Blog

Mu bihe bya vuba ntibyari bisanzwe kubona imvura igwa muri Kamena na Nyakakanga, ahubwo yari amezi y'izuba ryinshi ariko mu 2025 byarahindutse, abashinzwe iteganyagihe bagaragaza ko hazabaho ubukonje aho kuba ubushyuhe bukabije.

Iteganyagihe ryashyizwe hanze mu mpera za Kamena 2025 ryerekanaga ko hazagwa imvura itari nyinshi mu bice bitandukanye.

Umuyobozi Mukuru wa Meteo Rwanda, Aimable Gahigi yabwiye RBA ko imvura yo mu mpeshyi ikomoka ku miyaga iba izenguruka Isi.

Ati 'Hari impinduka zagaragaye, zigaragarira nanone mu bipimo […]Hari itsinda ry'imiyaga risanzwe rizenguruka Isi ku buryo bishobora kumara nk'iminsi 30 bizenguruka Isi, iyo iryo tsinda ry'imiyaga rigeze hejuru y'inyanja y'u Buhinde ryongera ubuhehere mu kirere, ikaba ari yo ya nkomoko ya ya mvura yari yateganyijwe mu ntangiriro za Nyakanga [2025.] Uko ubuhehere bwiyongera hakaboneka imvura na bwa bushyuhe buragabanyuka.'

Yashimangiye ko no mu bihe bya kera 'Mu mpeshyi hajya habaho imvura, ikibigaragaza cya mbere ni ibipimo. Ibyo bipimo birahari, n'abantu kumwe baba bamenyereye ahantu bo hari ubundi buryo bapima. Hari imvura zo mu mpeshyi zigiye zifite amazina mu Kinyarwanda bigaragara ko izo mvura zishingiye ku bipimo n'uburyo umuntu yapimaga.'

Imvura zamenyerewe kugwa mu bihe by'impeshyi harimo impungiramirara, intsindagirabigega, n'inkangabagisha.

Ati 'Izo mvura zifite icyo zivuze. Tuzihuza n'ibipimo byafashwe tugasanga ko izo mvura zabagaho.'

Imvura yaguye mu mpeshyi yatumye benshi bibaza icyabaye ku Isi

Ambasaderi Mukasine, anahagarariye u Rwanda mu bihugu birimo u Buyapani, Philippines na Malaysia akagira icyicaro i Tokyo mu Buyapani.

Yakiriwe mu Ngoro y'Umwami wa Thaïlande izwi nka 'Amphorn Royal Palace' iherereye mu Murwa Mukuru, Bangkok, mu muhango witabiriwe n'abayobozi bakuru muri iki gihugu.

Muri uyu muhango wabaye ku wa 20 Nyakanga 2025, Amb Mukasine yashyikirije Umwami Rama X intashyo za Perezida Paul Kagame amugaragariza ko yamwifurije ishya n'ihirwe.

Yagaragaje ko u Rwanda rurajwe ishinga no gukomeza umubano warwo na Thaïlande ndetse ko ruzakomeza gufatanya na yo mu mishinga itandukanye

Umwami Rama X na we yakiriye intashyo za Perezida Kagame yizeza ko azakomeza gushyigikira umubano n'ubufatanye bw'ibihugu byombi.

Na we yahaye intashyo Perezida Kagame n'Abanyarwanda ndetse agaruka ku mubano n'ubufatanye bw'ibihugu byombi bishingiye ku bucuti n'ubwubahane.

Yagaragaje ko anezezwa n'uburyo umubano w'igihugu cyabo n'u Rwanda ukomeje gukura bigashimangirwa n'uburyo ibihugu byombi bifatanya mu nzego zitandukanye.

Amb Mukasine yaganiriye n'Umunyamabanga Uhoraho Wungirije muri Minisiteri y'Ubucuruzi ya Thaïlande, Ekachat Seetavorarat, baganira ku bufatanye mu nzego nk'ubucuruzi, ishoramari, ingufu zisazura, umuco no kwakira abantu.

Yeretse abo muri Thaïlande uburyo u Rwanda rushaka gukomeza umubano n'abo mu nzego z'abikorera muri iki gihugu cyane cyane Ishami ry'Ubucuruzi mu Rugaga rw'Abikorera

Yagaragaje ko u Rwanda runatekereza uburyo bwo gushyiraho Ibiro by'Ubagarariye inyungu z'u Rwanda muri Thaïlande, kugira ngo bifashe ibikorwa bya dipolomasi n'ibijyanye n'ubukungu hagati y'ibihugu byombi.

Ni inkuru abo muri Thaïlande bakiranye ubwuzu na bo bagaragaza ko bashaka kwagura ubufatanye na Afurika u Rwanda rukaba ahantu ha nyaho hazabafasha kwinjira neza ku isoko rya Afurika.

Amb Mukasine kandi yaganiriye na Minisitiri w'Ubutabera, hasuzumwa amasezerano ibihugu byombi biherutse kugirana, anamugezaho ishimwe ry'u Rwanda ku bufatanye ibihugu byombi biherutse kugirana butuma Abanyarwanda 10 babaga muri iki gihugu boherezwa mu Rwanda

Amb Mukasine yanahuye n'Abanyarwanda baba muri Thaïlande, abereka uburyo u Rwanda rukomeje kwita ku Banyarwanda baba muri Diaspora runabafasha gukomeza kugira uruhare mu iterambere ry'Igihugu.

U Rwanda kandi rwatumiwe mu gikorwa cya Guverinoma ya Thaïlande, kiba kigamije kugaragariza abo muri iki gihugu umwihariko w'ibihugu byo muri Afurika.

Ambasaderi Mukasine Marie Claire yatanze impapuro zimwemerera guhagararira u Rwanda muri Thaïlande

Ambasaderi Mukasine yakiriwe mu Ngoro y'Umwami wa Thaïlande izwi nka 'Amphorn Royal Palace' iherereye mu Murwa Mukuru, Bangkok

Ambasaderi Mukasine yaganiriye n’abayobozi bo muri Thaïlande

Biteganyijwe ko aba mbere muri aba Bapolisi bazahaguruka mu Rwanda ku wa 24 Nyakanga 2025 berekeza muri Sudani y'Epfo, aba nyuma bakazagenda ku wa 8 Kanama 2025. Barimo abagore 35 n'abagabo 205.

Umuyobozi Mukuru wungirije wa Polisi y'u Rwanda ushinzwe Ubutegetsi n'Abakozi, DCG Jeanne Chantal Ujeneza, yabasabye guhorana ikinyabupfura n'ubunyamwuga mu butumwa bazakora, no guharanira kurangwa n'indangagaciro nyarwanda kuko u Rwanda ari igihugu cyamenyekanye ku guharanira amahoro.

Abapolisi 240 bagiye koherezwa muri Sudani y'Epfo bazasimbura abari bariyo 240.

Umuyobozi Mukuru wungirije wa Polisi y’u Rwanda ushinzwe Ubutegetsi n’Abakozi, DCG Jeanne Chantal Ujeneza yasabye abapolisi bagiye mu butumwa bw’amahoro kuzarangwa n’ubunyamwuga

Iyi gahunda, ni urubuga rugamije kumurika amahirwe y'ishoramari ari mu Rwanda n'ibicuruzwa bihakorerwa [Made in Rwanda], guteza imbere ubukerarugendo n'umuco, no guhuriza hamwe Abanyarwanda baba mu Bushinwa kugira ngo bagire uruhare mu iterambere ry'igihugu.

Yateguwe na Ambasade y'u Rwanda mu Bushinwa ku bufatanye n'Abanyarwanda baba muri iki gihugu.

Muri iyi gahunda biteganyijwe ko hazaba ibiganiro byo ku rwego rwo hejuru ku bucuruzi, bizakorwa ku bufatanye n'Ikigo cy'u Bushinwa gishinzwe Guteza Imbere Ubucuruzi Mpuzamahanga [China Council for the Promotion of International Trade].

Ni ibiganiro bizahuza Abanyarwanda baba mu Bushinwa, abikorera ku giti cyabo, abacuruzi, abashakashatsi, abakora mu rwego rw'ubukerarugendo, ibigo by'umuco, amashyirahamwe y'ubucuruzi, itangazamakuru ndetse n'inshuti z'u Rwanda.

Magingo aya u Bushinwa ni cyo gihugu kiza imbere y'ibindi mu gukora ishoramari mu Rwanda [foreign direct investment, FDI], ndetse hakanoherezwayo ibicuruzwa byinshi biturutse mu Rwanda. Biteganyijwe ko iyi nama izafasha kurushaho gukomeza umubano usanzweho.

'Meet Rwanda in China' izaba urubuga ruhoraho ruzajya ruhuza Abanyarwanda baba mu mahanga kugira ngo bagire uruhare mu iterambere ry'igihugu cyabo.

Biteganyijwe ko kandi hazizihizwa umunsi w'Umuganura, mu busanzwe usobanura gusangira no kwishimira umusaruro uba waragezweho mu gihe cy'ihinga.
Abazitabira iyi gahunda kandi, bazagira amahirwe yo kuryoherwa na gahunda zitandukanye zirimo imbyino n'indirimbo gakondo, ibisakuzo, guha abana amata, imikino irimo kubuguza n'ibindi.

The inaugural 'Meet Rwanda in China' event is coming to Wuhan on 1—2 August 2025! A unique platform to promote Rwanda's investment opportunities, Made in Rwanda products, tourism, and rich cultural heritage. 🇷🇼🇨🇳 #MeetRwandaInChina #VisitRwanda #InvestInRwanda #BuyMadeInRwanda… pic.twitter.com/WHXu63Uha0

— Rwanda Embassy | China (@RwandaInChina) July 22, 2025

Uyu mugore yafashwe ku wa 22 Nyakanga 2025, afatirwa mu Karere ka Nyarugenge, Umurenge wa Mageragere, Akagari ka Mataba, Umudugudu wa Burema.

Urumogi yafatanywe yari arubitse mu nzu atuyemo kugira ngo arugurishe abakiliya be.

Umuvugizi wa Polisi mu Mujyi wa Kigali, CIP Gahonzire Wellars yabwiye IGIHE ko uyu mugore yafashwe biturutse ku makuru yatanzwe n'abaturage, bahamagaye Polisi ikorera mu Murenge wa Mageragere, bagaragaza ko uyu mugore acuruza urumogi.

Ati 'Abapolisi bihutiye kujya iwe mu rugo bahageze yanga gukingura, nyuma aza kwemera arakingura, basatse inzu atuyemo ni bwo bamusanganye urumogi ndetse n'umunzani akoresha apimira abakiliya be.'

Uyu mugore yajyanywe gufungirwa kuri Sitasiyo ya Polisi ya Mageragere ngo akorerwe dosiye ashyikirizwe Urwego rw'Ubugenzacyaha, akurikiranwe n'amategeko.

CIP Gahonzire yashimiye abaturage bamaze kumva neza uruhare rwabo mu guhashya abantu bakwirakwiza ibiyobyabwenge mu baturage.

Yavuze ko RNP ishishikariza abatari babyumva guhindura imyumvire, bakajya batanga amakuru igihe hari aho babonye ibiyobyabwenge.

Yanaburiye kandi abantu bacyumva ko bazakora imishinga yo gucuruza ibiyobyabwenge, abereka ko bitazabahira kuko Polisi ifatanyije n'abaturage n'izindi nzego, bahagurukiye iki kibazo kugira ngo abijandika muri ibi bikorwa bafatwe bahanwe.

CIP Gahonzire ati 'Ababinywa na bo baragirwa inama yo kubireka kuko nta cyiza kirimo uretse kwangiza ubuzima bwabo.'

Iteka rya minisitiri nimero 001/moh/2019 ryo ku wa 04 Werurwe 2019 rigena urutonde rw'ibiyobyabwenge n'ibyiciro byabyo, rishyira urumogi mu biyobyabwenge bihambaye.

Ni mu gihe itegeko nimero 68/2018 ryo ku wa 30 Kanama 2018 riteganya ibyaha n'ibihano muri rusange, ingingo yaryo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw'imiti ikoreshwa nka byo mu buryo bunyuranije n'amategeko, aba akoze icyaha.

Iyo abihamijwe n'urukiko ahanishwa igifungo cya burundu n'ihazabu irenze miliyoni 20 Frw ariko itarenze miliyoni 30 Frw ku byerekeye ibiyobyabwenge bihambaye.

Polisi y’u Rwanda yafashe umugore wacururizaga urumogi i Mageragere mu Karere ka Nyarugenge

Ni iwabo w'ibyiza nyaburanga birangajwe imbere na Pariki y'Ibirunga ibarizwamo ingangi zo mu misozi miremire zisigariye hake ku Isi, hoteli zo ku rwego rwo hejuru n'ibindi.

Mu kiganiro na IGIHE, Guverineri Mugabowagahunde Maurice uyobora iyi ntara yavuze ko ubukerarugendo mu Ntara y'Amajyaruguru bushoboka cyane, bijyanye n'ubwiza nyaburanga buharangwa.

Yavuze ko nko mu Karere ka Musanze, habarirwa hoteli zirenga 50 zirimo izifite inyenyeri eshanu zakira ba mukerarugendo bo ku rwego rwo hejuru.

Yagarutse nko kuri Amakoro Songa Lodge iherereye mu Kinigi, Bisate Eco Lodge iherereye muri uyu murenge, One&Only Gorilla's Nest n'izindi zikomeje gutanga akazi ku bo mu Ntara y'Amajyaruguru.

Ati 'Dufite hoteli z'inyenyeri eshanu, enye kugeza ku zifite inyenyeri imwe ku buryo udusuye wese abasha kwibona muri hoteli dufite hano, akabasha kubona aho yakirirwa.'

Yavuze ko kandi izi hoteli zitanga imirimo mu buryo bunyuranye yaba ku batwaza ba mukerarugendo, abakora muri hoteli, abatanga amafunguro, abatwara abagenzi n'abandi, haherewe ku baturage baturiye izi hoteli.

Guverineri Mugabowagahunde kandi yavuze ko mu byishimirwa harimo ko abubaka izi hoteli banakoresha ibikoresho basanze i Musanze, hibanzwe ku makoro aboneka muri iki gice cy'ibirunga ku bwinshi.

Ati “Nkanjye navukiye muri aka gace, amakoro twayabonaga nk'ibintu bitubangamiye […] ariko ubu na yo yagize agaciro gakomeye, ubu izi hoteli zikomeye zirubakisha ibi bikoresho zisanga hano.”

Guverineri Mugabowagahunde yavuze ko hoteli zirenga 50 ziri i Musanze zikomeje kugira uruhare mu mibereho myiza y’abaturage

Izi hoteli kandi zishimirwa kugira uruhare mu kubungabunga umuco nyarwanda no kubungabunga ibidukikije muri ibi bihe u Rwanda n'Isi muri rusange bihanganye n'ingaruka z'imihindagurikire y'ibihe.

Yatanze urugero kuri Amakoro Songa Lodge, agaragaza ko iyo umuntu agiyeyo asanganirwa n'indirimbo za Kinyarwanda n'ibindi bigaruka ku muco Nyarwanda, bigatuma abahasura bawumenyaho byinshi.

Yibukije ko nk'ubu benshi mu bakozi b'izi hoteli bari ba rushimusi bagiraga uruhare mu gushimuta inyamaswa no gutema ibiti, ariko mu kubungabunga urusobe rw'ibinyabuzima barasobanuriwe berekwa akamaro ko kubungabunga Pariki y'Ibirunga.

Ati 'Ikindi ni uko abasura izi hoteli bashishikarizwa gusiga bateye ibiti, mu kubungabunga ibidukikije. Uwasuye iyi hoteli asiga ateye igiti cye akacyita izina, akazajya agaruka kureba uko kibayeho, bikadufasha kubungabunga ibidukikije.'

Zigira kandi umumaro munini mu guteza imbere ubukungu bw'abaturage n'igihugu muri rusange, kuko ibizikoreshwamo biba byaguzwe mu baturage baturiye hafi yazo, bakigishwa n'uburyo bwo kubihinga bigezweho bijyanye n'ibyo izi hoteli zifuza.

Uretse Pariki y'Ibirunga, i Musanze hari ubuvumo na bwo bukurura ba mukerarugendo, Guverineri Mugabowagahunde yavuze ko bahisemo guteza imbere ibindi bikorwa nyaburanga bashobora gusura.

Ati 'Dufite ibiyaga bya Burera na Ruhondo, ahazwi nka Nkotsi na Bikara [aho gihanga yagiraniye inama y'umushyikirano n'abami b'abasangwabutaka], na ho harasurwa cyane, dufite Umusozi wa Kabuye mu Karere ka Gakenke. n'ahandi.'

Yagaragaje ko Intara y'Amajyaruguru ari ho habarizwa Igishanga cya Rugezi, gicumbikiye urusobe rw'ibinyabuzima ndetse mu minsi ishize havumbuwe amoko y'ibinyabuzima arenga 400 arimo ataboneka ahandi.

Mu Ntara y'Amajyaruguru batangiye guteza imbere ubukerarugendo bushingiye ku buhinzi, nko mu turere twa Rulindo na Gakenke, ahari abajya kwihera ijisho uko ikawa itegurwa.

Ati 'Ubu twatangiye ubukerarugendo bushingiye ku buhinzi bw'ibirayi mu Karere ka Musanze. Abantu bakamenya n'ibindi biva mu birayi, ubu dufite uruganda rwenga inzoga mu birayi. Abantu bakamenya uko ikirayi gihingwa'

Guverineri Mugabowagahunde yagaragaje ko bari guteza imbere ubukerarugendo bushingiye ku buhinzi

Mu minsi ishize Urwego rw'Igihugu rw'Iterambere, RDB, rwatangaje ko amafaranga y'u Rwanda arenga miliyari 30,7 Frw azifashisha mu gutera inkunga imishinga y'abaturiye Pariki y'Ibirunga kugeza mu 2028.

Abaturage baturiye parike zitandukanye buri mwaka basaranganywa 10% by'ayo zinjije, agashyirwa mu bikorwa by'inyungu rusange n'imishinga y'iterambere n'imibereho myiza.

Iyi raporo igaraza ko imishinga 105 y'abaturage yatewe inkunga, igizwe na 43,1% ikora mu bikorwa by'ubuhinzi, 41% ijyanye n'ibikorwaremezo, 10,5% yakoreshejwe mu gutanga ibikoresho bitandukanye, 2,9% akoreshwa mu gusana ibikorwa by'abaturage inyamaswa zangije, mu gihe 1,9% yagenewe ibigo by'ubucuruzi by'abaturage baturiye barike.

Guverineri Mugabowagahunde ati 'Iryo 10% ridufasha gukora imishinga itandukanye nko gukwirakwiza amazi hose, ku buryo nk'imirenge umunani ikora kuri Pariki, ikibazo cy'amazi cyamaze gukemuka.'

Ayo mafaranga yavuze ko yifashishwa mu kubaka ibindi bikorwaremezo nk'amashuri, ibiraro, imihanda ifasha mu kugeza umusaruro w'ubuhinzi ku isoko, bikajyana no kuvana abaturage mu bukene.

Guverineri Mugabowagahunde yibukije kandi ko umuhango wo kwita izina abana b'ingagi na wo ugira uruhare runini mu gutuma Intara y'Amajyaruguru isurwa, na none imirimo ikaboneka ku bwinshi, buri wese amafaranga akamugeraho.

Yanashimiye ubuyobozi bw'igihugu bwashyizeho ibikorwaremezo bitandukanye butuma gusura ibyo byiza nyaburanga, anashishikariza Abanyarwanda gusura ibi bice kuko boroherejwe cyane.

Intara y'Amajyaruguru ituwe n'abaturage 2.038.511 iri ku buso bwa kilometero kare 3.293,3 ikagirwa n'uturere dutanu, imirenge 89, utugari 414 n'imidugudu 2744.

Kurikira ikiganiro cyihariye IGIHE yagiranye na Guverineri Mugabowagahunde

Umunyamakuru wa IGIHE ashimira Guverineri w’Intara y’Amajyaruguru, Mugabowagahunde Maurice wabakiriye

[email protected]

Iki gihembo kizwi nka 'Veronica Rudge Green Prize in Urban Design', kigamije guha ishimwe imishinga irangwa n'ubuhanga buhanitse mu gushushanya no gutunganya imijyi (urban design) no mu kuyobora imishinga igira uruhare mu iterambere rirambye ry'imijyi n'imibereho myiza y'abaturage, kikaba cyatangwaga ku nshuro ya 15.

Kaminuza ya RICA yubatswe ku buso bwa hegitare 1400, ikaba yarashushanyijwe, inubakwa na Sosiyete ya MASS Design Group, kuva ku gukora igishushanyo-miterere, kubaka, gutegura ubusitani no gushyiramo ibindi bikoresho byose. Ifatwa nk'icyitegererezo cy'ubuhanga mu kubungabunga ibidukikije, ubufatanye n'abaturage, no mu kugira igishushanyo-miterere cy'indashyikirwa.

Umuyobozi w'Akanama Nkemurampaka k'ibi bihembo, Joan Busquets, yavuze ko “Muri ibi bihembo, GSD yemera ko ubwiza mu miterere y'inyubako atari bwo gusa bukwiye gushimwa, ahubwo n'uburyo bikorwa…Umushinga wa RICA wagennye igipimo gishya mu kugenzura udushya mu rwego rwo gutunganya imijyi.”

Kaminuza ya RICA yubatswe mu buryo bwita ku ntego y'ubuzima bukomatanyije (One Health), ishingiye ku guhuza ubuzima bw'abantu, ubw'amatungo n'ubw'ibidukikije.

Uburyo iki kigo cyubatsemo burimo inyubako z'amashuri, amacumbi y'abanyeshuri, ibiraro by'amatungo, inganda zitunganya ibiribwa, uburyo bwo gukusanya no gutunganya amazi n'imyanda hamwe n'imiyoboro y'ingufu zituruka ku bidukikije. Hari inzira imwe ihuriza hamwe iki kigo, igihuza ahakorerwa ibikorwa by'ubuhinzi n'aho abantu baba, mu buryo bwateguwe neza.

Umwe mu bayobozi bakuru ba MASS Design Group, Alan Ricks, yagize ati “RICA ni urugero rukomeye rutwibutsa ko igishushanyo-miterere gishobora kuba byombi, icyitegererezo cy'uburumbuke buterekanwa no kugira ibisaga, ahubwo no kugira uburinganire, aho uburezi, kubungabunga ibidukikije ndetse n'imibereho myiza y'abaturage biterera imbere hamwe.”

Yavuze ko kubungabunga ibidukikije ari cyo cyari ku isonga mu ishyirwa mu bikorwa ry'uyu mushinga. Inyubako z'iki kigo zubatswe hifashishijwe ibikoresho biboneka mu gihugu nk'amabuye n'itaka kandi yubakwa mu buryo burengera ibidukikije.

Ibikoresho birenga 90% byakoreshejwe byabonetse mu ntera itarenga ibirometero 800, naho hafi 96% by'ibyayubatse byose byaturutse mu Rwanda. Ikipe yabigizemo uruhare ivuga ko umubare w'imyuka ya karubone yagiye mu kirere kubera kubaka RICA iri munsi ya 58% ugereranyije n'imishinga nk'iyi ku rwego rw'Isi, kandi bishoboka ko iyi nyubako izaba ibungabunga ikirere kurushaho bitarenze 2044.

Imirasire y'izuba ifite ubushobozi bwa megawati 1.5 ni yo itanga umuriro w'amashanyarazi ukoreshwa muri RICA n'imiyoboro y'amazi akoreshwa mu kuhira imyaka. Amazi y'imyanda arasukurwa agakoreshwa mu kuhira imyaka y'ibiribwa by'amatungo, naho imyanda iva ku matungo igakoreshwa nk'ifumbire y'imborera, bigafasha mu kugabanya imyuka ihumanya ikirere.

Kaminuza ya RICA yahawe igihembo mpuzamahanga kubera imyubakire ibungabunga ibidukikije

Iyi kaminuza yubatse ku buso bwa hegitare 1400

Ibikorwa byo kuhira imyaka bikorwa hifashishijwe ingufu zituruka ku mirasire

Munyentore Théobard, uri mu kigero cy'imyaka 60 wo mu Karere ka Nyaruguru, Umurenge wa Ngoma, Akagari ka Rubona, mu Mudugudu wa Shyoko, we yumviye inama zo guhinga imyumbati mu buryo bugezweho, none ubu ageze ku rwego rwo kweza hagati y'ibilo 70 na 80 ku giti kimwe cy'umwumbati yateye.

Uyu mugabo avuga ko ubu buryo bw'imihingire abukomora ku rugendoshuri yigeze kwitabira mu Karere ka Gisagara, akerekwa umuhinzi uhinga neza imyumbati, bikamuha isomo agahita amwigana.

Aganira na IGIHE, Munyentore yavuze ko imihingire y'imyumbati itanga umusaruro.

Ati ''Uracukura ubutaka ukabumenagura, ukongera ukagaruramo bwa butaka, ugashyiramo ifumbire y'imborera nk'udutebo dutatu, noneho ugatera ingeri imwe y'umwumbati, kugira ngo uzere wisanzuye, ushora imizi neza ari nayo ihinduka imyumbati ku ntera itubutse, maze ikera bihagije.''

Yavuze ko ubu atakirirwa atekereza kumara ubutaka bwe agena aho ahinga imyumbati hihariye, kuko imyumbati ye ayihinga mu rutoki bitamugoye.

Atanga inama ku bandi bahinzi cyane cyane abadafite ubutaka butubutse.

Ati ''Buri muntu wese akwiye kwikebuka, akareba niba ubuhinzi bwose akora bumuha umusaruro agashakisha tekiniki yose yatuma ahinga akeza.''

Munyentore, ubu umaze kugira ibiti bisaga 50 by'imyumbati, akomeza avuga ko yigishije n'abandi baturanyi be nabo bakaba bamaze kubiyoboka aho bamushimira ko yabarahuriye ubwenge bw'imihingire myiza.

Impuguke mu bukangurambaga bw'abaturage akaba n'umukozi wa AEE, mu Ntara y'Amajyepfo, Dusengimana Osée, ashishikariza abaturage bose gukanguka, bagatekereza ubuhinzi buvuguruye budatwara ubutaka bunini, kugira ngo bongere umusaruro.

Ati ''Umuntu ashobora gusarurura ibilo 70 kuri 'are' 10, mu gihe, nyamara yakabaye asaruraho toni irenga, ni ibyumvikanisha ko abantu bose bakwiye kubiyoboka. Urumva ibiti 50, nukuba n'ibilo 70 byera kuri kimwe, azasaruraho toni eshatu zirenga kandi ku buso buto. Igikenewe ni ukubyumva kuko abahanga barabigaragaje.''

Imyumbati ni kimwe mu bihingwa biri gutezwa imbere. Mu mpera za 2024 Ikigo cy'Igihugu gishinzwe iterambere ry'Ubuhinzi n'Ubworozi, RAB cyatangaje ko hari hamaze gutunganywa imbuto z'imyumbati 12 zahinduriwe uturemangingo, harimo ubwoko butatu bwashoboraga guhita buhabwa abaturage.

Ab’i Nyaruguru biyemeje gukora ubuhinzi bw’imyumbati bugezweho