Blog

Ariko se ko ikibyimba cye cyajemo kanseri, kizakira? Abategetsi ba Kongo bari bamenyereye imvugo ya 'cira aha nikubite', nabo si ukwiriza no kwitetesha sinakubwira. Bari bazi ko kugereka ibibazo byabo ku Rwanda bizahoraho, birengagije ko ukuri gutinda kugatsinda.

Ubwo Perezida Tshisekedi yatumiraga muri Kongo Perezida w'Ubufaransa, Emmanuel Macron, yibwiraga ko ari undi mwanya abonye wo gusuka amarira ashinja u Rwanda uruhare mu bibazo byamunaniye, ndetse akanarusabira ibihano.

Yumvaga Perezida Macron nawe azaba nka ba Senateri Robert Menendez na bamwe mu badepite bo mu Burayi Tshisekedi yafunze umuba w'amafaranga ngo bazengereze u Rwanda. Ibyo yari yiteze ariko ntibyamuhiriye, kuko Perezida Macron yamubaze ta kinya.

Ubwo yari mu ruzinduko muri Kongo kuwa gatandatu ushize, Perezida Macron yahisemo gukanda ikibyimba kikameneka, agamije kukivura kigakira, aho kugisiga amavuta gusa nk'uko bimenyerewe, kugeza ubwo cyaje no kuvamo kanseri. Ukuri Tshisekedi yabwiwe kwaramutunguye, kuko yari akuzi gusa ku bayobozi b'u Rwanda, dore ko abandi barumaga bagahuha.

Mu mvugo itanyura ku ruhande, Perezida w'Ubufaransa yabwiye Tshisekedi ko nyirabayazana w'ibibazo bya Kongo ari Abanyekongo ubwabo, bikaba ari ubugwari gushaka abandi babyegekaho. Yagize ati:'Kuva muw'1994 mwananiwe kubaka ubusugire bw'igihugu cyanyu, haba mu rwego rw'igisirikari n'umutekano, haba no mu mitegekere y'igihugu.

Mumbabarire kubabwiza ukuri gusharira, ariko ntimugashakire hanze ya Kongo ababateza ibibazo'. Perezida Macron ntiyagarukiye aha, ahubwo yanibukije ko amatora yo muw'2018 yashyize Tshisekedi ku butegetsi, yabayemo uburiganya, mu by'ukuri akaba ari mu mwanya utari uwe.

Muri make mbere yo gushinja u Rwanda n'ibindi bihugu uruhare mu guhungabanya ubusugire bwa Kongo, Tshisekedi n'agatsiko ke bagombye kwibuka ko kwiba amatora ari uguhonyora itegekonshinga, guhungabanya bikomeye ubusugire bw'igihugu. Ku birebana n'ibihano Tshisekedi yasabiraga uRwanda, Emmanuel Macron yamushubijke ko hakwiye kubanza kubahirizwa imyanzuro yafatiwe i Luanda muri Angola, aba amubwiriyemo ko agomba gushaka igisubizo cy'intambara binyuze mu mishyikirano, nk'uko iyo myanzuro ya Luanda ibiteganya. Nguko rero uko uwahigaga yahindutse umuhigo.

Nyuma y'iyo mvugo ikarishye Tshisekedi yananiwe kwihangana, agaragaza ubuswa muri dipolomasi n'indi myitwarire idakwiye umuntu uri ku rwego rwa Perezida w'igihugu. Nyamara uburakari bwa rya tungo ryo mu rugo bushirira mu kuzunguza umurizo.

Ko Tshisekedi se atarakaye ngo yange imfashanyo Perezida Macron yahavuye amwemereye? Tshisekedi nashikame ahangane n'ukuri, kuko ikinyoma ntigihabwa intebe kabiri. Nyuma ya Papa Francis nawe wamubwiye ko umuti w'ibibazo bya Kongo uri mu biganza by'Abanyekongo, akanamwibutsa ko ivangura rishingiye ku moko rizatuma ibintu birushaho kumukomerana, inzira yo kumywa umuti ushaririye igomba kuba itangiye kuri Tshisekedi.

Ibyo gushyikirana n'abamurwanya yari yarateye umugongo ubanza ari yo nzira rukumbi asigaranye yo kwivana mu mazi abira.

The post Perezida Emmanuel Macron yabaze Tshisededi nta kinya. appeared first on RUSHYASHYA.

Source : https://rushyashya.net/perezida-emmanuel-macron-yabaze-tshisededi-nta-kinya/?utm_source=rss&utm_medium=rss&utm_campaign=perezida-emmanuel-macron-yabaze-tshisededi-nta-kinya

Rutahizamu Issa Bigirimana wamamaye muri APR FC, ubu aryohewe n’urukundo rushya n’inkumi y’i Burundi, Scheilla.

Ni nyuma y’uko urukundo rwe na Uwase Carine yari yarambitse impeta ya fiançailles muri 2019 bagategura gukora ubukwe mu mpera 2021 rwajemo agatotsi bagahitamo gutandukana.

Buri umwe yahisemo kunyura inzira ye aho Uwase Carine ari mu rukundo na The Major wo muri Symphony Band.

Issa Bigirimana na we akaba ari mu rukundo rushya n’uyu mukobwa w’Umurundikazi.

Amakuru ISIMBI yamenye ni uko aba bombi bamaze amezi 7 bari mu rukundo ndetse mu minsi yashize Scheilla yari i Kigali yaje gusura umukunzi we Issa Bigirimana.

Amakuru kandi ahamya ko ubu Issa Bigirimana udafite ikipe muri iyi minsi ari i Bujumbura ariho arimo kuryohereza n’umukunzi we Scheilla.

Issa Bigirimana yakiniye APR FC kuva 2014 kugeza 2019, yahise yerekeza muri Tanzania atatinze aho yagarutse mu Rwanda asinyira amezi 6 Police FC, Issa Bigirimana yasinyiye Rayon Sports muri Nyakanga 2020 ariko ntiyayikinira kuko mu Kwakira 2020 yahise yerekeza muri Forest Rangers yo muri Zambia baje gutandukana agaruka mu Rwanda muri Espoir FC baheruka gutandukana.

Issa na Scheilla yasimbuje Carine

Bamaze amezi 7 bakundana

Scheilla yaje no mu Rwanda gusura Issa Bigirimana

Source : http://isimbi.rw/siporo/article/rutahizamu-issa-bigirimana-mu-munyenga-w-urukundo-n-umurundikazi-yasimbuje-carine-amafoto

Umugore wo mu gace kitwa Chibolya mu mujyi wa Lusaka muri Zambiaari kwivuza ibikomere bikomeye mu bitaro byitwa University Teaching Hospitals (UTH) nyuma y'aho umugabo we ubana n'ubumuga amutoteje akagera ubwo amushinga imbago mu myanya ye y'ibanga.

Uyu mugore ngo yarangiritse bikomeye mu myanya y'ibanga ku buryo atakibasha kugenzura ibyo kwihagarika kubera ubugome bukabije yakorewe.

Uyu kandi si imyanya y'ibanga gusa ngo yangijwe kuko uyu mugabo we yamukubise cyane ahandi ku mubiri kugeza ubwo ahindana mu isura.

Umugabo wahohoteye uyu mugore ngo yitwa Warren Mizinga yabanje kumubita izi mbago ze kugeza anazimushinze mu myanya y'ibanga.

Ibi ngo byabaye kuwa 24 Gashyantare 2023 kandi ngo n'inshuro ya kabiri uyu mugabo ahohoteye umugore we akamukomeretsa cyane.

Ushinzwe kumenyekanisha amakuru muri Polisi ya Zambia,Danny Mwale yavuze ko ibi byabayeho koko ndetse uyu Mizinga yafunzwe azira gukubita no kwangiza umubiri w'umuntu.

Mwale yavuze ko Mizinga w'imyaka 35 afunzwe ku nshuro ya kabiri azira ibyaha nk'ibi byo guhohotera uwo bashakanye kuko ngo n'umwaka ushize ariko byagenze afungwa amezi atandatu.

Yavuze ko Madamu yaherekejwe kuri polisi kugira ngo atange ikirego ko yahohotewe.

Uyu mugore ngo ntashobora kuvuga kubera akaga yahuye nako ubu ari gufashwa na murumuna we.

Uyu mugore ngo afitanye abana batatu n'uyu mugabo ndetse ngo yamukubise avuye ku isoko aho yamushinje ko avuye gusambana n'abandi bagabo.

Source : https://umuryango.rw/ubuzima-115/udushya/article/ufite-ubumuga-arashinjwa-kujomba-imbago-mu-myanya-y-ibanga-y-umugore-we

Abakorera mu gakiriro ka Nyagatare barinubira kuba iyo bijyeze ku mugoroba haba hataka, bakaba bafite impungenge ko bashobora kwibwa ibikoresho byabo.

Uhajyeze mu masaha yo ku manwa, ntiwamenya ko iyo bwije abahakorera bataha batizeye umutekano w'ibyabo, kuko amamashini asudira n'atunganya imbaho muri aka gakiriro byose biba bikoresha amashanyarazi.

Abakorera mu gakiriro k'akarere ka Nyagatare, bavuga ko kuba badacanirwa amashanyarazi ngo arare yaka, ari ikibazo gikomeye, basanga igihe cyose cyatuma bibwa ibyabo bakorera muriaka gakiriro.

Umwe Ati 'Amatara arimo ariko ntacyo amaze. Dusigamo ibikoresho byacu nk'uku hijimye isaha ku isaha uwajyamo yatwara ibyo ashaka, agaca hirya akagenda.'

Undi yungamo ati 'Nk'aha dufitemo kashipawa imwe, icyo badufasha byibuze buri kibanza bagashyizeho kashipawa yacyo, ku buryo wa muntu ugikodesha nakenera kugira ibyo akora akoresheje umuriro bizabasha kumworohera.'

Umwe mu bacunga umutekano muri aka gakiriro, yemeza ko bigoye gucunga umutekano ahantu hari umwijima, kuko amatara abaye yaka byabafasha gukumira abashobora kuza kuhiba.

Ati 'Nonese niba tuharinda hatubakiye urumva nta mpungenge wagira? Uwaza inyuma y'icyo kizu ntabwo yakugirira nabi, urumva ko ari ikibazo rero.'

Ni ikibazo bwana MATSIKO Gonzague,umuyobozi w' akarere ka Nyagatare wungirije ushinzwe ubukungu, avuga ko Akarere katari kazi, ko ariko ku bufatanye na REG bagiye kugikemura .

Ati 'Ubuyobozi bwa kariya gakiriro bwari butaratubwira ko ari ikibazo bafite, ariko turagikurikirana. Dufite ishami rya REG rikorera mu Karere kacu twafatanya noneho hakabaho kugenzura tukamenya ngo ikibazo ni ikihe? Niba ari n'ikibazo cya tekinike cyaba kirimo, tugafatanya na REG kugira ngo icyo kibazo gikemuke.'

Aka Gakiriro kubatse mu rwego rwo gukura abantu benshi mu bwigunge n'ubushomeri, babinyujije mu mishinga mito n'iciriritse, ariko kuba barahawe kashiPawa imwe kandi byagera ku mugoroba umuriro bakawuzimya, bikomeje guteza ibibazo bitakabaye bikiboneka mu mujyi wa Nyagatare watoranyijwe nk'umwe mu yunganira uwa Kigali.

Valens NZABONIMANA 

The post Abakorera mu gakiriro ka Nyagatare  babangamiwe no kutagira umuriro appeared first on FLASH RADIO&TV.

Source : https://flash.rw/2023/03/06/abakorera-mu-gakiriro-ka-nyagatare-babangamiwe-no-kutagira-umuriro/?utm_source=rss&utm_medium=rss&utm_campaign=abakorera-mu-gakiriro-ka-nyagatare-babangamiwe-no-kutagira-umuriro

Ni ubutumwa yagejeje ku bitabiriye Inama ya Gatanu y'Umuryango w'Abibumbye yiga ku ngamba na gahunda zikenewe kugira ngo ibihugu bikiri mu nzira y'amajyambere bive muri icyo cyiciro bijye mu bikize cyangwa byamaze gutera imbere.

Ni inama yatangiye kuri iki Cyumweru tariki 5 Werurwe izagera ku wa 9 Werurwe 2023, iri kubera i Doha muri Qatar ihuriwemo n'abakuru b'ibihugu na za guverinoma.

Mu gitondo cyo kuri uyu wa Mbere, abitabiriye iyi nama baganiriye ku guteza imbere ubumenyi, ikoranabuhanga, guhanga udushya n'ubushakashatsi mu iterambere ry'ibihugu bikiri mu nzira y'amajyambere.

Abitabiriye iyi nama bagaragaje ko kugira ngo ibihugu bitandukanye bibe byavuye mu biri mu nzira y'amajyambere, hasabwa gukoresha imbaraga nyinshi zituma biva muri icyo cyiciro bijya mu cy'ibihugu bikize.

Hagaragajwe ko kurandura ubujiji, abaturage bakabaho bazi gusoma no kwandika ndetse hakabaho n'ikoreshwa ry'ikoranabuhanga ku baturage bose.

Minisitiri w'Intebe w'Ubwami bwa Bhutan, Lotay Tshering yavuze ko mu gihugu cye bakomeje gushyira imbaraga mu guteza imbere uburezi hibandwa cyane ku kwimakaza ubumenyi n'ikoranabuhanga.

Ati 'Hatabayeho gushora imari mu burezi, hatabayeho gushora mu bakiri bato, nta kintu dushobora kugeraho muri uru rugendo rwo kuva mu bihugu biri mu nzira y'amajyambere tujya mu bikize.'

Minisitiri w'Intebe w'u Rwanda, Dr Ngirente Edouard yavuze ko imibare igaragaza aho ibihugu biri mu nzira y'amajyambere bihagaze ndetse n'aho bikwiye kugera.

Mu bijyanye no guteza imbere ubushakashatsi, imibare igaragaza ko nibura mu 2020, Isi yose yagombaga gukoresha miliyari ibihumbi $2,4 muri uru rwego. Icyo gihe Leta Zunze Ubumwe za Amerika, u Bushingwa n'u Buyapani nibyo bihugu byazaga imbere mu gushora menshi mu bushakashatsi.

Ikigo cy'Ibarurishamibare cya UNESCO kigaragaza ko ibihugu biri mu nzira y'amajyambere bikoresha 0.2% by'umusaruro mbumbe mu bijyanye n'ubushakashatsi. Ni mu gihe ikigereranyo mpuzamahanga ari 1.7%.

Imibare yo mu 2019 igaragaza ko ku Isi hose hari hari abashakashatsi miliyoni 8 aho abenshi bari abo mu Bushingwa [45%] mu gihe u Burayi bwari bufite 25%.

Minisitiri w'Intebe Dr Ngirente ati 'Ubumenyi ntabwo bwatangwa hatariho abashakashatsi by'umwihariko mu bihugu biri mu nzira y'amajyambere.'

UNESCO itangaza ko nibura 30% gusa ari abagore kandi usanga akenshi babikora babifatanya n'indi myanya baba bafite mu buyobozi.

Minisitiri w'Intebe Dr Ngirente yagaragaje ko hari uburyo bwo kuzana impinduka no guhindura imyumvire ituma ibihugu bidashyira imbaraga mu bushakashatsi.

Ati 'Ubufatanye n'imikoranire ni ingenzi mu bihugu bikiri mu nzira y'amajyambere kugira ngo tubashe kuva muri iki cyiciro. Ubufatanye gusangizanya ubumenyi mu bijyanye n'ubumenyi n'ikoranabuhanga ni ngombwa kandi ni ingenzi.'

Yakomeje agira ati 'Ibihugu biri mu nzira y'amajyambere n'abafatanyabikorwa byabyo bagomba gukorana mu kubaka ubushobozi bukenewe muby'ubumenyi n'ikoranabuhanga kugira ngo hatezwe imbere ubukungu n'iterambere ry'imibereho myiza bidaheza.'

U Rwanda rwize isomo

Minisitiri w'Intebe Ngirente, yavuze ko hari ibimaze kugerwaho birimo gushyiraho politiki yihariye igenga ubumenyi n'ikoranabuhanga ndetse no gushyiraho ibigo by'ubumenyi, ikoranabuhanga, ubushakashatsi no guhanga ibishya.

Hari nka Kaminuza ya Carnegie Mellon University itanga amasomo ajyanye n'ikoranabuhanga, ku bari mu cyiciro cya gatatu cya Kaminuza (Masters' Degree).

Mu Rwanda kandi hari Ikigo Nyafurika gishinzwe guteza imbere Ubumenyi bushingiye ku Mibare (African Institute Mathematics Science, AIMS). Uretse gutanga impamyabumenyi z'icyiciro cya Gatatu cya Kaminuza [Masters] iki kigo kigira na gahunda nyinshi zo guteza imbere imibare mu mashuri yisumbuye.

Ibyo ni ibigo byitezweho kuzatanga umusanzu mu ikoranabuhanga rizakoreshwa n'Ikigo cya BionTech kizaba gikorera inkingo n'indi miti mu Rwanda.

Guverinoma y'u Rwanda kandi yashyizeho uburyo bwo gutera inkunga gahunda zijyanye n'ubushakashatsi no guhanga ibishya.

Ati 'Urugendo ruracyari rurerure ariko iri shoramari ryashyizwe mu bumenyi n'ikoranabuhanga ryatangiye gutanga umusaruro mu bijyanye na serivisi zihabwa abaturage.'

Yakomeje agira ati 'Isomo rikomeye twize ni uko kujya mbere nk'ibihugu biri mu nzira y'amajyambere hakenewe uburyo bunyuranye bwo gushora imari ahakenewe cyane, ubufatanye no kuzamura guhanga ibishya, kubaka ubushobozi bw'abaturage bacu, kubyaza umusaruro ikoranabuhanga rigezweho no gushyiraho politiki zihamye zifasha muri urwo rugendo.'

Minisitiri w'Intebe Dr Ngirente yasabye ko hakwiye gushyirwaho ibintu bitatu by'ingenzi.

Birimo kubaka ibigo by'icyitegererezo mu turere kugira ngo bifashe mu bushakashatsi mu bihugu bikiri mu nzira y'amajyambere.

Ikindi ni ugushyiraho uburyo bwo kwigishiriza ku murimo ndetse no kubyaza umusaruro umutungo bwite muby'ubwenge kugira ngo byungukire abaturage by'umwihariko mu bihe by'ibyorezo.

Icya gatatu ni ugushyiraho uburyo bwo gushora imari no gutera inkunga imishinga y'ubushakashatsi mu bihugu bikiri mu nzira y'amajyambere.

Minisitiri w’Intebe yagaragaje ko u Rwanda rwasanze kugira ngo rutere imbere, hari ibyo rugomba kwimakaza

Iyi nama igamije kwiga ku ngamba zafasha gutera imbere ibihugu bikiri mu nzira y’amajyambere

---

Source : http://igihe.com/amakuru/u-rwanda/article/dr-ngirenye-yakomoje-ku-isomo-u-rwanda-rwize-kugira-ngo-rugere-ku-iterambere

Nyuma y’umwaka umwe asubiye muri Gisagara VC, umutoza Nyirimana Fidele yeguye kuri uyu mwanya.

Ni nyuma y’uko atahiriwe nk’uko yabyifuje aho mu bikombe bimaze gukinirwa yaba shampiyona ya 2022-23 yasoje ku mwanya wa kabiri inyuma ya REG VC ndetse no muri Memorial Kayumba yasojwe ejo hashize aba uwa 3 inyuma ya FOREFRONT na REG VC.

Nyirimana Fidele yemereye ISIMBI ko yamaze kwegura kuri uyu mwanya aho yabonaga ko hari ibintu bitarimo kugenda neza.

Ati “Ayo makuru ni yo rwose. Nabonaga hari ibintu bitarimo kugenda neza, ntabwo ‘communication’ yari imeze neza, nanze ko bikomeza gupfa cyane.”

Abajijwe niba Akarere kaba katacyita ku ikipe nka mbere, yagize ati “oya, ikipe yitabwaho rwose, ibyo babonaga mbere barabihabwa, ahubwo harimo utundi tubazo.”

Nyirimana Fidele avuga ko nta yindi kipe bari mu biganiro ariko ko nagaruka mu kazi atazasubira hanze ya Kigali.

Mu mwaka umwe yari amaze muri Gisagara VC, ayisigiye ibikombe 2 icya Gisaka Tournament cya 2022 ndetse na Memorial Rutsindura 2022. 2022 kandi yafashije Gisagara kwandika amateka maze iba iya 3 muri Afurika mu irushanwa rihuza amakipe yabaye aya mbere iwayo.

Nyirimana Fidele yatandukanye na Gisagara VC

Source : http://isimbi.rw/siporo/article/yanze-ko-bikomeza-gupfa-bikamwiritirirwa-nyirimana-fidele-yeguye-ku-mwanya-w-umutoza-wa-gisagara-vc

Mu ijoro ryo kuri iki Cyumweru, nibwo amakipe ahagarariye u Rwanda yafashe indege, yerekeje mu mikino mpuzamahanga y’ibigo byitwaye neza iwabo.

Mu mupira w’amaguru, u Rwanda rwahagarariwe n’ikigo cy’igihugu cy’ubuzima RBC, mu gihe muri Volleyball hagiye amakipe abiri arimo ikipe ya WASAC mu bagabo, na RRA mu bagore.

Iri rushanwa rizatangira tariki 9 Werurwe 2023, gusa tombora y’uko amakipe azahura ikazaba tariki 8 Werurwe 2023.

Perezida w'Ishyirahamwe Nyarwanda ry'Imikino y'Abakozi [ARPST], Mpamo Thierrey Tigos wagiye ahagarariye iri shyirahamwe, yavuze ko amakipe atatu ahagarariye u Rwanda hatazaburamo imwe ibasha gutahana igikombe. 

Uyu muyobozi yakomeje avuga ko imyiteguro yagenze neza kuri buri ruhande, yaba ku makipe no ku ruhande rwa ARPST. Umutoza mukuru wa RBC FC Hakizimana Patrick, abona kuba ikipe igiye yarabanje gukina imikino ibiri mu irushanwa ry'umunsi w'umurimo, byarabafashije cyane abakinnyi be.

Ndoli Jean Claude wungirije mu ikipe ya RBC FC, yavuze ko kuba hari inama abasha kugira barumuna be, ari iby'agaciro gakomeye ndetse umwuka ari mwiza mu rwambariro rw'iyi kipe.

RBC FC yitezweho kwitwara neza muri iyi mikino

Ikipe ziheruka guhagararira u Rwanda muri iyi mikino Nyafurika y'abakozi, ni Ikigo cy'Igihugu cy'Ibarurishamibare [NISR] na Equity Bank.

Source : https://inyarwanda.com/inkuru/126760/rbc-fc-itozwa-na-ndoli-jean-claude-yerekeje-muri-gambia-126760.html

Ushinzwe iyegeranya n'igabanya ry'umutungo aramenyesha abantu bose ko ku wa 14/03/2023 hamwe no ku wa 15/03/2023 azagurisha muri cyamunara imitungo itimukanwa ikurikira.

Kuwa 14/03/2023 azagurisha inzu iri mu kibanza gifite UPI:5/03/03/01/1834 iherereye ahahoze isoko rya Gitoki,cyamunara ikaba izatangira saa tatu za mugitondo(09:00AM),n'inzu iherereye hafi n'umurenge wa Rwimbogo,cyamunara ikazatangira saa munani (02:00PM).

Kuwa 15/03/2023 azagurisha amazu ari mukibanza UPI:5/03/04/03/215 giherereye Nyarugenge,Karenge,Kabarore,Gatsibo ikazatangira saa munani (02:00PM).

Gusura imitungo ni buri munsi guhera saa mbiri za mugitondo kugeza saa kumi nimwe.

WIFUZA IBINDI BISOBANURO YASOMA ITANGAZO RIRI HANO HASI CYANGWA SE AGAHAMAGARA KURI:+250788264400.

Source : https://umuryango.rw/amatangazo/article/itangazo-rya-cyamunara-y-imitungo-itimukanwa

Impera z'icyumweru zirangiye mu mukino w'intoki wa Volleyball mu Rwanda hatashye ibyishimo mu ikipe ya Forefront Volleyball y'abagabo n'abagore kubwo kwegukana igikombe bwa mbere kuva iyi kipe ibayeho.

Ibi byishimo byatashye muri iyi kipe ifashwa na Polisi y'igihugu nyuka yaho mu bagabo bahigitse amakipe arimo REG na Gisagara, ku bakobwa bo batsinze amajya m'amaza ikipe ya RRA bahora bahanganye.

Iyi myitwarire myiza y'iyi kipe ya Forefront y'abagabo ndetse n'abagore yitwaye neza mu mikino yakinwaga mu mpera z'icyumweru, yari imikino yo kwibuka Padiri Kayumba Emmanuel wayoboye Groupe Scolaire Officiel de Butare ari naho imikino yakiniwe.

Mu mukino yaninwe, ikipe ya ForeFront y'abagabo yatangiye itsinda ikipe ya UR CAVM ndetse na nyuma yaho isubira ikipe ya UR Nyarugenge zose zitindwa amaseti 3-0.

Iyi kipe kuri ubu irimo gufashwa na Polisi y'u Rwanda, yahise ihura na Gisagara VC iyitsinda bitabagoye cyane amaseti 3-0 yisanga ku mukino wa nyuma aho yagombaga guhura na REG VC yo yari yatsinze UR Nyarugenge muri 1/2.

Ku mukino wa nyuma ForeFront ntabwo yagowe  cyane n'uyu mukino kuko yatsinze amaseti 3-1 (26-24,22-25,22-25,19-25).

Mu bagore, ikipe ya Forefront yegukanye igikombe itsinze ikipe ya RRA amaseti 3-2( 23-25,26-24,15-25,25-13,14-16) ihita yegukana igikombe cyo kwibuka Padiri Kayumba Emmanuel.

Mu bindi byiciro byahatanye muri Volleyball hibukwa Padiri Kayumba Emmanuel, mu kiciro cy'amashuri yisumbuye ikipe ya GS St Joseph yegukanye igikombe itsinze Nyanza TSS amaseti 3-2.

Mu kiciro rusange ikipe ya Groupe Scolaire Mugombwa yatsinze Petit Seminaire Virgo Fidelia amaseti 3-2, mu bakanyujijeho ikipe y'Umucyo yatsinze Tout Age amaseti 3-2.

Bwa mbere izi kipe za Forefront zitwaye igikombe mu gihe kitarenze umwaka umwe iyi kipe ibayeho.

Nyuma yo gutwara iki gikombe,  iyi kipe irimo ifashwa na Polisi y'igihugu irimo kwitegura gukina imikino ihuza  abapolisi bo muri Afurika y'i Burasirazuba, ni imikino izabera mu Rwanda muri uku kwezi kwa Werurwe 2023.

Irushanwa ryo kwibuka Padiri Kayumba Emmanuel ryakinirwaga muri GSOB ari naho yayoboye kugeza mu mwaka wa 2009 ubwo yitabaga Imana, ryitabiriwe n'abanyacyubahiro batandukanye barimo umuyobo wa REB n'umuyobozi w'akarere ka Huye, Ange Sebutege.

The post Amakipe ya Forefront Volleyball Club y'abagabo n'abagore yegukanye irushanwa ryo kwibuka Padiri Kayumba Emmanuel wayoboye GSOB appeared first on RUSHYASHYA.

Source : https://rushyashya.net/amakipe-ya-forefront-volleyball-club-yabagabo-nabagore-yegukanye-irushanwa-ryo-kwibuka-padiri-kayumba-emmanuel-wayoboye-gsob/?utm_source=rss&utm_medium=rss&utm_campaign=amakipe-ya-forefront-volleyball-club-yabagabo-nabagore-yegukanye-irushanwa-ryo-kwibuka-padiri-kayumba-emmanuel-wayoboye-gsob