Blog

Urupfu ni icyita rusange ku buzima bwa muntu! Buri wese agira igihe cye- Abemera Imana bo bavuga ko hari ubundi buzima nyuma y'ubu (Aheza mu Ijuru).

Urupfu rushengura imiryango, abavandimwe, inshuti n'abandi cyane ko uwo muntu muba mutazongera kubonana ukundi.

Mu rwego rwo kuzirikana uwawe witabye Imana ushobora kugira urwibutso rwihariye nk'ifoto, amashusho n'ibindi bizajya bihora bimukwibutsa. Hari igihe urukumbuzi rukurenga, ukajya gusura imva umutima ukaruhuka.

Bitewe n'isi y'ikoranabuhanga, hari abajya gusura ababo bagasangiza icyo gikorwa ababakurikira, amafoto n'amashusho biherekejwe n'amagambo y'inkomezi.

Mu butumwa yatambukije kuri konti ya Twitter mu ijoro ryo kuri uyu wa Gatandatu tariki 21 Mutarama 2023, Jules Sentore yasabye abajya gusura imva 'za bamwe dukunda batuvuyemo' guhindura uburyo babikoramo kugira ngo bitange ishusho yo kutishushanya.

Uyu muhanzi uri kubarizwa ku Mugabane w'i Burayi muri iki gihe, yavuze ko atekereza neza ko kwifotoreza kuwitabye Imana bitari mu muco w'Abanyarwanda.

Yavuze ati 'Ndabasaba mbinginze: Imvugo mukoresha ku mafoto mufata mwagiye gusura imva za bamwe dukunda batuvuyemo mwazihindura, kugira ngo bitugaragarize ko mwabikoze bibavuye ku mutima naho kwifotoreza kuwagiye ndumva bitari mu Muco wacu. Murakoze.'

Jules uzwi mu ndirimbo zirimo 'Agafoto' yabwiye InyaRwanda ko yanditse ubu butumwa, nyuma y'igihe cyari gishize abona abantu batandukanye basura imva mu murongo wo 'kwibonekeza'.

Ati 'Maze igihe mbibona rwose kandi benshi iyo uganiriye nabo ubona ko aricyo cyari kibajyanye, uretse ko no kumusura byari birimo. Ariko rwose ni n'uburwayi icyo bita kwibonekeza.'

Mu batanze ibitekerezo ku butumwa bwa Jules Sentore harimo Ndagijimana Emmy, wavuze ko atiyumvisha ukuntu umuntu yifotoreza ku gituro.

Ati 'Uravuga ukuri. Njye sinumva n'impamvu umuntu yifotoreza ku gituro akabipostinga (Akabishyira ku mbuga nkoranyambaga). Simba nsobanukiwe icyo ashaka kugaragaza muri sosiyete, ariko ubanza ari ubujiji bwanjye ababizi bampugure.'

Mu kumusubiza, Jules yavuze ko benshi mu bifotoreza ku gituro babikora bibonekeza. Ati 'Benshi muri bo bazabikora bashaka kwibonekeza mu gihe bakabikoze bagamije guha Icyubahiro uwatuvuyemo, kuko imihigo ye irivugira kandi izamuherekeza ibihe bidashira (Kuri Twese).'

Ukoresha izina rya PanAfrica kuri Twitter yavuze ko yemeranya n'igitekerezo cya Jules Sentore. Kuri we, asanga niba wasuye igituro utagakwiye kubishyira ku karubanda, ahubwo wakabigize ibyawe.

Avuga ati 'Ni ukuri Sentore we ibyo uvuga nibyo. Niba wanasuye nyakwigendera koko ni byiza kuko mwari mubanye neza. Ariko nta 'publicity' (Kwamamaza) uri gukora ngo n'abandi bahasure bityo ubyerekane ku mbuga nkoranyambaga. Ni ukuri wanasuye igituro cye nta n'uwakamenye niba wanagiyeyo, ibyo ni wowe wakabigize ibyawe.'

Uyu muhanzi agiye kumara igihe mu Burayi aho yajyanywe no kwagura umuziki we, kandi afite icyizere cy'uko uzagera ku rwego Mpuzamahanga.

Ati 'Nagiye mu bijyanye n'umuziki wanjye ariko cyane cyane wa Gakondo, hari ikindi cyiciro nifuza ko ugeraho kandi mbona ko mu gihe runaka nzabigeraho.'

Kuri iki Cyumweru saa kumi n'ebyiri n’igice, ikipe ya Arsenal yakiriye Manchester United ku kibuga cyayo cya Emirates. Ni umukino wari utegerejwe na benshi, kubera ukuntu aya makipe yari amaze iminsi yitwara nta n'imwe igipfa gutsindwa. Uyu mukino warangiye Arsenal itsinze ibitego 3-2 bya Manchester United.

Abakinnyi 11 umutoza wa Arsenal yabanje mu kibuga: Ramsdale, White, Saliba, Gabriel, Zinchenko, Odegaard, Partey, Xhaka, Saka, Nketiah na Martinelli.

Manchester United niyo yatangije umupira ariko umunota 1 gusa wari uhagije ngo Arsenal ibe ibonye koroneri 2, n'ubwo batazibyaje umusaruro ngo batsinde igitego hakiri kare.

Abakinnyi 11 Erik Ten Hag wa Manchester United yabanje mu kibuga: De Gea, Wan-Bissaka, Varane, Martinez, Shaw, McTominay, Eriksen, Fernandes, Antony, Rashford na Weghorst. 

Arsenal mbere yo gutangira umukino irabanza igasenga

Ku munota wa 6 Bruno Fernandes yabonye uburyo bw’igitego asigaranye n’umuzamu ariko gutsinda biranga, ahubwo ajya kuburana penariti ariko umusifuzi arabihakana.

Ikipe ya Arsenal niyo yakomeje kubona uburyo bwo kugera mu rubuga rw’amahina rwa Manchester United inshuro nyinshi, ariko bageragamo bagahuzagurika ntibabashe kuba batsinda igitego.

Manchester United yakosoye Arsenal ku munota wa 17 ku mupira Rashford yabonye acenga Thomas Partey, maze arekura ishoti riremereye ari inyuma y’urubuga rw’amahina umuzamu wa Arsenal ayoberwa uko byagenze, igitego cya 1 cya MNU kiba kiranyoye.

Ubwo Rashford yarekuraga umuzinga w’ishoti hakavamo igitego cya 1

Nyuma yo gutsindwa igitego Arsenal yatangiye kurira umusozi wo gushaka igitego cyo kwishyura, ndetse ikanabona koroneri nyinshi. Ku munota wa 23 Xhaka yateretse umupira ku mutwe wa Nketiah nawe atereka mu izamu, igitego cya Arsenal cyo kwishyura kiba kirabonetse.

Igice cya mbere kigiye kurangira Thomas Partey yarase igitego kidahushwa ari wenyine, nta wundi mukinnyi wa Manchester United umwegereye kandi yarebaga izamu, ariko umupira awuburira mu birenge. Amakipe yombi yagiye kuruhuka anganya igitego 1-1.

Igitego Nketiah yatsinze yasimbutse cyane

Arsenal yatangiye igice cya kabiri ikora impinduka mu kibuga, ikuramo BenWhite utari witwaye neza imusimbuza Takehiro Tomiyasu. Nk'uko yabikoraga mu gice cya mbere n’ubundi Arsenal yakomeje gukina neza ishushanya, ndetse inagera imbere y’izamu rya Manchester United.

Ku munota wa 53 Bukayo Saka yarekuye ishoti ryaka umuriro, maze De Gea ageregeza kuwukoraho ariko biranga, Arsenal iba ibonye igitego cya 2 . Manchester United nayo yabonye igitego cya 2 cyo kwishyura ku munota 59 gitsinzwe na Martinez, ku ikosa ryari rivuye kuri Ramsdale wananiwe gufata umupira neza. 

Ku munota wa 69 Bukayo Saka yongeye kugerageza kurekura ishoti riremereye ari inyuma y’urubuga rw’amahina, ariko umupira bawushyira muri koroneri. Ikipe ya Arsenal yakomeje gukina yaciriye umurongo ntarengwa Manchester United ariko gutsinda biranga, ku munota wa 83 Nketiah yashoboraga gutsinda igitego ari imbere y’izamu wenyine ariko De Gea aratabara. Arsenal yabonye igitego cya 3 gitsinzwe na Nketiah ku mupira yari ahawe na Martin Odegaard ku munota wa 90. 

Umukino warangiye Arsenal itsinze ibitego 3-2 by’ikipe ya Manchester United. Kugeza ubu Arsenal iyoboye urutonde rwa Shampiyona n’amanota 50, naho Manchester United yo iri ku mwanya wa 4 n’amanota 39.

Umukinnyi ukomeye ukomoka muri Espagne ukina nka myugariro ariko inyuma hagati, n’undi mukinnyi nawe ugomba kuganira na Paris Saint-Germain niba yongera amasezerano nk'uko bimeze kuri Lionel Messi;

Sergio Ramos uhembwa miliyoni 6 z’amayero  ku mwaka, amasezerano ye azarangira mu mpeshyi y’uyu mwaka twatangiye wa 2023. Uyu mukinnyi akeneye kwicarana na perezida wa Paris Saint-Germain Nasser Al-Khelaifi, bakaganira niba uyu azagenda cyangwa azahaguma.

Nk'uko ikinyamakuru kitwa L’Equipe kibitangaza, ngo Paris Saint-Germain yaba yaramaze kumvikana n’umukinnyi ukina ku ruhande rumwe na Sergio Ramos, umukinnyi usanzwe akina muri Inter. Ibi biganiro ni bibi kuri Sergio Ramos, kuko byahita bituma kongererwa amasezerano bigorana.

Sergio Ramos ibyo yari yitezweho muri Paris Saint-Germain ntabwo aribyo yatanze, kubera ko akihagera avuye muri Real Madrid yakunze kurangwa n’imvune cyane. Kugeza ubu uyu mukinnyi ntabwo araba ngerwaho ngo Christophe Galtier abe yamukoresha cyane, kandi nicyo yazaniwe, bityo rero kongera amasezerano bishobora kuzagorana.

Sergio Ramos utazi niba azakomereza muri Paris Saint-Germain cyangwa azayisohokamo

Neymar nawe ni undi mukinnyi ushobora kuba ari mu mezi ye ya nyuma muri Paris Saint-Germain, n'ubwo amasezerano ye azarangira muri 2025. Kuva Kylian Mbappé yakongera amasezerano muri Paris Saint-Germain, hagiye habaho ibiganiro bisohora Neymar muri iyi kipe mu rwego rwo kubaka ikipe bundi bushya, ndetse no kugabanya ibifurumba by’amafaranga bamutangaho nk’umushahara.

Ukuri guhari ni uko umukinnyi ukomoka muri Brazil, Neymar, yanze gusohoka muri iyi kipe ya Paris Saint-Germain ndetse n’amakipe afite ubushobozi kandi yiteguye kumugura no kumuhemba ni make.

Neymar wanze gusohoka muri Paris Saint-Germain kandi Kylian Mbappé atamushaka

Umuhanzikazi w’icyamamare Beyoncé yongeye kugaragaza ubuhanga bwe mu gitaramo cy’amateka yakoreye i Dubai, mu birori byihariye byafunguraga ku mugaragaro hoteli yitwa ‘AtlantisThe Royal Dubai’. Beyonce wishyuwe akayabo ka miliyoni 24 z'amadolari, yasusurukije abitabiriye ibi birori biganjemo ibyamamare.

Nyuma y’imyaka 5 Beyonce atagera ku rubyiniro, yishyuwe amafaranga menshi cyane angana na miliyoni 24 z’amadolari, kugira ngo abataramire amasaha abiri. Aya mafaranga ayingayinga ay'umuhanzi wa mbere ukize muri Africa ariwe Wizkid, utunze miliyoni 30 z’amadolari. 

Izi miliyoni 30 Wizkid atunze yazihirimbaniye imyaka myinshi amaze mu muziki, mu gihe Beyonce yahawe ayingayinga aya mu ijoro rimwe gusa kandi nabwo ku gitaramo kitarenze amasaha abiri.

Hollywood Life yatangaje ko ibi birori Beyonce yaririmbyemo byari biteguye ku buryo bwihariye, dore ko uwabyitabiraga yagombaga kuba afite ubutumire yahawe n’iyi hoteli yabiteguye. Ababyitabiriye bakaba basabwe kudakoresha telefone zabo bafotora cyangwa bafata amashusho, nk’uko byari byanditswe ku butumire.

Beyonce akaba yakoreye ibintu bidasanzwe ku rubyiniro, nk’uko amashusho n’amafoto konti ya Instagram ya Atlantis The Royal Dubai Hotel yabigaragaje. Uyu muhanzikazi yahinduye imyambaro inshuro 4 ku rubyiniro, aririmbana n’imfura ye Blue Ivy Carter, ndetse anacana umuriro ku rubyiniro. 

Mu mafoto irebere uko byari bifashe mu gitaramo cy’amateka Beyonce yakoreye i Dubai, agashimangira ko ashoboye:

Beyonce yabanje kunyura ku itapi itukura, mbere yo kujya ku rubyiniro:

Beyonce yari yaje yabyambariye.

Yerekanye amaherena ahenze yari yambaye.

Ni uko Beyonce yanyuze ku itapi itukura mbere yo gutangira igitaramo yishyuwemo miliyoni 24 za madolari.

Ibyamamare byitabiriye iki gitaramo cya Beyonce yakoreye i Dubai:

Umukinnyi wa filime Nia Log atambuka ku itapi y’umutuku.

Umunyamideli kabuhariwe Kendall Jenner yanyuze ku itapi itukura mbere yo kwinjira mu gitaramo.

Umukinnyi wa filime akaba n’umunyamakuru Terrence J yitabiriye iki gitaramo.

Umunyamideli Eva Apio ni uko yitabiriye igitaramo yambaye.

Itsinda rya Swedish Mafia House naryo ryitabiriye iki gitaramo.

Umuhanzikazi Halle n’umukunzi we DDG banyuze ku itapi itukura mbere yo kwinjira mu gitaramo.

Umuhanzikazi Chloe Bailey akaba n’umuvandimwe wa Halle nawe yitabiriye iki gitaramo.

Umukinnyi wa filime Winston Duke uzwi muri Black Panther nawe yarahari.

Umukinnyi wa filime Letitia Wrigth uzwi muri ‘Black Panther’ akaba n’umufana wa Beyonce ukomeye ntiyatanzwe.

Uko byari byifashe mu gitaramo nyirizina ubwo Beyonce yageraga ku rubyiniro:

Habanje kwatswa umuriro mbere y’uko Beyonce agera ku rubyiniro.

Beyonce agera ku rubyiniro arikumwe n’imfura ye Blue Ivy Carter.

Beyonce n’umukobwa we baririmbanye indirimbo yitwa ‘Brown Skin Girl’.

Beyonce yahereye ku ndirimbo za kera zakanyujijeho zirimo ‘Halo’.

Ni uko Beyonce yari yambaye mu gice cya mbere k’igitaramo yakoreye i Dubai.

Ni uko Beyonce yagarutse ku rubyiniro mu gice cya kabiri.

Yahise atangirira ku ndirimbo ye ‘At Last’.

Yaririmbye kandi indirimbo ziri kuri album yise ‘Lemonade’ harimo nk’indirimbo ‘Freedom’ hamwe na ‘Formation’.

Ubwo Beyonce yaririmbaga indirimbo ye ‘Formation’.

Hongeye hatswa umuriro ubwo Beyonce yagarukaga ku rubyiniro mu gice cya gatatu.

Beyonce yagarutse mu myambaro mishya mu gice cya gatatu.

Indirimbo nka ‘Crazy in Love’, ‘Run The World’ ziri muzo yaririmbye.

Beyonce yakoreye miliyoni 24 za madolari mu masaha abiri gusa y’iki gitaramo.

Beyonce yakije umuriro i Dubai mu gitaramo cy’amateka yahakoreye.

Beyonce yagaragaje impamvu bamwita ‘Umwamikazi w’umuziki’.

Ni uko yashoje igitaramo yakoreye muri hoteli ‘The Atlantis Royal Dubai’.

Urukundo ni ikintu gikomeye kandi biragora ko ahanyuze iminsi yarwo hanyura urwango, ibi nibyo wakoresha usobanura guhuza urugwiro kwa Teta Sandra na Derek wo mu itsinda ry'umuziki rya Active.

Mu mashusho akomeje kuzenguruka ku mbuga nkoranyambaga, agaragaraza Derek wakundanye na Teta Sandra bahuje urugwiro muri kamwe, mu tubari two mu mujyi wa Kigali kitwa Wave.

Aho hakaba hari habereye ibirori byateguwe na Teta Sandra afatanije na Gatete Sharomo Xinda, na we umaze kuba inganzamarumbo mu gutegura ibirori bibera hirya no hino mu duce dutandukanye twiganjemo utubari.

Urukundo rwa Teta Sandra na Derek rukaba rwaradutse muwa 2014 nyuma y'uko uyu mukobwa atandukanye na Prince Kid gusa baza kurushyiraho akadomo muwa 2016.

Mu mwaka wa 2018 Teta Sandra yatangiye gukundana na Weasel baza no kubyarana abana babiri, gusa mu minsi yashize aba bombi baherutse kugirana ibibazo bikomye byatumye batandukana.

Na none ariko Weasel muri iyi minsi yumvikanye avuga ko yifuza kongera kubana na Teta Sandra bakasezerana kubana akaramata.

Amashusho ya Teta Sandra na Derek akomeje guhererekanwa ku mbuga nkoranyambagaTeta Sandra na Derek barawubanyeNtawamenya gusa aho yaciye nihaca urwango