Webrwanda Backend

Blog

  • Nicolas Jackson ashobora kuva muri Chelsea vuba aha #rwanda #RwOT

    Nyuma y'uko rutahizamu w'umunya-Nigeria, Noni Madueke, ashyize umukono ku masezerano yo kwerekeza muri Arsenal, ubu noneho undi mukinnyi wa Chelsea, Nicolas Jackson, na we ashobora gukurikira inzira yo kuva mu ikipe y'i Stamford Bridge muri iri gura n'igurisha ryo muri iyi mpeshyi.

    Jackson, umukinnyi w'imyaka 23 wavuye muri Villarreal mu mpeshyi ya 2023, yageze muri Chelsea yitezweho kuba umwe mu bazahesha ikipe intsinzi.

    Nubwo yagiye agaragaza ubuhanga n'ubushake bwo kwitanga, ntiyahiriwe n'umwaka we wa mbere mu Bwongereza kuko yagiye agira ibihe bibi, kutagira amahirwe imbere y'izamu, doreko n'ibikomere by'imvune byamudindije kugeza ubwo yaburaga amahirwe yo kuba umwe mu bakinnyi batsinda cyane.

    Amakuru aturuka mu binyamakuru byo mu Butaliyani no mu Bwongereza avuga ko AC Milan yo mu Butaliyani yamaze kubaza Chelsea ibijyanye n'amaherezo y'uyu mukinnyi, ndetse ngo yanohereje intumwa i Londres ngo zigirane ibiganiro n'abayobozi ba Chelsea.

    Gusa igiciro Chelsea isaba kirenga miliyoni 40 z'amapawundi cyatumye iyi kipe yo mu Butaliyani isubira inyuma gato, kuko amafaranga ifite yo kugura abakinnyi atarenga ayo.

    Bivugwa ko n'andi makipe yo mu Bufaransa, Espagne na Saudi Arabia na yo yamaze kwinjira mu rugamba rwo gusinyisha Nicolas Jackson.

    Bityo rero, n'ubwo nta kintu kiratangazwa ku mugaragaro, amahirwe yo kubona Jackson akina muri shampiyona ya Premier League mu mwaka utaha arasa n'ari hasi, cyane cyane niba Chelsea ishaka kongera kwinjiza amafaranga no kongeramo amaraso mashya mu busatirizi bwayo.

    Ese Chelsea izamurekura? Ese Jackson azemera kwerekeza ahandi nyuma y'umwaka umwe gusa? Ibi ni ibibazo bizasubizwa mu minsi mike iri imbere.

    Nicolas Jackson ashobora kuva muri Chelsea vuba aha
    Bivugwa ko n'andi makipe yo mu Bufaransa, Espagne na Saudi Arabia na yo yamaze kwinjira mu rugamba rwo gusinyisha Nicolas Jackson

    Source : https://kasukumedia.com/nicolas-jackson-ashobora-kuva-muri-chelsea-vuba-aha/

  • Beyoncé yagarukanye udushya twihariye mu gitaramo cya 'Cowboy Carter' #rwanda #RwOT

    BEYONCÉ YONGEYE GUTUNGURANA MU GITARAMO YAKOZE CYO KWAMAMAZA ALBUM YE 'COWBOY CARTER'

    Mu gitaramo gishya cyo kwamamaza album ye nshya Cowboy Carter, umuhanzikazi w'icyamamare ku isi, Beyoncé Knowles-Carter, yongeye gutungura imbaga y'abafana be ubwo yageraga ku rubyiniro mu buryo budasanzwe kandi bwavugishije benshi.

    Ni nyuma y'aho mu cyumweru gishize, ubwo yakoreraga igitaramo mu mujyi wa Houston, muri leta ya Texas, Beyoncé yari yagerageje gutungurana yinjira ku rubyiniro yicaye mu modoka iri mu kirere ifashwe n'imigozi. Ariko icyo gihe amahirwe ntiyamusekeye kuko imodoka yahagaze mu kirere itagera aho yagombaga kumugeza, bituma abashinzwe umutekano bamumanura mu buryo busanzwe.

    Nyamara kuri iyi nshuro, ubwo yari mu gitaramo cyabereye mu mujyi wa Atlanta, muri leta ya Georgia, Beyoncé yongeye kwereka isi yose ko ari umwamikazi w'ibitaramo n'udushya. Yageze ku rubyiniro yicaye ku kimeze nk'ifarasi y'umurimbo nacyo cyari kiri mu kirere gifashwe n'imigozi, ariko kuri iyi nshuro byose byagenze neza.

    Ifarasi yagaragaraga nk'iyakozwe mu buryo bugezweho, ifite amatara akayaka ndetse igaragara nk'ikirango gihuye neza n'umuco Beyoncé yifashisha muri album ye Cowboy Carter, ishingiye ku murage w'abirabura bo mu burengerazuba bwa Amerika, ahakunzwe cyane umuco w'ubworozi n'ubucengezamatwara bw'abatwara amafarasi.

    Abari bitabiriye iki gitaramo bashimiye cyane ubuhanga n'ubushake Beyoncé agaragaza mu guhanga udushya tudasanzwe dutuma buri gitaramo cye kiba igitaramo cy'amateka. Amashusho n'amafoto byafashwe muri icyo gitaramo byatangiye gucicikana ku mbuga nkoranyambaga, abantu benshi batanga ibitekerezo ku buryo yagaragaye nk'umunyabigwi utigera asubira inyuma.

    Album Cowboy Carter, igizwe n'indirimbo ziganjemo injyana ya Country n'izifite ubutumwa bujyanye n'umuco w'Amerika y'icyaro, yakiriwe neza kuva yasohoka, ndetse benshi bemeza ko Beyoncé yongeye kwerekana ko ashobora guhindura injyana iyo ari yo yose akayikora mu buryo buhanitse.

    Beyoncé, ukunzwe cyane ku isi hose, akomeje kwerekana ko adashobora gusubira inyuma mu rugendo rwe rwa muzika, ahubwo buri cyiciro cy'akazi ke cyubaka amateka mashya muri muzika mpuzamahanga.

    Source : https://kasukumedia.com/9078-2/

  • Muhanga: Ikirombe cyahitanye umuntu umwe cyafunzwe – #rwanda #RwOT

    Iyo mpanuka yabaye mu gitondo cy'itariki 9 Nyakanga 2025 ubwo abakora muri icyo kirombe bajyaga mu kazi nk'ibisanzwe.

    Umukozi ushinzwe Irangamimerere mu Murenge wa Rugendabari wasigariye mu nshingano Umunyamabanga Nshingwabikorwa w'uwo murenge Murenge, Bizimana Sixbert, yabwiye IGIHE ko abakozi bagiye mu kazi nk'ibisanzwe bageze mu ndani [imbere mu kirombe] harariduka.

    Yagize ati 'Ni abakozi bakorera sositeye yitwa Daba Supply bari bagiye mu kazi nk'uko bisanzwe mu gitondo nka saa mbili, imbere aho bakorera harariduka. Mu bantu batanu bari barimo umwe ni we witabye Imana abandi barahunga.'

    Bizimana yavuze ko abo barokotse bahise bajyanwa kwa muganga bahabwa ubuvuzi ndetse ubu basezerewe uretse umwe wakomeretse ikirenge ukiri kwitabwaho n'abaganga.

    Yavuze kandi ko nubwo iyo mpanuka itafashe igice kinini cy'icyo kirombe ariko cyabaye gihagaritswe by'agategebayo kugira ngo ubuyobozi bwacyo bugire ibyo bubanza gutunganya.

    Ati 'Twagiyeyo nk'ubuyobozi dufata umwanzuro wo kuba tugihagaritse by'agateganyo twereka ubuyobozi bwaho ibyo baba bakosoye harimo ibyitwa gutega. Nibamara kubirangiza bazatumenyesha bongere basubiremo bakore.'

    Uwo mukozi yagiriye inama abakora n'abakoresha mu birombe kubanza gukora ubugenzuzi mbere yo gutangira akazi ngo barebe niba nta hateza ikibazo harimo nk'uko biteganywa n'amategeko kuko aho habaye impanuka bigaragara ko bitari byakozwe.

    Yasabye abakoresha mu birombe gukurikiza iby'amategeko agenera umukozi n'abakozi bagaharanira uburengazira bwabo mu kazi mu kwirinda ingaruka zijya zigaragara.

    Ati 'Amabwiriza ateganya ko umukozi ukora mu kirombe aba afite ubwishingizi kandi afite amasezerano y'akazi. Umuryango w'uriya witabye Imana iyo sosiyete yawufashije gushyingura unahabwa impozamarira ariko hari aho impanuka zijya ziba ugasanga ibyo abakoresha ntibabyubahiriza. Turasaba abaturage gukora ubucukuzi ibyo byose babihawe kugira ngo nihaba ikibazo babone ibyo bagenerwa n'amategeko.'

    Uwitabye Imana aguye muri iyo mpanuka yari umusore w'imyaka 25 y'amavuko.

    Muhanga ni akarere kazwiho kugira ibirombe byinshi bicukurwamo amabuye y’agaciro

    Source : http://igihe.com/amakuru/u-rwanda/article/muhanga-ikirombe-cyahitanye-umuntu-umwe-cyafunzwe

  • Perezida Kagame yashimiwe uruhare rwe mu gukumira no guhangana n'ibyorezo – #rwanda #RwOT

    Icyemezo cy'ishimwe cya Perezida Kagame cyatanzwe ku wa 10 Nyakanga 2025 n'Umuyobozi Mukuru wa OMS, Dr Tedros Adhanom Ghebreyesus, mu nama yareberaga hamwe ishyirwa mu bikorwa ry'amasezerano agamije ubufatanye mu gukumira, kurwanya no guhangana n'ibyorezo bitera Isi yabereye i Genève.

    Amasezerano agamije ubufatanye bw'Isi mu guhangana n'ibyorezo yemejwe ku wa 20 Gicurasi 2025 n'ibihugu birenga 120.

    Ambasaderi w'u Rwanda mu Busuwisi, unahagarariye u Rwanda muri Loni, Urujeni Bakuramutsa, ni we washyikirijwe icyemezo cy'ishimwe cya Perezida Kagame.

    Abinyujije ku rukuta rwa X yagize ati 'Dr Tedros yashimiye Perezida Kagame n'abandi 20 bagize uruhare mu guharanira ko habaho amasezerano y'ubufatanye mu guhangana n'ibyorezo. Ni ishema gushimira ubuyobozi bw'u Rwanda buteza imbere urwego rw'ubuvuzi rudaheza akarere na kamwe, by'umwihariko budaheza Afurika.'

    Ubutumwa bwashyizwe kuri konti ya X ya Ambasade y'u Rwanda mu Busuwisi, bugaragaza ko Perezida Kagame yashimiwe kubera uburyo yaharaniye ko habaho uburyo bwemewe n'amategeko kandi buhuriweho bwafasha gukumira, kurwanya no guhangana n'ibyorezo bitandukanye.

    Kuva icyorezo cya Covid-19 cyashegesha Isi mu myaka ishize, u Rwanda rwagiye ruzamura ijwi rusaba ibihugu by'Isi n'imiryango mpuzamahanga gukorera hamwe bitegura guhangana biruseho n'ibindi byorezo bishobora gutera.

    Muri Kamena 2024 ubwo Perezida Kagame yari mu nama yabereye i Paris mu Bufaransa igamije gutangiza gahunda yo kwihutisha ibijyanye no gukorera inkingo muri Afurika yiswe 'African Vaccine Manufacturing Accelerator (AVMA)', yagarutse ku buryo ibihugu bimwe byoroherwa no kubona inkingo mu gihe ibindi cyane cyane ibyo muri Afurika n'ibikiri mu nzira y'amajyambere bibura aho bizikura.

    Ati 'Icyorezo cya COVID-19 cyatwaye ubuzima bw'abaririwa muri za miliyoni, ariko kinagaragaza isura nshya y'ibijyanye n'ubusumbane hagati y'ibihugu byateye imbere n'ibiri mu nzira y'amajyambere. Iyi virusi ntabwo yigeze isiga igihugu na kimwe kitagezweho n'ingaruka, ariko kubona inkingo n'ibyifashishwa mu buvuzi ku gihe byari birimo ingorane n'ubusumbane.'

    Imibare igaragaza ko Afurika buri mwaka ikenera inkingo zifite agaciro ka miliyari 1$, mu gihe ikora gusa izingana na 0,2%.

    Umuyobozi Mukuru wa OMS, Dr Tedros Adhanom Ghebreyesus, yashyikirije Ambasaderi w’u Rwanda i Genève, Urujeni Bakuramutsa, icyemezo cy’ishimwe cyagenewe Perezida Kagame

    Perezida Kagame yashimiwe uruhare rukomeye yagize mu guharanira ko ibihugu bifatanya mu kurwanya ibyorezo

    Source : http://igihe.com/amakuru/u-rwanda/article/perezida-kagame-yashimiwe-uruhare-rwe-mu-gukumira-no-guhangana-n-ibyorezo

  • Umubyeyi wa Agather Katrina agiye gushyingurwa i Bulo-Butambala #rwanda #RwOT

    Umubyeyi wa TikToker Agather Katrina agiye gushyingurwa i Bulo-Butambala

    Umuhanzi Tom Dee yatangaje gahunda y'ishyingura rya nyirabukwe, witabye Imana ku wa Kane mu bitaro bya Mulago, nyuma y'uburwayi yari amaranye igihe kirekire.

    Tom Dee yavuze ko nyakwigendera azashyingurwa uyu munsi kuwa Gatanu, i Bulo-Butambala, ahazwi nka Kasansala, guhera saa munani z'amanywa (2:00 PM).

    Gahunda y'ishyingura ry'umubyeyi wa Agather Katrina izabera i Bulo-Butambala-Kasansala kuri uyu wa Gatanu saa munani z'amanywa.

    Tom Dee yagaragaje akababaro gakomeye yatewe n'urugendo rubabaje umugore we yanyuzemo, avuga ko Agather amaze imyaka 12 arwaza nyina, warwaraga indwara nyinshi zidakira zirimo umuvuduko w'amaraso (pression), diyabete, ndetse n'ibibazo bikomeye by'impyiko n'umwijima.

    Agather amaze imyaka 12 arwaza nyina, wamaze igihe arwaye indwara zitandukanye zirimo umuvuduko w'amaraso, diyabete, impyiko n'umwijima.

    Buri munsi, bakoreshaga amafaranga arenga ibihumbi magana atanu (500,000 Frw) ku miti yo kumuvuza.

    Tom Dee yavuze ko ibyo byabaye umutwaro uremereye ku muryango, haba mu buryo bw'amikoro ndetse no mu buryo bw'amarangamutima, cyane cyane mu minsi ya nyuma y'uburwayi bwe.

    Yasabye abafana be n'inshuti zabo gukomeza kubasengera no kubashyigikira muri ibi bihe bikomeye, anashima cyane imbaraga nyirabukwe yagaragazaga n'ubwitange umugore we yagaragaje mu myaka yose yo kumwitaho.

    Imana imuhe iruhuko ridashira.

    Source : https://kasukumedia.com/umubyeyi-wa-agather-katrina-agiye-gushyingurwa-i-bulo-butambala/

  • Ernesto Ugeziwe wamamaye kuri RBA yagizwe umunyamuryango wa Recording Academy – #rwanda #RwOT

    Ku wa 10 Nyakanga 2025 nibwo iki kigo gikomeye ku Isi kizwiho gutegura ibihembo bya Grammy, cyatangaje abanyamuryango bashya 3.600, barimo 2.600 bafite uburenganzira bwo gutora n'abandi 1.000 badafite ubwo burenganzira.

    Ni igikorwa gikorwa buri mwaka hagamijwe kongera ubwiganze bw'abagore, Abirabura n'urubyiruko muri iyi sosiyete isanzwe iri mu zubashywe ku rwego rw'Isi yose.

    Ugeziwe ubu usigaye abarizwa muri Amerika, yatangaje ari ishema kuri we, ariko na none ashimira abantu barimo Umunyarwanda Tuma Basa ukorana na Google, cyane cyane kuri Youtube ndetse na Alexandra Cutler-Fetkewicz usanzwe ari Perezida wa Recording Academy Philadelphia Chapter, aho iri shami ryita ku bahanzi n'abakorera umuziki mu bice bya Pennsylvania, Delaware n'Amajyepfo ya New Jersey muri Leta Zunze Ubumwe za Amerika.

    Ati 'Mwarakoze cyane Tuma Basa na Alexandra Cutler-Fetkewicz ndetse n'itsinda ryose rya Philly Chapter ku nama, ubufasha n'inkunga mwampaye. Ntabwo nari kubigeraho ntabafite! Ndanezerewe cyane kandi mfite ishema ryo kwifatanya n'itsinda rishya ry'abanyamuryango ba Recording Academy 2025, umuryango mpuzamahanga w'abahanzi n'abandi bafite uruhare mu buhanzi mu buryo bw'umwuga, bose hamwe bagira uruhare mu kurushaho kuwubaka no kuwuteza imbere.'

    Yakomeje agaragaza imihigo afite nk'umuryamuryango mushya, ati 'Nk'umunyamuryango mushya, ngiye kugira ijwi mu gutora no kugena uko ibihembo bya Grammy bitangwa ndetse no kugira urubuga rwanjye rwo kuvuganira uruganda rw'umuziki, gushyigikira bagenzi banjye no gukomeza gutera imbere mu rugendo rwanjye.'

    Agaragaza ko igikomeza Recording Academy ari ubudasa bwayo. Ati 'Nishimiye cyane gutanga ibitekerezo byanjye no kugira uruhare mu guteza imbere ubuhanzi n'ubuhanga buhanitse mu muziki ku rwego rw'Isi.'

    Ernesto Ugeziwe uretse kuba umunyamakuru, ni umujyanama, umuyobozi wa gahunda zitandukanye ndetse afite ibikorwa by'ubushakashatsi n'imishinga itandukanye y'ubukangurambaga ku rubyiruko. Ni umwe mu bashinze ikigo cya Afro Hub Entertainment gitegura ibitaramo muri Amerika.

    Uyu musore yerekeje muri Leta Zunze Ubumwe za Amerika mu 2016.

    Ernesto Ugeziwe yagizwe umunyamuryango wa Recording Academy

    Ernesto Ugeziwe yagaragaje ko yishimiye iki gikorwa mu buryo budasanzwe

    Source : http://igihe.com/amakuru/u-rwanda/article/ernesto-ugeziwe-wamamaye-kuri-rba-yagizwe-umunyamuryango-wa-recording-academy

  • Intambara karundura iratutumba muri RDC (Video) – #rwanda #RwOT

    Mu gihe imyiteguro ikomeje guca ibintu ku ruhande rwa Congo, AFC/M23 iherutse gutanga intabaza igaragaza ko iyi myitwarire ishobora kugira ingaruka mbi ku biganiro bigamije gushaka amahoro hagati y'impande zombi biri kubera i Doha muri Qatar.

    Iby'iyi ntambara Tshisekedi ari gutegura bizarangira bite? Ese uyu mugabo ashobora kwisubiza ibice bigenzurwa na AFC/M23? Aramutse atsinzwe iyi ntambara, byamugiraho izihe ngaruka? Ashyigikiwe n'ibihe bihugu?

    Byose twabigarutseho mu kiganiro Indiba y'Ibivugwa.

    Source : http://igihe.com/amakuru/u-rwanda/article/intambara-karundura-iratutumba-muri-rdc-video

  • Right To Play Rwanda yahembye mudasobwa abo mu mashuri abanza batsinze amarushanwa ya 'robotics' – #rwanda #RwOT

    Ni igikorwa uyu muryango wafatanyijemo n'Ikigo cy'Igihugu gishinzwe guteza imbere uburezi bw'ibanze mu Rwanda (REB), GIZ na Creativity Lab,

    Aya marushanwa yateguwe binyuze mu mushinga w'uyu muryango witwa 'Plug-in Play (PIP)' ugamije guteza imbere ireme ry'uburezi bw'abiga mu mashuri abanza guhera mu mwaka wa kane kugeza mu wa gatandatu.

    Haba hagamijwe kubafasha kwiga binyuze mu gukina hifashishijwe ikoranabuhanga 'Learning through Play with Technology (LtPT)'.

    Umushinga watangiye mu 2021, wateguye amarushanwa ahuza abana babaye aba mbere mu turere ukoreramo.

    Ni uturere twa Ruhango, Nyanza, Kayonza, Nyagatare, Musanze na Rubavu. Batatu bahize abandi begukanye mudasobwa n'ibindi bikoresho by'ishuri.

    Umuyobozi ushizwe imishinga ya Right To Play mu Rwanda, Kabamba Rodgers, yasabye Leta gukomeza gufasha abana bagaragaje impano zidasanzwe zo gukora imishinga itandukanye ishobora kwifashishwa mu gukemura ibibazo by'abaturage.

    Ati 'Impamvu twatumiye abafatanyabikorwa ni ukugira ngo abana bagaragaje impano bazafashwe gukomeza gukora imishinga yabo, aho kugira ngo igarukire mu mashuri abanza.'

    Akomeza avuga ko bifuza ko ibi bikorwa byagera mu mashuri yose ya Leta.

    Imwe mu mishinga yatsinze irimo ujyanye n'inkoni y'ikoranabuhanga iyobora abafite ubumuga bwo kutabona, n'uburyo bugezweho bwo gukaraba intoki hirindwa indwara zituruka mu mwanda.

    Abanyeshuri bo muri G.S Kampanga, ni bo bakoze umushinga w'inkoni y'ikoranabuhanga iyobora abafite ubumuga bwo kutabona inabafasha kubaburira igihe bagiye guhura n'ibibazo.

    Ganza Bright wiga muri G.S Kampanga ati 'Iriya nkoni ifasha kutagonga ikintu icyo ari cyo cyose kiri imbere kubera ko iyo gihari ihita itanga impuruza ukamenya ko hari ikibazo ukaba wabasha kunyura indi nzira nziza.'

    Umukozi ushinzwe guteza imbere ikoranabuhanga mu Kigo cy'Igihugu Gishinzwe Uburezi bw'Ibanze (REB), Uwishema Aime Vedaste, yavuze ko aya marushanwa afite akamaro gakomeye kandi akaba ajyanye n'icyerekezo cy'igihugu cyo kugira ubukungu bushingiye ku bumenyi.

    Ati 'Aba bana bahawe insanganyamatsiko imwe, buri tsinda ritegura ibikorwa bitandukanye bihuje n'iyo nsanganyamatsiko. Uyu munsi bagaragaje ko bafite ibitekerezo byiza kandi bitandukanye byakemura ibibazo abantu bahura na byo hifashishijwe ikoranabuhanga'.

    Plug-in Play ikorera mu turere dutandatu no mu bigo by'amashuri 312, hagamijwe kwigisha abana binyuze mu mikino.

    Abanyeshuri bo muri G.S Kampanga bahawe igihembo ku mushinga w’inkoni y’ikoranabuhanga iyobora abafite ubumuga bwo kutabona

    Abanyeshuri bo kuri G.S Rambo bashyikirijwe igihembo cy’umushinga wabo bakoze ujyanye n’uburyo bwo gukuraba intoki hirindwa indwara zandurira mu myanda

    Abanyeshuri bo muri G.S Muhoza na bo bahawe igihembo cy’uko bitwaye neza muri aya marushanwa

    Abanyeshuri batandukanye biga mu mashuri abanza berekanye imishinga yabo

    Abanyeshuri 37 batsinze kurusha abandi ni bo bitabiriye aya marushanwa yo gukora imishinga y’ikoranabuhanga

    Abana bagaragaje ubumenyi bafite mu bijyanye n’ikoranabuhanga

    Umuyobozi ushizwe imishinga ya Right to Play mu Rwanda, Kabamba Rogers, yasabye Leta gukomeza gufasha abana bagaragaje impano zidasanzwe

    Umukozi ushinzwe guteza imbere ikoranabuhanga muri REB, Uwishema Aime Vedaste, yavuze ko aya marushanwa afite akamaro gakomeye kandi akaba ajyanye n'icyerekezo cy'igihugu cyo kugira ubukungu bushingiye ku bumenyi

    Umujyanama w’Umunyamabanga Uhoraho muri Minisiteri y’Ikoranabuhanga na Innovasiyo, Sonia Akimana yashimiye umurava waranze aba bana bitabiriye aya marushanwa

    Source : http://igihe.com/amakuru/u-rwanda/article/right-to-play-rwanda-yahembye-mudasobwa-abo-mu-mashuri-abanza-batsinze

  • Gatsibo: Umusore w'imyaka 25 arakekwaho kwica nyina wamubuzaga gutereta umugore baturanye – #rwanda #RwOT

    Ibi byabaye mu gitondo cyo kuri uyu wa Kane tariki ya 10 Nyakanga 2025 mu Mudugudu wa Gihembe mu Kagari ka Rumuri mu Murenge wa Muhura.

    Umwe mu baturage baganiriye na IGIHE, yavuze ko uyu musore yari amaze igihe kinini yarinjiye uwo mugore ariko ngo akaba n'ubusanzwe yagaragazaga imyitwarire itari myiza.

    Ati ''Yari umuntu ubona ufite ikibazo bitewe n'imyitwarire itari myiza yamurangaga mu bandi, iby'uko yari yarinjiye uriya mugore byo birazwi cyane inaha kandi mama we ntabwo yari abimushyigikiyemo rero twabyutse dusanga yamwishe.''

    Umunyamabanga Nshingwabikorwa w'Umurenge wa Muhura, Nayigizente Gilbert, yabwiye IGIHE ko uyu musore hari umugore baturanye yari yarinjiye, umubyeyi we ntiyabimushyigikiramo, undi aho kugira ngo amwumvire ahubwo ahitamo kumwicisha umuhini.

    Yagize ati 'Umwana yishe nyina, ni umusore w'imyaka 25 yamwicishije umuhini avuga ko amubuza gutereta umugore yari yarinjiye baturanye. Ni umugore wibana yari yarinjiye umubyeyi we ntabimushyigikiremo, uyu munsi rero yamwicishije umuhini ariko yahise atabwa muri yombi.'

    Gitifu Nayigizente yakomeje avuga ko kuri ubu uyu musore yatawe muri yombi na RIB.

    Ati 'Ubutumwa dutanga ni uko umuntu aramutse agize ikibazo yajya yegera ubuyobozi, turababwira ko ubuzima bw'umuntu ari ntavogerwa, nta muntu wemerewe kuvutsa ubuzima undi muntu. Buri wese akwiriye kubaha undi noneho ababyeyi bo bikaba akarusho.''

    Kuri ubu umurambo w'uyu mubyeyi wajyanywe ku bitaro bya Kiziguro kugira ngo ukorerwe isuzuma mbere y'uko ushyingurwa mu cyubahiro.

    Source : http://igihe.com/amakuru/u-rwanda/article/gatsibo-umusore-w-imyaka-25-arakekwaho-kwica-nyina-wamubuzaga-gutereta-umugore

  • Mpano Yeah indirimbo ye 'Bizakunda' aherutse gushyiranze hanze ikomeje kuvugisha benshi #rwanda #RwOT

    Amazina ye nyakuri ni TUYISHIMIRE Jean Claude, ariko mu ruganda rwa muzika Nyarwanda, azwi cyane ku izina Mpano Yeah. Uyu musore ukiri muto, afite imyaka 19 gusa y'amavuko, yatangiye urugendo rwe rwa muzika ku mugaragaro mu mpera z'umwaka wa 2024, aho yasohoye indirimbo ye ya mbere mu kwezi kwa Ukuboza.

    Mpano Yeah ni umwe mu rubyiruko rufite impano n'inyota yo gutanga ubutumwa binyuze mu bihangano byabo, n'ubwo inzira atari nziza nk'icyanzu. Nta bushobozi buhambaye bwo gukora muzika, ariko kandi ibyo ntibyigeze bimuca intege.

    Yakomeje gukora ibihangano bye uko ubushobozi bwamwemereraga, akabikora abikunze, ndetse ahora yifuza ko ubutumwa atanga bwagera kuri benshi.

    Indirimbo ya mbere ya Mpano yise 'Akunyu', yayikoranye n'umutima we wose, ariko ntiyabashije gusohoka uko yabiteganyaga kubera ikibazo gikomeye cy'amashusho. Uwo bari bayikoranye na Director DV, yamwibye amashusho yari yakoze, bituma indirimbo isohoka ituzuye. Ibyo ni bimwe mu byo yitesha kugira ngo adacika intege, ariko ntibyamuteye kuva ku nzozi ze.

    Nyuma y'iyo ndirimbo ya mbere, Mpano Yeah yaje gushyira hanze iyitwa 'Mon bébé', aho yerekana urukundo ruva ku mutima, yifashishije amagambo yoroshye ariko arimo ubusizi n'ubutumwa bukomeye.

    Iyo ndirimbo ni yo yatumye bamwe mu bakunzi ba muzika batangira kumumenya, ndetse abandi batangira kumushyigikira binyuze ku mbuga nkoranyambaga no kumushyigikira mu buryo bwo kumuha ubufasha butandukanye.

    Mpano Yeah indirimbo ye 'Bizakunda' aherutse gushyiranze hanze ikomeje kuvugisha benshi

    Kuri ubu, indirimbo ya gatatu yise 'Bizakunda' niyo iri kuvugisha benshi. Iyi ndirimbo ije mu gihe nyacyo, kuko ivuga ku buzima bushaririye abahanzi bato banyuramo, barimo kwihanganira inzitizi, agasuzuguro, no kubura ubushobozi, ariko bagakomeza kwizera ko ejo habo hazaba heza.

    'Bizakunda' ni indirimbo ikubiyemo ubuzima bwa Mpano n'abandi bahanzi b'inzozi, aho baririmba n'umutima wabo wose, bagamije ko igihe kizagera bakumvwa na bose.

    Indirimbo 'Bizakunda' irimo gucurangwa kuri YouTube ndetse no ku mbuga zitandukanye zicuruza umuziki. Ku rubuga rwe rwa YouTube, iyi ndirimbo yagaragaje ko hari icyizere cyo kwamamara, kuko imaze kugera mu bitekerezo bya benshi.

    Mpano Yeah, uvuga afite inzozi zihanitse, wifuza ko ubutumwa bwe bwagera ku bantu bose bafite impano ariko badafite aho bazikomereza. Ati: 'Nta musore utagira inzozi, gusa ntizisohozwa na buri wese. Njye ndabizi ko bizakunda, kubera ko impano n'icyizere bifite imbaraga.' Uyu musore arasaba abantu bose, by'umwihariko abakunda umuziki nyarwanda, gukomeza gushyigikira abahanzi bato badafite aho bashingira, kuko nabo bafite inkuru nziza zavamo indirimbo nziza.

    Amwe mu mafoto agize indirimbo ye

    Source : https://kasukumedia.com/mpano-yeah-indirimbo-ye-bizakunda-aherutse-gushyiranze-hanze-ikomeje-kuvugisha-benshi/