Umuvugizi w'ingabo za DR Congo avuga ko urubyiruko rw'Abanye-Congo rubarirwa mu bihumbi rumaze gusaba kujya mu ngabo, kuva ku wa kane ubwo Perezida yaruhamagariraga “kwinjira mu gisirikare ku bwinshi” kuko “intambara abaturanyi badushojeho isaba ibitambo bya buri umwe muri twe”.
Mu kiganiro n'abanyamakuru ku wa gatandatu, umuvugizi w'ingabo za Repubuilika ya Demokarasi ya Congo (FARDC), Jenerali Sylvain Ekenge, yavuze ko ibikorwa byo kwinjiza urubyiruko mu gisirikare ubu birimo kubera mu murwa mukuru Kinshasa n'i Goma mu burasirazuba bw'igihugu.
Muri icyo kiganiro kandi yari ari kumwe na Minisitiri ushinzwe gutangaza amakuru akaba n'umuvugizi wa leta, Patrick Muyaya.
Jenerali Ekenge yagize ati: “Abarenga 2000 bamaze kwiyandikisha i Goma, i Goma honyine”.
Ahatari ibiro bikuru bya gisirikare, Jenerali Ekenge yavuze ko hari “ibigo by'ijonjora”, cyangwa “cellules de sélection”, aho bitari na ho hakazoherezwa amatsinda y'abasirikare yo gukora ijonjora.
Yavuze ko abajya mu gisirikare ari urubyiruko rw'abasore n'inkumi rufite kuva ku myaka 18 kugeza kuri 25 rw'”imyitwarire myiza n'ubuzima bwiza ku mubiri no mu bitekerezo [mu mutwe]”, ndetse rukaba rwarize nibura imyaka ibiri irenze ku mashuri abanza.
'Nta santimetero n'imwe izasigara iriho inkweto z'umwanzi'
Umunyamakuru yabajije Jenerali Ekenge impamvu igisirikare cy'iki gihugu kimaze iminsi irenga 150 kitarashobora kwisubiza umujyi wa Bunagana.
Yasubije ko FARDC itari kurwanira ahari abaturage kandi inshingano yayo ya mbere ari ukurinda abaturage.
Ati: “Twasubiye inyuma by'amayeri y'urugamba mu kwirinda impfu zitari ngombwa”.
Yavuze ko mu 2012 bwo umutwe wa M23 wari wanafashe Goma, ariko ko nyuma y'umwaka urenga, mu kwezi kwa cumi na kumwe mu 2013, uwo mutwe wirukanwe muri uwo mujyi.
Ati: “Nta santimetero [cm] n'imwe izasigara iriho inkweto z'umwanzi”.
Minisitiri Muyaya yabajijwe niba ibiganiro bisabwa n'ibihugu byo mu muryango w'Afurika y'uburasirazuba (EAC) bizanatumirwamo umutwe wa M23.
Mu gusubiza, yabanje kuvuga ko icyavuzwe na EAC ari “ibiganiro bihuriweho”, cyangwa “dialogue inclusif”, avuga ko kugira ngo M23 ibe yabijyamo ari uko ibanza “kuva” ahantu hose yafashe.
Yanabajijwe ku bufasha buvugwa ko leta ya Uganda iha umutwe wa M23, asubiza ko ibyo birimo gukorwaho iperereza.
Mu ijambo yagejeje ku gihugu mu ijoro ryo ku wa kane, Perezida Félix Tshisekedi yongeye gushinja yeruye u Rwanda gufasha umutwe wa M23 ruwuha “abantu n'ibikoresho”.
Mu kiganiro cyo kuri radio cya BBC Focus on Africa cyo ku wa gatanu, umuvugizi wa leta y'u Rwanda Yolande Makolo yavuze ko amagambo ya Tshisekedi yo gushishikariza urubyiruko kwinjira mu gisirikare ku bwinshi ari “ukwikundisha ku baturage guciriritse” kandi “guteje ibyago”.
Yanavuze ko ari “amayeri yo mu matora”, ateganyijwe mu mwaka utaha.
Makolo yahakanye avuga ko leta y'u Rwanda idafasha M23, avuga ko “myinshi mu mitwe yo muri DRC mu by'ukuri yatangijwe inaterwa inkunga n'abanyapolitiki b'Abanye-Congo”.
Avuga ko DR Congo idakwiye kugerageza kwegeka ibibazo byayo ku bindi bihugu mu gihe “yananiwe guha umutekano abaturage [bayo]”.
Ariko kuri BBC Focus on Africa radio, Minisitiri Muyaya yashinje u Rwanda gushaka “gutuma iki gice cya DRC gikomeza kutagira umutekano kugira ngo rushobore gukomeza ubusahuzi bw'umutungo w'amabuye y'agaciro yacu nkuko rumaze imyaka 25 rubikora”.
M23 ubu igenzura ibice bitandukanye bya teritwari ya Rutshuru mu ntara ya Kivu ya ruguru, birimo umujyi mukuru w'iyi ntara n'ikigo cya gisirikare kinini cya Rumangabo.
Hari ubwoba ko izi nyeshyamba zishobora gukomeza zigana i Goma ku murwa mukuru w'intara ya Kivu ya ruguru, muri kilometero 70 uvuye i Rutshuru aho ziri.
BBC
I Rusizi ikipe ya Espoir FC yari yakiriye Gasogi United banganya igitego kimwe kuri kimwe, naho Rwamagana City inganya na Etincelles FC igitego kimwe kuri kimwe. Umukino uri busoze umunsi wa 8, urahuza ikipe ya APR FC iribwakire Gorilla FC kuva ku isaha ya saa 18:30.
As Kigali imaze imikino ibiri yikurikiranya idatsinda igitego 