Webrwanda Backend

Blog

  • Nyarugenge: Umugore yatwikishije mugenzi amazi ashyushye amuziza ko abana babo barwanye – #rwanda #RwOT

    Ahagana saa moya n’igice zo kuri uyu wa Kane tariki ya 26 Kanama 2021, nibwo uyu mugore yatwitse mugenzi we amusukaho amazi ashyushye.

    Amakuru avuga ko uwo mugore wakoze iryo bara, yabikoze nyuma yo gutaha umwana we akamubwira ko umwana w’umuturanyi we yamukubise.

    Undi yahise agira umujinya ajya guteza ubwega ku muturanyi we birangira barwanye.

    Abaturage bo muri aka gace kari munsi ya Mont Kigali, babwiye IGIHE ko uwo mugore wari uje guhorera umwana we, yahise yinjira mu nzu akazana isafuriya irimo amazi ashyushye akayamena kuri mugenzi we.

    Mukayisenga Solange ati “ Yaratashye umwana aramubwira ngo umwana w’umuturanyi yankubise. Nibwo yaje baratongana ahita ajya kwambara ipantalo mu nzu asohokana isafuriya y’amazi ashyushye ahita ayimumenaho, maze yirukira mu nzu arikingirana.”

    Uwitwa Kayumba Bernard, yavuze uyu mubyeyi wamenweho amazi yahiye umubiri wose.

    Ati “Akimara kwikingirana abanyerondo n’abayobozi baje bamusaba gufungura bahita bamujyana ku Murenge gusa twe byadutunguye uburyo umuntu ashobora gufata amazi akuye ku mbabura, akayasuka kuri mugenzi we”.

    Yongeyeho ko uyu mugore abanyerondo bahise bamujyana ku Murenge wa Nyakabanda mu gihe mugenzi yatwitse yahise yoherezwa ku Kigo Nderabuzima cya Kabusunzu.

    Uyu mugore watwitswe yahise ajyanwa kwa muganga

    source : https://ift.tt/3ksGiwe

  • Kigali: Agahinda k’umwana washukishijwe akazi agasambanywa, yatwara inda bakamwigarika – #rwanda #RwOT

    Uyu mwana w’umukobwa watewe inda afite imyaka 16 gusa, yabwiye IGIHE ko yatangiye guhura n’ibibazo bitandukanye nyuma y’aho ababyeyi be bitabye Imana, akaza guhura n’umugabo wamwijeje ko ashobora kumubonera akazi, dore ko yari agakeneye cyane kuko yari afite ibibazo byinshi, birimo kutagira icumbi.

    Yagize ati “Nyuma yo kubura ababyeyi banjye bose mu gihe cy’amezi atanu, nahuye n’ubuzima bubi cyane ku buryo kubona ibyo kurya byari ikibazo ndetse n’inzu nabagamo bayinsohoyemo. Naje guhura n’uwo mugabo [wanteye inda] anyereka ko angiriye impuhwe anyizeza ko azajya amfasha kandi ko agiye no kumpa akazi, nibwo yanshutse turaryama antera inda.”

    Akomeza avuga nyuma yo gutwara inda, yahuye n’ubuzima bubi cyane ku buryo byabaye ngombwa ako akora n’akazi ko mu rugo.

    Ati “Byabaye ngombwa ko nkora ikiyede, inda igeze hafi yo kuvuka ndabireka njya kubyara, na nyuma y’aho nkora akazi ko mu rugo ndi kumwe n’umwana kandi na we urabyumva ubuzima bwari bugoye kuko nararanaga n’umwana mu gikoni. Nyuma nibwo nabo baje kunyirukana bambwira ko batatunga umukozi ufite umwana kuko ngo ibiryo by’abana babo najya mbiha uwanjye.”

    Nyuma y’uko umugabo wamuteye inda amwigaritse, uyu mukobwa yaje gufata icyemezo cyo kwirwanaho, ati “Naje kwiyakira mpura n’abagiraneza banyigisha imyuga itandukanye irimo uwo gusuka no kudoda, ku buryo mbona ibiraka nkakuramo amafaranga yo kugaburira umwana wanjye.”

    Uyu mukobwa yavuze ko ababazwa no kuba umwana we azakura atarezwe na se, agira inama abandi bakobwa yo kwirinda ibishuko bishobora gutuma batwara inda bakiri bato.

    Yavuze kandi ko ubu afite inzozi zo kuzashinga inzu itunganya imyenda.

    Uwamahoro (amazina yahinduwe) yavuze ko yashutswe agaterwa inda afite imyaka 16 nyuma yo kuba imfubyi

    source : https://ift.tt/2WvBc9T

  • Abacururiza mu isoko rya Ngororero babangamiwe no gufungirwa umuriro mu buryo budasobanutse – #rwanda #RwOT

    Umwaka urashize iri soko rikoreramo abasaga 300 ribayemo ubujura bw’ibikoresho by’umuriro w’amashanyarazi, bwakozwe n’abantu bataramenyekana.

    Ubwo bujura bukimara kuba byatumye abareberera iri soko bakuramo insinga z’amashyanyarazi, abarikoreramo basigara mu icuraburindi kandi nabo batazi uko ubwo bujura bwakozwe.

    Bamwe mu bacuruzi baganiriye na Radio1, bayibwiye ko babangamiwe no kuba nta muriro bafite kuko bituma baba mu icuraburindi ndetse abacuruza ibiribwa bagahomba kuko frigo zidakora.

    Umucuruzi w’inyama yagize ati “Tugera nka saa Kumi n’ebyiri tukabura aho tuzishyira tukazicyura, tukajya kuzibika mu rugo, kuko nta muriro tuba dufite ngo dushyire muri frigo zigapfa.”

    Abandi bacuruzi bavuga ko babangamiwe no kutagira amatara bituma bacururiza mu mwijima ndetse batabona naho bacomeka telefoni zabo.

    Umwe ati “Biratubangamiye, hari ubwo umukiliya ashobora kuza gucomeka telefoni twamubwira ko nta muriro dufite agasubira inyuma akigendera.”

    Undi ati “Hari ubwo imvura igwa bwagoroba bikazana umwijima, saa Kumi n’Ebyiri nta muntu waza kugurira aha.”

    Aba bacuruzi bose baravuga ko batakabaye bazizwa ubujura batagizemo uruhare kandi iri soko rifite abaricungira umutekano bakabaye babibazwa, barasaba ko umuriro wagarurwa bikaborohereza ubucuruzi.

    Umuyobozi w’Akarere ka Ngororero Ndayambaje Godefroid, yavuze ko bitarenze uyu mwaka umuriro uzaba wasubijwemo ariko abacuruzi bakwiye kugira uruhare mu kuwurinda.

    Yagize ati “Muri uyu mwaka w’ingengo y’imari turongera tuwugarure na REG irabidufasha, twarabiganiriye umuriro usubiremo. Uruhare rw’abacuruzi turarukeneye.”

    Kuba ubujura bwarakozwe mu isoko bagakuraho umuriro wose byateje bamwe mu bacuruzi igihombo gikomeye.

    Umujyi wa Ngororero ari na wo wubatsemo isoko

    source : https://ift.tt/3DxW6qe

  • Hatangijwe gahunda y’urwuri rw’icyitegererezo Iburasirazuba yitezweho kongera umukamo – #rwanda #RwOT

    Ni gahunda yitezweho kuzamura umukamo ukava kuri Litiro ibihumbi 160 ziboneka muri iyi Ntara ku munsi mu gihe cy’imvura, zikikuba inshuro nyinshi kuko mu mwaka utaha mu Karere ka Nyagatare hazuzura uruganda rutunganya amata y’ifu, nibura ku munsi ruzajya rukenera amata litiro ibihumbi 500 ku munsi

    Kuri uyu wa Kane nibwo abagize komisiyo ihuriweho n’inzego zitandukanye, iyobowe na Guverineri Gasana Emmanuel ishinzwe gukurikirana uruhererekane nyongeragaciro mu bworozi muri iyi Ntara basuye urwuri rw’icyitegererezo mu Murenge wa Karangazi mu Karere ka Nyagatare.

    Ni urwuri rw’icyitegererezo rwujuje ibisabwa byose, ku buryo rwabera abandi borozi urugero mu gukorera inzuri no gukora ubworozi bw’umwuga.

    Uyu mworozi afite amazi mu rwuri rwe, agahinga kuri 30% ibisigazwa akabihunika akabigaburira inka mu gihe cy’impeshyi, ibi bituma inka mu rwuri rwe ikamwa litiro ziri hagati ya 20 na 30 ku munsi.

    Nkundimana Christophe ushinzwe kureberera uru rwuri, yavuze ko hakorerwamo ubuhinzi n’ubworozi, ubuhinzi bukorerwamo bukaba bufasha mu kunganira ubwatsi bukunze kuba ingume mu gihe cy’izuba.

    Ati “ Nkuko habaho ibihe by’imvura n’ibihe by’izuba, natwe niko tugendana n’ibyo bihe, igihe cy’imvura izi nka zirarisha zamara kurisha duhumuje tukaziha n’inyongera kugira ngo umukamo ukomeze kuba mwiza ariko iyo tugeze mu gihe cy’izuba ntabwo zirisha ahubwo tuziha ibisigazwa by’imyaka tuba twarahunitse.”

    Nkundimana yakomeje avuga ko bafite amazi menshi mu rwuri yifashishwa mu guha inka amazi mu gihe zirisha, ibi ngo bifasha mu kongera umukamo.

    Nyuma yo gusura uyu mworozi, abagize iyi Komisiyo bakoranye inama hagamijwe kurebera hamwe imbogamizi zikigaragra mu bworozi n’icyakorwa ngo ziveho.

    Umuyobozi Mukuru Wungirije mu Kigo cy’Igihugu gishinzwe Ubuhinzi n’Ubworozi, Dr Uwituze Solange, yavuze ko muri iyi Ntara ndetse no mu Ntara y’Iburengerazuba ariho hari inzuri nyinshi, bityo ko kugira ngo umusaruro mwinshi kandi mwiza ukenewe uboneke, bisaba ko aborozi borora by’umwuga.

    Ati “ Impamvu twaje kureba urugero rw’ibishoboka hano ni uko mu zindi Ntara abororera mu biraro twamaze gushyiraho akarima k’icyitegererezo ko kaba ari gato kagenewe kwereka umworozi ubwatsi bwiza yatera kuri wa muringoti akabasha kuzamura umukamo, Iburasirazuba ho rero bo bafite aho bororera aho inka zigenda zitari mu biraro, wareba ugasanga bafite umukamo muke ugereranyije n’inka bafite.”

    Guverineri w’Intara y’Iburasirazuba, Gasana Emmanuel yavuze ko kubona umukamo uhagije bisaba ko abaturage borora kinyamwuga.

    Ati “ Hari kubakwa uruganda ruzajya rufata litiro z’amata ibihumbi 500 ku munsi ariko kugeza uyu munsi iyo imvura yaguye ntabwo turenza litiro ibihumbi 160, hari icyo bidusaba rero kugira ngo tubone uwo musaruro dusabwa, biradusaba korora kinyamwuga, tworore mu buryo bw’ubucuruzi, niba ari uburyo bwo korora inka z’inyama hari icyo bidusaba niba ari ukorora dushaka amata hari icyo bidusaba.”

    Guverineri Gasana yavuze ko hari gahunda y’urwuri rw’icyiregererezo muri buri Murenge ndetse no kwegereza aborozi imbuto y’ubwatsi buhunikwa buhabwa amatungo mu gihe cy’izuba, ikazashyirwa ku mirenge guhera mu kwezi kwa Nzeri 2021.

    Yavuze ko basaba aborozi gukoresha 30% y’urwuri mu guhinga ibihingwa bashobora no kubonaho ibisigazwa baha imyaka bigafasha mu kongera umukamo ukenewe muri iyi Ntara.

    Intara y’Iburasirazuba ibarizwamo inzuri ziri ku buso bwa hegitari ibihumbi 100 zikabarizwamo inka zirenga ibihumbi 450 zitanga umukamo wa litiro ibihumbi 160 ku munsi mu gihe cy’imvura.

    Guverineri Gasana yavuze ko urwuri rw’icyitegererezo ruzafasha mu kwihutisha umukamo no kureberwaho n’abandi

    Abayobozi batandukanye barebeye hamwe ibyakorwa kugira ngo umukamo wiyongere

    source : https://ift.tt/3ks0a2l

  • Ngororero: Bane bafashwe bacukura amabuye y’agaciro bitemewe n’amategeko – #rwanda #RwOT

    Bafatiwe mu Karere ka Ngororero, Umurenge wa Gatumba, Akagari ka Bijyojyo, Umudugudu wa Kavumu, bafatanwe ibitiyo 10 n’amajerikani abiri bifashishaga mu gushaka yo mabuye y’agaciro.

    Umuvugizi wa Polisi mu Ntara y’Iburengerazuba, Chief Inspector of Police (CIP) Bonaventure Twizere Karekezi yavuze ko gufatwa kw’abo bantu byaturutse ku makuru yatanzwe n’abaturage bavuga ko hari abantu bangiza ibidukikije mu mugezi bigatuma imirima yabo itembanwa n’isuri.

    CIP Karekezi yagize ati” Bariya bantu iyo barimo gushaka amabuye muri uriya mugezi hari ukuntu bagomera amazi bakayayobya, banarimbura imigano yatewe ku nkombe z’imigezi bagashakamo amabuye y’agaciro. Ibi byose nibyo bituma iyo imvura iguye haba isuri igateza inkangu ikanatembana imirima y’abaturage, abaturage baje kutugezaho icyo kibazo twihutira kubikurkirana nibwo hafashwe bariya bane.”

    CIP Karekezi yakomeje avuga ko usibye no kuba bangiza ibidukikije, bariya bantu bakora ibitemewe n’amategeko. Abaturage bagirwa inama yo kwisunga ba rwiyemezamirimo bafite ibyagombwa bakabaha akazi cyangwa nabo bakibumbira hamwe mu mashyirahamwe bagasaba ibyangombwa bibemerera gucukura amabuye y’agaciro.

    At “Buriya bucukuzi bunyuranijwe n’amategeko buhombya igihugu ndetse na ba rwiyemezamirimo kuko ababukora nta misoro bishyura. Tubagira inama yo gushaka ibyangombwa bibemerera gucukura amabuye y’agaciro cyangwa bakajya gusaba akazi mu sosiyete abifitiye ibyangombwa.”

    CIP Karekezi yakomeje avuga ko buriya bucukuzi bwa rwihishwa buhitana ubuzima bw’abababukora cyangwa bakahakura ubumuga. Muri Nyakanga uyu mwaka hari abaturage 5 bo mu Murenge wa Ndaro nawo wegeranye n’uwa Gatumba bagwiriwe n’ikirombe bitaba Imana biturutse ku kuba barimo gucukura rwihishwa.

    Bane bafashwe ndetse n’ibyo bafatanwe birimo ibitiyo 10, amajerikani 2 ’amatiyo 2 manini bifashisha bayobya amazi bashyikirijwe Urwego rushinzwe ubugenzacyaha (RIB) rukorera muri sitasiyo ya Polisi ya Gatumba kugira ngo hakorwe iperereza.

    Bahise bashyikirizwa RIB ngo hakorwe iperereza ku byaha bashinjwa

    source : https://ift.tt/3Dg1Apg

  • Dore bimwe mu bimenyetso 9 simusiga bishobora kukwereka ko umukunzi wawe atakikwiyumvamo #rwanda #RwOT

    Nta bidasanzwe akora mu rukundo rwanyu

    Urukundo rurangwa n'ibintu bidasanzwe, ari na byo bituma ruryoha. Kimwe mu bizakwereka ko umuntu mukundana atangiye kureba ahandi ni uko uzasanga ibintu birimo gutanga impano n'utundi tuntu yari asanzwe akora abihagarika nta mpamvu ifatika, nk'ikibazo yagize mu kazi cyangwa ibihe bitoroshye runaka, ukabona aretse ibintu byose mu buryo udashobora gusobanura.

    Yigira ntibindeba

    Abantu babiri bakundana baba bakwiye gufatanya ibikorwa bitandukanye kugira ngo urukundo rwabo rurusheho kugenda neza. Iyo uwo muri kumwe ubona nta kintu yitayeho, ari wa muntu uhamagara gusa we ntabikore, umuntu utagufasha mu bibazo runaka ufite n'ibindi nk'ibyo, ujye utangira kugira amakenga umuganirize umenye impamvu, kuko ni ikimenyetso kitari cyiza cy'umubano wanyu.

    Ntabwo akwereka amarangamutima y'urukundo

    Urukundo si ikintu wafata cyangwa ngo urebe ahubwo rugaragarira mu marangamutima yanyu mwembi. Nubona umukunzi wawe nta marangamutima adasanzwe akwereka, ukabona ntaho utandukaniye n'abandi bantu basanzwe kuri we, ujye umenya ko ibyo akubwira by'uko agukunda bikeneye gusuzumanwa ubushishozi.

    Arajarajara

    Umuntu ugukunda bya nyabyo, ubona ari wowe gusa ahanze amaso ndetse ibyo akora ubona ari wowe byibandaho. Niba umukunzi wawe akwereka urukundo rudasanzwe uyu munsi, ejo ukabona ntarwo cyangwa ararwerekeza ahandi, ugomba gutangira kugira amakenga.

    Ahora yisegura ku makosa ye

    Umuntu muri kumwe mu rukundo ukabona buri gihe mwagiranye gahunda ntiyayubahirije, ahubwo afite impamvu zidashira zabimuteye. Ujye ugira amakenga kuko hari ubwo aba adashaka kubikora kuko atagukunda, ugomba kugenzura niba impamvu zibimutera zumvikana cyangwa ari uburyo bwo kukwibuza gahoro gahoro.

    Ashaka ko umukorera byinshi we ntacyo akora

    Umuntu utagukunda bya nyabyo, iteka ryose aba afite ibyo agusaba n'ibyo ashaka ko umukorera, ariko ugasanga we ntacyo yaguha. Aba yifuza ko wamuhora iruhande, ariko wowe wamushaka ntumubone. Ibi bizakwereka ko atagukunda ahubwo hari inyungu runaka agukurikiyeho.

    Nk'urugero ashobora kukuburira umwanya mu gihe umukeneye, ariko yaba agukeneye agakora uko ashoboye akabona uwo mwanya ndetse ugasanga yabishyizemo imbaraga. Ushobora kumusaba ko mujyana gusenga akabyanga, ariko yaba ashaka ko muryamana agakora ibishoboka byose mukabonana.

    Igihe cyose umuntu akoresha imbaraga zidasanzwe akwifuza ariko ntazikoreshe umwifuza, ugomba gutangira kumugiraho amakenga.

    Urukundo rwanyu ntabwo arugira ikintu cy'ibanze mu buzima bwe

    Iyo umuntu aha ikintu agaciro, abigaragariza ku mwanya agiha, niba umuntu avuga ko agukunda, ariko ukabona nta mwanya aguha, ni ngombwa ko wibaza kuri urwo rukundo. Ubundi umuntu ugukunda yagakwiye kukubonera umwanya, nubwo utaba uwo kubonana imbonankubone ariko mukaba mwaganira birambuye kuri telefoni n'ibindi nk'ibyo.

    Arikunda cyane

    Umukunzi wawe niba ubona ahora aharanira inyungu ze mu rukundo, ukabona icyo agusabye arifuza ko kigerwaho ariko wowe icyo umusabye akitarutsa, ukwiye gutangira kugira amakenga. N'iyo byaba bigoye ko icyo usabye ukibona buri gihe, hari ubwo umuntu yigomwa agakora ikintu runaka kubera urukundo agufitiye, ibyo bikwereka ko agufite ku mutima bitari ibyo kubeshya.

    Aba afite abandi bagabo/abagore bakururana cyane

    Niba ufite umukunzi akaba afite abandi bantu ubona bakundanye cyane ndetse washaka no kwinjira mu mubano wabo ukabona biramubabaje, ujye umenya ko ukwiye gukurikirana iby'uwo mubano wo ku ruhande, kereka iyo ari inshuti uzi.

    Mu rukundo, ikintu cya mbere ni ibiganiro, niba ubona ibi bimenyetso ku mukunzi wawe, mbere y'uko ufata umwanzuro uwo ari wo wose, ni ngombwa kubanza kuganira n'umukunzi wawe, ukamubaza uko ibintu bimeze, byaba ari ibisobanuro ukeneye ukabisaba kandi ukanyurwa.

    Mu gihe rero abantu bakundana batajya baganira ku ngingo zikomeye zirimo ibyo babona bitagenda mu rukundo rwabo, haba hari amahirwe ko ibyo bari gukora bizarangira nabi kuko umuntu umwe yishyiramo ibintu runaka, atabona ibisobanuro byabyo akabifata nk'ukuri bikazarangira bibaye agatotsi mu mubano wanyu.

    Source : https://umuryango.rw/ubuzima-115/udushya/article/dore-bimwe-mu-bimenyetso-9-simusiga-bishobora-kukwereka-ko-umukunzi-wawe

  • Kamonyi: Urubyiruko rwa SEVOTA rwasabwe kuba nk'itara rimurika amanywa n'ijoro muri rugenzi rwarwo #rwanda #RwOT

    Ni ubutumwa urubyiruko rw'abasore n'inkumi 94 ba SEVOTA bahawe n'umuyobozi w'agateganyo w'Akarere ka Kamonyi, nyuma y'iminsi itatu y'itorero bahurijwemo. Ni urubyiruko rudahuje amateka imiryango yabo yanyuzemo mu gihe cya Jenoside yakorewe Abatutsi. Bamwe bakomoka kuri ba Nyina baturuka mu miryango y'abarokotse Jenoside, mu gihe ba Se atariko bimeze. Basabwe kuba urugero rwiza mu bandi, gukunda Igihugu no kukirwanira ishyaka, kuba nkore neza bandebereho, haba aho batuye, aho bakorera n'aho bagenda.

    Tuyizere Thaddee, Umuyobozi w'agateganyo w'Akarere ka kamonyi waje gusoza iri torero, yasabye uru rubyiruko uko ari 94 kudapfusha ubusa amahirwe nk'aya bahawe yo kuba hamwe bakiga ibyabafasha mu kwiteza imbere no guteza imbere Igihugu. Yabasabye kugaragaza impinduka aho batuye, aho bagenda n'aho bakorera, abababona bakabigiraho ibyiza.

    Meya Tuyizere asaba urubyiruko kuba urugero rwiza hose.

    Yabibukije ko ari imbaraga z'Igihugu kandi zubaka, abasaba kubyaza umusaruro amahirwe Igihugu cyabashyize imbere, bakagira imibereho myiza, bagateza imiryango yabo imbere bihereyeho. Yabasabye ati' Nutekereza, utekereze nk'Umunyarwanda, nukora ukore nk'Umunyarwanda, nurota urote nk'umunyarwanda. Mube nk'itara bacanye rimurika amanywa n'ijoro, mu murikira bagenzi banyu'.

    Mukasarasi Godeliva, azwi cyane ku kazina ka Mama Mukuru akaba ariwe washinze umuryango SEVOTA (Solidarité pour l'Épanouissement des Veuves et des Orphelins visant le Travail et l'Auto-promotion), umuryango w'Ubufatanye mu kubungabunga ubwisanzure bw'abapfakazi n'impfubyi binyuze mu murimo no kwiteza imbere, avuga ko itorero nk'iri ryahereye ku babyeyi b'aba bana badahuje amateka ya Jenoside.

    Mukasarasi Godeliva, bakunze kwita Mama Mukuru.

    Bitewe n'amakimbirane yakunze kuranga imiryango bakomokamo, aho ngo ababyeyi b'abagabo akenshi wasangaga aribo ba nyirabayazaba, abana ugasanga babuze uruhande babamo, umuryango SEVOTA wahisemo guhugura ba Se na ba Nyina ku ikubitiro, hanyuma hakurikiraho urubyiruko, umwana mu kuru muri urwo rugo kugira ngo abe umutoza w'abandi, hagamijwe kugira umuryango uharanira iterambere n'ineza ya bose. Ashimangira ko nka SEVOTA baharanira gufasha akarere mu kubaka ingo z'amahoro, ingo zifite icyerecyezo cy'ejo heza, agasaba uru rubyiruko kuba intumwa nziza no kudapfusha ubusa amasomo bahawe.

    Uko ari 94, mu masomo bahawe muri iyi minsi itatu, ashingiye ahanini ku kwiyubaka ubwabo, kubaka Igihugu, kugikunda no kugikorera. Bigishijwe kandi kuri Gahunda ya Ndumunyarwanda, Ubumwe n'Ubwiyunge, Gukemura amakimbirane, Gukumira no kwirinda ihohoterwa mu buryo bwose, Indangagaciro zikwiye kubaranga, Gukora bakiteza imbere n'ibindi.

    Urubyiruko mu cyumba cy'inama cy'ishuri rya ESB Kamonyi.

    Kwizera Jean Claude, umwe mu bitabiriye iri torero avuga ko mubyo yize ndetse akabasha gusobanukirwa harimo; Gahunda ya Ndumunyarwanda, Gukunda Igihugu, Ibikorwa bakora nk'urubyiruko mu kwiteza imbere, Gukorera hamwe no Kwizigama, kurwanya imirire mibi, kugira isuku aho baba, kurwanya inda ziterwa abanyavu, kurwanya ihohoterwa rishingiye ku gitsinda n'irindi ryo mu buryo bwose, kurwanya ibyaha bitandukanye mu muryango nyarwanda n'ibindi. Ashimangira kandi ko amasomo bahawe azayabyaza umusaruro akiteza imbere, akabera abandi urugero.

    Niyomuhuza Joseline, umwe muri aba 94 bahuguwe ashima umuryango SEVOTA kuba warabatekerejeho nk'urubyiruko, bagahurizwa hamwe hagamijwe kubafasha kwiyubaka no kubaka Igihugu gishingiye ku muryango muzima. Avuga ko mu byamunyuze harimo gusobanukirwa amateka y'u Rwanda, inyigisho zo Gukunda Igihugu no kukirinda, Gukumira no kurwanya ibyaha, imyitwarire mbonera mu rubyiruko, kugira amagara mazima, Guharanira kugira umuryango ntangarugero aho kurangwa n'amakimbirane awudindiza mu kwiteza imbere n'ibindi. Ahamya ko nk'urubyiruko bashyize hamwe bashobora guhindura byinshi mu rubyiruko, bakiteza imbere, bakubaka icyizere cy'ejo heza muri bo ubwabo no muri bagenzi babo.

    Urubyiruko rwahawe ibitabo bikubiyemo amasomo azarufasha kwihugura no kwigisha abandi.

    Mu gusoza amasomo, uko baturutse mu mirenge 12 ibize akarere ka kamonyi, abahagarariye amatsinda buri umwe yahawe amafaranga y'u Rwanda ibihumbi 60 byo kumufasha gutangira umushinga wo kwiteza imbere, bahawe kandi ibitabo birimo inyigisho zizabafasha kwihugura no kwigisha bagenzi babo. Ababyeyi babo nabo babanje guhugurwa bahawe ibihumbi 100 nk'igishoro baheraho biteza imbere.

    Urubyiruko rwahawe impamba y'ibihumbi 60 nk'igishoro cyo gutangiza umushinga.

    Munyaneza Theogene / intyoza.com

    Source : https://www.intyoza.com/kamonyi-urubyiruko-rwa-sevota-rwasabwe-kuba-nkitara-rimurika-amanywa-nijoro-muri-rugenzi-rwarwo/

  • Agezweho ku Isoko ry’abakinnyi mu Rwanda: Niyonzima Olivier Seif, Emery, Kevin, Bakame… #rwanda #RwOT

    Isoko ry’abakinnyi mu Rwanda ririmo kugenda rigana ku musozo, ndetse abenshi bahamya ko benshi mu bakinnyi beza bamaze bamaze kugurwa, abasigaye ni ababa batarahitamo neza aho bazerekeza.

    Amakipe menshi yagiye yumvikana ku isiko ry’igura hano mu Rwanda, ariko hari nk’ayatereye agati mu ryinyo utamenya icyo atekereza nka Mukura VS.

    Muri iyi nkuru ntabwo turi buvuge ku bakinnyi baguzwe, ahubwo turagaruka kubo amakipe ashobora gusinyisha.

    Niyonzima Olivier Seif: Ni umukinnyi ukina hagati mu kibuga uherutse kurekurwa n’ikipe ya APR FC nyuma y’iminsi mike ayongereye amasezerano. Kuba nta kipe arasinyira si uko yayibuze ahubwo aracyatekereza iyo azerekezamo hagati ya Rayon Sports na Police FC.

    Abamwegereye bavuga ko umutima we uri muri Rayon Sports yandikiyemo izina ariko kuba iyi kipe itarabona amafaranga miliyoni 18 bumvikanye ko azagurwa, bishobora kumuhatiriza gusinyira Police FC imwifuza ndetse yiteguye no guhita yishyura, amakuru avuga ko akiva mu ikipe y’igihugu Rayon Sports niba itarabona amafaranga azahita asinyira Police FC.

    Amahirwe menshi ni uko Seif azerekeza muri Police FC

    Emery Bayisenge: Ni myugariro wo mu mutima w’ubwugarizi wasoje amasezerano mu ikipe ya AS Kigali ariko akaba atifuza kongerera iyi kipe amasezerano n’ubwo yo imwifuza cyane. Uyu mukinnyi uri mu ikipe y’igihugu na we isaha n’isaha yasinyira Police FC.

    Emery Bayisenge na we ashobora kujya muri Police FC

    Ndayishimiye Eric Bakame: Ni umwe mu banyezamu bafite ubunararibonye, ndetse akaba ari na we mukinnyi mu bagikina ufite agahigo ko kuba ari we wegukanye ibikombe 3 bya shampiyona mu makipe 3 atandukanye(Atraco FC, APR FC na Rayon Sports), uyu munyezamu wasoje amasezerano muri AS Kigali, amakuru yagiye amugarura muri Rayon Sports yahozemo, ariko ubu bisa n’ibigoranye bitewe n’uko iyi kipe yagaruye Kwizera Olivier wari warasezeye ruhago, gusa mu gihe bahitamo kumurekura nibwo Bakame yasinyira iyi kipe.

    Andi makuru avuga ko uyu munyezamu w’ikipe y’igihugu Amavubi, kuri miliyoni 10 ashobora kwerekeza muri Musanze FC.

    Bakame kugeza ubu ntaramenya aho azerekeza

    Kevin Muhire: Kugeza ubu nyuma yo gusoza amasezerano y’amezi abiri yari yasinyiye Rayon Sports nta yindi kipe arasinyira. Iyi kipe yashatse kumwongerera amasezerano ayibwira ko baba bitonze kuko hari ikipe yo hanze y’u Rwanda bari mu biganiro, biramutse byanze ngo nibwo azabasinyira, yari yatanze kugeza tariki ya 31 Nyakanya 2021. Uyu musore nta yindi kipe yo mu Rwanda bigeze bagirana ibiganiro uretse APR FC byigeze kuvugwa ko imushaka, gusa bisa nk’aho nta byari bihari.

    Mu gihe cyose yakina mu Rwanda, uyu musore ni uko amahirwe menshi azakinira ikipe ya Rayon Sports cyane ko na we ayikunda.

    Nta gihindutse Muhire Kevin azongera amasezerano muri Rayon Sports

    Niyibizi Vedaste: Niyibizi Vedaste yari asoje amasezerano mu ikipe ya Sunrise FC yamanutse mu cyiciro cya kabiri. Uyu mukinnyi ashobora kwerekeza muri Mukura VS aho umutoza Ruremesha Emmanuel yamweretse ko amushaka.

    Niyibizi Vedaste asoje amasezerano muri Sunrise, ashobora kwerekeza muri Mukura VS

    Kayumba Soter: Kayumba Soter na we nyuma yo gusoza amasezerano muri Rayon Sports, umwaka w’imikino wa 2021-22 nta gihindutse azaba ari umukinnyi wa Mukura VS.

    Kayumba Soter ashobora kwerekeza muri Mukura VS

    Nzayisenga Jean d’Amour: ni umukinnyi ukina ku ruhande rw’iburyo yugarira. Ubu ni umukinnyi wa Sunrise FC aho asigaranye umwaka umwe w’imikino. Ari mu biganiro n’iyi kipe ngo ibe yamurekura aho ashobora guhita yerekeza muri Rayon Sports yatwaranye nayo igikombe cya shampiyona 2016-2017 itozwa n’umutoza Masudi Djuma n’ubundi wagizwe umutoza w’iyi kipe.

    Meya ashobora gusubira muri Rayon Sports

    Source : http://isimbi.rw/siporo/article/agezweho-ku-isoko-ry-abakinnyi-mu-rwanda-niyonzima-olivier-seif-emery-kevin-bakame

  • Rubavu: Abahinzi b’icyayi barasaba gukurirwaho imisoro bakwa ku butaka butari ubwabo #Rwanda #RwOT via @kigalitoday #rwanda #RwOT

    Basaba gukurirwaho umusoro w
    Basaba gukurirwaho umusoro w’ubutaka bwo mu bishanga kuko ari ubwa Leta

    Kuva uyu mwaka wa 2021 watangira, abahinzi b’icyayi mu Karere ka Rubavu batangiye guhamagarwa n’ikigo cy’igihugu gishinzwe imisoro n’amahoro RRA, kibasaba kwishyura ibirarane by’imisoro y’ubutaka bafite.

    Bamwe babwiwe ko bafite umwenda w’umusoro urenga miliyoni ebyiri, abandi eshatu, mu gihe hari n’abavuga ko imisoro basabwa iruta kure imitungo batunze.

    Hitimana Gregoire ni umuhinzi w’icyayi mu Murenge wa Nyundo akaba yarasabwe kwishyura umusoro wa miliyoni n’igice, ariko hajyaho ubukererwa umwenda ukaba miliyoni ebyiri zirenga.

    Agira ati “Iby’umusoro nabimenye tariki 26 Kmena 2021, ubwo nahamagawe n’umukozi wa RRA ambaza ibirarane by’umusoro mfite, mubwira ko nta birarane by’imisoro uretse akabanza gato kandi ntabirarane mfite. Yatangiye kubwira ibibanza mfite ntarasorera muhakanira ko ntabyo, ansaba kujya ku murenge bakamfasha, nibwo nagezeyo batangira kubwira ubutaka budasoreye, nsanga ni aho duhinga icyayi”.

    Hitimana avuga ko ubutaka asabwa gutangira umusoro ari ubuteyeho icyiyi kandi bukaba buri mu gishanga, ibintu avuga ko binyuranye n’amategeko avuga ko ibishanga ari ibya Leta.

    Agira ati “Ibyayi ni ibyacu, imbuto ni iyacu, ariko ubutaka ni ubwa Leta, igihe yashakira ibonye umushoramari urenze icyayi yahasubirana. Ntitwiyumvisha ukuntu dusabwa gusorera ubutaka butari ubwacu kuko n’umubitsi w’impapuro yatubwiye ko kuduha ibyangombwa byo mu gishanga habaye kwibeshya ndetse bamwe muri twe ntabyo bahawe”.

    Iki kibazo cy’umusoro wakwa abahinzi b’icyayi mu Karere ka Rubavu, abahinzi bafite icyayi mu karere ka Rutsiro bo bavuga ko ntacyo bafite, Hitimana avuga ko nyirabayazana ari ababaruye ubutaka.

    Ati “Ababaruye ubutaka ni bo bakoze amakosa, kuko ubwo nari ku Murenge wa Kanama bambwiye ibibanza ngomba gusorera nkasanga byanditsweho inganda, ubukerarugendo ahandi ubukungu aho kwandika ko ari ubutaka bukorerwaho ubuhinzi”.

    Nsengimana Jonathan, umucungamutungo wa Koperative y’abahinzi b’icyayi cya Pfunda, avuga ko icyo kibazo bagishyikirijwe n’abanyamuryango kandi bagikoreye ubuvugizi ku karere binyuze mu nama njyanama.

    Agira ati “Twakiriye ikibazo cy’abahinzi b’icyayi kandi tubona ko amakosa yakozwe mu gihe cyo kwandika ubutaka, aho ubuhinzeho icyayi bwagiye bwandikwaho ubukerarugendo, inganda n’ubukungu bituma RRA ibubarira imisoro iri hejuru. Gusa iki kibazo twakibonye mu Karere ka Rubavu kuko muri Rutsiro tuhafite abahinzi b’icyiyi ariko bo nta kibazo bafite”.

    Umwanzuro w’inama njyanama y’Akarere ka Rubavu yateranye tariki 29 Kamena 2021 yasabye ubuyobozi bw’ako karere gukosora amakosa yakozwe n’ibiro by’ubutaka ku nyito yahawe imikoreshereze y’ubutaka itajyanye n’igishushanyo mbonera cy’imikoreshereze y’ubutaka mu Karere ka Rubavu, aho ibyangombwa by’ubutaka bwanditsweho ubukerarugendo, inganda, n’ibindi mu by’ukuri ari ubutaka bwagenewe ubuhinzi.

    Inama njyanama yasabye ko abaturage bafite ibyangombwa biriho amakosa bigomba gukosorwa kandi abaturage ntibagire andi mafaranga bacibwa, kuko amakosa yakozwe n’ibiro by’ubutaka.

    Umwanzuro ugira uti “Mu gihe cy’umwaka umwe uhereye igihe umwanzuro ufatiwe, ubuyobozi bw’Akarere ka Rubavu bukemure ibibazo byose by’abaturage bafite ibyangombwa by’ubutaka byahawe inyito itandukanye n’igishushanyo mbonera, bubarinda guhora basiragira mu buyobozi kandi bakabikora nta kiguzi cya serivisi basabwe, ndetse bakurirweho imisoro yose yabanditsweho mu gihe ubutaka bwabo bwahawe inyito y’imikoreshereze yabwo itajyanye n’igishushanyo mbonera”.

    Kigali Today yamenye ko abaturage barenga 200 bafite iki kibazo, n’ubwo bandikiye inzego zitandukanye ngo iyi misoro ntirakurwaho, bakavuga ko aho gutanga iyi misoro bareka guhinga icyayi kuko amwe mu mafaranga bishyuzwa ku mwaka batayasoroma mu cyayi mu mwaka, ibintu bavuga ko baba bakorera mu gihombo.


    source : https://ift.tt/3yklQlZ

  • RDC ihanganye n’ikiyobyabwenge gishya cyiswe ‘Bombe’ #Rwanda #RwOT via @kigalitoday #rwanda #RwOT

    Bivugwa ko ari ibiyobyabwenge bikozwe mu bisigazwa bituruka mu matiyo yo munsi y’imodoka asohora umwuka usa nabi.

    Ni ikiyobyabwenge cyiswe bombe gikozwe mu ruvangitirane rw’ibintu byinshi birimo n’imiti icuruzwa muri za farumasi.

    Bamwe mu bafashwe kuri uyu wa kane tariki 26 Kanama 2021, babwiye ibiro ntaramakuru AFP ko ari abere kuko bisanze bari ahantu hanywererwaga ibyo biyobyabwenge ariko bo batabizi.

    Umuyobozi wa polisi mu itsinda rishinzwe kurwanya ibyaha muri RDC, Alphonse Landu, yatangaje ko bafashwe mu gikorwa barimo cyo gukurikirana abacuruza ibiyobyabwenge mu murwa mukuru Kinshasa, nk’uko urubuga rwa Actualité muri Kongo rubitangaza.

    Minisiteri y’Ubuzima muri DRC ngo ihangayikishijwe n’urubyiruko rurimo kunywa ibiyobyabwenge, by’umwihariko igishya cyiswe bombe nk’uko bitangazwa na BBC.

    source : https://ift.tt/38ktzpw