda bagomba kubashimira ku nyungu yinjiye.

Ati “aba baturage baje gufata ubwasisi bw’afaranga yaturutse ku nyungu twabonye nubwo tuba twarabishyuye mbere ariko inyungu iyo ibonetse tubabarira amafaranga 30 ku kilo ku bagemuye kawa nziza na 15 ku zisanzwe, aba bahinzi uko ari 838 twabasabye gukorera kawa zabo bakongera umusaruro mu bwinshi n’ubwiza.’’

Umuyobozi w’Akarere ka Rutsiro wungirije ushinzwe ubukungu n’iterambere, Gakuru Innocent yashimye inganda za Kawa kuko zatumye abaturage babona amafaranga abafasha mu buzima bwa buri munsi.

Ati: “Ziriya nganda zatumye kawa yitabwaho cyane, itunganywa mu buryo bunoze, mbere wasangaga kawa abahinzi bazihera, zikaboneka zidafite ubwiza zakagombye kugira ku isoko mpuzamahanga, ariko ubu usanga itunganyije neza. Ibyo bituma abaturage babona amafaranga abafasha kwiteza imbere.”

Imibare itangwa n’Ikigo cy’Igihugu gishinzwe kwita ku musaruro w’ibyoherezwa hanze mu buhinzi n’ubworozi (NAEB), igaragaza ko mu Rwanda imiryango 400 000 itunzwe n’ubuhinzi bwa kawa.

Ku mwaka nibura u Rwanda rweza toni 16 000 kugeza kuri toni 21 000. Kawa ihingwa ku buso bungana na hegitari 42,000 ziganjemo izo mu bice by’imisozi miremire.

Abahinzi bishimiye guhabwa ubwasisi ku nshuro ya mbere

Umwe muri aba bahinzi ahabwa amafaranga ye yagenewe nk’ubwasisi

Gakuru yavuze ko yishimye kuba abashije kubona ishimwe ku nshuro ya mbere asaba bagenzi gusasira kawa

Aba bahinzi bahawe ubwasisi n’uruganda basanzwe bagemurirwa

Ubushobozi buke ni yo mpamvu nyamukuru ituma aho kugira ngo itangazamakuru “ryacu” rimenyeshe Abanyafurika ibigendanye n’uko byifashe muri politiki yabo bikora ku buzima bwabo, usanga akenshi rishishikariye gutuma Afurika igaragara nk’iyo kugirirwa impuhwe. Urebeye no kuri iyi nkuru.

Icya mbere, igitekerezo cy’uko “Igihugu [u Rwanda] rwadohotse rukazahazwa n’ubwandu bushya bw’icyorezo” ni ugusobanura nabi kuko kitabasha kumva imibare ihari ndetse n’ingamba zashyizweho na Guverinoma y’u Rwanda kuva iki cyorezo cyatangira.

Ahubwo umuntu akwiye kumva ko ingamba za mbere zashyizweho icyorezo kikiza zirimo na Guma mu rugo mu gihugu hose, zahaye guverinoma umwanya wo kubaka ibikorwa remezo byari bikenewe mu guhangana n’ubwandu mbere y’uko ibikorwa byongera gufungurwa.

N’ubwo bigaragara ko hari ubwiyongere bw’ubwandu, bikwiye kureberwa mu ndorerwamo y’uko ubushobozi bwa guverinoma bwo gupima, gukurikirana abahuye n’abanduye no kwita ku barwayi bwiyongereye, ibyo byatumye u Rwanda rubasha kubona uko icyorezo gihagaze mu gihugu hose no gushyiraho ingamba zigendanye n’agace runaka zirimo na Guma mu rugo bishingiye ku mibare.

Ibitangaje ahubwo ni uko Ishami ry’Umuryango w’Abibumbye ryita ku Buzima (OMS) ndetse n’ibindi bihugu bishyira u Rwanda mu myanya y’imbere mu bihugu byashyizeho ingamba zitanga umusaruro mu guhangana n’icyorezo, none The East African iremeza ko ngo u Rwanda rwadohotse cyane, ibintu bitari ukuri ahubwo bikaba bishyigira icyemezo cy’u Bwongereza cya politiki cyo guhagarika abagenzi bavuye mu Rwanda, cyamaganywe n’u Rwanda rukavuga ko kidashingiye kuri siyansi. Niba atari siyansi rero, ubwo ni politiki.

Icya kabiri, ikinyamakuru cyo muri “Afurika” gikwiye kwibaza aho u Bwongereza bwashingiye busaba u Rwanda “gushyiraho ingamba za demokarasi n’ amategeko bijyanye n’Umuryango w’Ibihugu bivuga Ururimi rw’Icyongereza ndetse no kubahiriza uburenganzira bwa muntu.”

Igikomeye kurushaho, ubusesenguzi bushingiye ku bimenyetso bwakozwe na The East African bw’uko umubano hagati y’u Rwanda n’u Bwongereza uhagaze, bwari bukwiye kubona ko hari ikintu kitagenda ubwo Guverinoma y’u Bwongereza yitwaraga nk’aho u Rwanda ruri gushya ariko bukagumya guceceka ku birebana n’amarorerwa ya buri munsi akorerwa hakurya muri Uganda.

Ahubwo uku kuvangura mu isuzuma ry’iyubahirizwa ry’amahame ya Commonweath mu Karere byatumye hazamuka ibibazo byinshi Guverinoma y’u Bwongereza ikwiye gusubiza. Ese inyungu z’ubuyobozi bwa Uganda zihuye n’iz’u Bwongereza? Ese Uganda iri gushakira mu mahanga kwemerwa itaboneye mu gihugu imbere, ubwo yashakaga inkunga mu myifatire yayo yo kurwanya u Rwanda?

Ese ni iki Guverinoma y’u Bwongereza ishaka muri Uganda kugeza ubwo ishyigikira gahunda zibasira igihugu gifite inshingano zikomeye zo gukora zirimo kongera imibereho myiza y’abaturage ndetse no gushyiraho agahigo mu gukumira ikwirakwira rya COVID-19?

The East African ikwiye kurengera inyungu z’Akarere kacu aho gushyigikira ibi byemezo bibogamye, ikwiye kotsa igitutu u Bwongereza aho kuba u Rwanda, bugasobanura ibyemezo n’imyifatire yabwo bigaragara ko bishyigikira umuturanyi wangana.

Ibikubiye muri iyi nyandiko ni ibitekerezo bwite bya Albert Rudatsimburwa. Yatangajwe bwa mbere muri The New Times mu Cyongereza ihindurwa mu Kinyarwanda na IGIHE.

Uyu musore ubusanzwe afite umuryango ufasha abana batishoboye witwa ‘Nufashwa Yafasha’. Ni umuryango yashinze nyuma y’ubuzima yanyuzemo bugoye kugira ngo abe uwo ariwe kugeza ubu.

Ibi bikorwa byo gufasha Guterman yabitangiriye aho akomoka mu Murenge wa Ngarama, mu Karere ka Gatsibo, I Ntara y’Uburasirazuba ariko akaba afite gahunda yo kubyagurira no bindi bice by’igihugu.

Nyuma y’igihe yari amaze ashinze umuryango wo gufasha, ubu ari kubaka ishuri ry’inshuke rizajya ryigamo abana batishoboye asanzwe afasha.

Guterman yabwiye IGIHE ko ari inzozi yari amaranye iminsi none ubu zikaba zitangiye kuba impano.

Ati “Kuva kera nahoze nifuza gukora ikintu nk’iki ni inzozi nahoranye none ntangiye kuzikabya. Dushaka gukomeza guteza imbere igihugu, binyuze mu bikorwa bitandukanye kandi bitangiye gukunda.”

Bari bamaze igihe aba bana bigira ahantu hakondeshejwe bikagorana kubera ko bisaba ubundi bushobozi burenze.

Iri shuri bari kubaka rizaba rifite ibyumba bitatu,ibiro, ubwiherero n’igikoni. Avuga ko ateganya ko rizaba ishuri ryagutse mu minsi iri imbere bitewe n’ubushobozi azagenda abona.

Mu Ukwakira 2019 uyu muryango we wegukanye igikombe cya serivise nziza nk’umuryango utari uwa Leta w’ubugiraneza.

Umuryango Nufashwa Yafasha ugamije gufasha abana baturuka mu miryango itishoboye watangiye mu 2014, aho umaze gukora ibikorwa byo kuzamura imibereho y’abana batishoboye n’imiryango yabo.

Ahanini ubushobozi ufite buturuka ku gukusanya inkunga ku bwitange bw’abagiraneza batandukanye (abantu ku giti cyabo n’indi miryango itanga ubufasha).

Mu bikorwa uyu muryango wakoze kandi ugikora harimo gusubiza abana mu mashuri, aho umaze gusubiza no gufasha abana kwiga barenga 120 bahabwa ibikoresho by’ishuri ndetse no gufasha imiryango ikennye ihabwa amatungo magufi nk’ihene, muri ibi bikorwa umaze koroza imiryango ijana. Uyu muryango watangije irerero ry’abana bato ryigamo abagera kuri 60.

Abandi biga mu mashuri asanzwe 50 bagurirwa imyambaro, bakishyurirwa ishuri ndetse n’imiryango yabo igafashwa kwiteza imbere binyuze mu kuboroza no mu itsinda bashinze bise ‘Agaseke k’amahoro’ baboheramo ibiseke.

Uyu munyamakuru akaba n’umuyobozi w’uyu muryango, yumva ko ari inshingano ze gufasha umuryango mugari w’abanyarwanda. Aho agira ati “Ntibisaba ibya mirenge”.

Intara y’Iburasirazuba niyo Guterman akoreramo ibikorwa bye , ariko ateganya ko igikorwa kizagera mu gihugu hose.

Imirimo yo kubaka iri shuri irarimbanyije

Iri shuri rizigamo abana badafite ubushobozi

Guterman yatangiye guhindura ubuzima bw’abana batishoboye ahereye ku b’iwabo ku ivuko

Aba bana bafashwa na Nufashwa Yafasha bishimira igihembo uyu muryango wahawe

Guterman yatangiye guhindura ubuzima bw’abana batishoboye ahereye ku b’iwabo ku ivuko