Blog

Ibi Perezida Kagame yabigarutseho kuri uyu wa Mbere, tariki 27 Gashyantare mu 2023 mu nama y'Umushyikirano.

Ni nyuma y'uko umunyemari Dennis Karera yari amaze kugaragaza ko Abanyarwanda batazoroherwa no gukorera ku Isoko Rusange rya Afurika [Africa Continental Trade Free Trade Area] kubera uburyo bagorwa no kubona ibyangombwa bibemerera kujyana ibicuruzwa ku isoko mpuzamahanga.

Ku itariki ya Mbere Mutarama 2021 nibwo amasezerano ashyiraho Isoko Rusange rya Afurika, African Continental Free Trade Area (AfCFTA), yatangiye gushyirwa mu bikorwa nyuma y'imyaka ibiri ashyizweho umukono n'ibihugu 54 muri 55 bigize Afurika

Ishyirwa mu bikorwa ry'aya masezerano ryitezweho kuzongera ubuhahirane mu bihugu bya Afurika rirasa nk'irigenda biguru ntege kuko nyuma y'umwaka ritangiye, nta mpinduka igaragara irabaho.

Mu ntego za mbere za AfCFTA, ni ukongera ubucuruzi hagati y'ibi bihugu ndetse hakabaganywa amafaranga atangwa mu kuvana ibicuruzwa mu gihugu kimwe cya Afurika bijya mu kindi ku rugero rwa 97%.

Mu gusubiza iki kibazo cya Karera, Minisitiri w'Ubucuruzi n'Inganda, Chrysostome Ngabitsinze yagaragaje ko Isoko Rusange rya Afurika riijyaho icyabanje gukorwa ari ugukora ubukangurambaga, ibijyanye na 'one stop center' nabyo bikaba biri kurebwaho.

Ati 'Twari tumaze iminsi turi mu bukangurambaga kugira ngo abantu bamenye uko bikora, ibyo avuga nibyo ariko bihagarariwe n'Urwego rw'Igihugu rw'Iterambere, RDB, ubu dufite itsinda ririmo Rica, Urwego rw'Igihugu rushinzwe ubugenzuzi bw'ubuziranenge, ihiganwa mu bucuruzi no kurengera umuguzi (RICA), Ikigo cy'Imisoro n'Amahoro, RRA ndetse n'Ikigo gishinzwe iyoherezwa mu mahanga ry'ibikomoka ku buhinzi n'ubworozi, NAEB n'abandi kugira ngo bafashe ibyo byangombwa bijye bibonekera ahantu hamwe kandi mu buryo bwihuse.'

Perezida Kagame wasaga n'utanyuzwe n'igisubizo cya Ministiri Ngabitsinze yahise agaragaza ko bitumvikana uburyo one stop center ishobora gufatwa nk'igisubizo gishya kandi ari ibintu u Rwanda rumaze imyaka rwariyemeje.

Ati 'Ubu ikibazo cya one stop center kigarutse aha gite? Imyaka ibaye ingahe? Ubu Karera kuko yakibajije ni ikintu gishya yazanye? Ni igitekerezo gishya yazanye? Namwe mubitega amatwi bisa nk'aho ari ibintu bishya mwumvise.'

Yakomeje abaza Umuyobozi Mukuru wa RDB, Clare Akamanzi niba bitagayitse kuba abantu bari kuganira ku kibazo kimaze imyaka myinshi cyarahawe umurongo.

Ati 'One stop center se iba mu isoko rimwe gusa ntibe mu rindi, ko twabishyizeho nka politike, aho bikwiriye kuba bikora hose. Clare (Akamanzi) ubu tugiye kongera kuganira one stop center nyuma y'imyaka ingahe kubera iki?'

'Ikibazo cya One stop center cyatangiye RDB ijya kujyaho, RDB yagiriyeho iki? Yagiyeho ite se? One Stop Center yatumye RDB ijyaho ubu tugiye kuyisubiramo nyuma y'imyaka 20 irenga nk'igitekerezo gishya, ubu nawe imyaka umaze muri RDB ishize wumva One Stop Center nk'igice cy'ahantu hamwe.'

Mu gusubiza, Clare Akamanzi yavuze ko ubu buryo bwo kohereza abashoramari bwa 'one stop center' bujyaho bwari bugamije kubafasha mu bijyanye no kubonera ahantu hamwe serivisi zijyanye n'ibyangombwa byo gukora, iby'ubuziranenge, kwishyura imisoro n'ibindi.

Akamanzi yakomeje agaragaza ko nubwo iki cyerekezo ari cyo cyari gihari ubu buryo bushyirwaho, kugeza ubu hari ibyangombwa abashoramari bakenera bitangirwa ahantu hatandukanye.

Perezida Kagame yamubajije uwazanye igitekerezo cyo kugira ngo ibintu bikorwa mu buryo butandukanye n'ubwari bwateguwe.

Clare Akamanzi mu gusubiza yagize ati 'Uhereye ku itangiriro habayeho kubyumva nabi ko one stop center igomba gutanga impushya zose zikenewe n'abashoramari, hanyuma ugasanga nk'ukeneye icyangombwa mu bijyanye n'ubucukuzi akajya mu Kigo Gishinzwe Mine, Peteroli na Gaz (RMB), ukeneye icyangombwa cy'amabanki ajya muri Banki Nkuru y'Igihugu n'ukeneye ikijyanye n'ubwikorezi akajya muri RURA. Icyo twakoraga ni ukubaha ibyangombwa by'ingenzi hanyuma ubundi niba umushoramari akeneye kujya muri icyo kigo tukamujyanayo.'

Umuyobozi Mukuru wa RDB yakomeje agaragaza ko nyuma aribwo baje gutahura ko iyo mikorere irimo ibibazo kandi isiragiza abashoramari.

Perezida Kagame yahise agaragaza ko bitumvikana uburyo abantu bashobora gukomeza guhitamo gukora gutyo kandi babibona ko hari ikitagenda neza.

Ati 'Wowe uhitamo gute gufata umuntu ukamwirukankana ukamujyana ahandi, warangirije ibibazo bye aho? Ibi twavugaga by'ikoranabuhanga byagiriyeho iki? Kuki umuntu yaza kubareba ubundi akajya ahandi nka hatatu hajyanye n'ibyo yaje kubarebera, kandi ukamara imyaka 10 utabibona nk'ikibazo, haba habaye iki? Haba habaye iki Clare?[…] iyi mikorere ikwiriye guhagarara cyangwa mwe mugahagarara.'

Clare Akamanzi yagaragaje ko kuva uyu mwaka watangira iki kibazo cyakemutse ku buryo iyi nzira ya 'one stop center' u rwanda rwahisemo ikora neza.

---

Source : http://igihe.com/amakuru/u-rwanda/article/bikwiye-guhagarara-cyangwa-mwe-mugahagarara-perezida-kagame-yanenze-abayobozi

Ku bakiliya bashya bifuza gutunga dekoderi ya CANAL+ ya HD  ubu barayigura ku 5,000 Frw gusa maze bagakorerwa na installation ku bindi bihumbi 5,000Frw. Ikindi kandi nuko nabafite decoderi za kera bifuza guhindura nabo bahindurirwa kuri iki giciro.

Mu gihe abasanzwe ari abakiriya ba CANAL + guhera kuri uyu wa 24 Gashyantare 2023, bagenewe poromosiyo kuri buri mukiliya uguze ifatabuguzi yari asanzwe agura atagiye munsi yaryo cyangwa uguze iryisumbuyeho, ahita ahabwa iminsi 15 areba shene zose za CANAL+ ako kanya.

Iyi poromosiyo yatangijwe ku mugaragaro kuri uyu wa mbere, ni poromosiyo iri kubera mu gihugu hose, aho abacuruzi barenga 100 ba Canal+ biteguye kugeza ibikoresho ndetse na abonema ku banyarwanda bose.

Abacuruzi ba Canal+ biteguye kugeza ibikoresho n’ifatabuguzi hose

Muri iyi poromosiyo  urabasha kureba amashampiyona yose akomeye mu mupira w'amaguru, nka Uefa Champions league, Premier league, La liga, Ligue 1,Bundesliga na Serie utibagiwe na NBA n'izindi shampiyona zikomeye ku mugabane w'Afrika.

Si ibyo gusa kuko Canal+ igufite n'amasheni meza wareberaho filimi zitandukanye zigezweho by'umwihariko harimo n'izo iyi Sosiyete yitunganyiriza zitarerekanwa ahandi, muri izi twavuga nka filime yihariye ivuga kuri Afrika yitwa ‘Le trône d'Akachi’ agace ka mbere n'agace ka kabiri bikazatambuka tariki ya 13 Werurwe 2023 kuri shene ya Canal+ Première.

Aimé Abizera ushinzwe ubucuruzi muri Canal + yavuzeko iyi ‘Promo Itwika’ ije gufasha abanyarwanda gukurikira imikino inyuranye kandi yihariye harimo imikino ya BAL izabera mu mijyi itandukanye y'Afrika, utibagiwe na filime nziza zihariye, zirimo niziri mu Kinyarwanda kuri shene ya ZACU TV.

Aimé Abizera asobanura ibya ‘Promo Itwika’

Canal+ isanga nta munyarwanda ukwiye gucikwa no gukoresha serivise zayo ngo yirebere amashusho meza ya HD kuko uretse ibikoresho bihendutse, ibaha n'ifatabuguzi rya make riha abakiliya amahirwe yo kureba amashene menshi abafasha gususuruka.

Umukiliya wifuza kugura ifatabuguzi ashobora kunyura k'umucuruzi wemewe wa CANAL+ cyangwa akifashisha ikoranabuhanga, nka MTN MOMO (*182*3*1*4#) cyangwa Airtel Money (*500*7#).

Canal+ iyoboye ku mikino n’imyidagaduro yashyizeho Poromosiyo

Source : https://inyarwanda.com/inkuru/126511/canal-yashyize-igorora-abanyarwanda-muri-poromosiyo-yise-promo-itwika-126511.html

Kuri iki cyumweru mu Karere ka Bugesera Umurenge wa Ntarama ahanzwi nka Tuuza Inn hasojwe circuit ya mbere ya Beach volleyball yari imaze iminsi ibera muri aka karere kuva kuwa gatandatu.

Ku nshuro ya mbere Uyu mwaka, Iyi circuit yitabiriwe n'amakipe n'amakipe 24 (couples) aho mu buri cyiciro cyitabiriwe na couples 12.

Iyi mikino yakinwe mu buryo busanzwe habanje gutomborana hagati yabo nyuma hakurikiyeho imikino y'ijonjorora ryibanze 1/4, 1/2 n'imikino ya nyuma Finals.

Nyuma yuko imikino y'ijonjora ry'ibanze ibaye kuwa 6, kuri iki cyumweru hakinwe imikino ya 1/4 kujyeza kuri Final aho hifashijwaga ibibuga 2 imikino ikaberaho iteganye.

Ikipe igizwe na Ntagengwa Olivier na Gatsinzi Venuste nizo zegukanye umwanya wa mbere mu cyiciro cy'abagabo batsinze Muvunyi Fred na Mugisha Emmanuel amaseti 2-0.

Mu cyiciro cy'abagore, Ikipe ya Munezero Valentine na Musabyimana Penelope niyo yegukanye umwanya wa mbere nyuma yo gutsinda Hakizimana Judith na Amito Sharon amaseti 2-1.

Ku mwanya wa gatatu mu bagabo wegukanywe na Habanzitwari Fils na Mbonigaba Vicent (Nyaruguru) nabo mu cyiciro cy'abagore wegukanwa na Nzamukosha Oliver na Uwimbabazi Léa.

Biteganyijwe ko uyu mwaka yuko shampiyona ya 2023 itangira, hagomba gukinwa Circuit 3 ubwo hakaba hasigaye 2 nyuma yiyi yabereye i Bugesera.

Circuit zisigaye biteganyijwe ko zizabera mu turere twa Huye aho mu mpera ziki cyumweru bazatangira kubakinira nyuma yaho imikino ikazakomereza mu karere ka  Rubavu mu matariki ataratangazwa.

The post Gatsinzi na Ntagengwa mu bagabo na Munezero Valentine na Musabyimana mu bagore begukanye circuit ya mbere ya Beach Volleyball appeared first on RUSHYASHYA.

Source : https://rushyashya.net/gatsinzi-na-ntagengwa-mu-bagabo-na-munezero-valentine-na-musabyimana-mu-bagore-begukanye-circuit-ya-mbere-ya-beach-volleyball/?utm_source=rss&utm_medium=rss&utm_campaign=gatsinzi-na-ntagengwa-mu-bagabo-na-munezero-valentine-na-musabyimana-mu-bagore-begukanye-circuit-ya-mbere-ya-beach-volleyball

Munyankindi ni umwe mu rubyiruko rw'intore mu Mbanzabigwi z'Akarere ka Gisagara mu Majyepfo y'u Rwanda, witabiriye Inama y'Igihugu y'Umushyikirano yatangiye kuri uyu wa Mbere tariki 27 Gashyantare 2023 iri kubera muri Kigali Convention Centre.

Uretse Abanyarwanda barenga 1500 bakoraniye muri iyi nyubako, mu turere dutandukanye twatoranyijwe bamwe mu baturage bafite ibitekerezo n'ibibazo bashyizwe ahantu hamwe, ari naho Munyankindi yari [Mu karere ka Gisagara] ubwo yavugaga ku rugendo rwe rw'ubuzima.

Ahawe umwanya, Munyankindi Abraham yashimye Perezida Kagame ku bwa gahunda y’uburezi kuri bose. Yavuze ko binyuze mu miyoborere myiza, yabashije kwiga arangiza icyiciro cya Gatatu cya Kaminuza.

Uyu musore yavuze ko akimara kurangiza amashuri yahise asubira iwabo i Gisagara, ashaka uburyo bwo kwiteza imbere bitanyuze mu gushakisha akazi.

Munyankindi avuga ko yashatse ibiraka abikuramo ibihumbi 200 Frw, ayakoresha agura inkoko 50. Izi nkoko yarazoroye, zitumuteza imbere.

Muri ya gahunda yo kuremera urubyiruko, Leta yamuteye inkunga y’ibihumbi 300Frw arabyongera bibasha kumugeza ku nkoko 500.

Yavuze ko izi ‘nkoko zamfashije mu bukire, ndakira’. Avuga ko amafaranga y’inyungu yakuraga mu korora inkoko, yayashoraga no mu bucuruzi bwo kugura imyaka akayisubiza.

Munyankindi avuga ko yatanze akazi ku rubyiniro 9, kandi muri aba, batanu yabaguriye moto. Uyu musore yavuze ko ubu nawe yaguze imodoka ‘imufasha kuzenguruka akora akazi ke’.

Yanavuze ko ubu afite abana batatu yakuye mu muhanda. Ati “Ubu bariga neza.” 

Yavuze ko imihigo ikomeje kuko ari mu biganiro n’Ikigo cy’Igihugu cy’Ubushakashatsi n’Iterambere mu byerekeye Inganda (NIRDA), mu kureba uko batangiza uruganda rutunganya ibikomoka kuri avocat birimo nk’amavuta.

Munyankindi yemeza ko akataje mu rugendo rwe rw'ubuzima, kandi arifuza ko mu myaka 10 iri imbere azaba ari mu bakire u Rwanda rufite.

Ati “Ndifuza ko mu myaka icumi iri imbere, ngomba kuzaba ndi mu bakire 10 iki gihugu kizaba gifite.'

Umushyikirano ni inama ihurirwamo n’abayobozi mu nzego nkuru za Guverinoma n’Abanyarwanda bari imbere no hanze y’igihugu, aho barebera hamwe ibyagezweho ndetse bakaganira ku mbogamizi zihari n’ingamba zarushaho guteza igihugu imbere.

Umushyikirano ukomoka mu muco no mu migenzo y’Abanyarwanda. Umushyikirano kandi uri mu Itegekonshinga ry’Igihugu guhera mu 2003.

Guverinoma y’u Rwanda yawushyizeho nka kimwe mu bisubizo by’umwimerere Abanyarwanda bihangiye, mu rwego rwo kujyanisha gahunda z’Igihugu z’iterambere n’amateka y’Abanyarwanda.

Source : https://inyarwanda.com/inkuru/126507/arifuza-kuba-mu-bakire-10-mu-rwanda-munyankindi-wahereye-ku-nkoko-50-yatinyuye-urubyiruko–126507.html

Umugore witwa Mukandekezi Solina w'imyaka 41, biravugwa ko yatawe muri yombi n'urwego rw'Igihugu rw'Ubugenzacyaha-RIB. Akurikiranyweho urupfu rw'umugabo we Shumbusho Jean Bosco w'imyaka 43 y'amavuko. Amakuru akavuga ko ashobora kuba yiyahuye abandi bakavuga ko yabanje gukubitwa bapfa amafaranga ibihumbi 2 y'u Rwanda. Byabaye mu ijoro ryo ku wa 26 Gashyantare 2023, Umurenge wa Cyeza, Akagari ka Makera, Umudugudu wa Nyarutovu.

Bamwe mu baturanyi be bavuganye n'umunyakamuru wa intyoza, bavuze ko uyu mugore n'umugabo we bavuganye nabi ndetse bakozanyaho, umugabo amubaza impamvu atahashye kandi yamusigiye ibihumbi bibiri (2000frw), umugore amubwira ko azayahahisha bucyeye, aribwo batangiye kurwana.

Bavuga ko muri uku kurwana, mbere yuko ava mu rugo n'abana ngo we n'umwe mu bana bashobora kuba barafatanije bakubita umugabo, bamugira intere babona guhunga urugo, aho bagarutse mu gitondo.

Umwe mu baturanyi yagize ati' Twamenye amakuru ko batonganye mu ijoro ryo ku wa  26 Gashyantare 2023 ndetse umugore n'abana baramuhunga kuko yaje ahagana saa munani z'ijoro yasinze, arwana nabo baramusiga. Bagarutse mu gitondo basanga amerewe nabi baratabara bamujyana kwa muganga'.

Hari undi nawe wabwiye umunyamakuru ko yumvise hari abavuga ko Nyakwigendera bamushahuye, gusa akongeraho ko ntabyo yabonye. Bakeka kandi ko bishoboka ko uyu mugore yafatanyije n'umukobwa we bakamukubita byo kumwica, barangiza bakamubuganiza imiti iterwa mu ntoryi kugirango bavuge ko yiyahuye.

Umunyamabanga Nshingwabikorwa w'umurenge wa Cyeza, Gakwerere Eraste yabwiye umunyamakuru ko uyu mugabo bikekwako yaba yanyoye imiti irinda udukoko, imbuto z'intoryi kuko akimara gutabarizwa yajyanywe ku kigo Nderabuzima cya Gitarama ahazwi nko mu Cyakabiri, arayirutswa. Akomeza avuga ko byakomeje gukomera bahamagaza imodoka itwara indembe(Ambulance), ihageze isanga yamaze gupfa.

Uyu Nyakwigendera Shumbusho Jean Bosco, byitezwe ko ajyanwa gupimwa kugirango hamenyekane icyateye uru rupfu. Uyu mugore yamaze gutabwa muri yombi aho yabaye acumbikiwe n'urwego rw'Igihugu rw'Ubugenzacyaha-RIB kuri Sitasiyo ya Nyamabuye.

Akimana Jean de Dieu

Source : https://www.intyoza.com/2023/02/27/muhanga-cyeza-umugore-arakekwaho-kwica-umugabo-bapfuye-2000fr/

Umunyamabanga wa Leta muri MININFRA, Uwase Patricie, yavuze ko mu mezi 3 ari imbere,Mu mujyi wa Kigali hazongerwa imodoka zitwara abagenzi 300.

Mu nama y'Umushyikirano iri kuba ku nshuro ya 18,umwe mu batanze ibitekerezo yabajije impamvu Perezida Kagame yatanze umurongo ku kibazo cyo gutwara abantu n'ibintu ariko kugeza n'ubu abantu bakaba bagitegereza imodoka amasaha menshi.

Madamu Uwase yagize ati “Icyo navuga cyakozwe nuko turi hafi kugura imodoka ziyongera ku zindi zihari.Ese n'ikibazo cy'imodoka zidahari?nibyo koko zagiye zigabanuka guhera muri 2012,2014 hari icyakozwe ariko muri kwa kudakurikirana batubwiye urwego rw'abikorera rwahuye n'ikibazo imodoka ziragabanuka cyane bigera aho gutegereza imodoka bitinda ariko mu gihe kidatinze mu mujyi wa Kigali turaba twongereyemo imodoka 300.

Abajijwe igihe bizamara ngo izi modoka zibe zageze mu Rwanda yavuze ko nibura bizatwara amezi atatu ndetse yemeza ko n'izitwara abagenzi mu ntara zizongerwa.

Ati “Nibyo koko igihe abantu bategereza imodoka gikomeje kuba kinini.Twatangiye gushaka aho kuzigura ndetse n'ingengo y'imari izigura yarabonetse,twavuganye na Minisitiri w'Imari n'igenamigambi,ikibura n'ukuzitumiza.

Mu gihe navuga ko bitarenze amezi atatu kuko hari aho zitumizwa nabyo bifata umwanya.Iyi gahunda iri gukorwaho iri hafi kurangira.”

Madamu Uwase yavuze ko Leta iri gufasha abikorera ndetse ubu abatwara abagenzi bavuye kuri batatu gusa ubu byahawe buri wese ushoboye.

Source : https://umuryango.rw/amakuru/mu-rwanda/ubukungu/article/umujyi-wa-kigali-ugiye-kongerwamo-imodoka-300-zitwara-abagenzi

Umunyamabanga wa Leta muri Minisiteri y'ubutegetsi bw'Igihugu ushinzwe imibereho myiza y'Abaturage, Ingabire Assoumpta yibukije abaturage kugira uruhare rufatika mu bikorwa byo kurwanya isuri kuko itwara ubutaka burimo ifumbire bigatuma bateza neza ibyo bahinze ndetse bagahomba ubutaka bwabo.

Ibi yabigarutseho mu muganda usoza ukwezi kwa Gashyanyare 2023 wabereye mu karere ka Muhanga mu murenge wa Kibangu, ahacukuwe imirwanyasuri hakanaterwa ibiti. Yabasabye kugira uruhare rufatika mu bikorwa byo kurwanya isuri kuko ibatwarira ubutaka burimo ifumbire, ubusigaye bukagunduka bityo bigateza ibibazo, bagahomba imyaka yabo bahinze, ntibeze neza ahubwo bakagwa mu gihombo.

Akomeza yibutsa ko bakwiye kuzajya babungabunga imirwanyasuri bakayiteraho ibyatsi byagaburirwa amatungo. Yibutsa Abafashamyumvire b'ubuhinzi ko bakwiye kujya basobanurira neza abaturage ibijyanye no kubungabunga ibidukikije, bagatera ibiti bivangwa n'imyaka.

Umuturage Mukangenzi Christine, avuga ko umuganda wamufashije guca imirwanyasuri mu mirima ye akaba akize ikibazo cy'ubutaka bwajyanwaga n'isuri kubera  imivu y'amazi, bigatuma n'ibyo ahinze bitera neza kubera ko agafumbire kaba kagiye,  agahora mu gihombo cy'ibyo yahinze.

Ati' Bamfashije guca imirwanyasuri kandi ndabashimiye cyane kuko ntabwo nari kuzabyishoboza. Bandindiye isambu ikibazo cy'ubutaka bwajyanwaga n'isuri kubera amazi ndetse yanagiraga uruhare mu gutuma dusigarana ubutaka butera kubera ubutaka burimo ifumbire bwamaze gutwarwa bukajyanwa n'imigezi'.

Bizimana Silas, avuga ko ubutaka bukorerwaho ubuhinzi buri ahahanamye butaraciweho imirwanyasuri biteza ikibazo kuko ibyo uhinzeho amazi abitwara. Yemeza ko ahacukuwe imirwanyasuri hagaterwaho ibiti bifata ubutaka uba wizeye ko ibyo wahinze bitapfa kujyanwa n'ibiza uko bije. Asaba bagenzi be guca imirwanyasuri bakayiteraho ubwatsi kuko babugaburira amatungo cyangwa bakabugurisha ku bayafite.

Umuyobozi w'Akarere ka Muhanga, Kayitare Jacqueline yabwiye itangazamakuru ko kugeza ubu gahunda yo kurwanya isuri igomba gusiga Hegitari ibihumbi 28 birwanyijeho isuri ndetse ko bageze kuri 86%, ko mu gihe cya vuba bashobora kuzarenza umuhigo bari barihaye wo kurwanyaho isuri.

Akomeza yibutsa abaturage ko kurwanya isuri babikora no mu mirima yabo. Avuga ko imbogamizi ari amasambu afite ba nyirayo batayakoreraho ibikorwa by'ubuhinzi, aho usanga ateza ibibazo abaturanyi bayo mu gihe bo baciye imirwanyasuri.

Mu Karere ka Muhanga, ibikorwa byo kurwanya isuri mu butaka bw'abaturage bimaze kugera kuri 86%, aho hagamijwe gufatanya n'abaturage gucukura imirwanyasuri mu masambu yabo. Muri iyi gahunda hamaze guterwa ibiti bisaga ibihumbi magana atatu mirongo itanu(350.000 Rfw) bivangwa n'imyaka, birimo n'iby'imbuto. Akarere n'abafatanyabikorwa bako, bafite umuhigo wo gutera ibiti bisaga ibihumbi 450.

Akimana Jenan de Dieu

Source : https://www.intyoza.com/2023/02/27/muhanga-minisitiri-ingabire-yibukije-abaturage-ko-bakwiye-kugira-uruhare-mu-kurwanya-isuri/

Umutwe w'inyeshyamba wa M23 uvuga ko udashyize imbere ibyo gufata uduce ahubwo ugamije kurokora abantu, nyuma yuko ku cyumweru wigaruriye agace ka Rubaya ko muri teritwari ya Masisi muri Kivu ya Ruguru.

Agace ka Rubaya, gakize ku mabuye y'agaciro nka coltan, kari mu ntera ya kilometero zigera kuri 50 mu burengerazuba bwa Goma, umurwa mukuru wa Kivu ya Ruguru.

Ku wa gatanu nabwo M23 yigaruriye agace ka Mushaki ko muri Masisi.

Mu kiganiro na BBC Gahuzamiryango, umuvugizi wa gisirikare wa M23 Major Willy Ngoma yavuze ko “gufata ahantu si byo dushyize imbere, ahubwo kurokora abantu bari mu byago”.

Ati: “Intego yacu si ugufata imijyi n'uduce. Ariko tubikora mu kwirwanaho ubwacu no kurwana ku baturage bacu”.

BBC Gahuzamiryango yagerageje kuvugana n'igisirikare cya Repubulika ya Demokarasi ya Congo (FARDC) ariko kugeza ubu ntibirashoboka.

Gusa FARDC yagiye ishinja M23 kuba ari yo iyigabaho ibitero irenze ku masezerano yo guhagarika imirwano yemejwe n'abakuru b'ibihugu byo mu karere.

Major Ngoma avuga ko abaturage b'i Mushaki n'i Rubaya ubu bakomeje ibikorwa byabo bya buri munsi, gusa ibi BBC Gahuzamiryango ntiyashoboye kubigenzura mu buryo bwigenga.

Ariko bamwe mu bahatuye n'abakozi bo mu miryango itanga imfashanyo bavuga ko hari abaturage bahahunze kuva M23 yafata Mushaki na Rubaya.

Major Ngoma yavuze ko M23 ishaka ko ikibazo “kirangira mu nzira y'amahoro”, ariko ko “nta bushake bwa politiki buhari” ku ruhande rwa leta DR Congo.

Leta ya DR Congo ivuga ko M23 ari umutwe w'iterabwoba idashobora kuganira na wo mu gihe cyose utarashyira intwaro hasi ndetse ukava mu duce wafashe.

Leta ya DR Congo inawushinja guhabwa ubufasha bw'abasirikare n'ibikoresho na leta y'u Rwanda, ikirego M23 na leta y'u Rwanda bahakana.

Muri uku kwezi kwa kabiri, umuryango uharanira uburenganzira bwa muntu Amnesty International washinje inyeshyamba za M23 ubwicanyi no gufata ku ngufu abagore n'abakobwa barenga 60 mu gace ka Kishishe na Bambo mu kwezi kwa 11 mu 2022.

Iyo raporo yawo yakurikiye izindi za ONU/UN na Human Rights Watch na zo zishinja M23 ibyaha byo mu ntambara bivugwa ko byakorewe i Kishishe na Bambo muri Kivu ya Ruguru.

Avuga kuri iyo raporo icyo gihe, Major Ngoma yabwiye BBC Gahuzamiryango ko ibirego byo gufata abagore ku ngufu bivugwa na Amnesty ari ibintu “abasirikare bacu badashobora gukora” kandi ko ari raporo “igamije gusa kwanduza isura ya M23”.

Source : https://umuryango.rw/amakuru/mu-mahanga/umutekano/article/m23-yatangaje-ko-ikiyitera-kurwana-inkundura-ari-ugutabara-abantu-kurenza

Itegeko rishyashya ryemeje ko imyaka yo kurongora ari 18 ryatangajwe mu ngiro mu Bwongereza no muri Wales, igihugu giherereye mu majyepfo y’uburengerazuba bw’Ubwongereza.

Mbere abantu bashoboraga kurongora cyangwa kurongorwa ku myaka 16 cyangwa 17 mu gihe ababyeyi babo babibemereye, kandi nta tegeko ryababuzaga kubana batiyandikishije mu mategeko.

Iri tegeko rishya kandi riremerera abakundana kurushinga batarinze guca imbere y’amategeko. Leta y’Ubwongereza ivuga ko izi mpinduka zishobora gufasha abana kubarinda gufatwa ku ngufu, no kurongorwa ku gahato.

Iri tegeko kandi rirabuza ko abana (bari munsi y’imyaka 18) babana mu buryo ubwo ari bwo bwose, hakoreshejwe ingufu cyangwa zitakoze.

Mu Bwongereza imyaka yo kurongora yagejejwe kuri 18, ivuye hagati ya 16 na 17.

Iryo tegeko ntirireba ibihugu bya Ecosse na Irlande ya ruguru, aho imyaka mike yo gushobora kurongora izaguma ari 16. Muri ibi bihugu, ababyeyi bategetswe kubanza kwemerera abana bari munsi y’imyaka 18 kurushinga.

Source : https://inyarwanda.com/inkuru/126505/u-bwongereza-imyaka-yo-kurongora-yagejejwe-kuri-18-126505.html

Umutegetsi mukuru muri Kenya bwana William Ruto, yasabye amahanga cyane cyane Amerika n'uburayi gufatira ibihano birimo kubuzwa kujya muri ibi bihugu mukeba we Raila Odinga, ashinja kurwanya gahunda za leta no kutemera perezida watowe n'abaturage.

Ikinyamakuru the Daily Nation mu nkuru zacyo cyasohoye ku cyumweru, imwe iravuga ko abambari ba perezida Ruto binyuze mu ihuriro Kenya Kwanza, basanga Raila Odinga akwiye guhagurukirwa ahanini hagendewe mu mahuriro y'abaturage yamagana ubutegetsi amaze iminsi akoresha.

Muri politiki mpuzamahanga birasanzwe ko abarwanya ubutegetsi bafatirwa ibihan,o ahanini bishingiye kugukomanyirizwa ingendo mu mahanga, kandi ngo bitanga umusaruro kuko bahita abacisha make banga ko ishoramari ryabo mu mahanga rifatirwa cyangwa se rikagirwaho ingaruka, bakanatinya ko nibarwara batazabasha kujya kwivuza mu mahanga, ahaba ubuvuzi buteye imbere.

Iki kinyamakuru cyanditse ko abategetsi bashyigikiye Perezida William Ruto, basaba ko Amerika n'uburayi kimwe n'izindi nshuti ze zimufatira ibihano birimo kutemererwa kuhagera, niba adahagaritse kwangisha Ruto abaturage avuga ko atatowe.

Bwana Odinga avuga ko azahagurutsa abaturage igihe cyose hari ibyo atemeranyaho na leta, kuri ubu avuga ko atemera ko Perezida Ruto yatowe ndetse ngo azamara iminsi 14 mu myigaragambyo isaba ko hahinduka uko komisiyo y'amatora ishyirwaho.

 Abashyigikiye ubutegetsi baravuga ko imikorere ya Raila Odinga, isa n'iyimitwe yitwaje intwaro ishaka kumena amaraso mu gihugu.

Iyi myigaragambyo ngo yashegeshe ubukungu kandi abantu benshi bayigwamo.

Ubu igisigaye ni ukumenya niba amahanga azumva neza ubusabe bwa perezida wa Kenya, akamufasha kumunigira Odinga warahiye ko atazayoboka.

The post <strong>Kenya: Perezida Ruto yasabye Amerika n'uburayi gufatira Odinga ibihano</strong> appeared first on FLASH RADIO&TV.

Source : https://flash.rw/2023/02/27/kenya-perezida-ruto-yasabye-amerika-nuburayi-gufatira-odinga-ibihano/?utm_source=rss&utm_medium=rss&utm_campaign=kenya-perezida-ruto-yasabye-amerika-nuburayi-gufatira-odinga-ibihano