Webrwanda Backend

Blog

  • Ibyo Urubyiruko Rugomba Kumenya kuri Ingabire Victoire #rwanda #RwOT

    1. Amavu n'amavuko ya Ingabire Victoire

    Ingabire Victoire yavutse mu 1968, avukira mu yahoze ari Komini Ngororero (ubu ni mu Karere ka Ngororero). Amashuri abanza yayatangiriye mu ishuri ribanza rya Rususa, akomereza mu cyahoze ari Komini Butamwa (ubu ni Umurenge wa Mageragere, mu Karere ka Nyarugenge), aho yimukiye akurikiye nyina, Therese Dusabe, wagiye kuyobora ikigo nderabuzima cya Butamwa kuva mu 1979.

    Icyakora, Ingabire ntiyigeze atsinda ikizamini cya Leta gisoza amashuri abanza. Ibi byatumye adakomereza amashuri yisumbuye no muri kaminuza. Nyina, kubera ubuyobozi yari afite, yamusabiye kwiga imyuga mu kigo cy'ababikira b'Abenebikira kiri mu cyahoze ari Komini Gishamvu, Butare. Aho yize ubudozi, ububoshyi n'imyuga ifasha abagore kwibeshaho.

    2. Uburyo yagiye yinjira mu mirimo no mu buzima bwo hanze

    Mu 1990, Ingabire yabonye akazi mu rwego rw'imisoro n'amahoro (Gasutamo), aho yakoreye muri Kagitumba mbere yo kwimurirwa Gisenyi mu 1992. Icyo gihe, akazi ke karazwi ko yagahawe ku buryo budasanzwe n'umuganga Emmanuel Akingeneye, wari inshuti ya nyina ndetse hari n'abavuga ko babyaranye umwana witwa Uwineza Regine.

    Muri 1993, Ingabire yahungiye mu Buholandi aho yashatse kwiga amashuri, ariko abura ibyangombwa bisabwa (impamyabumenyi) maze yiga amasomo y'imenyerezamwuga mu ibaruramari, aho yaje kubona certificat. Ni nayo mpamyabushobozi ya mbere n'iya nyuma azwiho kugeza magingo aya.

    3. Umugabo we yambuwe ubwenegihugu bw'u Buholandi

    Umugabo wa Ingabire, Lin Muyizere, yambuwe ubwenegihugu n'u Buholandi mu 2014 nyuma yo kugaragara ko yagize uruhare muri Jenoside yakorewe Abatutsi. N'ubwo yambuwe ubwenegihugu, akomeje gutera ingabo mu bitugu umugore we mu gukwirakwiza inyigisho z'ihakana rya Jenoside.

    4. Yafashije nyina, 'muganga w'urupfu', guhunga ubutabera

    Therese Dusabe, nyina wa Ingabire, yakoze Jenoside i Butamwa aho yakoreraga nk'umuforomokazi. Yicaga abagore batwite b'Abatutsikazi, agakuramo abana akabica abahanaguye ku rukuta. Ingabire yamufashije guhunga, amuha impapuro z'inzira zatumye agera mu Buholandi. Gacaca yamukatiye burundu mu 2009, ariko aracyidegembya.

    5. Se nawe yagize uruhare muri Jenoside

    Pascal Gakumba, se wa Ingabire, yari Burugumesitiri wa Komini Kibirira nyuma ya Jenoside. Mu 1996 yagombaga kwinjira mu Nteko Ishinga Amategeko, ariko iminsi itatu mbere y'irahira, yarafashwe akekwaho uruhare mu iyicwa ry'Abatutsi kuva 1990 kugera 1994. Yarekuwe mu 2002, yisubiza ubuzima mu 2004.

    6. Yayoboye imitwe y'abajenosideri

    Mu 1997, Ingabire yinjiriye RDR, umutwe washinzwe n'abahoze muri Leta yakoze Jenoside n'interahamwe. Yabaye umuyobozi wa RDR ku isi yose guhera mu 2000. Mu 2006, yayoboye FDU-Inkingi, ishyaka ryakomotse kuri RDR, rifite intego yo gukuraho ubutegetsi buriho no kugarura ingengabitekerezo ya Jenoside.

    7. Yahakanye Jenoside ku mugaragaro

    Yagarutse mu Rwanda mu 2010 ashaka kwiyamamaza mu matora y'Umukuru w'Igihugu. Ageze ku Rwibutso rwa Jenoside rwa Kigali, yabajije impamvu hatibukwa n'Abahutu, ibyo byerekanye imyumvire ye yo kuvuga ko habaye Jenoside ebyiri. Yasuye n'imva ya Dominique Mbonyumutwa, umwe mu bashinze Parmehutu — ishyaka ryatangije ivangura ryagejeje ku iyicwa ry'Abatutsi.

    8. Yarafunzwe arafungurwa abisabiye imbabazi

    Mu 2010, Ingabire yatawe muri yombi azira ibikorwa byo guteza umutekano muke, gupfobya Jenoside no gufatanya n'imitwe y'iterabwoba. Yahamijwe ibyaha mu 2012 ahanishwa imyaka 8, nyuma yiyongera igera kuri 15. Nyuma yo kwandikira Perezida Kagame amubabarira, yafunguwe ku mbabazi z'Umukuru w'Igihugu ku wa 15 Nzeri 2018.

    9. Yashinze DALFA-Umurinzi nka gisirikari cya FDU-Inkingi

    Mu mwaka wakurikiye ifungurwa rye, yashinze ishyaka rya DALFA-Umurinzi ngo ritwikire ibikorwa bya FDU-Inkingi. Nta tandukaniro hagati ya Ingabire wa RDR, wa FDU n'uwa DALFA. Buri gihe ni wa wundi uharanira gusubiza u Rwanda mu mwijima w'amacakubiri. Amategeko y'u Rwanda amubuza gushinga ishyaka kubera amateka y'ubucamanza ye.

    10. Akoresha itangazamakuru ryo mu Burengerazuba mu gukwirakwiza ibinyoma

    N'ubwo afite amateka y'ibyaha bikomeye, Ingabire akomeje guhabwa urubuga n'ibitangazamakuru mpuzamahanga nka BBC, CNN na Al Jazeera. Abanyamakuru b'Abanyaburayi bamugaragaza nk'ufunzwe azira ibitekerezo, bakirengagiza uruhare rwe mu gupfobya Jenoside. Ibi bitangazamakuru byamugize intwari, nyamara ni umunyabyaha wagiriwe imbabazi.

    Urubyiruko rw'u Rwanda rugomba kumenya ukuri ku bantu nka Ingabire Victoire. Nta mahoro, ubumwe cyangwa iterambere biva mu buhemu n'ibinyoma. Kumurwanya si ukumurwanya nk'umuntu, ahubwo ni ukurwanya ingengabitekerezo ye, kuko u Rwanda rwubakiye ku kuri, ubutabera n'ubwiyunge.

    The post Ibyo Urubyiruko Rugomba Kumenya kuri Ingabire Victoire appeared first on RUSHYASHYA.

    Source : https://rushyashya.net/ibyo-urubyiruko-rugomba-kumenya-kuri-ingabire-victoire/?utm_source=rss&utm_medium=rss&utm_campaign=ibyo-urubyiruko-rugomba-kumenya-kuri-ingabire-victoire

  • Mu mupira w'amaguru, hari igihe ibintu bibera imbere y'amaso y'abantu ariko bikagorana kubisobanura #rwanda #RwOT

    Mu mupira w'amaguru, hari igihe ibintu bibera imbere y'amaso y'abantu ariko bikagorana kubisobanura. Abenshi bati: 'Agapfa kaburiwe ni impongo.' Ni ko byagenze ku mukinnyi w'umufaransa Kylian Mbappé, wahisemo kuguma muri Paris Saint-Germain mu 2023, aho kwerekeza muri Real Madrid, ikipe yari imwifuje cyane, kandi isanzwe ifite amateka akomeye mu mupira w'i Burayi. Ariko se, ibyakurikiyeho ni ibiki?

    Real Madrid yamushakaga, amara igihe ayihakanira, birangira agumye muri PSG. Nyuma yaho gato, Real Madrid itwara igikombe cya UEFA Champions League ya 2023, igaragaza ko idakeneye umuntu umwe ngo ibe ikomeye.

    N'iyo umugani uvuga ngo 'iyo inzovu ebyiri zirwana, ibyatsi ni byo bihababarira', mu gihe abafana ba PSG bari mu gahinda, abafana ba Real bo bari mu munezero.

    Mu buryo bwatangaje benshi, mu 2024, Mbappé yemeye kuva muri PSG, ayivuyemo nyuma yo kuyimaramo imyaka myinshi y'akazi n'ibikombe bitandukanye mu gihugu imbere.

    Ni Amayobera: Mbappé yanze kujya muri Madrid itwara Champions League, PSG ayivamo na yo biba uko — Ubu se Ibrahimovic we byamugendekeye bite?

    Ariko, icyatangaje benshi kurushaho ni uko PSG imaze kumurekura, yahise na yo itwara UEFA Champions League bwa mbere mu mateka yayo. Benshi baravuze bati: 'Iyo amazi atakiri yo, n'ingona irayatera.'

    Icyo gihe havuzwe byinshi, bamwe batangira kubihuza n'amayobera, abandi bati: 'Mbappé yaba ari umuvumo kuri Champions League?'

    Ariko iby'umufaransa Mbappé ntibyari bihagije gusa, kuko hari n'ubundi buhamya bukomeye ku mukinnyi Zlatan Ibrahimović. Uyu mugabo wakiniye amakipe akomeye nka PSG, AC Milan, Inter Milan, Juventus, FC Barcelona, Manchester United na LA Galaxy, ntiyigeze na rimwe atwara Champions League, nubwo yari umwe mu banyabigwi batinyitse ku isi.

    Ese byari umwaku, amahitamo mabi, cyangwa hari n'ikindi kirenze? Abemera imbaraga zitagaragara bo bati: 'Umwaku uragwira, iyo utagusamiye ku ishyiga, ugusamira ku nkangara.'

    Mu mupira w'amaguru, hari igihe ibintu bibera imbere y'amaso y'abantu ariko bikagorana kubisobanura

    Ibrahimović yakundaga kwigamba ko ari 'Imana y'umupira w'amaguru' ariko iyo bigeze kuri Champions League, yagiye anyurwaho n'andi makipe atandukanye, rimwe na rimwe ayavuyemo akayirebera ku ruhande itwarwa n'andi makipe yari agiye ayasize.

    Uko biri kose, ibyo aba bakinnyi babiri bahuriyeho ni ukugira impano idasanzwe, amateka akomeye, ariko bagakomeza guhura n'udushya tudashira.

    Ibyabo bikaba byaratumye bamwe batangira kubihuza n'ibitangaza, cyangwa bakavuga ko harimo iby'isi itagaragarira bose.

    Biracyari amayobera. Ariko nk'uko umugani nyarwanda ubivuga: 'Niyo inzoka yakuruma, urwiri uruhora ucyeka.' Mbappé na Ibrahimović bazahora bibukwa, ariko bazanahora bibazwaho.

    Source : https://kasukumedia.com/mu-mupira-wamaguru-hari-igihe-ibintu-bibera-imbere-yamaso-yabantu-ariko-bikagorana-kubisobanura/

  • Kamonyi-Rugalika: Ni mwe bagenzacyaha ba mbere, mudufashe gutanga ubutabera-Daniel Nteziryayo/RIB #rwanda #RwOT

    Mu nteko y'abaturage yo kuri uyu wa 03 Kamena 2025 yabereye mu Kagari ka Masaka, Umurenge wa Rugalika ho mu Karere ka Kamonyi, Umuyobozi w'Urwego rw'Ubugenzacyaha-RIB Sitasiyo ya Rukoma, Daniel Nteziryayo yasabye abaturage gufasha urwego akorera gutanga ubutabera, abasaba kudaceceka igihe bafite amakuru. Yababwiye kandi ko ibyaha bibera mu muryango biwangiza kandi ko bisenya Igihugu. Kuba hari abafatwa bakekwaho gukora ibyaha bakarekurwa, yababwiye ko ufashwe wese bitavuze ko afungwa ariko ko hari n'abarekurwa kuko abafite amakuru banze kuyatanga.

    Daniel Nteziryayo, yabwiye Abanyamasaka ati' Abagenzacyaha ba mbere ni mwebwe. Ibintu byose twe dukora duhera kuri mwe, amakuru muduha niyo adufasha'. Yakomeje asaba buri wese kugira uruhare mu gukumira no kurwanya ibyaha, gutanga amakuru neza kandi ku gihe ku bakora ibyaha ndetse n'aho bikorerwa.

    Abaturage mu nteko yabo ku biro by'Akagari ka Masaka/Rugalika.

    Yagarutse kuri bimwe mu byaha bikunze gukorwa, biteza amakimbirane ndetse bikanasenya Umuryango. Muri ibyo harimo; Guhoza ku nkeke, Gukubita no Gukomeretsa hagati y'abashyingiranywe, Gusambanya Abana ndetse n'ibindi byaha usanga ahanini bishingiye ku gukoresha nabi umutungo w'urugo, aho usanga umwe mu babana atamenya uko umutungo ukoreshwa.

    Abitabiriye iyi nteko y'Abaturage, yababwiye ko byinshi mu byaha bikorerwa mu muryango usanga ahanini n'ubundi bifite inkomoko mu muryango kuko ngo niba umuntu yaravukiye mu muryango urimo amakimbirane, asanga intonganya hagati ya Se na Nyina, abona barwana cyangwa se bakora ibindi bibi, akenshi ngo uwo mwana ukuze atyo muri ubwo buzima azamukana ibyo yabonye kurusha ibyo yabwiwe.

    Aha niho yahereye asaba by'umwihariko Ababyeyi n'abarera abana kubera urugero rwiza abo babyara n'abo barera kuko ibyo bakora abana babireba ariyo masomo akomeye bakurana kurusha amagambo bababwira.

    Daniel Nteziryayo/RIB

    Yagize ati' Uwiba ahetse aba yigisha uwo mu mugongo. Iyo urebye, usanga abantu benshi bakora ibyaha nk'ibyo byo mu rugo bifite aho biri gukomoka. Aho usanga ari abana bakuriye mu makimbirane'. Yakomeje ababwira ko nta rirarenga, ko hakiri amahirwe yo guhinduka buri wese akamenya ngo ibintu ari gukorera umugore we, Umugabo we abana barabibona. Ati' Ni musigeho, muri gusenya umuryango, murimo kutwicira umuryango'.

    Yababwiye ko icyaha ari icyaha, ko nta cyiza na kimwe kiva mu gukora ibyaha. Ati ' Icyaha ni kibi, icyaha gisenya Umuryango, Icyaha kigira ingaruka mbi ku muryango Nyarwanda. Ni mureke tureke ibyaha turi bakuru dusige Umuryango muzima uzubaka Igihugu cyacu. Ni muhaguruke dufatanye turwanye ibyo bintu by'amakimbirane yo mu rugo, ni umwanda'.

    Yashishikarije ababana gufata umwanya wo kuganira kuko ari kimwe mu bifasha mu gukemura byinshi mu bibazo umuryango uhura nabyo. Yabibukije kandi ko byinshi mu bibazo usanga mu ngo bifatiye ku kuba abantu bataganira, batavugana nyamara babana.

    Yabasabye kandi ati' Ni mudufashe muduhe amakuru kuko uko turi twese dushyize hamwe nta munyabyaha watujyamo cyangwa ngo akore icyaha agende agaruke agume atyo kandi tumuzi neza, tuzi ibyo yakoze'.

    Daniel Nteziryayo, mu bindi yasabye Abanyamasaka ni ukuzirikana ko Igihugu gishingiye ku muryango. Yababwiye ko ni bagiraa Umuryango muzima, Umuryango uzira intonganya, uzira amatiku n'amacakubiri ayo ariyo yose n'Igihugu kizaba kizima. Ati' Ni mudufashe tugire umuryango muzima utarangwamo icyaha'.

    Nkurunziza Jean de Dieu, Gitifu wa Rugalika yasabye aba baturage ayobora kwitandukanya n'abakora ibyaha n'ibisa nabyo, kwegera ubuyobozi bagatanga amakuru y'ababikora n'aho bikorerwa ariko kandi no kumenya abinjira mu Isibo batuyemo kuko ngo bibabaje kuba abantu baza bakaba ahantu ntawe ubazi.

    Munyaneza Théogène

    Source : https://www.intyoza.com/2025/06/04/kamonyi-rugalika-ni-mwe-bagenzacyaha-ba-mbere-mudufashe-gutanga-ubutabera-daniel-nteziryayo-rib/

  • Uko Abanyarwanda bazungukira ku isoko rya carbone rihanzwe amaso – #rwanda #RwOT

    Binyuze mu isoko rya carbone, ibihugu bikiri mu nzira y'amajyambere ari na byo bigira uruhare ruto mu kohereza mu kirere imyuka igihumanya, bigirana amasezerano n'ibikize bikishyura ikiguzi ku bikorwa bigamije kugabanya imyuka ihumanya bityo uwishyuye ntabe akibarwa nk'uhumanya ikirere ku rugero rw'ibyo yaguze.

    Aha hakubiyemo imishinga yo gutera amashyamba, kuyabungabunga ntatemwe cyangwa kubungabunga urusobe rw'ibinyabuzima bishobora gukurura umwuka wa C02 woherezwaga mu kirere. Harimo kandi ibikorwa byose bibungabunga ibidukikije nko gukoresha ingufu zisubira.

    Munyazikwiye yasobanuye uko iki gikorwa kigenda, ati 'Dufate urugero nk'umuntu ukoresha amashyiga atatu, ugashyiramo inkwi ugacana, wabara imyotsi yose yasohotse ukoresheje izo nkwi ushobora gusanga usohora nka gigatonnes 100 za carbone ukavuga ngo uzanye rondereza igabanya ibicanwa ariko ishobora no kugabanya imyotsi yoherezwa mu kirere ikaba yasohora gigatonnes 10. Icyo kinyuranyo cya 90 watumye zitajya mu kirere ni zo ushobora kuba wagurisha.'

    Senateri Mugisha Alexis yabajije icyo abaturage bashobora kungukira muri iryo soko rya carbone u Rwanda rugaragaza ko rihanzwe amaso.

    Yakomeje ati 'Icyo umuntu asigara yibaza, ibiva muri iryo soko rya carbone byunganira bite umuturage w'Umunyarwanda kuba yabasha kugera ku bicanwa mu buryo bumworoheye kurusha ubwo yashoboraga gukoresha mbere y'uko riboneka? Ku buryo byanamutiza umurindi akirinda kuba yakwangiza ibidukikije.'

    Munyazikwiye yasobanuye ko mu Rwanda hari imishinga 19 iri ku isoko rya carbone, 12 muri yo iri mu rwego rw'ingufu, indi ikaba mu bijyanye no gutera amashyamba no kuyavugurura n'ijyanye no kuyungurura amazi.

    Yavuze ko abaturage bunguka byinshi binyuze muri iyo mishinga iba iri ku isoko rya carbone.

    Ati 'Nk'urugero rw'umuntu uje gutanga imbabura za rondereza, tuba twizeye ko agiye gutanga izujuje ubuziranenge, akazitangira ku giciro gito cyangwa ubuntu kuko azagaruza amafaranga yashoye binyuze mu isoko rya carbone.'

    Yavuze ko amarembo afunguye ku bikorera kandi na Leta ishobora gukora imishinga yajyanwa ku isoko rya carbone.

    Ku isoko rya carbone aho uza kugura ari we uba yabishatse, Carbon Credit imwe [toni imwe ya CO2 ihinduye] ifite agaciro k'ari hagati ya 40$ na 80$, ariko hari n'igihe ibiciro bishobora kurengaho mu gihe ibihugu ubwabyo byakwiyumvikanira bitewe n'ubwoko bw'imishinga igiye gukorwa.

    Isoko rya carbone ni kimwe mu bisubizo bizana amafaranga mu rwego rw'ibidukikije, bizafasha u Rwanda kugera ku ntego zo kugabanya iyoherezwa ry'imyuka ihumanya ikirere ku rugero rwa 38% bitarenze 2030.

    Hagaragajwe uko Abanyarwanda bazungukira ku isoko rya carbon rihanzwe amaso

    Source : http://igihe.com/amakuru/u-rwanda/article/uko-abanyarwanda-bazungukira-ku-isoko-rya-carbon-rihanzwe-amaso

  • Kwimura Agakiriro ko ku Gisozi birashoboka ariko ntibiri vuba aha – Umuvugizi w'Umujyi wa Kigali – #rwanda #RwOT

    Ku wa 3 Kamena 2025, IGIHE yasuye ako gakiriro by'umwahariko mu gice giherutse kwibasirwa n'inkongi y'umuriro cya Koperative Adarwa gikorerwamo ibijyanye n'ububaji.

    Nyuma y'iminsi ine icyo gice cyibasiwe bikomeye n'inkongi y'umuriro, kuri ubu ibyangiritse byinshi biracyakurwamo ndetse kongera kuhakorera biracyasaba akazi kenshi karimo no kubaka izindi nyubako.

    Abahakoreraga bavuga ko nta makuru baramenya y'ikigomba gukurikiraho, gusa abenshi muri bo nta bwishingizi bw'ibyo bakoreramo bafite uretse ubw'inyubako ya Adarwa bakodeshaga.

    Bamwe bavuga ko bumva amakuru ko n'igice kitafashwe n'inkongi y'umuriro na cyo cyizasenywa hagatangira kubakwa bundi bushya cyangwa Agakiriro kakimurwa.

    Umuvugizi w'Umujyi wa Kigali, Ntirenganya Emma Claudine, yabwiye IGIHE ko kuri ubu nta gahunda ya vuba yo kwimura ako gakiriro ihari.

    Yagize ati 'Kwimura Agakiriro ka Gisozi ni ibintu bishoboka ariko ntabwo biri vuba aha ngaha. Ibintu bizagenda bijyanishwa n'igihe mu Mujyi wa Kigali ni byinshi kandi ni urugendo rukorwa buhoro buhoro.'

    'Ubu ikintu cy'ingenzi turi gukora ku Gakiriro ko ku Gisozi n'ahandi hahurira abantu benshi ni ukureba ko bubahiriza amabwiriza. Harimo abo usanga barashyizemo ibifite ubushobozi bw'inyubako abandi barasatiriye imihanda kandi byose bigomba kuvaho. Turi kubafasha kubishyira mu bikorwa mu buryo bwihuse.'

    Agakiriro ko ku Gisozi kamaze kwibasirwa n'inkongi inshuro zirindwi kuva mu 2017, ndetse igitera ikizitera gikomeje kuba urujijo.

    Mu mpera za Gicurasi 2025 ubwo gaheruka gushya hahiye igice kinini cyane gitunganyirizwamo ibijyanye n'ububaji ndetse kugeza ubu haracyabarurwa agaciro k'ibyangirikiyemo.

    Agakiriro ko ku Gisozi gaherutse kwibasirwa n’inkongi y’umuriro

    Source : http://igihe.com/amakuru/u-rwanda/article/kwimura-agakiriro-ko-ku-gisozi-birashoboka-ariko-ntibiri-vuba-aha-umuvugizi-w

  • U Rwanda rugiye gufungura Ambasade muri Algérie – #rwanda #RwOT

    Ibi Perezida Kagame yabitangaje mu kiganiro yagiranye n'itangazamakuru, ubwo yari kumwe na mugenzi we wa Algérie, Abdelmadjid Tebboune.

    Abakuru b'ibihugu byombi kandi bayoboye ibiganiro byahuje amatsinda y'u Rwanda na Algérie, ndetse banakurikira igikorwa cyo gusinya amasezerano y'ubufatanye.

    Ni amasezerano yasinywe mu nzego zirimo ubwikorezi bwo mu kirere, gukuraho visa, itumanaho, Polisi, inganda zikora imiti, uburezi mu mashuri makuru na kaminuza, ubutabera, guteza imbere ishoramari no kwihangira imirimo.

    Abakuru b'ibihugu byombi kandi bagiranye ikiganiro n'itangazamakuru aho bagarutse ku bushake bwabo mu guteza imbere imikoranire hagati y'u Rwanda na Algérie.

    Muri iki kiganiro, ni bwo Perezida Kagame yatangaje ko u Rwanda rugiye gufungura Ambasade muri Algérie. Iki gihugu gisanzwe gifite Ambasade i Kigali kuva mu 2023.

    Perezida Kagame yageze muri Algérie kuri uyu wa Kabiri, aho yagize umwanya wo gusura no gushyira indabo ku Rwibutso rwa Maqam Echahid, mu rwego rwo guha icyubahiro intwari za Algérie, zaguye mu Ntambara yo guharanira Ubwigenge bw'icyo gihugu.

    Mbere y'isinywa ry'amasezerano hagati y'impande zombi, Perezida Kagame yaganiriye na mugenzi we wa Algérie, aho ibiganiro byabo byibanze ku bijyanye no kurushaho guteza imbere imikoranire hagati y'ibihugu bya Afurika, mu nzego zirimo ubucuruzi bwambukiranya imipaka ndetse no gusangira ubumenyi.

    Abakuru b'ibihugu byombi kandi banaganiriye ku bijyanye n'amasomo u Rwanda na Algérie byigiye mu rugendo rutoroshye rwo kwiyubaka nyuma y'amateka akomeye byanyuzemo, arimo Intambara yo guharanira Ubwigenge bwa Algérie ndetse na Jenoside yakorewe Abatutsi mu Rwanda mu 1994.

    Mu mpera z'umwaka ushize, Minisitiri w'Ububanyi n'Amahanga, Olivier Nduhungirehe, yagiranye ibiganiro na mugenzi we wa Algérie, Ahmed Attaf, bahuriye i Sochi mu Burusiya, byibanze ku mubano w'ibihugu byombi.

    Algérie n'u Rwanda bifitanye imikoranire mu bijyanye n'umutekano ndetse n'uburezi kuko hari abanyeshuri bava mu Rwanda bajya kwiga muri iki gihugu.

    Umubano w'ibihugu byombi uri mu nzego zirimo ubuzima, ubucuruzi, ishoramari, umutekano, uburezi n'izindi.

    Perezida Kagame yavuze ko u Rwanda rugiye gufungura Ambasade muri Algérie

    Perezida wa Algérie, Abdelmadjid Tebboune, ubwo yari mu kiganiro n’itangazamakuru

    Hasinywe amasezerano y’ubufatanye mu nzego zinyuranye

    Perezida Kagame na mugenzi we wa Algérie, Abdelmadjid Tebboune, bayoboye amatsinda y’ibihugu byombi mu biganiro bigamije kurushaho kunoza umubano

    Source : http://igihe.com/amakuru/u-rwanda/article/u-rwanda-rugiye-gufungura-ambasade-muri-algerie

  • Rurageretse hagati ya Kaminuza y'u Rwanda n'abanyeshuri bayo b'i Busogo – #rwanda #RwOT

    Icyo kibazo cy'abanyeshuri banze gukora ikizamini cyabaye ku wa 30 Gicurasi 2025, ubwo bari bahawe ingengabihe y'ibizamini byagombaga gutangira ku wa 2 Kamena 2025.

    Bamwe mu banyeshuri baganiriye na IGIHE bagaragaje ko bafite ikibazo cy'uko badahabwa amasomo uko bikwiye, aho bagaragaza ko gahunda y'imyigire yabo iba igizwe n'ibice bibiri birimo igice cya 50% biga mu magambo n'igice cya 50% biga bashyira mu ngiro. Iki gice cya kabiri gikorwa iyo abanyeshuri bagiye mu ngendoshuri.

    Umwe yagize ati 'Muri iyi minsi twatunguwe no kubona abayobozi baduhaye ingengabihe yo gukora ibizamini, tubabwira ko tutarasoza kwiga kuko twize mu nyandiko gusa (theory) tutari twajya kubishyira mu ngiro mu rugendoshuri (field visit), tubibasabye batubwira ko nta bushobozi buhari.'

    Yakomeje ati 'Ibyo twarabumvise tubaza bamwe mu bakozi ba BRD kuko ni bo dufitanye amasezerano, batubwira ko iyo umwaka w'amashuri utangiye, bohereza amafaranga y'ubushakashatsi, imenyerezamwuga n'urugendoshuri ku mashami ya kaminuza kugira ngo umunyeshuri yige neza.'

    Yavuze ko bakoranye inama n'abayobozi ba kaminuza, bababwira ko amafaranga bayakiriye ariko kugeza ubu nta yo bafite, bagaragaza ko icyo bashaka ari ukubanza kujya mu rugendoshuri bakabona gukora ikizamini kuko amafaranga bakoresha bazayishyura.

    Abanyeshuri bakomeza bagaragaza ko gusoza kwiga utagiye mu rugendoshuri bigira ingaruka ku bumenyi bavana muri kaminuza, bitewe n'imiterere y'amasomo yabo.

    Umuvugizi wa Kaminuza y'u Rwanda, Kabagambe Ignatius, yavuze ko abanyeshuri bafite iki kibazo bari kuganira n'ubuyobozi bwabo kugira ngo basobanurirwe impamvu nyamukuru yateje iki kibazo, hanaganirwe ku buryo bwo kugikemura.

    Yagize ati 'Abanyeshuri bagiye mu rugendoshuri ariko bumvaga bakwiye kujya ahandi hantu, ariko uko ubuyobozi bwa koleji bubiteganya ni uko bazayijyamo ikindi gihe kitari ubu cyangwa bakayijyano ahatari aho bifuza kujya.'

    Yakomeje avuga ko abanyeshuri bifuza cyangwa baryoherwa no kujya ahantu, bityo ingendoshuri zakorwa ntibabyishimire ari naho habaye intandaro y'iki kibazo, asobanura ko byatewe n'uko aho bateganyirijwe kujyanwa batahashaka.

    Kabagambe yakomeje asobanura ko umunyeshuri atari we wihitiramo aho azajya nk'uko atari we wigenera ibyo yiga n'aho ari bubyigishirizwe, abasaba kudakurikiza ibyabagaho mbere kuko biri guhinduka, aho kuri ubu ingendoshuri zizajya zikorerwa hafi y'ishami umunyeshuri yigamo.

    Ati 'Ingendoshuri zizajya zikorerwa mu gice cy'ishami umunyeshuri yigamo, ubushakashatsi bakora, gufatika kwabyo bihere aho riri, ureke kujya Rusizi uva Busogo, ujye Kirehe n'ahandi. Hera Musanze, Rulindo, Gakenke hafi aho, ni uko gahunda yahindutse.'

    Ubuyobozi bwa Kaminuza y'u Rwanda bwasabye abanyeshuri kubaha ibyo bateganyirizwa aho kumva ko ari bo bigenera ibyo gukora kandi bakwiye kubahiriza amategeko n'amabwiriza abagenga.

    Abanyeshuri ba Kaminuza y’u Rwanda i Busogo banze gukora ikizami

    Source : http://igihe.com/amakuru/u-rwanda/article/rurageretse-hagati-ya-kaminuza-y-u-rwanda-n-abanyeshuri-bayo-b-i-busogo

  • Perezida Kagame yakiriwe na Abdelmadjid Tebboune wa Algérie – #rwanda #RwOT

    Umukuru w'Igihugu yageze muri Algérie kuri uyu wa Kabiri, aho yagize umwanya wo gusura no gushyira indabo ku Rwibutso rwa Maqam Echahid, mu rwego rwo guha icyubahiro intwari za Algérie, zaguye mu Ntambara yo guharanira Ubwigenge bw'icyo gihugu.

    Perezida Kagame yaganiriye na mugenzi we wa Algérie, aho ibiganiro byabo byibanze ku bijyanye no kurushaho guteza imbere imikoranire hagati y'ibihugu bya Afurika, mu nzego zirimo ubucuruzi bwambukiranya imipaka ndetse no gusangira ubumenyi.

    Abakuru b'ibihugu byombi kandi banaganiriye ku bijyanye n'amasomo u Rwanda na Algérie byigiye mu rugendo rutoroshye rwo kwiyubaka nyuma y'amateka akomeye byanyuzemo, arimo Intambara yo guharanira Ubwigenge bwa Algérie ndetse na Jenoside yakorewe Abatutsi mu Rwanda mu 1994.

    Iyi Ntambara yo kurwanira Ubwigenge bwa Algérie yatangiye mu Ugushyingo 1954, irangira muri Nyakanga 1962. Ni Intambara yashyize iherezo ku bukoroni bw'u Bufaransa muri Algérie, bwari bumaze imyaka irenga 130 kuko bwari bwaratangiye mu 1830.

    Iyi Ntambara yatangiye ubwo Ishyaka rya 'The National Liberation Front' (FLN) ryagabaga ibitero bizwi nka 'Toussaint Rouge.'

    Impande zombi zaje gushyira umukono ku masezerano yo guhagarika intambara, ku itariki ya 1 Nyakanga, 1962 abaturage b'icyo gihugu bakora amatora ya referandumu, igamije kubahesha ubwigenge. Iyi ntego yo kugera ku bwigenge yagezweho mu minsi ine yakurikiyeho, ku itariki ya 5 Nyakanga, 1962.

    Leta ya Algérie igaragaza ko nibura abantu barenga miliyoni 1.5 baguye muri iyi ntambara.

    Mu mpera z'umwaka ushize, Minisitiri w'Ububanyi n'Amahanga, Olivier Nduhungirehe, yagiranye ibiganiro na mugenzi we wa Algérie, Ahmed Attaf, bahuriye i Sochi mu Burusiya, byibanze ku mubano w'ibihugu byombi.

    Algérie n'u Rwanda bifitanye imikoranire mu bijyanye n'umutekano ndetse n'uburezi kuko hari abanyeshuri bava mu Rwanda bajya kwiga muri iki gihugu.

    Mu Ukuboza 2023, Algérie yafunguye Ambasade yayo mu Rwanda.

    Umubano w'ibihugu byombi uri mu nzego zirimo ubuzima, ubucuruzi, ishoramari, umutekano, uburezi n'izindi.

    Perezida Kagame yakiriwe ku Ngoro y’Umukuru w’Igihugu muri Algérie

    Perezida Kagame yakiriwe mu cyubahiro gikwiriye Umukuru w’Igihugu

    Perezida Kagame yakiriwe na mugenzi we, Perezida Abdelmadjid Tebboune wa Algérie

    Perezida Kagame yaganiriye na mugenzi we wa Algérie, Abdelmadjid Tebboune

    Source : http://igihe.com/amakuru/u-rwanda/article/perezida-kagame-yakiriwe-na-abdelmadjid-tebboune-wa-algerie

  • Hejuru ya 60% y'ibikoreshwa ku nyubako biracyatumizwa hanze – #rwanda #RwOT

    Eng. Delphin Tuyisenge ufite sosiyete yitwa WEMEP wakoze mu mishinga migari irimo kubakisha ibibuga by'imyidagaduro nka Stade Amahoro, BK Arena n'Ikibuga Mpuzamahanga cy'Indege cya Bugesera n'ahandi, yabwiye RBA ko hari ibihombbo batezwa no gutumiza ibikoresho hanze.

    Yavuze ko iyo batumije ibikoresho by'ubwubatsi hanze, usanga bibasaba kwishyura mu madorali kandi amafaranga bakoresha ari Amafaranga y'u Rwanda, bigatuma bishyura amafaranga y'umurengera.

    Yagize ati 'Amafaranga asohoka mu gihugu atumiza ibikoresho hanze mu ruganda rwacu ntabwo bibuze 60% y'akoreshwa ku nyubako yose kugira ngo yuzure, kandi hazamo n'imbogamizi y'uko bidusaba kwishyura mu madorali kandi tuba dufite Amafaranga y'u Rwanda, usanga bidusaba kubanza kuvunjisha bikagutwara igihe kinini.'

    Umusesenguzi mu by'ubukungu, Prof. Egide Karuranga, yasobanuye ko iyo ibitumizwa hanze bikomeje kwiyongera bigira n'ingaruka zikomeye mu gutakaza agaciro k'ifaranga ry'igihugu.

    Yagize ati 'Iyo biriya biva hanze bikomeje kwiyongera ushobora gusanga n'ayo kubyishyura abuze, iyo abuze rero ni ho usanga ibihugu bimwe na bimwe bivuga biti 'reka tubaganye agaciro k'ifaranga ryacu kugira ngo abagura ibintu byacu babashe kubigura kuri make', aho niho bihurira no guta agaciro karyo.'

    Minisitiri y'Ubucuruzi n'Inganda, Prudence Sebahizi, agaragza ko ibikoresha by'ibanze bikoreshwa mu mirimo y'ubwubatsi harimo umucanga, amabuye, sima n'ibindi, ibyinshi muri byo bikorerwa mu Rwanda n'ubwo hari ibigitumizwa hanze.

    Yagize ati 'Ntabwo u Rwanda rugikeneye gukura sima hanze, iyo tuyikuye hanze ni ku bushake bw'umuntu kubera ko inganda ebyiri dufite ziyitunganya uyu munsi zifite ubushobozi bwo gutunganya toni miliyoni 2.5 ku mwaka, mu gihe dukeneye 1.5 ku mwaka mu gihugu hose.'

    Yavuze ko inganda zitunganya sima zimaze kugira ubushobozi burenze ubukenewe mu Rwanda. Avuga ko usanga inyinshi ahubwo yoherezwa hanze bakagurisha byibura 70% mu gihugu gusa.

    Minisitiri w'Intebe, Dr Edouard Ngirente, aherutse kuvuga ko mu byiciro by'inganda enye zizibandwaho harimo n'izitunganya ibikoresho by'ubwubatsi.

    Yavuze ko Guverinoma izafasha inganda zikora ibyuma harimo n'ururimo kubakwa mu karere ka Musanze ruzaba rufite ubushobozi bwo gukora ibyuma bingana na toni ibihumbi 300 ku mwaka.

    Yakomeje avuga ko uru ruganda ruzagira akamaro gakomeye mu guhaza isoko ry'imbere mu gihugu mu gutunganya ibikoresho by'ibanze byifashishwa mu zindi nganda zitagombye kubitumiza hanze

    Muri rusange agaciro k'ibintu u Rwanda rutumiza mu mahanga kavuye kuri miliyari zisaga 3$ mu 2017 kagera kuri miliyari zisaga 6$ mu 2024 muri ibyo harimo n'ibikoreshwa mu bwubatsi.

    Kugeza ubu mu Rwanda inganda zikora ibikoresho by'ubwubatsi zirimo inini 38 n'izindi 83 nto n'iziciriritse, aho umusaruro wazo wavuye kuri miliyari zisaga 200 Rwf muri 2017 zigera kuri miliyari 500 Rwf mu 2024.

    Inzobere mu by’ubwubatsi bagaraza ko inyubako itwara 60% by’ikoresho biturutse hanze kugira ngo ibe yuzuye

    Source : http://igihe.com/amakuru/u-rwanda/article/abahanga-mu-bwubatsi-bavuga-ko-60-y-ibikoresho-bikoreshwa-ku-nyubako

  • Perezida Kagame yunamiye abaguye mu ntambara yo gushaka ubwigenge bwa Algérie – #rwanda #RwOT

    Perezida Kagame ari muri Algérie mu ruzinduko rw'iminsi ibiri, rugamije gutsura umubano hagati y'ibihugu byombi, mu nzego zitandukanye.

    Iyi Ntambara yo kurwanira Ubwigenge bwa Algérie yatangiye mu Ugushyingo 1954, irangira muri Nyakanga 1962. Ni Intambara yashyize iherezo ku bukoroni bw'u Bufaransa muri Algérie, bwari bumaze imyaka irenga 130 kuko bwari bwaratangiye mu 1830.

    Iyi Ntambara yatangiye ubwo Ishyaka rya 'The National Liberation Front' (FLN) ryagabaga ibitero bizwi nka 'Toussaint Rouge.'

    U Bufaransa bwohereje ingabo ibihumbi mu guhangana n'abaturage ba Algérie barwanira ubwigenge bwabo, bakora ibikorwa birimo iyicarubozo, ihohotera no kwica abaturage, cyane cyane mu rugamba rwo guhanganira Umurwa Mukuru w'icyo gihugu, Alger rwaciye ibintu hagati ya 1956 na 1957.

    Impande zombi zaje gushyira umukono ku masezerano yo guhagarika intambara, ku itariki ya 1 Nyakanga, 1962 abaturage b'icyo gihugu bakora amatora ya referandumu, igamije kubahesha ubwigenge. Iyi ntego yo kugera ku bwigenge yagezweho mu minsi ine yakurikiyeho, ku itariki ya 5 Nyakanga, 1962.

    Leta ya Algérie igaragaza ko nibura abantu barenga miliyoni 1.5 baguye muri iyi ntambara.

    Perezida Kagame yasuye Urwibutso rwa Maqam Echahid rushyinguyemo abaguye mu rugamba rwo guharanira Ubwigenge bwa Algérie

    Perezida Kagame yashyize indabo ku Rwbutso rwa Maqam Echahid mu rwego rwo guha icyubahiro abaguye mu ntambara yo guharanira ubwigenge bwa Algerie

    Perezida Kagame yahaye icyubahiro abaruhukiye mu Rwibutso rwa Maqam Echahid

    Source : http://igihe.com/amakuru/u-rwanda/article/perezida-kagame-yunaniye-abaguye-mu-ntambara-yo-gushaka-ubwigenge-bwa-algerie