Blog

Ikinyamakuru L'Equipe kizwiho gukora no gutangaza inkuru zicukumbuye cyashyize hanze urutonde rw'abakinnyi bahembwa agatubutse muri Premier League,bayobowe n'Umubiligi Kevin de Bruyne.

L'Equipe ivuga ko umushahara mbumbe wa De Bruyne ari miliyoni 1 n'ibihumbi 700 z'amapawundi ku kwezi (£ 425.000-mu cyumweru),akurikiwe na Haaland kuri miliyoni 1.609 ku kwezi.

Uwa gatatu unganya na rutahizamu ukomeye wa City, umaze gutsinda ibitego 39 muri uyu mwaka w'imikino, ni David de Gea wo muri Man United nawe uhembwa ibihumbi 402.250 by'amapawundi buri cyumweru.

Icyakora Haaland ngo niwe utahana menshi buri cyumweru iyo harebwe n'uduhimbazamusyi.

Ku mwanya wa kane ni Mo Salah wa Liverpool – akaba ari we mukinnyi uhembwa menshi muri The Reds kandi bivugwa ko yinjiza miliyoni 1.495 z'amapawundi ku kwezi (£ 373.750 ku cyumweru).

Mo Salah amaze gutsinda ibitego 20 mu marushanwa yose muri uyu mwaka w'imikino.

Ku mwanya wa gatanu hari Jadon Sancho wa Man United unganya umushahara na Salah.

Abakinnyi batanu bahembwa akayabo muri Premier League:

Kevin de Bruyne £425,000
Erling Haaland £402,250
David de Gea £402,250
Mo Salah £373,750
Jadon Sancho £373,750

Source : https://umuryango.rw/imyidagaduro/imikino/article/kevin-de-bruyne-ayoboye-urutonde-rw-abakinnyi-bahembwa-menshi-mu-bwongereza

Urukiko Rukuru ruburanisha Ibyaha Mpuzamahanga n'ibyambukiranya imbibi ruherereye i Nyanza mu majyepfo y'u Rwanda rwasubitse iburanisha mu mizi ku rubanza ruregwamo Uzaramba Karasira Aimable, wahoze ari umwarimu muri Kaminuza y'u Rwanda ukurikiranyweho ibyaha birimo guhakana Jenoside yakorewe Abatutsi.

Ku wa 25 Ugushyingo 2022 nibwo Urukiko Rwisumbuye rwa Nyarugenge rwemeje bidasubirwaho ko rudafite ububasha rwo gukomeza kuburanisha urubanza rwa Uzaramba Karasira Aimable bituma rurwohereza mu Rukiko Rukuru ruburanisha ibyaha mpuzamahanga n'ibyambukiranya imibibi.

Urukiko Rwisumbuye rwa Nyarugenge rwaburanishaga uru rubanza rwasobanuye ko impamvu rwiyambuye ububasha bwo kurukomeza ishingiye ku kuba uregwa, ibyaha yarabikoreye kuri YouTube kandi bifatwa nk'ibyaha byo ku rwego mpuzamahanga, kandi byageraga no mu bindi bihugu.

Ni ibiganiro byatambutse ku miyoboro ya YouTube irimo Ukuri Mbona washinzwe na Karasira na Umurabyo TV wa Agnès Uwimana Nkusi.

Urukiko Rukuru ruburanisha Ibyaha Mpuzamahanga n'ibyambukiranya imbibi rwatangaje ko impamvu y'isubikwa ry'uru rubanza ishingiye ku kuba umwe mu bagize inteko iburanisha yitabiriye ibikorwa by'Inama nkuru y'ubucamanza i Kigali.

Uru rubanza rwimuriwe ku wa mbere w'icyumweru gitaha tariki 03 Mata 2023, i saa tatu z'igitondo.

Mu maburanisha atandukanye, Karasira Aimable yakunze kwanga kuburana asaba ko yahabwa igihe cyo kwifuza kuko afite indwara zirimo n'izo mu mutwe.

Kuri ubu afungiwe muri Gereza ya Nyarugenge iri Mageragere kuva ku wa 30 Kamena 2021.

Primo

Source : https://umuryango.rw/amakuru/mu-rwanda/ubutabera/article/urubanza-rwa-karasira-aimable-ushinjwa-ibirimo-guhakana-jenoside-yakorewe

Urukiko rw'ubujurire mu Rwanda rwahanishije Yvonne Idamange Iryamugwiza gufungwa imyaka 17 n'amezi atandatu ruvuga ko hari ibyaha atari yahaniwe n'urukiko rwa mbere.

Mu 2021, Idamange yakatiwe imyaka 15 y'igifungo ahamijwe ibyaha birimo; guteza imvururu muri rubanda, gupfobya jenoside, gutesha agaciro ahashyinguwe imibiri y'abazize jenoside, no gutangaza amakuru y'ibihuha.

Mbere y'uko yivana mu rubanza rwe, Idamange w'imyaka 43 yahakanye ibyaha byose yarezwe.

Nyuma y'ubujurire bwatanzwe n'ubushinjacyaha, Urukiko rw'Ubujurire rwavuze ko Idamange atari yahaniwe icyaha cyo 'kwigomeka ku butegetsi' no 'Gutanga cheque itazigamiwe' maze ruzamura igihano yari yarahawe.

Idamange ntiyari ahari ubwo uyu mwanzuro wasomwaga n'uru rukiko kuri uyu wa kane, yanivanye mu rubanza rwe mu 2021 kandi ntiyanaburanye mu bujurire.

Idamange yamenyekanye cyane hagati ya tariki 31 z'ukwa mbere na 15 z'ukwa kabiri 2021 ubwo yashyiraga kuri YouTube channel ye video umunani zitandukanye.

Yagiye gutabwa muri yombi amaze kumenywa na benshi kubera ibyo yatangazaga kuri channel ye ya YouTube.

Ubwo yakatirwaga gufungwa imyaka 15 umuryango Human Rights Watch wavuze ko urubanza rwe 'rusa nurwateguriwe gutera ubwoba uwo ari we wese utekereza kuvuga ibinenga, ibikomeye cyangwa ibitavugwaho rumwe.”

Uwari ahagarariye uwo muryango yavuze ko igihano Idamange yahawe “kizatuma Abanyarwanda bose bitonda mbere yo gukoresha uburenganzira bwabo bw'ibanze bwo gutanga igitekerezo”.

BBC

Source : https://umuryango.rw/amakuru/mu-rwanda/ubutabera/article/urukiko-rwongereye-igihano-cyahawe-yvonne-idamange

Umutoza wa Arsenal,Mikel Arteta ukomeje gukora ibitangaza yatangaje ko ikintu cyatumye ikipe ye yitwara neza uyu mwaka ari uubumwe no gufashanya biri hagati y'abakinnyi be.

Uyu munya Espagne ushaka guhagarika imyaka 19 ikipe ya Arsenal imaze idatwara shampiyona yavuze ko gufashanya kw'abakinnyi be kwabafashije gutsinda amakipe menshi muri uyu mwaka w'imikino.

Yabwiye Sky Sports ati “Dufite urwego ruri hejuru rwo guhatana no gufashanya kuko abakinnyi banjye baba bashaka cyane gufashanya no guterana akanyabugabo ndetse no gufasha ikipe kugera ku rwego twifuza.

Ibanga nta rindi n'ubumwe no gushyira hamwe kuri hagati mu bakinnyi.

Bakunda kumarana igihe,bakunda gukinana,bakunda gukinira imbere y'abafana bacu,banifitemo uwo mwuka wo kumva ko ikipe ari iyabo.Icyo kirakomeye ndakeka.”

Hari igihe cyageze Arsenal icika intege nyuma yo gutsindwa na Man City ibitego 3-1 ariko yarongeye iragaruka ubu iri ku mwanya wa mbere aho irusha uyu mukeba amanota umunani nubwo iyiri imbere umukino umwe.

Arsenal isigaje imikino 10 igoye kugira ngo irebe ko yakwegukana igikombe cya shampiyona imaze imyaka 19 itegereje.

Kuri uyu wa Gatandatu ifite umukino na Leeds kuri Emirates aho izahita isura Liverpool itayorohera.

Source : https://umuryango.rw/imyidagaduro/imikino/article/mikel-arteta-yamenye-ibanga-rikomeye-ryafashije-arsenal-kwitwara-neza-muri-uyu

Perezida Paul Kagame yavuze ko uburere ari ipfundo rikomeye mu kugira urubyiruko rufite akamaro muri iki gihe ndetse no mu bihe biri imbere.

Ibi umukuru w'Igihugu yabigarutseho kuri uyu wa Kane tariki 30 Werurwe 2023, ubwo yakiraga indahiro ya Minisitiri w'Urubyiruko, Dr Utumatwishima Jean Nepo Abdallah.

Nyuma yo kwakira indahiro, Perezida Kagame, yibukije Minisitiri mushya w'urubyiruko ko asanze abandi mu nshingano zitandukanye ariko icyangombwa ari kuzuza inshingano za buri wese kandi ko  gufatanya no kuzuzanya  ari  ingenzi.

Umukuru w'Igihugu yashimangiye ko uburere ari inshingiro ry'ejo heza h'urubyiruko cyane ko ari rwo hazaza ha buri gihugu.

Yagize ati 'Urubyiruko niho hazaza h'ejo ha buri gihugu na buri bantu abo aribo bose,  ntabwo tureba ejo hazaza gusa tureba n'uyu munsi. Urubyiruko bivuze  ko rukenerwa  mu gihe kiri imbere kurushaho ariko binavuze ko ibyo bishaka kurera, kurera iyo ufite abantu bato, iyo ufite abana kugira ngo bakure neza bazagire akamaro mu bihe biri imbere biterwa n'uburere wabahaye, uburere butandukanye.'

Umukuru w'igihugu yakomeje agira ati 'Uburere bw'imico, imyifatire, ubushobozi, niho havamo amashuri, niho havamo kugira ubuzima bwiza, uba umwubaka kugira ngo agire muri we gushobora ariko noneho bishingiye kuri za ndangagaciro ziba zikenewe mu bantu aho ariho hose.'

 Tariki 24 Werurwe 2023, nibwo Dr Utumatwishima Jean Nepo Abdallah yagizwe Minisitiri w'Urubyiruko asimbuye Rosemary Mbabazi wari kuri uyu mwanya guhera mu 2017.

The post <strong>Perezida Kagame asanga uburere ari ipfundo ryo kugira urubyiruko rufite akamaro</strong> appeared first on FLASH RADIO&TV.

Source : https://flash.rw/2023/03/30/perezida-kagame-asanga-uburere-ari-ipfundo-ryo-kugira-urubyiruko-rufite-akamaro/?utm_source=rss&utm_medium=rss&utm_campaign=perezida-kagame-asanga-uburere-ari-ipfundo-ryo-kugira-urubyiruko-rufite-akamaro

Idamange Iryamugwiza Yvonne yahamijwe ibyaha birimo guteza imvururu, gupfobya Jenoside, gutesha agaciro urwibutso rwa Jenoside, gutangaza amakuru y'ibuhuha hakoreshejwe ikoranabuhanga, gutanga sheki itazigamiye no kwigomeka ku buyobozi.

Muri Nzeri, yari yakatiwe gufungwa imyaka 15 no gutanga ihazabu ya miliyoni 2 Frw; gusa Ubushinjacyaha ntibwanyurwa n'icyo gihano burajurira.

Bwasobanuye ko urukiko rwakoze ikosa ryo kutagena ibihano ku cyaha cyo kwigomeka ku buyobozi n'icyo gutanga sheki itazigamiye, kandi ngo bigize impurirane mbonezabyaha.

Bwasobanuye ko yakabaye ahanishwa igihano cy'igifungo cy'imyaka 21 n'ihazabu ya miliyoni 8 Frw.

Ubushinjacyaha bwasabye ko igifungo cyakatiwe Idamange cyongerwaho imyaka itandatu

Ubushinjacyaha bwagaragaje ko Urukiko Rukuru rwakatiye Idamange imyaka 15 hagendewe ku mpurirane mbonezamugambi gusa, kandi rwaranamuhamije ibigize impurirane mbonezabyaha.

Bwagaragaje ko mu gihe habaye impurirane zombi muri dosiye, urukiko rukwiye kugena igihano hashingiwe ku biteganywa n'itegeko kuri buri mpurirane.

Icyemezo cy'urukiko cyasomwe kuri uyu wa Kane tariki ya 30 Werurwe 2023 n'inteko igizwe n'abacamanza batatu n'umwanditsi.

Urukiko rw'Ubujurire rwasanze ibyaha Idamange yakoze mu buryo bw'impurarane mbonezabyaha akwiye kubihanirwa akagenerwa igihano kuri buri cyaha.

Rusanga kandi bwa mbere atarigeze agenerwa ibihano ku byaha yakoze bigize impurirane mbonezabyaha bityo ko ibihano yahamijwe atigeze abihanirwa.

Rwagaragaje ko ku cyaha cyo kwigomeka ku buyobozi akwiye gufungwa amezi atandatu, gutanga sheki itazigamiye agafungwa imyaka ibiri n'ihazabu ya miliyoni 2 Frw.

Ni igihano kigomba kwiyongera ku bihano yahanishijwe mu Rukiko rukuru, bivuze ko agomba gufungwa imyaka 17 n'amezi atandatu n'ihazabu y'amafaranga miliyoni 4 Frw.

Idamange utarigeze agira icyo avuga ku bujurire bw'ubushinjacyaha kubera ko atitabye Urukiko rw'Ubujurire, uretse kuba yaraburanye ku ifunga n'ifungurwa ry'agateganyo ahandi hose urukiko rwagiye rusesengura ibyo yagiye avugira mu bugenzacyaha kuko yanze kuburana.

Igihano cy’imyaka 15 Idamange yari yarahawe, cyongereweho imyaka ibiri n’amezi atandatu

---

Source : http://igihe.com/amakuru/u-rwanda/article/idamange-yongerewe-igihano-azafungwa-imyaka-17-n-amezi-abiri

Abaganga bagaragaje ko Papa Francis w'imyaka 86 afite ibibazo by'ubuhumekero, akaba agomba kumara iminsi mike mu bitaro.

Umuvugizi wa Vatican, Matteo Bruni, yasohoye itangazo ati 'Mu minsi ishize, Papa Francis yagaragaje ko afite ibibazo byo guhumeka, maze nyuma ya saa sita ajyanwa kuri Policlinico A. Gemelli kugira ngo bamusuzume.'

'Isuzuma ryagaragaje ko afite ibibazo by'ubuhumekero bikeneye ko yitabwaho mu minsi mike ari mu bitaro.'

Mu butumwa yanditse kuri Twitter, Papa Francis yashimiye abakomeje kumwifuriza gukira vuba.

Ati 'Nakozwe ku mutima n'ubutumwa bwinshi nakiriye muri aya masaha, nkaba mbashimira uko mwakomeje kumba hafi no kwifatanya mu isengesho.'

Papa Francis aheruka gutangaza ko umunsi ubuzima bwe bwakomeje kumera nabi, azegura kuri izi nshingano. Yanavuze ko ubwo yatorwaga, ibaruwa yegura yahise ayitanga, ngo izakurikizwe n'aba atagifie ubushobozi.

I am touched by the many messages received in these hours and I express my gratitude for the closeness and prayer.

— Pope Francis (@Pontifex) March 30, 2023

Papa Francis ari mu bitaro nyuma yo kugira ububare mu gituza

---

Source : http://igihe.com/amakuru/u-rwanda/article/papa-francis-ari-mu-bitaro

Ibitaro bya Masaka byari bisanzwe ari iby'Akarere ka Kicukiro, byubatswe mu 2013, ku nkunga ya Leta y'u Bushinwa ari nayo igiye kubyagura aho bizahita bihindurirwa izina bikaba Ibitaro bya Kaminuza bya Kigali [CHUK].

Umuhango wo gushyira ibuye ry'ifatizo ku hagiye kwagurirwa ibi bitaro wabaye ku wa Kane tariki 30 Werurwe 2023.

Birimo kubakwa n'Ikigo cy'Abashinwa cya Shanghai Construction Group Co. Ltd.

Hashize amezi abiri kwagura ibi bitaro bitangiye nubwo ibikorwa nyir'izina byatangiye none. Bizuzura bitwaye miliyari 85 Frw, angana n'Ama-Yuan miliyoni 580.

Nibyuzura bizaba bifite ubushobozi bwo kwakira abarwayi 827, ni ukuvuga ibitanda abarwayi bashobora kuryamaho. CHUK ubu yakiraga abarwayi bagera kuri 400.

Igishushanyo mbonera cyabyo kigaragaza ko bizaba bifite inyubako eshatu z'abarwayi zubatse mu buryo bw'amagorofa harimo izigeretse inshuro eshanu. Bizaba bifite kandi inyubako zikorerwamo ubushakashatsi, izo kwigishirizamo n'izindi.

Mu 2025 nibwo biteganyijwe ko bizaba byuzuye.

Minisitiri w'Intebe w'u Rwanda, Dr Ngirente Edouard, yavuze ko ari ibitaro byitezweho gutanga serivisi ziri ku rwego rwo hejuru mu buvuzi ariko bikaba bizajya bitanga amahugurwa n'amasomo mu rwego rwo kugira abaganga n'abahanga bashoboye kandi mu gihe gito.

Ati 'Imbaraga nk'izi ziri gushyirwa mu yindi mishinga itandukanye mu kubaka ubushobozi bw'ibitaro by'icyitegererezo nk'ibyitiriwe Umwami Faisal, Ibitaro bya Kanombe n'ibindi.'

Imishinga iri muri aka gace kubatswemo ibitaro bya Masaka irimo Ibitaro bya IRCAD Africa bizajya byigisha kubaga indwara za kanseri zifata urwungano ngogozi no kwigisha abaganga kubaga bakoresheje 'Robot' cyangwa kubaga udafunguye ahantu hanini.

Hari kandi ibitaro bizajya bivura umutima by'umwihariko, hakaba n'indi mishinga myinshi iteganya kuzashyirwa muri aka gace kugira ngo bizafashe mu buvuzi n'ubushakashatsi.

Ni umusaruro w'umubano mwiza w'u Rwanda n'u Bushinwa

Mu 2017 Perezida Kagame yagiriye uruzinduko mu Bushingwa ndetse mu mwaka wakurikiyeho wa 2018, Perezida Xi Jinping w'u Bushinwa yari i Kigali.

Ambasaderi w'u Bushinwa mu Rwanda, Wang Xuekun, yavuze ko kuvugurura no kwagura Ibitaro bya Masaka ari umwe mu mishinga minini Perezida Kagame na Xi Jinping bemeranyije gufatanyamo mu 2018, ubwo Xi yasuraga u Rwanda.

Ati “Uyu mushinga ni igikorwa cy'indashyikirwa cy'ubufatanye hagati y'igihugu cyacu mu kubaka ibikorwaremezo mu rwego rw'ubuzima. Nibirangira kubakwa, Ibitaro bya Masaka bizaba ari byo binini, bizaba ari ibya mbere mu bitaro bya Kaminuza hano mu Rwanda.”

Mu 2011 nibwo hubatswe ibi bitaro bya Masaka nabwo ku nkunga y'u Bushinwa.

Kuva mu 1982, u Bushinwa bumaze kohereza mu Rwanda amatsinda 22 y'inzobere mu buvuzi [abaganga] zigera kuri 270 bagafasha ibitaro mu buvuzi.

Minisitiri w'Ubuzima, Dr Nsanzimana Sabin yavuze ko umusanzu w'u Bushinwa mu kubaka urwego rw'ubuzima ari ntagereranywa n'ubwo hari abandi bafatanyabikorwa batandukanye igihugu gifite.

Amafoto: Irakiza Yuhi Augustin

---

Source : http://igihe.com/amakuru/u-rwanda/article/umushinga-wa-miliyari-85-frw-wo-kwagura-ibitaro-chuk-izimukiramo-watangiye

Uwitwa NTAKOBATAGIZE François yasabye guhindura amazina mu buryo bwemewe n'amategeko akitwa NTAKO FRANCOIS mu bitabo by'irangamimerere.

Impamvu atanga zituma asaba guhindura amazina akaba ari uko ari amazina afite kuri Passport.

Source : https://umuryango.rw/amatangazo/article/itangazo-ntakobatagize-francois-yasabye-guhindura-amazina-akitwa-ntako-francois

Ikipe y'igihugu ya Benin yamaze kurega iy'u Rwanda muri CAF iyishinja gukinisha Muhire Kevin afite amakarita abiri yikurikiranya y'umuhondo mu mikino yo gushaka itike yo kwerekeza mu gikombe cya Afurika kizaba umwaka utaha.

Umutoza wa Bénin, Gernot Rohr, yabwiye abanyamakuru ko Ikipe ye yamaze gutanga ikirego muri CAF kubera Muhire Kevin wakinnye afite amakarita abiri y'umuhondo bitemewe.

Yagize ati “Reka ndebe kuko mfite [hano impapuro], hari nimero 11, Kevin Muhire wabonye ikarita y'umuhondo mu mukino ubanza ku munota wa 68, uwo mukinnyi kandi yayibonye ku munota 74 bakina na Sénégal.'

'Ni ukuvuga ngo CAF yaratuvanze cyane mbere y'uyu mukino, itujyana hirya no hino, ariko twabonye ko uyu mukinnyi wari ufite amakarita abiri y'umuhondo atigeze ahagarikwa.'

'Twamweretse Komiseri w'umukino, ndatekereza ko ubutabera bwa siporo bugena ko ahanwa. Muzi ibihano.'

Ku ruhande rw'Ikipe y'Igihugu Amavubi bavuga ko mbere yo guhura na Bénin mu mukino wo kwishyura i Kigali,CAF yabamenyesheje ko nta mukinnyi w'u Rwanda n'umwe ufite ikibazo uretse Hakim Sahabo wari wabonye ikarita itukura.

Itegeko rya 42 mu yagenga imikino y'Igikombe cya Afurika rigaruka ku bijyanye no guhagarikwa kw'abakinnyi kubera amakarita, rigena ko umukinnyi ubonye amakarita abiri yikurikiranya muri aya majonjora asiba umukino.

Icyakora mu gika cy'iri tegeko cya 10,CAF ivuga ko nubwo ibimenyesha amashyirahamwe bireba ariko na none kubimenya ari inshingano z'ishyirahamwe ku giti cyaryo.

Iryo tegeko rivuga ko niyo CAF itamenyesha Ishyirahamwe ko hari umukinnyi waryo utemerewe gukina,rigomba kugira amakenga,ntakoreshwe.Ibi niko byagenze ku Rwanda.

Ushinzwe ubuzima bwa buri munsi bw'ikipe [Team manager],niwe wandika amakarita abakinnyi babonye ndetse agatanga raporo ku mutoza ku myitwarire yabo.

Nubwo Muhire Kevin yabonye ikarita ya kabiri i Cotonou, raporo yatanzwe n'umusifuzi w'Umunya-Botswana Joshua Bondo muri CAF ku mugoroba wo ku wa 22 Werurwe ubwo umukino wari urangiye, igaragaza ko nta karita uyu mukinnyi w'u Rwanda yabonye.

Raporo ye yagombaga kwemezwa mu masaha 24, igaragaza ko u Rwanda rwahawe ikarita itukura, ku makarita abiri y'umuhondo yeretswe Hakim Sahabo ndetse n'indi y'umuhondo kuri Mugisha Gilbert.

Icyakora nubwo ariko iyi raporo imeze,mu mukino Muhire Kevin yahawe umuhondo nubwo utatangiwe raporo.

Umutoza wa Benin yavuze ko iki kibazo barezemo u Rwanda cyigeze kumubaho muri 2017 ubwo yatozaga Nigeria hanyuma Algeria bakinnye ibarega gukinisha umukinnyi ufite amakarita abiri y'umuhondo.

Nigeria ngo yireguye ivuga ko CAF itigeze ibibabwira muri raporo ariko ririya tegeko ribakoraho baterwa mpaga y'ibitego 3-0.

CAF niyo izaca urubanza ariko Benin ivuga ko ishobora no kuregera urundi rwego igihe CAF yakwanga guhana u Rwanda.

Source : https://umuryango.rw/imyidagaduro/imikino/article/hamenyekanye-itegeko-rizabiza-icyuya-u-rwanda-mu-kirego-cya-benin-kuri-muhire