Blog

Yabivuze kuri uyu wa 19 Mata, ubwo abayobozi bakuru ba ADEPR, abakozi n'abapasiteri bo mu Rurembo rwa Huye [rugizwe n'uturere twa Huye, Gisagara, Nyaruguru na Nyamagabe] basuraga Urwibutso rwa Jenoside rwa Murambi mu Karere ka Nyamagabe.

Ni igikorwa ADEPR ivuga ko cyiyongera ku byakozwe n'ibiteganyijwe mu rwego rwo kwiga no gusangira amateka kimwe no kugaragaza ko iri torero ryifatanyije n'Abanyarwanda mu minsi 100 yo kwibuka ku nshuro ya 29 Jenoside yakorewe Abatutsi.

Urwibutso rwa Jenoside rwa Murambi ruri ahahoze ishuri ry'imyuga, rwatoranyijwe nka rumwe mu zifite ibimenyetso n'amateka byivugira bitewe n'ubukana bwa Jenoside yahabereye n'uburyo ibyo bimenyetso byabungabunzwe.

Umuyobozi w'Urwibutso rwa Murambi, Mugabarigira Stanley, yasobanuye ko mu batutsi bagera ku bihumbi 50 bari bahungiye i Murambi harokotsemo abatarenze 34.

I Murambi hitabajwe imashini zicukura ibyobo byo kujugunyamo imibiri yabo [bimwe biragaragara muri uru rwibutso kuko byabungabunzwe] bikorwa n'abagororwa bakuwe muri Gereza ya Gikongoro nk'uko Mugabarigira yakomeje abisobanura mu kiganiro yahaye aba bayoboke ba ADEPR.

Umushumba Mukuru wa ADEPR, Pasiteri Isaïe Ndayizeye , yavuze ko gusura urwibutso nk'uru bakareba ibyabaye bifasha mu guha uburemere Jenoside yakorewe Abatutsi, kubona ibikenewe gukorwa no kwibaza ibyatumye Jenoside igerwaho.

Ati “Ntabwo ari ikintu cyo kwirengagizwa kuko ubutumwa bwiza bubereyeho gukemura ibibazo bihari. Nta kibazo cyaduteye ingaruka zirenze izo twatewe na Jenoside yakorewe Abatutsi, ni yo mpamvu imyigishirize yose n'ibikorwa bitandukanye bikwiye kuba bifite aho bihuriye no gukemura icyo kibazo.”

Pasiteri Ndayizeye yavuze ko uba ari n'umwanya wo kuganira “tukibaza ku cyabaye kugeza ubwo Itorero riceceka mu gihe hatangwaga inyigisho zitanya abantu nyamara Bibiliya isanzwe yigisha urukundo.”

“Tugomba kwibaza ngo 'habaye iki cyatumye insengero zimwe zicirwamo abantu, bamwe mu bapasiteri bakabigiramo uruhare?' Ikibazo ni uko tutaragera ku rwego rwo kuvuga 'oya' no ku bintu bito. Urasanga mu 'bariye' imfubyi n'abapfakazi harimo abaririmbyi, abibye amasoko barabwiriza ku ruhimbi…Mbese inyigisho dutanga ni izifasha abantu kuvuga 'oya' ku bintu bidakwiye?”

Umukozi ushinzwe isanamitima, ubuzima n'ubumwe n'ubwiyunge muri ADEPR, Emmanuella Mahoro, yavuze ko Itorero ryagize ubugwari bityo ko kujyana abapasiteri ku rwibutso ari ukwemera gutsindwa no kurebera hamwe icyakorwa mu guhangana n'ingaruka.

Ati 'Ntabwo twakwirirwa tubisobanura Itorero ryaratsinzwe mu gihe cya Jenoside ni yo mpamvu ubona kiliziya n'insengero zabaye inzibutso. Twemera gutsindwa kwacu nk'Itorero ariko na none twebwe abahari tuzabazwa iby'iki gihe. Ni yo mpamvu tuzana abapasiteri n'abayobozi bose kugira ngo twigire hamwe icyo Itorero ryakora mu gusohoka muri za ngaruka, dufungure urubuga abantu baganire kugira ngo bwa bugwari twagize butazongera.'

Mahoro yavuze ko gusura uru rwibutso ari bumwe mu buryo bwo kuvura ibikomere binyuze mu gufasha umuntu guhura n'ibyabaye. Mu bimenyetso biranga uwahungabanye ngo harimo no kwanga guhura n'amateka ye ariko nyibishoboka gukiza ihungabana mu gihe umuntu arihunga.

ADEPR iteganya ibikorwa bitandukanye mu minsi 100 yo kwibuka birimo gufasha abarokotse Jenoside batishoboye basanirwa cyangwa bubakirwa inzu, kuboroza inka n'ibindi bizatwara agera kuri miliyoni 170 z'amafaranga y'u Rwanda. Hari kandi gahunda zo kwibuka zizabera ahantu 143 hirya no hino mu gihugu.

Itorero kandi ngo rizakoresha iminsi 100 yo kwibuka rifasha Abanyarwanda by'umwihariko urubyiruko kumva no gusobanukirwa amateka no gukumira ingengabitekerezo ya Jenoside ihererekanywa mu buryo butandukanye.

Abagize iri tsinda ubwo bageraga ku Rwabitso rwa Murambi

Abayobozi ba ADEPR bashyira indabo ku mva rusange ku Rwibutso rwa Murambi

Umushumba Mukuru wa ADEPR, Pasiteri Ndayizeye Isaïe ashyikiriza Mugabarigira Stanley, Umuyobozi w’Urwibutso rwa Murambi inkunga yo kurushyigikira

Abayobozi bakuru ba ADEPR bakurikiye ikiganiro

Umukozi w’Umuryango AMI, Uwizeye jean de Dieu watanze ikiganiro ku kamaro ko kuganira ku mateka ubwo abayobozi ba ADEPR basuraga Urwibutso rwa Jenoside rwa Murambi

Aba basirikare bakuru 17 biga mu Ishuri Rikuru rya Gisirikare, Rwanda Defense Force Command and Staff College (RDFCSC) baturuka mu bihugu icyenda bya Afurika birimo n'ibigaragaramo umutekano muke mu bice bimwe byabyo nka Sudani y'Epfo, Ethiopie, Nigeria n'ahandi.

Kuri uyu wa 20 Mata 2023 bunamiye Intwari z'u Rwanda, basobanurirwa ibyaranze intwari mu byiciro byazo, banasura aho ziruhukiye ndetse bahugurwa ku mateka ya buri wese.

Lt. Col Zuzan Lakot Uruni waturutse muri Uganda yavuze ko gusigasira amateka y'Intwari z'Igihugu cyane cyane izarwaniye ubumwe ari ngombwa kugira ngo abantu bazajya bigira ku mateka yabaye.

Yavuze ko ibyo babonye bazajya kubisakaza mu bihugu baturutsemo kugira ngo na bo bibafashe mu iterambere ryabo.

Yagize ati 'Twaje kwigira ku Rwanda nk'Abanyafurika dukurikije amateka y'u Rwanda n'uko rwasigasiye amateka y'Intwari zaharaniye ubumwe. Turaza kugira bimwe tuzajyana iwacu, tubikwize no muri Afurika kandi kubisakaza bishobora kuba inzira yo kugera ku mahoro arambye mu bice bya Afurika bikirimo intambara[…] Igihe cyose umuntu ageze hano hari icyo yiga kandi hari icyo asubirana iwabo. Niba bitakorwaga iwabo azabijyanayo. Bizafasha kuba amateka mabi atakwisubiramo.'

Lt Col Zuzan yavuze ko urebye ubumwe buranga Abanyarwanda, amahoro, iterambere n'ibindi byiza bigaragarira amaso, bigaragaza ko gusigasira amateka y'Intwari ari ingenzi cyane.

Umuyobozi ushinzwe Iterambere n'Ubushakashatsi Col. Ebenezer Mark Alo yavuze ko kuzana aba banyeshuri gusura Igicumbi cy'Intwari bibafasha gusobanukirwa urugendo rwo kwiyubaka igihugu kirimo nyuma ya Jenoside yakorewe Abatutsi mu 1994.

Yavuze ko kuba bamwe muri bo baturuka mu bihugu birimo intambara bigomba kubafasha kwigira ku budaheranwa bw'u Rwanda, bityo bakazabyigana bageze iwabo.

Ati 'Byinshi mu byo tubona bibaha amahirwe yo kubigereranya n'ibibazo ibihugu byabo byahuye na byo, bakajyana ubumenyi barahuye hano, bakigira ku budaheranwa bw'Abanyarwanda kandi ibyo ni ingenzi cyane.'

Yavuze ko abasirikare bakuru biga muri RDFCSC baba bateganyirijwe kwiga amasomo ya gisirikare ariko hakiyongeraho amateka y'igihugu n'uburyo cyiyubatse nyuma ya Jenoside yakorewe Abatutsi mu 1994, bagasura inzibutso n'ahandi hantu hari amateka akomeye y'igihugu.

Umunyamabanga Nshingwabikorwa w'Urwego Rushinzwe Intwari z'Igihugu Imidari n'Impeta by'Ishimwe Deo Nkusi, yavuze ko 'buri wese ava aha yumvise ubutwari, akamenya ukuntu abantu bitangiye igihugu, akaba na we yakuramo kuba yagera ikirenge mu cy'Intwari twagize.'

Yavuze ko iyo Abanyamahanga baje gusura Igicumbi cy'Intwari bigaragaza isura nziza y'Igihugu kuko hirya y'Abanyarwanda bakoze Jenoside bibereka ko hari n'abandi baharaniye ubumwe bigatuma bajyana amateka yuzuye.

Aba basirikare basuye Igicumbi cy'Intwari z'u Rwanda nyuma yo kuva ku Rwibutso rwa Jenoside rwa Murambi, ku Ngoro y'Amateka ya Huye no mu Rukari i Nyanza.

Bose bari bafite inyota yo gusobanukirwa amateka yaranze intwari z’u Rwanda

Basobanuriwe ibiranga ubutwari bw’Abanyarwanda

Basobanuriwe amateka ya buri Ntwari iruhukiye ku Gicumbi cy’Intwari i Remera

Aba basirikare bahaye icyubahiro intwari z’u Rwanda