Blog

Umugabo w'imyaka 82 wahoze ari umusirikare wa Amerika ubu wakoraga nka 'cashier' mu iguriro rya Walmart yabashije kujya mu kiruhuko cy'izabukuru nyuma y'igikorwa cy'ubugiraneza.

Warren Marion w'i Cumberland muri leta ya Maryland, mu cyumweru gishize yahawe sheki ya $108,682 (arenga miliyoni 115 Frw) yakusanyijwe n'abagiraneza kuri internet.

Umugabo witwa Rory McCarty ufite abantu benshi bamukurikira kuri TikTok yashyizeho GoFundMe yo gufasha Marion kujya mu kiruhuko cy'izabukuru.

Video yatangaje bombi bari kumwe mu Ukuboza gushize yarebwe inshuro zirenga miliyoni eshatu.

McCarty yashakaga gufasha Marion, sekombata kandi w'umupfakazi, 'kugera ku bintu yifuza gukora', nk'uko abivuga mu butumwa yatangaje mu kwezi gushize.

McCarty afite business yitwa Bug Boys ifite page ya TikTok ifite abayikurikira bagera ku 300,000.

Avuga ko yumvise yifuje gufasha uyu mukambwe wahoze mu ngabo akoresheje uru rubuga rwe kubera indi nkuru nk'iyo yabonye kuri TikTok.

Kuri page ya GOFundMe yashyizeho asaba abantu kugira icyo bafasha, McCarty yagize ati: 'Nk'umuntu ufite business…Natangajwe cyane no kubona uyu musaza muto akibasha kujya ku kazi. Agakora amasaha umunani cyangwa icyenda.'

Mu cyumweru gishize, Marion yagiye kukazi ku munsi wanyuma nyuma y'ibyumweru bibiri abahaye abakoresha be integuza yo gusezera.

Ibinyamakuru byaho byamugaragaje atambuka muri 'parking' y'iri guriro bahatatse imitako, agenda aramutswa anakomerwa amashyi n'abamukunda.

Ijambo rya mbere ryamusohotse mu kanwa nyuma yo guhabwa sheki y'ariya madorari ni 'wow'.

Mu Ukuboza yabwiye Cumberland Times News ko ayo mafaranga yamufasha kwishyura inzu ye no kubasha kujya i Florida gusura abuzukuru be.

Nyuma yo kuyabona, uyu musaza yabwiye icyo kinyamakuru ati: 'Icyo nababwira ni uko Imana nziza yampembeye ibyo nakoze mu myaka y'ubuto bwanjye.'

BBC

Source : https://umuryango.rw/amakuru/mu-mahanga/ubuzima/article/umusaza-w-imyaka-82-yagiye-mu-kiruhuko-nyuma-y-uko-kuri-tiktok-bamukusanyirije

Byatangajwe na Marc Gillinov na Steven Nissen bombi bamaze igihe bavurira indwara z'umutima mu bitaro bitandukanye.

Ubushakashatsi bwakozwe n'Ikigo cy'Abanyamerika kita ku ndwara y'umutima bwiswe 'a scientific statement from the American Heart Association' bwagaragaje ko 75% by'abagabo bicwa n'indwara y'umutima ubafata mu gihe barimo basambana n'umugore utari uwabo. Ibi byago ngo byiyongera iyo uwo mugabo arusha imyaka myinshi uwo mugore.

Ubu bushakashatsi bwasuzumye imirambo 5,559 y'imfu zabaye ku bagabo zitunguranye.

Ubundi bushakashatsi busesengura impamvu abantu bafatwa n'indwara y'umutima mu gihe cyo gutera akabariro bwakozwe na Paul Newman nk'uko tubikesha ikinyamakuru Fobes.

Iki kinyamakuru kivuga ko uyu mushakashatsi yagaragaje ko bibaho gace kuba umutima wafata umugabo mu gihe ari gutera akabariro gusa ngo muri ako gace kabaho ubwiganze buri ku bagabo baba bari guca inyuma abagore babo.

Mu gitabo yanditse ashyira ahagaragara ubu bushakashatsi hari aho yanditse aburira abagabo bafite indwara y'umutima ko bakwiye kwirinda guca inyuma abo bashakanye.

Muri Leta zunze ubumwe za Amerika abantu 647 000 bicwa n'indwara z'umutima buri mwaka. Ni ukuvuga ko mu bantu bane bapfa muri Amerika umwe aba azize indwara z'umutima. Iki gihugu kitakaza miliyari 219 z'amadorali buri mwaka kubera indwara z'umutima.

Ishami ry'Umuryango w'Abibumbye ryita ku buzima OMS rivuga ko buri mwaka indwara z'umutima na stroke byica abantu miliyoni 17 ku Isi.

Source : https://umuryango.rw/ubuzima-115/article/wari-uziko-abagabo-baca-inyuma-abagore-babo-aribo-bakunze-kwicwa-n-indwara-y

Mu masaha ya mbere y’ijoro ryo kuri uyu wa 10 Mutarama 2023, Turahirwa Moses  yashyize ifoto ku rubuga rwa Instagram agaragaza ko ari i Paris mu Bufaransa, ayikurikiza ubutumwa bugira buti “Indaya i Paris” byerekana ko arimbye kandi ameze neza i Burayi.

Amagambo yanditse mu rurimi rw’igifaransa ngo ‘La Prostituée á Paris’ aherekejwe n’ishusho y’umutima umenetse (Emoji), Moses yayanditse munsi y’ifoto imwerekana yambaye imyenda y’umukara, bigaragara ko yafatiwe hafi y’umuturirwa wa Tour Eiffel mu masaha y’umugoroba.

Mu minota 30 ya mbere iyi foto ishyizwe kuri Instagram, hari hamaze gushyirwaho ubutumwa burenga 50 buyisubiza, burimo ubugaruka ku mashusho yashyizwe hanze mu cyumweru gishize, yagaragayemo Turahirwa Moses akora imibonano mpuzabitsina n’umugabo mugenzi we.

Abasubije kandi barimo abagaragaza ko bashyigikiye Moses muri ibi bihe, nk’aho uwitwa Kavanna 250 yagize ati “Ubuzima bwawe, amahitamo yawe” naho Anyce Nicky akagira ati “Uko byaba kose, ndagukunda ibihe byose.”

Ubutumwa bwa Moses

Ku ya 3 Mutarama 2023, nibwo ku mbuga nkoranyambaga zitandukanye hasakaye amashusho agaragaza Turahirwa Moses akora imibonano mpuzabitsina n’undi mugabo, nyuma aza gusaba imbabazi abanyarwanda muri rusange, avuga ko ayo mashusho yahererekanijwe kubera konti ye ya SnapChat yibwe.

Turahirwa yavuze ko aya mashusho 'yashyizwe hanze ajyanye na filime iri gufatirwa mu Butaliyani' yisegura ku bakinnyi ba filime bo mu Butaliyani n'inzu z'imideli zagizweho ingaruka nayo.

Ayo mashusho n’indi foto yaje nyuma igaragaza Moses yambaye ubusa byakomeje kuganirwaho ndetse no guhererekanywa na benshi ku mbuga nkoranyambaga, bakagenda batangaho ibitekerezo ku buryo butandukanye.

Icyo gihe byavuzwe ko Moses yari mu Butaliyani ari naho hafatiwe amashusho amugaragaza anezeranywe n’abandi bagabo ubwo batunganyaga Filime yiswe ‘Kwanda’ ari naho yavuye yerekeza i Paris mu murwa mukuru w’ u Bufaransa, aho ari kubarizwa kuri ubu.

Turahirwa Moses washinze inzu ikomeye y’imideri yitwa ‘Moshions’ ni umwe mu banyempano bakomeye kandi bahiriwe byihuse n’uyu mwuga wo gukora imyenda n’imirimbo yihebeye kuva mu myaka ye y’ubuto.

Ni umwe mu bahangamideri bafite amazina akomeye mu Rwanda no mu Karere kuko imyenda itunganyirizwa iwe yambarwa n’ibyamamare, abaherwe ndetse n’abandi bakomeye haba ab’imbere mu Rwanda, muri Africa ndetse no hanze y’uyu mugabane.

Moses watangije Moshions muri 2015 ni umuhanga mu guhanga imyambaro ibereye ijisho

Source : https://inyarwanda.com/inkuru/124728/indaya-i-paris-moses-washinze-moshions-yagaragaye-ahagaze-bwuma-imbere-ya-tour-eiffel-124728.html

Ni amasezerano yari agamije gukomeza kwamamaza ibikorwa by'iyi sosiyete imaze kuba ubukombe mu gutanga serivisi za internet by'umwihariko yo mu bwoko bwa 4G.

Ntabwo impande zombi zigeze zifuza gutangaza igihe aya masezerano azamara, gusa zivuga ko ashobora kuzongerwa bitewe n'uburyo ibyo bumvikanye bizaba byubahirijwe.

Young Grace yitezweho kumenyekanisha serivisi za Mango 4G muri iki gihe cyo gutangira umwaka mushya wa 2023.

Kuva mu minsi mikuru ya Noheri n’Ubunane, Mango 4G yahananuye ibiciro bya internet ndetse ni na ko bizakomeza.

1GB yaguraga amafaranga 900 Frw iri kugura 590 Frw, 3GB zaguraga 2900 Frw ubu zigura 1900 Frw, 5GB zaguraga 3300 Frw ubu ni 2900 Frw, 10GB zaguraga 5500 Frw ziri kugura 5900 Frw.

Kandi hari na Poromosiyo yiswe ‘Ni Dilu Ishyushye’ aho umuntu iyo aguze Telefone cyangwa router ahabwa inyongera ya 72 GB z'ubuntu mu mezi 24.

Ushaka ibindi bisoburo agana ishami rya Mango4G rimwegereye agahabwa internet yihuta kandi yizewe ya Mango4G cyangwa ushaka ibindi bisobanuro agahamagara umurongo utishyurwa ariwo 2550 cyangwa agasura urubuga rwabo rwa www.mango4g.rw

Mango 4G kuri ubu ifite amashami arenga 25  hirya no hino mu gihugu, aha hose haboneka ibicuruzwa byayo.

Mu Ukuboza 2022, Mango yari yasinyishije abarimo Rocky Kirabiranya usanzwe uzwi mu gusobanura filime ndetse n'Umunyamakurukazi Uwimana Clarisse uzwi muri siporo mu Rwanda cyane kuri B&B FM-UMWEZI.

 

Young Grace yasinye amasezerano yo kwamamaza Mango

Young Grace ubwo yasinyaga aya masezerano 

Young Grace agiye kwamamaza ibikorwa by’iyi sosiyete 

Ntabwo igihe aya masezerano azamara kigeze gitangazwa 

AMAFOTO- Sangwa Julien

 

Source : https://inyarwanda.com/inkuru/124725/young-grace-yahawe-akazi-ko-kwamamaza-ibikorwa-bya-mango-4g-amafoto-124725.html

Uyu munsi kuwa Kabiri tariki ya 10 Mutarama 2023, Umuyobozi Nshingwabikorwa w’Akarere ka Kicikiro ubwo yari mu kiganiro Imvano y’ibivugwa kuri Televiziyo ya Izuba (Izuba tv) yatangaje ko Umurenge wa Gatenga ugiye gutezwa imbere ku buryo uzahinduka nk’uko mu biryogo hameze.

Umutesi Solange, uyobora Akarere ka Kicikiro yemeje ko umushinga wo guteza imbere Gatenga igahinduka umujyi uzatangira gushyirwa mu bikorwa uyu mwaka.

Yagize ati: “Mu mujyi wa Kigali hari gahunda y’uko buri karere hafatwa nibura Umurenge umwe hagashyirwamo ibikorwa nka biriya biri mu Biryogo. Nyarugenge bahereye kuri Biryogo, iwacu muri Kicukiro tugiye guhera muri Gatenga”.

“Nakwizeza abaturage ko dushoje duhishiwe. Gatenga mubona muri uyu mwaka n’uwukirikiyeho izaba atari Gatenga abantu bazi, uzaba ari Umurenge w’imihanda kandi ahaje imihanda haza isuku.” 

Umutesi yakomeje agira ati: “Gatenga ni umurenge abaturage bavuga ko bakeneye imihanda kandi koko urebye umuhanda ujya Rebero, umuhanda uturuka muri Murambi no muri Gatenga hagati nta mihanda myinshi irimo”.

“Naho umushinga wo kuvugurura Gatenga  wamaze kwemezwa, abaturage barimo kwegerwa kugira ngo babarirwe. Uwo mushinga uzakorerwa ku mihanda minini noneho hazanatunganywe site z’ubucuruzi  kugira ngo hazabe ari ahantu hateye imbere nk’uko mu Biryogo hakozwe, ahasigaye abaturage nabo bazavugurure inyubako zabo.”

Source : https://inyarwanda.com/inkuru/124724/kicukiro-hagiye-gutangira-umushinga-wo-guhindura-gatenga-nko-mu-biryogo-124724.html

Urwego Mpuzamahanga Rwashyiriweho Gukora Imirimo y'Insigarira y'Inkiko Mpanabyaha (IRMCT) rwinjije Umucamanza Margaret M. deGuzman mu rubanza rwa Kabuga Félicien, ushinjwa ibyaha bya Jenoside yakorewe Abatutsi mu 1994.

Muri iyi minsi IRMCT iri mu kababaro kubera urupfu rw'Umucamanza Elizabeth Ibanda-Nahamya ukomoka muri Uganda, wapfuye ku itariki ya 5 Mutarama 2023 ku myaka 70.

Ubwo urubanza rwa Kabuga rwatangiraga, Perezida w'Urwego yagize Elizabeth Ibanda-Nahamya umwe mu bacamanza baburanisha uru rubanza, icyo gihe ashyira Umucamanza Margaret M. deGuzman ukomoka muri Leta zunze ubumwe za Amerika mu bacamanza b'ingoboka.

Umucamanza Elizabeth Ibanda-Nahamya yapfuye urubanza rugeze mu mizi, kuko urukiko rumaze iminsi rwumva abatangabuhamya b'Ubushinjacyaha, bagarutse ku ruhare rwa Kabuga mu bihe byagejeje kuri Jenoside, cyane cyane binyuze mu icengezamatwara ryakozwe na RTLM, radiyo yagize uruhare mu gushinga ndetse akayibera perezida.

Mu cyemezo cya Perezida w'inteko iburanisha, Umucamanza Iain Bonomy, kuri uyu wa 10 Mutarama 2022, yabanje gushima umusanzu Elizabeth Ibanda-Nahamya yatanze mu butabera mpuzamahanga, no mu mirimo y'Urwego muri uru rubanza.

Yakomeje ati “Bijyanye n'uko amategeko agenga imiburanishirize ateganya ko urubanza ruhita rukomezanya n'umucamanza w'ingoboka agasimbura utagishoboye gukomeza imirimo, ku bw'iyo mpamvu, bijyanye n'ingingo ya 19 y'aya mategeko, urubanza rugomba gukomezanya n'Umucamanza Margaret M. deGuzman, agasimbura Umucamanza Elizabeth Ibanda-Nahamya.”

Kuva ku wa Mbere, tariki ya 9 Mutarama kugera ku wa Gatatu tariki ya 18 Mutarama 2023, ku mashami ya IRMCT i Lahe na Arusha hateganyijwe ibitabo abantu bashobora kwandikamo ubutumwa bw'akababaro kubw'urupfu rw'umucamanza Ibanda-Nahamya.

Bisabwe n'umuryango we, umurambo w'Umucamanza Ibanda-Nahamya uzashyirwa ku ishami rya IRMCT ry'i Haye, ku wa Kane tariki ya 12 Mutarama 2023, hagati ya saa tanu na saa munani z'amanywa, kugira ngo asezerweho bwa nyuma.

Umuhango wo kumushyingura uzaba nyuma, mu gihugu akomokamo cya Uganda.

Biteganyijwe ko urubanza rwa Kabuga rugomba gukomezanya n'abacamanza batatu, Iain Bonomy nka perezida w'inteko y'abacamanza, hamwe n'abacamanza bagenzi be Mustapha EI Baaj na Margaret M. deGuzman.

IRMCT yatangaje ko bakimara kumva inkuru y'urupfu rwe, Abacamanza bagenzi be bari kumwe mu Nteko y'Urugereko rwa Mbere rw'Iremezo iburanisha urubanza rwa Félicien Kabuga, bavuze ko “bababajwe n'urupfu rutunguranye rwa mugenzi wabo bemeraga cyane ndetse bakubaha kandi ko Urugereko ruzahora rwibuka umurava n'uruhare ntagereranywa Umucamanza Ibanda-Nahamya yagaragaje mu mirimo yarwo mu myaka irenga ibiri ishize”.

Ibanda-Nahamya yabaye Umucamanza wa IRMCT muri Werurwe 2018, ashimirwa ko yagaragaje ubushobozi bwo ku rwego rwo hejuru mu manza zikomeye. Muri izo manza harimo urwa Ratko Mladić mu bujurire , wari colonel-general muri Bosnia.

Kabuga wari umunyemari ukomeye mu Rwanda, yafatiwe Asnières-sur-Seine, mu Bufaransa, ku itariki ya 16 Gicurasi 2020.

Aregwa ibyaha bya jenoside, guhamagarira abantu, mu buryo butaziguye kandi mu ruhame, gukora jenoside, ubwumvikane bugamije gukora jenoside, itoteza rishingiye ku mpamvu za poritike, itsembatsemba, n'ubuhotozi nk'ibyaha byibasiye inyokomuntu byakorewe mu Rwanda mu mwaka wa 1994.

IVOMO:IGIHE

Source : https://umuryango.rw/amakuru/mu-mahanga/ubutabera/article/urubanza-rwa-kabuga-felicien-rwahinduriwe-umucamanza