Blog

Iyi nama izamara iminsi ine yatangiye tariki 2 Kamena izageza kuri 5 Kamena 2021. Izatangirwamo ibiganiro bitandukanye byiga ku guteza imbere ubukungu, birimo gushyira hamwe imbaraga mu rugendo rugana ku iterambere, guhanga udushya mu by'ikoranabuhanga ndetse n'uruhare rwa muntu mu gukemura ibibazo Isi ihura nabyo.

Ubusanzwe iyi nama iba buri mwaka guhera mu 1997, uretse umwaka wa 2020 itabaye kubera icyorezo cya Covid-19.

Ihuza abayobozi batandukanye ndetse n'inzobere mu by'ubukungu ziturutse hirya no hino ku Isi mu bihugu birenga 120, birimo Leta Zunze Ubumwe za Amerika, u Bushinwa, Qatar, u Buhinde, n'ibindi.

Ibiro bya Minisitiri w'Intebe bibinyujije ku rubuga rwa Twitter, ni byo byatangaje ko Minisitiri Edouard Ngirente yatanze ikiganiro muri iyi nama ikomeye, mu muhango wo kuyifungura ku mugaragaro ku nshuro ya 24.

Uyu munsi, Minisitiri w'Intebe @EdNgirente yatanze ikiganiro mu muhango wo gufungura Inama ya 24 Mpuzamahanga ku Bukungu ya St. Petersburg irimo kubera mu Burusiya kuva ku itariki ya 2 kugeza ku ya 5 Kamena 2021. #SPIEF2021 pic.twitter.com/twFBkTKyFi

— Office of the PM | Rwanda (@PrimatureRwanda) June 3, 2021

Minisitiri Ngirente ni inzobere mu by'ubukungu, aho afite impamyabumenyi y'icyiciro cya gatatu cya Kaminuza, PhD, mu Ibarurishamibare n'ibijyanye n'Imari yakuye muri Université Catholique de Louvain yo mu Bubiligi.

Afite impamyabushobozi y'icyiciro cya Kabiri cya Kaminuza (Masters) mu ibarurishamibare mu by'ubuhinzi yakuye muri iyi kaminuza nyine, ndetse na Masters mu bijyanye no guhangana n'ingaruka mu by'Imari (financial risk management) yakuye muri Kaminuza ya Saint-Louis yo mu Bubiligi. Yize n'ibarurishamibare muri Kaminuza y'u Rwanda.

Mbere y'uko aba Minisitiri w'Intebe, yari Umujyanama mukuru w'Umuyobozi wa Banki y'Isi, yabaye kandi Umuyobozi w'Igenamigambi muri Minisiteri y'Imari n'Igenamigambi, ndetse nyuma aza kugirwa Umujyanama mu by'Ubukungu muri MINECOFIN.

Uretse iyi mirimo yose yakoze mu bijyanye n'ubukungu, mu 2016 yagizwe Umujyanama Mukuru mu by'Ubukungu mu buyobozi bukuru bwa Banki y'Isi ahagarariye ibihugu 22 birimo n'u Rwanda.

Gutanga ikiganiro muri iyi nama mpuzamahanga yiga ku bukungu ntibitangaje cyane kuko ni umwe mu bantu bafite inararibonye mu bijyanye n'imari.

Abayobozi bakomeye bazatanga ibaganiro muri iyi nama ya St Petersburg yiga ku bukungu, ni Perezida w'u Burusiya, Vladimir Putin, Chancelier wa Autriche, Sebastian Kurz ndetse na Emir wa Qatar, Sheikh Tamim bin Hamad Al Thani.

Minisitiri w’Intebe, Dr Edouard Ngirente, yatanze ikiganiro mu nama ya 24 mpuzamahanga yiga ku bukungu ya St Petersburg mu Burusiya

Iyi nama iba buri mu mwaka kuva 1997 uretse mu 2020 itabaye kubera icyorezo cya Covid-19

Dr. Edouard Ngirente ni inararibonye mu byubukungu

---

Source : http://igihe.com/amakuru/u-rwanda/article/minisitiri-w-intebe-dr-ngirente-yatanze-ikiganiro-mu-nama-mpuzamahanga-yiga-ku

Mu ruzinduko yagiriye muri Tanzania, kuri uyu wa Kane tariki 3 Kamena 2021, Minisitiri w'Ububanyi n'Amahanga n'Ubutwererane, Dr Biruta Vincent yashyikirije Perezida wa Tanzania, ubutumwa yagenewe n'Umukuru w'Igihugu cy'u Rwanda, Paul Kagame.

Ni ubutumwa bwo kwihanganisha Abanye-Tanzania mu gihe bakiri mu kababaro ko kubura uwari Perezida wabo, Dr John Pombe Magufuli ndetse no kwibutsa Perezida Samia Suluhu Hassan ubuvandimwe n'ubucuti ibihugu byombi bifitanye.

Dr Biruta yagize ati 'Naje hano nk'intumwa yihariye ya Perezida Kagame nzanye ubutumwa bwa Perezida wa Repubulika Yunze Ubumwe ya Tanzania, nabumuhaye ariko twanagize amahirwe yo kuganira ku bufatanye bw'ibihugu byombi ndetse na bimwe mu bibazo byugarije Akarere ka Afurika y'Uburasirazuba.'

Yakomeje agira ati 'Ibihugu byombi bifitanye imishinga mu nzego zitandukanye nk'urw'Ingufu aho dufite umushinga w'amashanyarazi wa Rusumo, turi gukorana ku nzira ya Gari ya Moshi kandi muzi ko u Rwanda ruri gukoresha icyambu cya Dar es Salaam mu kujyana ibicuruzwa mu mahanga cyangwa kubizana mu Rwanda.'

Minisitiri Dr Biruta yavuze ko ibihugu byombi bifitanye imishinga y'ubufatanye mu nzego zitandukanye ariko hashobora no gutekerezwa uko iyi mishinga yakwagurwa ikaba myinshi ndetse n'iyatangiye ikihutishwa.

Nyuma yo kwakira ubutumwa bwa mugenzi we, Perezida Suluhu yavuze ko yabwakiranye yombi ndetse amushimira uburyo akomeje kwifuza no kugaragaza ubushake bw'uko ibihugu byombi byabana neza mu bufatanye n'ubuhahirane.

Itangazo ryashyizweho umukono n'Umuvugizi wa Guverinoma ya Tanzania, Gerson Msigwa, rivuga ko Perezida Suluhu yijeje ko igihugu cye cyiteguye gukomeza gukorana neza n'u Rwanda haba mu mishinga isanzwe yaratangiye ndetse n'indi impande zombi zishobora kuganiraho.

Rikomeza rigira riti 'Perezida Suluhu yashimiye Perezida Kagame wamwoherereje ubutumwa bwo kumwihanganisha ariko anamwizeza ko Tanzania yiteguye gukomeza gushyira imbaraga mu mubano wayo n'u Rwanda.'

Mu by'ingenzi, Perezida Suluhu yijeje ko bigiye kongerwamo imbaraga ni imishinga ibihugu byombi bihuriyeho ndetse amwizeza ko hagiye gushyirwaho itsinda rihuriweho n'ibihugu byombi mu kwiga uko iyo mishinga yakwihutishwa ahari imbogamizi iryo tsinda rikahagaragaza.

Source: IGIHE

Source : http://umuryango.rw/amakuru/mu-rwanda/politiki/article/perezida-suluhu-yiyemeje-kwihutisha-imishinga-u-rwanda-na-tanzania-bahuriyeho

Amakuru dukesha Football365 Afrique, avuga ko kuva uyu mukinnyi yasohoka ku rutonde rw'Amavubi Mashami Vincent yitabaje ku mikino ibiri ya gicuti na Central Africa, ahamagarwa n'abayobozi b'Ishyirahamwe ry'umupira w'amaguru mu Rwanda 'FERWAFA' ndetse n'umutoza Mashami, ariko ntiyitabe telephone cyangwa ngo asubize ubutumwa.

Si ubwa mbere uyu rutahizamu ufite umubyeyi w'umunyarwanda yanze kwitabira ubutumire bw'Amavubi, kubera ko ubwo ikipe y'igihugu yakinaga imikino yo gushaka itike y'igikombe cya Afurika, nabwo yitabajwe ariko yanga kwitabira ubutumire.

Kevin Monnet Paquet yamaze gutandukana n'ikipe ya St Etienne yo mu Bufaransa yakiniraga, kuri ubu akaba nta yindi kipe arabona azakinira umwaka utaha.

Paquet w'imyaka 32 y'amavuko, avuka kuri Nyina w'umunyarwanda naho Se akaba umufaransa. Uyu mukinnyi yasabwe kenshi gukinira Amavubi, ariko yaryumyeho yanze kwitabira ubutumire ndetse ntacyo aba ashaka no gutangaza ku bijyanye no gukinira Amavubi.

Uyu mukinnyi ari ku rutonde rwa 34 Mashami yitabaje ku mikino ibiri ya gicuti u Rwanda ruzakina na Central Africa, aho umukino wa mbere uzakinwa kuri uyu wa Gatanu tariki ya 04 Kamena, mu gihe undi wa kabiri uzakinwa tariki ya 06 Kamena 2021 kuri Stade ya Kigali i Nyamirambo.

Iyi mikino izakinwa mu rwego rwo kwitegura imikino yo gushaka itike y'igikombe cy'Isi izakinwa muri Nzeri, Ukwakira, ndetse n'Ugushyingo 2021.

Ku nshuro ya kabiri Kevin Monnet Paquet yanze kwitabira ubutumire bw’Amavubi

Source : https://inyarwanda.com/inkuru/106234/ku-nshuro-ya-kabiri-kevin-monnet-paquet-yanze-kwitabira-ubutumire-bwamavubi-106234.html

Uyu mukinnyi watsindiye City ibitego 260 yanze kuva muri iyi kipe adasize urwibutso ariyo mpamvu yafashe urufunguzo rw'imwe mu modoka ze arangije aruha ushinzwe gutunganya imyenda y'abakinnyi [Kit man].

Aguero mbere y'uko ava muri City yari amazemo imyaka 10,yaguriye abakozi b'ikipe amasaha 60 yo mu bwoko bwa Hublot cyangwa Tag Heuer mu rwego rwo kumushimira ibyo bamukoreye.

Uyu rutahizamu ntiyahagaritse gukora neza kuko yahaye imodoka ye yo mu bwoko bwa Range Rover Evoque uyu mukozi uhembwe umushahara udakanganye.

Aguero akimara guha uyu mukozi imodoka ihenze yahise amuhobera ndetse uyu mugabo yari afite amarangamutima menshi.

Umwe mu bashyize hanze iyi videwo yagize ati 'Ntukibagirwe abantu mwakoranye.'

Uyu mukinnyi yaje atwaye iyi modoka,hanyuma ayivamo akuramo urufunguzo arangije aruhereza uyu mukozi wa City aramubwira ati “Your car, puto”.

Aguero yamaze kwerekeza muri FC Barcelona aho yasinye amasezerano y'imyaka 2.

Source : http://umuryango.rw/imyidagaduro/imikino/article/sergio-aguero-yahinduriye-amateka-ushinzwe-imyenda-mu-ikipe-ya-manchester-city

Uyu mutoza w'inararibonye watwaye ibikombe byinshi mu mupira w'amaguru,yatangiye avuga ko yashimiye Perezida Perez kuba yongeye kumugarura mu ikipe ya mbere ku isi ndetse avuga ko azakora ibishoboka byose ngo yongere atware ibikombe.

Abajijwe ku bakinnyi b'ikipe badahagaze neza,Ancelotti yagize ati 'Ndacyafitiye icyubahiro Gareth, Isco, Marcelo.Bazabona umwanya wo kugaragaza ko bashoboye gukinira Real Madrid.

Benzema yazamuye urwego rwe mu myaka ishize,ndamukunda.Ntekereza ko tudakeneye kugura abakinnyi ngo dutsinde ibitego byinshi ahubwo dukeneye ko Benzema atsinda 50 aho kuba 30.Na Vinicius akeneye gutsinda ibitego byinshi.'

Abajijwe ku hazaza ha Ramos yagize ati 'Biragaragara ko Ramos afite akamaro cyane kandi wagize uruhare mu gutuma ikipe itwara ibikombe byinshi.Ndabizi ko hari ibiganiro byo kongera amasezerano gusa nta byinshi ndamenya,nimbimenya nzababwira.'

Abajijwe ku kugura Mbappe yagize ati 'Abakinnyi beza baguha amahirwe menshi yo gutsinda.Ni byiza kugira ikipe yuzuye,irimo abakinnyi bafite ubuhanga ndetse banafite ubushake bwo kwitanga,gukinira hamwe ndetse n'ubushobozi bw'umuntu ku giti cye n'ingenzi.

Kuri Hazard yagize ati 'N'umukinnyi wo ku rwego rwo hejuru cyane ariko imvune zamubujije kugaragaza ubuhanga bwe.Icyakora,uyu mwaka ushobora kuba ariwo agiye kugaruka.'

Ageze ku byerekeye kugaruka mu ikipe kwa Cristiano Ronaldo,Ancelotti yatunguye abanyamakuru kubera ibyo yamuvuzeho.

Yagize ati 'Cristiano Ronaldo kugaruka?Mwumve ko mufitiye icyubahiro gusa sinkunda kuvuga ku bakinnyi bo mu yandi makipe gusa aracyari umukinnyi mwiza nkuko yahoze.

Abanyamakuru bo mu Butaliyani bambajije niba Cristiano atararangiye.Narababajije nti 'amaze gutsinda ibitego bingahe?,30?35?.Nibyo koko yararangiye.Yari amenyereye gutsinda 50.'

Carlo Ancelotti yavuze ko akunda Zidane ndetse amwubaha yiteguye kumuvugisha bakaganira cyane ko banakoranye.

Carlo Ancelotti yatangiye akazi ke ndetse ikipe yongereye Lucas Vasquez amasezerano muri Real madrid azamugeza muri 2024.

Source : http://umuryango.rw/imyidagaduro/imikino/article/carlo-ancelotti-yahaye-igisubizo-gitangaje-abamubajije-niba-cristiano-ronaldo

Ku munsi w’ejo ku wa Gatanu tariki ya 4 Gicurasi 2021 ni wo munsi wa nyuma wo gutanga kandidatire ku bashaka kwiyamamarirza kuyobora ishyirahamwe ry’umupira w’amaguru mu Rwanda 'FERWAFA’, uretse Rurangirwa Louis wemeje ko yamaze gutanga kandidatire ye nta wundi urabyemeza, ni mu gihe hari andi mazina 2 agenda agaruka mu mitwe y’abantu.

Aya matora ateganyijwe ku wa 27 Kamena 2021, akazabera muri Lemigo Hotel, akaba agiye kuba nyuma y’uko 6 mu bari bagize Komite Nyobozi ya FERWAFA barimo na perezida Rtd Brig Gen Sekamana Jean Damascene beguye kandi 4 basigaye bakaba nta cyemezo bafata.

Tariki ya 1 Kamena nibwo gutanga Kandidatire byatangiye bikaba bizarangira ku munsi w’ejo ku wa Gatanu tariki ya 4 Kamena 2021.

Rurangirwa Louis wari waniyamamaje muri 2018 ubwo yatsindwaga na Rtd Brig Gen Sekamana Jean Damascene, ni we wayitanze ku munsi wa mbere.

Kugeza ubu nta wundi muntu uramenyekana watanze kandidatire cyane ko muri FERWAFA bavuga ko bazabatangaza mu cyumweru gitaha hamenyekane abujuje ibisabwa.

Gusa hari amazina arimo kugenda avugwa cyane nka Gisanura Ngenzi Raoul wabaye visi perezida wa FERWAFA kuva muri 2006 ubwo yari yungirije Général Kazura Jean Bosco akomeza no kuri komite ya Ntagungira Celestin, bivugwa ko ari umwe mu bashobora gutanga kandidatire ye.

Uyu mugabo wanabaye muri Komite Nyobozi ya CECAFA amakuru avuga ko mu gihe yaba atowe yazungirizwa na Gacinya Chance Denis wigeze kuba umuyobozi wa Rayon Sports.

Irindi zina rivugwa ni Nizeyimana Olivier usanzwe ari perezida w’ikipe ya Mukura VS, akaba na nyiri kompanyi itwara abagenzi ya Volcano, na we aravugwa ko ashobora kwiyamamariza kuyobora iri shyirahamwe mu gihe cy’imyaka 4.

Uyu mugabo uzibukirwa ku gikombe cy’Amahoro yahesheje Mukura VS muri 2018, mu gihe yaba koko yiyamamaje ni nawe uhabwa amahirwe yo kuyiyobora aho bivugwa ko muri Komite Nyobozi ye azagumya kungirizwa na Habyarimana Marcel Matiku usanzwe ari visi perezida wa FERWAFA.

Tariki ya 5 kugeza ku ya 8 Kamena ni umwanya wo kwiga kuri Kandidatire, tariki ya 9 Kamena 2021 nibwo hazatangazwa abemerewe kwiyamamaza by’agateganyo.

Nizeyimana Olivier umwe mu bahabwa amahirwe yo kuyobora FERWAFA

Gisanura biravugwa ko ashobora kongera kwiyamamariza kuyobora FERWAFA

Rurangirwa Louis yamaze gutanga kandidatire ye

Source : http://isimbi.rw/siporo/article/harabura-umunsi-umwe-gutanga-kandidatire-bikarangira-amazina-abiri-akomeje-kuvugwa-muri-ferwafa

Gukunda no gukundwa ni ibintu byizana, kandi ntawe bitabaho muri iyi si dutuyeho, yaba ashaje cyangwa ari muto. Gusa ikigora ni ukumenya niba hari umuntu ukwitayeho cyangwa ugukunda, ngo mube mwahuza urugwiro, mu gihe nawe ukeneye kubona umukunzi.
Nubona rero ibimenyetso ku mukobwa wiyumvamo ntuzace ku ruhande uzahite umukura mu buribwe bw'urukundo maze nawe umukunde:

.Inseko
Umukobwa yagukunze ntiyifuza kukubona ubabaye narimwe, bityo bigatuma yumva yakubwira amagambo agushimisha, kugira ngo akubone useka. Usanga kandi iyo yinjiye aho uri, murebana akamwenyura, ndetse kuburyo iyo munaganira acishamo agaseka ku tuntu tumwe na tumwe mubamuganira, ngo akwereke ko akwitayeho cyane.

.Akunda kukureba cyane
Amaso burya ni igice cy'umubiri kidasanzwe, kuko gitanga ubutumwa bwinshi mu bwonko bw'umuntu. Mu gihe rero umukobwa azaba yagukunze azahora ashaka kukwitegereza, cyane cyane nkiyo umunyuzeho, iyo muri kumwe muganira, iyo mwahuriye nko mu birori, cyangwa ahandi hose hahuza abantu benshi. Cyane cyane nushaka kumureba uzabona ko muzajya mukunda guhuza amaso kenshi, agasa nkuwijijisha akareba hirya.

.Ibimenyetso by'umubiri
Ibimenyetso by'umubiri bikunda kuvuga ibintu byinshi, ariko si abantu benshi bakunze kubisobanukirwa. Nubona umukobwa muhuye cyangwa yinjiye ahantu uri akakwicira akajisho atavuze, akagukubita agashyi, akagukora mu mugongo, akakwicara iruhande, n'ibindi byinshi, ujye umenya ko hari ikintu kidasanzwe arimo kukwereka.

.Akunda kukuvuga
Mu byukuri nta mukobwa utagira ikigare (group), iyo bari kumwe rero bakunda kuganira ibintu byinshi, cyane cyane ntibashobora gutandukana batavuze ku ngingo y'abasore, baba incuti zabo cyangwa abo bakorana. Iyo bateruye icyo kiganiro rero, usanga umukobwa wagupfuye ahora agutanga ho ingero muri bagenzibe, icyo bavuze cyose akagisanisha nawe.

.Azagusaba ko musohokana
Ushobora kuba wari inshuti n'umukobwa bisanzwe, mukorana , mwigana, cyangwa se hari ibindi bintubyinshi muhuriramo, byazagera aho, ukumva atangiye kujya agusaba ko mwasohoka mwenyine . mu byukuri aba ashaka ko hari icyo mwazaganiraho mwiherereye mutari muri rwaserera.

.Azakoresha uko ashoboye kugirango aguhore iruhande
Burya iyo ukunda umuntu ubawunva mwahora muri kumwe cyane. Umukobwa rero iyo yakwikundiye, akoresha ibishoboka byose akajya aba ari aho nawe ukunda kujya, kandi mukaza kubonana. Urugero, nkiyo ukunda kujya kubyina, kureba umupira se, n'ahandi, usanga akunda kuhaza, kandi abacuti be bataha agasigarana nawe, mukavugana ho amagambo make gusa, akitahira.

.Azakubwira ko akunda imico yawe
Umukobwa nakubwira ko yikundira imico yawe, mbese nk'ukuntu ugenda, useka, ijwi, ubwitonzi, kwambara se, n'utundi tuntu twinshi tukwerekeyeho, azaba akubwiye ko agukunda. Nibwo buryo bwe azaba akoresheje kugira ngo akwereke ko yagukunze.

.Akwereka ko akwitayeho buri gihe
Burya umukobwa wagukunze, aba ashaka kukwereka ko ariwe muntu ukwitayeho kurusha abandi. Nkiyo murikumwe na bagenzi banyu, usanga akunganira mu bintu byose uvuga, bakubaza nk'ikibazo nawe akagushyigikira, wavuga ikintu akakunganira, kandi akagerageza kwereka abandi ko uvuze ibintu bifite akamaro.

.Akunda kukugira Inama z'ubuzima
Niba umukobwa yarakubengutse uzajya wumva arimo kukugira inama z'ubuzima, akwereka icyo wakora ngo witeze imbere n'icyo utagomba gukora. Ibi kandi nta wanya munini bizamutwara, kuko azabikubwira igihe muzaba muganira.

.Aragufuhira
Gufuha ni ibintu bigirwa na benshi, cyane cyane iyo bakundana, kandi usanga umuntu ufuhira undi, aba amukunda koko by'ukuri. Iyo umukobwa rero mumaze kumenyerana, muganira bisanzwe, ushobora kutamenya ko yagukunze. Ariko nubona akunda kukubaza niba umukobwa runaka ari inshuti yawe, cyangwa akakubaza icyo upanga n'umukobwa yigeze kubabonana, uzamenye ko burya atabikunda, ahubwo aba ashaka ko ari we wenyine wakikundira.

Source : http://umuryango.rw/ubuzima-115/udushya/article/musore-dore-ibimenyetso-bizakwereka-ko-umukobwa-yagukunze-ariko-akabura-aho

Amazi y'amashyuza asanzwe aboneka mu Murenge wa Nyamyumba mu Karere ka Rubavu ku nkombe z'ikiya cya Kivu yari yaraburiwe irengero nyuma y'imitingito yongeye kugaragara muri ako gace k'igihugu.

Ayo mazi azimiye nyuma y'uko ku wa 27 Gicurasi 2021 ku isaha ya saa saba n'iminota 54 z'ijoro, humvikanye umutingito mu Karere ka Rubavu ufite igipimo cya 3.9 wakubitiye aha isoko y'amashyuza iherereye.

Ubu muruyu murenge wa Nyamyumba nkuko bigaragara kuriyi videwo ikurikira bigaragara ko amashyuza yagarutse aho yahoze https://twitter.com/i/status/1400396162834829312.

Kigalinews24 ivugana n'Umunyamabanga Nshyingwabikorwa w'Umurenge wa Nyamyumba, Kazendebe Hertien, yavuze ko amashyuza yagiye ariko hari ahandi babonye mu Kivu hacumba imyotsi bagakeka ko inzira yaba yayobeyemo.

yagize ati 'Amazi yagiye ntiwabona ayo koga, kereka ahari isoko yogerwamo n'abagore ni ho haboneka makeya nabwo utakwicaramo, uretse kuyavoma'. ubu biravugwa ko ayo mazi yaba yari yayobeye muriyo nzira yo mukiyaga cya Kivu akaba ariyo mpamvu yagarutse .

ubu igitegerejwe nabaturage nuko nayo mukarere ka Rsizi yaba agiye kugaruka doreko nayo yaburiwe irendero nyuma yiruka ry'ikirunga cya Nyiragongo co muri RD Congo.

The post Rubavu: Nyuma y'icyumweru gishize amazi y'Amashyuza aboneka mu murenge wa Nyamyumba yakamye, ubu yose yagarutse. appeared first on .

Source : https://kigalinews24.com/2021/06/03/rubavu-nyuma-yicyumweru-gishize-amazi-yamashyuza-aboneka-mu-murenge-wa-nyamyumba-yakamye-ubu-yose-yagarutse/

Guverinoma y'u Rwanda iratangaza ko ishaka kongera umusaruro w'amata ari nako hongerwa umubare w'ayo Umunyarwanda anywa ku mwaka ageze kuri litiro 72 kuri ubu.

Muri gahunda, Leta y'u Rwanda yiyemeje kongera umukamo w'amata ukava kuri toni 895 wabonetse mu mwaka wa 2020 ukagera kuri toni 1.274.554 mu 2024.

Ubwo hizihizwaga Umunsi Mpuzamahanga wo kunywa amata kuruyu wa Kabiri, tariki ya 1 Kamena 2021 mu birori byabereye mu Karere ka Burera mu Murenge Ruhunde, ababyeyi bagiriwe inama yo kongera umubare w'inka zitanga umukamo uhagije no gushishikariza abana babo kuyanywa bakabarinda ibigage n'ibindi binyobwa bisembuye kuko bigira ingaruka mbi ku buzima bwabo.

Umubare munini w'abatuye aka karere batunzwe n'ubuhinzi n'ubworozi ariko haracyagaragara ibibazo by'imirire mibi n'igwingira mu bana, bituruka ku myumvire ikiri hasi ku kunywa amata n'umusaruro muke uboneka muri rusange.

Iyo uganiriye na bamwe muri abo babyeyi, usanga hari abagifite imyumvire y'uko korora ibimasa ari byo bibafitiye inyungu kuko bitanga ifumbire nyinshi kandi mu gihe gito. Bituma babona umusaruro uhagije ntibite ku nka zitanga umukamo.

Uwiragiye Valérie yagize ati 'Ikimasa kirabyinagira cyane kigacundagura isaso ari na ko ifumbire yiyongera ku buryo buri cyumweru ntindura, ariko imbyeyi yo wamara hafi ukwezi utegereje ifumbire. Amata yo tuyanywa ari uko twayaguze mu mafaranga dukura mu buhinzi, gusa ubu twumvise akamaro ko kunywa amata ku buryo ngiye guhindura ubworozi nkajya mbona iyo fumbire n'amata nkayabona.'

Karimwabo Joseph na we yagize ati 'Simbabeshya mu rugo dushobora no kumara icyumweru tutanyoye amata ahanini kuko tuyabona tuyaguze gusa. Iyo hari inka y'imbyeyi ni bwo dupfa kuyanywa kandi murumva ntahahora. Ubu noroye ibimasa bibiri kuko nashakaga ifumbire ihagije ariko ubu maze kubona ko nakorora imbyeyi imwe n'ikimasa nkabona byose tugahashya imirire mibi no mu baturanyi bacu.'

Umuyobozi w'Akarere ka Burera wungirije ushinzwe Imari, Ubukungu n'Iterambere Munyaneza Joseph yemeza ko nubwo hari abagifite imyumvire yo korora ibimasa cyane cyane bagamije kubona ifumbire ngo bazakomeza ubukangurambaga bwo gushishikariza no korohereza abaturage kubona inka zitanga umukamo n'ifumbire icyarimwe.

Yagize ati 'Byaba biteye agahinda kubona mu rugo rufite inka ikamwa hagaragaye imirire mibi n'igwingira biturutse ku kugurisha amata yose yakamye. Mbere yo gutekereza kugurisha amata, banza uhaze abagize umuryango. Tuzakomeza ubukangurambaga kandi twarabutangiye ku buryo ubona ko hari abagenda bahindura iyo myumvire, tuzakomeza kwegera abaturage tubigishe tunaborohereze kubona inka zitanga ifumbire n'amata icya rimwe bityo bizadufashe no kubona amata yo kunywa ahagije turandure imirire mibi cyane cyane ikigaragara mu bana bato bikabatera no kugwingira'.

Umunyamabanga Nshingwabikorwa w'ishyirahamwe ry'amakusanyirizo mu Rwanda Musiime Umurungi Florence avuga ko icyo bagamije ari ukwigisha no guca ingeso mbi yo kureresha abana ibigage n'ibindi bisindisha ahubwo bagahabwa amata abafasha mu mikurire yabo.

Yagize ati 'Dushaka kwigisha abaturage korora inka zitanga umukamo uhagije aho kugwiza inka zidatanga umukamo zikagabanywa, naho umuco wo kunywa amata wo ugasimbura uwo kumenyereza abana kunywa imisururu, ibigage, inzoga n'ibindi bidafitiye umubiri akamaro'.

Muri ubu bukangurambaga bwo kunywa amata, abana biga mu Rwunge rw'Amashuli rwa Gitovu bagera kuri 600 bahawe litiro 300 z'amata ndetse no mu yandi mashuri atandukanye hagiye hatangwa amata ku banyeshuri.

Amata ni ikinyobwa gikungahe ku ntungamubiri nyinshi zikenerwa n'umubiri w'umuntu nka calcium, protein na vitamin D.

The post Burera: Umuco wo kureresha abana ikigage n'umusururu wasimbujwe uwo kubareresha amata. appeared first on .

Source : https://kigalinews24.com/2021/06/03/burera-umuco-wo-kureresha-abana-ikigage-numusururu-wasimbujwe-uwo-kubareresha-amata/

Imibare y'Ikigo cy'Igihugu gishinzwe Ubuzima, RBC, igaragaza ko ibibazo byatewe na Covid-19, byatumye habaho ubwiyongere bukabije bw'abagana serivisi z'ubuvuzi bwo mu mutwe bafite ibibazo bifitanye isano no gushaka kwiyahura.

Abakiriwe muri serivisi z'ubuvuzi bw'indwara zo mu mutwe kubera ikibazo cyo kugerageza kwiyahura mu 2019 [Ni ukuvuga kuva muri Mutarama kugeza mu Ukuboza 2019] banganaga na 916. Mu 2020 bariyongereye, bagera ku 1374.

Ni ukuvuga ko biyongereye ku kigero cya 33%, aho RBC ivuga ko abenshi ari abagabo dore ko bavuye kuri 54,8% mu 2019 mu gihe bageze kuri 60% mu 2020.

Mu minsi ibiri ishize, mu gihugu hose havuzwe abantu batatu biyahuye, umwe ni umugabo w'imyaka 36 wo mu Kagari ka Munini mu Murenge wa Ruhango wiyahuye asize yanditse ibaruwa ivuga ko arambiwe kubaho.

Meya w'Akarere Ruhango, Habarurema Valens, yabwiye IGIHE muri aka gace hadakunze kugaragara abantu bapfa biyahuye anasaba abaturage kubyirinda no kujya begera ubuyobozi igihe bafite ibibazo.

Ati ' Ubutumwa bwa mbere ni uko umuntu wese ashobora kugira ibibazo ariko ntakwiye kwiyahura kuko nk'ubuyobozi tuba duhari n'abaturage baba bahari kugira ngo dufatanye.'

'Rero numva umuntu abaye agifite ubushobozi bwo kubigaragaza yajya yegera ubuyobozi bwaba ubwo hasi n'abaturage akababwira bakamufasha kugikemura babinanirwa akabigeza ku buyobozi bwo hejuru atarinze kwiyambura ubuzima.'

Tariki ya Mbere Kamena 2021, mu Murenge wa Nyamirama mu Karere ka Kayonza hagaragaye umurambo w'umugabo wiyahuye mu cyuzi nyuma yo gushyamirana n'umugore we bapfa ko yamubujije guhana umwana babyaranye.

Umunyamabanga Nshingwabikorwa w'Umurenge wa Nyamirama, Nyirabizeyimana Immaculée, yasobanuriye IGIHE iby'urupfu rw'uyu mugabo.

Ati 'Yatonganye n'umugore we bapfa umwana yabwiraga ngo ajye kuryama noneho biza gutuma umugabo akubita umugore abaturanyi barabakiza baranabaganiriza umugore ajya kuryama undi ahita asohoka aragenda ajya kucyuzi ariyahura.'

Yongeyeho ko muri aka gace hakunze kugaragara abantu bapfa biyahuye n'ubwo atari benshi.

Mu gitondo cyo kuri uyu wa Gatatu kandi mu Murenge wa Kimisagara, Akarere ka Nyarugenge hagaragaye umurambo w'Umunyamategeko witwa Bukuru Ntwari witabye Imana yiyahuye asimbutse igorofa ya kane mu isoko rizwi nka 'Inkundamahoro.'

Ubushakashatsi bwa RBC bwo mu 2018, bwagaragaje ko mu banyarwanda bose nibura umuntu umwe muri batanu [1/5], afite uburwayi bwo mu mutwe bumwe cyangwa bwinshi. Ni mu gihe urubyiruko ruri hagati y'imyaka 14-18 rwagaragaje ko rufite ibibazo byo mu mutwe ku rwego rwa 10%.

Ubwo bushakashatsi bwagaragaje ko agahinda gakabije kenshi gakunda kugendana n'ibimenyetso byo gushaka kwiyahura, kumva umuntu yataye agaciro muri we, aho kari kuri 11,9% mu banyarwanda bose muri rusange.

Umugabo w'imyaka 36 wo mu Karere ka Ruhango yagaragaye yiyahuye

---

Source : http://igihe.com/amakuru/u-rwanda/article/mu-minsi-2-abagabo-batatu-bariyahuye-umwe-yiyambuye-ubuzima-kubera-umwana-wanze