Blog

Korali Shalom yashinzwe mu mwaka wa 1986, itangira ari korali y'abana bato. Icyo gihe muri ADEPR Nyarugenge hari korali nkuru imwe ariyo Hoziyana.

Mu 1986, abari bayigize bari bafite imyaka iri hagati ya 15-17 y’amavuko. Yaje kuba korali y'urubyiruko, icyo gihe mu Gakinjiro haza indi korali yitwaga korali Cyahafi kuri ubu yitwa Baraka ari nayo yahise iba iya kabiri.

Mu mwaka 1990, ni bwo Shalom choir yaje kwemererwa n’itorero ryabo kwitwa izina dore ko yari imaze igihe kirekire ari iy’abana yitwa Korali Umunezero hanyuma bahita bitwa Shalom choir. 

Iyi korali yahise izamukana imbaduko mu murimo w’Imana aho yakoze album mbere ya Jenoside yakorewe Abatutsi ariko ntibayisohora ku bwo kumva iri ku rwego rwo hasi, ariko biyifasha mu rwego rwo kongera ubumenyi no kwiyongerera umuhate dore ko abagiye inama, Imana ibasanga.

Mu gihe cya Jenoside yakorewe Abatutsi mu 1994 yahitanye abarenga Miliyoni, Shalom Choir nayo yagizweho ingaruka nyinshi nk’uko mu gihugu hose nta kanyamuneza kaharangwaga n’ibyishimo. 

Nyamara n’ubwo baciye muri byinshi, Shalom Choir yakomeje kwiyubaka kugira ngo agahinda katabatwara bakibagirwa gukorera Imana kandi ariyo igena byose imenya ikiri imbere umuntu atazi.

Nyuma yo guca muri ibyo bihe bitoroshye, bongeye gukora Album ariko nanone ntibayigurisha kuko bumvaga iri ku rwego rwo hasi bitewe n’umwimerere bashakaga muri album yabo.

Nyamara n’ubwo batakoze album, bakoze indirimbo nyinshi zo kuvuga no kwamamaza imirimo y’Imana harimo indirimbo nka; ‘Nzirata Umusaraba’, ‘Nyabihanga’, ‘Abami n’Abategetsi’, 'Uravuga bikaba, 'Umuntu w'imbere', 'Mfite Ibyiringiro', 'Ijambo Rirarema', 'Icyizere', 'Nduhiwe' n'izindi.

Shalom choir, niyo korali rukumbi yo muri ADEPR yakoreye igitaramo mu nyubako ihenze mu Rwanda ariyo Kigali Convention Center. Ni igitaramo cyabaye tariki 12/08/2018 gihembukiramo imitima ya benshi. Cyaritabiriwe bikomeye mu gihe kwinjira byari ukugura Album yabo nshya.

Bitari ukuririmbira abantu gusa, Shalom Choir ijya ikora ibikorwa by’urukundo bagafasha abatishoboye bitari ukubahumuriza no kubabwira ijambo ry’Imana gusa.

Shalom Choir yahuye n’ibigusha, ibisitaza n’ibigeragezo byinshi mu murimo wo gukorera Imana ariko kubera umuhamagaro n’umuhate wo gukorera Imana babashije kubicamo amahoro.

Muri uwo mujyo wo gukorera Imana no kuvuga ubutumwa bwiza, Shalom Choir irimo gutegura igitaramo gikomeye kizabera muri BK Arena akaba ariyo korali ya kabiri igiye gukorera muri iyi nyubako nyuma ya Chorale de Kigali. Ariko niyo ya mbere muri ADEPR igiye kwandika aya amateka.

Ijambo ry’Imana riravuga ngo “Icyakora muzahabwa imbaraga Umwuka Wera nabamanukira, kandi muzaba abagabo bo kumpamya i Yerusalemu n’i Yudaya yose n’i Samariya, no kugeza ku mpera y’isi.” (Ibyakozwe n’Intumwa 1:8). Ni yo mpamvu mu mbaraga z’Imana Shalom Choir igiye gukoresha imbaraga zose yahawe mu kuvuga ubutumwa bwiza bw’Imana.

Iki gitaramo cy’aba baririmbyi b’i Nyarugenge giteganyijwe kuba ku wa 17 Nzeri 2023 muri BK Arena, bakaba baragitumiyemo Israel Mbonyi kandi kwinjira azaba ari ubuntu mu rwego rwo kwamamaza ijambo ry’Imana nta kiguzi. Imiryango izaba ikinguye kuva saa sita z’amanywa.

Ku wa 17 Nzeri 2023, Shalom choir igiye gukorera igitaramo muri BK Arena batumiyemo Israel Mbonyi aho kwinjira ari ubuntu

Imbaraga z’Imana n’impano yo kuririmba ni byo byiganje mu baririmbyi ba korali Shalom

Korali Shalom iva ku ruhimbi ikajya gukora ibikorwa by’urukundo hirya no hino

Korali Shalom igiye kuba iya kabiri mu Rwanda ibashije gukorera igitaramo muri BK Arena

REBA INDIRIMBO NSHYA YA SHALOM CHOIR YA ADEPR NYARUGENGE

Manishimwe Djabel, umwe mu bakinnyi b’Abanyarwanda badashidikanywaho ku mpano yabo cyane ko yagiye anabigaragaza, gusa na none ni umukinnyi udacirwa akarurutega mu makipe yanyuzemo kubera imyitwarire ye bishobora no gukoma mu nkokora urugendo rwe rwa ruhago.

Uvuze izina Manishimwe Djabel, umuntu wese ukurikirana ruhago nyarwanda ahita amumenya kuko ibikorwa bye byatumye akinira amakipe abiri ubu ari ku gasongero ka ruhago nyarwanda, APR FC na Rayon Sports ubu akaba ari muri Mukura VS nk’intizanyo ya APR FC.

Nk’uko ibyangombwa bye bibigaragaza uyu musore wavukiye Kiramuruzi mu Burasirazuba bw’u Rwanda muri Gatsibo mu 1998, ku myaka 15 yavuye Gatsibo aza i Kigali akoze intera y’ibilometero 89 aje mu murwa nta muvandimwe ahafite ahubwo akurikiye inzozi ze zo kuzaba ikirangirire muri ruhago y’u Rwanda.

Umupira w’amaguru niwo watumye uyu mukinnyi wakuriye mu irerero ry’umutoza Ntirenganya i Kiramuruzi ahagarika amashuri yisumbuye ubwo yari ageze mu mwaka wa 4 w’Amashuri yisumbuye muri Ecole Secondaire de Rukara (ESR) mu Karere ka Kayonza aho yigaga Amateka, Ubukungu n’Ubumenyi bw’Isi (History, Economics and Geography [HEG]).

Ntabwo yarangije umwaka kuko muri 2013 yahise yinjira Umujyi wa Kigali aje mu irerero rya SEC ahantu atatinze ahita ajya mu Irerero ry’Isonga, mu Isonga byaranze ahita yerekeza mu Magepfo y’u Rwanda muri Rayon Sports icyo gihe yari ikiba i Nyanza.

Nyuma yahise ahindura ibyo yigaga ahita ajya kwiga Indimi n’Ubuvangazo muri St Patrick Kicukiro, nabwo yaje gusa n’ucikiriza amashuri ariko nyuma yaje kwiga ararangiza

Uwihanganye akama ishashi…

Nahigira ukubwira ko uyu mukinnyi yanyuze mu nzira z’ubusamo azaba akubeshye, kuko yabaye muri Rayon Sports i Nyanza, adahembwa akora imyitozo yizeye ko umunsi umwe yazamufata. Aha i Nyanza tuvuga nubwo yaje kuhakura umugeni ariko nta muryango yari ahafite yaripapaga akananimama.

Amata yaje kubyara amavuta maze Manishimwe Djabel, Rayon Sports yari imaze kubona impano ye imwemeza mu ikipe nkuru atangira gusarura ku matunda yari yarabibye.

Ni nabwo yahise ahamagarwa mu Ikipe y’Igihugu y’Abatarengeje imyaka 17 muri 2014 yasezerewe na Uganda mu gushaka itike y’Igikombe cy’Afurika cyabereye muri Niger, ni na we wari wagiriwe icyizere cyo kuba kapiteni w’iyi kipe.

Ni uko Djabel yagiye azamuka aba umukinnyi ngenderwaho muri Rayon Sports batwaranye igikombe cya Shampiyona n’Igikombe cy’Amahoro, Super Cup n’ibindi kugeza muri 2019 ubwo yerekezaga muri APR FC n’aho batwaranye ibikombe bya Shampiyona na Super Cup ubu ikaba yaramutije muri Mukura VS. Ni umukinnyi w’Ikipe y’Igihugu.

Gusa ariko nubwo ari umukinnyi w’umuhanga ni umukinnyi bivugwa bigoye gutunga mu ikipe yawe bitewe n’imiterere ye aho bivugwa ko ashobora kuba afunze mu mutwe ndetse n’imibanire ye na bagenzi be ikaba icyemangwa.

Rayon Sports yamwonkeje ubu imufata nk’umugambanyi…

Nubwo yakiniye Rayon Sports akanayigiriramo ibihe byiza ariko biragoye ko wazongera kubona Manishimwe Djabel yambaye ubururu n’umweru akinira Rayon Sports kuko bamufata nk’umugambanyi.

Abarayon kugeza uyu munsi ntibirabava mu mutwe uburyo uyu mukinnyi yavuye muri iyi kipe yerekeza muri mukeba.

Yasabye gutandukana na Rayon Sports muri 2019 avuga ko yabonye ikipe hanze y’u Rwanda muri Gor Mahia yo muri Kenya, bisaba ko n’Umunyamabanga w’iyi kipe aza mu Rwanda bafata n’amafoto asinya.

Gusa benshi batunguwe n’uko indege yamutwaye muri Kenya yaparitse Kimihurura maze yegukanwa na APR FC, mukeba w’ibihe byose wa Rayon Sports. Ubu buryo yagiyemo byababaje Rayon Sports cyane aho ivuga ko umwana birereye atakagiye muri ubwo buryo, kuva icyo gihe kugeza uyu munsi biragoye ko habaho ubwiyunge hagati ye n’iyi kipe.

Muri APR FC yimennye inda…

Imyitwarire ye muri APR FC, imyaka 2 yabaye ntamakemwa ari nayo mpamvu iyi kipe y’Ingabo z’Igihugu yamwongereye amasezerano y’imyaka 3 ndetse anagirwa Kapiteni wayo.

Gusa umwaka umwe wari uhagije kugira ngo habe habaho gatanya hagati ye na APR FC yari agifitiye amasezerano y’imyaka 2.

Umwaka w’imikino wa 2022-23 ntabwo wabaye mwiza kuri Djabel yaba mu kibuga ndetse no hanze yacyo, uretse guterana amagambo mu itangazamakuru n’uwari umutoza w’iyi kipe, Adil Erradi Mohammed akanahagarikwa ukwezi, umusaruro we wagerwaga ku mashyi kuko nta mwanya uhagije wo gukina yigeze abona ariko bikanavugwa ko yagize ibindi bibazo byamugizeho ingaruka.

Amakuru ISIMBI yamenye ni uko ubwo yari umukinnyi ugoranye ariko na none ubuyobozi bw’iyi kipe bwamufataga nk’umukinnyi mukuru kandi wayobora bagenzi be, ari nayo mpamvu nubwo byavuzwe cyane ariko ntabwo yari mu bakinnyi iyi kipe yiteguye kurekura ahubwo we yakoresheje inzira zose, izishoboka n’izidashoboka kugira ngo ayisohokemo byaje no kumuteranya n’ubuyobozi ndetse n’abakunzi ba APR FC.

Yabanje gusaba ko bamurekura akajya muri Saudi Arabia mu ikipe yitwa Al Shabab yari yamushimye ariko bumvikana ko bidakunze yagaruka muri iyi kipe. Basanze urwego rwe ruri hasi bamusaba kugaruka kuruzamura, icyo gihe icyo byari bivuze ni uko yagombaga kugaruka muri APR FC nk’uko babyumvikanye.

Uyu mukinnyi yasabwe kujya gutangira imyitozo arabyanga ahubwo atangira gukoroga iyi kipe kugira ngo imwirukane ayivemo kuko we yumvaga atakiyibarizwamo, we n’umutima we bamaze kuyivamo.

Djabel wari ugifite amasezerano y’imyaka 2 ari na kapiteni w’ikipe, yakoze ikintu benshi banenze cyafashwe nko kwimena inda, ajya kuri radio anenga kumugaragaro abakinnyi iyi kipe yaguze, aho yavuze ko nubwo ari Abanyamahanga ariko nta kintu barusha abanyarwanda.

Ati 'Nkurikije ibyo mbona ubu, nta tandukaniro rinini riri hagati ya APR FC yari ihari ubushize n’iy’ubu. Uko ni ko kuri nkurikije imikino ya gicuti bagiye bakina kuko nagiye nyikurikirana. Nta kinyuranyo gihari.'

'Nta mukinnyi ndi kubona muri APR FC ubu urusha urwego ba Bosco [Ruboneka], Yannick [Bizimana] na Nshuti [Innocent]. Gusa umupira ugira ibyawo bashobora kugera ku byo abandi batagezeho ariko mu by’ukuri ntibyoroshye.'

Nyuma yaje kwemerera umunyamakuru ko yabikoze mu rwego rwo kwihimura kuri iyi kipe kugira ngo arebe ko yamurekura kuko yabonye ikipe hanze banga kumutizayo.

APR FC itari inafite undi mukinnyi ku mwanya we byaje kuyihatiriza kumurekura maze imutiza muri Mukura VS umwaka umwe, nyuma yawo bazagena aho azajya kuko kumugarura byo bizagorana.

Umubano we n’abandi bakinnyi harimo ikibazo…

Manishimwe Djabel iyo umurebye ubona ari umukinnyi utuje cyane udapfa kuvuga, gusa ni umukinnyi muri we wumva ko ari umuyobozi ku buryo ikipe arimo yose aba ari mu bakinnyi bavugana bya hafi n’ubuyobozi.

Amakuru adafitiwe gihamya, bivugwa ko akenshi usanga abwira abayobozi ibyo bagenzi be bakora n’ibitari ngombwa.

Bivugwa ko muri APR FC ari kimwe mu byatumye ashanwa n’abakinnyi benshi batemeraga ibyo akora ko hari na bamwe bagiye birukanwa abigizemo uruhare cyangwa bitewe n’amakuru yatanze, aha bivugwa Seif yirukanywe kubera Djabel wamureze.

Ubwo yarimo ashaka ikipe yakwerekezamo bamwe mu bo bavuganye harimo Kiyovu Sports, ariko Niyonzima Olivier Seif yareruriye ubuyobozi ko Djabel naza we agenda kuko atakinana n’umuntu wamwirukanishije muri APR FC.

Mu gihe atasohoka ngo ajye gukina hanze y’u Rwanda, bishobora kuzarangira impano ye ipfuye ubusa kuko niba ari umukinnyi ukomeye ariko nta kipe ikomeye imwifuza mu Rwanda, ni uko ushobora gusanga ari we kibazo.

Ibi babivuga kuko baba baramaze kubona imyitwarire y’abagabo itari myiza irimo nko kwihakana umwana, gutererana umugore babyaranye, kwanga gufata inshingano mu muryango, kwirengagiza umugore n’abana akarenzaho gushaka undi mugore n’ibindi.

Ibituma abantu batandukana cyangwa ntibabashe kumvikana ngo babane byo ni byinshi ariko ntibyumvikana neza ukuntu umuntu w’umugabo yakwihakana umwana we ntamugirire impuhwe za kibyeyi ngo amwiteho ndetse hari n’ababata burundu ku buryo abaho nkaho nta Se agira nyamara ahari.

Ibi iyo bibaye umugabo akanga umwana yabyaye, akenshi bituma uyu mwana na nyina babaho nabi, bigoranye kubona ikibatunga ndetse bamwe mu bo byabayeho hari n’ababura uburyo bagana ishuri cyangwa babona ibintu shingiro bibafasha kubaho neza. 

Ibi nubwo bitaba buri munsi ariko bibaho cyane ndetse bamwe babibona mu miryango baturukamo, byababayeho cyangwa byabaye ku bo baturanye. Nyamara ibi ntabwo byasize no mu byamamare kuko byinshi muri byo byahuye n’iki kibazo bituma babaho nabi gusa ntibyababuza kugera ku nzozi zabo ngo bamamare kandi banabe abaherwe bimwe umunyarwanda yavuze ati: ”Umwana wanzwe niwe ukura”!

Ibi ni bimwe mu byamamare bitandukanye byagiye byihakanwa/bitabwa naba Se bikiri bito nyamara ntibyababuza kuvamo ibikomerezwa kugeza ubu binatunze agatubutse: 

1. Angelina Jolie

Abareba filme cyane bazi umugabo Jon Voight, ni umubyeyi wa Angelina Jolie, yamenyekanye muri filime  nka Mission Impossible, Most Wanted, Ray Donovan n'izindi. Uyu nawe yataye umuryango ubwo Angelina Jolie yari umwana muto, ku bw'amahirwe aza no gutera ikirenge mu cye aba umukinnyi wa filime ukomeye, gusa umubano wabo uhora uzamo agatotsi biturutse kuri uko kuba yaramutaye akiri umwana.

Angelina Jolie wahoze ari umugore wa Brad Pitt, ari mu bagore bakina filime bikimero kirangaza benshi ndetse ari no mu batunze agatubutse dore ko kugeza ubu afite umutungo wa Miliyoni 160 z’Amadolari.

2.Samuel L. Jackson

Nawe ni umukinnyi wa filime, Se yataye nyina akiri muto gusa ngo  mu buzima bwe bwose yahuye na Papa we inshuro 2 gusa mbere y'uko yicwa n'inzoga. Ibi by'uko yabayeho akiri umwana ngo nibyo byamuteye imbaraga no kwizirika ku nshingano ku mwana we w'umukobwa w'ikinege Zoe Jackson.  Uyu mugabo uri  muri bakizigenza mu birabura bakina filime, azwi cyane muri filime yakinnye zirimo nka ‘Coach Carter’, ‘Django Unchained’, Captain Marvel’, ‘Avengers’ ibice byayo byose.

Uyu mugabo w’imyaka 74 y’amavuko utunze Miliyoni 280 z’Amadolari yakuye mu mwuga wo gukina filime. Magingo aya ari gukina muri filime y’uruhererekane ikunzwe yitwa ‘Secret Invasion’ igaragaza uburyo ibivejuru (Aliens) byageze ku Isi mu myaka ya kera ndetse bikaba bigihari aho byishushanya nk’abantu ngo hatagira ubibona.

3. Alicia Keys

Umucuranzi wa Piano ukomeye akaba n’umuhanzikazi w’icyamamare, Alicia Keys nawe yakuriye mu buzima bugoye kubera Se yamutaye. Yarezwe na nyina gusa mu mujyi wa New York ,ubuzima butaboroheye kugeza ubwo aje kuba umunyamuziki ukomeye. Icyo gihe cyose yari arakariye Se, gusa amaze kubyara nibwo yavuze ko umutima we wafungutse cyane akabona akamaro k'umubyeyi nuko afata icyemezo cyo kwiyunga na Se abigiriye abana be.

Alicia Keys kuba yarinjiye mu muziki akawukorana ingufu bitewe n’uko yifuzaga kubona amafaranga afasha nyina n’abavandimwe be, byaramuhiriye aho ubu ari umugwiza faranga utunze Miliyoni 150 z’Amadolari.

4.Lil Wayne

Amazina ye ubundi ni Dwayne Michael Carter Jr, nyina yamubyaye afite imyaka 19, Lil Wayne amaze kugira imyaka 2 yatandukanye na Se ndetse ahita abata mu buryo bwa burundu ntiyongera kwita kuri Lil Wayne nk'umwana yabyaye. Nyina yaje gushakana n'umugabo witwa Rabbit waje kwicwa uyu niwe afata nka Se.

Kugeza ubu Papa wa Lil Wayne ariho ariko ntibavugana ndetse Lil Wayne yavuze ko nta kintu na kimwe ahuriyeho nawe. Ibi nibyo byamuteye gukuraho D  ku isina rye akareka kwitwa Dwayne, izina ahuriyeho na Se.

Kugeza ubu Lil Wayne watawe na Se ku myaka ibiri gusa yaje kuvamo umuraperi ukomeye ku Isi unatunze Miliyoni 140.9 z’Amadolari.

Yabwiye ikinyamakuru GQ Magazine ati 'Nta kintu anyitayeho nanjye ntacyo mwitayeho. Ndabizi ko inshuti ze zishobora kuba zibwira ko abeshya igihe avuga ko ndi umwana we zibaza uburyo ataba mu nzu ihenze cyangwa ubuzima butandukanye n'ubwo abayemo.

Murabizi uko So abayeho kose iyo ufite amafaranga uramufasha, nanjye ubu nakabaye mufasha ariko si data.  Ejo bundi nahuriye nawe muri New Orleans mpafite igitaramo, sintinya kubivuga kugira ngo numvikanishe uburyo ntamwitayeho na gato,  abantu bose iyo Lil Wayne ari buze baba babizi nawe yaje yitembereza kuri Hotel nari ncumbitsemo, ndeba mu idirishya mbwira umuntu twari kumwe nti 'dore data!' aratangara cyane ati 'murasa cyane!'. Sinishimiye kuba nsa nawe ariko niko byagenze'. 

Ibi kandi Lil Wayne yabigarutseho mu ndirimbo 'Mirror' afatanyije na Bruno Mars aho agita ati 'Damn, I look just like my fuckin' dad' tugenekereje mu Kinyarwanda ni 'Asyi, ndasa neza neza na Data'

Kugeza ubu Lil Wayne watawe na Se ku myaka ibiri gusa yaje kuvamo umuraperi ukomeye ku Isi unatunze Miliyoni 140.9 z’Amadolari.

5. Selena Gomez

Selena Gomez nawe ni umwe mu byamamare byahuye n'ikibazo cyo kurerwa n'umubyeyi umwe. Nyina yatwaye inda ye ubwo yari afite imyaka 16 ndetse ku myaka 5 gusa, ababyeyi be baratandukanye, Selena Gomez avuga ko nyina yamureze wenyine kuko Se yari yaritangiriye ubundi buzima atabitayeho gusa aho amariye kuba mukuru nta bibazo bikomeye yagiranye na Se gusa yemeza ko nyina ari we wamuruhiye.

Ibi ariko ntibyabujije nyina wa Selena Gomez kumuhatira kujya kwiga ibijyanye n’umuziki no gukina filime ndetse akaza no kubikora bya kinyamwuga. Ubu uyu muhanzikazi w’imyaka 31 atunze Miliyoni 800 z’Amadolari.

6. 50 Cent

Curtis Jackson wamamaye cyane ku izina rya 50 Cent, ni undi muhanzi w’icyamamare watawe na Se. Nyina yitabye Imana ubwo 50 Cent yari afite imyaka 8, yari umucuruzi w'ibiyobyabwenge ndetse yapfuye arashwe, nyuma y'urwo rupfu se ntiyigeze amwitaho cyangwa ngo agire  ikindi amumarira nk'umubyeyi, arerwa n'ababyeyi ba nyina. 

Kugeza n'ubu Se ariho ariko nta hantu na hamwe bahurira, ubwo yabazwaga n'itangazamakuru niba hari gahunda afite yo kwiyunga na se, 50 Cent yagize ati 'Hari amakosa nakoze mu buzima, ntiyigeze ahaba ngo ambuze kuyakora, ubu sinkimukeneye.'

Nubwo bimeze bitya ariko, 50 Cent nawe afite umwana w'umuhungu batabanye neza uvuga ko Se atamwitaho. People Magazine yigeze gutangaza ko ibiri kuba kuri 50 Cent bisa nk’amateka yisubiyemo aho yatereranywe na Se none nawe akaba ari kubikorera umuhungu we. Kugeza ubu 50 Cent atunze Miliyoni 40 z’Amadolari.

7.Adele

Adele Blue Adkins ni umwe mu bahanzi bakomeye cyane muri iki gihe yaba iwabo mu Bwongereza no ku Isi hose, Se yamutanye na nyina ubwo yari afite imyaka 3 gusa. Kuva ubwo nabo babayeho ubuzima bwose birwanaho kugeza ubwo Adele abaye icyamamare n'umunyamafaranga.

Se agaragaza ko yicuza cyane kuba yarataye umwana we igihe yari amukeneye, bigeze no kwiyungaho gato ariko se aza kwitwaza iyo turufu y'uko ari umubyeyi wa Adele agurisha amakuru y'umuryango mu kinyamakuru, Adele biramurakaza cyane anavuga ko aramutse amubonye 'yamucira mu maso', yongera no kubivuga muri uyu mwaka mu birori bya Grammy Awards, ashimira umujyanama we bamaranye imyaka 10 amubwira ko amukunda mu cyimbo cya Se, mu magambo aravuga ati 'Sinkunda Data'.

Adele uzwiho guhanga indirimbo z’urukundo zuzuyemo agahinda, kuva yatangira umuziki kugeza ubu amaze kwigizwaho umutungo wa Miliyoni 220 z’Aamadolari.

8.Eminem

Marshall Mathers uzwi cyane nka Eminem ni umwe mu baraperi b'abazungu babashije kugira amahirwe yo guhirwa n'umuziki, dore ko Rap ifatwa nk'injyana y'abirabura. Yakuze mu buzima bugoye kuko Se yamutanye na nyina akiri umwana muto cyane w'umwaka n'amezi 6, nyuma ntibongera kubonana ukundi.

Yakuze yanga Se gusa uyu mubyeyi we yaje kumwandikira ibaruwa ayinyuza mu binyamakuru kuko nta kundi yari kumugeraho, amusobanurira ko nyina ari we wahisemo kubatandukanya gusa Eminem ibyo ntabikozwa ndetse yatangarije itangazamakuru ko nta gahunda na ntoya afite yo gushakisha Se, kuvugana nawe cyangwa se kugira ikindi bahuriraho.

Eminem avuga ko kera akiri umwana yajyaga yandikira Se amabaruwa ariko akayamusubiza atanayasomye, bikamutera agahinda kenshi kugeza ubwo amwikuyemo burundu.

Kugeza ubu Eminem uherutse gushyirwa ku rutonde rw’abaraperi 50 b’ibihe byose, asigaye ahugiye mu gushora imari mu bintu bitandukanye birimo n’amaresitora yafunguye mu mijyi igera kuri 4 muri Amerika. Uyu mugabo akaba atunze Miliyoni 250 z’Amadolari.

9.Kelly Clarkson

Yatangiye kumenyekana nyuma yo gutsindira Amrican Idol, ni umwe mu batsindiye iri rushanwa bagikomeje gukora umuziki ukundwa n'abatari bake. Ubwo yari afite imyaka 6 gusa, Se yarabataye ajya gutangira ubundi buzima, bikomeretsa Kelly cyane ku buryo yakoze indirimbo zitandukanye zigaruka ku gikomere se yamuteye. Iyitwa Piece by Piece ho avugamo inkuru ibabaje yibukiranya uburyo Se yari umuntu wikunda none akaba atangiye kumukenera kuko abona hari icyo yigejejeho.

Uyu muhanzikazi umaze no gukundwa mu kiganiro ‘The Kelly Clarkson Show’ kinyura kuri televiziyo mpuzamahanga ya ABC, kuri ubu atunze  Miliyoni 45 z’Amadolari.

10. Demi Lovato

Umuhanzikazi akaba n’umukinnyi wa filime wamamaye cyane kubera kompanyi ya Disney, nawe yakuze Se na nyina batumvikana bituma ashaka undi mugabo kuko Se yari yarigendeye.

Se yaje guhitanwa na kanseri muri 2013, Demi Lovato avuga ko yaje gusanga amakosa ya Se bwari uburwayi bwo mu mutwe nubwo byamutwaye igihe kinini ngo yumve ko agomba kumubabarira.

Nyuma y'urupfu rwa Se yahise ashinga umuryango ufasha abantu bafite indwara zo mu mutwe kwishyura ubuvuzi.