Blog

Iryo tangazo riragira riti: 'Isibo Tv iramenyesha abantu bose ko umuhango wo gutanga ibihembo bya The Choice Awards 2022 By Isibo Tv, wari uteganyijwe tariki 26 Werurwe 2023, wimuriwe tariki ya 30 Mata 2023. Isibo Tv ibashimiye uburyo mwakiriye izi mpinduka n’ubufatanye bwiza.'

Abarimo Bruce Melodie, Mukansanga Salima, Rusine Patrick, Mutesi Scovia na Mugisha Moise, bari mu bahataniye ibihembo bya The Choice Awards bigiye gutangwa ku nshuro ya gatatu.

Ibi bihembo biri mu byiciro 13 batangajwe mu ijoro rishyira tariki ya 1 Mutarama 2023, mu muhango wabereye kuri Isibo TV itegura ibi bihembo.

Kuri iyi nshuro abahanzi Bruce Melodie, Bwiza, Kenny Sol na Juno Kizigenza ni bo bahataniye ibihembo byinshi dore ko bahataniye ibigera kuri bibiri.

Mu cyiciro cy'uvuga rikumvikana [Best Influencer of the year] harimo, Mukansanga Salima, Coach Gael [Umujyanama wa Bruce Melodie] na Mutesi Scovia.

Mu cyiciro cy'umuhanzi w'umwaka [Best Male Artist of the year] harimo Bruce Melodie, Christoper, Kenny Sol, Juno Kizigenza na Chris Eazy.

Abahanzi bashya bitwaye neza [Best New Artist] harimo Bwiza, Afrique, Mistaek, Yampano na Rumaga.

Umuhanzikazi wahize abandi [Best Female artist of the year] harimo Butera Knowless, Ariel Wayz, Alyn Sano, Bwiza na Marina.

Ku ndirimbo ifite amashusho meza [Best Video of the year] hahatanye; Why ya The Ben na Diamond Platnumz, Funga Macho ya Bruce Melodie, Joli ya Kenny Sol, Jaja ya Juno Kizigenza na Izina ya Bruce Melodie.

Mu cyiciro cy'abatunganya amashusho y'indirimbo [Best Video Director of the year] harimo Gad, Meddy Saleh, Eazy Cuts, Fayzo Pro na Simbi Nailla.

Icyiciro cy'abahanzi baririmba indirimbo zo kuramya no guhimbaza Imana (Best Gospel Artist of the year) harimo Israel Mbonyi, Vestine & Dorcas, James & Daniella, Bosco Nshuti na Chryso Ndasingwa.

Umukinnyi wahize abandi [Most Valuable Player] harimo Axel Mpoyo, Bigirimana Abed, Malinga Kartbart, Mugisha Moise na Shabana Hussein Tchabalala.

Umukinnyi wa filime wahize abandi [Best Actor of the year] harimo Nyaxo, Rusine Patrick, Niyitegeka Gratien, Bamenya na Clapton Kibonge.

Umukinnyikazi wa filime wahize abandi [Best Actress of the year] harimo Nadia, Bahavu Usanase Janet, Nyambo Jesca, Aisha na Rufonsina.

Umu DJ wahize abandi [Best Dj of the year] ni Dj Toxxyk, Dj Marnaud, Dj Pyfo, Dj Briane na Nep Djs.

Inzu y'imideli yahize izindi [Best Fashion Designer of the year] hahatanye Moshions, Joyce Fashion Design, Kezem, Urutozi Gakondo na Style By Chriss Be.

Icyiciro cy'umubyinnyi wahize abandi [Best Dancer of the year] harimo Jojo Breezy, Jordan Kallas, Uwase Biance, Saddie na Rachid.

Ibi bihembo biheruka gutangwa mu ijoro ryo ku wa 13 Werurwe 2022, bigamije gushyigikira no gushimira abahanzi n'abandi bafite aho bahuriye n'uruganda rw'imyidagaduro.

Mu kumenya uwatsinze muri buri cyiciro hazagenderwa ku majwi y'abazatora binyuze kuri internet, amajwi azatangwa n'abagize akanama nkemurampaka n'ibindi. Kuri Ubu amatora Ari kubera kuri Noneho Events.

Source : https://inyarwanda.com/inkuru/127255/umuhango-wo-gutanga-ibihembo-bya-the-choice-awards-wimuriwe-indi-tariki-127255.html

Mu mpera z'icyumweru dusoje, muri kenya haberega irushanwa rya 'ITF BT10 Ocean Blue' aho u Rwanda rwari ruhagarariwe n'abakinnyi babari aribo; Habimana Valens ufatanya na Joshua Muhire. Iyi mikino yari ikinwe ku nshuro ya mbere mu bihugu byo mu Karere k'Afurika y'Uburasirazuba, yanatanze amanota ku rutonde rw'Impuzamashyirahamwe y'Umukino wa Tennis ku Isi ITF.

Abakinnyi 32 nibo bitabiriye iyi mikino, bavuye mu bihugu by'u Rwanda, Esipanye, Uganda, Tanzaniya, Sudani na Kenya yakiriye iyi mikino. Muri iri rushanwa, Habimana Valens ufatanya na Joshua Muhire, bageze mu mikino ya kimwe cya kabiri, mu Marushanwa abiri anyuranye, rimwe ryakinwe ku wa Gatandatu, irindi rikinwa ku Cyumweru.

Mu mukino wa (1/2) wakinwe kuri iki Cyumweru aba bakinnyi bakuwemo n'Ikipe y'Umunya-Espanye Navas Borja ufatanya n'Umunyakenya Mouhamed Fazal, ufite Umudali wa Bronze ku rwego rw'Afurika. Nyuma y'uyu musaruro, wafashije aba bakinnyi bombi, kuba Abakinnyi ba mbere b'Abanyarwanda bagiye ku rutonde rwa ITF-ATP Ranking.

Aba bakinnyi b'abanyarwanda kugira ngo bashyirwe ku rutonde rwa ITF-ATP, byatewe n'amanota 5 bakuye muri aya marushanwa kuko bagarukiye muri 1/2

Ni mu gihe amakipe yageze ku mukino wa nyuma, iya mbere yegukana amanota 10 muri buri rushanwa mu gihe iza kabiri zegukanye amanota 7 naho abavuyemo batsinze umukino umwe, babona inota 1 gusa.

Uko umukino wa Tennis ikinirwa ku mucanga wageze mu Rwanda

Tariki ya 19 Ukuboza mu 2019, Ishyirahamwe ry'Umukino wa Tennis mu Rwanda 'RTF' ryatangije uyu mukino, utangirira ku kibuga cyari inyuma ya Sitade Amahoro i Remera. 

Ikibuga gikinirwaho uyu mukino kigizwe na metero 16 ku munani, kikaba kigabanyijemo kabiri mu gihe ibikoresho byifashishwa ari udupira dutandukanye n'utwo bakinisha Tennis isanzwe ndetse na raketi (Racket) zitandukanye.

Ubwo umukino wa Beach Tennis wazanwaga mu Rwanda bwa mbere ku mugaragaro mu 2019 

Umugozi barenzaho agapira uba uri muri metero 1.7 uvuye hasi mu gihe uyu mukino ukinwa n'abakinnyi babiri nka Beach Volleyball cyangwa umwe kuri umwe, naho kubara amanota byo bikaba ari ibisanzwe.

Nyuma yo gutangiza uyu mukino, Perezida w'Ishyirahamwe Nyarwanda ry'Umukino wa Tennis, Karenzi Théoneste, yavuze ko ari umwe mu isanzwe ikinwa ku rwego mpuzamahanga ndetse bizeye ko n'Abanyarwanda bazabasha kuwukina. 

Yagize ati 'Uyu ni umwe mu byiciro by'imikino ya Tennis bisabwa n'Ishyirahamwe ry'Umukino Mpuzamahanga wa Tennis, natwe rero turawutangije kandi ni umukino dukwiye kujyamo tukitwara neza, nizera ko tuzabishobora.'

Muhire Joshua na Habimana Valens bafite amahirwe yo gukina igikombe cy’afurika

Uyu mukino waje gukomwa mu Nkokora n'Icyorezo cya Covid-19 cyadutse mu Isi no mu Rwanda by'Umwihariko. Uyu mukino ukenera ibikoresho byihariye bitari ibisanzwe bikoreshwa muri Tennis isanzwe. 

Ibi birimo raketi ifite agaciro kagera ku €100, agapira kagura €10 ndetse n'umugozi 'Net' ugura agera ku € 200. Tennis yo ku Mucanga yatangiye gukinwa mu 1970 mu Butaliyani, aho kugeza ubu uyu mukino umaze kugera mu bihugu bisaga 50 ku Isi hose.

Valens na Joshua bwo bari mu kibuga bahanganira ku gera ku mukino wa nyuma

Source : https://inyarwanda.com/inkuru/127257/beach-tennis-habimana-valens-na-muhire-joshua-babaye-abanyarwanda-ba-mbere-bagiye-ku-ruton-127257.html

Igitaramo ‘Urwejeje Imana’ cya Inyamibwa za AERG, cyerekanye ko umuziki gakondo n'imbyino bikunzwe cyane. InyaRwanda igiye kukugezaho ibintu ukwiye kuzahora wibuka kuri iki gitaramo cy’imbaturamugabo.

Turagaruka ku byaranze iki gitaramo kuva gitangiye saa moya z'umugoroba kugera saa tanu z’ijoro ubwo cyashyirwagaho akadomo. Cyabaye tariki ya 19 Werurwe 2023 muri Camp Kigali.

Umurishyo w'abato

Abana bafunguye igitaramo babikoze neza bajyanisha mu murishyo udasobanya mu gihe kingana n'iminota 20. Bageze ku ndirimbo “Rwanda nziza” biba ibindi, babahundagazaho amashyi menshi. Ni ibintu kandi bigaragaza ko Inyamibwa zizahoraho iteka kuko ari uruhererekane.

Ubwitabire

Igitaramo cyagize ubwitabire bwo hejuru kandi mu byiciro byose guhera ku bari bicaye mu myanya ya 5,000Frw kugera ku itabule (Table) ya 200,000Frw y'abantu umunani. Abantu bitabiriye ku bwinshi kugera aho intebe zashize n’aho guhagarara haba hato. Indirimbo n'imbyino zabo zizihiye bose.

Impanga

Ababyinnyi bose b'Inyamibwa ni ntagereranwa ariko byari binejeje kubona abakobwa babiri basa bajyana mu mudiho, umwe yamwenyura n’undi bikaba uko. Abo nta bandi, ni ababyinnyi b’impanga Mpinganzima Joselyne na Ngwinondebe Josette. Ubwo bagerwaho, bishimiwe cyane.

Abakuru mu Inyamibwa

Ubwo abasore n'inkumi banyuze mu Inyamibwa kuri ubu benshi bamaze no kuba ababyeyi bagerwagaho, byabaye ibindi kubera uburyo umudiho wabo n'uburyo bakaragamo umubyimba.

Ibi byerekana ko Inyamibwa ihora ariyo kandi byari bikwiye ku munsi wo kwizihiza imyaka 25 ngo buri umwe yumve anyuzwe n’igisekuru cye mu Inyamibwa.

Nita Impression

Miss Umuratwa Anitha Katie yatunguye benshi mu buryo yateguyemo ahantu bya kinyarwanda binyuze muri muri kompanyi yashinze izajya ikora ibijyanye na Decoration, mu gihe gito imaze ikaba imaze kwerekana ko yaziye igihe.

Iyi kompanyi yayise Nita Impression. Uyu mukobwa uretse kuba yaramamaye mu marushanwa y’ubwiza aho yitabiriye Miss Rwanda akaza no kuba Miss Supranational, ari no mu babyinnyi b’imena bagize Inyamibwa. Yaserutse mu Urwejeje Imana mu buryo bwizihiye benshi.

Imyambarire

Abasore n'inkumi ba Inyamibwa kuva bahaguruka kuri Sports View Hotel kugera ubwo bashyiraga akadomo ku gitaramo cyabo cyabereye muri Camp Kigali, bagiye bahinduranya imyambaro ifite umwihariko wa gakondo nyarwanda ariko na none ifite ukuntu ijyanye n’aho isi igeze.

Imibyinire yabo, kuyihuza n’ubukaka bwabo, ukongera ugaterera akajisho kuri bashiki babo bari barimbye bikomeye mu myambaro ya Kinyarwanda, wabonaga ari ibikomangoma n’ibikomangomakazi.

Ifi yarobewe ku rubyiniro

Ubwo aba basore n'inkumi bari ku rubyiniro, berekanye imibereho y'umunyarwanda n'ibimutunze birimo ubuhinzi, ubworozi n'ibindi birimo n'uburobyi. Aha ni ho abasore batatu banaze indobani, birangira umwe afatiye ifi ku rubyiniro.

Umukinnyi wa Arsenal

Herekanwe kandi ibintu bitandukanye bizanira abanyarwanda amadovize birimo inyubako nka Kigali Conventional Center, Indege n’Ingagi.

Ubwo bamurikaga ikipe ya Arsenal ifitanye amasezerano n’u Rwanda binyuze muri gahunda ya Visit Rwanda, berekanye umwe mu bakinnyi b’iyi kipe wazamuye amarangamutima ya benshi dore ko iyi kipe iri mu zimaze imyaka ifite abakunzi batagira ingano.

Umurindi n'amajwi y'ababyinnyi

Uvuze ibitazibagirana kuri iki gitaramo ntiwakwirengagiza umurindi w'abasore n'inkumi baserutse ku rubyiniro, maze byagera ku majwi y'abaririmbyi bikaba ibindi.

Ni amateka yanditswe na Gakondo nyarwanda by'umwihariko itorero Inyamibwa. Abakunzi b’iri Torero baryeretse urukundo rukomeye, naryo ribashimira ko barizirikana.

Inyamibwa zahagurukije abato n’abakuru nyuma y’imyaka 5 badakora igitaramo

Si ubwiza n’ubukaka bw’ababyinnyi b’iri torero, ubuhanga bwabo mu majwi n’imibyinire byari ibindi

Miss Umuratwa Anitha yatunguranye muri Decoration yo ku rwego rwo hejuru binyuze muri kompanyi ya Nita Impression ifite intero igira iti “Dutega amatwi, dugategura neza mu kanyurwa” 

Umurindi w’abasore mu mugara bijyana n’amajwi meza y’ingoma n’umwirongi mu buryo burimo ubuhanga watigishije bikomeye KCEV/Camp Kigali

Amaboko meza arambuye, inseko nziza ijyana n’imibyinire by’inkumi z’Inyamibwa, bizahora byibukwa ku Urwejeje Imana

Umurishyo w’abana bato babanje ku rubyiniro winjije neza mu gitaramo abakunzi b’Inyamibwa

Uno Protocol & Service igizwe n’inkumi z’ubwiza n’abasore beza ni bo bakiranaga yombi abitabiraga bose banabereka ibyicaro

Abinjiraga bose babanzaga kwerekana cyangwa kugura itike zacurujwe binyuze ku rubuga Noneho Events rwa InyaRwanda – rukomeje kuzana itandukaniro mu kwamamaza, kugurisha amatike no mu matora akorwa hifashishijwe ikoranabuhanga

Imyambarire y’Itorero Inyamibwa kuva ku munota wa mbere kugera kuwa nyuma yari inoze kandi ijyana na buri cyiciro yaba ku rubyiniro no hanze yarwo

Hari hashyizweho uburyo bwo korohereza abantu kubona ibyo kunywa n’amafunguro ngo bihere ijisho igitaramo ntakibabangamira

KANDA HANO UREBE MU BURYO BW’AMASHUSHO UKO IGITARAMO URWEJEJE IMANA CYA INYAMIBWA CYAGENZE

Source : https://inyarwanda.com/inkuru/127233/ibintu-bitazibagirana-ku-gitaramo-urwejeje-imana-cyitorero-inyamibwa-amafoto-127233.html

Braverman unafite mu nshingano ze ibijyanye n'impunzi, kuva kuwa Gatandatu w'icyumweru gishize yari mu ruzinduko rw'akazi mu Rwanda rugamije ibiganiro ku masezerano ari hagati y'ibihugu byombi mu gufasha impunzi.

Ni amasezerano ataravuzweho rumwe n'abaharanira uburenganzira bwa muntu kugeza ubwo hitabajwe inkiko kugira ngo zitambamire gahunda yo kohereza abimukira mu Rwanda.

Braverman yongeye kwamagana abanenga aya masezerano, avuga ko ari 'abirasi babaswe n'ibitekerezo by'ukunenga kudafite ishingiro'.

Yasubizaga Minisitiri wungirije w'ubutegetsi bw'igihugu, Yvette Cooper, wavuze ko gahunda yo kohereza abimukira mu Rwanda 'idakoreka, itarimo ubunyamwuga kandi irimo ubugome'.

Uyu mugore yanavuze ko yakozwe mu kwihunza inshingano yo kunanirwa ikibazo cy'abimukira kandi amafaranga azahabwa u Rwanda adakurikije amategeko kandi ari umurengera.

Braverman yasubije Cooper na bagenzi be bo mu ishyaka ry'abakozi [Labour], badakozwa iyi gahunda ko ari ubwirasi budafite ishingiro.

Ati 'Abo mu ishyaka ry'abakozi bavuga ku kintu batabanje gutekereza kandi bakabikora mu buryo bubogama. Ni ubwirasi buteye isoni no kunenga kudafite ishingiro kugamije gusenya ubufatanye bwacu'.

Yavuze ko nyuma yo gusura u Rwanda yasanze bizaba ari 'umugisha ku bimukira kubohereza muri iki gihugu'

Ati 'Nahuye n'impunzi zo mu bihugu byinshi zishima cyane ubufasha u Rwanda rwazihaye. Amahirwe yo kwiga, umutekano, aho kuba n'ibindi biha aba bantu b'abanyantege nkeya icyizere cy'ahazaza heza'.

Umwaka ushize nibwo indege ya mbere irimo abimukira yagombaga kugera i Kigali ariko iki cyemezo gitambamirwa n'Urukiko rw'uburenganzira bwa muntu i Burayi.

The Sun yanditse ko Braverman yahishuye ko abayobozi b'u Bwongereza bari mu biganiro by'ibanga n'uru rukiko kandi biri kugenda neza. Ibi ngo bizakuraho inzitizi ikomeye yatumye indege idahaguruka ngo yerekeze i Kigali.

Ati 'Guverinoma yakuyeho igihu cyagaragajwe n'urukiko ari nacyo cyatumye indege idahaguruka'.

Mu kwezi gutaha nibwo hazafatwa icyemezo cy'urukiko ku kohereza abimukira mu Rwanda.

Guverinoma y'u Bwongereza ivuga ko ikibazo cy'abimukira binjira mu bihugu mu buryo bunyuranyije n'amategeko kiri gufata intera ariko ko aya masezerano y'u Rwanda n'u Bwongereza azaba ikiraro mu gukemura iki kibazo.

Minisitiri w'Ububanyi n'Amahanga n'Ubutwererane, Dr Biruta Vincent, yavuze ko kuba u Rwanda rwatanga umusanzu mu gukemura iki kibazo, ari inyungu ikomeye cyane.

Ati 'Twiteguye gukorera hamwe kugira ngo tugire uburyo bushya budufasha gukemura duhereye mu mizi ibibazo by'abimukira ku Isi.''

'Ibi ntibizafasha gusa kurwanya abakora ubucuruzi bw'abantu, ahubwo bizanarengera ubuzima binakureho ubusumbane buboneka mu mahirwe y'iterambere ku bantu.'

Kuri iki Cyumweru kandi Minisitiri Braverman yashyize ibuye ry'ifatizo ahazubakwa amacumbi azajya yakira aba bimukira.

Ni inyubako biteganyijwe ko zizatwara miliyari 60 Frw aho hagiye kubakwa inzu 528 zikazuzura mu gihe cy'amezi atandatu, i Gahanga mu Karere ka Kicukiro.

Nibagera mu Rwanda, bazahabwa ubushobozi bubafasha kuba bakwitunga, bajye mu mashuri ku buryo babona ubumenyi bubafasha kwitunga no gutanga umusanzu ku iterambere ry'igihugu.

Ku ikubitiro, u Bwongereza bwahaye u Rwanda miliyoni 120£ azagirira akamaro izo mpunzi n'Abanyarwanda binyuze mu bikorwa by'uburezi mu mashuri yisumbuye, ay'imyuga n'andi mahugurwa y'amasomo y'ubumenyingiro.

Impande zombi zivuga ko abazashaka bazafashwa kwiga kugera mu mashuri makuru na kaminuza.

Imibare ya Guverinoma y'u Bwongereza igaragaza ko mu mwaka ushize, abimukira binjiye muri icyo gihugu bakoresheje ubwato butoya buca mu nzira itemewe y'amazi (English Channel) bageze ku 45.756, bavuye ku 28.526 mu 2021.

Guverinoma y'u Bwongereza itangaza ko ikoresha nibura miliyari ebyiri z'ama-Pound mu gucumbikira no kwita kuri aba bimukira baba bageze mu gihugu mu buryo bunyuranyije n'amategeko.

Minisitiri w'Intebe w'u Bwongereza, Rishi Sunak, aherutse kubwira abagize Inteko Ishinga Amategeko y'icyo gihugu ko gushaka umuti w'iki kibazo cy'abimukira byihutirwa kandi bigomba gushyirwa mu bikomeye igihugu kigomba guheraho.

Minisitiri Braverman yasuye inzu zizatuzwamo abimukira bazava mu Bwongereza, anyurwa n’imiterere yazo

---

Source : http://igihe.com/amakuru/u-rwanda/article/minisitiri-braverman-yise-abirasi-abanenga-amasezerano-yo-kohereza-abimukira-mu

Ishyirahamwe ry’umukino wa Volleyball mu Rwanda (FRVB) ryamaze gushyira ku isoko umwanya w’umutoza w’ikipe y’igihugu y’abagabo n’abagore.

Nk’uko bigaragara mu itangazo FRVB yashyize hanze, ni uko hifuzwa umutoza umwe ugomba gutoza ikipe y’igihugu y’abagabo n’abagore.

Uyu mutoza akazaba agomba gufasha ikipe y’igihugu mu bagabo n’abagore guhatana ku ruhando mpuzamahanga no kuba yaba afite ubushobozi bwo guhugura abandi batoza ba Volleyball mu Rwanda.

Ku bufatanye na Minisiteri ya Siporo na FRVB, uyu mutoza akaba azahabwa amasezerano y’imyaka 3 ashobora kongerwa.

Akaba azaba asimbura Paolo de Tarso Milagres ukomoka muri Brazil wagizwe umutoza w’ikipe y’igihugu muri Kanama 2021 agatoza igikombe cy’Afurika cyabereye mu Rwanda muri Nzeri 2021, nyuma yaho ntiyongeye kugaragara kuko n’u Rwanda rwari rwahanwe nta marushanwa rwitabira.

Harimo gushakwa umutoza w’ikipe y’igihugu ya Volleyball

Source : http://isimbi.rw/siporo/article/hashyizwe-ku-isoko-umwanya-w-umutoza-w-ikipe-y-igihugu

Ushinzwe iyegeranya n'igabanya ry'umutungo aramenyesha abantu bose ko azagurisha muri cyamunara ku nshuro ya gatatu imitungo ya Koperative zitwa Cootravemomu,Cootamob Coctamoka, Cootamomu Sud, Cootratamomu Light, Kamotraco n'Ituze igizwe n'inzu, Ibibanza,Amashyamba ndetse n'ibikoresho bitandukanye byo muri za Biro byakoreshwaga nizo Koperative zavuzwe haruguru kugira ngo hishyurwe abo zibereyemo imyenda, Cyamunara ikazajya ibera aho ikicaro cya Koperative giherereye mu Mujyi wa Muhanga ndetse no mu Karere ka Kamonyi.

Ipiganwa mu cyamunara rizatangira tariki ya 10/03/2023 I saa tatu za mu gitondo (09H00) kugeza tariki ya 23/03/2023 saa kumi n'imwe z'umugoroba.

WIFUZA IBINDI BISOBANURO YASOMA ITANGAZO RIRI HANO HASI CYANGWA SE AGAHAMAGARA KURI:+250788305140.

Source : https://umuryango.rw/amatangazo/article/itangazo-rya-cyamunara-y-imitungo-yimukanwa-n-itimukanwa-70016

Abadepite benshi b'Abafaransa bakiriye ubutumwa bwinshi bubabwira ko baracibwa imitwe nibaramuka bashyigikiye gahunda ya Perezida Emmanuel Macron yo kuzamura imyaka yo gutanga ikiruhuko cy'izabukuru.

Polisi yavuze ko ubutumwa bw'iterabwoba amagana bwohererejwe abadepite bitegura gutora mu Nteko ishinga amategeko i Paris.

Ibi bije nyuma y'icyemezo cya Perezida Macron cyo kuzamura imyaka y'ikiruhuko cy'izabukuru ikava kuri 62 ikagera kuri 64,cyateje imyigaragambyo ikaze mu Bufaransa.

Depite Agnes Evren akaba na visi-perezida w'ishyaka rya Repubulika,yavuze ko 'yakiriye ubutumwa bwinshi bw'iterabwoba' buvuga ko bazamwica bamuciye umutwe nk'uko byakorewe Umwami Louis XVI n'umwamikazi Marie Antoinette mu gihe cy'iterabwoba ryakurikiye impinduramatwara y'Abafaransa mu 1789.

Yanditse kuri Twitter ati: 'Izi ntagondwa zanze ibiganiro mpaka – ntabwo zubaha abo badahuje muri politiki kandi ziteguye kwigana iterabwoba.'

Uwo mu ishyaka ry'aba Repubulika, Frederique Meunier yongeyeho ati: 'Ni nk'aho bashaka kuduca umutwe.'

Mu ijoro ryo ku cyumweru,wari umunsi wa kane w'imyigaragambyo mibi mu Bufaransa nyuma y'icyemezo Perezida Macron yagejeje ku nteko ishinga amategeko ku wa kane ushize.

Abigaragambya bazengurutse mu mihanda yo mu mijyi minini irimo Paris, batwika amashusho ya Perezida na ba minisitiri mbere yuko abapolisi bahagera babatera ibyuka bijyana mu maso banabakubita inkoni.

Source : https://umuryango.rw/amakuru/mu-mahanga/umutekano/article/abadepite-babwiwe-ko-bazacibwa-imitwe-nibashyigikira-gahunda-ya-perezida-macron

Nyuma y'akanama gashinzwe umutekano muri L'ONU gaherutse mu burasirazuba bwa Congo, ubu hakurikiyeho n'irindi tsinda nk'iri ariko ryo ku rwego rw'Afurika yunze ubumwe AU.

Kuri uyu wambere ariki ya 20 werurwe 2023 nibwo itsinda rishinzwe amahoro n'umutekano muri Afurika yunze ubumwe ryageze Kinshasa , aho rizamara iminsi itatu rigenzura ibibera muri Kivu ya Ruguru.

Abagize iryo tsinda rya CPS baragirana ibiganiro n'abategetsi ba RDC barimo Perezida n'abakuru b'inteko ishingamategeko imitwe yombi, ndetse baonereho no kuganira n'abahagarariye MONUSCO ndetse n'amatsinda y'amahanga mu bya politiki.

Au muri Kivu ya Ruguru , iryo tsinda rizagirana ibiganiro na MONUSCO ,FARDC n'ingabo za EAC ku ishyirwa mu bikorwa ry'amasezerano yo kugarura amahoro muri icyo gice yashyiriweho umuko I Luanda.

Uaba umwanya kandi wo kungurana ibitekerezo n'imiryango itegmiye kuri leta ihranira uburenganzira bwa muntu muri Kivu ya Ruguru , n'agatsinda kagenzura umupaka w'u Rwanda na Congo , mbere yo gusubira Addis Abeba gutanga raporo.

Iri tsinda rigamije gushaka umuti uhamye wasubiza ibintu mu buryo, no guhosha imvururu zishingiye ku ntambara ya M23 n'ingabo z'igihugu FARDC imaze kuyogoza ibitagira ingano.

Ibizava mu bushakashatsi bw'izi nzobere ngo nibyo bizagenderwaho hafatwa imyanzuro ikakaye ku ruhande rudashaka gukura akaboko mu ntambara y'uburasirazuba bwa Congo yatumye ibihumbi by'abakongoman ubu batagira aho kuba, n'ubwicanyi bwibasira abo mu bwoko bw'abatutsi.

Source : https://umuryango.rw/amakuru/mu-mahanga/umutekano/article/itsinda-rishinzwe-kugenzura-amahoro-n-umutekano-muri-afurika-ryageze-i-kinshasa

Umugabo yajyanwe mu rukiko azira kwikinishiriza imbere y'abakobwa b'abangavu bari berekezaga muri bisi bagiye ku ishuri.

Bwana Daniel Molan, ufite imyaka 51, yarekuwe n'urukiko nyuma yo kurujyanwamo aregwa icyaha cyo gukora ibiteye isoni imbere y'abangavu.

Aba bangavu bagera kuri batandatu b'ahitwa i Leigh muri Greater Manchester,bavuga ko uyu mugabo yabateze bagiye ku ishuri yikinishiriza imbere yabo.

Ibi byamenyekanye ubwo umwe muri bo yabibwiraga umwarimu we hanyuma nawe ajyana ikirego kuri polisi basuzuma amashusho ya CCTV.

Umwunganizi w'uyu mugabo yabwiye urukiko ko umukiriya we atagomba guhabwa ibihano kuko akaga yateje aba bakobwa bakiri bato kadakanganye.

Yatawe muri yombi nyuma yuko umwe mu bahohotewe abwiye mwarimu we n'abapolisi bashakisha amashusho ya CCTV.

Umwe mu bakobwa yavuze ko ibyabaye byamuteye 'gucira urubanza' abagabo bose bahuye avuga ko ahangayika cyane iyo ari muri bisi igihe cyose umugabo amwicaye iruhande. Undi yavuze ko 'yacitse intege' kubera ibyabaye.

Molan,ukora akazi ko gupakira mu ruganda rw'ahitwa Leigh,we nta bisobanuro yatanze ku myitwarire ye.

Mu rukiko rwa Bolton, yasabiwe igifungo cy'imyaka itatu nyuma yo kwiyemerera ibyaha bitatu birimo gukora ibifitanye isano n'ubusambanyi imbere y'umwana na bibiri byo gukora ibikorwa by'urukozasoni ku karubanda ariko akatirwa igifungo cy'amezi 22 gisubitse.

Umwunganizi we, Paul Treble, yabwiye urukiko ati: 'Yiteguye kwakira igihano gisubitse na raporo ya muganga ku buzima bwo mu mutwe. Yambwiye ko yicuza cyane ibyo yakoze kandi byamuteye isoni.

Afite akazi gahoraho kandi umukoresha we yavuze ko afite imyitwarire myiza mu kazi. Nubwo ntahakana uburemere bw'icyaha, ibyangiritse ni bike. '

Urukiko rwumvise ko Molan yibasiye umwana wa mbere w' imyaka 14 saa mbili z'amanywa muri Gashyantare 2022 ubwo uyu mwana yari agiye kuri bisi yerekeza i Leigh.

Source : https://umuryango.rw/ubuzima-115/udushya/article/yajyanwe-mu-nkiko-azira-kwikinishiriza-imbere-y-abana-b-abakobwa

Inama y'intekorusange ya 73 y'impuzamashyirahamwe y'umupira w'Amaguru ku Isi, FIFA, iherutse kubera mu Rwanda yabaye kuya 16 Werurwe 2023 yasize isura nziza ku banyarwanda ndetse n'igihugu muri rusange bitewe n'ibikorwa ndetse n'ubwuzu abari bitabiriye iyi nama bakiranywe.

Si ku munsi w'inama y'intekorusange umuntu yasobanura ukwishimirwa ku Rwanda ndetse n'ibyakozwe kuri uwo munsi gusa, ahubwo mbere y'uko iyi nama yabereye mu Rwanda iba habanje ibindi bikorwa byashimangiye ko u Rwanda truhagaze neza mu kwakira asbhyitsi ndetse bamwe banashima ko byagenze neza.

Tariki ya 14 Werurwe 2023, kuri sitade ya IPRC Kicukiro hatangijwe igikorwa kigamije guteza imbere umupira w'amaguru uhereye mu bana bakiri bato binyujijwe mu mashuri cyiswe 'Football for Schools', ni igikorwa kizatwara asaga Miliyoni 100 z'amadorari y'Amerika yatanzwe na FIFA.

Bukeye bwaho i Nyamirambo, hafunguwe ku mugaragaro Sitade ya Kigali yahawe izina rya Kigali Pele Stadium, ni nyuma yo kuyivugurura uhereye muri Mutarama 2023, iki gikorwa cyatwaye miliyoni 350 z'Amafaranga y'u Rwanda.

Ifungurwa ry'iyi Sitade ryakozwe na Perezida wa Repubulika Paul Kagame ndetse aha yari kumwe n'umuyobozi w'impuzamashyirahamwe y'umupira w'amaguru ku Isi, FIFA, Gianni Infantino ndetse n'abandi banyacyubahiro batandukanye.

Nyuma y'ifungurwa rya Kigali Pele Stadium, hanakinwe umukino wahuje abari bahagarariye u Rwanda bayobowe na Perezida Paul Kagame batsinze iya FIFA yari iyobowe na Infantino, ni umukino warangiye u Rwanda rutsinze ibitego 3-2.

Umunsi nyirizina wahurije hamwe abanyamuryango ba FIFA 209 mu gihe hari hategerejwe ko haza 211 bitabiriye iyi ntekorusange yagombaga no gutorerwamo umuyobozi mushya wa FIFA uzayobora muri manda ya 2023 kugeza 2027.

Ni inama y'intekorusange yasize Gianni Infantino yongeye gutorerwa kuyiyobora kuri Manda ye ya gatatu dore ko muri aya matora yabereye muri BK Arena ari naho habereye iyo nama yasize ayoboye iyi mpuzamashyirahamwe y'umupiraw'amaguru ku Isi, FIFA dore ko yari umukandida rukumbi kuri uyu mwanya.

Kwakira iyi nama ndetse n'ibindi bikorwa bya ruhago byabaye muri icyo cyumweru ku Rwanda, bigaragaza ubushobozi ndetse n'intambwe iki gihugu kimaze gutera mu myaka itari myinsi, ibi kandi bikaba bigaragarira buri wese usuye iki gihugu ndetse bikanatera ishema buri munyarwanda wese.

Ubwo yari mu kiganiro na Televiziyo y'igihugu kuri iki cyumweru, Minisitiri wa Siporo mu Rwanda, Munyangaju Aurore Mimosa yashimye cyane Perezida Paul Kagame na Madamu we ku ruhare bagira rwo guteza imbere siporo.

Minisitiri Mimosa yagize ati 'Natangira nshimira abanyarwanda bose bagize uruhare cyangwa mugufasha gutegura iyi kongere, tunashimira Nyakubahwa Paul Kagame na Madamu Jeannette Kagame, mu ruhare bagira cyangwa badahwema guteza imbere siporo cyangwa se siporo muri rusange, ariko hano turavuga by'umwihariko ruhago.'

Usibye Minisitiri Aurore wavuze ko u Rwanda rwari ruhanzwe amaso muri iki cyumweru bitewe n'iki gikorwa gikomeye cyabere mu rwa Gasabo, umuyobozi wa FIFA, Gianni Infantino ubwo yari mu kiganiro n'itangazamakuru yahishuye ko ubwo yazaga mu Rwanda bwa mbere 2016 yahigiye isomo rikomeye nk'igihugu kirimo gutera imbere.

Infantino ati ' icy'ingenzi nabonye ni uburyo iki gihugu kiyubatse kirazamuka, kandi cyazamutse nta kintu gifite, ntacyo cyahereyeho, ni icyizere, ni ukwihangana, ni ubushake, ni ugukora cyane n'ubuyobozi bwiza, kandi iki gihugu cyiza ubu ndizere ko buri wese azagarukana n'umuryango we n'inshuti bagasura, atari i Kigali gusa bakagera no mu byaro, bakareba ingagi n'ibindi byiza, bagasura n'ibihugu bikikije iki gihugu cyiza.'

Uku gutaka ndetse no kuvuga ku gihugu cy'iyubatse nyuma ya Jenoside yakorewe Abatutsi muri Mata 1994 igahitana abarenga Miliyoni bazira uko bavutse, nibyo biha amahirwe ndetse n'ubushobozi bwa kuba u Rwanda rwakira ibikorwa bitandukanye bikagenda neza.

Infantino yavuze ko u Rwanda rwiyubatse ruhereye ku buso, ariko rubikesheje umuhate ndetse n'ubuyobozi bwiza, kandi uyu munsi abantu benshi bitabiriye iyi nama ya FIFA bazagaruka kurusura.

Infantino yavuze ko u Rwanda rwiyubatse ruhereye ku buso, ariko rubikesheje umuhate ndetse n'ubuyobozi bwiza, kandi uyu munsi abantu benshi bitabiriye iyi nama ya FIFA bazagaruka kurusura.

Perezida Kagame Paul Kagame, mu ijambo rye yashimiye FIFA kuba yaratoranyije u Rwanda nk'igihugu gikwiriye kwakira Inteko Rusange ya FIFA. Ati 'Ni iby'agaciro gakomeye, cyane ko mwashoboraga guhitamo kujya ahandi.'

Kugenda neza kw'ibikorwa bibera mu gihugu cy'u Rwanda biterwa n'impamvu nyinshi ziyobowe ni uko iki guhugu gifite ubuyobozi bwiza buyobowe na Nyakubahwa Perezida Paul Kagame uherutse no guhembwa n'impuzamashyirahamwe y'umupira w'amaguru muri Afurika, CAF.

Nyuma yo guhabwa icyo gihembo, Perezida Kagame yagaragaje ko yishimiye guhabwa igihembo gihabwa uwabaye indashyikirwa mu guteza imbere ruhago Nyafurika.

Yifurije abitabiriye iki gikorwa kwiyumva nk'abari mu rugo. Ati 'Iki ni igihugu cyanyu.'

'Ibihembo nk'ibi rimwe na rimwe umuntu ntaba abiteganya cyangwa ngo yumve ko abikwiye. Mu mateka yacu, bamwe muri twe, ntidutegereza ko dukwiye byinshi ariko iyo bije muri ubu buryo, hari imvugo hano mu gihugu cyacu ko ikintu gifite agaciro, ucyakirana amaboko yombi.'

Ni igihembo yahawe kuwa kabiri tariki ya 14 Werurwe 2023, nibwo CAF yahaye Perezida Paul Kagame igihembo cy'indashyikirwa kubera uruhare yagize mu guteza imbere Siporo, ni umuhango wabere muri Kigali Serena Hotel.

Mu gihe cy'ibi bikorwa bya FIFA, Perezida Paul Kagame akaba umuterankunga wa CECAFA Kagame Cup, Irushanwa rihuza amakipe y'umupira w'amaguru yo muri Afurika y'Iburasirazuba no Hagati yakiriye abahagarariye Inama y'Ubuyobozi ya CECAFA.

Nyuma y'ibi bikorwa byabaye, ikinyamakuru RUSHYASHYA.NET cyakusanyije inyungu u Rwanda rwakuye mu kwakira iyi nama y'intekorusange yabaye mu cyumweru gishize nk'igikorwa gishingiye ku bukerarugendo.
Iyi nama ya FIFA, yashimangiye kumenyekana kw'igihugu:

Ibi bigaragazwa cyane n'ubwitabire bw'abanyamuryango b'impuzamashyirahamwe y'umupira w'amaguru ku Isi bitabiriye ibikorwa bitandukanye byabaye muri iki cyumweru dushoje bikaba byaritabiriwe n'abantu bavuye mu bihugu birenga 200.

Aha ninaho hatangajwe na Minisitiri wa Siporo, Aurore Mimosa yavuze ko isi yose yari ihanze amaso u Rwanda.
Minisitiri ati 'Byaradushimishije, byashimishije abanyarwanda, ni ibintu bikomeye ku Rwanda kwakira iyi kongere ya FIFA, nk'uko twagiye tubibona hirya no hino ni ukuvuga ngo Isi yose yari hano mu Rwanda, Isi yose yari ihanze amaso ku Rwanda, mu minsi y'icyumweru isi yose ivuga u Rwanda, ibona u Rwanda.'

Guteza imbere ubukerarugendo:

Usibye kwitabira iyi nama kw'abavuye mu bihugu bitandukanye, hateganyijwe ko abitabiriye ibikorwa bya FIFA, bagombaga no gusura ibice bitandukanye byo mu Rwanda harimo ahantu nyaburanga bityo no mugihe kiri imbere ntagushidikanya ko bamwe muribo bazagaruka bazanye n'imiryango yabo cyangwa inshuti gusura aho bageze ndetse kugera ahandi hashya.

Ubwo bari mu kiganiro n'itangazamakuru nyuma y'Amatora yatorewemo Gianni Infantino yashyishikarije abitabiriye ibikorwa bya FIFA kuzasura ibice bitandukanye by'igihugu cyane cyane Urwibutso rwa Jenoside rwa Kigali ruherereye ku Gisozi.

Infantino ati 'Nibuka uruzinduko nagiriye ku rwibutso [mwese mukwiriye kujya gusura urwibutso], ndavuga nti 'ndi nde wo gucika intege', ibyo iki gihugu cyanyuzemo, uko cyiyubatse, ni ibintu biha icyizere uwo ari we wese.'

Ibi kandi byashimangiwe na Pierluigi Collina, umutaliyani wabaye umunyabigwi mu gusifura umupira w'amaguru ku Isi yasuye Urwibutso rwa Jenoside yakorewe Abatutsi rwa Kigali ku Gisozi yunamira inzirakarengane zihashyinguye.

Pierluigi Collina wasuye Urwibutso, ni we wasifuye umukino wa nyuma w'igikombe cy'isi cya 2002 wabereye mu Buyapani uhuza ikipe y'igihugu ya Brazil n'iyu Budage. Ni umukino warangiye Brazil itsinze u Budage ibitego 2-0 byatsinzwe na Ronaldo Luís Nazário de Lima.

Amafaranga yinjiye mugihugu kubera serivisi abitabiriye iyi nama bose bahaherewe:

Ubwitabiriye bw'abanyamuryango ba FIFA, binjirije igihugu amafaranga menshi ndetse no mu bice bitandukanye, aha twavuga nk'amafunguro yahawe abitabiriye iyi nama aho babaga bacumbitse, aho bararaga ndetse n'ingendo zakozwe mu gihugu imbere.

Ibi bikorwa tuvuze haruguru byinjirije igihug amafaranga ndetse akanagera kubanyarwanda benshi mu buryo bumwe cyangwa ubundi bitewe na Serivisi bahawe mu icyo gihe u Rwanda rwakiraga iyi nama.

Ubufatanye (Cooperation) hagati ya FERWAFA n'andi mashyirahamwe:

Iyi nama yitabiriwe n'abanyamuryango ba FIFA 209 bavuye mu bihugu bitandukanye by'Isi, icyo bivuze hano ni uko nk'ishyirahamwe ry'umupira w'amaguru ryungutse ubufatanye n'abamwe muri abo banyamuryango binyuze mu kwitabira iyi nama.

Aha twavuga nk'inyubako ya FERWAFA imaze kuzura hafi y'ikicaro cyayo kiri i Remera, mu rwego rwo kureba aho iyi nyubako igeze umwe mubayobozi b'umupira w'amaguru kuri Isi ndetse unakomoka muri Busuwisi yasuye iyi nyubako izaba igizwe n'ibyumba 42.

Kugirirwa icyizere kw'igihugu mu kwakira izindi nama zikomeye:

Iyi ngingo ubwayo irivugira kurwego ndetse n'uruhare urwarirwo rwose, ntawashidikanya ko inama mpuzamahanga yabera mu Rwanda yose yagenda neza bitewe n'ubunararibonye (Experience) igihugu kimaze kugira.

Inama iri ku rwego nk'uru ndetse n'ururi hejuru yayo kugeza ubu ku Rwanda kuba bakwakira iyo nama ni ntamakemwa, aha biraterwa n'ubunararibonye mu gutegura inama zo ku rwego rwohejuru zimaze kubera i Kigali no hanze yaho kandi zikandenda neza.

Dusubize amaso inyuma ku rugero rumwe rw'inama iheruka kubera u Rwanda igatanga isura nziza ndetse n'abayitabiriye bashimira ubuyobozi bw'iki gihugu buyobowe na Nyakubahwa Perezida Paul Kagame.

I Kigali haherutse kubera inama y'umuryango w'ibihugu bivuga ururimi rw'icyongereza uzwi nka commonwealth, ni inama yitabiriwe n'abayobozi ndetse n'abandi batandukanye babarizwa muri uwo muryango.

Umuryango wa commonwealth ugizwe n'ibihugu 54 bituwe n'abaturage barenga miliyari ebyiri na miliyoni 500(bakaba bangana na 1/3 cy'abatuye Isi), ndetse uyu muryango ukaba ari uwa kabiri ku Isi mu bunini nyuma y'Umuryango w'Abibumbye UN.

Iterambere kuri kampanyi zo mugihugu zagize uruhare mugutegura iriya nama:

Binyuze ku rubuga rwa Twitter, imwe muri kompanyi ya Manumetal ikora ibikoresho bitandukanye yanditseko yafatanyijwe n'ikigo cyahawe gukora igishushanyo cyangwa gutaka muri BK Arena ahabereye iyi nama gutegura ndetse no gutunganya aho iyo nama yabereye.

Uru ni rumwe mu rugero rw'ibigo bitandukanye byagiriye inyungu mu gutanganya no gutuma iyi nama y'intekorusange ya FIFA yateraniye mu Rwanda kuba yarabaye ndetse ikaba ari ntamakemwa ndetse ikanatanga umusaruro kuri buri wese wayitabiriye cyane cyane ku Rwanda nkanyiri abashyitsi.

Iterambere ry'ibikorwa remezo kuko izo nama zisabako biba bihari kandi biri ku rwego rwiza

Utembereye ibice bimwe na bimwe by'umujyi wa Kigali hari impinduka nini ndetse zigaragarira buriwese uri muri uyu mujyi kuko ibikorwaremezo ni kimwe mu byafashije ndetse binafasha ababikoresha, aha twavuga nk'imihanda, amahoteri, ibyumba biberamo izo nama n'ibindi.

Uwakugeza kuri i Nyamirambo, ahazwi nko kuri tapis rouge ugakomeza ukinjira muri Sitade yahoze yitwa iya Regionale kuri uyu yabaye Kigali Pele Stadium nibwo wakumva neza ibi, niba uheruka kuriyo Sitade mbere ya tariki ya 4 Mutarama 2023 uzahanyarukire uzabona ubusobanuro bw'iyi ngingo.

Kanze mbamare amatsiko ho gato, iyi sitade yaravuguruwe ndetse n'ibindi bice bihegereye birimo kuvugururwa kuko imirimo yo irakomeje, iyi sitade yavguruwe nyuma yaho hemejwe ko hazabera irushanwa rizahuza abazaba bitabiriye iyi nama ya FIFA harimo n'abakozi bayo.

Gutanga imiririmo kuko ibikorwa byose bikenera ababikora haba mu myiteguro nko kubaka ibikorwa remezo, mugihe inama iba nk'abasemuzi, abayobora abakererugendo, protocol ndetse n'abandi.

Iyi nama y'intekorusange yasigiye inyungu nini u Rwanda mu buryo bufatika ndetse kandi bigaragara ko n'ikindi gihe ibikorwa binini nk'ibi cyangwa ibyisumbuyeho kuba byabera mu Rwanda hari ikizere ndetse n'ubushake ko byose bizagenda neza.

The post Ingingo zishimangira umusaruro w'inama y'Intekorusange ya FIFA ku Rwanda nk'umusingi w'imenyekanishagihugu mu bukerarugendo appeared first on RUSHYASHYA.

Source : https://rushyashya.net/ingingo-zishimangira-umusaruro-winama-yintekorusange-ya-fifa-ku-rwanda-nkumusingi-wimenyekanishagihugu-mu-bukerarugendo/?utm_source=rss&utm_medium=rss&utm_campaign=ingingo-zishimangira-umusaruro-winama-yintekorusange-ya-fifa-ku-rwanda-nkumusingi-wimenyekanishagihugu-mu-bukerarugendo