Webrwanda Backend

Blog

  • Ibyo kwitondera mu kuzirika inda nyuma yo kubyara #rwanda #RwOT

    Kuzirika inda cyangwa kwambara umukandara ufashe mu nda cyane, bituma inyama zo mu nda zegerana nyuma yo kubyara, n’inda igasa n’isubiranye, ndetse kikaba n’igisubizo mu gufasha umugongo gukomera.

    Gukoresha ubu buryo ariko, ni ibyo kwitonderwa ndetse bikwiye gukoreshwa n’uwabiherewe uburenganzira na muganga, kuko n’ubwo bifite akamaro hari ubwo bishobora no kugira ingaruka zikomeye ku mubyeyi zirimo n’urupfu bitewe n’uko ubuzima bwe busanzwe buhagaze.

    Mu mubiri w’umuntu habamo utuntu dukweduka bita elasitomere (elastomers), tuba dusa n’aho twacikaguritse mu gihe cyo gutwita inda ikareguka, n’ibinure na byo biba byariyongereye ari na byo bifasha kugaburira umwana na nyina.

    Iyo nda yaregutse, bifata igihe kugira ngo isubirane nyuma yo kubyara. Uburyo bufasha kuyisubiranya hifashishijwe kuyizirika bukaba butavugwaho rumwe n’ababyeyi. Bamwe mu baganiriye na Kigali Today bavuga ko kugira ngo inda isubirane biterwa n’imiterere y’umuntu, abandi bakavuga ko utayiziritse idashobora gusubirana, abandi na bo bakavuga ko batabikora kubera ububabare baba bafite.

    Dr Butoyi Alphonse, muganga w’ababyeyi, avuga ko kuzirika inda bisaba ubundi buryo bubyunganira akanasobanura akamaro kabyo.

    Yagize ati 'Kuzirika inda ubundi ni byiza, kuko bifasha umubiri gukomera (tonicité), ariko ubwabyo ntibyatuma inda isubirana burundu. Kugira ngo igende burundu ni uko biherekezwa n’imyitozo ngororamubiri n’imirire iboneye hagamijwe kugabanya ibiro (régime) kugira ngo isukari, ibinure n’amavuta bigabanuke. Ibi kandi ngo bifasha umugore wabyaye abazwe gukira vuba ndetse bikanafasha kugabanya ububabare bw’umugongo.

    Dr Butoyi asobanura impamvu kuzirika inda nyuma yo kubyara ari ibyo kwitonderwa,

    Ati 'Ushobora kuzirika inda waragize indwara y’imitsi yitwa thrombosis (indwara ifata imitsi ijyana amaraso), ukaba wafunga imitsi bigatuma ugira ibibazo bikomeye kuko bituma amaraso adatembera neza bikagira ingaruka ku mutima n’ibihaha, bityo bikaba byanakuviramo urupfu. Bivuze ngo ni ukwitondera icyo kintu ukabikora ubijyanisha n’imyitozo ngororangingo kugira ngo bifashe amaraso gutembera neza ndetse wanabiherewe uburenganzira na muganga.'

    Urubuga rwa interineti www.handbook.com avuga ko ubu buryo bwo kuzirika inda nyuma yo kubyara bugira akamaro, kimwe n’uko bwagira ingaruka. Urwo rubuga rukomeza ruvuga kandi ko byahozeho kuva kera no mu bihugu byateye imbere, ubu bikaba bikomeje gukorwa cyane muri Afurika, Aziya na Amerika.

    Ababyeyi bagenda bahererekanya aya makuru mu miryango n’ubwo hari ibigenda bihinduka bitewe n’agace. Kuzirika inda bikorwa mu gihe kiri hagati y’ibyumweru 3 na 6 uhereye igihe umubyeyi yabyariye.

    Source: Kigalitoday.com

    [email protected]

    Source : https://agakiza.org/Ibyo-kwitondera-mu-kuzirika-inda-nyuma-yo-kubyara.html

  • Rwatubyaye na Nirisarike bisanze mu itsinda rimwe muri UEFA Europa Conference League #rwanda #RwOT

    Amakipe ya Urartu ikinamo Nirisarike Salomon na FC Shkupi ikinamo Rwatubyaye Abdul yamenye amakipe bazahura mu ijonjora rya UEFA Europa Conference League.

    Uyu munsi nibwo habaye tombola y’uko amakipe azahura mu cyiciro cya mbere cya UEFA Europa Conference League, irushanwa rigiye kuba ku nshuro ya mbere.

    Urartu FC ya Nirisarike Salomon yabaye iya kabiri muri shampiyona ya Armenia ihita ibona itike.

    FC Shkupi ya Rwatubyaye Abdul yabonye itike yo gukina iri rushanwa nyuma yo kuba aba kabiri.

    Muri rusange amakipe 66 niyo yabonye itike yo gukina iri rushanwa.

    Tombola yasize amakipe agabanyijwe mu matsinda 8, itsinda rya mbere kugera ku rya 7 afite amakipe 8 aho
    rizazamura amakipe 4, itsinda rya 10 rifite amakipe 10 aho rizazamura amakipe 5 ajye mu cyindi cyiciro.

    Urartu FC ya Nirisarike Salomon iri mu itsinda rya 3, izabanza gukina na Maribor FC yo muri Slovenia.

    Rwatubyaye Abdul n’ikipe ye ya FC Shkupi yo muri Macedonia nayo iri mu itsinda rya 3 kumwe na Urartu FC, yo izabanza guhura na Llapi FC yo muri Kosovo.

    Uko amatsinda yose ateye

    Itsinda rya 1

    Levadia Tallinn (EST) vs St Joseph’s (GIB)
    Inter Turku (FIN) vs Puskás Akadémia (HUN)
    Dečić (MNE) vs Drita (KOS)
    Sūduva (LTU) vs Valmiera (LVA)

    Itsinda rya 2

    La Fiorita 1967 (SMR) vs Birkirkara (MLT)
    Mons Calpe (GIB) vs Santa Coloma (AND)
    Velež (BIH) vs Coleraine (NIR)
    Domžale (SVN) vs Swift Hesper (LUX)

    Itsinda rya 3

    Shkupi 1987 (MKD) vs Llapi (KOS)
    Dinamo Batumi (GEO) vs Tre Penne (SMR)
    Sfintul Gheorghe (MDA) vs Partizani (ALB)
    Maribor (SVN) vs Urartu (ARM)

    Itsinda rya 4

    Laçi (ALB) vs Podgorica (MNE)
    Milsami Orhei (MDA) vs FK Sarajevo (BIH)
    Noah (ARM) vs KuPS Kuopio (FIN)
    Žilina (SVK) vs Dila Gori (GEO)

    Itsinda rya 5

    FH Hafnarfjördur (ISL) vs Sligo Rovers (IRL)
    Paide Linnameeskond (EST) vs Śląsk Wrocław (POL)
    RFS (LVA) vs KÍ Klaksvík (FRO)
    Bala Town (WAL) vs Larne (NIR)

    Itsinda rya 6

    Fehérvár FC (HUN) vs Ararat Yerevan (ARM)
    Gagra (GEO) vs Sutjeska (MNE)
    Sileks (MKD) vs Petrocub-Hincesti (MDA)
    Široki Brijeg (BIH) vs Vllaznia (ALB)

    Itsinda rya 7

    Stjarnan (ISL) vs Bohemians (IRL)
    Glentoran (NIR) vs The New Saints (WAL)
    Sant Julià (AND) vs Gzira United FC (MLT)
    Europa (GIB) vs Kauno Žalgiris (LTU)

    Itsinda rya 8

    Dundalk (IRL) vs Newtown (WAL)
    Spartak Trnava (SVK) vs Mosta (MLT)
    Struga (MKD) vs Liepāja (LVA)
    Racing FC Union Lëtzebuerg (LUX) vs Breidablik (ISL)
    Honka Espoo (FIN) vs NSÍ Runavík (FRO)

    Ku nshuro ya mbere Rwatubyaye Abdul agiye gukina iri rushanwa

    Na Nirisarike agiye gukina iri rushanwa ku nshuro ya mbere

    Source : http://isimbi.rw/siporo/article/rwatubyaye-na-nirisarike-bisanze-mu-itsinda-rimwe-muri-uefa-europa-conference-league

  • Itegeko rishya rigenga ubutaka ryakubise umwotso ku bibazo byatakishaga abaturage –

    Ni itegeko ryasimbuye iryagiyeho mu 2013, ryari ririmo imbogamizi ku bijyanye no kwandikisha ubutaka nk’ikimenyetso ntashidikanywaho cy’uburenganzira kuri bwo, no kubuhererekanya nk’uko abaturage bagiye babigaragaza hirya no hino mu gihugu.

    Ubutaka buhererekanywa binyuze mu izungura, impano, irage, ikodeshwa, iyatisha, ingurane, gutangwaho ingwate, gutizwa n’ubundi buryo rimwe na rimwe bikaba bisaba ko bugabanywamo ibice.

    Nyamara mu itegeko no 43/2013 ryo ku wa 16/6/2013 byari bibujijwe ko ubutaka bugenewe ubuhinzi, ubworozi n’amashyamba bugabanywamo ibice bifite munsi ya hegitari imwe.

    Mu itegeko rishya iri gabanywa riremewe nubwo ubuso bwasigara buri munsi y’ibyo bipimo.

    Mbere byaberaga imbogamizi abafite ubutaka buto bigatuma batabasha kububyaza umusaruro mu buryo butandukanye no kubutangaho ingwate kuko nta byangombwa byabwo bafite nk’uko byatangajwe na bamwe mu baturage baganiriye na RBA.

    Umwe yagize ati “Nari mfite ubutaka buto none ngiye kubona ibyangombwa ntafite umuntu mbifatanyije na we. Umuntu yagusoreraga ukamusubiza amafaranga ukanarenzaho none bakemuye ibibazo byinshi birimo n’iby’imbago aho rimwe na rimwe wasangaga umuntu yakwimuriye imbago yitwaje ko ari we ufite icyangombwa. Birashimishije kuko ufite ubutaka buto nta buryo yashoboraga gusaba inguzanyo muri banki.”

    Nubwo kugabanya ubutaka buto byemewe ngo nta burenganzira nyirabwo azaba afite bwo kubukoresha binyuranye n’ibiteganywa mu gishushanyo mbonera cy’aho buherereye.

    Urugero niba ubutaka bukorerwaho ubuhinzi kubugabanya ntibivuze ko uzaba wemerewe no gutakamo ibibanza mu gihe cyose ubuwo butaka butagenewe guturwaho.

    Ibijyanye no guhererekanya uburenganzira ku butaka na byo byarorohejwe. Mu gihe itegeko rya mbere ryateganyaga ko umuntu wanditse ku cyangombwa ari we wemerewe gusinya, itegeko rishya rivuga ko n’utanditse ku cyangombwa aba agomba gushyira umukono ku masezerano yo guhererekanya uburenganzira ku butaka.

    Ingingo ya 22 igira iti “Ihererekanya ry’uburenganzira ku butaka, mbere y’uko rikorwa, ryemezwa n’abanditse ku nyandikompamo z’ubutaka bose. Icyakora, ihererekanya ry’uburenganzira ku butaka abashyingiranywe bahuriyeho, ryemezwa n’abashyingiranywe bombi n’iyo umwe muri bo yaba atanditse ku nyandikompamo z’ubutaka”

    Ibibazo by’amakimbirane afitanye isano n’imbibi byimuriwe mu Kigo Gishinzwe Imicungire n’Imikoreshereze y’butaka (RLMUA) nk’urwego ruzaba rushinzwe kuyakemura mu gihe byajyaga bijya mu nkiko.

    Umuyobozi w’iki kigo, Mukamana Espérance, yabwiye itangazamakuru ko bizafasha abaturage kureka gusiragira mu nkiko aho wasangaga byarabaye byinshi.

    Ni mu gihe ariko iki kigo cyanenzwe n’Umugenzuzi Mukuru w’Imari ya Leta muri raporo ya 2019/2020 ko amakosa y’imbibi mu byangombwa by’ubutaka ateye inkeke ariko ubuyobozi bwacyo bukavuga ko byaterwaga n’ibikoresho byifashishwaga mu gupima ubutaka bifite ubushobozi buke, none ubu kikaba cyarabonye ibya kabuhariwe.

    Izindi mpinduka ziboneka mu bijyanye n’inkondabutaka (uburyo bwo gutunga ubutaka bushingiye ku masezerano leta igirana n’umuntu imuha uburenganzira busesuye kandi bwa burundu), aho yagabanyijwe ikagera kuri hegitari ebyiri mu gihe itegeko rya mbere ryagenaga hegitari eshanu ku muntu.

    Ku rundi ruhande, itegeko rishya rigena ko ubutaka umuntu yarazwe, yazunguye, yaguze, yahawe nk’impano, ingurane, ubwo akomora ku isaranganya cyangwa yahawe n’ubuyobozi bubifitiye ububasha, abutunga mu buryo bw’ubukode burambye cyangwa inkondabutaka.

    Icyo gihe cy’ubukode burambye bw’ubutaka kikaba cyiyongereye ariko kitagomba kurenza imyaka 99 aho ku munyarwanda kikazajya cyongerwa atagombye kubisaba.

    Itegeko no 27/2021 ryo ku wa 10/6/2021 rigena uburyo bwo kubona ubutaka, kubwandikisha, kubutanga, kubuhererekanya, kubucunga no kubukoresha risimbuye iryari risanzwe ryo mu 2013, rikaba ryaratangiye gukurikizwa.

    Itegeko rishya rigenga ubutaka mu Rwanda ryitezweho gukemura amakimbirane ashingiye ku mbibi n’ibindi bibazo byabangamiraga imikoreshereze yabwo mu buryo busesuye

  • Ese mu Rwanda hari ibicuruzwa bifite ubuziranenge bwo kujya ku Isoko Rusange rya Afurika? –

    Impamvu yo kwibaza ku buziranenge bw’ibizaba biri kuri iri soko ni uko ryitezweho kongera inyota yo guhanga udushya ku baturage, ubwiyongere bw’inganda n’ibikorwa bihindura imibereho ya rubanda. Ibi byose ariko bidafite ubuziranenge n’ubundi byaba ari ukuvomera mu rutete.

    Mu 1977 nibwo Afurika Yunze Ubumwe yashyizeho Umuryango Nyafurika ushinzwe Ubuziranenge [African Organisation for Standardisation (ARSO)], mu gihe ibihugu bya Afurika byari biri mu nkundura yo kwigobotora ubukoloni, bityo bitekereza uko byakwishyira hamwe mu kubaka ubukungu.

    Mu kiganiro cyatambutse kuri RBA, Umuyobozi wa ARSO, Dr Nsengimana Hermogène, yavuze ko mbere uyu muryango wari uhuriyemo ibihugu bibarirwa muri 20, ariko kuva isoko rusange ryatekerezwa ibihugu byahise bishyiraho ingamba zikomeye kugira ngo ibihugu byose bigize AU bibashe kujya mu muryango kugira ngo ubucuruzi hagati y’ibihugu butere imbere.

    Avuga ko kugeza ubu hashyizweho politiki ishinzwe ubuziranenge ku rwego rwa Afurika ndetse n’amategeko ashyirwaho kugira ngo ikintu kibashe kwinjira mu gihugu.

    Ati “Ubundi buryo ni ubwo kwemera ikirango, tukavuga ngo ikirango cy’ubuziranenge gitanzwe mu Rwanda, Nigeria, Afurika y’Epfo cyangwa ikindi gihugu bashobora kucyemera? Dufite intego yo kugira ibwiriza, ikirango n’igipimo kimwe, ku buryo abashakashatsi bahurira hamwe na laboratwari zemewe cyangwa zemeranya ku bushobozi bw’igihugu ku kindi.”

    Umuyobozi Mukuru w’Ikigo cy’Igihugu gishinzwe Ubuziranenge, RSB, Murenzi Raymond, yavuze ko mu Rwanda hamaze kuboneka ibicuruzwa bigera kuri 700 bimaze kubona ibirango by’ubuziranenge ku buryo byacuruzwa ku isoko rya Afurika.

    Ati “Ibyo rero biduha icyizere ko bishobora no kwiyongera, uko inganda zikomeza kwiyongera, uko abantu benshi bakomeza kujya mu bucuruzi, bitwereka ko ibyo bicuruzwa bigenda byiyongera kandi n’ababikeneye bakiyongera.”

    Murenzi yavuze ko ubu ingamba ziriho ari ugukomeza gukora amabwiriza ahamye y’ubuziranenge kandi ari mpuzamahanga ndetse no gushyira imbaraga mu kugira ngo ibicuruzwa byose bijye byinjira mu gihugu runaka habanje kubaho ubugenzuzi bwo kureba niba byujuje ubuziranenge.

    Ubusanzwe ibigo bishinzwe kugenzura ubuziranenge muri Afurika bikorana hagendewe ku itegeko rigenga ubuziranenge riba ryarashyizweho ari naryo rigena uburyo ubuziranenge bugenzurwa, ibirango by’ubuziranenge ku buryo igicuruzwa kivuye mu gihugu kimwe kijya mu kindi ari uko ubuziranenge bw’aho cyaturutse bwamaze kubyemeza.

    Mu bindi bihugu bidasanzwe bifitanye ayo masezerano cyangwa bitabarizwa muri uwo muryango, bigerayo hakabanza kubaho kugenzura ubuziranenge, bikongera bigasubira muri za laboratwari zipima ubuziranenge n’ibindi bituma habaho ubukererwe n’amananiza.

    Murenzi ati “Ibyo rero bituma koroshya ubucuruzi bitaba bishoboka, bituma n’ikiguzi cyo gukora ubucuruzi kiyongera.”

    RSB ivuga ko kugeza ubu laboratwari zayo zamaze kubona ibirango by’ubuziranenge mpuzamahanga ku buryo uwahawe serivisi nazo ibicuruzwa yajyana mu gihugu icyo aricyo cyose cyaba icyo muri Afurika, i Burayi na Amerika.

    Murenzi ati “Turi kubaka ubushobozi kugira ngo ikigo cyacu kibe cyabasha gutanga serivisi inoze kandi yemerwa n’ibihugu byose ku Isi, uyu munsi navuga ko laboratwari zacu zamaze kubona ibirango by’ubuziranenge mpuzamahanga ku buryo uwo twafashije igicuruzwa cye cyajya mu bihugu byose kikemerwa.”

    Yakomeje agira ati “Yaba ari za laboratwari zacu zamaze kubona ibirango mpuzamahanga, zaba ari serivisi zo gusuzuma ubuziranenge nazo zamaze kubona ibirango mpuzahanga ndetse na serivisi zo gukora amabwiriza y’ubuziranenge ku buryo uyu munsi twizeye neza ko aho igicuruzwa cy’u Rwanda cyakenera kujya cyagenda kikahagera kandi gifite icyizere cy’uko kigomba kwemerwa.”

    Made in Africa?

    Imwe mu ntego zo gushyiraho Isoko Rusange rya Afurika, ni ukuvanaho igisebo ku Mugabane wa Afurika ukorana ubucuruzi n’indi migabane kurusha uko ukorana ubucuruzi hagati yawo. Ibi kandi ngo bigomba kujyana no kuba ibicuruzwa bizajya bijyanwa hanze ya Afurika bizaba bifite ikigaragaza ko byakorewe muri Afurika.

    Ubuyobozi bw’Umuryango Nyafurika ushinzwe Ubuziranenge muri Afurika, buvuga ko kugeza ubu amabwiriza azagenga ibikorerwa muri Afurika [Made in Africa], bikaba bizatuma abantu bashobora gushora imari muri Afurika kugira ngo ikintu cyabo kizajye kitwa Made in Africa.

    Dr Nsengimana ati “Intego nyamukuru ya Made in Africa ni ukugira ngo inganda zacu zitangire kwikorera ibintu atari ukuvuga gusa ngo ibintu byaturutse hanze. Tutaba ba bantu abandi bazaza bagakoresha Isoko Rusange rya Afurika bagatera imbere aho kugira ngo ibihugu bya Afurika abe aribyo bitera imbere.”

    Yakomeje agira ati “Ni ibintu biguha imbaraga zo kuva ku isoko gusa wari uriho ukavuga ngo iki kintu gifite ubushobozi bwo kujya mu bihugu 55, ariko birerekana kandi ubushobozi bwa Afurika aho guhora tuvuga ko ibikorerwa muri Afurika biri hasi.”

    Murenzi avuga ko ibigo byo mu Rwanda bishobora kungukira cyane muri Made in Africa kuko ari politiki yose igamije guteza imbere ibikorerwa mu bihugu bya Afurika.

    ARSO ivuga ko kugeza ubu ibiganiro n’ibihugu binyamuryango ku bijyanye na politiki n’amabwiriza ashyiraho Made in Africa ndetse bikaba biteganyijwe ko mu mpera z’uyu mwaka hazaba hamuritswe aya mabwiriza mu gihe ibijyanye n’ikirango cya Made in Africa byo bizakorwa umwaka utaha.

    Amasezerano ashyiraho iri soko avuga ko ibicuruzwa 90% bizakurirwaho imisoro mu gihe biri gucuruzwa hagati y’Umugabane wa Afurika kandi byahakorewe, intego igomba kuzaba yagezweho nibura mu 2034.

    Icyo gihe, Afurika izaba ituwe na miliyari 1,8 z’abantu, bavuye kuri miliyari 1,3 bariho uyu munsi. Mu gihe rero Isoko rusange rya Afurika rizaba impamo, byitezwe ko rizazahura ubukungu bw’uyu mugabane ndetse rigatanga imirimo irenga miliyoni 100 hirya no hino.

    Inganda z’u Rwanda zikomeje kongera ubushobozi buzibashisha gukora ibintu bishobora guhangana ku isoko mpuzamahanga

  • Police FC yahagaritse umutoza nyuma yo gutsindwa na APR no kunganya na Rayon #rwanda #RwOT

    Itangazo rya Polisi FC, rivuga ko iyi kipe yirukanye by’agataganyo Haringingo Francis Christian ndetse n’abamufashaga barimo Rwaka Claude wari umwurungirije na Niyitunga Jean Paul wari umutoza wo kongerera ingufu abakinnyi.

    Iri tangazo ryashyizweho umukono n’Umunyamabanga Mukuru, CIP Obed Bikorimana rivuga ko aba batoza bahagaritswe kubera umusaruro mucye.

    Bahagaritswe nyuma y’igihe gito iyi kipe itsinzwe n’Ikipe y’Ingabo z’u Rwanda, APR FC iri mu zikiri mu nzira ziganisha ku gikombe.

    Police FC ivuga ko iyi kipe isigaje imikino itatu muri Shampiyona, igihe kuba itozwa na Nkotanyi Hitabatuma usanzwe ari umutoza w’Ikipe ya Interforce yo mu kiciro cya kabiri akaba anashinzwe guteza imbere urubyiruko muri Police FC.

    Umukino ubanziriza uwo Police FC yatsinzwemo na APR FC 3-0, iyi kipe ya Polisi y’u Rwanda yari yanganyije na Rayon Sports 1-1.

    UKWEZI.RW

    Source : http://www.ukwezi.rw/Imikino/article/Police-FC-yahagaritse-umutoza-nyuma-yo-gutsindwa-na-APR-no-kunganya-na-Rayon

  • Nyuma y'aho Minisitiri w'Ububanyi n'Amahanga w'Ububiligi, Sophie Wilmès, atangarije ko yakiriye umuryango w'umugizi wa nabi Paul Rusesabagina, abantu bakomeje kumubaza igihe azakirira abo Rusesabagina yagize imfubyi. #rwanda #RwOT

    Inkuru zirimo gukwirakwizwa n'ibigarasha, abajenosideri n'ababashyigikiye, ni uko Sophie WILMES, Ministri w'Ububanyi n'amahanga w'Ububiligi, kuri uyu wa mbere yakiririye umugore wa Paul Rusesabagina n'umukobwa we, abizeza ko ngo azakomeza kubakorera ubuvugizi.

    Iyi nkuru ikigera ku mbuga nkoranyambaga, abantu banyuranye barimo Abanyarwanda n'abanyamahanga, babajije Uyu mugore Wilmè niba ateganya no kwakira abo Rusesabagina yagize imfubyi, abo yamugaje, nabo yasahuye abinyujije mu mutwe we w'iterabwoba wa FLN. Bamubajije niba iyo ministeri ategeka ishobora kwakira umuryango wa Bin Laden, Abedsalam, n'abandi bayobozi b'imitwe y'iterabwoba iyogoza isi hirya no hino, cyangwa niba iterabwoba rikorewe Abanyafrika, by'umwihariko Abanyarwanda, atariha agaciro.
    Abasesenguzi benshi bakomeje kwibaza byinshi ku myitwarire y'abategetsi bo mu Bubiligi, bakomeje kugaragaza kuvogera bikabije ubusugire bw'ubutabera bw'uRwanda n'ubw'uRwanda muri rusange.

    Inteko ishinga amategeko muri icyo gihugu iherutse 'gutegeka' uRwanda guhita ifungura Paul Rusesabagina, yirengagije uburemere bw'ibyaha akurikiranyweho. Ababonye ibyanditswe n'abo badepite basanga iyo myumvire ari iya gikoloni n'irondakoko, aho bamwe mu bategetsi b'Ububiligi bakibwira ko bafite ububasha bwo gutegeka uRwanda icyo rukora, nk'uko byari bimeze Ububiligi bukirukolonije.

    Mu mafuti bamwe mu Babiligi barimo gukora mu kibazo cya Rusesabagina, harimo no kwivuguruza cyane. Ni gute basaba ko Rusesabagina arekurwa agasubira 'iwabo' mu Bubiligi, kandi bimwe mu bimenyetso urukiko rushingiraho rumuburanisha byaratanzwe n'inzego zo mu Bubiligi, zimaze gusaka urugo rwa Rusesabagina

    Ese aho kohereza ibyo bimenyetso mu Rwanda, kuki batabigumanye akaburanishirizwa 'iwabo' mu Bubiligi?
    Abazi neza amateka y'uRwanda n'Ububiligi, basanga amatiku ya benshi mu banyapolitiki b'Ababiligi atari aya none. Ntawe utibuka ikitwa' IDC'(International Democrate Chrétien), ishyaka ryakunze guhembera ingengabitekerezo ya jenoside n'umwiryane mu Banyarwanda, dore ko IDC ari umufatanyabikorwa ukomeye wa Parmehutu, Interahamwe n'Impuzamugambi. Abagize IDC ni nabo bakomeje gukingira ikibaba abajenosideri batsembye Abatutsi, none nyuma y'imyaka isaga 27 ababarirwa mu magana baridegembya mu Bubiligi nta kwikanga ubutabera.

    Muri Mata 1994 hari abasirikari b'Ababiligi 10 biciwe mu Rwanda, ariko aho guharanira ko nibura abishe bene wabo bahanwa, abenshi mu banyapolitiki b'Ababiligi barajwe ishinga no gushyigikira abajenosideri, abahakana bakanapfobya Jenosideri yakorewe Abatutsi, cyane cyane abibumbiye mu cyitwa 'Jambo asbl'.

    Abanyarwanda basobanuye kenshi ko igihe cyo gutinya igitutu cy'abanyamahanga cyarangiye, ariko ababwirwa bigize ingumba z'amatwi.

    Gukomeza 'gusakuza', nk'uko Rusesabagina abatelefona abibasaba, ntibizabuza umunyabyaha nka Rusesabagina guhanwa, kabone n'iyo bitashimisha Ababiligi n'abandi batekereza nkabo.

    The post Nyuma y'aho Minisitiri w'Ububanyi n'Amahanga w'Ububiligi, Sophie Wilmès, atangarije ko yakiriye umuryango w'umugizi wa nabi Paul Rusesabagina, abantu bakomeje kumubaza igihe azakirira abo Rusesabagina yagize imfubyi. appeared first on RUSHYASHYA.

    Source : https://rushyashya.net/nyuma-yaho-minisitiri-wububanyi-namahanga-wububiligi-sophie-wilmes-atangarije-ko-yakiriye-umuryango-wumugizi-wa-nabi-paul-rusesabagina-abantu-bakomeje-k/?utm_source=rss&utm_medium=rss&utm_campaign=nyuma-yaho-minisitiri-wububanyi-namahanga-wububiligi-sophie-wilmes-atangarije-ko-yakiriye-umuryango-wumugizi-wa-nabi-paul-rusesabagina-abantu-bakomeje-k

  • Mwirinde icyaha cyo kwimura IMANA #rwanda #RwOT

    Nuko bene Data, mwirinde hatagira uwo muri mwe ugira umutima mubi utizera, umutera kwimūra Imana ihoraho. Abaheburayo3:12

    Kwimura Imana, ni umuntu wigeze kumenya ubuntu bw’Imana, akamenya imikorere y’Imana, mu magambo asobanutse akaba yarakiriye Kristo Yesu nk’Umwami n’Umukiza w’ubugingo bwe. Agakizwa agahinduka akaba umwana w’Imana, akiga kwiringira Imana. Amategeko 10, atanu yose areba umubano w’umuntu n’Imana Yesu yayakubiye muri 2: Avuga ngo “Ukundishe Uwiteka umutima wawe wose, n’ubwenge bwose n’imbaraga zose”. Uyu ni umubano wihariye umuntu agirana n’Imana, ni igihe umuntu abaho asabana n’Imana ari incuti magara n’Imana akaba akijijwe.

    Hanyuma akimura Imana muri we, akimika ibindi bintu, murabizi ko ikinyuranyo cy’Imana ari ibigirwamana kandi ikigirwamana gishobora kuba ikintu icyo ari cyo cyose wimitse kikagira umwanya uruta uw’Imana mu buzima bwawe. Aha bishatse kuvuga ko ikintu cyose wumva ko kitariho utabaho kiba ari ikigirwamana, urugero hari igihe umuntu akunda ubuzima agakabya kugeza ku rwego ahora yizirikana, ahora yikunda Imana ikabura umwanya pe! Akabura umwanya wo gusenga, wo gusoma Bibiliya. Ubwo buzima bwose bukavaho agasigara ari umuntu usanzwe w’inyama n’amaraso kandi ubuzima tugomba kubaho, ni ubuzima bw’umubiri yego ariko cyane cyane ni ubuzima bw’umwuka.

    Yesu yabwiye Nikodemu ko' Icyibyarwa n’umubiri nacyo ari umubiri, ikibyarwa n’umwuka nacyo ari umwuka’ ni ukuvuga ko imirimo isanzwe y’umubiri dukwiye kuyikora mu mwanya wayo ariko ubusabane bwacu n’Imana nabwo butabangamiwe. Hari igihe umuntu akunda kureba firime amasaha menshi agakabya, akarangiza atananiwe ariko byagera gusoma ijambo ry’Imana bikanga. Iyo abantu bareba umupira nubwo iminota bayongera ku yari iteganyijwe nta kibazo bagira.

    Ariko kuririmba indirimbo ebyiri bikakunanira, kuba mu biganiro bindi biba mu buzima busanzwe ntusinzire ariko wagera mu materaniro ukumva utangiye gusinzira, mbese ukabura uburyo bwo gusabana n’Imana. Guteranira hamwe n’abandi bikakunanira nyamara wicaye mu kabari ho nta kibazo.

    Bibiliya yatubwiye ngo 'Twirinde tutagira umutima mubi udutera kwimura Imana’

    Ibyimura Imana ni byinshi ntabwo twabirondora ngo tubibashe, hari nubwo Imana iduha umugisha bikaba impamvu yo kwimura Imana. Urugero Imana yanyujije Abisiraheli mu butayu irababwira ngo 'Nimumara kugera mu gihugu mbajyanyemo mukarya mukabyibuha, mukubaka amazu mukayabamo ntimuzibagirwe ko Imana yabatungiye mu butayu imyaka mirongo ine’. Ariko bageze yo babona umwero, babona umugisha Imana ibahaye baribagirwa, nibyo byatumye bajyanwa mu bundi bunyage bw’imyaka mirongo irindwi.

    Nagira ngo mbabwire ko umugisha Imana iduha ntiwuduha kugira ngo turamye umugisha, ahubwo dukwiye kuramya Imana itanga umugisha. Imana yagize neza kuguha icyubahiro, Imana yagize neza kuguha akazi, Imana yagize neza kuguha urubyaro, Imana yagize neza kuguha ibyo ukora mu buzima bwa buri munsi ariko ibyo ntibikwiye gutuma Imana yimuka mu buzima bwawe. Hari igihe umuntu yihugiraho ku buryo n’Imana itabasha kumubona, no mu rugo bakamubura ubuzima bwe bwose bukaba ari ugushakisha amafaranga, akarwana n’imibereho Imana ikagera ubwo Imubura kuko adafite akanya ko gusenga( akanya ko gusabana nayo)

    Dawidi yagiye afashwa n’Imana iramuzamura, imukura mu buzima bubi imugira kuba umwami wa Isiraheli ariko igihe rimwe amaze gukira abaye umuntu ukomeye rimwe yifuza kubara ingabo. Umugaba w’ingabo aramubuza ati ingabo ni iz’Imana, arabyanga ingabo arazibara. Imana irababara iramubwira iti ‘Dawidi nagukuye inyuma y’intama ejobundi, none utangiye kwirata amaboko, utangiye kumva ko wihagije! Icyo gihe igihugu cyose giterwa n’ibyago hapfa abantu benshi cyane, icyo gihe Dawidi yarihannye asaba Imana imbabazi iramubabarira.

    Hari ubwo umuntu ashobora kwimura Imana ku giti ke, ashobora kwimura Imana mu muryango( Niba uri umupapa mu rugo wakagombye kuba utoza abo mu rugo iwawe gusenga, niba ari wowe muyobozi mu rugo urera abo mubana, cyangwa uri umugore mu rugo ukwiye kuba utoza abo mubana gusenga). No mu rusengero nabwo hari ubwo Imana ihimuka, tukimika imihango y’amatorero gusa ariko Imana yarahimutse.

    Umuntu ashobora kwimura Imana ikimuka burundu mu mikorere ye: Buriya iyo utangiye kwinjiza ruswa ukayirya cyangwa ukayitanga, uba urimo kwimura Imana muri Businesi yawe. Iyo utangiye gukora amanyanga mu kazi Imana yaguhaye nabwo uba urimo kugenda uyimura. Noneho mu mubiri wawe nabwo ushobora kwimura Imana, Bibiliya ihamya ko turi insengero z’Umwuka Wera kandi ikavuga ngo umuntu natsemba urusengero Imana nawe izamutsemba.

    Bishatse kuvuga ko mu mubiri wawe ushobora kwimika ibyaha, Yesu akimuka burundu mu buzima bwawe. Yesu yigeze avuga ngo' Ingunzu zifite imyobo, ibiguruka bifite ibyari, ariko umwana w’umuntu ntafite aho arambika umusaya' Hano bishatse kuvuga ko hari igihe tubonera umwanya ibindi, Imana ikimuka mu buzima bwacu.

    Ibihembo byo kwimura Imana ni ugukorwa n’isoni!

    Bibiliya ihamya ko ingororano cyangwa se ibihembo byo kwimura Imana, biba gukorwa n’isoni. muri Yeremiya 17:13 hagira hati “Uwiteka Byiringiro bya Isirayeli, abakwimūra bose bazakorwa n’isoni. Abanyimūra bazandikirwa mu isi kuko bimūye Uwiteka, kandi ari we sōko y’amazi y’ubugingo.”

    Abantu bimura Imana ibihembo byabo ni ugukorwa n’isoni kuko Bibiliya irahamya ngo ‘Uwiteka ari mu ruhande rwacu, umubisha ntawe’. None se nuyimura ikava mu ruhande rwawe: ariyo igutabara, ariyo ituma abanzi bawe batakugeraho, ariyo yakugaburiraga, ariyo yakwambikaga, ariyo yatumaga utera imbere, uzarengerwa nande?

    Abantu bagutabara ariko bafite aho bagarukira, ubwenge bwawe bwagufasha ariko bufite aho bugarukira, ubuzima bwawe ni bwiza ariko Imana itagukingiye Satani yagutera akakumira bunguri. Ariko niwiringira Imana ikaba mu ruhande rwawe, umubisha ntawe Satani azahunga. Gusa twirinde impamvu iyo ariyo yose yakwimura Imana mu buzima bwacu.

    Nagira ngo nkubaze: Ni ryari uheruka gusenga ukumva Imana ije hafi yawe, ukumva ubuntu bw’Imana bukujeho? Ni ryari uheruka gusabana n’Imana ukumva ije mu buzima bwawe? Ni ryari imbaraga z’Imana ziheruka kukurinda ukumva uri mu kubaho kw’Imana? Garuka mu kubaho kw’Imana, icyo ukunda ntukiburira umwanya.

    Wirinde icyaha kuko kimura Imana, muribuka Adamu yimitse icyaha ariko ingaruka twese zatugezeho. Niwimura Imana mu muryango ingaruka zizaba ku bana bawe, ku muryango, ku itorero, zizaba ku buzima bwawe. Ariko niwimika Imana imigisha izakuzaho kugeza ku bisekuru byinshi bizakurikira.

    Inyigisho yateguwe na Pasiteri Desire Habyarimana mu kiganiro 'Ubutumwa bukiza’ kuri Agakiza Tv

    [email protected]

    Source : https://agakiza.org/Mwirinde-icyaha-cyo-kwimura-IMANA.html

  • Police FC yahagaritse Haringingo Francis #rwanda #RwOT

    Ikipe ya Police Fc yafashe icyemezo cyo guhagarika umutoza mukuru wayo Haringingo Francis nabo bakoranaga kubera umusaruro muke.

    Kuruyu wa kabiri mu gitondo nibwo habyutse hacaracara amakuru avuga ko Haringingo Francis ashobora kwirukanwa bitewe n'ikibazo cy'umusaruro muke yagaragaje muriyi shampiyona ibi byavugwaga hashingiye ko ubuyobozi bw'iyi kipe bwabyukiye mu nama idasanzwe yagombaga kwiga ku musaruro wiyi kipe.

    Ubuyobozi bw'iyi kipe y'igipolisi cy'u Rwanda bwahagaritse umutoza mukuru wiyi kipe Haringingo Francis ndetse na bamwe mu batoza bakoranaga babashinja umusaruro utari mwiza bitewe n'abakinnyi iyi kipe yabaguriye ndetse ikaba yaranakoze ibishoboka byose ngo babe bayihesha igikombe ariko bikaba bisa naho byanze.

    Ubuyobozi bw'iyi kipe buvuga ko Haringingo nabo bahagarikanywe bagiye kuba bahagaze igihe kitazwi ariko amakuru akavuga ko ubwo shampiyona y'u Rwanda izaba igeze ku musozo nubundi uyu mutoza azigendera doreko amasezerano ye yagombaga kurangirana niyi shampiyona.

    Haringingo Francis yaje muri police fc avuye muri Mukura Victory Sport amaze kuyihesha igikombe cy'amahoro ndetse anitwara neza gusa mw'ikipe ya Police fc ku mwaka we wa kabiri ntibyaje gukunda kandi ubuyobozi bwayo buvuga ko uyu mugabo bamuhaye ibyo yasabye byose nawe abizeza igikombe cya shampiyona y'uyu mwaka none yirukanwe shampiyona itarangiye doreko hasigaye imikino ibiri harimo nuwo bazakina ejo na Rutsiro Fc mu bugesera.

    Police fc yahagaritse umutoza wayo Haringingo Francis nabo bakoranaga

    Source : https://impanuro.rw/2021/06/15/police-fc-yahagaritse-haringingo-francis/

  • Icyo ubuyobozi bwa APR FC buvuga ku kuba Seif yababariwe agasubira mu mwiherero #rwanda #RwOT

    Ubuyobozi bwa APR FC buvuga ko uyu munsi ari bwo bushobora kuza gufata umwanzuro ku kibazo cya Seif wasohotse mu mwiherero nta ruhushya agasubizwa mu rugo akaza kwandika ibaruwa isaba imbabazi.

    Mu mpera z’icyumweru gishize ku wa Gatandatu nibwo inkuru yamenyekanye ko APR FC yahagaritse Niyonzima Olivier Seif, ni nyuma yo gusohoka mu mwiherero nta ruhushya asabye.

    Mu gitondo cyo kuri uyu wa Kabiri tariki ya 15 Kamena 2021, nibwo haje inkuru ivuga ko uyu mukinnyi ukina mu kibuga hagati ko yamaze kubabarirwa ndetse yanasubiye mu mwiherero w’iyi kipe irimo kwitegura Rayon Sports k’umunsi w’ejo.

    Ku kuba yasubiye mu mwiherero, umunyamabanga wa APR FC, Masabo Michel yabwiye ISIMBI ko ubuyobozi bwa APR FC bwakiriye ibaruwa isaba imbabazi ya Seif ariko atarasubizwa.

    Ati'Seif ibyo mwumvise nibyo, amakosa yakoze arangije ayasabira imbabazi ubuyobozi bwakira ubusabe bwe, buri bufate akanya buyigeho hanyuma bukamusubiza(…), sinakubwira ngo ni ryari ariko biraterwa n’igihe ubuyobozi buri bubonere umwanya.'

    Yakomeje avuga ko Seif yashyizwe mu kato kugira ngo nanahabwa imbabazi azajye mu bandi hakurikijwe amabwiriza yo kwirinda icyorezo cya Coronavirus.

    Ati'habayeho ikintu cyo kumushyira mu kato bijyanye n’aya mabwiriza tugenderaho y’iki cyorezo cya Coronavirus, kugira ngo naba uwo kugaruka nabyo bigire uko bikurikizwa hashingiwe kuri ayo mabwiriza, amasaha 72 yapimwe agaragaza ko nta bwandu afite, ubundi ibindi bizakurikizwa ni imyanzuro ubuyobozi buzaba bwafashe.'

    Uyu muyobozi kandi yavuze ko Niyonzima Olivier Seif akiri umukinnyi wa APR FC itigeze imwirukana.

    Niyonzima Olivier Seif ngo ntabwo ubuyobozi burafata umwanzuro ku kibazo cye

    Source : http://isimbi.rw/siporo/article/icyo-ubuyobozi-bwa-apr-fc-buvuga-ku-kuba-seif-yababariwe-agasubira-mu-mwiherero

  • Abantu benshi bacitse ururondogoro kubera Nicki Minaj n'umuhungu we. – YEGOB #rwanda #RwOT

    Umuhanzikazi w'umuraperi Nicki Minaj yagarutsweho na benshi kubera ifoto yashyize hanze ari kumwe n'umwana w'umuhungu ,bituma bavuga ko yabyaye.

    Onika Tanya Maraj uzwi nka Nicki Minaj ni umwe mu bahanzikazi bayoboye umuziki wo muri Amerika by'umwihariko akunzwe cyane mu njyana ya Rap akora dore ko banamwita umwamikazi wayo. Uyu mugore wari umuze igihe mu kiruhuko cya kibyeyi amaze kugaragaza ko yagarutse kandi akiri nka Nicki Minaj wa cyera mbera y'uko abyara.

    Nicki Minaj ukomeje gutitiza imbuga nkoranyambaga bitewe n'amafoto ari kugenda agaragaza amenshi yerekana ikimero cye naho andi nayo yifotoza ari kumwe n'imfura ye y'umuhungu yabyaranye n'umugabo we Kenneth Petty.

    Uyu muraperi akaba yongeye gutuma abantu benshi bamuvuga nyuma yuko yerekanye ifoto ateruye umuhungu we yahaye akazina ka kabyiniriro ka 'Papa Bear'. Iyi foto ikaba yatumye abenshi bavuga ko yibyaye dore ko umwana we akomeje gukura asa na nyina cyane.

    Source : https://yegob.rw/abantu-benshi-bacitse-ururondogoro-kubera-nicki-minaj-numuhungu-we/