Blog

Akarere ka Karongi kizihije umunsi wahariwe amazi (Water Day )kuri uyu wa 29 Werurwe 2023,gafatanyije n'abafatanyabikorwa bako barimo WASAC, Water for People na World Vision.

Uyu munsi wizihijwe hatahwa imiyoboro ibiri y'amazi n'ikigo cy'isuku n'isukura ( District Sanitation Center) kizafasha Abaturage kugira ubwiherero bwujuje ibisabwa.

imiyoboro yatashywe ni iya Rugobagoba-Tongati-Kazibaziba ufite uburebure bwa kilometero 68.2 uha amazi abaturage n'abafatanyabikorwa b'akarere bagera ku 22,000 bo mu Mirenge ya Ruganda , Gashali na Murambi.

Undi n'umuyoboro wa Mukura Rubengera uha amazi abaturage 26,000 bo mu Murenge wa Rubengera ufite uburebure bwa kilometero 47.2km

Abaturage bo mu murenge wa Ruganda baganiriye na Umuryango.rw bavuze imyato ubuyobozi butabatereranye bukabaha amazi Meza .

Mukantabana vVestine yagize ati ,”Maze imyaka 50 nywa amazi mabi tuvoma epfo ni nko mu birometero 5 urumva kuba amazi atwegereye ni byiza tuzanywa amazi meza ndetse n'abana ntibazongera gukererwa ishuli.Mbere byagoranaga ndabona ari nko kubonekerwa .”

Naho Ntakirutimana Innocent we yavuze ko bishimiye amazi bagejejweho.Ati, “mvugishije ukuri mbere numvaga ko batubeshya ntayo bazaduha ariko ndishimye burya Leta yacu itwitayeho.”

Mukarutesi Vestine,Umuyobozi w'akarere ka Karongi aganira na Umuryango.rw yavuze ko amazi ari isoko y'ubuzima ariyo mpamvu bifuza ko buri muturage yagira amazi meza.

Ati “Uyu muyoboro twatashye uzatuma abaturage bagira ubuzima bwiza.Iyo unyoye amazi meza bikurinda indwara zituruka ku mwanda, ikindi n'igwingira rizacika kuko abantu bazaba banywa amazi asukuye bityo bibarinde inzoka.Turasaba abaturage kubungabunga ibi bikorwa remezo bahawe ntibabyangize .”

Ibi bikorwa byakozwe ku bufatanye bw'Akarere ka Karongi n'abafatanyabikorwa bako barimo WASAC, World Vision, Water for People,byatwaye amafaranga y'u Rwanda asaga miliyari imwe na miliyoni 614 (Frw 1,614,956,327).

Ku bufatanye bw'akarere n'abafatanyabikorwa, Akarere ka Karongi kihaye intego ko ingo 100% zizaba zifite amazi meza mu mwaka wa 2024.

Nubwo hari uyu muhigo w'uko muri 2024 Ingo 100% zizaba zifite amazi meza, haracyari abaturage banywa amazi y'ikivu nay'imigezi bakaba bagaragaza ko ari imbogamizi ndetse binateye inkeke ku buzima bwabo.

Hari abagaragaza kandi ko aba bafatanyabikorwa babaha amazi Wasac ikaza ikayafunga batazi impamvu.

Sylvain Ngoboka
Umuryango.rw

Source : https://umuryango.rw/amakuru/mu-rwanda/ubukungu/article/karongi-ingo-zose-zizaba-zifite-amazi-meza-muri-2024

Iki gikorwa cyateguwe binyuze muri 'Kid's Special', umunsi washyiriweho abana kugira ngo na bo babone ahantu heza ho kwidagadurira kuko n'ababyeyi na bo bafite aho basohokera hatandukanye kandi heza.

Ku Bakirisitu, Pasika ni umwe mu minsi mikuru ikomeye cyane aho baba bizihiza izuka rya Yesu/Yezu Kirisitu wabapfiriye, benshi bizera ko babariwe ibyaha byabo.

Igikorwa cyo kwizihiza Pasika ku bato giteganyijwe ku wa 1 Mata 2023, aho abana baturutse hirya no hino bazahurira kuri Park Inn by Radisson Kigali Hotel bakorerwe ibikorwa bitandukanye byo kubinjiza muri Pasika iteganyijwe ku wa 9 Mata 2023.

Park Inn by Radisson Kigali Hotel yateguye ibikorwa bitandukanye byo gushimisha abana bazitabira iki gikorwa nko koga muri 'piscine', gushushanywaho, gukina umukino wa Pasika uzwi nka 'Easter Egg Hunting', gusangira amafunguro atandukanye n'ibindi.

Kwinjira muri iki gikorwa buri mwana agomba kwishyurirwa 20.000 Frw, giteganyijwe gutangirwa saa Yine kugeza saa Kumi n'Imwe. Buri mwana agomba guherekezwa n'umubyeyi cyangwa undi muntu mukuru.

Park Inn by Radisson yafunguwe mu 2017 na Perezida Paul Kagame, yubatswe n'umushoramari w'Umunyarwanda, Joseph Mugisha, ikaba iherereye mu Kiyovu mu Mujyi wa Kigali.

Iyi hoteli ifite ibyumba 161 byo ku rwego rwo hejuru birimo murandasi yihuta, hari kandi na restaurant nziza iteka amafunguro y'ubwoko bwose ufata wiyumvira amahumbezi ya Kigali.

Park Inn by Radisson Kigali Hotel yateguye igikorwa cyo kwishimana n'abana mu rwego rwo kwihizanya na bo Pasika idasanzwe

Mu mikino bateguriwe harimo no koga muri piscine

Abana bateguriwe imikino itandukanye

Park Inn by Radisson Kigali Hotel yateguriye abana Pasika yihariye

---

Source : http://igihe.com/amakuru/u-rwanda/article/park-inn-by-radisson-kigali-hotel-yateguriye-abana-pasika-yihariye

Ni gahunda yatangijwe ku wa Gatatu, tariki ya 29 Werurwe 2023, ubwo habaga Inama Mpuzabikorwa y'Akarere ka Ngoma. Yari ifite insanganyamatsiko igira iti 'Kwiyemeza bijyanye n'ibikorwa, imibare, ibipimo, imihigo, ingamba, igihe n'ingaruka.'

“Bwije nkoze iki?” izafasha abayobozi bose kujya bisuzuma bakareba icyo bakoze buri munsi yaba mu gukemura ibibazo by'abaturage, kugira icyo bakora ku mihigo n'ibindi bibazo bitandukanye bigaragara aho bayobora.

Umuyobozi w'Akarere ka Ngoma, Niyonagira Nathalie, yavuze ko iyi gahunda bayitezeho byinshi mu kongera uburyo bwo gukemura ibibazo by'abaturage no kwesa imihigo ku bayobozi bamwe na bamwe byajyaga bigaragara ko bakiri inyuma.

Yakomeje avuga ko buri muturage iyi gahunda imureba kuko azajya abyuka yirirwe akora ariko nibigera ku mugoroba yiherere arebe nibura icyo umunsi bwije umusigiye.

Niyonagira yavuze ko na buri muyobozi ari uko azajya agera ku mugoroba akayikoresha akareba icyo bwije akoreye umuturage cyangwa icyo yakoze ku mihigo.

Ati 'Bizatuma nta muyobozi ugira ubunebwe kuko uzajya wicara niwisuzuma uvuge uti 'Bwije nkoze iki?'. Ni iki nagezeho umunsi wose? Ubu dusanzwe dufite uburyo tugenzura abayobozi twifashishije raporo batanga mu kurangiza imanza, gukurikirana ibibazo by'abaturage, Ejo Heza, mituweli n'ahandi henshi. Aho hose tuzahagenzura umunsi ku munsi, ikindi tuzajya tunifashisha ikoranabuhanga mu kureba icyo bwije bakoze.'

Yavuze ko bifashishije iyi gahunda nibura buri munsi umuyobozi azajya atanga raporo y'ibyo yakoze n'ibyo azakora kugeza atanze serivisi nziza ku baturage.

Bamwe mu banyamabanga nshingwabikorwa b'utugari bitabiriye iyi nama bavuze ko iyi gahunda izabafasha kwesa imihigo no gukurikirana ibibazo by'abaturage umunsi ku munsi.

Ndagijimana Jean d'Amour uyobora Akagari ka Nyinya mu Murenge wa Rukira yavuze ko iyi gahunda bayitezeho kubafasha kongera imikorere mu kazi kabo.

Yavuze ko nibura ngo yitezweho guhwitura buri muyobozi akamenya gukorera ku mibare n'ibipimo mu kwita ku baturage ayoboye no gukurikirana imihigo buri munsi.

Nyiransengimana Hervanie uyobora Akagari ka Munege mu Murenge wa Gashanda we yavuze ko Gahunda ya “Bwije nkoze iki?” bayitezeho kubafasha gukemura ibibazo by'abaturage batajenjetse.

Depite Nyirahirwa Veneranda, witabiriye iyi nama, yasabye abayobozi kurushaho kwegera abaturage bakabakemurira ibibazo bagendeye ku bipimo n'imihigo ngo kuko ari byo byabafasha kureba neza ibibazo bihari.

Muri iyi nama abanyamabanga nshingwabikorwa b'utugari 38 muri 64 bahawe moto nshya zizabafasha mu kurushaho kwegera abaturage no kubakemurira ibibazo mu buryo bwihuse. Abandi basigaye na bo bazazihabwa nyuma yo kuzuza ibisabwa.

Izi moto bahawe zanajyanye no kubongerera ibihumbi 50 Frw ku mushahara wabo nk'uko byemejwe n'Inama Njyanama y'Akarere ka Ngoma kugira ngo abafashe kuzishyura no kubona lisansi mu buryo bworoshye.

Umuyobozi w'Akarere ka Ngoma, Niyonagira Nathalie, yavuze ko Bwije nkoze iki? ari gahunda yitezweho gukemura ibibazo by'abaturage

Inama Mpuzabikorwa y'Akarere ka Ngoma yize ku 'Kwiyemeza bijyanye n'ibikorwa, imibare, ibipimo, imihigo, ingamba, igihe n'ingaruka'

Depite Nyirahirwa Veneranda yasabye abayobozi kwegera abaturage bakabakemurira ibibazo bafite

Iyi nama yitabiriwe n’abayobozi batandukanye ku rwego rw’ibanze mu Karere ka Ngoma

Ba gitifu bashimye ko bahawe moto zizabafasha mu ngendo zabo

Abanyamabanga nshingwabikorwa b'utugari 38 muri 64 bahawe moto mu gihe abandi bakiri gutekerezwaho

---

Source : http://igihe.com/amakuru/u-rwanda/article/bwije-nkoze-iki-uburyo-bushya-bwo-gukemura-ibibazo-by-abaturage-b-i-ngoma

Imiryango isaga ibihumbi bitanu yo mu mirenge itanu y'Akarere ka Muhanga itishoboye, imaze gubabwa ubufasha burimo amatungo magufi, ibiryamirwa n'ibiribwa mu rwego rwo gufasha abana kwitabira ishuri no gufasha iyi miryango kubonera abana iby'ibanze mu buzima bwa buri munsi. Benshi guta ishuri byabaye amateka kuko icyo bahungaga kitagihari mu miryango bakomokamo.

Umuyobozi Mukuru w'Umuryango Icyerecyezo Rwanda, Byiringiro Patrick yabwiye intyoza.com ko nibura mu myaka 5 ishize bamaze kwita ku bana barenga ibihumbi birindwi biga mu mashuri abanza n'ayisumbuye bo mu Mirenge itanu y'Akarere ka Muhanga, aho byarinze abatari bake kuva mu Ishuri.

Yagize Ati' Mu myaka itanu(5) ishize tumaze gufasha abana basaga ibihumbi birindwi (7) kandi turabakurikirana kuva mu mashuri abanza tukabaha ibikoresho by'ishuri, ibyo kurya n'imyambaro bigatuma babana bava mu miryango itishoboye bakomeza kwiga neza batekanye kuko mbere babaga badatuje kubera kutabona ibiribwa bihagije bigatuma bava mu ishuri'.

Akomeza avuga ko muri icyo gikorwa bafatanya n'ubuyobozi bw'Akarere ka Muhanga mu gushaka imiryango ikennye kurusha iyindi, ariko ko nabo bafite umufatanyabikorwa ufasha no kwishyurira abana batsinda neza biga mu bigo bibacumbikira.

Umuyobozi wa Putocas mu Rwanda, Elisabeth Souzan Causina, avuga ko iyo umwana yariye neza ku ishuri atsinda neza kandi akabasha kugira ubumenyi bufatika. Avuga kandi ko iyo bafashije imiryango bakomokamo bakayiha ibikenerwa bya buri minsi iyo bavuye ku ishuri babasha kurya ndetse bakagira ubuzima bwiza.

Agira Ati 'Abana bakuriweho inzitizi zose zatuma batabasha kwiga bisanzuye. Iyo ubakurikiranye ukabamenyera ifunguro riteguye neza bagira ubumenyi kuko ntabwo baba bafite ibibabuza kugera ku ntego zabo. Byose bimutegurira ejo hazaza heza kandi nubwo umusaruro utahita uboneka nibura uba ubiziko ejo uzaboneka kuko wahamuteguriye hakiri kare'.

Ku ruhande rw'Ishuri ry'Urwunge rw'Amashuri rwa Kivumu riri mu murenge wa Cyeza, Ntigurirwa Placide avuga ko kuva uyu mushinga watangira gufasha imiryango ikomokamo abana bakennye nta mwana ukiva mu ishuri kubera ubushobozi bukeya bw'ababyeyi kuko nta kibazo cy'inzara bahura nacyo, kandi ko ababyeyi babo bahabwa amatungo magufi yo kubafasha kwiteza imbere.

Agira Ati' Kuva twabona uyu mushinga wafashije abana, umubare wabavaga mu ishuri waragabanutse cyane ndetse nk'ubu muri uyu mwaka twagize abana babiri gusa  bataye ishuri, ariko dukurikiranye dusanga byaratewe n'amakimbirane mu miryango yabo, ariko abandi biga neza bahabwa amafunguro ahagije, bigatuma banatisnda. kandi tunagerageza natwe kubaba hafi kugirango turebe niba hari ibindi bibazo byihariye bafite byatuma batabasha kwiga neza'.

Umuyobozi w'Akarere ka Muhanga wungirije ushinzwe Imibereho myiza y'Abaturage, Mugabo Gilbert avuga ko inkunga zihabwa abana n'imiryango itishoboye zatumye umubare w'abataga amashuri ugabanuka cyane kandi n'ibijyanye n'ubuzima bwabo ubona ko bugenda neza cyane. Yibutsa kandi ko abahabwa amatungo magufi bakwiye  kuyikenuza yabanje kororoka kugira ngo igihe ubufasha bahabwa buzaba bwarangiye babashe wifasha ubwabo.

Bamwe mu babyeyi bafite abana bafashwa n' uyu muryango bavuga ko amatungo magufi bahawe azabafasha kwikenura. Bemeza kandi ko bagiye gukurikirana neza ubuzima bw'abana babo haba ku ishuri no mu rugo bahereye ku nyunganizi bahawe.

Banemeza ko ubukene bwo mu miryango butuma batita ku bana kubera guhora bajya gushaka ibyo kubagaburira, bityo kumenya ko umwana yatsinze neza mu ishuri cyangwa yatsinzwe bikaba inzozi.

Uyu mushinga mu byo ufasha iyi miryango harimo gufasha abana gufatira ifunguro ku mashuri bigaho nta ya ndi mafaranga yakwa ababyeyi, naho imiryango bakomokamo ikaba ihabwa ibiribwa birimo; Imiceri, Ibishyimbo, Ifu y'ibigori(akawunga) hamwe n'ibiryamirwa (Imifariso). Hanatangwa kandi imyenda n'inkweto ku bana.

 Akimana Jean de Dieu

Source : https://www.intyoza.com/2023/03/29/muhanga-imwe-mu-miryango-yavugutiwe-umuti-ku-bana-bataga-ishuri/

Polisi ya Uganda yatangaje ko iyi mpanuka yabaye kuri uyu wa 29 Werurwe 2023 ahagana saa 3h00'. Ivuga ko Polisi yo mu gace ka Ntungamo yakurikiranye iyo mpanuka ikomeye yabereye ku kiraro cya Katinda, ku muhanda Ntungamo – Kabale.

Ni impanuka yabaye hagati y'imodoka ya RAD 795B HYUNDAI BUS ya Volcano Express na RAC 704L SCANIA BUS ya Trinity.

Polisi yakomeje iti “Abagenzi 20 bo mu modoka zombi bakomeretse. Bivugwa ko imodoka ya RAD 795B Hyundai yavaga mu gace ka Ntungamo igana i Kabale yakomeje kugendera ku ruhande rw'iburyo ubwo yageraga ku kiraro cya Katinda, birangira igonganye na bisi ya RAC 704L Scania, yaturukaga muri Kabale igana Ntungamo, yari mu mukono wayo.”

It’s alleged that motor vehicle reg number RAD 795B Hyundai bus which was moving from Ntungamo heading to Kabale kept right when he reached Katinda bridge & ended up colliding head – on with motor vehicle RAC 704L Scania bus which was from Kabale side to Ntungamo on his lane. pic.twitter.com/CzzTOCyf6S

— Uganda Police Force (@PoliceUg) March 29, 2023

Si ubwa mbere imodoka ziturutse mu Rwanda zikorera impanuka muri Uganda, kubera kubusanya imikono yo kugenderamo.

Mu Rwanda imodoka zigendera ku ruhande rw'iburyo, mu gihe muri Uganda zikoresha urw'ibumoso. Iyo zimaze kwambuka umupaka, ziba zigomba guhindura uruhande zikoresha.

Mu Ukuboza 2022, nabwo imodoka ya Volcano Express yari iturutse i Kampala igana i Kigali yagonganye n'indi itwara abagenzi mu muhanda Ntungamo-Kabale ku musozi wa Rwahi, batandatu barimo Abanyarwanda bane bitaba Imana.

Polisi ya Uganda yatangaje ko abakomeretse bagera kuri 40, bakaba bahise bajyanwa ku kigo nderabuzima cya Lotom mu gace ka Muhanga.

Hatangajwe ko uburangare ari kimwe mu byateye impanuka, aho umushoferi wa Volcano yataye igice cy'umuhanda imodoka zivuye Kampala zinyuramo, akajya mu ruhande rw'imodoka zituruka mu Rwanda ari naho yagonganiye n'iya Oxygen.

Imodoka ya Trinity yangiritse ariko nta witabye Imana

Izi modoka zagonganye zigeze ku kiraro cya Katinda

---

Source : http://igihe.com/amakuru/u-rwanda/article/polisi-ya-uganda-yemeje-ko-abantu-20-bakomerekeye-mu-mpanuka-y-imodoka-ya

Ambasaderi Antonino Maggiore, yari kumwe n'umuyobozi w'Ingabo za EU zitoza iza Mozambique, Brig Gen Comodore Martins de Brito kuri uyu wa Gatatu tariki 29 Werurwe 2023.

Aba bashyitsi bahawe ikaze n'umuyobozi w'ingabo z'u Rwanda ziri muri Mozambique, Maj Gen E Nkubito, wabahaye ishusho y'umutekano muri ako gace kagenzurwa n'ingabo z'u Rwanda zifatanyije n'iza Mozambique.

Ambasaderi Antonino Maggiore, yashimiye ubufatanye bw'intangarugero bukomeje kuranga ingabo ziri kugarura amahoro muri Cabo Delgado. Yashimye kandi ibikorwa byo gufasha abaturage birimo nko kubaha ubuvuzi.

Ambasaderi Maggiore yijeje ubuvugizi mu gushishikariza imiryango itari iya leta gutanga ubufasha ku baturage bari gusubira mu byabo.

Mu Ukuboza 2022, Umuryango w'Ubumwe bw'u Burayi (EU) wemeje inkunga ya miliyoni €20 (miliyari zisaga 20 Frw) yo gushyigikira ibikorwa by'Ingabo z'u Rwanda bigamije kugarura amahoro mu Ntara ya Cabo Delgado, mu majyaruguru ya Mozambique.

---

Source : http://igihe.com/amakuru/u-rwanda/article/ambasaderi-wa-eu-yashimye-ibikorwa-by-ingabo-z-u-rwanda-muri-cabo-delgado

Ubwo hakinwaga umukino w'umunsi wa kane wo gushaka itike y'igikombe cya Afurika 2023 wahuje u Rwanda na Benin warangiye amakipe yombi anganyije igitego kimwe kuri kimwe urutonde ntirwahinduka.

Uyu umukino wabereye kuri Kigali Pele Stadium guhera ku isaha ya Saa cyenda, uyu mukino wakinwaga wo kwishyura ku mpande zombi ukaba uw'umunsi wa kanmu itsinda rya nyuma mu guhatanira itike y'igikombe cya Afurika kizabera muri Cote d'Ivoire mu ntangiriro z'umwaka utaha wa 2024.

Ni umukino watangiye ku ruhande rw'u Rwanda babona amahirwe yari bube yabyaye igitego, ni uburyo bwa penaliti yatewe na Rafael York ariko umunyezamu wa Benin awukuramo bitamugoye amakipe yombi ajyaa kuruhuka ari ubusa ku busa.

Bavuye kuruhuka nibwo ikipe ya Benin yabonye igitego cya mbere ubwo hari ku munota wa 57, ni igitego cyatsinzwe na Jodel Dossou nyuma yo gucenga umunyezamu Ntwari Fiacre wari mu izamu ry'Amavubi.

Ikipe y'igihugu y'u Rwanda, Amavubi yabonye igitego cyo kwishyura ubwo hari ku munota wa 71 w'umukino, ni igitego cyatsinzwe na myugariro Manzi Thierry ku mupira wari uvuye muri koruneri ugarurwa neza na kapitei Kagere Meddie.

Nyuma y'igitego cyatsinzwe na Manzi byarinze bigera ku munota wa nyuma w'umukino amakipe yombi anganyije igitego kimwe kuri kimwe.

Nyuma y'uyu mukino, ikipe y'igihugu ya Senegal yaraye itsinze ikipe ya Mozambique yahize ibona itike yo gukina imikino ya nyuma y'igikombe cya Afurika kizabera muro Cote d'Ivoire, kugeza ubu Senegal ifite amanota 12, irakurikirwa na Mozambique ifite amanota 4, u Rwanda rukagira amanota atatu naho Benin yo kuri ubu ifite amanota abiri.

The post Amavubi yaguye miswi na Benin ku mukino wa kane wo mu itsinda L wogushaka itike y'igikombe cya Afurika 2023 appeared first on RUSHYASHYA.

Source : https://rushyashya.net/amavubi-yaguye-miswi-na-benin-ku-mukino-wa-kane-wo-mu-itsinda-l-wogushaka-itike-yigikombe-cya-afurika-2023/?utm_source=rss&utm_medium=rss&utm_campaign=amavubi-yaguye-miswi-na-benin-ku-mukino-wa-kane-wo-mu-itsinda-l-wogushaka-itike-yigikombe-cya-afurika-2023

Ikipe y'igihugu “Amavubi”yanganyije igitego 1-1 na Bénin mu mukino w'Umunsi wa Kane wo mu Itsinda L ryo gushaka itike ya CAN 2023,abura amahirwe yo gusiga Mozambique.

Muri uyu mukino wari utegerejwe na benshi,Amavubi yatangiye asatira byatumye ku munota wa 7 Rafael York akinana na Manzi Thierry,wasubije umupira hafi y'urubuga rw'amahina usanga Mutsinzi Ange wateye ishoti rica ku ruhande rw'izamu.

Ku munota wa 16,Amavubi yabonye penaliti ku mupira wahinduwe mu rubuga rw'amahina, ukorwa na myugariro wa Benin, Doremus, n'ukuboko.

Umusifuzi Omar Artan yahise yerekana penaliti.

Rafael York yahushije iyi penaliti ku mupira yateye ukurwamo n'umunyezamu Saturnin Allagbe, ujya muri koruneri.

Ku munota wa 19,Rubanguka Steve yahawe ikarita y'umuhondo ku ikosa yakoreye Matteo Alrich.

Ku munota wa 19,Ishola Junior Olaitan yateye umupira ukomeye kuri coup franc ukurwaho na Ntwari Fiacre ujya muri koruneri.

Ku munota wa 29,Rafael York yacometse umupira imbere, ukurwaho nabi na ba myugariro ba Benin, Muhozi Fred awuteye mu izamu ukurwamo n'umunyezamu Allagbe

Ku munota wa 30,Mugisha Gilbert yinjiranye umupira mu rubuga rw'amahina, awuhinduye ushyirwa muri koruneri na Doremus.

Ku munota wa 34,Muhozi Fred yageze imbere y'izamu akata umupira mu rubuga rw'amahina, ariko ntihagira mugenzi we uwugeraho kuko Rafael York yari inyuma.

Igice cya mbere cyarangiye amakipe yombi anganya 0-0.

Igice cya kabiri cyatangiye umutoza w'Amavubi yinjiza Bizimana Djihad asimbura Rubanguka Steve wari wabonye ikarita y'umuhondo.

Ku munota wa 54, Muhire Kevin yakinanye na Mugisha Gilbert wari uzengurutswe n'abakinnyi benshi mu rubuga rw'amahina, ariko ateye umupira ujya hejuru y'izamu.

Ku munota wa 56,Benin yafunguye amazamu ku gitego cyatsinzwe na Jodel Dossou wacenze umunyezamu Ntwari Fiacre basigaranye,biturutse ku burangare bwa ba myugariro.

Ku munota wa 68,Imourhane Hassane yacenze umunyezamu Ntwari atera umupira mu izamu, ariko Imanishimwe Emmanuel awukuriraho ku murongo.

Ku munota wa 70,Manzi Thierry yishyuriye Amavubi igitego n'umutwe ku mupira wari uvuye kuri koloneri,Kagere awutera n'umutwe usanga Manzi wenyine awushyira mu nshundura.

Ku munota was 82,Amavubi yahushije uburyo bukomeye ku ishoti rikomeye ryatewe na Mugisha Gilbert, umupira ushyirwa muri koruneri n'umunyezamu Allagbe.

Ku munota wa 84, Niyonzima Ally yahawe umupira ari imbere y'izamu wenyine awusubiza mu mpande barongera barawumusubiza awutera hanze.

Amavubi yakomeje gushakisha igitego ariko abakinnyi bayo birangaraho,umukino urangira Ari igitego 1-1.

Amavubi azakina umukino wa gatanu kuwa 12 Kamena na Mozambique I Kigali.

Iri tsinda L riyobowe na Senegal yamaze kubona itike n'amanota 12, igakurikirwa na Mozambique ifite amanota ane mu gihe u Rwanda rufite amanota atatu naho Bénin ikagira amanota abiri.

Source : https://umuryango.rw/imyidagaduro/imikino/article/afcon2024-amavubi-yapfushije-ubusa-amahirwe-yo-guca-kuri-mozambike

Ikipe y'Igihugu ya Bénin yareze u Rwanda mu Mpuzamashyirahamwe y'Umupira w'Amaguru muri Afurika, CAF, ivuga ko rwakinishije Muhire Kevin kandi afite amakarita abiri y'umuhondo.

Umutoza w'ikipe y'Igihugu ya Bénin, Grenit Rohr,niwe wahamije ko Impuzamashyirahamwe y'Umupira w'Amaguru ku Mugabane wa Afurika, CAF, ikwiye gukoresha ubutabera igahana u Rwanda rwakinishije umukinnyi wari wujuje amakarita abiri y'umuhondo.

Amakarita Muhire Kevin ashinjwa yayabonye ku mikino ibanza ya Sénégal na Bénin.

Umukino Muhire Kevin ' yabonye ikarita y'umuhondo Amavubi akina na Senegal ku munota wa 69, akiniye nabi Gana Gueye.

Mu mukino uheruka I Cotonou, Benin ivuga ko nabwo Muhire Kevin yabonye ikarita y'umuhondo yagombaga gutuma asiba umukino w'uyu munsi ariko yawukinnye wose.

Itegeko rya CAF rivuga ko umukinnyi ukinnye afite amakarita abiri y'umuhondo, igihugu akinira gihanishwa mpaga y'ibitego 3-0.

Hari andi makuru avuga ko ushinzwe ubuzima bw'Amavubi bwa buri munsi, Jackson, yavuze ko ku rutonde CAF yahaye u Rwanda rw'abatemerewe gukina, ruriho Hakim Sahabo wenyine.

Andi makuru akavuga ko hashobora kuba harabayeho kwibeshya ku ikarita y'umuhondo iri kwitirirwa Muhire Kevin bivugwa ko yaboneye i Dakar muri Sénégal.

Mu gihe iki kirego cyahabwa ishingiro, u Rwanda rwaterwa mpaga ku mukino rwanganyijemo na Bénin igitego 1-1 kuri Kigali Pelé Stadium kuri uyu wa Gatatu, tariki ya 29 Werurwe 2023.

Muhire Kevin ashobora guhemukira Amavubi

Source : https://umuryango.rw/imyidagaduro/imikino/article/ikipe-ya-benin-yareze-u-rwanda-gukinisha-umukinnyi-utemewe

Muhire Kevin yakinnye iminota yose mu mukino u Rwanda rwanganyijemo n’ikipe y’igihugu ya Benin. Uyu mukino wabaye kuri uyu wa Gatatu tariki 29, ubera kuri sitade ya Kigali Pele Stadium. Muhire Kevin yagiye mu kibuga afite amakarita y’umuhondo harimo ikarita yahawe ku munota wa 69 u Rwanda rukina na Senegal, ndetse n’ikarita y’umuhondo yabonye ku munota wa 53 u Rwanda rukina na Benin.

Itegeko rivuga ko umukinnyi wabonye amakarita 2 y’umuhondo yikurikiranya mu mikino y’amajonjora yo gushaka itike y’igikombe cy’Afurika, asiba umukino ukurikiyeho. Ibi bivuze ko umukino u Rwanda rwahuriyemo na Benin, Muhire Kevin atagombaga gukina.

Umutoza wa Benin, Gernot Rohr mu kiganiro n’itangazamakuru nyuma y’umukino, yavuze ko bagiye kurega u Rwanda kubera ko rwakinishije umukinnyi ufite ikarita z’umuhondo ebyiri. Hari irindi tegeko rya CAF rivuga ko ishyirahamwe ry’umupira w’amaguru mu gihugu, ariryo rigomba kumenya no kumenyesha abakinnyi batemerewe gukina umukino.

Muhire Kevin aherutse kubona ikarita y’umuhondo u Rwanda rukina na Benin

Muhire Kevin yari yabonye ikarita mbere ubwo u Rwanda rwakinaga na Senegal

Muhire Kevin yagaragaye mu mukino wo kuri uyu wa Gatatu

Source : https://inyarwanda.com/inkuru/127583/amavubi-ashobora-guterwa-mpaga-kubera-amakarita-ya-muhire-kevin-127583.html