Blog

Ni mu muhango wabaye kuri uyu wa Kane tariki 30 Werurwe 2023 muri Village Urugwiro, wayobowe na Perezida Kagame.

Umukuru w’Igihugu yabanje kwibutsa abayobozi gufatanya, kuzuzanya, gukorera hamwe, kuko ‘nta rwego rukora rwonyine’ ahubwo mu nshingano haba harimo ko inzego zikorana kuko ari bwo abantu batera imbere n’igihugu kigatera imbere.

Perezida Kagame yavuze ko n’iyo umuntu yaba atari asanzwe mu nzego za Leta akagera ku rwego rwa Minisitiri, ‘aba yumva uburemere bw’izo nshingano’ z’ubuyobozi zimutegereje.

Yavuze ko no kumva imikorere muri izo nshingano bidakwiye kuba bigoye, kuko ari umuco wumvikana aho ari ho hose, cyane cyane iyo bigeze ku gukorera inyungu rusange z’Igihugu.

Umukuru w’Igihugu, yavuze ko yizeye ko Minisitiri Utumatwishima Jean Nepo Abdallah yumva neza inshingano zimutegereje ‘kandi yumva n’inshingano yo kuyobora, gufasha Igihugu kuyobora urubyiruko mu buryo bundi nabwo bukwiye kumvikana ko burimo inshingano ziremereye cyane’.

Kagame yavuze ko urubyiruko ari ho ‘hazaza h’ejo ha buri gihugu’ ndetse n’abantu abo ari bo bose. Avuga ko hatarebwa ejo hazaza gusa ‘tureba n’uyu munsi’.

Yavuze ko urubyiruko rukenerwa ‘mu gihe kiri imbere kurushaho’ ari nayo mpamvu bisaba kubategura binyuze mu burere. Akomeza ati “Iyo ufite abantu bato, iyo ufite abana kugira ngo bakure neza bazagire akamaro mu bihe biri imbere biterwa n’uburere wabahaye, uburere butandukanye.”

'Uburere bw’imico; imyifatire, ubushobozi, niho havamo amashuri, niho havamo kugira ubuzima bwiza, uba umwubaka ngo agire muri we gushobora ariko noneho bishingiye kuri za ndangagaciro ziba zikenewe mu bantu aho ari ho hose.”

Umukuru w’Igihugu yasabye Minisitiri w’Urubyiruko Utumatwishima kuzuza inshingano ze, ashingiye ku bishya bigezweho ndetse n’ibiri mu burere.

Ati “Ndizera ko muzakora mushingiye ku bishya bigezweho ariko mutibagiwe iby’uburere butwigisha.”

Yavuze ko nta muntu uba utaranyuze mu myaka y’urubyiruko, kandi abahanyuze mbere ‘bafite byinshi bashobora kwigirwaho’. Yungamo ati “Ariko byose ni ugushyiraho umutima, abantu bakumva icyangombwa.”

Kagame yifurije imirimo myiza, ubufatanye n’abandi bafite indi mirimo bashinzwe bagomba kuzuzanya nawe, igihe nawe yuzuzanya nabo.

Mu butumwa aherutse kunyuza kuri konti ye ya Twitter, Utumatwishima yashimye Umukuru w'Igihugu wamugiriye icyizere, aho yavuze ati 'Ntewe ishema no kugirirwa icyizere na Nyakubahwa Paul Kagame, Perezida w'igihugu cyacu cy'u Rwanda; cyo kuyobora Minisiteri y'urubyiruko. Ndabashimiye cyane Nyakubahwa Perezida, mbizeza ko nzakorana umurava izi nshingano.'

Perezida Kagame yakiriye indahiro ya Minisitiri w’Urubyiruko, Dr Utumatwishima Jean Nepo Abdallah

Perezida Kagame yabwiye Minisitiri Utumatwishima ko afite inshingano zo kwita ku rubyiruko ashingiye ku bigezweho n'uburere 'batwigisha'

KANDA HANO UREBE UBWO PEREZIDA KAGAME YAKIRAGA INDAHIRO YA MINISITIRI UTUMATWISHIMA

“>

Ni igitaramo cyiswe “12 Hours of Praise & Worship”. Gifite insanganyamatsiko ivuga ngo “Gusana igicaniro cyo kuramya Imana mu mitima yacu”. Kizaba tariki 31 Werurwe 2023, kimare amasaha 12 kuva saa kumi n’ebyiri z’umugoroba kugeza saa kumi n’ebyiri za mu gitondo.

Iri joro ridasanzwe ryo kuramya Imana, ryatumiwemo amatsinda arimo Gisubizo Ministries, Asaph Kibagabaga, Kingdom of God Ministries, Asaph Gisozi na Asaph Rubirizi. Iki gitaramo kizabera mu Gatenga muri Zion Temple ari naho Asaph Music International ikorera umurimo w’Imana.

Asaph Music International yavutse mu iyerekwa rya Apostle Dr. Paul Gitwaza. Yanyuzemo abahanzi b’amazina akomeye hano mu Rwanda nka Aline Gahongayire, Aime Uwimana na Barnabas. Kanuma Damascene, Yvan Ngenzi ni bamwe mu baramyi bakomeye bababarizwa muri iri tsinda uyu munsi wa none.

Aline Gahongayire wafashijwe na Asaph gukuza ubuhanzi bwe, yatangaje ko iri tsinda rifite amavuta yo kuramya Imana. Ati: “Mbabwije ukuri, Asaph ni twe ba mbere ku isi dufite amavuta yo kuramya no guhimbaza Imana”. Ibi yabitangaje mu 2018 muri ‘Be Blessed’ yacaga kuri Televiziyo y’igihugu.

Asaph Music International yafashe ifoto y’urwibutso n’abanyamakuru

Pastor Nkubana Ernest Umushumba wa Asaph ku Isi hose, mu kiganiro n’abanyamakuru cyabaye kuwa Gatatu w’iki cyumweru kuri Home Free Hotel, yatangiye ashimira abanyamakuru ku bwo kwitanga kuko “umuntu kuguha umwanya we akaza mukaganira aba aguhaye ikintu cy’agaciro”.

Arakomeza ati “Tujya gutekereza guhura namwe, icyabiteye kimwe muri byo harimo no kubashimira. Ariko kandi harimo no gukomeza imikoranire myiza dusanzwe dufitanye namwe. Turashima Imana ikidukomeje gukora umurimo wayo.” 

Yavuze kandi ko bashimira Imana ku bw’igikorwa gikomeye cyo gukora Album imwe buri kwezi mu gihe cy’amezi 12. Ati “Turashima Imana ko mu mwaka wa 2019 igikorwa twagezeho ntekereza ko abamaze kukigeraho ari bacye, twakoze Album 12.”

Yanakomoje ku ndirimbo yabo nshya bise “Umunezero w’agakiza”, ashima Imana yabafashije kuyikora mu buryo bugezweho bwa ‘Live Recording’. 

Yavuze ko ari isengesho risaba Imana ngo ‘wa munezero twagize tugikizwa, bwa bubyutse bwa kera abantu bagisenga, bakiririmbira Imana, bagisoma ijambo ry’Imana, turashaka ko ubwo bubyutse bwongera kugaruka mu bakwemera bose”.

Avuga ko buri mezi 2 bazajya bashyira hanze indirimbo nshya kandi ikozwe mu buryo bwa Live Recording. Yatangaje ko “Asaph yamahagariwe kuramya Imana amasaha 24, ni ukuvuga ngo buri saha haba hari Mwene Asapha uba urimo kuramya. Ubu ngubu hari abari kuramya, ubwo buzima nibwo tubayemo.” 

Gentil Muvunyi Perezida wa Asaph Music International, yavuze ko batahagaritse igitaramo bakoraga cy’amasaha 24. Yakomeje avuga ko Barnabas atigeze abasezera, bivuze ko akiri uwabo. Ati “Ntabwo yigeze adusezera, kugeza ubu tumufata nk’umushumba wa Zion Temple, tumufata nk’umushumba wa Asaph, kandi turabimwubahira”.

Asaph Music International yateguye igitaramo cy’amasaha 12

Asaph Music International mu kiganiro n’itangazamakuru

Pastor Ernest Nkubana Umushumba wa Asaph ku Isi hose

Edith Nibakwe niwe wayoboye ikiganiro n’abanyamakuru

Issa Karinijabo yabajije impamvu Barnabas atakigaragara muri Asaph

Frederick Byumvuhore wa Gospeltime.org

Ev. Frodouard [Obededom] wa Paradise.rw

Ange Daniel wa Radio Umucyo

Joel Sengurebe wa Iyobokamana.rw

James Mugarura wa O Tv

Christian Abayisenga (hagati) wa Isibo Tv yavuze ko imikoranire ya Asaph n’abanyamakuru atari myiza

Asaph Music International yasobanuye birambuye igitaramo cy’amasaha 12 izakora kuri uyu wa Gatanu

REBA INDIRIMBO NSHYA YA ASAPH MUSIC INTERNATIONAL

Ni ubutumwa bwatangiwe mu bukangurambaga bumaze icyumweru bwo gukangurira Abanyarwanda kwita ku buzima bwo mu mutwe binyuze mu Mushinga witwa 'Baho Neza Twite ku Buzima bwo mu Mutwe', bwasorejwe mu Murenge wa Rweru mu Tugari twa Nkanga na Nemba mu Karere ka Bugesera ku wa 29 Werurwe 2023.

Mu itangizwa ry'uyu mushinga uzamara imyaka itatu, hahuguwe abiswe 'Abahumurizamutima', bahabwa inshingano zo kumenya amakuru y'abafite ibibazo by'ubuzima bwo mu mutwe mu duce batuyemo binyuze mu Itsinda 'Baho Neza', bakaganirizwa ku buryo basohoka muri ibyo bihe byangiza ubuzima bwabo bwo mu mutwe.

Muri abo bitabwaho harimo abarokotse Jenoside yakorewe Abatutsi, imiryango ibana mu makimbirane, abakoresha ibiyobyabwenge, abangavu batewe inda bakiri bato n'abandi.

Umukozi wa GAERG Ushinzwe guhuza Ibikorwa, Nyiribakwe Jean Paul, uri no mu batanze ibiganiro muri ubu bukangurambaga, yibukije abitabiriye ko bakwiye kwita ku budaheranwa.

Ati ''Igihe tugiye kwitegura kwibuka hagaragara abafite ibibazo byinshi. Biragaragara ko ihungabana ryatangiye kugaragara no mu bana bavutse nyuma ya Jenoside. Rero iyo tuje mu bukangurambaga tugerageza gusobanurira Abanyarwanda ko binjira mu bihe byo kwibuka, bahangana n'ubudaheranwa''.

Yasabye Abanyarwanda guhumurizanya hanitabwa ku barokotse Jenoside kuko bagorwa cyane no kunyura mu bihe byo kwikuka, bagafashwa kudaheranwa n'agahinda mu gihe bibuka amateka mabi yo kubura abo mu miryango yabo.

Ushinzwe Abahumurizamitima bo mu Kagari ka Nemba, Munyankindi Théoneste, ashimira ishyirwaho ry'uyu mushinga kuko abaganirijwe batanga ubuhamya bw'uko ubuzima bwabo bwahindutse bagatangira kwiyitaho no kubohoka mu marangamutima.

Niyonsaba Josiane avuga ko atarajya mu rubuga Baho Neza yari mu bwigunge, kuko yari yaraheranwe n'ibikomere byo kubura abe muri Jenoside yakorewe Abatutsi mu 1994.

Ati ''Nabaga nigunze, mfite abavandimwe ariko nkumva ndi njyenyine. Mu muryango nashatsemo numvaga ndi njyenyine ariko uyu munsi namaze kujya mu rubuga Baho Neza, nahuye na bagenzi banjye''.

GAERG iri gushyira mu bikorwa uyu mushinga ifatanyije na Imbuto Foundation n'Ikigo cy'Igihugu gishinzwe Ubuzima, RBC n'abandi bafatanyabikorwa.

Ubu bukangurambaga bwaberaga mu mirenge uyu mushinga watangijwe n'Umuryango Imbuto Foundation ukorerwamo mu Turere twa Gasabo na Bugesera ariko ukaba ukorera no mu tundi turere bigizwemo uruhare n'abandi bafatanyabikorwa.

Wahereye muri utu turere nyuma y'uko ubushakasatsi bwakozwe n'Ikigo cy'Igihugu Gishinzwe Ubuzima (RBC) mu 2018, bwagaragaje utwo turere ari two tuza ku isonga mu kugira abantu benshi bafite ibibazo by'ubuzima bwo mu mutwe bari mu ngeri zitandukanye.

Bwanagaragaje ko abaturarwanda 11,9% bafite indwara y'agahinda gakabije, naho 35% mu barokotse Jenoside yakorewe Abatutsi bafite iyi ndwara.

Ikindi ni uko umuntu umwe muri batanu afite ubwoko bumwe bw'uburwayi bwo mu mutwe cyangwa bwinshi. Ni mu gihe urubyiruko ruri hagati y'imyaka 14 na 18 rwagaragaje ko rufite ibibazo byo mu mutwe ku rwego rwa 10%.

Mu gihe u Rwanda rwitegura kwibuka ku nshuro ya 29, Jenoside yakorewe Abatutsi mu 1994, Ikigo cy'Igihugu cy'Ubuzima (RBC), gisaba Abanyarwanda guhumuriza uwagaragayeho ihungabana mu gihe cyo kwibuka Jenoside yakorewe Abatutsi.

Ibimenyetso by'ihungabana

Uwagize ihungabana arangwa no kugira amarangamutima hamwe n'imyifatire idasanzwe, birimo kurira ku rugero rwo hejuru, guhumeka insigane, kutabasha gutuza, gutaka, gushaka guhunga no kwiruka asa n'uhunga abashaka kumwica.

Ubufasha buhabwa uwahungabanye

Kugira ngo uhe ubufasha umuntu wagaragaweho n'ibimenyetso tuvuze haruguru, usabwa kumushyira ahantu hatuje, kumuba hafi, kumuhumuriza, kumufasha kugaruka mu gihe turimo no kumutega amatwi ariko wirinda kumuhatira kukubwira amateka yamuhungabanyije.

Igihe ibimenyetso bimugaragaraho bikomeje, ihutire kumujyana ku ivuriro riri hafi cyangwa uhamagare ku 114 ku buntu, uhabwe ubufasha.

Mu mahugurwa yabo 'Abahumurizamutima' bahabwa inshingano zo kumenya amakuru y'abafite ibibazo by'ubuzima bwo mu mutwe mu duce batuyemo

Abagore baretse gucuruza isambaza mu buryo bwa magendu bavuga ko bamwe mu bakora muri ubwo buryo bashukwa n'abarobyi bikabaviramo gusambanywa.

Umwe muri bo yabwiye IGIHE ko mbere bagicuruza isambaza mu buryo bwa kinyeshyamba bajyaga kuzirangurira mu bihuru, umugore udafite amafaranga yo kuranguza, abarobyi bakamuha iz'ubuntu ariko babanje kumusambanya.

Ati 'Mbere ya 2017, inda zagiye zivuka hagati yacu n'abarobyi zari nyinshi. Ni ibintu byari byaratubase kandi byatugizeho n'ingaruka'.

Mugenzi we avuga ko abagore bacuruza isambaza kinyeshyamba na bo ari ba rushimusi kuko babyukaga ijoro bakajya guhurira n'abarobyi mu bihuru no kubacungira kugira ngo inzego z'umutekano n'iz'ubuyobozi zitabafata.

Ati 'Twari tubayeho nabi, abana bacu bagahurira n'abo barobyi mu bihuru kugira ngo babeho, bagatwara inda ariko ubu nta mwana wacu ugitwara inda aho twagereye mu iterambere'.

Akomeza avuga ko igihe yamaze akorana na barushimusi b'isambaza akazicuruza kinyeshyamba ntacyo byamumariye uretse kumutesha agaciro.

Ati 'Twarabikoraga n'inzego z'ubuyobozi zaza tukiruka tukazihunga. Iyo twabonaga inzego z'ubuyobozi zije twaryaga akara ba rushimusi bagahunga. Mu gihuru ni ho twaranguriraga.'

Sibomana Jean Bosco, Umuhuzabikorwa wa Kibuye Fishing Project, ikusanya ikanacuruza umusaruro w'abarobyi bo mu Karere ka Karongi, igice cya Rutsiro n'icya Nyamasheke, yabwiye IGIHE ko ubu busambanyi budakorwa na ba rushimusi b'isambaza gusa ko ahubwo n'abarobyi bakora mu buryo buzwi na bo bashukisha abagore isambaza.

Ati 'Abashyana (abarobyi bakorera abandi) hari umusaruro w'isambaza biba ba shebuja hakaba n'uwo ba shebuja babagenera wo kubatunga. Izo bakaziha abo bagore na bo bakabitura kubacumbikira […].'

Uyu mugabo umaze imyaka irenga 25 mu burobyi n'ubucuruzi bw'isambaza avuga ko ubu busambanyi butizwa umurindi no kuba abashyana benshi bakorera kure y'ingo zabo.

Ati 'Hakenewe ubukangurambaga bwimbitse bwo gushishikariza abo bagore by'umwihariko abibana kwirinda indwara zifata mu myanya ndangagitsina no kuboneza urubyaro kuko hari abana benshi bavuka muri izo nzira ndetse n'ubwandu bwa virus itera SIDA bukaba buri hejuru.'

Inama z'abagore bigobotoye izi ngeso

Biturutse ku nama z'ubuyobozi n'imiryango itari iya Leta, hari abagore baretse gucuruza isambaza mu buryo bwa magendu bashinga koperative.

Iyo bagereranyije ubuzima barimo nyuma yo kwibumbira mu makoperative n'ubwo babagamo mbere basanga barisubije agaciro, bagasaba abagore bakiri muri izo ngeso kubireka na bo bagakorera hamwe.

Umwe muri bo yabwiye IGIHE ko mbere bagicuruza kinyeshyamba bakoraga bihishahisha babona ubuyobozi bakiruka ariko ubu bafite aho bakorera hazwi ndetse bageze ku rwego rwo kohereza umusaruro w'isambaza mu bihugu by'amahanga.

Ati 'Mu minsi 21 yo kuroba, buri munsi duteranya ibihumbi 50 Frw tukayaha umwe muri twe. Ejo tukayaha undi kugira ngo tuzamure igishoro.'

Mugenzi we avuga ko kuri ubu buri munsi yunguka amafaranga atari munsi y'ibihumbi bitanu.

Ati 'Ubu twisubije agaciro, abarobyi badushukishaga isambaza uyu munsi dufite amafaranga aruta ayabo, twubatse inzu zigezweho. Inama nagira abagore bagicuruza isambaza mu buryo bwa magendu n'abarobyi bahimuta isambaza ni uko babireka na bo bakajya mu makoperative.'

Umuyobozi w'Akarere ka Rutsiro, Murekatete Triphose, yavuze ko abagore bavuye mu burobyi n'ubucuruzi bw'isambaza bidakurikije amategeko ubu bari kwiteza imbere, asaba abakirimo kubivamo.

Ati “Icyo twasaba ababa bakirimo ni uko babivamo kuko ni ukwangiza, byangiza umusaruro bigatuma uwagombaga kuboneka ufitiye akamaro abantu benshi utaboneka. Ubwo rero twabagira inama yo kwegereza bagenzi babo bakajya mu matsinda bakajya mu makoperative, bagakora ubucuruzi bwemewe noneho bakareka kwangisha abo bana b'isambaza kuko uriya musaruro w'isambaza twese udufitiye akamaro mu karere no mu gihugu”.

Abarobyi bashukisha abagore kubaha isambaza bakabasambanya