Blog

Abakobwa benshi batarashyingirwa bigaragara ko barimo gukururwa n'abagabo bubatse, kandi babigambiriye kubashaka babareshya.

Kubireba, mu gihe cyiminsi irenga irindwi ku mpuguke mu by'imibanire uzwi cyane, mu nkuru za Joro Olumofin kuri Instagram hashize amezi macye, hari raporo na raporo zasohotse, konti z'abantu ku giti cyabo zishimangira ibi bikorwa no kwerekana uburyo bisa nkaho ari 'intego'. ku bakobwa bato, bakiri abaseribateri, kujya mu rukundo n'abagabo bubatse bitandukanye no gukundana n'umuntu utarashaka ukiri muto nkabo.

Kuki abagore b'abaseribateri bakundana n'abagabo bubatse

Impamvu ya mbere igaragara ituma iyi mibanire isa nkaho itera imbere mu buryo bwumvikana igomba kuba ku bw'inyungu zamafaranga zijyanye n'ibi bibazo by'urukundo.

Umukoresha wa Instagram asangiza ubunararibonye bwe ku rukuta rwa Instagram rwa Joro mu gihe cyavuzwe haruguru. Kuba ingaragu kandi adashobora kubona abakobwa abo aribo bose nubwo yagerageje inshuro nyinshi, rimwe yabonye impeta nuko ayishyira ku rutoki rwe. Kimwe n'ubumaji, kuva icyo gihe abakobwa baramwegereye ndetse batangira no kumwemerera imibonano mpuzabitsina bihendutse nk'uko wabitekereza. Uyu musore atarivuze amazina yagize ati:

'…Iyo mpeta y'ubukwe isobanura intsinzi n'umutekano abo bakobwa bo muri Nigeria b'abanebwe bakunda.'

Aha niba uyu musore yarabaye inyangamugayo 100% avugisha ukuri, n'ikindi kintu wakwibaza.

Gusa ikigaragara hano, ku bagore benshi bakundana nkana n'abagabo bubatse, nuko abasore bo mu myaka yabo baba batarashobora kugera ku rwego rwo kwihagararaho bityo bikabagora kuba bakuzuza ibyo basabwa kugirango babone uko bashimisha abo bakobwa.

Ariko tekereza neza, ninde ufite ibirenze bihagije bishobora gutera inkunga ingendo, imyenda ihenze cyane nibindi bice byose by'ubuzima bwiza abo bakobwa baba bashaka? Gukenera rero kubaho ubuzima buhenze utitaye ku bukungu buke ni imwe mu mpamvu zibitera.

Indi mpamvu yabyo ishobora kuba ubwigenge; kwidegembya kwishimira ibinezeza by'imibonano mpuzabitsina n'ibindi byose binezeza umubano ariko bitagusabye kuba mu bucuti.

Dairo, umufotozi i Lagos agira ati: 'Nzi uruhinja rukundana n'umugabo washatse kubera igitsina gusa.'

Avuga ko adashaka kwizirika ku bakunzi basanzwe n'ibyo bikunze kuzana. Arashaka gukomeza ibirori no kubaho nkuko abona bikwiye kandi bidahinduka kandi atiriwe yunama kugirango yakire umusore runaka mubuzima bwe, ati:

Barahura, bagakora urukundo, bagatemberana gato, bayobya hirya no hino, baseka; nyuma yaho umugabo wubatse asubira mu rugo mu muryango we, maze umukobwa nawe agasubira mu buzima bwe akunda bwo kuba umuseribateri.

Ntekereza ko, nka we, abakobwa benshi bifuza inyungu zombi zo kuba mu rukundo n'ubwigenge; ikintu gishobora kugorana n'umukunzi cyangwa undi musore umwe rukumbi ushobora gutangira kugotwa n'ibyiyumvo nyuma y'igihe gito muzaba mumaze gukora urukundo.

Ugereranyije, kutabiyumvamo cyane abagabo benshi bubatse bakunze kugira kuri abo bakobwa bo kuruhande birabatunganira cyane kandi bituma bagira ubwo bwigenge Dairo avuga.

Ayo, umukunzi wishimisha, we avuga ko hariho imyizerere mu bagore ko abagabo bubatse, kubera uburambe, bazi gufata abagore neza. Kubandi bakobwa bamwe, iyi niyo ngingo ibakurura mu gukunda abagabo bubatse..

Kuba yarabanye n'umugore wubatse igihe kitari gito, kandi kuba umugabo urengeje imyaka mirongo itatu n'ukuze cyane byamushoboza kuba afite ubukungu akana n'inararibonye cyane mu kwita ku bagore n'umubiri wabo neza bakishima cyane.

Gukundana n'abagabo bubatse ni bibi

Impamvu zo gukundana n'abashyingiranywe, nubwo zakumvikana gute kubazemera ziracyariho, ariko ntizihagije na mba kugirango zibe zakwemeza umuco wo gukundana n'umugabo w'undi. Kandi na none ntibishobora kuba nk'urwitwazo ku bagabo bubatse bashaka guca inyuma abagore babo,

Bamwe bashobora kuvuga ko karma izagaragara ku muryango wawe nyuma mu buzima, ariko niba ikora cyangwa itabikora n'ikintu 50-50. Hagati aho naho, rwana n'intambara y'umutimanama wawe.

Source : https://umuryango.rw/ubuzima-115/udushya/article/reba-impamvu-bamwe-mu-bakobwa-batanga-zituma-basigaye-bikundanira-n-abagabo-70408

Rutahizamu wa Chelsea,Pierre-Emerick Aubameyang yatumye benshi bamwibazaho nyuma yo kugaragaza ko yishimiye kwirukanwa k'umutoza we,Graham Potter batakoranye neza.

Nyuma yo kwirukanwa kwa Graham Potter,Aubameyang yagaragaje ko yishimiye icyo cyemezo ubwo yakandaga like akunda] ku butumwa butangaza kugenda kwe.

Uyu rutahizamu ntabwo yakunzwe na Potter kandi yabuze burundu mu mikino ya Chelsea iheruka.

Aubameyang aheruka kugaragara mu kibuga mu mukino iyi kipe yatsinzwe na Tottenham ibitego 2-0 muri Gashyantare ndetse yabanje mu kibuga mu mikino ine gusa ya Premier League atozwa na Potter.

Yaguzwe n'uwahoze ari umutoza wa Chelsea, Thomas Tuchel gusa ntabwo yigeze ahuza rwose na gahunda za Potter.

Ubwo Chelsea yatangazaga ko uyu mugabo w'imyaka 47 yirukanwe mu butumwa bwo kuri Instagram, Aubameyang 'yakunze' iyi nyandiko.

Aubameyang yababajwe no kubura umwanya mu byumweru bishize, birimo no gukurwa mu ikipe ya Chelsea izakina Champions League.

Aubameyang w'imyaka 33,yakuwe mu ikipe mu mikino ya Leicester, Everton na Aston Villa nyuma yo gutsinda igitego kimwe muri Premier League.

Abantu benshi babonye Aubameyang akunze ubu butumwa babigira ikiganiro ku mbuga nkoranyambaga bemeza ko uyu mukinnyi yishimiye kugenda kwa Potter.

Aubameyang yakunze ubutumwa bwa Chelsea bwirukana Potter

Source : https://umuryango.rw/imyidagaduro/imikino/article/aubameyang-yakoze-agashya-nyuma-yo-kwirukanwa-k-umutoza-we-utaramukunze

Abagore 13 bari barahamijwe icyaha cyo gukuramo inda bari bafungiwe muri gereza ya Nyarugenge, Ngoma Musanze na Nyamagabe nibo bahawe imbabazi bahawe imbabazi na Perezida Kagame.

Mu mpera z'ukwezi gushize umukuru w'Igihugu yari aherutse no kubabarira Paul Rusesabagina na bagenzi be bari barahamijwe ibyaha by'iterabwoba.

N'ubwo mu itegeko riteganya ibyaha n'ibihano muri rusange ryasohotse mu 2018 no mu iteka rya Minisitiri w'Ubuzima rya 2019, gukuramo inda ntibyemewe, gusa harimo ingingo iteganya ukutaryozwa mu mategeko icyaha cyo gukuramo inda.

N'ubwo itegeko rigena ibyaha n'ibihano muri rusange rivuga ko Nta buryozwacyaha bubaho iyo gukuramo inda byakozwe kubera impamvu :

1º Kuba utwite ari umwana.

2º Kuba uwakuriwemo inda yarakoreshejwe imibonano mpuzabitsina ku gahato.

3º Kuba uwakuriwemo inda yarayitwaye nyuma yo kubanishwa n'undi nk'umugore n'umugabo ku gahato.

4º Kuba uwakuriwemo inda yaratewe inda n'uwo bafitanye isano ya hafi kugera ku gisanira cya kabiri.

5º Kuba inda ibangamiye ubuzima bw'utwite cyangwa ubw'umwana atwite.

Hari abagore n'abakobwa bagifungwa bahamijwe icyaha cyo gukuramo inda bityo hakaba hari imiryango iharanira uburenganzira bwa muntu n'uburenganzira bw'abagore n'abana by'umwihariko ibasabira koroherezwa kuko bishoboka ko baba bakuyemo inda bitari amahitamo yabo.

Perezida wa repubulika atanga imbabazi buri mwaka ahanini ziba zigizwe n'abana baba bafunzwe ariko baratsinze ibizamini bya Leta ndetse n'abagore baba barakuyemo inda n'abandi baba barahamijwe ibyaha bitandukanye barasabye imbabazi.

@Intego

Source : https://umuryango.rw/amakuru/mu-rwanda/ubutabera/article/perezida-kagame-yongeye-gutanga-imbabazi-kubandi-bagororwa

Umukinnyi wa Arsenal, OIeksandr Zinchenko, yavuze ko uburyo yasabye umugore we ko bazashyingiranwa bwari bubi cyane ku buryo ntawe yakwifuza ko yamwigana.

Uyu mukinnyi w'inyuma ku ruhande rw'ibumoso, washakanye n'umunyamakuru wa TV Vlada mu 2020, yemera ko uko yabigenje ngo asabe umukunzi we kuzamubera umugore ari bubi cyane kandi ko azabyicuza ubuzima bwe bwose.

Aganira na www.FootballersLives.tv, Zinchenko yagize ati: “Uburyo namusabye ko yazambera umugore nibwo buryo bubi cyane kuruta ubundi bwose, – ntibishoboka, biteye isoni.”

Nkuko tubizi Vlada yavuze yego, nubwo bitigeze bishidikanywaho na Zinchenko nubwo ngo yabikoze saa kumi za mu gitondo yambaye akenda k'imbere.

Uyu mugabo w'imyaka 26 yagize ati: “Nibyo koko yarabyemeye.Mbere ya byose kuko ndi Brad Pitt w'umunya Ukraine kandi nari nambaye akenda k'imbere -mfite umubiri utangaje.”

Yongeyeho ati: 'Mvugishije ukuri nzahora nicuza ubuzima bwanjye bwose uburyo nasabye umukunzi wanjye ko tubana- ikintu kibi cyane kuruta ibindi byose – biteye ubwoba.

“twari twakinnye na Portugal mu rugo, dushaka kwerekeza muri Euro. Nari niteguye kumusaba ko twazabana. Nari nzi ko Vlada arakora kuri uriya mukino.

Nashakaga gusaba shebuja ngo aze muhe ikiganiro kandi nashakaga kumwambikira impeta mu kiganiro. Iki gitekerezo cyari cyiza – twatsinze umukino 2-1. Impeta yanjye yari mu mufuka wanjye kandi nashakaga kubikora.

“Ariko kuva nkiri muto, nari nzi ko mbere yo gusaba umukunzi wawe ko mwazabana ugomba gusaba uruhushya ababyeyi be. Atari kuri terefone, ahubwo imbonankubone.

Kubona umwanya byari bigoye cyane. Nari ngiye kubaza umutoza niba nshobora kuva mu ikipe kubera ibibazo byanjye bwite nkagaruka nyuma y'amasaha atanu. Sinashoboraga kubikora, sinashakaga kubikora mbere, mbere yuko nsaba uruhushya.

Nyuma y'ibi, nabikoze muri iryo joro ahagana mu ma saa kumi za mu gitondo, cyangwa saa cyenda za mu gitondo mu nzu ye, nambaye akenda k'imbere gusa, hafi no kwambara ubusa.

Ndashaka guha inama buri wese uteganya gusaba umukunzi kurushinga, nyamuneka ntuzabikore nkuko nabikoze. Icyo gihe nabaye nk'umusazi nyuma y'aho. Nagiye hanze gutembera,mugurira indabo nyinshi muri icyo gitondo.

Aba bashakanye batangiye gukundana muri 2019, Zinchenko ndetse asoma Vlada ari kuganira nawe kuri TV.

Ubu bafitanye umwana umwe.

Source : https://umuryango.rw/imyidagaduro/imikino/article/zinchenko-yahishuye-ukuntu-yicuza-uburyo-yakoresheje-yambika-impeta-umukunzi-we

1. Ese waba ufite umwanya w'urukundo mu buzima bwawe ?

Hari abantu bajya aho ibintu biberekeje hose bakajya mu bintu byose ubuzima bubajyanyemo ukuyemo kuba yajya mu rukundo.

Iki kibazo kizagufasha kumenya uko ukwiye kwitwara kuri uwo muntu biguhe n'umurongo wagenderamo umutereta.

2. Ese wifuza kubyara abana ?

Kubyara no kurera abana si ibya buri wese, bamwe babifata nk'impano. Niba wowe wifuza kubyara abana uwo wifuza gutereta akaba adashaka abana ndetse adakozwa ibyo kubyara, nimukundana bikagera kure bizarangira umubano wanyu ujemo agatotsi.

Hari igihe wasanga nta gahunda yo kubyara abana afite ashaka ko mukundana gusa, akaba kuri we yumva igihe cyo kubyara kitaragera.

3. Gushyingiranwa ubifata gute ?

Gushyingiranwa imbere y'Imana n'amategeko hari ababifata nk'ikintu cya ngombwa cyane, gusa uyu munsi hari n'abatabyemera na gato.Ni byiza kumenya niba umuntu wifuza ko yakubera umukunzi yemera imihango y'abashyingiranwa.

4. Ese ufitanye umubano mwiza n'ababyeyi bawe ?

Mbere yo gukundana n'umuntu muhuye bwa mbere, uzamenye ko uburyo afata ababyeyi be nawe niko azagufata nimumara kubana.

Niba uwo muntu abana n'ababyeyi be neza kandi abitaho, nawe azakwitaho kandi agufate neza, gusa niba atita ku babyeyi be, hari ibyago byinshi ko nawe atazakwitaho.

5. Ukunda akazi ?

Benshi muri twe tumara umwanya munini cyane mu kazi ka buri munsi, Ni byiza ko mbere yo gukundana n'umuntu umenya niba ari umuntu ukunda gukora cyane ndetse ukitegura kwihanganira kuzajya uhabwa akanya gato ko kubana nawe kuko umwanya munini awumara mu kazi ke.

6. Ese waba uteganyiriza amasaziro yawe ?

Nibyiza kubaza umuntu wifuza gukundana nawe inzozi afitiye ubuzima bwe bwo mu masaziro ndetse ukamubaza niba hari icyo yahateganyirije.

Source : https://umuryango.rw/imyidagaduro/article/dore-ibibazo-ukwiye-kubaza-umuntu-wifuza-ko-yakubera-umukunzi-w-ubuzima-bwawe

Aya mabwiriza yasohotse kuri uyu wa Mbere tariki 3 Mata 2023, agaragaza ko insanganyamatsiko yo kwibuka izakomeza kuba 'Kwibuka twiyubaka'.

Akomeza avuga ko icyumweru cy'icyunamo kizatangirizwa ku Urwibutso rwa Kigali ku Gisozi ku itariki ya 7 Mata 2023, ni mu gihe mu Turere: Icyunamo kizatangirizwa ku Urwibutso rw'Akarere.

Kuri uwo munsi, kuva saa tatu za mu gitondo hose mu midugudu abaturage bazahabwa ikiganiro kijyanye no kwibuka Jenoside yakorewe Abatutsi, bisozwe no gukurikirana ubutumwa nyamukuru bw'uwo munsi. Abaturage bose basabwe kwitabira icyo gikorwa. Nibirangira, abaturage bazasubira mu mirimo yabo uko bisanzwe. Kuri uwo munsi, nta rugendo rwo Kwibuka ruteganyijwe.

Kuva tariki ya 8 Kugeza 12 Mata 2023 ni icyumweru cy'icyunamo giteganyijwemo ibikorwa byo kwibuka ahantu hatandukanye mu gihugu ku matariki Abatutsi biciweho, ibigenewe Abahagarariye ibihugu byabo n'Imiryango Mpuzamahanga mu Rwanda, ibiganiro bihuza urubyiruko, abanyamakuru n'ibindi byiciro.

Aya mabwiriza avuga ko ibikorwa by'ubucuruzi, siporo z'abantu ku giti cyabo n'indi mirimo itunze abantu n'ibyara inyungu izakomeza mu cyumweru cy'icyunamo.

Avuga ko nta biganiro biteganyijwe mu midugudu nyuma ya saa sita hagati ya tariki 8 Mata na 12 Mata 2023. Kandi mu cyumweru cy'icyunamo ibendera rirururutswa rikagezwa hagati.

Ku Rwego rw'Igihugu, icyunamo cyizasozwa tariki ya 13 Mata 2023 ku Rwibutso rwa Rebero, hibukwa abanyapolitike bishwe bazira kurwanya Jenoside n'ingengabitekerezo yayo.

Mu Turere, ubuyobozi bwako bufatanyije n'izindi nzego bazagena aho icyumweru cy'icyunamo gisorezwa.

Iri tangazo kandi rigaragaza ibikorwa bibujijwe mu cyumweru cy'icyunamo birimo:

Ibirori by'ibyishimo bihuza imbaga y'abantu; ubukwe n'imihango ijyanye nabwo, amarushanwa uretse siporo zikorwa n'abantu ku giti cyabo;

Umuziki utajyanye no Kwibuka haba mu tubari, aho bafatira amafunguro, aho batunganyiriza imisatsi (salon de coiffure), aho batunganyiriza umuziki (studio) n'ahandi hantu hahurira abantu benshi nk'aho abantu bategera imodoka, n'ahandi.

Ibindi bikorwa bitemewe harimo Imikino y'amahirwe; kwerekana imipira, ibitaramo mu tubyiniro, utubari, iby'urwenya, iby'indirimbo, iby'imbyino, sinema, n'ikinamico ritajyanye no Kwibuka.

Ibikorwa byo kwibuka bizakomeza mu minsi ijana kugeza tariki ya 3 Nyakanga 2023, birimo gushyingura imibiri yabonetse cyangwa iyimurwa muri gahunda yo guhuza inzibutso yumvikanyweho n'Uturere.

Muri aya mabwiriza kandi bavugamo ko 'igikorwa cyo kwibuka Jenoside yakorewe Abatutsi ntikirenza amasaha atatu (3), kandi kigomba gukurikirana kuri ubu buryo:

Kumenyesha gahunda; gufata umunota wo Kwibuka, Isengesho ry'uhagarariye amadini ku babyifuza, Ijambo ry'ikaze, Ikiganiro kijyanye no Kwibuka Jenoside yakorewe Abatutsi; 

Ubuhamya kuri Jenoside yakorewe Abatutsi; ubutumwa bw'Umuryango IBUKA, ubutumwa bw'uhagarariye abashyinguye ababo igihe igikorwa cyo Kwibuka cyahujwe no gushyingura imibiri yabonetse, kwimura imibiri ivanywe ahandi izanwa mu rwibutso cyangwa habaye igikorwa cyo guhuza inzibutso, Ubutumwa bw'umushyitsi mukuru.

Hagati y'ibi bikorwa hashobora gushyirwamo umuvugo n'indirimbo bifasha Kwibuka Jenoside yakorewe Abatutsi.

Guhabwa ikiganiro no Kwibuka Jenoside yakorewe Abatutsi muri za Minisiteri, Uturere, mu bigo bya Leta, iby'abikorera, imiryango ishingiye ku myemerere, amashyirahamwe no mu zindi nzego z'ubuyobozi, bizakorwa ku munsi batoranyije mu gihe cy'iminsi yo kwibuka hagati ya tariki 8 mata na 3 nyakanga 2023.

Mu ngingo ya munani y'aya mabwiriza, bavugamo ko ibigo by'amashuri bizateganya umunsi wihariye wo Kwibuka no guhabwa ikiganiro mu gihe abanyeshuri bazaba bagarutse ku mashuri no ku bigo byabo bavuye mu biruhuko.

Muri aya mabwiriza yashyizweho umukono na Minisitiri, Dr Bizimana Jean Damascene, banavugamo ko mu gikorwa cyo Kwibuka Jenoside yakorewe Abatutsi, nta busumbane bugomba kuba mu madini.

Misa n'amateraniro ntibishyirwa muri icyo gikorwa kuko abitabira Kwibuka Jenoside yakorewe Abatutsi atari abayoboke b'idini rimwe. Ariko mu gihe igikorwa cyo kwibuka Jenoside yakorewe Abatutsi cyateguwe n'idini, itorero cyangwa ibigo by'abihaye Imana byemewe n'amategeko, hagamijwe Kwibuka abayoboke babo cyangwa abanyamuryango babo bishwe muri Jenoside yakorewe Abatutsi, icyo gihe abateguye icyo gikorwa babikora bakurikije uko imyemerere yabo iteye, hakubahirizwa ibiteganywa n'amategeko n'amabwiriza.

Umugoroba w'ikiriyo ubanziriza umunsi wo Kwibuka cyangwa gushyingura imibiri y'abazize Jenoside yakorewe Abatutsi uremewe, ariko usozwa bitarenze saa yine z'ijoro, mu rwego rwo kubungabunga ubuzima n'umutekano w'abantu.

Mu gihe hateguwe urugendo rwo kwibuka, rukorwa mu ituze bikamenyeshwa mu nyandiko ubuyobozi, inzego z'umutekano n'iz'ubuzima byibura iminsi itanu (5) mbere y'igikorwa, zikagena uburyo urugendo rwo kwibuka rwakorwa bitabangamiye uruva n'urujya rw'abantu n'ibintu.

Amabwiririza agena uko ibirango byo Kwibuka bikorwa ari kuri www.kwibuka.rw hari n'ibirango byo Kwibuka byemejwe bigomba gukoreshwa. Aya mabwiriza avuga ko 'nta muntu n'umwe wemerewe kunyuranya n'aya mabwiriza mu gukora ibirango byo Kwibuka.'

Mu rwego rw'isuku rusange no kubungabunga ibidukikije, inzego zose zirakangurirwa gukoresha ibyapa (bill board), screen, teardrops, pull up banner cyangwa agasanduku kabugenewe (branded box), nk'uko bigaragara mu birango byatanzwe, bigashyirwa aho abagana urwego bakirirwa (reception) cyangwa ahandi hagaragarira buri wese.

Ibigo by'amashuri n'ibiro by'utugari bizamanika amakarita (Posters) nk'uko bigaragara mu birango byatanzwe byibutsa itegurwa n'ishyirwa mu bikorwa rya Jenoside yakorewe Abatutsi, n'uburyo bwo gufasha uwahungabanye. Aya makarita azamanikwa ahantu hagera abantu benshi, kandi mu buryo atangirika.

Kanda hano usome birambuye aya mabwiriza: 

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascéne

Source : https://inyarwanda.com/inkuru/127753/kwibuka29-hatangajwe-amabwiriza-azakurikizwa-nibikorwa-bibujijwe-127753.html

Mu itangwa ry'ibi bihembo ryabaye ku wa 1 Mata 2023, Usanase Bahavu Jeannette ni we wegukanye imodoka ya KIA K5 yakozwe mu 2012 nubwo atahise ayihabwa ahubwo yizezwa ko azayishyikirizwa mu minsi iri imbere.

Kwegukana imodoka kuri uyu mugore ntabwo byatunguranye ku basanzwe bakurikiranira hafi ibya sinema kuko amatora yarangiye ari we uyoboye abandi mu majwi.

Uretse ibyo, muri ibi bihembo byatanzwe kuwa 01 Mata 2023, yegukanye kandi igihembo cy'umukinnyikazi mwiza w'umwaka (Best Actress) abicyesha filime ye 'Impanga'.

Mu magambo ye yashimiye Imana agira ati 'Ibi ntabwo mbifata nk'ibintu bituma ncika intege, ngo numve ko ngezezeyo ahubwo ni itangiriro ryiza kuri njye mpawe kugira.

Nyuma y'uko yegukanye iyi modok, twabakusanyije ibyavuye mu majwi bigaragaza ko uyu mugore yegukanye imodoka arusha bikomeye amajwi abo bari bahanganye. Yari afite 56 336 bivuze ko abamutoye bashoye 5 633 600Frw.

Ni umwanya yari akurikiweho na Benimana Ramadhan uzwi nka Bamenya wari ufite amajwi 39 642, uyu akaba yaratoreshejwe 3 964 200Frw, undi wabagwaga mu ntege ni Iradukunda Abouba Ibra ukina muri sinema yitwa Yvan watowe n'amajwi 31 117 bivuze ko yinjirije abateguye iki gikorwa 3 111 700Frw.

Aba nabo bakurikiwe na Iraguha Francis Zahabu wamamaye nka Steven watowe n'amajwi ibihumbi 11 766 bisobanuye ko yinjirije abateguye iki gikorwa 1 176 600 Frw.

Uretse aba tugarutseho batowe n'amajwi menshi, bagenzi babo na bo batowe mu buryo bunyuranye kugeza kuri Uwimpundu Sandrine wamamaye nka Rufonsina wagize amajwi 18 bivuze ko yinjirije abateguye iki gikorwa 1 800Frw.

Uteranyije amanota yose yatoreshejwe abakinnyi ba sinema muri iki gikorwa usanga baratowe na 150 234 bivuze ko binjirije abategura iri rushanwa 15 023 400Frw.

Aya mafaranga yose yakusanyijwe mu majwi mu gihe imodoka bahataniraga ifite agaciro ka miliyoni 13Frw ukurikije uko ibiciro bihagaze ku isoko ry'u Rwanda.

Source : https://umuryango.rw/imyidagaduro/article/menya-agaciro-ki-modoka-bahavu-yegukanye-n-akabo-kinjiye-mu-matora-y-ibihembo

Ambasaderi wa Amerika muri Kenya madame Med Whitman yavuze ko yanyuzwe n'icyemezo cya Perezida William Ruto na Raila Odinga, batavuga rumwe cyo guhagarika ihangana.

Bwana Odinga bitunguranye kuri uyu wa Mbere tariki 03 Mata 2023, yatangaje ko imyigaragambyo ihagaze, agiye kuganira na mukeba we William Ruto.

Ambasaderi Whitman yavuze ko abanya Kenya, bose bakwiye gushyigikira umugambi w'ibiganiro nk'uyu kuko nta kiruta amahoro.

Ikinyamakuru the Star cyanditse ko Perezida Ruto, yabanje guca bugufi mbere akemera ko ashaka kumva Raila Odinga, kandi ko asanzwe ari umutegetsi wemera ubwumvikane.

Bwana Odinga yavuze ko uyu mwanzuro wa Ruto wo gushaka kuganira yawishimiye kandi ubusanzwe ngo si umugabo mubi.

Kureka iyi myigaragambyo kwatumye hari abategetsi benshi begamiye Raila Odinga, bari bafite ibirego byo kwigaragambya nta ruhushya byakuweho mu gihugu hose, ndetse n'abari bararekuwe hatanzwe ingwate ngo barazisubuzwa abakatiwe bagirwe abere.

Uyu mwanzuro wa Ruto na Odinga washimishije abategetsi bamwe muri Kenya, ariko bavuze ko babibonaga ko Perezida n'uwahoze ari minisitiri w'intebe bazageraho baaganira.

The post <strong>Kenya: Amerika yanyuzwe n'umwanzuro wa Perezida Ruto wo kuganira na Odinga</strong> appeared first on FLASH RADIO&TV.

Source : https://flash.rw/2023/04/03/kenya-amerika-yanyuzwe-numwanzuro-wa-perezida-ruto-wo-kuganira-na-odinga/?utm_source=rss&utm_medium=rss&utm_campaign=kenya-amerika-yanyuzwe-numwanzuro-wa-perezida-ruto-wo-kuganira-na-odinga

Minisitiri w'Intebe Dr Edouard Ngirente yabwiye Inteko Ishinga Amategeko, ko guverinoma yongereye nkunganire ku ifumbire ihabwa abahinzi bo mu Rwanda ku gipimo cy'aho mu ngengo y'imari ya 2022-2023, yiyongere ku rugero rwa 93% ugereranije n'umwaka w'ingengo y'imari ushize.

Guverinoma ivuga ko yashyize miliyari 31 z'amafaranga y'u Rwanda muri nkunganire y'ifumbire muri 2022-2023.

Ibi Minisitiri Ngirente yabigarutseho kuri uyu wa Mbere tariki 03 Mata 2023, ubwo yagezaga ku Nteko Ishinga Amategeko imitwe yombi, ibikorwa bya guverinoma bijyanye no kongera umusaruro ukomoka ku buhinzi n'ubworozi, hakurwaho imbogamizi zikibangamiye uru rwego.

Guverinoma ivuga ko kongera nkunganire ku ifumbire byatewe n'itumbagira ry'ibiciro ku rwego mpuzamahanga.

Bimwe mu bibazo biri mu rwego rw'ubuhinzi abagize Inteko Ishinga Amategeko imitwe yombi bagaragarije guverinoma, harimo ibijyanye n'inyongeramusaruro (imbuto z'indobanure) aho hari ahagaragaye  izamuka ry'ibiciro by'imbuto zirimo n'izidafite 'Nkunganire' (ibishyimbo na soya) hamwe n'izamuka ry'ibiciro by'ifumbire mvaruganda, byagize ingaruka ku igabanuka ry'umubare w'abahinzi bakoresha ifumbire.

Hari kandi ikibazo cy'ibura ry'imbuto zishobora guhangana n'indwara.

Urugero ni mu Karere ka Nyanza hagaragajwe ikibazo cy'ibura ry'imbuto y'imyumbati n'ibonetse ikaba ishaje, kandi ikazahazwa cyane n'ibyonnyi.

Hanagaragajwe kandi ikibazo cyo kubona ubwoko bw'insina buhangana na Kabore n'izindi ndwara zibasira urutoki; mu Karere ka Kirehe mu Murenge wa Kirehe abahinzi bagaragaje ko bakeneye imbuto y'imyumbati.

Hari kandi ikibazo cy'imbuto z'ibigori zidatanga umusaruro muri tumwe mu Turere harimo nko mu Karere ka Muhanga, Umurenge wa Nyamabuye, mu Karere ka Nyamagabe, Umurenge wa Kamegeri no mu Karere ka Rulindo, mu Mirenge ya Base, Tumba na Bushoki, imbuto ya RHMA1049 bavuga ko idatanga umusaruro, naho mu Karere ka Gatsibo, Umurenge wa Gitoki imbuto y'ibigori ya WH408 na WH93 nta mpeke zitanga.

 Abagize inteko Ishinga Amategeko banagaragaje ikibazo cy'imbuto y'ingano itaragezwa ku bahinzi kandi igihe cy'ihinga kirimo kurangira, nta n'abatubuzi b'ingano.

Batanze urugero rwo mu Karere ka Rulindo mu Murenge wa Base, aho hari hateganyijwe guhinga ingano ku buso bungana na 165 Ha, ahamaze guterwa hangana na 25Ha, ahasigaye hadateye ni ho hanini kuko hangana na 140Ha bingana na 84,8%.

 Ikibazo cy'ibura ry'imbuto ya soya  aho nko mu Karere ka Gatsibo mu Murenge wa Gitoki, imbuto ya soya itabonekeye igihe bituma hahingwa 52% by'ubutaka bwari buteganyijwe guhingwaho.

Minisitiri w'Intebe Dr.Edouard Ngirente, yijeje abadepite n'abasenateri ko hari gukorwa ibishoboka byose kugira ngo urutonde rw'imbuto ziri muri nkunganire rwiyongere, kandi abashoramari be kwishisha gushora imari muri uru rwego.

The post Leta imaze gutanga nkunganire ingana na miliyari 31 Frw mu buhinzi -Minisitiri Ngirente appeared first on FLASH RADIO&TV.

Source : https://flash.rw/2023/04/03/leta-imaze-gutanga-nkunganire-ingana-na-miliyari-31-frw-mu-buhinzi-minisitiri-ngirente/?utm_source=rss&utm_medium=rss&utm_campaign=leta-imaze-gutanga-nkunganire-ingana-na-miliyari-31-frw-mu-buhinzi-minisitiri-ngirente

Guhera tariki 7 Mata 2023 mu gihugu hose hatangira icyumweru cy'icyunamo. Ku rwego rw'Igihugu, icyumweru cy'icyunamo kizatangirizwa ku rwibutso rwa Kigali, ku Gisozi.

Mu Turere, icyunamo kizatangirizwa ku rwibutso rw'Akarere naho mu Midugudu, kuva saa tatu za mu gitondo, abaturage bazahabwa ikiganiro kijyanye no kwibuka Jenoside yakorewe Abatutsi bisozwe no gukurikirana ubutumwa nyamukuru bw'uwo munsi.

Abaturage bose basabwe kwitabira icyo gikorwa. Nibirangira, bazasubira mu mirimo yabo uko bisanzwe. Kuri uwo munsi, nta rugendo rwo Kwibuka ruteganyijwe.

Kuva tariki ya 8 kugeza 12 Mata 2023 ni icyumweru cy'icyunamo giteganyijwemo ibikorwa byo kwibuka ahantu hatandukanye mu gihugu ku matariki Abatutsi biciweho, ibigenewe Abahagarariye ibihugu byabo n'Imiryango Mpuzamahanga mu Rwanda, ibiganiro bihuza urubyiruko, abanyamakuru n'ibindi byiciro.

Ibikorwa by'ubucuruzi, siporo z'abantu ku giti cyabo n'indi mirimo itunze abantu n'ibyara inyungu izakomeza mu cyumweru cy'icyunamo. Muri iki cyumweru cy'icyunamo, ibendera rirururutswa rikagezwa hagati.

Nta biganiro biteganyijwe mu midugudu nyuma ya saa sita hagati ya tariki 8 Mata na 12 Mata 2023. Ikiganiro giteganyijwe mu minsi yo Kwibuka ni kimwe kizatangwa tariki ya 7 Mata guhera saa tatu za mu gitondo.

Ku Rwego rw'Igihugu, icyunamo kizasozwa tariki ya 13 Mata 2023 ku Rwibutso rwa Rebero hibukwa abanyepolitiki bishwe bazira kurwanya Jenoside n'ingengabitekerezo yayo. Mu Turere, ubuyobozi bufatanyije n'izindi nzego bazagena aho icyumweru cy'icyunamo gisorezwa.

Ibikorwa bibujijwe mu cyumweru cy'icyunamo

Minubumwe yagaragaje ko mu cyumweru cy'icyunamo hari ibikorwa bibujijwe ari byo; ibirori by'ibyishimo bihuza imbaga y'abantu; Ubukwe n'imihango ijyanye na bwo ; amarushanwa uretse siporo zikorwa n'abantu ku giti cyabo.

Habujijwe kandi umuziki utajyanye no Kwibuka haba mu tubari, aho bafatira amafunguro, aho batunganyiriza imisatsi (salon de coiffure), aho batunganyiriza umuziki (studio) n'ahandi hantu hahurira abantu benshi nk'aho abantu bategera imodoka, n'ahandi ; Imikino y'amahirwe.

Ibindi bibujijwe ni ibikorwa byo kwerekana imipira, ibitaramo mu tubyiniro, utubari, iby'urwenya, iby'indirimbo, iby'imbyino, sinema, n'ikinamico ritajyanye no Kwibuka.

Ibikorwa byo kwibuka birakomeza mu minsi ijana kugeza tariki ya 3 Nyakanga 2023, birimo gushyingura imibiri yabonetse cyangwa iyimurwa muri gahunda yo guhuza inzibutso yumvikanyweho n'Uturere.

Mu gikorwa cyo Kwibuka Jenoside yakorewe Abatutsi, nta busumbane bugomba kuba mu madini. Misa n'amateraniro ntibishyirwa muri icyo gikorwa kuko abitabira Kwibuka Jenoside yakorewe Abatutsi atari abayoboke b'idini rimwe.

Minubumwe yatangaje ko mu gihe igikorwa cyo kwibuka Jenoside yakorewe Abatutsi cyateguwe n'idini, itorero cyangwa ibigo by'abihaye Imana byemewe n'amategeko, hagamijwe Kwibuka abayoboke babo, cyangwa abanyamuryango babo bishwe muri Jenoside yakorewe Abatutsi, icyo gihe abateguye icyo gikorwa babikora bakurikije uko imyemerere yabo iteye, hakubahirizwa ibiteganywa n'amategeko n'amabwiriza.

Umugoroba w'ikiriyo ubanziriza umunsi wo Kwibuka cyangwa gushyingura imibiri y'abazize Jenoside yakorewe Abatutsi uremewe, ariko usozwa bitarenze saa yine z'ijoro, mu rwego rwo kubungabunga ubuzima n'umutekano w'abantu.

Inzego zose zateguye Kwibuka Jenoside yakorewe Abatutsi zigomba gufata amashusho n'amajwi by'icyo gikorwa bigashyikirizwa Minisiteri y'Ubumwe bw'Abanyarwanda n'Inshingano Mboneragihugu (MINUBUMWE) mbere y'isozwa ry'iminsi 100 yo kwibuka.

Soma amabwiriza yose HANO

Perezida Kagame na Madamu Jeannette Kagame bacana urumuri rw’icyizere mu 2021

---

Source : http://igihe.com/amakuru/u-rwanda/article/kwibuka29-menya-ibizaba-byemewe-n-ibibujijwe-mu-cyumweru-cy-icyunamo