Webrwanda Backend

Blog

  • Chorale de Kigali yongeye gutegura igitaramo kiba mu mpera za buri mwaka, icya 2021 kizabera muri Kigali Arena mu kwezi k'Ukuboza #rwanda #RwOT

    Umuryango Cholare de Kigali umaze kuba ubukombe hano mu Rwanda kubera ubuhanga ndetse n'ubushobozi bwo kuririmba no gushyira mu bihe byiza ababa bitabiriye ibirori iyi Korari iba yateguye yongeye gutegura igitaramo ngarukamwaka.

    Iyi Chorale de Kigali isanzwe ikorera umurimo w'Imana mu itorero ry'abakatorike ryongeye gutegura igitaramo gisanzwe kiba mu mpera z'umwaka, biteganyijwe ko iki gitaramo kizaba mu mpera z'ukwezi k'Ukuboza ku itari ya 19 kizabera muri Kigali Arena.

    Nk'uko byamaze gushyirwa hanze n'abategura iki gitaramo binyuze ku nteguza y'iki gitaramo igaragazako iyi korari igitaramo cy'uyu mwaka kizaba ku itariki ya 19 ukuboza 2021.

    Nubwo ntamakuru ahagije arashyirwa hanze n'abategura iki gitaramo, ikinyamakuru RUSHYASHYA cyamenye ko kirimo gutegurwa n'iyi Chorale binyuze muri La beauté du son pour des âmes kizaba mu masaha y'igicamunsi cyo ku munsi wo ku cyumweru.

    Iyi chorale de Kigali isanzwe ari umuryango udaharanira inyungu imaze imyaka 56 ibayeho dore ko yashinzwe mu mwaka wa 1966, ubona ubuzima gatozi mu 1987 ndetse ubwo buzima gatozi bukaba bwaravuguruwe mu 2011.

    Amateka ya Chorale de Kigali agaragaza ko yatangijwe n'abahanga muri muzika bari barabyize mu mashuri ya seminari n'ahandi harimo nka Saulve Iyamuremye, Matayo Ngirumpatse, Paulin Muswahili, Celestin Nkaka, Heneriko Nzajyibwami, Stanislas Karangwa n'abandi benshi.

    The post Chorale de Kigali yongeye gutegura igitaramo kiba mu mpera za buri mwaka, icya 2021 kizabera muri Kigali Arena mu kwezi k'Ukuboza appeared first on RUSHYASHYA.

    Source : https://rushyashya.net/chorale-de-kigali-yongeye-gutegura-igitaramo-kiba-mu-mpera-za-buri-mwaka-icya-2021-kizabera-muri-kigali-arena-mu-kwezi-kukuboza/?utm_source=rss&utm_medium=rss&utm_campaign=chorale-de-kigali-yongeye-gutegura-igitaramo-kiba-mu-mpera-za-buri-mwaka-icya-2021-kizabera-muri-kigali-arena-mu-kwezi-kukuboza

  • Batanu bafashwe bakekwaho kwiba ibikoresho bitanga amashanyarazi mu ngo z’abatishoboye – #rwanda #RwOT

    Mu Karere ka Gatsibo hafashwe babiri naho mu Karere ka Ruhango hafatiwe batatu kuri uyu wa Gatatu tariki ya 10 Ugushyingo 2021.

    Umuvugizi wa Polisi mu Ntara y’Iburasirazuba, Chief Inspector of Police (CIP) Hamdun Twizeyimana yavuze ko kugira ngo bafatwe byaturutse ku makuru yatanzwe n’abaturage.

    Yagize ati “Abaturage bo mu Karere ka Gatsibo, Umurenge wa Kabarore, Akagari ka Murambi baduhaye amakuru bavuga ko hari abantu binjiye mu mazu yabo biba batiri zitanga ingufu z’amashanyarazi aturuka ku zuba barimo guhabwa na Polisi y’u Rwanda muri iyi minsi dutangira iperereza.”

    Umwe mu bafashwe yavuze ko mu kwiba izo bateri yacunze ba nyir’urugo bagiye mu mirima yica amadirishya y’inzu ajya mu nzu azikuramo. Imwe yayigurishaga amafaranga y’u Rwanda ibihumbi 7 500.

    Umuvugizi wa Polisi mu Ntara y’Amajyepfo, Superintendent of Police (SP) Theobald Kanamugire yavuze ko mu Karere ka Ruhango hari uwafashwe nijoro avuye kumanura imirasire y’izuba (Solar Panels) ku mazu y’abaturage.

    Yafatanwe imirasire itatu na batiri imwe, amaze gufatwa hakomeje iperereza hafatwa n’abandi babiri buri umwe afatanwa umurasire umwe.

    SP Kanamugire yaboneyeho gukangurira abantu kwirinda ubujura, abasaba gufata neza ibikorwaremezo Leta igenda igeza ku baturage.

    Ati “Biriya bikorwa birimo kwibwa ni ibyo Leta igenda igeza ku miryango itishoboye mu rwego rwo kuyifasha kwiteza imbere. Biragayitse kuba hari abanyura inyuma bakajya kubyiba bakabigurisha, ariko ababikora bose bamenye ko bazajya bafatwa bakabihanirwa.”

    Yakomeje agira inama abaturage kumenya ko bafite inshingano zo gucunga umutekano w’ibikorwa Leta igeza ku baturage baramuka hari uwo babonye abyangiza bakihutira gutanga amakuru.

    Abafashwe bahise bashyikirizwa Urwego rw’Ubugenzacyaha (RIB) kugira ngo bakurikiranwe mu mategeko.

    Itegeko no 68/2018 ryo kuwa 30/08/2018 ingingo ya 166 ivuga ko Umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe ariko kitarenze imyaka ibiri n’ihazabu y’amafaranga y’u Rwanda atari munsi ya miliyoni imwe ariko atarenze miliyoni ebyiri, imirimo y’inyungu rusange mu gihe cy’amezi atandatu cyangwa kimwe gusa muri ibyo bihano.

    Ingingo ya 167 y’iri tegeko ivuga ko ibihano ku cyaha cyo kwiba byikuba kabiri iyo uwibye yakoresheje guca icyuho, kurira cyangwa yakoresheje igikoresho icyo aricyo cyose gifungura aho utemerewe kwinjira, kwiba byakozwe mu nzu ituwemo cyangwa isanzwe ibamo abantu cyangwa mu nyubako ziyikikije, kwiba byakozwe nijoro, kwiba byakozwe n’abantu barenze umwe.

    Abakekwaho ubujura bw’ibikoresho bitanga ingufu zikomoka ku mirasire y’izuba mu Turere twa Ruhango na Gatsibo

    source : https://ift.tt/3Dc3Ux4

  • Kibeho: Ishuri ryisumbuye ryujuje amacumbi y’abanyeshuri n’abarimu azafasha kuzamura ireme ry’uburezi – #rwanda #RwOT

    Amacumbi y’abanyeshuri agizwe n’inyubako ebyiri z’amagorofa zatwaye amafaranga y’u Rwanda angana na miliyari n’igice, zatangiye kubakwa muri Kanama 2019.

    Umuyobozi w’iri shuri, Soeur Uwizeramariya Marie Brigitte, yavuze ko izo nyubako zirimo ibyangombwa byose ku buryo abanyeshuri nibatangira kwiga bazajya baryama ahantu heza kandi bisanzuye.

    Ati “Zizajya zicumbikamo abana nka 350. Abanyeshuri twiteguye kubakira neza kuko ibyangombwa byose turabifite, nta kibazo dufite cyo kwakira abanyeshuri.”

    Iri cumbi ryubakiwe abanyeshuri nyuma y’uko andi bacumbikagamo yari amaze gusaza kuko ahamaze imyaka igera kuri 50.

    Abarimu bigisha kuri iryo shuri bagera kuri 23 na bo bubakiwe amacumbi ashobora kubakira bose, agizwe n’inyubako igeretse rimwe, akazaba afite ibyangombwa birimo amazi, amashashanyarazi na internet.

    Yatangiye kubakwa mu muri Gashyantare 2021 bikaba biteganyijwe ko bazatangira kuyacumbikamo mu gihembwe cya kabiri cy’uyu mwaka w’amashuri.
    Umwe muri bo witwa Musabyimana Corneille yavuze ko we na bagenzi be basanzwe bacumbika muri kilometero imwe uvuye ku ishuri.

    Ni ahantu avuga ko hatakiberanye n’umwarimu ukeneye gutegura amasomo ye kandi n’umutekano w’ibyo bahasiga na wo wari muke.

    Ati “Hari amacumbi y’abarimu ariko ntabwo twese dukwiramo; asa n’aho yari anashaje kuko ni amazu amaze igihe ku buryo n’ibikrwaremezo nk’amatara n’ibijyanye n’umutekano waho iyo twaje ku kazi ku bikoresho tuba twasize hari n’igihe dusanga babyangije cyangwa babitwaye.”

    We na bagenzi be bishimira ko amacumbi mashya bubakiwe ku ishuri bazatangira kubamo mu gihembwe cya kabiri, ameze neza kandi azabafasha gutegura neza amasomo.

    Bamwe mu banyeshuri bavuze ko kuba abarimu na bo bubakiwe amacumbi meza, bizazamura imyigire yabo cyane cyane mu gutegura amasomo no kugerera ku kazi igihe.

    Kubaka iryo cumbi babitewemo inkunga n’Abanyamerika, David Stirling n’umugore we Laurea Stirling babisabwe n’Umunyarwandakazi Iribagiza Immaculata ukomoka i Kibeho.

    Ubusanzwe GS. Mère du Verbe Kibeho yigamo abanyeshuri 683 barimo abakobwa 500.

    Abanyeshuri bishimira ko bacumbika ahantu heza hafite isuku

    Iri cumbi ry’abanyeshuri ryatangiye kubakwa muri Kanama 2019

    Kubaka iri cumbi babitewemo inkunga n’Abanyamerika David Stirling n’umugore we Laurea Stirling babisabwe n’Umunyarwandakazi Iribagiza Immaculata ukomoka i Kibeho

    Ni icumbi ryubakiwe abanyeshuri nyuma y’uko andi bacumbikagamo yari amaze gusaza kuko ahamaze imyaka igera kuri 50.

    [email protected]

    source : https://ift.tt/30dxCmP

  • BNR yatanze umuburo ku bakoresha amafaranga y’ikoranabuhanga arimo ‘Bitcoin’ – #rwanda #RwOT

    Muri Kamena 2021 nibwo bwa mbere Banki Nkuru y’u Rwanda yatangaje ko iri gusuzuma niba ari ngombwa ko u Rwandaruyoboka inzira yo gukoresha ‘Digital Currency’.

    ‘Digital Currency cyangwa’ se ‘Central Bank Digital Currency (CBDC)’ ni ifaranga ry’ikoranabuhanga rikoreshwa mu kugura ibintu cyangwa serivisi kuri internet ariko rikaba ritahindurwa mu mafaranga afatika.

    Bitandukanye n’ubundi bwoko bw’amafaranga buzwi nka ‘Crypto Currency’ ari na bwo bubarizwamo Bitcoin, aya mafaranga yo agenzurwa na Banki Nkuru y’Igihugu mu gihe andi ashobora kugenzurwa n’ubonetse we. Ibi bituma ikoreshwa rya Central Bank Digital Currency ritagira ingaruka zikomeye ku bukungu nk’uko bigenda kuri Bitcoins.

    John Rwangombwa yavuze ko kugeza ubu hatarafatwa umwanzuro niba u Rwanda ruzakoresha iri faranga ry’ikoranabuhanga cyangwa niba ruzaryihorera kuko byose bikiri mu nyigo.

    Ati “Ibijyanye n’ifaranga ry’ikoranabuhanga rya Banki Nkuru y’Igihugu turimo turabyiga, ntabwo turageraho aho tuvuga ngo tugiye kubitangiza, ku bw’ibyo ntabwo navuga ngo tuzabitangiza ejo cyangwa ejobundi.”

    “Ni ibintu bikiri mu nyigo, iyo nyigo nirangira nibwo tuzafata icyemezo cy’uko twaritangiza tukarikoresha kubera ko rifitiye Abanyarwanda akamaro cyangwa se tugasagasanga bidafitiye ubukungu bwacu n’Abanyarwanda muri rusange tugahitamo kurikoresha.”

    Yakomeje avuga ko ibizava muri iyo nyigo ari byo bizagena ikizakorwa. Ati “Ntabwo rero turavuga ngo tugiye kuritangiza ahubwo turi mu nyigo zo kureba niba rikenewe. Iyo nyigo nirangira nibwo tuzareba tukavuga tuti ’dore akamaro rifite, tugiye kuritangiza dore uko rizakora.”

    Mwitondere ‘Cryptocurrency’

    Central Bank Digital Currency na Cryptocurrency bihuriye ku kuba byose bikoresha ikoranabuhanga rifasha mu gukurikirana ibikorwa by’ubucuruzi bikozwe hifashishijwe internet rizwi nka Blockchain. Gusa kuri Central Bank Digital Currency ibi bikorwa biba biri mu ibanga mu gihe, kuri Cryptocurrency biba biri ku karubanda.

    Hashize iminsi hari ikigo cyitwa ‘Yellow Card’ cyamamaza ko cyatangije ibi bikorwa byo gucuruza aya mafaranga abarizwa muri Cryptocurrency mu Rwanda.

    Abajijwe ku mikoreshereze y’aya mafaranga mu Rwanda, John Rwangombwa yavuze ko kugeza ubu mu Rwanda nta buryo buhari bwo kuyavunja.

    Ati “Cryptocurrency hashize igihe mu Rwanda twaragiriye abantu inama ko bayitondera. Kuko uyu munsi uracuruza ukoresheje iri faranga hanyuma ubigenze gute, nta hantu uzajya mu Rwanda ngo ufate aya mafaranga uyavunjemo Amanyarwanda.”

    Yakomeje avuga ko abashaka kuyacuruza cyangwa kuyagura bakoresheje ikoranabuhanga BNR itababuza ariko yibutsa ko ari ifaranga ririmo ibibazo byinshi.

    Ati “Ariko niba umuntu azajya mu ikoranabuhanga akarigura yarangiza akarigurisha abantu bo hanze bafite uko babigenza ntabwo tuzajya kugenzura uko bikorwa ariko mu Rwanda nta buryo dufite bwo kuvunja iri faranga.”

    Yakomeje asaba Abanyarwanda kwitondera iri faranga. Ati “Ikindi harimo amanyanga menshi cyane ku rwego mpuzamahanga bituma rero twumva ko abantu baryitondera nta bugenzuzi bifite bwimbitse ku rwego mpuzamahanga, ugiye kubijyamo ubwo ni ukwirengera n’ingaruka zabyo.”

    “Nta kibazo turabona uyu munsi cyadutera kubihagarika cyangwa ngo tubirwanye nk’uko hari ibihugu bimwe na bimwe byari byasaze barabirwanya, inama tugira abantu gusa ni uko babyitondera.”

    Impuguke mu bukungu zigaragaza ko hatangiye ikoreshwa ry’ifaranga ry’ikoranabuhanga rigenzurwa na Banki Nkuru y’Igihugu byakuraho impungenge abantu bajyaga bagira mu bijyanye n’ikoreshwa rya Cryptocurrency bumva ko isaha n’isaha bashobora guhomba kandi ntihagire uwo babaza igihombo cyabo.

    Guverineri wa Banki Nkuru y’u Rwanda, John Rwangombwa yasabye Abanyarwanda kwitondera amafaranga y’ikoranabuhanga azwi nka ‘Cryptocurrency’

    source : https://ift.tt/30ffdGr

  • Ndagijimana Juvenal, umwuzukuru wa Rukara rwa Bishingwe yitabye Imana #Rwanda #RwOT via @kigalitoday #rwanda #RwOT

    Ndagijimana Juvenal umwuzukuru wa Rukara rwa bishingwe akaba yari anamenyerewe mu mbyino gakondo
    Ndagijimana Juvenal umwuzukuru wa Rukara rwa bishingwe akaba yari anamenyerewe mu mbyino gakondo

    Amakuru y’urupfu rw’uwo mugabo wari utuye mu Kagari ka Kidakama mu Murenge wa Gahunga mu Karere ka Burera, amenyekanye mu gitondo cyo kuri uyu wa Gatanu tariki 12 Ugushyingo 2021, ubwo abantu bahererekanyaga ubutumwa ku mbuga nkoranyambaga bavuga ku rupfu rwe.

    Umwe mu bari baturanye na Ndagijima, yabwiye Kigali Today ko ngo yaba yazize uburwayi yari amaranye iminsi mike.

    Yagize ati “Ni byo koko Ndagijimana yitabye Imana. Birashoboka ko yaba yapfuye mu masaha ya nijoro kuko ejo numvaga abantu bavuga ko amerewe nabi cyane. Yari amaze iminsi arwaye”.

    Ndagijimana yari azwi cyane mu mbyino gakondo, mu matorero atandukanye harimo n’itorero ry’igihugu (Urukerereza). Abo mu Ntara y’Amajyaruguru, by’umwihariko mu Turere twa Musanze na Burera, bamumenye cyane mu itorero yari yarashinze, ribyina imbyino gakondo, risusurutsa ibirori byaberaga hirya no hino.

    Rukara rwa Bishingwe Ndagijimana Juvenal akomokaho, yamenyekanye mu mateka y’u Rwanda ubwo yicaga umuzungu Rupias bakundaga kwita Rugigana, amwiciye mu Gahunga k’Abarashi, ahagana mu mwaka w’1912, ku bwo kutumvikana hagati y’abo bombi, bitewe n’uko ubwo uwo muzungu yageraga muri ako gace, yigize umucamanza agashaka no kunyaga amasambu y’abitwaga Abarashi Rukara rwa Bishingwe akomokamo.

    Andi makuru ku rupfu rwa Ndagijimana, Kigali today iracyayakurikirana.


    source : https://ift.tt/3qwjGiX

  • Green Gicumbi ikangurira abanyeshuri kuzabyaza amahirwe ingemwe z’ibiti zirimo guterwa #Rwanda #RwOT via @kigalitoday #rwanda #RwOT

    Umuyobozi wa Green Gicumbi hamwe n
    Umuyobozi wa Green Gicumbi hamwe n’abana bo muri GS Mulindi mu Murenge wa Kaniga, harimo gutera ibiti mu butaka bw’icyo kigo

    Umuyobozi wa Green Gicumbi, Kagenza Jean Marie Vianney, avuga ko mu bagomba gutera ibyo biti harimo abana biga mu mashuri yo mu mirenge icyenda uwo mushinga ukoreramo, kugira ngo bakurane umuco wo gukunda Ibidukikije no gushaka uburyo babibyaza umusaruro.

    Kagenza asanga urubyiruko hamwe n’abana badakunda kuba mu mirimo y’ubuhinzi, by’umwihariko ijyanye no gutera ibiti n’amashyamba, bakaba bayiharira abantu bakuze, nyamara ari ho ngo hasigaye amahirwe yateza imbere benshi mu baturage.

    Mu biti Green Gicumbi ifite muri za pepinyeri bigomba guterwa muri ako karere, harimo iby’amashyamba, ibivangwa n’imyaka, iby’imbuto n’ibyagenewe guterwa mu mibande no mu bishanga.

    Kagenza hamwe n
    Kagenza hamwe n’Abanyeshuri bo muri TVET Mulindi

    Kagenza avuga ko uretse umumaro wo kurengera ibidukikije, ibiti byose birimo guterwa bizaba byatangiye kubyara ubukungu mu myaka itanu iri imbere, agasaba abanyeshuri kudacikwa n’ayo mahirwe.

    Agira ati “Ubu twateye ibiti birimo ibya avoka, nyuma y’imyaka itanu biraba byatangiye kwera, igiti kimwe cya avoka ku mwaka gitanga amafaranga ari hagati y’ibihumbi 50-100, avoka imwe igurwa amafaranga 100 ariko hari n’aho igurwa 500. U Rwanda rufite isoko rinini rya avoka, ufite nk’ibiti 100 nta muhinzi-mworozi wasarura nka we”.

    Kagenza avuga ko barimo kuva muri buri shuri bahashinze amatsinda (clubs) y’ibidukikije azajya akurikirana ibiti byatewe, ndetse bakazagera ubwo batanga ibihembo byo gushimira abazarusha abandi kubicunga no kubyitaho.

    Green Gicumbi yafatanyije n
    Green Gicumbi yafatanyije n’ abanyeshuri n’abarimu bo muri TVET Mulindi mu gutera ibiti by’imbuto n’ibivangwa n’imyaka

    Umunyeshuri witwa Musabika Fidèle wiga ibijyanye n’Ikoranabuhanga mu Ishuri ry’imyuga (TVET) rya Mulindi mu Murenge wa Kaniga w’Akarere ka Gicumbi, avuga ko atajyaga aha agaciro ibiti ngo yumve ko byazamuviramo kwihangira imirimo.

    Ati “Nk’umuntu wiga, n’iri ni isomo muba muduhaye, gutera ibiti birimo ubucuruzi kandi wiga ugamije kuzagira ejo heza, mu rugo hari abantu baba bafite imirima ipfa ubusa, ngiye kubasaba kujya nshyiramo byibura igiti cya avoka, ndumva ntakongera kuba umushomeri”.

    Umuyobozi wa TVET Mulindi, Byensi Jean Claude, avuga ko ubufasha abanyeshuri bagize Club y’ibidukikije bazabasaba, ishuri ryiteguye kubutanga mu rwego rwo kubafasha kugira ibyo bakora bakiri ku ntebe y’ishuri no kubarinda kuzaba abashomeri barangije kwiga.

    Mu myaka ibiri Umushinga wa Green Gicumbi umaze urengera Icyogogo cy’Umuvumba, uvuga ko umaze gukoresha amaterasi ku butaka bungana na hegitare 850, gusazura amashyamba ku buso bungana na hegitare 500, kubaka ibigega bifata amazi y’imvura, gutera ikawa,icyayi n’imigano no kubaka imikoki.

    Kagenza uyobora Green Gicumbi avuga ko uwo mushinga wahesheje imirimo abaturage barenga ibihumbi 23, kandi ko ukomeje ibikorwa byo kubakira abaturage ubudahangarwa ku mihindagurikire y’ibihe mu yindi myaka ine iri imbere.

    source : https://ift.tt/3wFb3n5

  • Exclusive: Miss Ingabire Grace yagize icyo av… – #rwanda #RwOT

    Miss Ingabire Grace ni umwe mu bitabiriye igitaramo cya Bruce Melodie cyo kwizihiza imyaka 10 amaze mu muziki cyababye tariki 6 Ugushyingo 2021. Iki gitaramo cyabereye muri Arena, cyabaye amateka kigaragaza ko Bruce Melodie ari umuhanzi ufite ubuhanga n’abafana batari bake mu bahanzi bakorera umuziki mu gihugu cy’u Rwanda.

    Miss Ingabire Grace n’igisonga cye cya kabiri Mutoni Witness bari mu bagaragaye muri iki gitaramo bishimye kandi babyina mu buryo budasanzwe ubwo Bruce Melodie yari ari ku rubyiniro. Mu kiganiro na Inyarwanda.com, Miss Ingabire Grace yagarutse kuri iki gitaramo cyabaye amateka, avuga icyo abona Bruce Melodie avuze mu muziki nyarwanda anakomoza ku byamuvuzweho ko aririmba ibishegu anamugira inama.

    Ubwo Melodie yri ku rubyiniro, Miss Grace na Witness bari bizihiwe babyina indirimbo yaririmbaga

    Miss Ingabire Grace agaruka kuri iki gitaramo, yagize ati: “Bruce Melodie ni umwe mu bahanzi nkunda mu Rwanda n’ibyishimo cyane kuba abasha kugira igitaramo kimeze gutya akabasha no gukora ‘Live peformance’ imeze kuriya”. Yakomeje agaragaza icyo Bruce Melodie avuze mu muziki nyarwanda ati: “Ntekereza ko agaragaza iterambere rimaze kuba mu muziki nyarwanda, ni icyitegererezo ku bandi bashaka gukora umuziki nyarwanda, ni umuhanzi mwiza uhagarariye impano nyazo”.

    Twamusabye kutubwira uko yakira ibyagiye bivugwa n’abantu batandukanye ko Bruce Melodie aririmba ibishegu maze asubiza agira ati: “Ntekereza ko aho ngaho ntafite amakuru ahagije, icyo ni cyo navuga”. Yagiriye inama uyu muhanzi akunda yamuherekeza mu yindi myaka asigaje mu muziki ati: “Icya mbere ni ukumushimira cyane cyane, ikindi ni ukudacika intege kubera ko ni urumuri ku banyarwanda”. 

    Muri iki kiganiro Miss Ingabire yagaragaje ko igitaramo Bruce Melodie yakoze cyabaye amateka kandi ko cyari gikenewe kuko abantu bari bamaze igihe bititabira ibitaramo kubera icyorezo cya COVID-19.

    Iki gitaramo cya Bruce Melodie cyabaye amateka

    REBA HANO UKO MISS INGABIRE YABYINNYE BIDASANZWE MU GITARAMO CYA BRUCE MELODIE

    Source : https://inyarwanda.com/inkuru/111333/exclusive-miss-ingabire-grace-yagize-icyo-avuga-ku-bivugwa-ko-bruce-melodie-aririmba-ibish-111333.html

  • Urayeneza Gerard mu bujurire yashinjuwe n’ababanje kumushinja bahishura n’icyabibateye #rwanda #RwOT

    Urayeneza Gerard ubu araburana ubujurire mu Rugereko Rwihariye rw’Urukiko Rukuru ruburanisha ibyaha mpuzamahanga n’ibyambukiranya imipaka ruri i Nyanza.

    Mu iburanisha ryo kuri uyu wa Kane tariki 11 Ugushyingo 2021, Umucamanza yabanje guha ijambo umutangabuhamya Nkurunziza Emmanuel uri mu bashinja uregwa.

    Nkurunziza Emmanuel yabwiye Urukiko ko mu gihe cya Jenoside yakorewe Abatutsi 1994, Gerard yari atunze umuryango wo kwa Emmanuel Nkurunziza, ngo yajyaga abona Gerard afite imbunda akajya ayishyira mu modoka yo mu bwoko bwa taxi, yavuze ko nta muntu yabonye Gerard yica.

    Abashinjura bati iki ?

    Nyuma ya Emmanuel hahawe ijambo ryahawe umutangabuhamya wa mbere ushinjura witwa Jerome Musoni wavuze ko Urayeneza Gerard mu gihe cya Jenoside yakorewe Abatutsi muri Mata, 1994 yamubonye igihe gito kuko Gerard yahise ajya iwabo i Mbuye (aho akomoka).

    Ati 'Gerard muzi ari inyangamugayo mu gihe cya Jenoside yakorewe Abatutsi 1994.'

    Musoni yongeyeho ko mu ntangiriro z’urubanza hari umugore witwa Ahobantegeye Charlotte (yakoraga muri Kaminuza ya Gitwe Gerard yayoboraga ngo bari bifitanye ibibazo Gerard amurega kunyereza umutungo wa Kaminuza), yaguze inzoga 'Bierre' ngo arazimuha arasinda bituma yandika ibaruwa ishinja Gerard ibitaribyo abitewe n’inzoga yari yaguriwe.

    Ati 'Nta mbunda nabonanye Gerard nta n’iyo nabonanye abana be.'

    Hahawe ijambo kandi umutangabuhamya Ngendahayo Denys we yaranzwe no gusaba imbabazi kuko yashinje Gerard Urayeneza mu ntangiriro z’urubanza rwe, yumvikanaga avuga ko yashukishijwe ibiryo n’amafaranga yahabwaga n’uwitwa Ahobantegeye Charlotte (yari asanzwe akora muri Kaminuza ya Gitwe).

    Ati 'Natse umuryango wa Urayeneza Gerard imbabazi n’ubutabera kubera ibyo nashinje Gerard bitaribyo.'

    Denys wakunze gukurura amarangamutima y’abari mu Rukiko kuko byinshi mu byo yavugaga abakurikiraga iburanisha basekaga, yavuze ko ubuhamya yatanze mu Bugenzacyaha (RIB) atari byo abubwo ko yabaga yatewe ubwoba kandi muri iyo minsi yari afite ikibazo cy’ihungabana (uburwayi).

    Ati 'Ahobantegeye Charlotte yize Kaminuza yandushaga ubwenge ibyo navugaga byose ni we wabaga wabimbwiye, ariko ntibyari ukuri gusa yabaga yampaye akawunga n’umuceri maze akambera Mwarimu nta kintu kibi nzi kuri Gerard na bagenzi be.'

    Nyuma hahise hahabwa ijambo umutangabuhamya Nyirasanande Beatrice avuga ko Jenoside yakorewe Abatutsi 1994 iba, mu ntangiriro Gerard atari muri Gitwe ahubwo ko yari iwabo i Mbuye

    Ati 'Gerard muzi afite Bibiliya, simuzi afite imbunda.'

    Yongeyeho ko hari umugabo witwa Kamanzi (Umuvandimwe wa Nyirasanande kwa Se wabo) wamushishikarije gushinja Gerard ko yagize uruhare rwo kwica musaza we (wa Nyirasanande) kandi abeshya atari byo.

    Urukiko rwasoje iburanisha rya none ruha ijambo umutangabuhamya witwa Mukamana Immaculee wavuze ko azi Gerard ari Umuganga, yongeraho ko mu gihe cya Jenoside yakorewe Abatutsi 1994 atigeze abona Gerard kuko yari yaragiye i Mbuye iwabo.

    Ati 'Gerard we n’abana be nta mbunda bigeze, bize ubuganga ahubwo ubu Akarere kacu kabuze Abaganga b’inzobere.'

    Mukamana yakomeje avuga ko abandi bafunganwe na Gerard na bo nta kibi abaziho ko icyo azi kuri Nyakayiro Samuel (ufunganwe na Gerard) yari ahagarariye IBUKA bahurira mu nama (na Mukamana).

    Umucamanza yavuze ko iburanisha ku rubanza rwa Gerard Urayeneza na bagenzi be baregwa ibyaha byo Kuba ikitso ku cyaha cya Jenoside yakorewe Abatutsi n’icyaha cyo gutesha agaciro ibimenyetso cyangwa amakuru byerekeye Jenoside yakorewe Abatutsi 1994, rizasubukurwa ku wa 30/11/2021 humvwa abandi batangabuhamya.

    Source : http://www.ukwezi.rw/mu-rwanda/3/article/Urayeneza-Gerard-mu-bujurire-yashinjuwe-n-ababanje-kumushinja-bahishura-n-icyabibateye

  • Imana nibishaka tuzongera duhure – Mashami agaruka ku bakinnyi ba APR FC yimwe mu Mavubi #rwanda #RwOT

    Umutoza w’ikipe y’igihugu y’u Rwanda, Mashami Vincent avuga ntacyo bari kurenza ku kuba APR FC yarababwiye ko bamwe mu bakinnyi bayo bahamagawe barwaye, gusa ngo icyo kwishimira ni uko bakize Imana nibishaka bazongera bahure.

    Mashami Vincent yari yahamagaye abakinnyi 31 agomba kwifashisha mu mikino 2 isoza itsinda E mu gushaka itike y’igikombe cy’Isi cya 2022 kizabera muri Qatar, ni imikino Amavubi yaraye atsinzwemo nz Mali 3-0 ndetse n’uwo azakina na Kenya tariki ya 15 Nzeri 2021.

    Muri aba bakinnyi 31 Mashami Vincent yahamagaye, harimo 5 b’ikipe ya APR FC. Mu buryo butunguranye babiri bonyine ari bo Nshuti Innocent na Nsanzimfura Keddy nibo bitabiriye ubu butumire (basanzwe ari abasimbura muri APR FC).

    Abandi 3 ari bo; Manishimwe Djabel, Ruboneka Bosco na Kwitonda Alain Bacca ntibitabira ubutumire aho byavuzwe ko byatewe n’impamvu z’uburwayi bunyuranye.

    Icyo gihe umuvugizi wa FERWAFA wungirije, Jules Karangwa yabwiye ISIMBI ko ikipe yabo yababwiye ko abo bakinnyi barwaye.

    Mu buryo butunguranye aba bakinnyi ejo bagaragaye mu mukino wa gicuti APR FC ejo yatsinzemo Gasogi United 2-1, aho Djabel ari na we watsindiye APR FC igitego cya mbere.

    Umutoza Mashami Vincent abajijwe kuri aba bakinnyi yimwe ngo barwaye ariko bakagaragara mu mukino wa gicuti ikipe yabo yakinnye na Gasogi United, yavuze ko ntacyo bari kurenzaho kuko bahawe raporo na APR FC ko barwaye.

    Ati “Unabivuze neza ko baduhaye raporo, ubwo twubaha raporo baduhaye kuko niba barafashe umwanya bakandika raporo bakanayisinyaho wowe nk’umuntu warenzaho iki? “

    Kuba bitaba ari agasuzuguro ku ikipe y’igihugu, yavuze ko buri wese agira uko afata ibintu ariko na none bakwishimira bakize.

    Ati “Imana ishimwe ko bakize. Ibyo ng’ibyo buri wese afite uko asesengura ibintu bye, rero icyo twakwishimira ni uko umuntu arwara agakira, ubuzima nibwo bwa mbere, twabifurizaga ko bakira vuba, barakize rero Imana nibishaka tuzongera duhure.”

    Nubwo Mashami Vincent yavuze ibi ariko benshi mu bakunzi b’umupira w’amaguru mu Rwanda, ntabwo bishimiye iki gukorwa aho bavuga ko APR FC itakabaye yarimanye aba bakinnyi.

    Ruboneka Bosco ntabwo yitabiriye ubutumire bw’Amavubi

    Manishimwe Djabel na we APR FC yavuze ko arwaye

    Mashami Vincent avuga bakwiye kwishimira ko abakinnyi nubwo bataje ariko bakinnye

    Bacca na we yari yahamagawe

    Source : http://isimbi.rw/siporo/article/imana-nibishaka-tuzongera-duhure-mashami-agaruka-ku-bakinnyi-ba-apr-fc-yimwe-mu-mavubi

  • Polisi yafashe abakekwaho kwiba ibikoresho bitanga amashanyarazi mu ngo z'abatishoboye #rwanda #RwOT

    Mu Karere ka Gatsibo hafashwe babiri naho mu Karere ka Ruhango hafatiwe batatu kuri uyu wa Gatatu tariki ya 10 Ugushyingo 2021.

    Umuvugizi wa Polisi mu Ntara y'Iburasirazuba, Chief Inspector of Police (CIP) Hamdun Twizeyimana yavuze ko kugira ngo bafatwe byaturutse ku makuru yatanzwe n'abaturage.

    Yagize ati 'Abaturage bo mu Karere ka Gatsibo, Umurenge wa Kabarore, Akagari ka Murambi baduhaye amakuru bavuga ko hari abantu binjiye mu mazu yabo biba batiri zitanga ingufu z'amashanyarazi aturuka ku zuba barimo guhabwa na Polisi y'u Rwanda muri iyi minsi dutangira iperereza.'

    Umwe mu bafashwe yavuze ko mu kwiba izo bateri yacunze ba nyir'urugo bagiye mu mirima yica amadirishya y'inzu ajya mu nzu azikuramo. Imwe yayigurishaga amafaranga y'u Rwanda ibihumbi 7 500.

    Umuvugizi wa Polisi mu Ntara y'Amajyepfo, Superintendent of Police (SP) Theobald Kanamugire yavuze ko mu Karere ka Ruhango hari uwafashwe nijoro avuye kumanura imirasire y'izuba (Solar Panels) ku mazu y'abaturage.

    Yafatanwe imirasire itatu na batiri imwe, amaze gufatwa hakomeje iperereza hafatwa n'abandi babiri buri umwe afatanwa umurasire umwe.

    SP Kanamugire yaboneyeho gukangurira abantu kwirinda ubujura, abasaba gufata neza ibikorwaremezo Leta igenda igeza ku baturage.

    Ati 'Biriya bikorwa birimo kwibwa ni ibyo Leta igenda igeza ku miryango itishoboye mu rwego rwo kuyifasha kwiteza imbere. Biragayitse kuba hari abanyura inyuma bakajya kubyiba bakabigurisha, ariko ababikora bose bamenye ko bazajya bafatwa bakabihanirwa.'

    Yakomeje agira inama abaturage kumenya ko bafite inshingano zo gucunga umutekano w'ibikorwa Leta igeza ku baturage baramuka hari uwo babonye abyangiza bakihutira gutanga amakuru.

    Abafashwe bahise bashyikirizwa Urwego rw'Ubugenzacyaha (RIB) kugira ngo bakurikiranwe mu mategeko.

    Itegeko no 68/2018 ryo kuwa 30/08/2018 ingingo ya 166 ivuga ko Umuntu wese uhamijwe n'urukiko icyaha cyo kwiba, ahanishwa igifungo kitari munsi y'umwaka umwe ariko kitarenze imyaka ibiri n'ihazabu y'amafaranga y'u Rwanda atari munsi ya miliyoni imwe ariko atarenze miliyoni ebyiri, imirimo y'inyungu rusange mu gihe cy'amezi atandatu cyangwa kimwe gusa muri ibyo bihano.

    Ingingo ya 167 y'iri tegeko ivuga ko ibihano ku cyaha cyo kwiba byikuba kabiri iyo uwibye yakoresheje guca icyuho, kurira cyangwa yakoresheje igikoresho icyo aricyo cyose gifungura aho utemerewe kwinjira, kwiba byakozwe mu nzu ituwemo cyangwa isanzwe ibamo abantu cyangwa mu nyubako ziyikikije, kwiba byakozwe nijoro, kwiba byakozwe n'abantu barenze umwe.

    Source : https://umuryango.rw/amakuru/mu-rwanda/umutekano/article/polisi-yafashe-abakekwaho-kwiba-ibikoresho-bitanga-amashanyarazi-mu-ngo-z