Blog

Agahenge hagati ya Israel n'umutwe wa Hamas wo muri Palestina kagiye mu ngiro. Katangiye kuva ku masaha y'igicuku cyo kuri uyu wa gatanu. Ibi bihagaritse imirwano yo kurasanaho ibisasu imaze iminsi 11, isize abantu barenga 240 bapfuye, benshi ari abo muri Gaza.

Abanyapalestina bahise bisuka mu mihanda ya Gaza aka gahenge kagitangira, mu gihe abakuru ba Hamas baburiye ko intoki zabo 'ziri ku mbarutso'. Israel na Hamas byombi biravuga ko ari byo byatsinze imirwano.

Perezida Joe Biden wa Amerika yavuze ko aka gahenge kazanye 'amahirwe nyayo' yo gutera intambwe. Kuwa kane gusa, ibisasu birenga 100 bya Israel byibasiye ibikorwa remezo bya Hamas mu majyaruguru ya Gaza. Hamas yasubije nayo irasa za rokete.

Ibi bikorwa byo kurasanaho byatangiye tariki 10 z'uku kwezi nyuma y'ibyumweru amakimbirane atutumba hagati y'impande zombi mu gace kafashwe na Israel k'uburasirazuba bwa Yerusalemu.

Ibi byagejeje ku mirwano muri aho hantu hatagatifu hagati y'Abasilamu n'Abayahudi, Hamas yatangiye kurasa za rokete nyuma yo kuburira Israel kuva muri ako gace, Israel nayo yihimura irasa ibisasu.

Abantu bagera kuri 232, barimo abana n'abagore barenga 100, barishwe muri Gaza, nk'uko bivugwa na minisiteri y'ubuzima igenzurwa na Hamas. Israel ivuga ko abarwanyi bagera ku 150 bari mu biciwe muri Gaza. Hamas ntivuga umubare w'inkomere.

Muri Israel, abantu 12 barimo abana babiri barapfuye nk'uko urwego rw'ubuzima rwabo rubivuga. Israel ivuga ko rokete 4,000 zarashwe zigana ku butaka bwayo ziva muri Gaza.

Impande zombi zavuze iki?

Leta ya Israel yavuze ko 'yatoye ku bwiganze yemera inama' y'agahenge.
Yongeyeho iti: 'Inzego za politiki zishimangira ko uko ibintu bizamera ari byo bizagena niba ibitero bikomeza'.

Minisitiri w'ingabo wa Israel Beny Gantz yatangaje kuri Twitter ko ibitero kuri Gaza byatanze 'umusaruro wa gisirikare ukomeye'.

Umuvugizi wa Hamas yabwiye ibiro ntaramakuru Associated Press ko agahenge katangajwe na Israel kavuze 'intsinzi' ku baturage ba Palestina no gutsindwa kwa Minisitiri w'Intebe Benjamin Netanyahu wa Israel.

Nyuma gato y'uko agahenge gatangiye saa munani z'ijoro kuri uyu wa gatanu (saa saba ku isaha y'u Burundi n'u Rwanda), umubare munini w'Abanyepalestina wagiye mu mihanda ya Gaza mu modoka no ku maguru kubyishimira.

Indangururamajwi ku misigiti yatangaje 'intsinzi yo kwirwanaho ku kwigarurirwa mu ntambara 'inkota ya Israel’'.

Gusa Basem Naim, wo mu nteko ya Hamas ishinzwe ububanyi n'amahanga, yabwiye BBC dukesha iyi nkuru ko atizeye neza ko aka gahenge kazaramba. Ati: 'Nta butabera ku baturage ba Palestine, nta guhagarika ubushotoranyi n'ubwicanyi bya Israel ku baturage bacu i Yeruzalemu, agahenge kazakomeza kuba kadakomeye'.

Ezzat al-Reshig, umwe mu bakuriye politiki ya Hamas yaburiye Israel. Yabwiye ibiro ntaramakuru Reuters ati: 'Ni byo koko urugamba rurarangiye uyu munsi kandi isi yose ikwiye kumenya ko intoki zacu ziri ku mbarutso kandi tuzakomeza gushaka ubushobozi bwo kwihagararaho. Turabwira Netanyahu n'ingabo, ko nimugaruka, natwe tuzagaruka.'

Ni iki cyagejeje ku gahenge?

Impande zombi zari zimaze igihe ziri ku gitutu cy'amahanga ngo zihagarike imirwano.
Kuwa gatatu, Perezida Biden yabwiye Netanyahu 'ko ategereje intambwe mu koroshya imirwano uyu munsi biganisha ku gahenge'.

Misiri, Qatar na ONU byagize uruhare mu b'imbere mu biganiro by'ubuhuza hagati ya Israel na Hamas itegeka Gaza.

Perezida Sisi yatumye intumwa muri Israel no mu duce twa Palestina twigaruriwe ngo zikore ku buryo haboneka agahenge, nk'uko bivugwa na televiziyo ya leta ya Misiri.

Munyaneza Theogene / intyoza.com

Source : https://www.intyoza.com/intambara-hagati-ya-israel-na-gaza-yahagaze/

Uganda n'Uburundi byemeranyije gahunda yo kubaka umuhanda mushya wo guteza imbere ubucuruzi no kuzenguruka no koroshya ibibazo byubucuruzi ninzinduko kubera gufungwa k'umupaka wa Gatuna mu ntangiriro za 2019.
Ibikorwa remezo bishya bizanyura mu majyaruguru ya Tanzaniya bizava muri Uganda mubice bibiri; Kitagate muri Isingiro kugera Karagwe na Myotera-Mutukula kugera Karagwe, hanyuma uhuze inzira imwe kugirango uzenguruke Ngara mu majyaruguru y'uburengerazuba bwa Tanzaniya hanyuma uhuze na Burundi ku mupaka wa Kobero uhana imbibi.
Izi nzira zombi ni 360Km na 274Km, ukurikije imibare ya googlemap, kandi byafata ahantu hose hagati yamasaha ane kugeza kuri atandatu nigice kugirango utware, ugereranije namasaha arindwi nigice kuri kilometero 348 uvuye Gatuna ugana Bujumbura.
Ariko, kugenda kuva Kobero kugera mu murwa mukuru wa Bujumbura mu Burundi bishobora gufata amasaha 4 yiyongera.
Ubucuruzi bwa Uganda n'u Rwanda n'Uburundi, biri mu gihugu imbere, bwaragabanutse kuva umupaka wa Gatuna wafungwa, mu ntangiriro za 2019 havugwako hubatswe aho gasutamo imwe ihagarara, nyuma ikavuga ko ifatwa ry'abaturage b'u Rwanda muri Uganda.
Uganda yashinjaga u Rwanda kwinjira mu bikorwa by'ubutasi.

Zambiya: abaturage bakomeje kugaragaza uburakari bukomeye basaba impinduka Bayobowe na Mr Hechilema utavuga rumwe na leta.

Ibisobanuro birambuye ku mushinga mushya w'umuhanda byemeranijweho mu nama yahuje Perezida Museveni na mugenzi we w'Uburundi Évariste Ndayishimie mu ruzinduko rw'igihugu cya Gicurasi 13-14, nyuma y'umunsi umwe yitabiriye umuhango wo kumwakira ku ya 12 Gicurasi.
Biteganijwe ko abaminisitiri ndetse n'abatekinisiye bakomeye bagenzura imirimo n'imihanda muri Uganda, Tanzaniya n'Uburundi biteganijwe ko bazahura ku ya 20 Kamena, nk'uko byatangajwe na Minisitiri w'ibikorwa bya Uganda, Joy Kabatsi.
Nyuma y'inama yo ku ya 13 Gicurasi na mugenzi we w'Uburundi, Perezida Museveni yagize ati: 'Twaganiriye ku miterere y'umuhanda Kikagate-Morongo-Isingiro imbere muri Tanzaniya-Keisho —ku Kayanga. Umuhanda ni umuhanda wa marram ushaje niba uzamuwe kandi 'ukitotomba' neza abantu bashobora kuwukoresha kuva kuruhande rwa Mbarara. '
Yongeyeho ati: 'Umuhanda uva Mutukula-Kyaka-Kayanga-Ngara urahari kubera ko Abanyatanzaniya bahagaritse kuva Mutukula-Kyaka ugana Kayanga, bityo dushobora guhita tujya mu Burundi. Kuruhande rwacu, ndashaka ko ureba kuva Morongo kugera Kayanga. Turashobora kandi gushiramo inzego z'umutekano. '
Amakuru y'iterambere akurikira ikindi cyifuzo cyatanzwe na Uganda cyo kuzamura kilometero amagana y'umuhanda wa kaburimbo mu burasirazuba bwa DR Congo, umufatanyabikorwa w'ubucuruzi ukomeye muri kariya karere, kugeza bitumen — koroshya umupaka w'iburengerazuba mu bucuruzi

Byakomeje gushimangirwa cyane ko bizafasha abacuruzi ndetse n'ubukungu bukuzamuka muri ibi bihugu nyuma yigihe kinini abaturage bavugaga ko hagomba kugira igikorwa.

The post Sobanukirwa byinshi kumuhanda ugiye kubakwa uzahuza Uganda,Burundi,Tanzania nyuma yifungwa y'umupaka wa gatuna. appeared first on .

Source : https://kigalinews24.com/2021/05/21/sobanukirwa-byinshi-kumuhanda-ugiye-kubakwa-uzahuza-ugandaburunditanzania-nyuma-yifungwa-yumupaka-wa-gatuna/

Minisiteri y'Ubuzima yatangaje ko kuri uyu wa Kane, umugabo w'imyaka 83 wo mu karere ka Huye yishwe na COVID-19 mu Rwanda bituma umubare w'abamaze guhitanwa n'iki cyorezo uba 349.

Abarwayi bashya babonetse ni 105 mu gihe abakize ari 76, bityo abamaze gukira bageze kuri 94.7%. Abakirwaye bageze ku 1,296 barimo umuntu umwe urembye.

Abaturarwanda barasabwa kutirara kuko icyorezo kigihari ndetse hakomeje gufatwa ingamba nshya zigamije gukumira ikwirakwizwa ryacyo, harimo no kwirinda ingendo zitari ngombwa no kwirinda kujya ahantu hahurira abantu benshi kandi hafunganye.

Kuri ubu haracyubahirizwa amabwiriza yashyiriweho kwirinda. Ingendo hagati y'Umujyi wa Kigali n'Intara, ndetse no hagati y'Uturere dutandukanye tw'Igihugu zirakomorewe.

Guhera ku wa 6 Gicurasi 2021, Imirenge itandatu yo mu Turere twa Huye, Gisagara na Nyaruguru yakuwe muri gahunda ya Guma Mu Rugo nyuma y'isuzuma ryakozwe n'inzego z'ubuzima ryagaragaje ko ubwandu bw'icyorezo cya COVID-19 bwagabanyutse.

Ku rundi ruhande, Imirenge ya Rwamiko mu Karere ka Gicumbi na Bwishyura mu Karere ka Karongi yashyizwe muri Guma mu Rugo kubera ko imibare y'abanduye Koronavirusi (COVID-19) yakomeje kugenda yiyongera cyane.

Ahandi ingendo zirabujijwe guhera saa yine z'ijoro (10:00 pm) kugeza saa kumi za mu gitondo (4:00 am) uretse mu Turere tw'Intara y'Amajyepfo twa Ruhango, Nyanza, Huye, Gisagara, Nyaruguru na Nyamagabe zibujijwe guhera saa moya z'ijoro (7:00pm) kugeza saa kumi za mugitondo (4:00am).

Mu gihe u Rwanda rutaragera ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n'isabune cyangwa alukolo yabugenewe.

Minisiteri y'Ubuzima ivuga ko gukingira abari mu byiciro byibasiwe kurusha ibindi bizakomeza mu Gihugu hose uko u Rwanda ruzagenda rwakira ibindi byiciro by'inkingo.

Gukingirwa byatangiye nyuma y'iminsi ibiri gusa u Rwanda rwakiriye icyiciro cya mbere cy'inkingo rwemerewe muri gahunda ya COVAX mu ntangiriro za Werurwe 2021.

Source : http://umuryango.rw/amakuru/mu-rwanda/ubuzima/article/covid-19-yahitanye-umuntu-umwe-mu-rwanda-abandi-105-barayandura

Mu masaha ya mugitondo cyo kuri uyu wa 20 Gicurasi 2021, umukozi w'urwego rwunganira akarere ka Kamonyi mu gucunga umutekano-DASSO, Usabuwera Jean Baptiste ukorera mu Kagari ka Ngoma, Umurenge wa Nyamiyaga, yafashwe ashyikirizwa RIB Sitasiyo ya Mugina ngo abazwe ibimuvugwaho byo gukubita umuturage akamumena ijisho.

Amakuru intyoza.com icyesha bamwe mu baturage mu kagari ka Ngoma, ahamya ko ku mugoroba w'uyu wa 19 Gicurasi 2021 haje abayobozi bagakorana inama n'abaturage aho ikibazo cyabereye, ahazwi nko ku Nkambi.

Gusa mu gukoresha inama ngo kuko hari bamwe mu bayobozi babanje kuhazindukira mbere y'uko inama iba, bakaba kandi batazi icyabagenzaga kuko ngo atari buri wese bavuganye, bakeka ko harimo ugushaka kuyobya uburari ngo bagaragaze ko DASSO ntaho ahuriye n'ibyabaye ku muturage ashinjwa gukubita.

Kubwimana Jean de Dieu, Umunyamabanga Nshingwabikorwa w'Umurenge wa Nyamiyaga ku murongo wa Terefone ngendanwa yemereye umunyamakuru ko inama koko yaraye ibaye ku mugoroba w'uyu wa Gatatu.

Avuga ko kugeza ubu batazi ukuri ku byabye ngo kuko hari abaturage bavuga ko DASSO ariwe wakubise uyu muturage, abandi ngo bakavuga ko DASSO yagiye kubakiza uwo muturage yakomeretse.

Ati' Ikigaragara, we yagiye agiye gukiza ariko abaturage bakagaragaza ko ariwe wakubise uriya mwana, ariko muri makeya hari abemezaga ko ariwe wamukubise, abandi bakavuga ngo yagiye kubakiza yakomeretse, ariko RIB irimo kugenda ibaza abantu batandukanye bari bahari kugira ngo habonekemo ukuri'.

Gitifu Kubwimana, avuga ko kuri uyu munsi wa kane mu masaha ya mugitondo aribwo uyu DASSO yashyikirijwe RIB Sitasiyo ya Mugina, aho abazwa ibyo ashinjwa n'abaturage. Mu masaha ya nyuma ya saa sita, abakozi b'urwego rw'Ubugenzacyaha-RIB mu karere ka Kamonyi bari mu kugenda baganira n'abaturage b'i Ngoma, bashaka amakuru mpamo ku bivugwa.

Soma hano inkuru yabanjirije iyi umenye uko byagenze:Kamonyi-Nyamiyaga: Haravugwa DASSO wakubise umuturage akamumena ijisho

Munyaneza Theogene / intyoza.com

Source : https://www.intyoza.com/kamonyi-nyamiyaga-dasso-bivugwa-ko-yakubise-umuturage-akamumena-ijisho-yashyikirijwe-rib/

Umuhanzi Jay Polly n'abo bareganwa icyaha cyo gukoresha ibiyobyabwenge bakatiwe gufungwa iminsi 30 y'agateganyo mu gihe hagikorwa iperereza.

Uyu mwanzuro wasomwe kuri uyu wa 20 Gicurasi 2021 mu rukiko rw'ibanze rwa Gasabo.

Urukiko rwanzuye ko baba bafunzwe iminsi 30 y'agateganyo kuko hari impamvu zikomeye zituma bakekwaho icyaha bakurikiranyweho.

Jay Polly, murumuna we witwa Iyamuremye Jean Clément, Shemsa Mutabonwa na Hatunga Fidèle Benedicto uvuga ko ari Umunyamerika ukomoka muri Tanzania. bari baburanye tariki 17 Gicurasi ku ifungwa n'ifungurwa by'agateganyo.

Icyo gihe Umushinjacyaha yavuze ko impamvu ikomeye yatumye bageza abaregwa imbere y'Urukiko, ari ibipimo byafashwe n'abaganga byagaragaje ko bakoresheje ibiyobyabwenge.

Yagaragarije urukiko ko mu bipimo by'inkari abaregwa bafashwe, Jay Polly yasanganywe 385, Iyamuremye [198], Mutabonwa [338] mu gihe Benedicto we yasanzwemo 155. Ibi bipimo basanzwemo, Ubushinjacyaha buvuga ko biri hejuru cyane kuko ubusanzwe muri mililitiro imwe y'inkari z'umuntu udakoresha urumogi ariko wafashe imiti ifite aho ihuriye narwo aba afite 20 gusa.

Mu gitondo cyo ku cyumweru tariki ya 25 Mata ku cyicaro cya Polisi mu Mujyi wa Kigali i Remera, nibwo Polisi yeretse itangazamakuru abantu 12 bafatiwe mu rugo rw'umuhanzi witwa Tuyishime Joshua uzwi ku izina rya Jay Polly.

Aba bantu bafatiwe mu Karere ka Gasabo mu Murenge wa Kimironko bari mu birori barenze ku mabwiriza yo kurwanya COVID-19,bafashwe barimo kunywa inzoga n'ikiyobyabwenge cy'urumogi harimo kandi n'abanyamahanga bari bafite ibisubizo bya COVID-19 bihimbano bigaragaza ko batanduye COVID-19.

Hanerekanywe kandi n'umuganga watangaga ibisubizo by'ibihimbano bigaragaza ko umuntu atanduye COVID-19.

Ubwo berekwaga itangazamakuru, umuhanzi Tuyishime Joshua(Jay Polly) yavuze ko tariki ya 23 Mata aribwo bariya bantu 12 baje iwe mu buryo atari yateguye.

Source : http://umuryango.rw/amakuru/mu-rwanda/ubutabera/article/jay-polly-na-bagenzi-be-bakatiwe-gufungwa-iminsi-30-y-agateganyo

Urukiko Rwisumbuye rwa Nyarugenge ku gicamunsi cyo kuri uyu wa Kane rwahamije Tom Byabagamba icyaha cyo kwiba telefoni, rumuhanisha igifungo cy'umwaka umwe.

Inteko y'umucamanza umwe n'umwanditsi w'urukiko niyo yasomye imyanzuro y'urubanza rwa Tom Byabagamba. Ubushinjacyaha bwari mu biro byabwo naho Byabagamba yari ari aho asanzwe afungiye muri Gereza ya Gisirikare i Kanombe.

Wari umwanzuro ku bujurire. Umucamanza yavuze ko ubujurire bwe bufite ishingiro kuri bimwe. Yasobanuye ko urubanza rwaciwe n'Urukiko rw'Ibanze rwa Kicukiro mu Ugushyingo 2020 ruhinduka gusa ku gihano yari yahawe cyo gufungwa imyaka itatu agahabwa umwe.

Byabagamba ybwiwe ko hari umuhanga wanditse ko nubwo watora ikintu kidafite nyiracyo ukagitwara ntihagire ukurega ko uba ukoze icyaha cyo kwiba.

Ubushinjacyha bwavuze ko ubwo Tom Byabagamba wahoze ari Colonel mu ngabo z'u Rwanda mbere y'uko azamburwa yasakwaga aho afungiye bitunguranye basanze afite Telephone igendanwa n'amafranga ibihumbi 450 y'amanyarwanda.

Iki gihe akaba yarahise akurikiranwaho icyaha cyo kwiba telephone urukiko rwibanze rwa Kicukiro rumukatira imyaka 3.

Byabagamba yahise ajurira ndetse hemerwa ubujurire bwe buherutse kuburanishwa kuwa 28 Mata 2021.

Mu bujurire, Col Tom Byabagamba yasabye urukiko ko rwabaza ubushinjacyaha bukazana nyiri telefone buvuga ko yibye akaba ariwe baburana.

Ubushinjacyaha bwo bwasabye ko icyemezo cy'urukiko rwibanze rwa kicukiro rwafashe cyo gufunga Col Tom Byabagamba imyaka itatu cyagumaho kuko rwakurikije amategeko yose.

Byabagamba yavuze ko Urukiko rw'ibanze rwa Kicukiro rwamuhamije icyaha cy'ubujura nta bimenyetso rushingiyeho.

Tom Byabagamba yavuze ko yasatswe muri Werurwe 2020 kandi Ubushinjacyaha buvuga ko yibye telephone mu Rukiko Rukuru ubwo yari akihaburanira muri 2019.

Yavuze ko inyandiko y'ifatira ibyasatswe aho afungiye atayemera.

Ati 'Natangajwe no kubona urukiko rwarayifashe nk'ikimenyetso kandi iyo nyandiko njye ntayemera.'

Col Tom Byabagamba yatanze urugero ati 'Ibyambayeho ni nk'uko warega umuntu icyaha cyo kwica umuntu kandi nta muntu wishwe. Iki cyaha ndegwa ubundi ni nde wakindeze, murashingira kuki muvuga ko nibye telephone niba hari ikirego cy'umuntu mwakiriye wibwe telephone ni we mwagaragaza nkanaba ari we mburana na we, ariko ntaburana n'Ubushinjacyaha. Gusa njye nta muntu nibye, Urukiko nirubaze Ubushinjacyaha umuntu nibye bumuzane.'

Umucamanza yabajije Tom Byabagamba iyo telephone yafatanywe niba atarayibye aho yayikuye.

Byabagamaba ati 'Mucamanza ndabona nawe ugiye kugwa mu mutego w'Ubushinjacyaha ibyo umbajije nabisobanuye kenshi njye navuze ko nakuye telephone ku Rukiko kandi gufata ikintu bitandukanye no kukiba, kandi ibyo ntabwo bigize ubujura keretse hari uwandeze avuga ko yabuze telephone na charger yayo.'

Me Ntare Paul umwunganira mu mategeko yahise abwira Urukiko ko ubundi icyaha cy'ubujura kigendera ku itegeko n'ibimenyetso, ko ariko ibyo byose ntabyakozwe.

Me Ntare ati 'Ubundi kwiba ni ugutwara ikintu cy'undi rero uwo nunganira nta kintu cy'undi yatwaye kuba Byabagamba yasanganwa telephone aho afungiye ntabwo bigize icyaha cy'ubujura.'

Me Ntare Paul yasabye Urukiko Rwisumbuye rwa Nyarugenge gukuraho icyemezo cy'urukiko rw'ibanze rwa Kicukiro Tom Byabagamba akagirwa umwere ku cyaha cy'ubujura bwa telephone kuko nta bujura bwabayeho.

Me Gakunzi Gasore Varelie na we yahise abwira Umucamanza ko ibintu byabaye kuri Tom Byabagamba bidasobanutse.

Ati 'Ingingo ya 165 isobanura neza ikijyanye no kwiba ikintu cy'undi. Uwo nunganira rero nta na kimwe cyabayeho.'

Ubushinjacyaha bwahawe ijambo buvuga ko ibyo Urukiko rw'Ibanze rwa Kicukiro rwakoze byose rwashingiye ku mategeko.

Ubushinjacyaha buti 'Nubwo uwibye telephone avuga ko ntawamureze, ubwo bujura ntabwo bikuraho ko yakoze icyo cyaha cyo kwiba telephone.'

Ubushinjacyaha bwasobanuye ko ubwo Tom Byabagamba yasakwaga Ubugenzacyaha bwamusanze aho afungiye mu kigo cya gisirikare i Kanombe bumukoresha inyandikomvugo irimo telephone yafatanywe yo mu bwoko bwa Samsung G2 ndetse na Frw 450,000.

Ubushinjacyaha bwasobanuye ko Byabagamba yasobanuye ko impamvu yatwaye iyo telephone kwari ukugira ngo ajye avugana n'umuryango we kuko kuva yafungwa muri 2014 atigeze ahabwa umuryango we ngo bavugane bisanzuye.

Ubushinjacyaha bwasoje busaba Urukiko Rwisumbuye rwa Nyarugenge ko rwagumishaho icyemezo cy'urw'Ibanze rwa Kicukiro cyo gufunga imyaka itatu Tom Byabagamba.

Byabagamba yahise asaba Urukiko ko mu gufata icyemezo ku rubanza rwe rwazigenga kugira ngo Urukiko rutazagwa mu mutego w'Ubushinjacyaha.

Icyo gihe,Umucamanza yumvise impande zombi apfundikira iburanisha ategeka ko urubanza ruzasomwa ku wa 20 Gicurasi 2021.

Byabagamba wahoze ayoboye umutwe w'abarinda umukuru w'igihugu, yari asanzwe yarakatiwe igifungo cy'imyaka 15 ku bindi byaha birimo kwangisha abaturage ubutegetsi buriho.

Source : http://umuryango.rw/amakuru/mu-rwanda/ubutabera/article/tom-byabagamba-yakatiwe-igifungo-cy-umwaka-umwe-kubera-kwiba

Umugabo w'umucuruzi muri Nigeria yakoze agashya kaciye ibintu ku mbuga nkoranyambaga ubwo yajyaga gushyingura se umubyara afashe intare mu ntoki mu rwego rwo gukanga abakekwaho kumwica.

Uyu mugabo wo muri Leta ya Anambra, yagaragaye mu muhango wo gushyingura se afashe iyi ntare nzima bituma abari bitabiriye uyu muhango bagira ubwoba ndetse bamwe muri bo bakwira imishwaro.

Mu mashusho yashyizwe ku mbuga nkoranyambaga agakwirakwira cyane,uyu mukire ntiyatinye gukanga abantu bari bitabiriye uyu muhango kubera iki gikoko yari afite akinjira mu bantu byatumye bamwe bicwa n'ubwoba barahunga.

Source : http://umuryango.rw/ubuzima-115/udushya/article/umukire-yakoze-agashya-ajya-gushyingura-se-afashe-intare-mu-ntoki

Abadiplomate bashakisha uburyo intambara hagati ya Isirayeli n'Abanyepalesitina yahagarara bateranye uyu munsi kuwa kane, nyuma y'uko perezida w'Amerika Joe Biden ahamagariye kugabanya ubushyamirane.

Cyakora Isirayeli yakomeje kohereza ibisasu bya bombe muri Gaza na roketi zongera guterwa n'umutwe wa Hamas nyuma yo guhagarara igihe gito.

Hashize iminsi umutegetsi wa Hamas abaye nk'uhanura iryo hagarikwa ry'imirwano.

Umuminisitiri wa Isirayeli yavuze ko iki gihugu gishobora kuzahagarika ibitero byacyo, ari uko gusa kigeze ku ntego kiyemeje.

Ibitero bya roketi kuri Isirayeli, byahagaze amasaha umunani, uyu munsi kuwa kane, umunsi wa 11 w'ubushyamirane, mbere yo kongera kuraswa ku miryango iri hafi y'umupaka wa Isirayeli na Gaza.

Isirayeli yakomeje ibitero byayo by'indege mu gice cya Gaza kigenzurwa na Hamas, ivuga ko ishaka kurandura uwo mutwe wa kiyisilamu, kugirango utazongera gushotorana mu bihe biri imbere, ubushyamirane burimo kuba ubu, nibumara guhagarara.

Kuva imirwano itangiye kw'itariki ya 10 y'ukwezi kwa gatanu, abayobozi bashinzwe ubuzima bavuga ko abanyepalestina 230 barimo abana 65 n'abagore 39 bishwe kandi ko abantu barenga 1,700 bakomerejejwe na bombe ziterwa n'indege.

Abategetsi ba Isirayeli bavuga ko kugeza ubu hapfuye abaturage babo 12 na 336 bavuwe ibikomere.

IJWI RY'AMERIKA

Source : http://umuryango.rw/amakuru/mu-mahanga/umutekano/article/isirayeli-yanze-kumvira-joe-biden-yongera-kurasa-kuri-gaza

Imiryango 23 y'Abasigajwe inyuma n'amateka ituye mu Kagari ka Nyamabuye igizwe n'abantu 92. Abaganiriye na IGIHE bemeza ko mbere babagaho mu buzima bubi bafite umwanda, barwaye amavunja kandi baba mu nzu za nyakatsi.

Nyirabanguka Anatolie ni umwe muri bo; wemeza ko bari babayeho mu buzima bushaririye.

Ati 'Twabaga muri nyakatsi turwaye amavunja tudakaraba, bwari ubuzima bubi cyane.'

Ndayisenga Bosco w'imyaka 20 y'amavuko avuga ko muri icyo gihe no kurya rimwe ku munsi byari amahirwe, bigatuma baba ibirara.

Ati 'Menye ubwenge mfite nk'imyaka irindwi twari tubayeho mu buzima bubi tutaramenye COPORWA, kuko kurya rimwe ku munsi byari amahirwe. Twari ibirara tugatungwa no kujya kwiba. Twabaga dufite umwanda turwaye amavunja tukumva ari bwo buzima.'

Mu 2010 nibwo ishyirahamwe rivuganira abasigwajwe inyuma n'amateka (COPORWA) ryabakoreye ubuvugizi bubakirwa inzu zo kubamo, bahabwa ibikoresho by'ibanze ndetse n'abana babo bafashwa kujya mu ishuri.

Kuri ubu iyo ugeze aho batuye ubona ntaho batandukaniye n'abandi baturage kuko bafite isuku ndetse n'amazu babamo bayagirira isuku.

Abana babo 47 biga mu mashuri abanza naho batandatu biga mu yisumbuye. Batuye mu mudugudu wa Nyacyondo hamwe n'abandi Banyarwanda.

Ndayisenga Bosco ati 'Kuri ubu dushima Imana kuko twabonye abakangurambaga bo muri COPORWA badufasha guhindura imyumvire ku buryo ugenda waba wambaye umwenda usa nabi, ukumva biguteye isoni. Ukamenya ko niba uhohotewe hari aho ugomba kubariza.'

Birikunzira Wellars ni umusore w'imyaka 19 wiga mu mwaka wa mbere mu mashuri yisumbuye. Avuga ko yavutse asanga iwabo baba mu buzima bubi. Mu muryango wabo w'abana umunani nta n'umwe wakandagiye mu ishuri usibye we gusa.

Yavuze ko yumva agomba kwiga kugira ngo abana azabyara batazavukira mu buzima bubi nk'uko byamubayeho.

Ati 'Iwacu nta muntu wize kuko twari abakene amavunja yaratwishe, noneho COPORWA iraza iraduhugura batwigisha isuku badukura mu bwigunge. Nahise numva ngomba kujya kwiga kuko nabonaga abana biga babaho mu buzima bwiza, ntangira kwiga mu wa mbere w'amashuri abanza mfite imyaka 12.'

Kuva atangiye kwiga yarangije amashuri abanza aba uwa mbere, akora ikizamini cya Leta aragitsinda ajya kwiga mu mashuri yisumbuye.

Ati 'Ntsinze ikizamini cya Leta banyohereza kwiga mu mashuri yisumbuye, Leta irandihira ifatanyije na COPORWA, bikaba ari ibintu binshimishije.'

Bafite ibyifuzo kugira ngo ubuzima bukomeze gutera imbere

N'ubwo imibereho yabo yahindutse, abasigajwe inyuma n'amateka batuye mu Kagari ka Nyamabuye bagaragarije COPORWA ibyifuzo by'icyo bakorerwa kugira ngo babe abantu bifashije, bave mu buzima bwo guca inshuro.

Birikunzira Wellars ati 'Icyo nifuza badufasha ni ukwita ku bana n'urubyiruko bakadutera inkunga tukiga kugira ngo ubujiji butuvemo kuko iyo tutiga tuba ibirara tukajya kwiba dushaka ibyo kurya. Bazadufashe badushyire mu bigo bicumbikira abanyeshuri.'

Ndayisenga Bosco na we yifuza ko imbaraga zashyirwa mu bana bakiri bato bakabona uburezi.

Ati 'Nk'uko Leta ijya ibidushishikariza, imbaraga zashyirwa mu rubyiruko abana bakabona uburezi kuko burya ni zo mbaraga z'igihugu. Bamaze kwiga ndumva nko mu 2050 tuzaba turi abaturage bari ku rwego rumwe n'abandi Banyarwanda.'

Nyirabanguka Anatolie we yifuza ko ababyeyi n'abandi bakuze bashyirwa mu ishyirahamwe bagahabwa amatungo magufi yo korora kugira ngo babashe kwiteza imbere.

Ati 'Icyo nifuza ko batugezaho, nibaduhe ishyirahamwe ry'amatungo magufi tubashe korora twiteze imbere.'

Ntibitegera Emmanuel yasabye ko bahabwa igishoro bagakora ubucuruzi buciriritse kugira ngo bikorere bave mu buzima bwo guca inshuro.

Ikindi bahurizaho mu byifuzo byabo ni ugushakirwa isambu yo guhinga kugira ngo babashe kubona ibyo kurya bihingiye badategereje kujya guca inshuro.

Umuyobozi wa COPORWA, Bavakure Vincent, avuga ko muri iki gihe bari mu gikorwa cyo kwegera abasigajwe inyuma n'amateka kugira ngo bakire ibyifuzo byabo kugira ngo bizitabweho mu mushinga bagiye kubazanira.

Ati 'Iyi gahunda igamije kwegera aba baturage kugira ngo turebe ubuzima babayemo tunareba n'imishinga tugenda dukora harimo n'uyu wa PPIMA [Public Policy Information Monitoring and Advocacy] wateguwe na COPORWA ariko uterwa inkunga NPA [Norwegian People's Aid]. Ni umushinga uzegera abaturage kugira ngo ubafashe guhindura imyumvire no kugira ngo ibyifuzo byabo bishyirwe mu igenamigambi ry'akarere.'

Bavakure yavuze ko ikindi bazabakoreraho ubuvugizi kigatezwa imbere ari umuco wabo gakondo wo kubyina no kuvuza ikondera kugira ngo bagire itorero rishobora kuzajya rikodeshwa rikishyurwa amafaranga.

Yabijeje ko bazakomeza kubaba hafi no kubakorera ubuvugizi ku bibazo bafite kugira ngo bikemuke.

Abasigajwe inyuma n’amateka bo mu Murenge wa Mata mu Karere ka Nyaruguru bagiranye ibiganiro n’abayobozi ba COPORWA

Basigaye bafite isuku bitandukanye na mbere bakigira umwanda

Birikunzira Wellars yasabye ko abana bakwitabwaho bakiga nakazagira ejo heza

Bishimira ko bigishijwe kugira isuku bakaba batakirwara amavunja

Batanze ibitekerezo ku cyo babona bafashwa kikabateza imbere

Bvakure Vincent yabijeje ko bazakomeza kubaba hafi no kubakorera ubuvugizi ku bibazo bafite kugira ngo bikemuke

Ibitekerezo batanze byanditswe kugira ngo bizitabweho

Amwe mu mazu batuyemo mu Murenge wa Mata mu karere ka Nyaruguru

[email protected]

---

Source : http://igihe.com/amakuru/u-rwanda/article/nyaruguru-impinduka-ku-mibereho-y-abasigajwe-inyuma-n-amateka-bemeza-ko-bavuye

Urwego rw'Igihugu rushinzwe Kugenzura Imikorere y'Inzego zimwe z'Imirimo ifitiye Igihugu Akamaro(RURA), rwatangaje ko nubwo ibiciro by'ibikomoka kuri peteroli byiyongereyeho 17% ku isoko mpuzamahanga, Leta y'u Rwanda yafashe icyemezo cy'uko ibiciro muri Gicurasi na Kamena 2021 biguma uko byari bisanzwe. Leta ikaba yemeye kwigomwa amahooro yari asanzwe yakwa ku bikomoka kuri peteroli

Mu itangazo RURA yashyize hanze kuri uyu wa 20 Gicurasi 2021, yavuze ko izo mpinduka zabaye ku isoko mpuzamahanga zari gutuma ibiciro by'isoko ry'u Rwanda byiyongeraho 7%.

Itangazo riragira riti 'Nyuma y'uko ibiciro by'ibikomoka kuri peteroli byiyongeyeho 17% ku isoko mpuzamahanga, bikaba byari gutuma ku isoko ryo mu Rwanda byiyongeraho 7%; Leta y'u Rwanda yafashe icyemezo cy'uko ibiciro by'ibikomoka kuri peteroli mu mezi ya Gicurasi na Kamena biguma uko byari bisanzwe.'Leta yemeye kwigomwa ayo mahoro yari asanzwe yakwa ku bikomoka kuri peteroli.'

RURA yategetse ko igiciro cya lisansi i Kigali kitagomba kurenga 1.088 Frw kuri litiro, naho icya mazutu ntikirenge 1.054 Frw kuri litiro.

Ibiciro byagumishijweho byari byarashyizweho ku wa 5 Werurwe 2021. Icyo gihe byari byiyongereyeho 10% ku isoko ry'u Rwanda, kuko igiciro cya lisansi cyari cyiyongereyo 30% ku isoko mpuzamahanga, mu gihe icya mazutu cyo cyari cyiyongereyeho 26%.

Source : http://umuryango.rw/amakuru/mu-rwanda/ubukungu/article/leta-y-u-rwanda-yigomwe-amahoro-kugira-ngo-ibiciro-by-ibikomoka-kuri-peteroli