Blog

Nyuma y’uko yiyunze n’inzu itunganya umuziki ya The Mane Music Label, ikaba ari nayo irerebera inyungu ze muri muzika, umuhanzikazi nyarwanda Marina yasohoye indirimbo ‘I’m sorry’ asaba imbabazi The Mane.

Mu mpera za Mata 2021 nibwo Marina yatangaje ko yatandukanye na The Mane Music Label k’ubwumvikane bw’impande zombi abashimira ibyo bamukoreye.

Bidateye kabiri, Bad Rama akaba umuyobozi w’iyi nzu itunganya umuziki, abinyujije ku rukuta rwe rwa Instagram, yavuze ko uyu muhanzikazi yamaze kugaruka muri The Mane ndetse agiye gusohora indirimbo isaba imbazi inakubiyemo byose ku isezera rye, hari mu mpera z’ukwezi gushize.

Iyi ndirimbo ikaba yamaze gusohoka aho Marina yumvikana asaba imbabazi.

Hari aho avuga ko na we ari umuntu yakosa ariko ibyo yakoze yari ameze nk’uri kurota.

Ati”Byasaga nk’aho ndi kurota bituma nkora ibidakwiye, I’m Sorry ku bw’amakosa yose nanjye ndi umuntu nta we udakosa ku Isi!'

Akomeza avuga ko yicuza kuba imitwe y’inkuru yarabaye we agatera amarira abamukunda.

Hari aho avuga kandi ko yari yashutswe, gusa ngo ntacyo yakora ngo asubize ibihe inyuma.

Ati 'Nta kintu nakora ngo nsibe ibyahise, mbishoboye nasubiza ibihe inyuma, nanjye nari nagoswe, ngera aho nicuza, sinzi uwari wanshutse.”

“Mumbabarire ntabwo mpakana(I’m sorry and I can’t deny) ko nahubutse!'

Marina yinjiye muri The Mane mu mpera za 2017 ndetse akaba ari nabwo yari atangiye kwinjira mu muziki, izina yubatse yaryubakiye muri iyi nzu itunganya umuziki.

Marina yasabye imbabazi abafana be na The Mane ya Bad Rama

Ni mu gikorwa cyiswe 'It's Ability Talents' cyateguwe na Uwezo Youth Empowerment kubufatanye na The Trackslayer Music, cyatangijwe kuri uyu wa Kane tariki 03 Kamena 2021, aho studio ya Producer Trackslayer ikorera i Nyamirambo.

Uyu munsi abanyempano barenga 20 mu rubyiruko rufite ubumuga rwo mu Mujyi wa Kigali barimo abo mu Karere ka Kicukiro, Gasabo na Nyarugenge, banyuze imbere y'Akanama Nkemurampaka buri wese agaragaza impano yifitemo, hanyuma agahabwa amanota hakurikijwe uko yitwaye.

Ni igikorwa cyitabiriwe na bamwe mu basanzwe bafite indirimbo ariko zitamenyekane ku mpamvu basobanura ko babuze ubushobozi bacika intege. Harimo n'abandi basanzwe bafasha abahanzi mu miririmbire n'umukobwa umwe witabiriye ArtRwanda-Ubuhanzi.

Buri wese wiyandikishije muri iki gikorwa yavugaga impano yifitemo. Hari abavuze ko bazi kuvuga imivugo, kwandika indirimbo, gucuranga ibikoresho bya muzika, gukora amashusho, kuvuza ingoma, gusetsa (Comedy), gufotora, gufunganya amajwi n'ibindi.

Abitabiriye barimo Iryivuze Clarisse, Fausta Umutoniwase, Uwineza Olivier, Kayiranga Sedrick, Ntihinyurwa Olivier, Obed Gasangwa, Uwicyeza Nkana Yvonne, Uwayo Anitha, Charles Birekereho na Sibomana Jean Claude.

Hari kandi Cyiza Otto, Ntakirutimana Joseph, Tuyishimire Emmanuella, Haragirimana Claver, Twagirayezu Olivier, Bazambaza Slots, Mukingambeho Herniette, Ndayisaba Jean Damascene, Mutabazi Omar na Nshimyuremyi Ernest.

Umuryango Uwezo Youth Empowerment watangiye mu 2013, zimwe mu ntego ufite harimo guteze imbere urubyiruko rufite ubumuga binyuze mu mpano, mu mikino, mu myidagaduro n'ibindi bigamije gukora ubuvugizi ku bushobozi bwabo ariko hanagamijwe no kuba amahirwe atuma bibona mu muryango.

Uyu muryango ugitangira ntiwahise ushyire mu ngiro buri ntego wihaye bitewe n'uko wari ukiyubaka. Uko wagiye wagura ibikorwa ukorana n'urubyiruko bafite ubumuga hirya no hino mu gihugu niko bagiye bavumbura impano muri bo.

Gusa, uyu muryango wagiye uzitirwa n'uko waburaga uko wabafasha. Ku bw'amahirwe, The Trackslayer Music yarabegereye ibagezaho igitekerezo cyo gufasha urubyiruko rufite ubumuga kuzamura impano zabo no kuzibyaza umusaruro.

Omar Satir Bahati Umuyobozi w'Umuryango Owezo Youth Empowerment yabwiye INYARWANDA, ko bahuje imbaraga na The Trackslayer Music kugira ngo bateze imbere impano z'abafite ubumuga, kandi ko nta cyiciro na kimwe baheje muri iki gikorwa.

Akomeza ati 'Tuzashingira kuri byinshi. Icya mbere twebwe ntabwo ari amarushanwa turi gukoresha, ahubwo ni igikorwa cyo guteza imbere impano nk'uko iki gikorwa kibivuga ni uguteza imbere impano zubakiye ku bushobozi.'

Akomeza ati 'Icya kabiri turifuza guha amahirwe ibyiciro byose […] Hano wenda twahahuriye kubera ko ni ahatunganyirizwa umuziki n'ubusanzwe turibanda cyane ku kuririmba, imivugo, ikinamico n'ibindi bishobora kuza muri studio cyangwa bikaba byategurwa n'ubundi buryo ariko impano ni nyinshi, hari abanyabugeni, hari abashushanya, hari abakora iby'ubukorikori, hari abakora amasiporo…izo zose ni impano ziri mu rubyiruko bafite ubumuga tuzagenda tugerageza kuzamura uko dushoboye.'

Bahati yavuze ko bazibanda cyane ku kububakira ubushobozi mu ngeri zose, bakabateza imbere harimo no kuririmba mu bitaramo bikomeye no kubakurikirana kuva ku munota wa mbere.

Uyu muyobozi yavuze ko mu Mujyi wa Kigali bazafata abantu 15, kandi ko iki gikorwa kizakomereza mu Ntara cyane cyane mu bigo byakira abana bafite ubumuga.

Mukingambeho Herniette ni umwe mu bitabiriye iki gikorwa. Imbere y'Akanama Nkemurampaka yagaragaje impano idasanzwe akina ikinamico aganiriza Nyina [Utari uhari] wari mu marembera, asuka amarira bitungura abari bagize Akanama.

Dj Pius yahise asaba uyu mukobwa gukina undi mukino noneho adasuka amarira, ahubwo yishimye. Herniette yahise akina umukino agaragaza ibyishimo, akina yishimiye kuzamurwa mu ntera mu kazi.

Dj Theo umujyanama wa Social Mula, yabwiye uyu mukobwa ko ari umuhanga ku buryo muri iki gikorwa adakwiye kuburamo.

Mu kiganiro na INYARWANDA, Mukingambeho yavuze ko nyuma yo kwitabira ArtRwanda-Ubuhanzi ntabashe gutsinda atacitse intege, ahubwo yakomeje gukuza impano ye.

Uyu mukobwa yagarukiye mu 120 batoranyijwe mu gihugu hose muri Art Rwanda. Yavuze ko yitabiriye iki gikorwa cyo gushakisha impano mu rubyiruko rufite ubumuga, biturutse ku nshuti ye yabimworohereje ku mbuga nkoranyambaga.

Herniette avuga ko afite icyizere cyo gutsinda, kandi ko iki gikorwa akitezeho gutinyura abafite ubumuga. Ati 'Iri rushanwa ndamutse nditwaye hari byinshi ryamfasha, byaba ari umwanya mwiza wo kugaragaza impano yanjye no gufasha sosiyete…Ni no kugira ngo umuntu akomeze azamure isura nziza y'abafite ubumuga.'

Kwiyandikisha muri iki gikorwa byari ubuntu. Umunyempano uzatsinda azakorerwa indirimbo mu buryo bw’amajwi n’amashusho (Audio& Video), kubamamaza (Promotion) no kubakurikirana (Management).

Abafite ubumuga banashyiriweho amahirwe arimo kwiga; gufata amajwi, gukora indirimbo, gufata amashusho, gutunganya amajwi n’amashusho, gufata amafoto, kuyobora no kugenzura amajwi.

Omar Bahati Umuyobozi w'Umuryango Owezo Youth Empowerment Uhereye ibumuso: Dj Theo, Producer Trackslayer washinze The Trackslayer Music, Producer Thomas na Dj Pius Iki gikorwa cyiswe 'It’s Ability Talents' abagiteguye bavuga ko ari amahirwe ku rubyiruko rufite ubumugaHerniette yakinnye ikinamico aganiriza Nyina wari mu marembera, asuka amarira bitungura abagize Akanama Nkemurampaka Dj Pius washinze 1K Entertainment akuriye Akanama Nkemurampaka kari gushakisha impano mu rubyiruko rufite ubumuga Producer Trackslayer washinze The Trackslayer Music wahuje imbaraga n'Umuryango Owezo Youth Empowerment mu gutegura iki gikorwa

Ntihinyurwa Olivier yaririmbye indirimbo 'Malaika' ya Buravan, anavuga ko asanzwe afasha abahanzi mu miririmbire barimo Mukuru we Gasangwa Obed afite indirimbo ebyiri zitamenyekanye, ariko avuga ko afite icyizere Sibomana Jean Claude yagaragaje impano ye

Producer Thomas ufite ubumuga yifashishijwe mu Kanama Nkemurampaka 

Cyiza Otto avuga ko yatangiye umuziki mu 2012 kandi ko indirimbo ze zakinwe kuri Radio Salus akaza gucika intege mu muziki we

AMAFOTO: Iradukunda Jean De Dieu-INYARWANDA.COM

Kuri uyu wa Kane tariki ya 03 Kamena 2021, ni bwo abagize ikipe ya Patriots bayobowe na kapiteni w'iyi kipe Mugabe Arstide, bunamiye ndetse banashyira indabo ku rwibutso rwa Kigali rushyinguyemo imbaga y'Abatutsi bazize Jenoside yakorewe Abatutsi mu 1994.

Nk’uko bigaragara ku rukuta rwa Twitter rwa Kigali Genocide Memorial, aba bakinnyi basobanuriwe amateka ya Jenoside yakorewe Abatutsi mu 1994, ndetse n'intambwe yatewe mu bumwe n’ubwiyunge.

Aba bakinnyi basuye uru rwibutso nyuma y'iminsi ine basoje irushanwa rya Basketball Africa League (BAL) ryabereye mu Rwanda, aho basoje ku mwanya wa Kane mu makipe 12 yari yitabiriye BAL 2021 yegukanwe na Zamalek yo mu Misiri.

Abakinnyi ba Patriots basobanuriwe amateka ya Jenoside yakorewe Abatutsi mu 1994

Gasana Kenny ari mu basuye Urwibutso rwa Jenoside rwa Kigali

Abakinnyi ba Patriots bashyize indabo ndetse bunamira inzirakarengane zishyinguye mu rwibutso rwa Jenoside rwa Kigali

Abakinnyi ba Patriots basuye Urwibutso rwa Jenoside rwa Kigali

Guhera mu mpeshyi ya 2020 kugera mu ya 2021 abahanzi batandukanye bagiye basohora ibihangano bitandukanye, byinshi cyangwa se bicye bitewe na Politike y'uburyo akoramo umuziki we.

Wifashishije rero iyitwa Youtube Chart, Israel Mbonyi usanga ariwe uyoboye isoko ry'urutonde rw’abinjirije menshi ku butaka bw'u Rwanda aho abarebye ibikorwa bye baherereye mu Rwanda mu gihe cy'umwaka wose ushize ari miliyoni 8.31.

Naho umugwa mu ntege ni Diamond rurangiranwa ukunzwe ukunzwe n'abatari bacye mu duce tunyuranye tw’isi no mu Rwanda. Umusaruro rusange wa Youtube w'umwaka wa 2020/2021 yahakuye miliyoni 7.16. Uku kurebwa cyane kw’ibyo bashyira kuri Youtube, binasobanuye ko ari ko bakurikirana mu kwinjiza menshi.

Ubundi amashusho atagejeje ku minota icumi (5) yashyizwe kuri youtube yishyura amadorali ajya kwegera abiri (2) ku bantu igihumbi (1,000) bayarebye($2/1000 Views) nk’uko Google.com ibyerekana.

Bivuzeko James na Daniella mu gihe cy’umwaka indirimbo zabo zimaze kuri Youtube zabinjirije agera ku bihumbi kuri $5,860 avuye gusa ku bantu bazirebye bari mu Rwanda aho bagera kuri Miliyoni 2.9 (2.93M Views). Uyashyize mu manyarwanda ayo binjije mu mwaka ni 5,860,000 Frw.

Ni mu gihe Israel Mbonyi we abantu barebye ibikorwa bye bari mu Rwanda kuri Youtube kuva muri 03 Kamena 2020 kugera kuri 03 Kamena, bamwinjirije agera ku $16,620 kuko indirimbo ze zarebwe inshuro 8.31, aba akaba ari abazirebeye gusa mu Rwanda. Ushyize mu manyarwanda ayo yinjije mu mwaka ararenga Milyoni 16 (16,620,000 Frw).

Bivuze ko ku musaruro abatuye ku butaka bw’u Rwanda bahaye aba bahanzi 10 mu gihe cy’umwaka ushize avuye muri ‘Views’ miliyoni 55.9 z’abantu baba mu Rwanda bonyine, ararenga ibihumbi 111 by’amadorali y’Amerika ($111,800), akaba angana na Miliyoni 111 z’amanyarwanda (111,800,000 Frw).

Urutonde rw'abahanzi bihariye isoko rya Youtube ryo ku butaka bw'u Rwanda kuva kuwa 03 Kamena 2020 kugera kuri 03 Kamena 2021.

10.James&Daniella (2.93M)

09.Harmonize (3.47M)

08.Marina Deborah (3.76M)

07.Papi Clever (4.58M)

06. Meddy (6.1M)

05.The Mane Artist (6.21M)

04.Bruce Melodie (6.52M)

03.Clarisse Karasira (6.86M)

02.Diamond Platnumz (7.16M)

01.Israel Mbonyi (8.31M)  

Yabigarutseho kuri uyu wa Gatatu mu Karere ka Nyagatare mu Murenge wa Rwempasha ubwo hatangizwaga imishinga igamije guha akazi abaturage bo mu mirenge itandatu ihana imbibi n'igihugu cya Uganda.

Ku ikubitiro abagera ku 2450 bahise babona akazi mu kubaka umuhanda bakajya bahembwa 2000 Frw ku munsi, bakishyurwa nyuma y'iminsi itanu.

Minisitiri Gatabazi witabiriye uyu muhango yasabye abaturage kubyaza umusaruro amafaranga bazakorera muri iyi mishinga bakizigamira kandi bakirinda gusubira gucuruza ibiyobyabwenge ahubwo bagashaka ikindi bakora.

Yifashishije ingero z'abaturage bahabwa inka n'abubakirwa inzu zasenyukaho gato cyangwa inka zabura umuntu bagashaka ko ari Leta iwutanga, ababwira ko bidakwiye nabo ubwabo bakwiriye kongera imbaraga mu kwifasha.

Minisitiri Gatabazi yakomeje ananenga abaturage batarwaye, bafite amaboko ariko usanga bananirwa kwiyubakira imisarani n'ibindi byangombwa by'isuku mu ngo zabo bakarindira kubakirwa n'abandi baturage biciye mu miganda.

Ati ' Njyewe nkiri muto ntabwo iwacu higeze haza umuntu aje gucukura umusarani, ntararangiza amashuri yisumbuye ninjye wawucukuraga nkashaka bagenzi banjye bakamfasha muzehe wanjye akagura amabati gusa, ntabwo Papa yigeze ajya kwishyura umuntu uwuducukurira.'

Yakomeje anenga abayicukurirwa rimwe na rimwe yanuzura bakajya kureba ba Gitifu bababwira ko yuzuye kugira ngo bongere babahe ubufasha bwo kuyibacukurira. Yabwiye abaturage ko iyo myifatire idakwiye ahubwo buri wese akwiriye kugira inshingano.

Ati ' Turashaka abaturage bazi ko bafite inshingano, niba ubyaye abana ukazirikana ko abana bagomba kujya ku ishuri naho kutita ku bikureba utegereje ko uzabikorerwa n'abandi ntibikwiye.'

Minisitiri Gatabazi kandi yabwiye abaturage babonye akazi muri iyi mishinga ko itazahoraho, bityo bakwiriye gukora bizigamira bikazanabafasha kutongera gusubira gucuruza ibiyobyabwenge.

Biteganyijwe ko iyi mishinga izakorerwa mu turere twa Nyagatare, Gicumbi, Burera na Musanze nka tumwe mu turere duhana imbibi n'igihugu cya Uganda abaturage bakunze kujyamo bagiye kuzana ibiyobyabwenge.

Abayobozi batandukanye babanje gukora umuganda mbere yo kuganira n’abaturage

Minisitiri Gatabazi yasabye abaturage kwishakamo ibisubizo bibakemurira ibibazo byabo aho kurindira Leta

Muri ibi biganiro, abaturage bagaragaje ko bo ubwabo aribo usanga biboha mu mibanire mibi yabo aho ababirenze ubu bamaze gutera imbere kandi ko bazakomeza guharanira kurandura amacakubiri, ivangura n'ingengabitekerezo ya Jenoside byagiye bihagaragara.

Uwamahoro Clémentine avuga ko yajyaga yumva bavuga ko yagizwe imfubyi n'Abahutu, bityo akumva ko ari abagome cyane ariko ngo nyuma y'aho Leta isabiye abantu kuba Abanyarwanda aho kwibona mu ndorerwamo y'amoko yatumye Uwamahoro ashaka mu bo yitaga inzigo kandi ko ubu babanye neza nta rwikekwe.

Yagize ati 'Nakuranye igikomere ko icyangize imfubyi ari Abahutu, bityo nkura niyumvamo ko Abahutu ari abagome cyane, nyuma y'aho naje gukorana n'umushinga wa Duhuze, aho wahuzaga Abarokotse Jenoside n'abayigizemo uruhare ndetse n'abari bahungutse. Ni bwo natangiye kujya mvuga ibyanjye n'abandi bakavuga ibyabo. Ibyo natekerezaga bigenda bimvamo buhoro buhoro kugeza ubwo byamvuyemo burundu ngahita nshakana n'uwo nitaga inzigo [Umuhutu] none tukaba tubayeho neza kuko duhuriye muri Ndi umunyarwanda.''

Yakomeje agira ati “Mbere ntarabohoka, nahoraga mu bitaro kubera ihungabana ariko kugeza ubu nta kibazo njya ngira. Muri njye, nta Muhutu, nta Mututsi cyane ko n'umuryango nakuriyemo wari waranyanze ngo nashakiye mu Bahutu none uyu munsi ninjye basigaye bagisha inama mu by'ihungabana.'

Nduwayezu Narcisse yagize uruhare muri Jenoside yakorewe Abatutsi arabihanirwa, nyuma yo kurangiza igihano cye atuzwa mu Mudugudu wa Kimonyi watujwemo abari barahunze mu 1959, abarokotse Jenoside, abavuye ku rugerero n'abakoze Jenoside.

Yavuze ko bakihagera bumvaga kubana bitazashoboka kubera urwikekwe bahoranaga ariko baje guhuza ubu bakaba bafatanya muri byinshi mu mibanire yabo n'iterambere.

Yagize ati 'Tukigera mu Mudugudu twabonaga kubana bitazashoboka, nahoranaga ipfunwe numva ntawe nahura nawe mu barokotse, naje gukoresha ubukwe mbona baraje baradufasha mu mirimo yo mu rugo guteka, kwakira abantu kuntwerera byose barabikora babigize ibyabo bisanzuye numva ngize ikiniga kuko ntawe nari natumiye.'

Yakomeje ati 'Ni bwo nahise nanjye ntangira kubegera tukajya duhura tukaganira, haza kuza gahunda yaduhurije mu itsinda ryitwa Duhuze dukomeza kujya duhura tukavugana ku mateka yabaye, uko twese tubayeho noneho dukomeza no gushakira hamwe ibisubizo twahuraga nabyo mu buzima harimo n'ibyari bibangamiye iterambere ryacu.”

Yakomeje avuga ko ubu babanye neza bose bashyize imbere ubumwe n'ubwiyunge.

Bamwe mu bayobozi b'imidugudu igize Umurenge wa Cyuve nabo bavuga ko gahunda ya 'Ndi Umunyarwanda' ari imwe mu ntwaro ikomeye yo gukumira no kurwanya ingengabitekerezo ya Jenoside.

Murekatete Clémentine ni umwe muri bo wagize ati “Gukira amacakubiri, ivangura n'ingengabitekerezo ya Jenoside ni urugendo ariko usanga aho bikiri bikomeje kubangamira iterambere ry'aho. Twe nk'abayobozi ubwo tubyumva ni ahacu kubyumvisha abo tuyoboye ubundi tukiteza imbere kandi tuzaharanira ko bigerwaho.

Umuhuzabikorwa wa Komisiyo y'Ubumwe n'Ubwiyunge mu Ntara y'Amajyaruguru, Rucogoza Edouard, avuga ko kubaka amahoro ari ukubohokerana kandi ko nta bwobo bubi bubaho nk'uko abantu babyibwira ahubwo hashobora kubaho abantu babi.

Yagize ati “Twubaka amahoro neza iyo tuganira, tubohokerana, tworoherana noneho gutsimbarara ku kibi bikavaho kuko nta bwoko bubi bubaho ahubwo habaho abantu babi. Turasaba abantu bakiboshywe n'ingoyi mbi ko zigomba gucika kandi zigacika biciye mu biganiro kuko iyo bisohotse bidaciye mu biganiro, bisohoka nabi kandi bigasiga igikomere.'

Umuyobozi w'Akarere ka Musanze, Nuwumuremyi Jeaninne, yavuze ko Ubumwe n'Ubwiyunge ari urugendo ariko ko icy'ingenzi ari ubushake n'ubufatanye bugaragara.

Ibi biganiro bizakomereza mu mirenge yose igize Akarere ka Musanze yatangirijwe mu wa Cyuve ahakivugwa imibiri y'abishwe muri Jenoside yakorewe Abatutsi itaragaragazwa aho yajugunywe.

Biyemeje kurenga amoko bagashyira imbere ubumwe n’ubwiyunge kuko ariyo nzira y’iterambere

Ku Cyumweru tariki ya 30 Gicurasi 2021, ni bwo uyu muganga yafatiwe mu rugo rw'uyu mwarimukazi ruherereye mu Kagari ka Murembe mu Murenge wa Cyabingo muri Gakenke.

IGIHE yamenye ko abaturage bo muri aka gace aribo batanze aya makuru nyuma yo kumenya ko uyu muganga n'uyu mwarimukazi bari gusambanira mu rugo rw'uyu mugore. Bahamagaye abashinzwe umutekano bari aho hafi bahita bajya kubafata.

Umunyamabanga Nshingwabikorwa w'Umurenge wa Cyabingo, Mukeshimana Alice, yemereye IGIHE ko uyu muganga n'uyu mwarimukazi bose bafite abo bashakanye.

Ati 'Ni byo uwo mugabo yafatiwe mu rugo rw'abandi ariko njye sinakwemeza ko bari barimo gusambana kuko njye ntabwo nabafashe.'

Bamaze gufatwa bahise bashyikirizwa Ubugenzacyaha bakaba bari kuri Sitasiyo ya RIB mu gihe iperereza rikomeje.

Itegeko riteganya ibyaha n'ibihano mu Rwanda mu ngingo ya 136 rivuga umuntu wese washyingiwe ukorana imibonano mpuzabitsina n'uwo batashyingiranywe, aba akoze icyaha. Iyo abihamijwe n'urukiko ahanishwa igifungo kitari munsi y'amezi atandatu ariko kitarenze umwaka umwe.

Gukurikirana icyaha cy'ubusambanyi ntabwo bishobora kubaho hatareze uwahemukiwe mu bashyingiranywe ku buryo bwemewe n'amategeko. Muri icyo gihe hakurikiranwa uwarezwe n'uwakoranye icyaha na we.

Bafashwe bakekwaho gusambana bashyikirizwa Ubugenzacyaha