Blog

Killaman yavuze uko yabanye n'umugore we nta kintu na kimwe afite, Imana ikabaha umugisha ibintu bikaboneka

Niyonshuti Yannick uzwi cyane ku izina rya Killaman, yatangaje ko urukundo rwe n'umugore we rwabanje guca mu bihe bikomeye by'ubukene bukabije, ariko nyuma Imana ikabaha umugisha maze ibintu byose bikaza.

Mu kiganiro yasohoreye kuri InyaRwanda TV, Killaman yagaragaje ko nta kintu na kimwe yari afite ubwo yatangira kubana n'umugore we, ariko uwo mugore atigeze amutererana, ahubwo yamuhaye urukundo rwa nyarwo no kumuba hafi.

'Nabanye n'umugore wanjye nta n'ishilingi mfite. Twabayeho mu buzima bugoye, ariko Imana yaje kuduha umugisha. Ibyo mfite uyu munsi byose twarabibanye, nta na kimwe nari mfite njyenyine,' niko Killaman yabivuze.

Uyu muraperi yakomeje avuga ko gushyira hamwe nk'umugabo n'umugore ari kimwe mu by'ingenzi bituma abantu batera imbere. Yashimangiye ko umugore we yamubereye inshuti, umufasha ndetse n'umujyanama, ibintu byamuhaye imbaraga zo gukomeza gukora cyane mu muziki ndetse n'ubuzima busanzwe.

'Umuntu uguherekeje mu bukene ni we ukwiriye kuguherekeza no mu bukire,' Killaman yongeraho.

Ni inkuru yateye benshi agahinda ariko inatanga isomo rikomeye ku rubyiruko rwinshi rushobora kwibeshya ko urukundo rw'ukuri rushingira ku bintu bifatika cyangwa ku mutungo.

Killaman yashimiye cyane umugore we, amwita 'umugisha we wa mbere,' avuga ko ari umwe mu bantu yamye asenga kugira ngo Imana imugumishe hafi, kuko ari we wamubereye igisubizo mu bihe bikomeye.

Abakunzi be ndetse n'abarebye ikiganiro ku rubuga rwa InyaRwanda TV bashimye uko uyu muhanzi ashimira umugore we mu ruhame, bemeza ko ari urugero rwiza rw'urukundo rw'ukuri rwubatse ku kwemera no kwihangana.

Wari uzi ko Killaman atigeze agira n'inzu cyangwa amafaranga ubwo yatangiraga kubana n'umugore we? Ariko noneho barubatse urugo rukomeye!

Source : https://kasukumedia.com/killaman-nabanye-numugore-wanjye-nta-na-kimwe-mfite-imana-iraduhindurira-ubuzima/

Frank Gashumba, umunyapolitiki akaba n'umunyamakuru wamenyekanye cyane muri Uganda, yongeye kuvuga amagambo akomeye yavugishije benshi, aho yasabye abagabo bose kujya bapimisha ADN (DNA) y'abana babo bagihumeka umwuka wa mbere, kugira ngo bamenye uko bahagaze mu kuri.

Mu butumwa yashyize ahagaragara, Gashumba yavuze ko kurerera umwana utari uwawe ari kimwe mu bintu bibabaza umugabo kurusha ibindi byose. Yagize ati:
'Umugore wawe akimara kubyara, mu kwezi kumwe gusa ukore ikizamini cya DNA. Ushobora kwibeshya ukamara imyaka urera umwana utari uwawe. Ibyo ni ugukubitirwa mu rujijo.'

Urugero rwa Ssegirinya rwakomeje kuzamura amarangamutima

Ibi Gashumba yabivuze mu gihe inkuru ikomeye iri gucicikana muri Uganda yerekeye uwahoze ari Depite wa Kawempe North, Muhammad Ssegirinya, aho raporo ivuga ko abana 4 muri 9 bamwitirwaga atari abe mu buryo bw'amaraso.

Uyu mwuka mubi wateje impaka ndende mu bitangazamakuru n'imbuga nkoranyambaga, abantu benshi batangaza ko ibi bintu bisigaye biba kenshi ariko bikagirwa ibanga. Abagabo benshi bari kumva ko bashobora kuba barereraga abana batabakomokaho, ibintu bikomeza kubashengura umutima.

Gashumba ati: 'Abagabo mujye mwimenya hakiri kare'

Frank Gashumba yakomeje asaba abagabo kutagendera ku rukundo gusa cyangwa ku kwemera kwa gakondo, ahubwo bagashyira imbere ukuri gushingiye ku buhanga. Yagize ati:
'Uburyo bw'ikoranabuhanga burahari, ikizamini cya DNA kiroroshye. Ni uguha agaciro ejo hazaza hawe n'ubuzima bwawe. Kandi ntacyo bigutwaraho uramutse ushatse ukuri kare.'

Yanasabye ko hagira amategeko ashyirwaho asaba ko DNA yakorwa ku mwana wese ku bushake bw'umubyeyi w'umugabo, nk'uburenganzira bwo kumenya aho ahagaze nk'umubyeyi.

Reba uko abanyarwanda n'abanyafurika bose babifata

Nubwo ubutumwa bwa Gashumba bwakiriwe neza n'abagabo benshi, hari abandi bavuga ko iyi myumvire ishobora kwangiza umuryango. Bamwe bagize bati:
'Gupimisha DNA buri gihe si igisubizo, ahubwo bigaragaza kutizerana hagati y'abashakanye.'

Abandi bati:
'Ni byo koko, hari abagore batabwira abagabo ukuri ku bana, kandi ibyo bikwiye gucika burundu.'

DNA n'imibanire y'abashakanye

Mu muryango nyafurika, gukeka ko umwana utari uwawe ni ikintu gikomeye gishobora gusenya urugo cyangwa gutera ipfunwe rikomeye. Ariko Gashumba avuga ko ari byiza kugira ukuri kare, aho kubana mu rujijo imyaka myinshi.

Yagize ati:
'Niba ari wowe wamubyaye uzaryoherwa. Niba atari uwawe, uzashaka uko witwara hakiri kare utaragwa mu gihombo gikabije.'

Ubutumwa bwa Frank Gashumba bwongeye gufungura impaka ku burenganzira bw'abagabo mu by'imiryango, ubunyangamugayo mu rukundo, no gushakira hamwe ibisubizo byakubaka umuryango w'umugabo n'umugore ushingiye ku kuri.

Ibi biganiro bikomeje gufata indi ntera muri Uganda ndetse no mu karere, mu gihe ikoranabuhanga ritanga ubushobozi bwo kumenya ukuri nta nkomyi. Gusa bikaba bigisaba kuganira nk'abashakanye, kugira ngo hakorwe ibifasha kubaka umuryango utanyeganyezwa n'amakenga.

Source : https://kasukumedia.com/frank-gashumba-atangaje-igikomeye-abagabo-benshi-barimo-kurera-abana-batababyaye/

'Uburyo atuje, uko yitwara, ni ibintu byatumye mwiyumamo' — Tracy Melon

Umuhanzikazi ukomoka muri Uganda, Tracy Mirembe wamamaye mu muziki nka Tracy Melon, yahishuye amarangamutima ye ku munyarwanda ukomeye mu bijyanye no gutunganya umuziki, Element EleéeH.

Mu kiganiro cyihariye yagiranye na radiyo ikomeye yo muri Uganda, Galaxy FM, Tracy Melon yagaragaje ko urukundo akunda Element ruturuka ku miterere n'imyitwarire ye isobanutse. Yavuze ko ubwo yahuraga na we bwa mbere yahise amubona nk'umuntu utuje cyane, utajya avuga amagambo menshi, ahubwo akora ibintu bye mu mutuzo n'ubunyamwuga.

Yagize ati:
'Element ni umuntu utandukanye n'abandi. Iyo uri kumwe na we, wumva afite ikinyabupfura, agira umutuzo udasanzwe. Sinigeze mbona undi muntu nk'uwe. Ni ibintu byatumye mwiyumamo byihuse.'

Uyu muhanzikazi yakomeje avuga ko nubwo abantu benshi bareba ku buryo umuntu agaragara cyangwa umubare w'ibyamamare aba yarakozeho, we yahisemo kumwiyumvamo nk'umuntu ufite indangagaciro n'umurongo uhamye mu buzima.

Nubwo atigeze asobanura niba hari urukundo rusanzwe hagati yabo, yavuze ko iyo umuhanzi nka Element agaragaza ubunyamwuga n'ubupfura mu byo akora, atabura kugira abantu bamwiyumvamo.

Tracy Melon ari mu bahanzi bari kuzamuka mu muziki wa Uganda, azwi mu ndirimbo z'urukundo no mu miririmbire yuje amarangamutima. Ubu akomeje kwagura umuziki we, by'umwihariko akorana n'abatunganya umuziki bo mu karere u Rwanda rurimo.

Ibyatangajwe na Tracy bikomeje gukurura amarangamutima ku mbuga nkoranyambaga, aho abafana be bamwe bashyigikiye urwo rukundo, abandi bagasaba ko bajya babigira ibanga. Naho ku ruhande rwa Element EleéeH, nta kintu na kimwe aratangaza kuri aya makuru kugeza ubu.

Source : https://kasukumedia.com/umuhanzikazi-tracy-melon-avuga-ko-yaguye-mu-rukundo-na-element-kubera-imyitwarire-ye/

Angus Barbieri: Umugabo wamaze iminsi 382 adakoza ibiryo mu kanwa, ariko akaguma amahoro

Mu mateka y'isi, hari ibintu biba bigasiga benshi mu gihirahiro, ndetse bamwe bakabifata nk'ibitangaza. Ibyo ni nako byagenze ku mugabo witwa Angus Barbieri, ukomoka mu gihugu cya Scotland, wamamaye kubera igikorwa cyihariye yakoze mu rwego rwo kugabanya ibiro: yamaze iminsi 382 adarya na gato. Yari atunzwe n'amazi, icyayi n'ibinyobwa birimo vitamini, ariko ntiyariye ibiryo bisanzwe.

Angus Barbieri yatangiye uru rugendo ku wa 14 Kamena 1965, arusoza ku wa 11 Nyakanga 1966, amaze igihe cy'umwaka n'iminsi 17 adashyira ikintu na kimwe mu kanwa gifite isano n'ibiryo. Ibi byose yabikoze agambiriye gutakaza ibiro kuko yari asanganywe umubyibuho ukabije. Icyakora, igitangaje ni uko mu gihe cyose cy'uru rugendo, nta kibazo cy'ubuzima na kimwe yagize, bitewe n'uko yari akurikiranwa n'abaganga umunsi ku wundi.

Ubwo yatangiraga iyi gahunda idasanzwe, Angus yari afite ibiro 207kg. Amaze gusoza gahunda yo kudafata ibiryo, yari asigaye afite ibiro 82kg. Ibi bivuze ko yatanzeho ibiro 125kg, bigatuma aba umwe mu bantu batakaje ibiro byinshi mu buryo butangaje kandi butanduye.

Nyuma yo kurangiza iyi gahunda, Angus yasubiye ku mirire isanzwe, ariko ngo ntiyongeye kongera ibiro nk'uko bamwe babitekereza. Yabayeho ubuzima busanzwe kugeza mu 1990 ubwo yitabaga Imana, ariko icyo yazize nticyigeze gitangazwa.

Yanditse amateka adasanzwe

Mu 1973, ibikorwa bya Angus Barbieri byanditswe mu gitabo cy'ubuvuzi kizwi nka 'Medical Literature', aho byemejwe ko ari we muntu wamaze igihe kirekire kurusha abandi ku isi adafata ibiryo. Kuva icyo gihe kugeza magingo aya, nta wundi muntu urabasha kurenza aka gahigo.

Uyu mugabo yahinduye amateka y'ubuzima bw'abantu bafite umubyibuho ukabije, ariko kandi ibyamubayeho bibaye isomo rikomeye ku bantu bose: uko ubuzima bw'umuntu bushobora guhinduka mu gihe buhagarikiwe neza n'inzobere mu buvuzi.

Ese wowe watekereza kumara umwaka utarya? Angus yarabikoze kandi agira ubuzima bwiza nyuma yabwo. Uyu ni umwe mu nkuru zidasanzwe z'ukuri, zigatuma umuntu yongera kwibaza ku bushobozi bwa muntu no ku mbibi zishobora gusenyuka mu gihe hari ubushake n'ubugenzuzi buhagije.

Source : https://kasukumedia.com/angus-barbieri-umugabo-wamaze-iminsi-382-adakoza-ibiryo-mu-kanwa-ariko-akaguma-amahoro/

Imbwa yitwa Baby Boy Broadus imaze gukundwa n'ibihumbi by'abakunzi kuri Instagram

Umuraperi w'ikirangirire ku isi, Snoop Dogg, yongeye kwerekana urukundo rudasanzwe afitiye imbwa, nyuma yo gufungurira imbwa ye nshya konti ya Instagram yihariye.

Ibi bibaye hashize ibyumweru bibiri gusa Snoop Dogg apfushije imbwa ye yari yise Juelz, imbwa yari yarahawe na mugenzi we mu muziki Wiz Khalifa mu mwaka wa 2014. Juelz yari icuti magara ya Snoop, ndetse yayigaragazaga kenshi ku mbuga nkoranyambaga ze.

Imbwa nshya, Snoop Dogg yayise Baby Boy Broadus, izina ryayo rikaba rihuje na nyirayo witwa Calvin Broadus Jr. Nyuma y'uko Snoop ayishyize ku mbuga nkoranyambaga, yahise itangira gukundwa n'abantu batari bake ku isi hose. Konti yayo ya Instagram imaze kugira abayikurikira barenga ibihumbi 66, kandi buri foto cyangwa videwo ishyirwaho ihita igira ibitekerezo n'ibikunze byinshi.

Abakunzi ba Snoop Dogg ndetse n'abakunda inyamaswa, bakomeje gutanga ibitekerezo bishimangira ko bishimiye uburyo uyu muhanzi akomeza kubungabunga no gukundisha abantu inyamaswa, by'umwihariko imbwa.

Snoop Dogg, uzwi cyane mu muziki no mu bikorwa bitandukanye by'ubucuruzi, asanzwe ari n'umwe mu bantu bazwiho kugira imbwa nyinshi aho atuye. Baby Boy Broadus, ibaye nk'ikiziba icyuho cyasizwe na Juelz, kandi bigaragara ko izahabwa urukundo n'ubwitange bukomeye.

Nubwo ari imbwa, Baby Boy Broadus imaze gukurura abantu benshi ku mbuga nkoranyambaga, ku buryo bishoboka ko ishobora no kuzamura izina rya Snoop Dogg kurushaho mu bijyanye no kwamamaza, cyane ko benshi bahamya ko iyi konti ishobora kuba izafasha no mu bucuruzi bw'ibikoresho by'imbwa.

Wari ubizi? Snoop Dogg si ubwa mbere akoze ibikorwa bijyanye n'imbwa. Mu myaka yashize, yagiye agaragara mu biganiro bitandukanye agaragaza urukundo rwe ku nyamaswa, ndetse akanatanga ubutumwa bwo kuzitaho.

Instagram ya @babyboybroaddus ubu ni imwe mu zikurikirwa cyane mu z'inyamaswa z'abamamare, kandi abakunzi ba Snoop barasabwa gukomeza kuyikurikira kugira ngo batagirwa inyuma mu buryo bushya uyu muraperi ari gukoresha mu kugaragaza Baby Boy Broadus nk'igice cy'umuryango we.

Source : https://kasukumedia.com/snoop-doggy-yafunguriye-imbwa-ye-nshya-konti-ya-instagram/

Mu joro rya Tariki ya 01 Nyakanga 2025 mu kigo cy'ishuri ryisumbuye rya Karama kirindwa n'Inkeragutabara hibwe Mudasobwa(Computer Positivo) 67 n'imigozi yazo. Bamwe mu bakekwa kugira uruhare muri ubu bujura barimo abazamu batatu na Kontabure w'ikigo nibo ku ikubitiro bahise batabwa muri yombi nkuko Gitifu Yvette Aline Nirere uyobora umurenge wa Karama yabibwiye umunyamakuru wa intyoza.com

Aganira na intyoza.com, Gitifu Yvette Aline Nirere yabwiye umunyamakuru ko mu bigaragara bitagombeye n'ubusesenguzi bwimbitse, kwiba izi Mudasobwa urebye aho zari zibitse ngo ni ibintu bigaragara ko byari byarateguwe.

Yagize ati' Ntabwo mu kuziba batoboye, ubona ko nyine harimo ikintu twakwita nko gutegura. Ntabwo bahatoboye, ahubwo ahantu ku rugi hagombaga gufungwa niho ubona hameze nk'aho bacishije ikintu cy'icyuma bagasa nk'abegura kuri serire(nko kujijisha)'.

Gitifu Yvette, ahamya ko mu by'ukuri uko bigaragara, ibyakozwe bitashoboka uretse mu gihe uwabikoze yaba afite umuntu w'icyitso wamuhaye amakuru kuko aho izi Mudasobwa zari zibitse ngo winjiraga mu cyumba ariko nabwo ngo ntuhite uzibona kuko zari zarakorewe ububiko bumeze nk'umutamenwa, aho zabikwaga mu mutekano kandi aho zibitse hafungishwa ingufuri ebyiri nazo abinjiyemo imbere bishe kugira ngo bagere kuri Mudasobwa.

Avuga kandi ko umwe mu bazamu( Inkeragutabara) ukekwa cyane ngo iryo joro yari ahari ndetse ngo n'aho mashine zibikwa ntabwo yari kure yazo kuko ari umuryango ku muryango. Ati' Urumva rero nti babikora atabireba cyangwa atabyumva. Yasaga n'aho abarebera, ariwe cyitso cyabo'.

Amakuru agera ku intyoza.com ni ay'uko mu bamaze gufatwa, uretse Abazamu ndetse na Kontabure, hari n'umwarimu nawe wamaze gufatwa. Bivugwa ko uyu ashobora kuba yarabonywe n'umwana w'umunyeshuri atwaye ibikapu birimo za Mudasobwa, aho haje abamotari babiri bazitwara. Bivugwa kandi ko uwo muzamu ukekwa, iryo joro ryo kwibwa ngo hari umuntu w'umugabo yazanye avuga ko ari Afande we, ndetse abandi bazamu akuriye abakura hafi y'aho Mudasobwa zibikwa. Hari kandi kuba iryo joro ngo yaragiye akomanga ku nzugi ku buryo hari n'irondo ryahanyuze ribajije ibisakuza ababwira ko nta kibazo gihari, baragenda ariko mu gitondo hatakwa ubujura bwa Mudasobwa 67 n'imigozi yazo.

Munyaneza Theogene

Source : https://www.intyoza.com/2025/07/07/kamonyi-karama-icyo-gitifu-wumurenge-avuga-ku-iyibwa-rya-mudasobwa-67-mu-kigo-cyishuri/

Ibitaro bya Ngarama byubatse mu Murenge wa Ngarama mu Karere ka Gatsibo. Bifite ibitanda 132 bishobora kwakira abarwayi barwariramo.

Ni ibitaro byo ku rwego rw'Akarere, bikorera mu gace karimo ibigo nderabuzima umunani harimo n'icyo mu Nkambi ya Nyabiheke icumbikiye impunzi z'Abanye-Congo barenga ibihumbi 15.

Byashinzwe mu 1987, biha serivisi abaturage barenga 187518. Amakuru agaragara ku rubuga rw'ibi bitaro yerekana abarwayi baba bari mu bitaro ari 72% by'ubushobozi bw'ibitanda bihari, abenshi bakamaramo iminsi itanu.

Umunyamabanga Uhoraho wa MINEMA, Philippe Habinshuti, ubwo yatangaga ibisobanuro kuri Komisiyo ishinzwe Gukurikirana imikoreshereze y'Imari n'Umutungo bya Leta, PAC, ku wa 7 Nyakanga 2025, yavuze ko ibi bitaro byavuguruwe mu murongo wo gufasha impunzi n'abatuye agace kubona ubuvuzi bwiza.

Ati 'Ni ibitaro bimaze igihe kinini, bifite inyubako zishaje ku buryo byari bigeze mu gihe cyo gusanwa ariko noneho twebwe hariya dusanzwe tuhafite inkambi ya Nyabiheke irimo impunzi zirenga ibihumbi 15. Bivuze ko ibitaro biba byarongerewe abantu baza kubisabamo serivisi.'

'Kuba harakozwe uyu mushinga duhuriyeho na Minisiteri y'Ubuzima kugira ngo byagurwe binavugururwe, ni ikintu cyiza kugira ngo izo serivisi zitangwe, zitangirwe ahantu heza ariko tunungukiremo kubisana.'

Mu kuvugurura ibi bitaro habanje ibitaro by'ababyeyi (Maternity) byatwaye miliyari 4 Frw.

Imirimo yo kubaka ibitaro by'ababyeyi yararangiye, ndetse ibikorwa byose muri rusange bigeze kuri 98%. Ibikoresho bijyanye no kubaga ababyeyi byatumijwe, bikatangira gukoreshwa mu bitaro by'ababyeyi mu mpera z'Ukwakira 2025.

Ati 'Haherewe ku bitaro by'ababyeyi (maternity) ariko hateganyijwe n'icyiciro cyo kuvugurura izindi serivisi kugira ngo ibitaro byose bibe bimeze neza. Ni ikintu rero tubona kizatanga umusaruro, kizafasha impunzi twebwe dushinzwe kugira ngo zibone serivisi z'ubuvuzi zimeze neza ariko bigafasha n'abaturage bazakiriye babana na zo hariya.'

Habinshuti yasobanuye ko bimwe mu bikoresho byifashishwa mu nzu y'ababyeyi bihari, ndetse bishobora gukoreshwa muri iyo nzu nshya, ibikoreshwa mu bikorwa byo kubaga ababyeyi bijyanye n'ibitaro bishya akaba ari byo bigitegerejwe.

Ibitanda biri mu Bitaro bya Ngarama bigenewe ababyeyi ni 36, ariko ibishya birimo ibitanda 140.

Icyiciro cya kabiri cyo kuvugurura Ibitaro bya Ngarama kizatwara miliyari 10 Frw, umushinga wose ukazarangiza kubakwa mu Ukwakira 2026.

Ati 'Hazaba harimo serivisi zindi zikorera ku bitaro, harimo ubuvuzi rusange, inyubako y'ubuyobozi, serivisi zindi zakoreraga mu bitaro zitari inzu y'ababyeyi inyubako yindi izashobora kuzifasha.'

Magingo aya ingengo y'imari yose ijyanye no kubaka ibi bitaro inyuzwa muri Minema, ariko ibijyanye n'ibikorwa by'ubuvuzi bikazakorwa na Minisiteri y'Ubuzima.

Ati 'Uburyo umushinga wateguwe, ni mu rwego rwo gushyiraho ibikorwaremezo bifasha impunzi n'abaturage bazakiriye ariko mu kubishyira mu bikorwa bikajya muri Minisiteri ibishinzwe.'

Kugeza ubu mu nkambi zose zo mu Rwanda haba ibigo nderabuzima bitanga ubuvuzi bugezweho abatahaboneye serivisi bakajya mu bitaro bibegereye kandi bagakoresha mituweli nk'abenegihugu.

Umunyamabanga Uhoraho wa MINEMA, Philippe Habinshuti yavuze ko ibitaro bya Ngarama bizatuma impunzi zibona ubuvuzi bwiza

Minema yasobanuye ko bitarenze Ukwakira 2025 ibitaro by’ababyeyi bizaba bikora neza

Abadepite bagize PAC bagaragaje ko ibikorwa byo kurangiza maternity mu bitaro bya Ngarama yatinze kurangira

Amafoto: Nzayisingiza Fidele

---

Source : http://igihe.com/amakuru/u-rwanda/article/u-rwanda-mu-mushinga-w-ibitaro-bya-miliyari-14-frw-bizafasha-impunzi-zirenga

Iyicwa ry'uyu musore ryamenyekanye mu rukerera rwo kuri uyu wa Mbere tariki ya 7 Nyakanga 2025, mu Mudugudu wa Akabenda mu Kagari ka Cyarukamba mu Murenge wa Munyiginya.

Bamwe mu baturage bari bamubonye ku manywa, bavuze ko uyu musore yari yagiye mu Karere ka Rwamagana kureba mwene wabo. Ahageze ngo yatangiye gusengerera abantu batandukanye, baza kumenya ko yavuye iwabo bagurishije isambu bagabana amafaranga.

Umunyamabanga Nshingwabikorwa w'Umurenge wa Munyiginya Mukantambara Brigitte, yabwiye IGIHE ko iperereza ryahise ritangire ngo hamenyekanye icyishe uyu musore.

Yagize ati 'Twabimenye saa Kumi z'ijoro baduhamagaye batubwira ko babonye umuntu mu muhanda wapfuye, bamusanze ku muhanda munini wa kaburimbo. Twahageze n'inzego z'umutekano duhita dutangira gukurikirana kugira ngo turebe icyamwishe niba yishwe n'abantu cyangwa niba ari ikindi kintu cyamwishe ntabwo turabimenya.''

Gitifu Mukantambara yavuze ko uyu musore yari yaje muri uyu murenge aturutse mu Karere ka Gatsibo nyuma y'aho iwabo bagurishije isambu bakagabana amafaranga, bigakekwa ko yishwe akamburwa ayo mafaranga.

Ati 'Ejo yiriwe inaha ari kunywa inzoga ndetse anafite ayo mafaranga niyo makuru twahawe, ubu inzego z'umutekano zahise zitangira iperereza. Abaturage barasabwa gukaza amarondo no kwirinda ubugizi bwa nabi kuko uwo iperereza rizagaragaza ko yagize uruhare mu rupfu rwe azabihanirwa kandi bikomeye.''

Bamwe mu baturage bavuga ko ubwo uyu musore yageraga muri uyu mudugudu bamubonye asangira inzoga n'umuvandimwe we yari yaje kureba, bakaba bongeye kumubona mu gitondo yapfuye.

---

Source : http://igihe.com/amakuru/u-rwanda/article/rwamagana-umusore-w-imyaka-20-yasanzwe-ku-muhanda-yapfuye

Irushanwa ryo Kwibohora ku nshuro ya 31 ryasojwe ku Cyumweru, tariki ya 6 Nyakanga 2025, ryasize Police Volleyball Club yegukanye ibikombe byombi mu cyiciro cy'abagabo n'abagore, nyuma yo gutsinda APR VC mu mikino ya nyuma.

Iri rushanwa ryatangiye ku wa Gatanu, tariki ya 4 Nyakanga, ryitabirwa n'amakipe ane ya mbere muri shampiyona y'u Rwanda mu mwaka ushize w'imikino.

Mu kiciro cy'Abagabo amakipe yitabiriye ni APR VC, Police VC, Kepler VC na REG VC, mu kiciro cy'Abagore hitabiriye Police WVC, APR WVC, RRA WVC na Kepler WVC.

Mu bagabo, Police VC yatsinze APR VC amaseti 3-2, mu mukino wakinwe ku rwego rwo hejuru. APR yari yatsinze set ya kabiri n'iya gatatu, ariko POLICE ihindura ibintu mu seti ebyiri za nyuma (25—22, 22—25, 20—25, 25—22, 15—10).

Mu bagore, Police WVC yatsinze APR WVC amaseti 3-1, nyuma yo gutakaza iseti ya mbere ariko ikagaruka mu mukino mu buryo bukomeye itwara igikombe, (18—25, 25—10, 25—19,25—19).

Mbere y'imikino ya nyuma, habaye imikino yo guhatanira imyanya ya gatatu, aho mu bagore Kepler WVC yegukanye umwanya wa gatatu itsinze RRA WVC amaseti 3-1 naho mu bagabo, Kepler VC yo yatsinze REG VC amaseti 3-1.

Ku ikipe ya Police y'Abagore yegukanye igikombe cyo Kwibohora nyuma yaho yegukanye Shampiyona y'u Rwanda, iki kikaba igikombe cya Gatatu cyo Kwibohora yikurikiranya kuko yagitwaye mu mwaka wa 2023, 2024 na 2025.

The post Police VC yegukanye igikombe cyo Kwibohora 2025 mu byiciro byombi, itsinze APR VC ku mukino wa nyuma appeared first on RUSHYASHYA.

Source : https://rushyashya.net/police-vc-yegukanye-igikombe-cyo-kwibohora-2025-mu-byiciro-byombi-itsinze-apr-vc-ku-mukino-wa-nyuma/?utm_source=rss&utm_medium=rss&utm_campaign=police-vc-yegukanye-igikombe-cyo-kwibohora-2025-mu-byiciro-byombi-itsinze-apr-vc-ku-mukino-wa-nyuma

Dusabe ni umwe mu bari guhabwa amahugurwa i Mutobo, amufasha gusubira mu buzima busanzwe nyuma yo kwitandukanya n'uyu mutwe agataha mu Rwanda.

Yinjiye muri FDLR mu 1998 ajyanywe na Cure Ngoma usigaye ari umuvugizi w'uyu mutwe muri iki gihe.

Ati 'Najyanywe n'umunyapolitiki anyumvisha ko tuzajya tubana, anyizeza ibitangaza. Bamwita Cure Ngoma. Nyuma haza gusohoka itegeko ko nta muntu wemerewe gutunga umuntu ugifite imbaraga, ko agomba guhabwa imyitozo ya gisirikare akabona kumutunga ari umusirikare wemewe.'

Amaze kurangiza imyitozo, yashyizwe mu barinzi ba Gen Iyamuremye Gaston wiyita Gen Rumuli, uyobora Umutwe wa FDLR.

Ati 'Bakajya bategura imirwano tukajyayo, akazi karakomeza biza kugera aho banjyana mu byo gucuruza kugira ngo abasirikare bajye babona uko barya umunyu. Njye nacuruzaga ihene'

Ihene bacuruzaga ni izo abarwanyi b'uyu mutwe bororaga. Usibye ubworozi, ibindi byavanwagamo amafaranga ni ibijyanye n'amabuye y'agaciro n'ubucuruzi bw'ibishyimbo. Yamaze imyaka ine ari byo akora.

Ati 'Buri kwezi warakoraga wabona amadolari 15 ukayohereza, bakajya bakwandikira icyangombwa kugira ngo abandi basirikare batazakubona bakagira ngo waratorotse.'

Yavuze ko ubwo bucuruzi bwakorwaga n'abantu benshi, kandi ko bitabaga byoroshye kubona amafaranga kuri we kuko byari nko gusahura abaturage.

Ati 'Hari abajyaga gusoresha abacukura amabuye y'agaciro…hari abantu benshi babikora.'

Raporo zitandukanye zigaragaza ko umutwe wa FDLR ukura amafaranga mu bucuruzi burimo ubwo ikorera muri Pariki ya Virunga.

Mu 2022, Raporo y'Impuguke za Loni yagaragaje ko “Amakara acibwa muri Pariki y'Igihugu ya Virunga agize isoko rinini ry'amafaranga ya FDLR'.

Iyo raporo igaragaza ko FDLR ifite ibirindiro muri teritwari za Rutshuru na Nyiragongo, mu byanya bibungabunzwe bya Pariki y'Igihugu ya Virunga no mu mashyamba ya Rutshuru mu duce twa Bwito, Binza, Bukoma na Busanza.

Dukuze yavuze ko abayobozi b'uyu mutwe bahoraga bashyira igitutu ku barwanyi bawo, babumvisha ko ugerageje gutahuka mu Rwanda, bitamugwa amahoro kuko agirirwa nabi. Gusa ngo ibi si byo namba ari nayo mpamvu asaba abakiri mu mashyamba kwitandukanya n'abafite ingengabitekerezo.

Ati 'Ingengabitekerezo ni byo, nta somo bakwigisha atari ukuvuga ngo tujye guhirika ubutegetsi bwa Kagame, bw'Abatutsi.'

Yasabye abo babanye ku mu mashyamba bakiri yo gukora amahitamo mazima bagataha aho kuyasaziramo.

Dukuze yagiriye ibikomere mu mashyamba ya Congo, ikiganza cye cy’akaboko k’ibumoso cyarasiwe ku rugamba

---

Source : http://igihe.com/amakuru/u-rwanda/article/yamaze-imyaka-ine-acururiza-fdlr-aba-n-umurinzi-n-umuyobozi-wayo-ubuhamya-bwa