Blog

Ni ishami rizatangirwamo amasomo yo ku rwego rw'icyiciro cya Kabiri mu mashami atandukanye arimo Uburezi mu Cyongereza n' Ikinyarwanda, Uburezi mu Cyongereza no mu Gifaransa, Uburezi mu mibare n'Ikoranabuhanga rya Mudasobwa, n'Ubugeni mu Icungamutungo.

Umuyobozi Mukuru wa UTAB, Padiri Dr. MUNANA Gilbert, yavuze ko icyemezo cyo gufungura ishami rishya i Kiramuruzi kigamije kwagura ibikorwa byayo byo gutanga ubumenyi bufite ireme no kuzamura umubare w'abayigana.

Ati 'Nyuma y'imyaka isaga 20 ikorera mu Ntara y'Amajyaruguru, hafashwe icyemezo cyo gutangiza ishami rishya i Kiramuruzi hagamijwe kwagura uburezi bufite ireme no kubugeza ku baturage benshi, cyane ko twari tumaze kubona ko Kaminuza yitabirwa, nk'uko umubare w'abanyeshuri dufite ubyemeza.'

Yakomeje agaragaza ko UTAB yakoranye cyane n'Inama y'Igihugu Ishinzwe Amashuri Makuru na Kaminuza (HEC) mu gukomeza kunoza ahazatangirwa amasomo hashingiwe ku bipimo ngenderwaho mu burezi bijyanye n'inyubako, ibikoresho bigezweho n'ibindi.

UTAB yashinzwe mu mwaka wa 2006, ikaba ifite amashami (Faculties) atatu, arimo Ishami ry'Imbonezamubano, Icungamutungo n'Iterambere, Ishami ry'Uburezi, n'Ishami ry'Ubuhinzi, Kurengera Ibidukikije n'Ingufu zisubira. Ikaba iteganya no gutangiza ishami rya kane ry'Ubumenyi n'Ikoranabuhanga.

Muri ayo mashami yose amasomo atagwa ku rwego rw'icyiciro cya Kabiri (Bachelor), ariko iry'Uburezi rikaba ritanga Post Graduate Studies, ndetse banateganya gutangiza icyiciro cya Gatatu.

Kuri ubu, iyi Kaminuza ibarirwamo abanyeshuri bagera kuri 11.449, harimo abigakumanywa, mu mpera z'icyumweru no mu biruhuko.

Kaminuza ya UTAB kandi yemerewe n'ibigo byigenga gutanga amasomo muri Porogaramu zitandukanye z'igihe gito, zirimo Ikoranabuhanga mu bya Mudasobwa, n'Ubucungamari bw'Umwuga, zombi zemewe ku rwego mpuzamahanga.

Umuyobozi wa UTAB yavuze ko ku bashaka kwiga muri iryo shami rya Kiramuruzi, kwiyandikisha byatangiye, asaba abujuje ibisabwa kubagana kuko amasomo azatangira ku wa 21 Nyakanga 2025.

UTAB yafunguye ishami ryayo iKiramuruzi mu Karere ka Gatsibo

UTAB kandi yemerewe gutanga amasomo muri Porogaramu zitandukanye z'igihe gito zirimo ikoranabuhanga mu bya mudasobwa

Ni ishami rizatangirwamo amasomo yo mu cyiciro cya Kabiri cya Kaminuza

Hateguwe kandi ahazatangirwa amasomo hashingiwe ku bipimo ngenderwaho mu burezi

Umuyobozi Mukuru wungirije wa REB, Mutezigaju Flora, yavuze ko izo mpinduka zizatangira kubahirizwa muri Nzeri uyu mwaka ubwo umwaka utaha w'amashuri uzaba utangiye.

Izo mpinduka zikubiyemo ko mu cyiciro cya mbere cy'amashuri abanza, kuva mu wa mbere kugeza mu wa gatatu abanyeshuri bazajya biga ingunga imwe aho kwiga ingunga ebyiri nk'uko byari bisanzwe hamwe na hamwe.

Mutezigaju ati 'Kuva mu mwaka wa mbere kugeza mu wa gatatu w'icyiciro cya mbere cy'amashuri abanza habayemo amavugurura akomeye kuko abarimu baratubwiraga ngo integanyanyigisho umwana ntiyazayirangiza. Amashuri menshi dufite yiga mu byo twita ingunga ebyiri kandi ntibabasha kwiga amasaha yose asabwa mu cyumweru.

'Twasanze kugira ngo tubone amasaha dukeneye ku munsi abana biga muri icyo cyiciro bagomba gutangira saa mbili za mu gitondo bakageza saa tanu na 40' noneho nyuma ya saa sita batangire saa saba n'iminota icumi bageze saa kumi na 50'.'

Izo mpinduka kandi zirimo ihuzwa ry'amashami yigishwaga mu cyiciro cya kabiri cy'amashuri yisumbuye aho ayenda gusa yahurijwe mu mbumbe eshatu z'ingenzi harimo iy'Imibare na Siyansi irimo ibyiciro bibiri, Iy'Ubumenyamuntu ndetse n'iy'Indimi.

Aho harimo ko amashami ahuriye mu Butabire nka MCB, PCB na PCM azahuzwa abyare ikiswe Imibare na Siyansi Ikiciro cya Mbere noneho abigaga amasomo ahuriye ku Mibare nka MEG, MCE, MPC na MPG ahuzwe mu kiswe Imibare na Siyansi Ikiciro cya Kabiri.

Hazahuzwa kandi amashami y'Ubumenyamuntu azwi nka HGL na HLP abe imbumbe yiswe 'Arts and Humanities' mu gihe amasomo y'indimi na yo asanzwe arimo amashami abiri rimwe ryihariye Igifaransa irindi Igiswahili na yo azahuzwa bajye baziga zose uko ari Ikinyarwanda, Icyongereza, Igiswahili n'Igafaransa.

Izo mpinduka kandi ziteganya ko mu cyiciro cya kabiri cy'amashuri yisumbuye nibura buri kigo cy'ishuri cyagira amashami abiri kugira ngo bizanatume abalimu bashobora kujya boherezwa ahari amasomo ajyanye n'ibyo bari basanzwe bigisha.

Umuyobozi Mukuru wa Lycée de Kigali, Mfura Jean yabwiye RBA ko izo mpinduka zari zikenewe mu myigishirize.

Yagize ati 'Kuba hari abatigaga Imibare byatumaga badatekereza cyane. Ikindi ni uko hari ikibazo cyo kuvuga ngo abana basoza kwiga bazi Icyongereza, Igifaransa yewe n'Ikinyarwanda batakizi neza kandi mu gukora ibizamini by'akazi babikeneye. Ni byiza ko kandi Icyongereza bose bazajya bakibazwa mu kizamini cya Leta.'

Amasomo mu mashuri abanza n'ayisumbuye agiye kujya atangira saa mbili

Bandikiye ibaruwa Ibiro by'Ubudage bishinzwe Ububanyi n'Amahanga banenga uburyo Abanyarwanda bajya muri iki gihugu bahabwamo visa.

Bashingira k'uko visa za Schengen zitagitangirwa mu Rwanda. Abazishaka bajya kuzishaka muri Kenya, ibitwara umwanya amafaranga yisumbuyeho, bigatuma abakora ingendo zigamije ubucuruzi zidindira.

Bagaragaza ko bikomeje kugira ingaruka mbi ku mikorere y'ubucuruzi hagati y'u Rwanda n'u Budage, bityo bagasaba Ambasade y'u Budage i Kigali kongera kuzitanga mu buryo bw'agateganyo nk'uko byari byakozwe mu mezi abiri ashize.

Abasinye iyo baruwa ni abo mu bigo 15 bikora ibijyanye n'ikoranabuhanga.

Yasinyweho kandi n'amahuriro yo mu Budage atandukanye arimo Ishyirahamwe ry'Abadage bakora ibijyanye n'Ikoranabuhanga (BITMi), iry'abakora Ubucuruzi buto n'Ubuciriritse (BVMW) n'Ihuriro ry' Abadage n'Abanyafurika bakora Ubucuruzi.

Perezida wa BITMi, Oliver Grun, yavuze ko kubera icyuho cy'abakozi bafite ubumenyi bwifuzwa, ibigo by'ikoranabuhanga byo mu Budage biri kwishingikiriza ku bindi bihugu mu kuziba icyo cyuho.

Imibare igaragaza ko nko mu 2040 u Budage buzagira ibibazo byo kubura inzobere mu bijyanye n'ikoranabuhanga zirenga ibihumbi 660, u Rwanda rugafatwa nk'uwafasha mu kuziba icyo cyuho cyane ko rwiyemeje kuba igicumbi cy'ikoranabuhanga.

Grun ati “Icyo dukeneye ni uburyo bwo gutanga visa bunoze, budaca abantu intege, bwakomeza koroshya ubufatanye mu by'ubukungu. Ni ibintu by'ingenzi mu buri uru rwego rwacu.'

Umuyobozi Wungirije w'Ihuriro ry'Abadage n'Abanyafurika, Claudia Voß, yavuze ko koroshya uburyo bwo kubona viza ari imwe mu ntambwe zikenewe kugira ngo politiki y'u Budage ku bufatanye bwayo na Afurika igire akamaro.

Ati 'Ni ukwivuguruza ku Budage. Ni gute uvuga ko ushaka ubufatanye na Afurika mu by'ubukungu, nyamara ukima amahirwe Abanyarwanda yo kujyayo, inzira zo kubona viza zikagorana.'

Uyu muyobozi yavuze ko hakenewe igisubizo cyihuse bitabaye ibyo, 'Abafatanyabikorwa bacu bazadutakariza icyizere ndetse tunabure amahirwe twari dufite.”

Ubushakashatsi bwakozwe n'impuguke mu bijyanye n'imigenderanire, Mehari Taddele Maru, bugaragaza ko kuva mu 2014 kugera mu 2022, igipimo cyo kwima Abanyafurika viza za Schengen cyazamutse kigera kuri 30% kivuye mu 18%. Iki gipimo kirenze kure impuzandengo y'Isi yose ya 17.5%.

Ufite viza ya Schengen aba afite uburenganzira bwo kujya mu bihugu 27 byo mu Burayi muri 44 bigize uyu mugabane wa wa gatandatu mu bunini.

Abadage bashoye imari mu Rwanda ntibumva impamvu u Budage bwahagaritse gutangira viza za Schengen i Kigali

Dukuzimana Appollonie wigisha mu mashuri yisumbuye yo mu Karere ka Huye mu Ntara y'Amajyepfo yabwiye RBA ko amaze imyaka iatu ahakora nyamara umuryango we utuye mu Karere ka Gakenke mu Ntara y'Amajyaruguru.

Avuga ko kugira ngo agere ku muryango we bimusaba nibura amafaranga ari hagati y'ibihumbi 20 Fw na 25 Fw bya tike bigatuma hari ubwo amara amezi abiri ataragera mu rugo rwe agakora adatuje.

Ati 'Amatike ni menshi cyane bisaba gutegereza nk'igihe twahembwe. Imyaka itatu isabwa ngo duhindure aho dukora ni myinshi cyane kuyihanganira ugeraho ukurambirwa.'

Icyo kibazo agisangiye na Ndayisenga Théogène wigisha mu Karere ka Huye ataha mu Karere ka Nyaruguru yavuze ko nta kintu yakora kindi cy'iterambere kandi utuye kure y'umuryango we.

Dusabe Donathille ukorera i Karongi umuryango we uri mu Karere ka Huye na we yavuze ko ajya amara igihembwe atageze iwe kandi yarahasize umwana.

Ati 'Ubu ntaha ari uko igihembwe kirangiye kandi mu rugo nahasize umwana muto w'imyaka ine. Rimwe na rimwe hari igihe ukora akazi uhangayitse cyangwa utishimye kuko nk'igihe bambwira ko umwana arwaye sinaba nkigakoze rwose kandi sinahora ntega kuko amatike ni menshi.'

Umuyobozi w'Ishuri ryisumbuye rya Butare Catholique, Byiringiro Dan, yavuze ko bigoye gukurikirana abarimu baba kure y'imiryango yabo kandi bagatanga umusaruro muke.

Ati 'Iyo hari nk'usabye uruhushya mu muryango we barwaye ntiruba urw'umunsi umwe gusa rufata iminsi myinshi kuko aba yagiye mu kandi karere. Iyo batashye muri weekend kandi na bwo ku wa mbere ntibagaruka kuko uba usanga habaye kure cyangwa bakabura imodoka n'ibindi.'

Minisitiri w'Uburezi, Nsengimana Joseph, yavuze ko nubwo bifuza ko imyaka yo kwimura abarimu yagabanuka, bakwiye no kwita ku kureba ku banyeshuri bahindurirwa abarimu buri gihe.

Ati 'Tugomba no kureba ku ruhande rw'ishuri kuko niba umwarimu atangiye akazi nyuma y'umwaka umwe akaba ashaka kwimurwa ishuri yigishagaho yari amaze kurimenyera n'abayeshuri bamaze kumumenyera byatera akavuyo mu mashuri abana ntibige neza. Ubu imyaka itatu ni yo yari yagengwe kugira ngo umwarimu ashobore gusaba kwimura ariko REB na MINEDUC turiteguye kwicarana n'abarimu na bo batubwire igihe bumva cyaba ari cyo cyiza.'

Mu mwaka w'amashuri 2023/24 imibare ya REB igaragaza ko abarimu 2 ,235 basabye guhabwa kwimurirwa muri bo abagera ku 1 ,226 nibo bari bujuje ibisabwa, ariko 751 gusa nibo bimuwe.

Abarimu baravuga ko igihe cy'imyaka itatu isabwa ngo bemererwe guhindurirwa aho bigisha cyagabanywa

Ni inkuru yamenyekanye mu gitondo cyo ku wa 15 Nyakanga 2025, aho amakuru akomeza avuga ko bikimenyekana inzego z'umutekano zari aho zagerageje kukimwambura, ariko we agashaka kuzirwanya, ariko aza kugeraho aratuza.

Abazi uyu mwana bavuze ko asanzwe akoresha ibiyobyabwenge, ibyo baheraho bakeka ko ari byo byaba byamuteye iyi myitwarire mibi.

Umuvugizi wa Polisi mu Ntara y'Amajyepfo, SP Emmanuel Habiyaremye, yabwiye IGIHE ko uyu munyeshuri yafashwe afite icyuma ku mukandara

Ati 'Yafatanywe icyuma yari yambariyeho kiri ku mukandara, akaba anacyekwaho kuba gukoresha ibiyobyabwenge.'

SP Habiyaremye, yakomeje avuga ko ikibazo cy'uyu munyeshuri kirimo gukurikiranwa, kugira ngo hamenyekanye neza igitera imyitwarire y'uyu munyeshuri.

Uyu munyeshuri yahise ajyanwa kuri Polisi, Agashami ka Kigeme aba ariho akorera ikizamini ndetse byanzurwa ko n'ikizamini cyo ku wa 16 Nyakanga uyu mwaka ari ho azagikorera kugira ngo hirindwe ko hari umuntu yazagirira nabi.

Kuri GS Gasaka, muri Nyamagabe ni ho hagaragaye umunyeshuri wazanye icyuma acyambariyeho

Muri Gicurasi 2025 nibwo Urwego rw'Igihugu rw'Imiyoborere mu Rwanda (RGB), rwahagaritse by'agateganyo mu gihe cy'amezi atatu, ibikorwa by'amasengesho ngarukakwezi, byaberaga kwa Yezu Nyirimpuhwe, kubera ko hatari hujuje ibisabwa.

Icyo gihe, RGB yamenyesheje Diyosezi ya Kabgayi ibyo igomba gukora kugira ngo Ikibaya cy'Amahoro cyongere gusengerwamo birimo gutanga ubwisanzure ku bahasengera, bashakakirwa imbuga yo guparikaho ibinyabiziga, gutandukanya inzira y'abamanyamaguru n'ibinyabiziga, ndetse no gushaka ahantu hatuje abanyantegenke bashobora gukurikiranira isengesho batuje.

Mu gusubiza ibi, ubuyobozi bw'Ingoro yo Kwa Yezu Nyirimpuhwe, bwatangije ibikorwa byo kuvugurura ahasengerwaga no kuhongera bagamije kubahiriza ibyo basabwe na RGB, no kongera umutekano w'imbaga y'abakirisitu bahagana.

Mu kiganiro na IGIHE, Umuyobozi w'Umusigire w'Ingoro yo Kwa Yezu Nyirimpuhwe, Padiri Dominique Ngendahayo Tumaine, yavuze ko ku wa 7 Nyakanga, 2025 ari bwo imirimo yo gutunganya ibyasabwe na RGB yatangiye.

Biteganyijwe ko bazakora umuhanda urenga metero 500 uzajya unyuramo imodoka zazanye abantu, zikazenguruka munsi y'ikibaya, zikomereza muri pariki iri kubakwa, kugira ngo zitandukane n'abantu.

Ati ''Abatugana bagomba kugira ubwisanzure, abantu bakagira aho banyura, n'imodoka aho ziherera. Hari umuhanda uri kubakwa uzaturuka kuri kaburimbo, akamunuka, ukanyura munsi y'ikibaya ugana kuri parikingi, yatangiye kubakwa mu isambu ya Diyosezi, bikaba byitezwe ko bizatanga umutekano uhagije.''

Padiri Tumaine yakomeje avuga ko ibi bizaherekezwa no gushyiraho 'écrans géants' hirya no hino ahasengerwa zigera kuri enye, kugira ngo zifashe abantu kureba ibibera mu kibaya, zikazafasha abanyantege nke baje kuhasengera n'abandi bose batabasha kureba imbere ahari guturwa igitambo cy'ukarisitiya.

Ati ''Akandi gashya karimo, ni uko tuzashyiramo écrans za rutura imwe ikazajya muri kiliziya ya Paruwasi ya Ruhango, ahazajya abanyantegenke nk'abasaza, abagore batwite n'abandi, indi ijye ku rwinjiriro rugari, ireba hanze, indi muri parikingi, iya kane ikazajya ahandi hazaba ngombwa.''

Yakomeje avuga ko kandi ko hazanashyirwaho uburyo bwo kurinda umutekano hakoreshejwe 'cameras de surveillance' zifata ibihabera byose bikanoza umutekano.

Padiri Tumaine, yaboneyeho gusubiza abibazaga ibyo kugura ubutaka n'abaturage baturiye Ikibaya cy'Amahoro, avuga ko byabaye bihagaze muri iki gihe , kuko aho gushyira ibyangombwa byasabwe na RGB ho hahari, ariko yongeraho ko uko imyaka izagenda iza ubundi butaka buzakenerwa muri gahunda yo kunoza kurushaho icyi cyanya.

Ibikorwa by'amasengesho yo mu Kibaya cy'Amahoro mu Ruhango, byatangiye mu 1991, ubu hakaba hamaze kuba ahantu habera ubukerarugendo nyobokamana hagendwa n'abantu b'imihanda yose, haba mu Karere no ku Isi, aho kuri cyumweru cya mbere cy'ukwezi haba hateraniye abasaga ibihumbi 100.

Aha ni ho hazaba hari parikingi izakira imodoka zisaga 800 z’abajya gusengera mu Ruhango

Imashini ziri mu mirimo

Umuyobozi w’imirimo yo kuvugurura kwa Yezu Nyirimpuhwe, Eng.Ndayiringira Principe, yavuze ko iyi parikingi izaba ifite ubushobozi bwo kwakira imodoka zisaga 800

Uruzitiro rw’igice cyo hepfo cy’Ikibaya cy’Amahoro rwarasenywe kuko ari ho hazanyura umuhanda werekeza kuri parikingi

Yabigarutseho ku wa 15 Nyakanga 2025 ubwo iki kigo cyatangaga ibisobanuro ku makosa yagaragaye muri raporo y'Umugenzuzi Mukuru w'Imari ya Leta y'umwaka warangiye muri Kamena 2024.

Abadepite bagize Komisiyo ishinzwe gukurikirana imikoreshereze y'imari n'umutungo by'igihugu, PAC, bagaragaje ko hari ibigo byahawe inguzanyo cyangwa inkunga ariko ubu bikaba bitagikora.

Umuyobozi Mukuru wa BDF, Munyeshyaka Vincent, yavuze ko umubare munini w'ibigo by'ubucuruzi BDF yateye inkunga bimara imyaka irenze ibiri bigikora kandi.

Ati 'Ubushakashatsi bwakozwe bugaragaza nibura ko BDF abantu twafashije nibura 72% babasha gukora bakarenza imyaka ibiri bakiriho, ndetse muri bo 68% imishinga bakora na serivisi bakora zirazwi, ziranditswe muri RDB, ndetse banishyura imisoro.'

Yasobanuye ko kuba hari imishinga ihomba ari ibintu bisanzwe mu bucuruzi, ariko byose bikajyana n'uburyo nyir'ubucuruzi yitwaye cyangwa ubumenyi abifitemo.

Munyeshyaka yavuze ko ibigo bamaze guha inkunga birenga ibihumbi 55.

Ati 'Twafashije imishinga ibihumbi 55.372. Twasanze rero ugendeye kuri uwo mubare abo babashije nibura guhanga imirimo ine ariko noneho kubera ko ibyo bakora biri mu ruhererekane nyongeragaciro, tuvuge niba ari umuntu worora inkoko hari aho azagura ibiryo [byazo] kubera abo bandi bakorana na bo, bagiye bahanga imirimo nibura ibiri idaturutse ku mushinga, iturutse ku mikoranire n'uwo mushinga.'

BDF ivuga ko kuva mu 2019 bamaze guhanga imirimo irenga ibihumbi 300 binyuze mu nkunga n'inguzanyo iha abaturage bayigana.

Kuva mu 2017 kugeza mu 2024 imirimo yahanzwe yari 1.374.214, mu gihe intego y'igihugu ari uguhanga ibihumbi 250 buri mwaka.

PAC yasabye ko imishinga BDF yateye inkunga idakora neza yakwitabwaho

Umuyobozi Mukuru wa BDF, Vincent Munyeshyaka yavuze ko imirimo yahanzwe binyuze muri BDF irenga ibihumbi 300