Blog

Janet Israel yahuye na Rev Lucy Natasha ku Cyumweru tariki 13 Gashyantare 2022. Yavuze ko yahuye na Rev. Natasha n’umugabo we Prophet Carmel nyuma y’ubutumire bari bamuhaye bw’ibirori byo gutangiza ku mugaragaro igikorwa bashyizeho umutima muri iyi minsi. Byahuriranye kandi no kwizihiza isabukuru y’umwaka umwe y’Itorero ryabo bise Empowerment Christian Church (ECC). Ati “Twahuye ejo tariki 13 Gashyantare kuri Church yabo, niho bantumiye muri ‘One year Celebration’, bana launching icyo bise Fearless Generation. Ni ivugabutumwa barimo gutegura ahantu hatandukanye”.

Janet Israel yabwiye InyaRwanda.com akunda cyane Rev. Lucy Natasha ndetse anahishura ko ari we afatiraho icyitegererezo. Yavuze ko mu byo amukundira harimo kuba yigirira icyizere, kubwiriza adategwa, gukorera kuri gahunda ibintu byose biteguwe neza, no kuba yarakoreye Imana ari umukobwa ntacike intege kugeza ashatse umugabo. Ati “Icya mbere mukundira ni ‘Self Confidence’. Icya kabiri ni uburyo abwiriza adategwa, icya 3 ni uburyo ari organised muri Ministry ye, icya kane ni ukuntu yakoreye Imana ari umukobwa ntacike intege kurinda ashatse”.

Ev. Janet Israel hamwe na Rev. Lucy Natasha 

Umuvugabutumwa Janet Israel wamamaye mu kujyana abantu muri Israel, si ubwa mber ahuye na Rev. Lucy Natasha kuko baherukaga guhurira mu Rwanda mu mwaka wa 2018. Bongeye guhura nyuma y’iminsi micye Janet Israel n’umugabo we Pastor Francis Sendakize batangije umuryango w’ivugabutumwa (Ministry) New Jerusalem Healing Centre unafite Itorero bise New Jerusalem Temple (NJT) ryubakiye ku cyanditswe cyo muri Bibiliya mu gitabo cy’Ibyahishuwe 21:2. Ni igikorwa cyabaye mu Ntangiriro z’umwaka wa 2022 mu kwezi kwa Mutarama kibera muri Kigali.

Gutumirwa muri Kenya na Rev. Lucy Natasha ndetse n’umugabo we Prophet Carmel Stanley, byazamuye amarangamutima ya Ev. Janet Israel na cyane ko afata Lucy Natasha nk’icyitegererezo kuri we. Kuva kera cyane yamye atangaza ko akunda bihebuje Rev. Natasha. Janet Israel yanditse kuri Instagram ati “Mbega umugisha nagiriwe wo guhura n’uwo mfatiraho icyitegerereo (Role model), umuvandimwe wanjye (Sister) na Prophet Carmel. Byari umugisha kwifatanya namwe mu kwizihiza isabukuru y’umwaka umwe ya ECC (Empowerment Christian Church). Mbifurije kuzizihiza imyaka ibihumbi”.

Janet Israel yamamaye kubera gufasha abantu kujya gusura igihugu cya Israel

Janet Israel umaze kujyana muri Israel abanyarwanda batari bacye biganjemo abapasiteri barimo na Apotre Dr Paul Gitwaza, yashyize ku rukuta rwe rwa Instagram amafoto atatu amugaragaza ari kumwe na Rev. Natasha. Ifoto ebyiri zimugaragaza ari kumwe na Rev. Natasha n’umugabo we Prophet Carmel naho ifoto ya gatatu imugaragaza ari kumwe na Rev. Natasha ari bonyine, barimo gusenga bafatanye mu biganza. Ev. Janet Israel ati “Nakiriye (umugisha) mu izina ry’Umwami wacu Yesu. Amen”. Yongeye arandika, asabira umugisha iyi ‘Couple’ ku bwo kumugira inama nziza.

Rev. Lucy Natasha watumiye umunyarwandakazi Janet Israel, ni Umushumba Mukuru w’Itorero Empowerment Church rikorera muri Kenya, akaba ari no mu bapasiteri bakunzwe cyane muri Kenya no mu Karere, by’akarusho akaba ayoboye ku mbuga nkoranyambaga aho kuri Instagram akurikirwa n’abarenga ibihumbi 820. Kuri ubu ari kugaragara mu bikorwa by’ivugabutumwa agaragiwe n’umugabo we Prophet Carmel ukomoka mu Buhinde. Amafoto y’aba bombi bambaye imyenda itandukanye ibereye ijisho akunze kuvugisha benshi ku mbuga nkoranyambaga.

Rev. Lucy Natasha ari mu banya-Kenya batunze amafaranga menshi dore ko abarirwa umutungo ugera kuri Miliyoni 120 z’amashiringi yo muri Kenya, mu manyarwanda akaba arenga Miliyari imwe (1,103,514,878 Frw). Ari no mu bagore b’uburanga batigisa imbuga nkoranyambaga cyane cyane Twitter na Facebook. Natasha ukunzwe cyane n’abiganjemo urubyiruko, aheruka mu Rwanda mu mwaka wa 2018 ubwo yari yatumiwe mu giterane cy’iminsi itatu cyizwe ‘3 Days of Glory’ cy’umuryango Zoe Family Ministries washinzwe na Esperance Buliza.

Ev. Janet Israel yishimiye ibiganiro byiza n’inama zubaka yagiriwe na Rev. Natasha n’umugabo we Prophet Carmel

Ev. Janet Israel yaherukaga guhura na Rev. Lucy Natasha mu mwaka wa 2018

Ev. Janet Israel hamwe n’umugabo we Pastor Francis bashakanye mu 2017

Pastor Sendakize Francis umugabo wa Ev. Janet Israel

Ubwo Rev. Lucy Natasha yambikwaga impeta mu Ugushyingo 2021

Rev. Lucy Natasha ni we Ev. Janet Israel afatiraho icyitegererezo

Rev. Lucy Natasha n’umugabo we Prophet Carmel banazwi kwambara bakarimba

Ku wa Gatandatu tariki ya 12 Gashyantare 2022, nibwo Maniraguha Ndamage Jean Damascene yatorewe kuyobora ikipe ya Mukura asimbuye Olivier Nizeyimana Mugabo watorewe kuyobora Ishyirahamwe ry'umupira w'amaguru mu Rwanda 'FERWAFA'.

Maniraguha usanzwe ari Rwiyemezamirimo ndetse unafite inganda zitandukanye mu ntara y'Amajyepfo, yatorewe uyu mwanya kugira ngo akomeze guharanira iterambere n'umusaruro mwiza w'ikipe, ariko kandi akemure ikibazo cy'imyenda iyi kipe ibereyemo abatoza batandukanye.

Nyuma yo gutorerwa kuyobora Mukura, Maniraguha yavuze ko ikimuzanye muri iyi kipe ari ugutwara igikombe cya shampiyona.

Yagize ati'Intego dufite ni ugutwara ibikombe, Mukura ntabwo ari ikipe ya Rugby, ntabwo ari ubucuruzi, icyo dushaka ni ugutwara ibikombe no kwiyerekana'.

Uyu muyobozi yavuze ko intego ya mbere we na komite bagiye gukorana ari ugushaka ubushobozi, gushyira hamwe no kongerera imbaraga za Fan club no kunga ubumwe.

Perezida mushya wa Mukura, yagarutse ku buryo agiye kwitwara mu kibazo cy'umwenda wa miliyoni 46 Frw iyi kipe ibereyemo abatoza bayitoje ariko bakirukanwa amasezerano yabo atarangiye.

Yagize ati'Twahinduye inama y'ubutegetsi y'ikipe tugerageza gushyiramo abantu bafite ubushobozi, twagize amahirwe COVID-19 iri kugabanyuka, ni ukugerageza gutsinda ku buryo abafana baza ku kibuga  ari benshi amafaranga akinjira, ikindi dufite gahunda yo kuvugana n'abaterankunga batandukanye, hari abo dufite ndetse hari n'abandi duteganya, dufite amahirwe yo kubona amafaranga menshi yo kuzakemura ibyo bibazo'.

Maniraguha agiye kuyobora Mukura Victory Sport mu gihe cy'imyaka ine iri imbere.

Maniraguha Ndamage Jean Damascene yatorewe kuyobora Mukura Victory Sport

Ibi birori byabaye kuwa Gatandatu tariki 12 Gashyantare 2022 bibera mu Mujyi wa Kigali mu Ubumwe Grande Hotel. Baker Samuel n'umukunzi we bari baberewe cyane mu myenda yiganjemo amabara y'umutuku n'umukara y'abantu bakundana. Umunsi wahariwe abakundana (Saint Valentin) ntiwari wakageze kuko uba buri mwaka kuwa 14 Gashyantare, ariko bo bawizihije tariki 12/02 nk'umunsi batangiriyeho byeruye urugendo rwabo rw'urukundo ruganisha ku kubana ubuziraherezo.

Baker Samuel na Jocelyne baritegura gukora ubukwe mu 2022

Baker Samuel umusore ushinguye w'inzobe yenda kuba imibiri yombi, yari yambaye ibara ry'umukara ahantu kose kuva ku nkweto, ipantalo kugeza ku ishati. Yari yambaye ishati iriho umugongo w'umweru ku ruhande rw'ibumoso ahagana ku gituza. Umukunzi we Jocelyne w'inzobe icyeye, ufite ishinya yenda kuba umukara, amenyo y’urwererane n'igara rito nk'iry'aba Miss, yari yambaye ipantalo y'umweru de ndetse n'ishati y'umutuku wererutse irimo utudomo duto tw'umweru.

Ugendeye ku mafoto n’amashusho y’iki gikorwa kizwi nka ‘Proposal’ cyangwa ‘Engagement’ mu ndimi z’amahanga, bigaragara ko Jocelyne Uwase yambitswe impeta mu buryo bwamutunguye (Surprise). Mu mashusho y’aba bombi yashyizwe ku mbuga nkoranyambaga na Mike Karangwa, Jocelyne yinjirana na bagenzi be muri Hoteli ibi birori byabereyemo, agatungurwa no kubona umukunzi we amusanganiye ari na bwo yamusabaga kuzamubera umugore. Jocelyne agaragara asa nk’ubaza bagenzi be impamvu bamujijishije.

Muri ibi birori byitabiriwe n'abantu bacye mu kwirinda icyorezo cya Covid-19, Baker Samuel n’umukunzi we Jocelyne bamaze imyaka ibiri n'andi mezi mu buryohe bw'urukundo, bari bagaragiwe n'inshuti zabo za hafi zirimo umunyamakuru Mike Karangwa na Munyakazi Sadate b’amazina azwi mu myidagaduro. Baker Samuel yasabye Jocelyne kuzamubera umugore, undi ntiyazuyaza amubwira YEGO, maze umusore ahita amwambika impeta 'Fiançaille', barahoberana biratinda, barasomana, umukobwa asuka amarira kubera ibyishimo. 

KANDA HANO UREBE AMASHUSHO MATO Y’UKO IBI BIRORI BYARI BIMEZE

Ijuru rito! Byari umunezero mwinshi kuri Baker Samuel na  Jocelyne ku munsi wabo w’amateka wa ‘Engagement’

Baker Samuel BYANSI yabwiye InyaRwanda.com ko hashize imyaka ibiri akundana na Uwase Jocelyne wanyuze umutima we, bigatuma amurutisha abandi bakobwa bose yamenye. Yavuze ko yakunze Jocelyne kubera ko ari we mufana we wa mbere ukunda ibyo akora. Ati: 'Umukunzi wanjye tumaranye igihe cy'imyaka 2 n'amezi arengaho. Ikintu mukundira cyane ni ukubera ko ari we mufana wa mbere ngira, akunda ibyo nkora kandi abiha agaciro'.

Ati 'Nawe akunda inkuru zicukumbuye 'Investigative stories' so she is supportive'. Yunzemo ko Jocelyne ari we mujyanama afite, ati'Kandi ni we mujyanama mukuru nsigaye mfite yaba mu buzima busanzwe ndetse no mu kazi'. Ku bijyanye n'igihe bateganya gukora ubukwe, yavuze ko ari muri uyu mwaka wa 2022. Ati 'Ubukwe bwacu turabuteganya muri Summer y'uyu mwaka Imana nidutiza ubuzima'.

Jocelyne ni umukunzi akaba n’umujyanama wa Baker Samuel

Baker Samuel yanditse kuri Twitter ashimira umukunzi we wamubwiye YEGO, nyuma y'amasaha macye yari ashize ku mbuga nkoranyambaga cyane cyane Twitter hari amakuru avuga ko uyu musore yaba yaburiwe irengero, ndetse uwabitangaje yahise amenyesha RIB na Polisi. Twabajije Baker Samuel uko byari byamugendekeye, avuga ko yari arwaye ndetse akaba yari ahugiye muri ibi birori bye. Ati 'Njye nari ndwaye kandi ndi no gutegura biriya birori, so uko wabibonye nanjye ni ko nabibonye'.

Nk'umuntu umaze iminsi ibiri yambitse umukunzi we impeta y'urukundo, ubu Isi yose ikaba iri kwizihiza Umunsi Mpuzamahanga wahariwe abakundana (Saint Valentin), birumvikana ko Baker Samuel na Jocelyne bari mu bantu bari kumva cyane uburyohe bw'uyu munsi. Twabajije uyu musore umuhanzi nyarwanda akunda, ndetse n'indirimbo y'urukundo yatura umukunzi we, adusubiza agira ati 'Umuhanzi Nyarwanda nkunda ni 'Late Jay Polly', gusa indirimbo natura umukunzi wanjye kuri iyi St Valentin ni 'I LOVE YOU TOO' ya Yvan Buravan.

Baker Samuel BYANSI ni muntu ki mu Itangazamakuru ?

Baker Samuel BYANSI ni umunyamakuru wa Royal Fm mu kiganiro 'Face of the Nation' kiba buri ku wa Gatandatu kuva saa mbiri za mu gitondo kugeza saa za mu gitondo (8am to 10am). Amaze umwaka n'igice akora muri iki kiganiro kibanda ku makuru acukumbuye y'ibiba bigezweho mu gihugu n'andi anyuranye, kigatumirwamo abantu batandukanye barimo na bamwe mu bayobozi bakuru mu nzego za Leta n'iz'abikorera. Yakoze kandi kuri Radio / TV 10.

Uyu musore watangiriye urugendo rw'itangazamakuru kuri Goodrich TV, magingo aya akora kuri Royal FM, akanakorana ibiganiro mbarankuru 'Documentary' na BTN TV, TV10 ndetse na M28 Investigates. Muri 2019 afatanyije n'abandi banyamakuru batangije M28 Investigates ikora inkuru zicukumbuye gusa, ikanigisha n'abandi kuzikora. Baker Samuel ni umunyamuryango w'Ishyirahamwe ry'Abanyamakuru mu Rwanda (ARJ)n'Urwego rw'Abanyamakuru Bigenzura(RMC).

Baker Samuel yaminuje mu itangazamakuru, mu mwihariko w'Itangazamakuru Ricukumbura (Investigative Journalism). Yize muri Uganda ndetse no muri Kenya. Nyuma yo kuva ku ntebe y'ishuri, yakoze amahugurwa atandukanye mu gukora inkuru zicukumbuye akaba ari na zo akora magingo aya abinyujije mu Kigo cy'Itangazamakuru kidaharanira inyungu yashinze afatanyije na bagenzi be nk'uko yabidutangarije (Non-Profit Newsroom ya M28 Investigates).

Ni umunyamuryango wa Global Investigative Journalism Network, akaba akorana n'ibindi bitangazamakuru nka Africa Uncensored, Zam Magazine, IWPR ndetse n'ibindi nk'Umunyamakuru Wigenga (Freelance). Impamvu akunda gukora Inkuru Zicukumbuye, ayisobanura muri aya magambo: 'Impamvu nkunda Investigative stories ni ukubera ko zizana impinduka muri sosiyete. Itangazamakuru ntacyo rimaze igihe cyose ridafasha umuryango mugari guhinduka mwiza 'Positive Change as an impact'.

Baker Samuel yabwiye InyaRwanda.com ko afite abantu batatu afatiraho urugero. Ati 'Jyewe ngira aba ‘Role Model’ batatu (3). Uwa mbere ni John Allan Namu, Co-Founder wa Africa Uncensored kandi nawe akaba Investigative Journalist (Kenya). Uwa kabiri niDayo Ayitan, Founder waInternational center for investigative Reporting l, nawe akaba Investigative Journalist (Nigeria). Uwa gatatu niAnas Aremeyaw Anas, Founder waTiger Eye, akaba na Undercover Journalist muri (Ghana)'.

Baker Samuel na Joselyne bagiye kurushinga nyuma y’imyaka 2 bamaze bakundana

Munyakazi Sadate ari mu bitabiriye ibirori Baker Samuel yambikiyemo impeta umukunzi we Jocelyne

Mike Karangwa yitabiriye ibi birori

Bahoberanye biratinda!

Jocelyne yishimye akumva yaguruka kubera ko agiye kurushinga na Rudasumbwa we!

Inshuti za Baker na Jocelyne zishimiye intambwe bateye mu rukundo rwabo

Ubwo Baker Samuel yambikaga umukunzi we impeta ntiyigeze atera ivi nk’uko bamwe babiharaye

Uwase Jocelyne hamwe n’urungano rwe rwishimiye cyane intambwe yateye

Samuel B. Baker na Jocelyne bamaze imyaka ibiri bakundana

Samuel B. Baker ni umunyamakuru wa Royal Fm ukora Inkuru Zicukumbuye

Samuel B. Baker na Conary Mugume wa NBS Tv uri mu banyamakuru bakomeye muri Uganda ubwo bari bahuriye ku mupaka wa Gatuna kuwa 31 Mutarama 2022

REBA HANO “I LOVE YOU TOO” YA YVAN BURAVAN INDIRIMBO BAKER SAMUEL YATUYE UMUKUNZI WE JOCELYNE KURI UYU MUNSI WA SAINT VALENTIN

Mu gitondo cyo kuri uyu wa Mbere tariki ya 14 Gashyantare 2022, ni bwo inkuru y'incamugongo yasakaye ko Baziki Jean Pierre wari Kit Manager w'ikipe y'igihugu Amavubi yitabye Imana azize uburwayi.

Baziki yari amaze imyaka irenga 8 akorera ikipe y'igihugu Amavubi, gusa urugendo rwe ku Isi rukaba rwarangiye mu gitondo cyo kuri uyu wa Mbere mu bitaro bya CHUK yari arwariye.Ntabwo uburwayi bwahitanye Baziki bwatangajwe, gusa icyavuzwe ni uko yazize uburwayi.

Baziki Jean Pierre wari Kit Manager wa Amavubi yitabye Imana

Imana imuhe iruhuko ridashira kandi ikomeze umuryango we n'umuryango mugari w'abasportif mu Rwanda kuko babuze umuntu w'ingenzi.

Umuhanzikazi nyarwanda, Alyn Sano yamaze gushyira hanze indirimbo 'Boom’ izaba iri kuri Album ye avuga ko izaba idasanzwe yise 'Intare y’ingore y’Afurika’ (African Lioness).

Uyu muhanzikazi aherutse gusohora amashusho y’indirimbo 'Boom’, ikaba ari indirimbo y’urukundo ituje avuga ko yakoze mu rwego rwo gufasha abakundana kuryoherwa n’urukundo mu njyana ituje.

Ati 'Nashakaga gukora indirimbo y’abakundana kandi iryoheye amatwi itihuta cyane ariko na none idatuje cyane, nibwo mu mutwe hajemo ijambo 'Boom’ kuko nkunda no kurivuga, mpita nandika iyo ndirimbo.'

Iyi ndirimbo Boom, Alyn Sano yumvikana mu ijwi ry’umukobwa uba uvuga ko iyo umukunzi we ahari aba yumva ari bwo yuzuye, akaba ndetse ari nayo mpamvu ituma abyuka buri munsi ko yumva bakwibanira ubuziraherezo, ngo azamutwara aho yumva ashaka hose.

Alyn Sano kandi yabwiye ISIMBI ko nta byinshi yatangaza kuri Album ye ya mbere 'African Lioness’ n’impamvu yayise iri zina, ngo hari ibyo akirimo kunoza azabitangaza mu minsi ya vuba.

Yakomeje avuga ko ikintu yayibwiraho abakunzi be ari uko izaba ari album iriho umwihariko kuko hazaba hariho n’ubundi butumwa butari urukundo.

Ati 'Abakunzi banjye ikintu kimwe nayibabwiraho ni uko nzabaha umuziki ntasanzwe mbaha, izaba ari album iriho ubutumwa butandukanye butari urukundo gusa, ikindi kandi ni uko igiye kuza vuba cyane.'

Iyi Album kandi ikazaba iriho indirimbo 12, aho avuga ko izakorwaho n’abahanzi batandukanye ndetse barimo n’abo hanze y’u Rwanda.

Youvia yagersgeje kwishyura ibitego ariko biranga

Mu mukino ubanza wa ½ wabereye i Kayonza, ikipe ya Kayonza WFC yari yatsinze Youvia WFC ibitego 4 ku busa, bivuze ko byasabaga ikipe ya Youvia kuzakora iyo bwabaga igatsinda ibitego biri hejuru ya 4 ku busa mu mukino wo kwishyura, kugira ngo yizere gusezerera Kayonza WFC, ndetse inerekeze mu kiciro cya mbere.

Ntabwo bwakuze rero kuko mu mukino wo kwishyura wabaye ku wa Gatandatu taliki 12 Gashyantare 2022 i Masoro warangiye ikipe ya Youvia WFC itsinze Kayonza ibitego 4-2, bituma ihita itakaza amahirwe yo kwerekeza mu kiciro cya mbere, kuko ikipe ya Kayonza WFC niyo yahise izamuka ku giteranyo k’ibitego 6-4.

Tuyishimire Angelique aracyari muri koma

Nyuma y’uwo mukino, abakinnyi ba Youvia WFC bananiwe kubyakira dore ko ari nawo mukino bari batsinzwe rukumbi kuva batangira shampiyona, maze amarira aba benshi mu bakinnyi ba b’iyo kipe, ndetse bamwe birakomera bajyanwa no kwa muganga. Uwitwa Tuyishimire Angelique we yananiwe kubyakira ahita ajya muri koma (coma) biba ngobwa ko yoherezwa i Kigali mu bitaro bya CHUK, kugeza magingo aya akaba ataranakanguka, gusa abo bari kumwe bandi batatu bo bakaba barahise basezererwa basubira mu rugo.

Aganira na Kigali Today, umuyobozi wa Youvia FC, Ndarama Mark, yavuze ko amakuru bahabwa n’abaganga avuga ko angelique ameze neza nta kindi kibazo afite, umutima uratera neza usibye kuba akiri muri koma kandi bizeye ko aza gukanguka, ndetse anasobanura icyaba cyateye ibi.

Youvia WFC

Ati 'Angelique we aracyari kwa muganga ubu ari CHUK niho arwariye, ari muri koma ariko amakuru abaganga baduha batubwira ko ameze neza. Bagenzi be bo bamaze gutaha n’ubu turi kumwe ndetse turimo kubaganiriza tubabwira ko bibaho. Icyateye ibi ni ukunanirwa kwakira gutsindwa na Kayonza WFC ndetse bakabura n’amahirwe yo gukina mu kiciro cya mbere, kuko kuva twatangira shampiyona bari bataratsindwaho na rimwe'.

Abandi bakinnyi bari batwawe kwa muganga harimo Dukuzumuremyi M. Claire umaze gutsindira iyi kipe ibitego byinshi, ndetse akaba yari yanatsinze ibitego 2 muri uyu mukino wabaye ku wa gatandatu. Hari kandi Muhayimpundu Ratif ukina hagati ndetse na myugariro wabo w’ibumoso Umutoniwase Denise.

Kayonza FC izakina mu cyiviro cya mbere umwaka utaha

Youvia WFC yasoje ku mwanya wa mbere mu itsinda rya mbere, aho mu mikino 10 yakinnye yatsinzemo 9 ikanganya umwe. Ibyo byatumwe ihura n’ikipe ya Kayonza WFC yo yari yabaye iya 2 mu itsinda rya B birangira inayisezeye, bivuze ko amakipe y’Iburasirazuba, Kayonza WFC na IPM WFC, ari zo zizahura ku mukino wa nyuma, ndetse zikazakina mu kiciro cya mbere umwaka utaha.

Basohoka mu Rwambariro

Abafana bari benshi bakaniye

Abayobozi muri Somalia baraganira n’ab’u Rwanda ku bijyanye n’imiyoborere

Ni ibiganiro bitangira guhera kuri uyu wa Mbere tariki 14 kugeza 18 Gasyantare 2022, bikaba bigomba kwakirwa n’Ihuriro ry’Uturere n’Umujyi wa Kigali mu Rwanda (RALGA), ikaba yarabiteguye ku bufatanye na Minisiteri y’Umutekano n’Ububanyi n’amahanga ya Somalia.

Abayobozi bo mu gihugu cya Somalia nibo bahisemo guteranira mu Rwanda, ahanini hagamijwe kugira ngo bigire ku mikorere y’inzego z’ibanze mu Rwanda, no ku ntabwe u Rwanda rumaze gutera mu zindi nzengo zitandukanye, zirimo Ubumwe n’Ubwiyunge ndetse n’Iterambere.

Umunyamabanga Mukuru wa RALGA, Ladislas Ngendahimana

RALGA ivuga ko ibi biganiro ari umwanya mwiza wo kuganira ku miyoborere mu gihugu cya Somalia, ibibazo bijyanye n’igihugu cyabo, birimo iterambere ry’Imijyi, kwegereza ubuyobozi abaturage, ibibazo by’ubuhunzi, guhangana n’ibiza ndetse n’imitangire ya serivisi.

Ibyo u Rwanda rumaze kugeraho mu miyoborere byakwifashishwa nk’ingero, n’icyitegererezo cy’ibyo abayobozi ba Somalia bakwigira mu Rwanda, mu bijyanye no kugerageza guteza imbere igihugu cyabo.

Muri urwo ruzinduko bikaba biteganyijwe ko abayobozi bo muri Somalia, bazasura ibigo n’ibice bitandukanye yaba mu Mujyi wa Kigali ndetse no mu bindi bice by’igihugu, hagamijwe kugira ngo bamenye byimbitse inzira yo kwiyubaka u Rwanda rwanyuzemo rwishakamo ibisubizo.

Umunyamabanga Mukuru wa RALGA, Ladislas Ngendahimana, avuga ko ari iby’agaciro kuba u Rwanda rwakiriye iyi nama kuko bigaragaza icyizere ku bimaze kugerwaho n’inzego z’ibanze mu Rwanda, mu kwegereza ubuyobozi abaturage ndetse n’iterambere.

Minisitiri Gatabazi na we yitabiriye ibyo biganiro

Umuyobozi Mukuru muri Minisiteri y’Umutekano, n’Ububanyi n’amahanga ya Somalia, Said Abdullahi Alasow, avuga ko kuba u Rwanda hari byinshi rwagezeho mu myaka 20 ishize mu bijyanye n’ubumwe, ubwiyunge ndetse n’iterambere, ari iby’agaciro kuba bagiye kurwigiraho, kuko bizafasha igihugu cyabo mu rugendo cyatangije, mu rwego rwo kugerageza kwiyubaka.

Mu gitondo cyo kuri uyu wa Mbere, tariki 14 Gashyantare 2022, amazi y’umugezi wa Nyabarongo nibwo yabaye menshi ku Cyiraro cya Cyome urujya n’uruza rurahagarara nyuma y’uko ku ruhande rw’Akarere ka Ngororero amazi afunze umuhanda.

Polisi y’u Rwanda yifashishije urukuta rwayo rwa Twitter, yavuze ko umuhanda Muhanga-Ngororero-Mukamira utakiri nyabagendwa kubera amazi y’umugezi wa Nyabarongo, basaba abagenzi bakoresha uyu muhanda kwifashisha umuhanda wa Kigali-Musanze-Rubavu.

Ubutumwa batanze bugira buti: “Turabamenyesha ko kubera imvura nyinshi, amazi y’umugezi wa Nyabarongo yafunze umuhanda Muhanga-Ngororero-Mukamira, ubu ukaba utari nyabagendwa. Muragirwa inama yo gukoresha umuhanda Kigali-Musanze-Rubavu.”

Mwaramutse,

Turabamenyesha ko kubera imvura nyinshi, amazi y’umugezi wa Nyabarongo yafunze umuhanda Muhanga-Ngororero-Mukamira ubu ukaba utari nyabagendwa.

Muragirwa inama yo gukoresha umuhanda Kigali-Musanze-Rubavu.

Murakoze

— Rwanda National Police (@Rwandapolice) February 14, 2022

Bizimana Sixbert, Umunyamabanga Nshigwabikorwa w’umusigire w’Umurenge wa Rugendabari mu Karere ka Muhanga, avuga ko ku ruhande rwa Muhanga ntakibazo hafite ndetse n’icyiraro cya Cyome kitarengewe ahubwo amazi yafunze umuhanda hafi n’aharemera isoko rya Cyome.

Yagize ati: “Bitewe n’imvura yaraye igwa ari nyinshi, kugeza mu gitondo n’aya masaha ku ruhande rwa Muhanga ntakibazo dufite, ahubwo urenze ikiraro gato hakurya muri Ngororero nibwo muri iki gitondo amazi yamaze gufunga umuhanda kubera ko kuva mu gitondo yagiye yiyongera bigaragara none ubu yamaze kuzura umuhanda si nyabagendwa.”

Bizimana Sixbert akomeza avuga ko n’abanyamaguru batabasha kwambuka kuko bakajije umutekano barinda ko hari uwatwarwa n’amazi ashaka kwambuka.

Yagize ati 'Ubu impande zose harafunze, urahazi ahegereye aho Abashinwa bakoreraga niho Nyabarongo yuzura ikarenga igishangwa ikaza mu muhanda kuko ni ahantu hari hasi haringaniye. N’abanyamaguru ntabwo babasha kwambuka, hafunzwe hose kugirango bitagira impanuka biteza kugeza uruzi rusubiye hasi abantu bakabasha kwambuka.'

Aya akaba atari ubwa mbere afunze uyu muhanda kuri iki cyiraro cya Cyome, biterwa akenshi n’imvura iba yaguye ari nyinshi mu turere twohereza amazi mu mugezi wa Nyabarongo, gusa Bizimana Sixbert, yabwiye UMUSEKE ko kubera muri Muhanga nta mvura iri kugwa bidashobora gufata igihe kirekire amazi ataragabanuka.

Ati: “Ubu muri Muhanga dufite umucyo ntabwo mu gitondo ivura yigeze igwa bivuze ko ari amazi y’imvura ari kuva aho yabyutse igwa. Nk’ubu dufite umucyo biragaragara ko bimara amasaha makerukaba rumanutse, byaba ikibazo dufite imvura nyinshi iri kugwa ariko kubera hari umucyo mu isaha imwe cyangwa ebyiri ruraba rumaze gusubira hasi.”

Usibye ko aya mazi ya Nyabarongo yafunze umuhanda, nta myaka irangizwa nuko amazi yageze mu nkuka z’uruzi rwa Nyabarongo, gusa ku ruhande rw’Umurenge wa Rugendabari bakajije umutekano bagenzura niba amazi adakomeza kuba menshi mu gishanga ndetse hakaba hari uwatwarwa nayo.

Abantu basabwe kwirinda kwishora mu mazi mu gihe bikigaragara ko ari menshi, basabwa kwihangana bagategereza ko amazi agabanuka kuko bitari buze gufata igihe kirekire ngo amazi agabanuke.

Bitwe nuko uyu muhanda wa Muhanga-Ngororero ku cyiraro cya Cyome ku ruhande rw’Akarere ka Ngororero uri hasi, bituma uko imvura iguye ari nyinshi amazi afunga umuhanda ubuhahirane bugahagaraga. Ibintu bikwiye gutekerezwaho uyu muhanda ukaba wakigizwa hejuru ku buryo amazi atabasha kuwurenga.