Blog

Bafatiwe mu kabari barenze ku mabwiriza yo kwirinda Covid-19

Ako kabari kafatiwemo abo bantu ngo si ubwa mbere gafashwe gafunguye kandi ibyo binyuranyije n’amabwiriza yo kwirinda Covid-19, ubu ngo ni ubwa gatatu gafatiwemo abantu.

Abafatiwe muri ako kabari bavuga ko bicuza ibyo bakoze kuko ngo barenze ku mabwiriza basanzwe bayazi, ariko ngo barabisabira imbabazi.

Umwe muri bo witwa Haguma Jean Nepomuscène ati “Ndi umuyobozi, ndi umujyanama mu Kagari, nagombye kuba nkangurira abandi kwirinda icyorezo, bubahiriza amabwiriza, ariko nafashwe nayarenzeho. Nafashwe nyoye icupa rimwe gusa ariko ni ikosa nyine, barimpaniye sinzabyongera, ubu 10.000Frw by’amande ntanze ntiyari kubura ikindi akora mu rugo”.

Uwitwa Rudasingwa Innocent na we ati “Amabwiriza turayazi, twarayabwiwe kenshi n’ubwo twakwifuza ngo bikomeze kuko kwigisha ni urugendo n’ubwo icyorezo cyo kitadutegereza”.

Ubuyobozi bwafashe umwanya wo kubaganiriza

Kalisa Appolinaire nyiri akabari kafatiwemo abantu, avuga ko yari arwaye, ubu yafashwe kubera amakosa y’abakozi be bakinguye akabari atabizi.

Ati “Nari ndwaye, nari mu rugo ariko abakozi bafungura akabari barenga ku mabwiriza yo kwirinda icyorezo ntabizi. Ni akabari kanjye nabihaniwe, hari amande natanze ariko ntegereje ibindi bihano ntaramenyeshwa, gusa ndasaba imbabazi kuko baramutse bambariye, nahinduka umukangurambaga wo kurwanya icyorezo”.

Umuyobozi w’Akarere ka Bugesera, Mutabazi Richard, yavuze ko mu bafatiwe kurenga ku mabwiriza yo kwirinda Covid-19 harimo abafashwe zinshuro irenze imwe, ku buryo bigera aho bikagaragara nko kwigomeka kandi kurwanya icyorezo cya Covid-19 ubundi ngo atari urugamba rw’umuntu umwe.

Yagize ati “Uyu Kalisa Appolinaire, nyiri akabari karaye gafatiwemo abantu, twabonye raporo kenshi ko ajya arenga ku mabwiriza agafungura akabari, ubwanjye nagiye kumureba i Ntarama ndamuvugisha, mpava anyemereye ko bitazongera kumubaho ubundi, none nimugoroba akabari ke kongeye gufatirwamo abantu. Ubu ibyo yitwazaga byose niba yahabaga, ni ba yahacururizaga ibindi byose birafungwa kugeza icyorezo gicitse burundu”.

Yongeyeho ko kwigisha amabwiriza ajyanye no kwirinda icyorezo byakozwe cyane mu buryo bwose, ubu igikurikiyeho ni uguhana, kandi ibihano biba bitandukanye. Ufashwe yarenze ku mabwiriza bwa mbere, agira uko ahanwa, ufashwe bwa kabiri ari isubiracyaha agira uko ahanwa na ho ufashwe yarabigize akamenyero na we akagira uko ahanwa.

Yagize ati “Mukwiye kugira isoni z’ibyo mwafatiwemo. Amande mucibwa ntajya mu mufuka w’umuyobozi uwo ari we wese, na Leta ntiyakeneye, ariko ni ngombwa guhana mu gihe abantu banze kumva amabwiriza, kuko icyorezo kirahari. Nshinzwe kurinda Abanyabugesera Covid-19, urenga ku mabwiriza ajyanye no kuyirinda agomba guhanwa”.

Abafashwe ni Ngirababyeyi Eugène w’imyaka 28, Ngirumukiza Paul w’imyaka 23, Dusingizimana Ndazivunnye w’imyaka 26 na Nizeyimana Elias w’imyaka 24, nk’uko bigaragara ku rubuga rwa Internet rwa Polisi y’u Rwanda.

Umuvugizi wa Polisi mu Ntara y’Amajyepfo, SP Theobald Kanamugire, yavuze ko gufatwa kw’abo bantu byaturutse ku makuru yatanzwe na nyiri ikirombe, abakozi be ndetse n’abayobozi mu nzego z’ibanze.

Ati “Nyiri ikirombe cyibwagamo amabuye y’agaciro yo mu bwoko bwa Koluta, ni we waduhaye amakuru ko hari abantu bamaze iminsi bitwikira ijoro bakajya mu kirombe cye gucukuramo amabuye y’agaciro. Twakoranye n’abayobozi mu nzego z’ibanze batubwira ko hari itsinda ry’abantu biyise abanyogosi bazwiho kujya mu birombe bagacukura amabuye y’agaciro, abaturage n’abayobozi mu nzego z’ibanze batugejeje kuri bariya bane mu ngo zabo tugenda tuhasanga ibikoresho bifashisha bacukura amabuye mu birombe”.

SP Kanamugire yashimiye abaturage bagize uruhare mu gutuma abo bantu bafatwa ariko yibutsa abaturage ko nta muntu wemerewe kujya gucukura amabuye y’agaciro ahantu aho ari ho hose atabifitiye uburenganzira.

Ati “Abaturage tubakangurira ko umuntu ucukura amabuye y’agaciro aba abifitiye ibyangombwa bitangwa n’inzego zibishinzwe. Bariya bose babijyagamo bitazwi kandi babaga barimo guhemukira umushoramari wabiherewe uburenganzira n’inzego zibishinzwe. Byari bimaze iminsi na Polisi yari irimo kubashakisha”.

Yabibukije ko kujya gucukura amabuye y’agaciro bashobora kuhagirira ibibazo bitandukanye harimo kuba bagwirwa n’ibirombe bagapfa cyangwa bakamugara.

Abafashwe bahise bashyikirizwa Urwego Rushinzwe Ubugenzacyaha (RIB) rukorera muri sitasiyo ya Polisi ya Kiyumba.

Itegeko N° 58/2018 ryo ku wa 13/08/2018 rigenga ubucukuzi bw’amabuye y’agaciro na kariyeri Ingingo ya 54 ivuga ko Umuntu wese ushakashaka, ucukura, utunganya, ucuruza amabuye y’agaciro cyangwa kariyeri nta ruhushya, aba akoze icyaha.

Iyo abihamijwe n’urukiko, ahanishwa igifungo kitari munsi y’amezi abiri (2) ariko kitarenze amezi atandatu (6) n’ihazabu y’Amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni eshanu (5.000.000 FRW) cyangwa kimwe gusa muri ibyo bihano. Urukiko rutegeka kandi ubunyagwe bw’amabuye y’agaciro cyangwa kariyeri byafatiriwe biri mu bubiko, bicuruzwa cyangwa bitunganywa nta ruhushya.

Imodoka zabugenewe ziri kwifashishwa mu gusukira ubusitani

Ubusitani buri gutunganywa, haterwamo amoko atandukanye y’ibiti n’indabyo bitaka kurushaho, bisimbura ubusitani bwari bugizwe ahanini n’umucaca uzwi nka pasiparumu n’indabyo byari bihamaze igihe birimo kurandurwa.

Umuyobozi w’Akarere ka Musanze Nuwumuremyi Jeannine, avuga ko gutunganya ubusitani, biri muri gahunda yagutse yo kuvugurura umujyi. Yagize ati: “Tumaze igihe kinini turi muri gahunda ndende yo kuvugurura umujyi wa Musanze, bijyanye no kongera ibikorwa remezo by’amazu y’amagorofa, kubaka imihanda, n’ibindi bijyanye no kurimbisha umujyi. Twaje gusanga byarushaho kuba byiza dutunganyije n’ubusitani, tukabuteramo ibimera birushaho kuwutaka mu buryo bujyanye n’igihe, kugira ngo turusheho kurimbisha umujyi, urusheho gusa neza”.

Akomeza avuga ko imihanda ya kaburimbo yose yo mu mujyi wa Musanze, iri gukikizwaho ubusitani, kandi uko umujyi uzagenda urushaho kwaguka, ni nako gahunda yo kuwurimbisha hongerwa ubusitani izakomeza.

Abiganjemo urubyiruko bahaboneye akazi bahemberwa

Urubyiruko rusaga 1000 rwo muri aka Karere n’utundi bihana imbibi, nibo bari kwifashishwa mu mirimo ya buri munsi yo gutunganya ubu busitani. Kuri bo ngo ni uburyo bwiza, bubafasha gukemura ibibazo byaterwaga n’ubushomeri bwari bubugarije.

Mushinzimana Marie Jeanne, umwe mu bo Kigali Today yasanze mu kazi ko gutunganya ubu busitani, yagize ati: “Nibura ku munsi nkorera amafaranga ibihumbi 2. Ubu ndi guteganya kuzayazigama, yagwira nkakora umushinga w’ubworozi. Nanone bizandinda kubera ababyeyi umuzigo, kuko nzaba nshobora nko kwigurira mituweri, amavuta n’utundi tuntu umukobwa aba akeneye. Mbese urebye aka kazi nakabonye nkababaye”.

Urubyiruko rwahawe akazi ko gutunganya ubusitani byabarinze ubushomeri

Undi witwa Mukamurenzi yagize ati: “Ubushomeri bwari bumereye nabi, aho nabonaga buri kimwe cyose ari uko ngisabye ababyeyi, kenshi batabaga banabifitiye ubushobozi. None nagize amahirwe nabonye akazi. Ubu ifaranga ndi gukorera ndi kurikomeraho, nirinda kuryayamo, kuko nteganya ko nikarangira, nzagana iy’ubucuruzi buciriritse, bindinde kongera kwisanga mu bushomeri, kuko nzaba nabonye igishoro”.

Abatuye muri uyu mujyi barimo uwitwa Ntahobagiye Clement, bishimiye ko umujyi wa Musanze, ugiye kugaragara mu yindi sura nshya y’ubwiza, bitandukanye n’uko wari usanzwe.

Yagize ati: “Uzarebe ukuntu ubusitani bw’i Kigali buba buteye amabengeza, binatuma hari aho ugera ukumva utakwifuza gutaha, kubera ukuntu hasa neza. Ni byiza ko n’ubusitani bwa hano iwacu bwatekerejweho, kandi bizarushaho gutuma umujyi wacu urushaho gukurura abawugenderera, cyane ko turi muri viziyo y’iterambere”.

Gutunganya inkengero z’imihanda yo mu mujyi wa Musanze haterwa ubusitani biri mu rwego rwo kuwurimbisha

Nuwumuremyi Jeannine, uyobora Akarere ka Musanze, asaba abaturage kubungabunga ibi bikorwa. Ati: “Tuributsa abaturage ko na bo bafite inshingano zo kurinda no kubungabunga ibiri gukorwa. Tubasaba gukumira uwagira uruhare mu kwangiza nk’izo ndabyo cyangwa ibiti biri guterwa, cyangwa mu gihe babonye hari ubyangiza bakaba banadutungira agatoki. Kuko ni igikorwa twashoyemo imbaraga n’amafaranga menshi, duharanira ko iterambere ry’umujyi rigerwaho. Ntitwifuza rero uwo ari we wese warisubiza inyuma”.

Akomoza ku mihanda harimo n’imishya ikomeje gukorwa muri uyu mujyi, Mayor Nuwumuremyi yongeye kwibutsa abaturage ko bidashobora kuramba, mu gihe ababituriye n’ababikoresha baba batabigizemo uruhare.

Ahahoze hateye umucaca wararanduwe ngo usimbuzwe indabo

Yagize ati: “Igikorwa remezo nticyaramba, abantu batagize uruhare mu kugifata neza. Hari nk’aho tugera, tugasanga imihanda na za rigore byarahinduwe aho kujugunya ibintu by’ibisigazwa nk’imyanda n’ibindi bintu bitagikoreshwa, bikaba ngombwa ko aho byangije dusubira mu mirimo y’isana cyangwa kubaka bundi bushya. Ndagira ngo nibutse abaturage bose, ko buri wese afite inshingano zo kubicunga no kubifata neza, kugira ngo bizarambe, bityo bidufashe kuboneraho no gutera intambwe y’ibindi bikorwa”.

Imirimo yo gutunganya ubusitani, izamara amezi abiri, ariko gahunda yo kubwitaho mu buryo buhoraho no kububungabunga yo izakomeza na nyuma yaho; aho biteganyijwe ko mu bahawe akazi ko gutunganya ubu busitani bushya, hari abazagakomeza mu buryo buhoraho.

Bari kuhatunganya muri ubu buryo bakabona kuhatera indabo n’ibiti bizatuma hagaragara neza kurushaho

Insengero zafunzwe mu mirenge ya Nyamabuye na Shyogwe

Ubuyobozi bw’Akarere ka Muhanga butangaza ko iyo myanzuro yafashwe nyuma y’uko ku wa 30 Kamena 2021, imibare ya Minisiteri y’Ubuzima (MINISANTE) yagaragaje ko Akarere ka Muhanga ari aka kabiri mu kugira abanduye Covid-19 benshi nyuma y’Umujyi wa Kigali, izo ngamba nshya zigatangira gushyirwa mu bikorwa kuri uyu wa Gatanu tariki 2 Kamena 2021.

Iminsi ine ishize ni bwo ubwandu bwa Covid-19 bwatangiye kuzamuka, ku wa 30 Kamena abanduye bakaba bagera kuri 96, imibare myinshi ikaba yiganje mu kagari ka Gahogo mu mujyi wa Muhanga.

Umuyobozi w’Akarere ka Muhanga, Kayitare Jacqueline, avuga ko impamvu nyamukuru z’ubwandu bwiyongereye ari ukwirara abantu ntibakurikize ingamba kuko usanga nk’amazu y’ubucuruzi atakigira ahantu ho gukarabira.

Avuga ko hari n’izindi ngamba abantu badohotseho, aho usanga bacucitse aho bakorera, gufungura utubari mu buryo butemewe no kuba abantu bari basigaye badahana intera kandi bagasurana cyangwa bagakora ibirori bitemewe.

Imiryango yakoraga buri munsi ku maduka no mu isko na yo irakora 50%

Hafashwe ingamba zo gufunga insengero no kugabanya abakorera ku maduka no mu isoko

Umuyobozi w’Akarere ka Muhanga avuga ko kubera kudohoka byacaga amarenga yo kugira ubwandu bwinshi ari na byo byabaye, hagahita hafatwa ingamba zihariye mu Karere ka Muhanga by’umwihariko mu mirenge ya Nyamabuye na Shyogwe, aho ibyiciro by’abantu byinshi bigaragaramo ubwandu.

Agira ati “Twarebye ibikorwa bihuza abantu benshi tugabanyamo kugeza kuri 50% cyangwa bimwe turabihagarika igihe bigaragara ko ntacyo byahungabanya gikomeye ku buzima bw’abantu, nk’insengero twabaye tuzifunze muri iyo mirenge mu byumweru bibiri maze turebe ko kudahura kw’abantu byagabanya imibare y’abandura”.

Yongeraho ati “Twasabye ko udusoko duto duto twa buri munsi ‘Ndaburaye’ twaba duhagaze, amasoko ya Misizi, Kinini na Cyakabiri hagaragaremo gusa ibyo kurya n’amatungo, na ho urujya n’uruza rw’abantu mu mujyi wa Muhanga rukagabanuka, aho twagabanyije inzu z’abacuruzi 50% bakajya bagurana kuza gukora kugira ngo turebe ko icyorezo twagica intege”.

Imirenge y’icyaro nta kibazo ifite gikomeye ariko na bo basabwa gukurikiza ingamba

Meya Kayitare avuga ko imirenge y’icyaro nta bibazo by’ubwandu bwinshi bihari kuko aho bwari bwagaragaye hafashwe ingamba bukagabanuka ku buryo hari n’aho bwashize, ari na yo mpamvu guhangana na bwo mu mujyi bisaba ingamba zihariye.

Urujya n’uruza rw’abakiriya n’umubare w’abacuruzi n’abakozi babo byagabanyijwe kabiri

Avuga ko imirenge ya Kiyumba mu Kagari ka Rukeri mu mudugudu wa Nundwe wasangaga imibarey’abandura igaragara muri uwo mudugudu, gusa kubuhashya byahise byoroha, na ho mu murenge wa Nyarusange mu Kagari ka Ngaru na ho ubwandu bukaba burimo kugabanuka hifashwishijwe gushyiraho ingamba zirimo gusura abarwariye mu ngo no gushyiraho amarondo y’amanywa.

Ubuyobozi butangaza ko igihe byagaragara ko ubwandu bukomeje kwiyongera kandi abantu barenga ku mabwiriza hafatwa izindi ngamba zikomeye zirimo no kuguma mu rugo, bukaba busaba abaturage kubigira ibyabo birinda kugira ngo ingamba zafashwe zitange umusaruro.