Blog

Ako gace kashyizwemo pariki nshya y'inyoni iri muri Singapore izwi nka 'Bird Paradise'.

Ahiswe 'Rwanda Nyungwe Forest Heart of Africa' ni agace kabumbatiye inyoni zifatwa, gaherekejwe n'amagambo agaragaza uburumbuke bw'ibinyabuzima biboneka mu ishyamba rya Nyungwe.

Bird Paradise iherereye muri Mandai Wildlife Reserve, hamwe mu hantu hakomeye mu rusobe rw'ibinyabuzima.

The Mandai Wildlife Reserve isanzwe ibarizwamo pariki enye zirimo Singapore Zoo, River Wonders, Night Safari n'iheruka gufungurwa ya Rainforest Wild Asia.

Rwanda Nyungwe Forest Heart of Africa iri ku buso bungana na hegitare 1,55 ikaba ari na yo nini mu ziherereye muri Bird Paradise, ahaboneka amoko y'inyoni arenga 800 arimo iziboneka muri Afurika, inuma z'izindi zinyuranye.

Ako gace kahanzwe hifashishijwe igishushanyo gishingiye ku misozi n'amashyamba yo ku Mugabane wa Afurika, by'umwihariko hagendewe ku miterere y'Ishyamba rya Pariki y'Igihugu ya Nyungwe.

Harimo na Canopy Walkway, inzira yo mu kirere yifashishwa mu kureba inyoni n'ibindi binyabuzima bitandukanye biri muri iryo shyamba.

Ubwo bufatanye buha u Rwanda umwanya wo kwerekana uko rukungahaye ku binyabuzima ku rwego mpuzamahanga, guteza imbere ubumenyi ku bikorwa byo kubungabunga ibidukikije no kugaragaza igihugu nk'ahantu heza ku bashaka gukora ubukerarugendo bugezweho kandi bushingiye ku bidukikije.

Umuyobozi Mukuru w'Ishami ry'Ubukerarugendo muri RDB, Irène Murerwa, yagaragaje ko u Rwanda rwishimiye gukorana na Mandai Wildlife Group.

Ati 'Twishimiye gufatanya na Mandai Wildlife Group mu kugaragaza u Rwanda nk'icyerekezo cy'ubukerarugendo bushingiye ku bidukikije no kubibungabunga ku ruhando mpuzamahanga. Ubu bufatanye bushimangira ubushake bwacu mu guteza imbere imikoranire mpuzamahanga, guteza imbere ubukerarugendo no gusangiza abandi inkuru y'u Rwanda.'

Ubufatanye n'icyo kigo kandi bwagaragajwe nk'intambwe ikomeye mu ngamba z'igihugu zo guteza imbere ubukerarugendo.

Ni inzira nziza kandi yo gusangiza abantu no kubafasha kwiga urusobe rw'ibinyabuzima byo muri Afurika no gushimangira imbaraga ziri mu kubibungabunga.

Umuyobozi muri Mandai Wildlife Group, Dr. Cheng Wen-Haur, yashimangiye ko iki kigo kigamije guteza imbere ibikorwa byo kubungabunga ibinyabuzima kandi ko bishimiye ubufatanye na RDB.

Ati 'Ku bufatanye buhamye n'abafatanyabikorwa bafite icyerekezo nk'Urwego rw'Igihugu rw'Iterambere (RDB) na Ambasade y'u Rwanda, tubashije gusangiza Isi inkuru zidasanzwe z'uburyo bwo kubungabunga ibidukikije, zishobora kugera ku bantu batandukanye hirya no hino ku Isi.'

Bird Paradise iherereye muri Mandai Wildlife Reserve ni hamwe mu hantu hakomeye mu kubungabunga urusobe rw'ibinyabuzima

Umuyobozi muri Mandai Wildlife Group, Dr. Cheng Wen-Haur, yashimangiye ko iki kigo kigamije guteza imbere ibikorwa byo kubungabunga ibinyabuzima

Umuyobozi Mukuru w'Ishami ry'Ubukerarugendo rya RDB, Irène Murerwa, yagaragaje ko u Rwanda rwishimiye gukorana na Mandai Wildlife Group

Abitabiriye iki gikorwa bagaragarijwe akamaro kacyo

Mbere y'uko Rwanda rushyiraho gahunda y'uburezi kuri bose hari abana bavukaga ku babyeyi bari bataramenya akamaro ko kwiga ntibabashyire mu ishuri.

Ibi byatumye kuri ubu hari abakuze batazi gusoma, kwandika no kubara. Bamwe muri bo bagira ipfunwe ryo kugana amasomo yashyiriweho abakuze bacikanwe n'uburezi bw'ibanze.

Mukeshimana Josephine w'imyaka 40 yabwiye IGIHE ko ubwo yari ageze mu wa gatatu w'amashuri abanza nyina yapfuye, bituma ava mu ishuri ajya kwita ku muryango kuko se afite ubumuga.

Gukura atazi gusoma no kwandika byamubihirije ubuzima kuko yageraga ku cyapa ntamenye ibyanditseho, ndetse ngo ubwo yiteguraga gushinga urugo umukunzi we yaramwandikiraga akajya gushaka umusomera.

Ati “Mu mezi atandatu ashize nafashe umwanzuro njya kwiga mu bakuze ubu nzi gusoma, kwandika no kubara”.

Bazaze Emmanuel w'imyaka 43 avuga ko afite imyaka irindwi ababyeyi bamutegetse kujya kuragira inka, bituma agira imyaka 43 atarigera akandagira mu ishuri. Nawe mu mezi atandatu ashize nibwo yafashe icyemezo cyo kwiga kubara, gusoma no kwandika.

Uyu mugabo uvuga ko agiye guhita akomerezaho akiga gusudira. Yavuze ko abagabo bagenzi be bagira ipfunwe ryo kwiga bakuze.

Ati “Impamvu abagabo biga bakuze ari bake urabona hano ni ku kigo cy'amashuri, abana baza kutureba bakaduseka, bigatuma abagabo bagira ipfunwe bakavamo batarangije”.

Mukarubayita Berthilde wo mu Murenge wa Shangi, w'Akarere ka Nyamasheke umaze imyaka irindwi yigisha abakuze gusoma no kwandika, avuga ko mu giturage harimo abakuze benshi batazi gusoma no kwandika.

Ati “Umudugudu ntuyemo ugizwe n'abantu 1345 harimo abakuze barenga 300 batazi gusoma no kwandika. Ubuyobozi bukwiye gushyiramo imbaraga bugasubizaho agahimbazamusyi bageneraga umwarimu wigisha abakuze”.

Pasiteri Kayobera Joseph, Umushumba w'Itorero ADEPR Mukoma rikorera mu Murenge wa Shangi n'uwa Nyabitekeri avuga ko impamvu itorero ADEPR rishyira imbaraga mu kwigisha abakuze kumenya gusoma no kwandika ari uko basanze ari ingenzi mu buzima bwa buri munsi.

Ati “Kumenya gusoma no kwandika ni ingenzi cyane, twigisha ijambo ry'Imana ariko tukigisha n'abakirisitu kwisomera ijambo ry'Imana, ikindi muri iki gihe Isi iyobowe n'ikoranabuhanga kugira ngo umuntu atere imbere biramusaba kuba azi gukorrsha ikoranabuhanga, kandi ntabwo wamenya gukoresha ikoranabuhanga utazi gusoma no kwandika”.

Umuyobozi wungirije w'Akarere ka Nyamasheke, Mukankusi Athanasie mu kiganiro na IGIHE, yavuze ko mu cyiciro cya kabiri cya gahunda ya Leta yo kwihutisha iterambere NST2 harimo kwigisha abakuze batazi gusoma no kwandika.

Ati “Dukeneye ko izi nyigisho zihabwa abantu benshi. Uwaba yarasigaye nawe turamushishikazira gukurikirana izi nyigisho kandi duharanira kwishakamo ibisubizo twirinda ibyadusubiza inyuma”.

Mu mwaka w'ingengo y'imari 2024/2025 mu Karere ka Nyamasheke abakuze bize gusoma no kwandika bagera 2278 barimo abagabo 966 n'abagore 1312.

Abakuze bize gusoma no kwandika basaba bagenzi babo kudaterwa ipfunwe no kwiga bakuze

Mu 2024/25 abakuze bo mu Karere ka Nymasheke bize gusoma no kwandika bagera kuri 2200

Ibi byatumye nibaza impamvu iyo benshi batekereje gusohoka, aha mbere habaza mu mutwe wari i Rubavu. Wari uzi ko muri Kigali hari ahantu henshi wajya hakagufasha kuruhuka?

Nubwo aheza buri gihe hahora ari mu rugo, ariko hari ahandi ushobora gusa n'uwimukiye igihe gito, ubundi ukitekerezaho wowe n'umuryango wawe niba uwufite, ubundi mukagira ibihe byiza.

Hamwe muri aho ahantu heza ho kuruhukira, hatuje, hari amahumbezi ndetse nta rusaku, ushobora gukora imirimo yawe yose, no mu Mujyi wa Kigali ushobora kuhabona byoroshye, bitagusabye kujya mu ntara.

The Cabin at Ahera

The Cabin at Ahera ni Airbnb iherereye mu Karere ka Kicukiro. Ni inzu ishobora gucumbikira abantu bane. Airbnb ni ha hantu wimukira ukahasanga ibintu byose nk'ibyo ukenera iwawe ndetse ukaba wakwitegurira amafunguro yawe.

The Cabin at Ahera ifite igikoni kigezweho, piscine, ahantu ho gukinira, ubusitani ndetse ushobora no gusura ubworozi bukorerwa mu ishyamba iyi nzu iherereyemo rya Ahera Forest Farm.

Ni ahantu ushobora kujyana n'umuryango wawe ku bawufite, cyangwa inshuti n'imiryango, ubundi mukitegurira ibintu byanyu ku murongo mugatekereza imishinga ibyara inyungu mugatera imbere kakahava.

Eagles View Lodge

Eagle View Lodge, ni hoteli iherereye ku i Rebero yubatse mu buryo bw'ubugeni bijyanye n'umuco gakondo w'Abanyarwanda.

Yitegeye hejuru ku musozi ku buryo uri yo ubasha kureba ibice bitandukanye by'Umujyi wa Kigali.

Aha haba ubwoko bw'ibyumba bigera kuri bitanu, birimo ibyumba bisanzwe byishyurwa 90$, studio apartment ya 100$ n'ibyumba byahariwe abari mu kwezi kwa buki kimwe wishyura 150$.

Hari n'ibindi byahariwe umuryango biba birimo buri kimwe cyose wakwifuza. Ubishaka yishyura 250$ ku bantu bane.

Muri Eagle View Lodge hari n'ibyumba biherereye ku gasongero k'inyubako (penthouse) aho uba witegeye ubwiza bw'Umujyi wa Kigali. Uhashaka yishyura 190$ ku muntu umwe. Ibi byumba byose uhabwa ibyo kurya bya mu gitondo.

Eagle View Golf

Eagle View Golf iri i Nyarutarama mu Karere ka Gasabo hafi y'Ikibuga cya Golf cya Kigali. Ifite ibyumba biri mu byiciro bine byose byitegeye umujyi ndetse n'ikibuga cya Golf.

Eagle View Golf ifite piscine, n'abakozi b'abahanga bateka ibyo kurya ushaka byose, hakagufasha kuruhuka ari na ko utekereza ku iterambere ryawe.

Amata n'Ubuki Boutique Hotel

Iyi ni hoteli iherereye Nyarutarama mu Karere ka Gasabo, ifite ibyumba biri mu byiciro icyenda. Ubaye uri umuntu ukunda ahantu hatuje, watekereza utuje cyangwa ushaka kuganira n'abantu bawe mutuje, wajya kuri iyi hoteli.

Ifite na restaurent ya Jiko izwiho kugira umwihariko mu guteka indyo zo mu bihugu byo mu mahanga nko mu Buhinde na Thailand n'ahandi.

Igira ibyumba byo kuruhukiramo, birimo imitako itandukanye yiganjemo iya Kinyarwanda. Ni ibyumba biba birimo aho kuryama, nk'igitanda kimwe cyakwakira abantu babiri, ahagenewe ibiro ku bashaka gukomeza gukurikirana imishinga yabo, n'ibindi wakenera. Hari ibyumba bibiri biba biri mu cyumba kimwe n'ibindi.

The retreat

Iyi ni hoteli y'inyeyeri eshanu iri mu Kiyovu mu Karere ka Nyarugenge, yamenyekanye cyane ubwo yakiraga Umwami w'u Bwogereza Charles III n'umugore we mu 2022 mu ruzinduko bagiriye mu Rwanda icyo gihe.

Iyi Hoteli ifite ibyumba 20, icya menshi cyitwa Luxury Pool Villa kukiraramo ni 2100$, mu gihe icya make ari 735$. Ni ahantu heza ho kuruhukira kuko usangayo buri kimwe cyose wakeneye.

Urabyuka ugakorerwa massage ubishaka, ukajya gufata amahumbezi yo kuri piscine nziza, ukigishwa imwe mu mirimo ya Kinyarwanda n'ibindi.

Wonderland Kanyinya Hills

Iki ni icyanya kiri i Kanyinya mu Karere ka Nyarugenge, ubaye uri umuntu uteganya ibirori by'abantu bacye, cyangwa kujya kuganira n'inshuti zawe, wajya kuri iyi Wonderland.

Iki cyanya gifite umwihariko wo kugira ahantu bacumbika (Camping), gukinira, ndetse n'igikoni gifite indyo zitandakanye, ubundi ukaryoherwa n'ibiruhuko.

Eze home kigali

Iyi ni Airb&b iri i Kagugu, mu Karere Gasabo ifite ibyumba bine, ubwongero bubiri, igikoni, piscine, n'uruganiriro.

Ni ahantu wajya wenyine cyangwa n'inshuti yawe mugamije kuruhuka, kuganira no kugirana ibihe byiza nk'inshuti, mukitegurira ibintu byanyu hanyuma si ugutekereza imishinga ibateza imbere kakahava.

Kanyonga yabigarutseho ubwo yaganiraga n'Abanyarwanda n'inshuti z'u Rwanda bitabiriye ihuriro Rwanda Convention ryabereye muri Leta Zunze Ubumwe za Amerika mu Mujyi wa Texas.

Yabwiye abari bitabiriye ko RSSB icunga gahunda y'ubwisungane mu kwivuza, aho abarenga miliyoni 11 bayikoresha kugira ngo babone ubuvuzi mu buryo bworoshye ku buryo ubu yishingira n'indwara zikomeye zirimo Cancer.

Ati 'Ubwo bwishingizi ndi kuvuga umuntu yishyura ari munsi y'amadolari atatu ku mwaka. Ibyo byerekana icyo umuntu yakora akoresheje ubushobozi buke, iyo ni inkuru y'u Rwanda.'

Kanyonga yavuze ko RSSB aricyo kigo kigari mu Rwanda gikora ishoramari, aho imishinga itandukanye cyashoyemo imari ifite agaciro kagera kuri miliyari 2,5 z'amadolari ya Amerika.

Ati 'Ku banyarwanda, ayo ni amafaranga yanyu, ni amafaranga ava mu misanzu yanyu. RSSB ni iya buri munyarwanda. Dushora imari mu mishinga hafi ya yose y'ingenzi igamije iterambere ry'igihugu, tujyana n'icyerekezo cy'igihugu.'

Yavuze ko RSSB yashoye mu rwego rw'imari, aho inafite imigabane mu bigo bitandukanye by'imari, mu ikoranabuhanga no mu guhanga udushya aho yatanze urugero ku ishoramari ryakozwe muri Zipline, ryatumye RSSB iba mu ba mbere bakozemo ishoramari rifatika.

Ati 'Twashoye mu nganda binyuze mu Inyange […] mu bukerarugendo. Aho RDB ivuze ngo dushore, tujyayo.'

Heza Estate izaba igizwe n’inyubako 548

Amahirwe ku batuye muri diaspora

Kanyonga yasabye abatuye muri diaspora gushora imari muri Ejo Heza, Ikigega cy'Ubwiteganyirize kigamije gufasha Abanyarwanda kubona uburyo bwo kwizigama by'igihe kirekire.

Ati 'Uwo ariwe wese wo muri diaspora, niba ushaka kongera ubwiteganyirize bwawe, niba ushaka gufasha mu hazaza h'umuryango wawe mu by'amikoro, mbashishikarije kumenya byisumbuye Ejo Heza. Itanga amahirwe ku nyungu igera kuri 11% mu mafaranga y'u Rwanda ibarwa buri mwaka.'

Ahandi yavuze ko hakwiriye gushorwamo imari ni mu bwubatsi, aho yatanze urugero ku mushinga w'inyubako wa Vision City II uzaba ari mugari inshuro eshatu ugereranyije na Vision City I.

Ati 'Turi kuva ku nzu 500 dufite muri Vision City I zikagera hafi ku 1500. Icyiciro cya kabiri kizatangira muri Nzeri.'

Yavuze ko muri uyu mushinga hazaba harimo inyubako z'ubwoko butandukanye kuva kuri Villa, Apartment kugera no ku zindi bitewe n'ibyo umuntu yifuza.

Usibye Vision City II, Kanyonga yavuze ko hari n'undi mushinga wa Heza Estate uzaba ugizwe n'inzu 548 zigenewe abafite amikoro aringaniye. Ati 'Ibiciro bihera ku madolari 70$.'

Undi mushinga wa gatatu ni uw'Ikigega cyo gufasha ibigo bito n'ibiciriritse kizatangira gifite miliyoni 30 z'amadolari aho kizazamuka kikagera kuri miliyoni 100$.

Yavuze ko iki kigega kizafasha imishinga ivuka mu gihugu ku buryo imito iciriritse izajya ifashwa kubona igishoro cy'igihe kirekire.

Ati 'Twizeye ko tuzabona ibisabwa byose muri Kanama hanyuma tugatangira gutanga igishoro.'

Louise Kanyonga yashishikarije abanyarwanda baba mu mahanga gushora imari mu mishinga itandukanye iteza imbere igihugu iri muri RSSB

Yabigarutseho ku wa 5 Nyakanga 2025, mu kiganiro yahaye Abanyarwanda baba muri Amerika n'inshuti zabo, bateraniye muri Rwanda Convention 2025.

Namara yagaragaje ko iterambere ry'igihugu ritashoboka hatabayeho abikorera, ndetse urwego rw'imari rukabigiramo uruhare rukomeye mu kongera ibishoro.

Ati 'Mu Rwanda honyine ducunga miliyari 1400 Frw hakwiyongeraho n'ay'abandi dukora mu rwego rumwe, ikibazo si amafaranga, amafaranga arahari ahubwo reka dushake uko tuyakoresha.'

Namara yavuze ko mu mabanki y'ubucuruzi badatanga inkunga ahubwo hatangwa umwenda ariko hari n'ubundi buryo bwinshi bwo kubona igishoro.

Ati 'Amafaranga mubitse kuri konti zanyu hano adakoreshwa yitwa 'ubwizigame' ntabwo azabagira abakire. Nimutangire ubushabitsi. Nimuze mu rugo mutangire ubucuruzi tubashyigikire, tubahe ubufasha bukenewe byaba muri serivisi cyangwa ishoramari mu buryo bwose bushoboka kandi nzi ko banki zose ziri aha dutanga amafaranga kugeza no ku myaka 20.'

Namara yahamije ko ibijyanye n'inyungu ku nguzanyo bishobora kuganirwaho ikagabanyuka kuko ijyana n'imiterere y'ibikorwa uwaka inguzanyo agiye gukora n'ibyago byateza mu kwishyura.

Ati 'Inyungu ku nguzanyo ziri kugenda zigabanyuka, inyungu ku nguzanyo ijyanishwa n'uko winjiza muri ubwo bushabitsi…ufite ubwoba natere intambwe.'

Equity Bank ifite ubushobozi bwo kuguriza abantu cyangwa ibigo binini, agera kuri miliyoni 32$ [arenga miliyari 45,9 Frw].

Imibare y'igihembwa cya mbere cya 2025, igaragaza ko cyarangiye inguzanyo za Equity Bank zizamutseho hafi 36%. Ni mu gihe urwunguko rw'igihembwe cya mbere rwiyongeyeho 10%, aho rwavuye kuri miliyari 18 Frw rukagera kuri miliyari 21 Frw mu gihembwe cya mbere.

Mu myaka 13 ishize, Equity Bank ni bwo yatangiye ndetse kuri ubu yishyura abanyamigabane bayo urwunguko rwa miliyoni 20$ buri mwaka.

Namara yabijeje ko abazagana Equity Bank Rwanda Plc bazafashwa kunoza imishinga y'ishoramari mu ngeri zitandukanye hagamijwe kuzamura iterambere ry'igihugu.

Hannington Namara yahamije ko ibyerekeye inyungu ku nguzanyo bishobora kuganirwaho ikagabanyuka

Umuyobozi Mukuru wa Equity Bank Rwanda Plc, Hannington Namara, yemeye gufasha Abanyarwanda baba muri Amerika ku byerekeye kunoza ishoramari

Amakuru IGIHE yamenye ni uko abakekwaho ubujura babarirwa muri 20 biganjemo abaturutse mu Mujyi wa Kigali bafashwe mu ijoro rya tariki 4-5 Nyakanga 2025, bafatiwe mu bitaramo byarimo bibera mu mirenge ya Gisenyi na Nyamyumba.

Umuvugizi wa Polisi y'u Rwanda, ACP Rutikanga Boniface, yemereye IGIHE ko bafashe abakekwaho ubujura mu bitaramo biri kubera mu Karere ka Rubavu.

Ati 'Twifashishije amakuru twahawe habayeho gufata abakekwaho ubujura mu bitaramo byaberaga i Rubavu, mu mirenge ya Gisenyi na Nyamyumba. Bakekwaho kwiba telefoni, amasakoshi y'abagore n'ibindi by'agaciro kandi iperereza rirakomeje.'

ACP. Rutikanga yibukije abaturage ko igihe cyo kwishima mu bitaramo atari icyo kujya gucucura abandi utwabo.

Ati 'Mu gihe abantu bishima biba bigayitse kuba hari uwifuza kubababaza. Uwumva azabeshwaho n'utw'abandi iherezo rye ntabwo ari ryiza, kuko aba yangiriza ubuzima bwe, kandi aba yangiriza izina rye kuko bimuviramo gufungwa. Polisi iri maso, n'aba kubafata nta wari uzi ko tubikora.'

Yavuze ko bene abo bishora mu bujura bagifite amahirwe yo guhinduka, bagakura amaboko mu mifuka, bagakora imbaraga bakoresha biba bakazikoresha biteza imbere.

Aba bakekwaho ubujura bafashwe kuri ubu bafungiwe kuri Sitasiyo ya Polisi ya Gisenyi.

IGIHE yamenye ko abakekwaho ubujura bafatiwe mu gitaramo cya Toxic Experience cyaraye kibereye mu Murenge wa Nyamyumba.

Harimo n'abari baguze amatike yo kubinjiza mu myanya y'icyubahiro yishyurwaga arenga ibihumbi 30 Frw ngo babashe gucucura abo begeranye.

Abandi bafatiwe mu iserukiramuco rigikomeje kubera i Rubavu rizwi nka 'Yvy Summer Fest'.

Twifuje kumenya uko no muri Kivu Beach Expo & Festival iri kuba ku nshuro yayo ya kabiri, bimeze, Umuyobozi wa Yirunga Ltd yateguye iki gikorwa abwira IGIHE ko bo bakajije umutekano ku buryo mu minsi ibiri ishize batangiye nta gikorwa cy'ubujura kirahagaragara.

Mu gihe abandi bari kwinezeza hari abari barahiriye kubacuza utwabo Polisi y’u Rwanda irahagoboka

Abakekwaho ubujura babarirwa muri 20 bafatiwe i Rubavu baje kwiba abitabiriye ibitaramo bitandukanye biri kuhabera

Ni igikorwa cyabereye i Londres ku wa 04 Nyakanga 2025.

Abitabiriye bari baturutse mu mijyi itandukanye irimo uwa Manchester, Coventry, Newcastle, Liverpool, Nottingham, Bristol, n'indi itandukanye, ibigaragaza uburyo Abanyarwanda baba muri ibyo bihugu bazirikana igihugu cy'inkomoko.

Iki gikorwa cyari gifite insanganyamatsiko igaruka ku kuzirikana ahahise hanategurwa ejo hazaza heza h'u Rwanda.

Abitabiriye baririmbiwe na Ruti Joel na mugenzi we Clement-the-Guitarist bari baturutse mu Rwanda bagiye kwifatanya n'Abanyarwanda baba mu Bwongereza kwizihiza umunsi mukuru wo kwibohora.

Ambasaderi w'u Rwanda mu Bwongereza,Johnston Busingye, yashimiye Abanyarwanda baba mu Bwongereza ku muhati wabo badahwema kugaragaza mu gushyigikira iterambere ry'u Rwanda.

Yavuze ko mu gihe mu gihe Abanyarwanda bizihiza umunsi wo kwibohora ari ngombwa gukomeza kuzirikana umurava w'abagabo n'abagore, abasore n'inkumi bitanze kugira ngo u Rwanda rubohorwe, buri wese abe afite aho yita mu rugo.

Ati 'Bigaragaza uburyo mwubahiriza inshingano mu guteza imbere igihugu cyacu, mubifashijwemo no kunga ubumwe. Byaba mu bikorwa bitandukanye nko kwibuka ku nshuro ya 31 Jenoside yakorewe Abatutsi, n'ibindi bikorwa, muba muhari kandi uruhare rwanyu ni ingirakamaro.'

Yashimiye abafatanyabikorwa barimo Banki ya Kigali, Urwego rw'Igihugu rw'Ubwiteganyirize, RwandAir n'abandi ku ruhare bagize kugira ngo iki gikorwa cyo kwizihiza umunsi wo kwibohora gikunde.

Yavuze ko abo bafatanyabikorwa bagize uruhare runini mu guhuza ababa muri Diaspora no kuganira na bo ari na ko babereka amahirwe yo gusura no gushora imari mu Rwanda.

Amb Busingye yongeye gushimangira ko kwizihiza imyaka 31 u Rwanda rumaze rwibohoye, bigaragaza uburyo Abanyarwanda baba mu Bwongereza bunze ubumwe n'uburyo biyemeje kugira uruhare mu iterambere ry'igihugu cyabo, bazirikana ahahise, bishimira ibigezwego ari na ko bategura ejo hazaza heza.

Abitabiriye iki gikorwa kandi banyuzwe n'imbyino gakondo zabyinwe na Inyange Troupe rigizwe n'Abanyarwanda baba mu Bwongereza.

Ambasaderi w'u Rwanda mu Bwongereza, Johnston Busingye, aganiriza abitabiriye ibirori byo kwibohora

Abanyarwanda baba mu Bwongereza bizihije umunsi wo kwibohora

Shampiyona y'Isi y'Amagare ni irushanwa ngarukamwaka ryitabirwa n'amakipe y'ibihugu mu mukino wo gusiganwa ku magare, ritegurwa n'Ishyirahamwe Mpuzamahanga ry'uyu mukino ari ryo Union Cycliste Internationale (UCI).

Ku nshuro ya mbere rigiye kubera ku Mugabane wa Afurika, u Rwanda ni ryo ruzayakira aho rwemejwe muri Nzeri 2021 ruhigitse Maroc.

Mu myiteguro y'iri rushanwa, u Rwanda rukomeje kubaka ibikorwaremezo bitandukanye bizifashishwa muri iryo rushanwa birimo n'imihanda.

Umuvugizi w'Umujyi wa Kigali, Emma Claudine Ntirenganya, yabwiye IGIHE ko bari kwitegura gukora imihanda hakurikizwa amategeko agenga iri rushanwa arimo no kuba itarimo dodani.

Ati 'Amwe mu mabwiriza batanga ni uko mu mihanda hagomba kuba nta dodani zirimo. Muri urwo rwego inzira yateguwe bazanyuramo aho ziri zigomba kuba zivuyemo.'

Ku bijyanye no kuza zizasubiramo, Emma Claudine yagize ati 'Haracyari amezi imbere, hashobora kugira icyaba cyahinduka ariko igihari ni uko aho zakuwemo zigomba gusubiramo rirangiye.'

Biteganyijwe ko Shampiyona y'Isi y'Amagare izitabirwa n'abantu benshi baturutse mu bihugu bitandukanye, aho byitezwe ko hari n'abazitabira mu gice cy'ubukerarugendo.

Shampiyona y'Isi y'Amagare yabaye bwa mbere mu 1921 i Copenhagen muri Danemark mu gihe iheruka kuba mu 2024 yabereye i Zürich mu Busuwisi.

Indi nkuru wasoma: UCI yasohoye Ingengabihe ya Shampiyona y'Isi y'Amagare izabera i Kigali

Imwe mu mihanda ya Kigali izifashishwa muri Shampiyona y’Isi y’Amagare yatangiye gukurwamo dodani