Blog

Mu mukino APR FC yaraye itsinzemo Rayon Sports 2-0, abafana b’iyi kipe y’Ingabo z’Igihugu bagaragaje ko banabonye umuti w’umurindi w’aba-Rayon wakangaga benshi.

Mbere y’umukino ubwoba bwari bwinshi no ku bakinnyi ba APR FC bibaza ukuntu bazakina uyu mukino wa mbere w’agapingane mu rw’Imisozi 1000 nta bafana bahari cyane ko bari bamaze igihe bigaragara ko bataza kubashyigikira.

Si bo gusa kuko n’abakunzi b’umupira w’amaguru bari bafite aya matsiko niba koko abakunzi ba APR FC bari buyitererane kuri uyu mukino, bakibaza uko abakinnyi babyitwaramo imbere y’umukeba uzwiho kugira abafana bafite umurindi ukomeye cyane uhungabanya abo bahanganye.

Umunsi w’umukino warageze ku wa Gatandatu tariki ya 9 Werurwe 2024, wabereye kuri Kigali Pelé Stadium saa 15h00′.

Abafana bo bari babukereye ku mpande zombi, baje ari benshi cyane yaba ari ku ruhande rwa APR FC ndetse n’urwa Rayon Sports.

Abafana ba Rayon Sports bagerageje ibishoboka byose ariko aba APR FC basanga babigiye imitwe

Kimwe mu byo abakunzi ba Rayon Sports bazwiho, ni ugufana guhera ku munota wa mbere kugeza ku wa nyuma.

Aba baba bavuza ingoma, baririmba indirimbo z’ikipe ya bo ndetse n’izo gusebya mukeba, amashyi ya bo ari wo mwihariko wa bo ni kimwe mubihungabanya uwo bahanganye.

Gusa abari kuri Stade ejo mu ntangiriro barabibonaga ko batari buze koroherwa uyu munsi bitewe na morale abakunzi ba APR FC bari bafite.

Wabonaga aho bari hose bafite utuvuvuzela duto, benshi mbere y’uko umukino utangira babonaga ari ibisanzwe, gusa muri izo vuvuzela ni ho ibanga rya bo ryari rizingiye.

Nk’ibisanzwe umukino ugiye gutangira abakunzi ba Rayon Sports bafite umuco wo gukoma amashyi y’aba-Rayon, kuri iyi nshuro babaye bakijya kuyakoma vuvuzela z’abakunzi ba APR FC zirungikanya ziyaburizamo, ntiyumvikana.

Aha byahise bigaragara ko bitari buze koroha kuko uburyo izo vuvuzela zumvikanaga byari biteye ubwoba.

Uko umukino wagendaga wigira imbere abakunzi ba Rayon Sports bageragezaga no kuririmba ngo batere imbaraga abakinnyi ba bo ariko amajwi ntarenge umutaru, ingoma zarabiswe ariko kumvikana biba ingora bahizi kubera izi vuvuzela zavugijwe iminota 90 yose nta kuruhuka.

Umukino warangiye APR FC itsinze ibitego 2-0 bya Niyigena Clement na Niyibizi Ramadhan.

Kuwa 10 Werurwe 2024, Israel Mbonyi ukunzwe mu ndirimbo “Nina Siri” imaze kurebwa na Miliyoni 39 kuri Youtube, yujuje ikinyacumi kuva yatangira umuziki mu buryo bw'umwuga. Tugiye kwitsa ku mateka ye.

Israel Mbonyicyambu wamamaye nka Israel Mbonyi ni umuhanzi w'umunyarwanda umaze kugwiza ibigwi mu bijyanye no kwandika indirimbo zihariye ndetse n'uruhare rukomeye amaze kugira mu iterambere ry'umuziki wo kuramya no guhimbaza Imana.

Mbonyi yavukiye mu muryango w'abakristo mu gihugu cya Repubulika Iharanira Demokarasi ya Congo, hari kuwa 20 Gicurasi 1992. Yatangiye kwiyumvamo urukundo rw'umuziki mu bwana bwe.

Uyu musore nubwo ubuzima bwe yabwerekeje mu muziki ariko afite impamyabumenyi mu birebana na Pharmacy yakuye mu Buhinde.

Ubwo yagaraniraga na RTV mu 2022 yavuze ko yenda gusoza icyiciro cya Gatatu mu birebana na Public Health kandi ko ari cyo kintu abona yakora abaye adakora umuziki. Aherutse gutangaza ko afite gahunda yo gukomeza amashuri kugera ku rwego rw PhD.

Israel amaze kwigwizaho igikundiro yaba mu Rwanda no hanze yarwo mu bihugu nka Tanzania na Kenya

Israel yatangiye kwiga umuziki akiri muto aho yigishwaga n'umwarimu we mu bice bya Musanze. Mu banyeshuri bagera muri 30 bari batangiranye, ni we wabashije gusoza amasomo yo kwiga gitari.

Kuwa 10 Werurwe 2014 ni bwo yashyize hanze indirimbo ye ya mbere yanitiriye Album yashyize hanze muri uwo mwaka. Ibi bisobanuye ko kuri uyu wa 10 Werurwe 2024 yujuje imyaka 10 amaze mu muziki.

Iyi Album ya mbere yise “Number One” yariho indirimbo zagize igikundiro cyo hejuru nka Yankuyeho Urubanza, Ku Migezi, Nzibyo Nibwira, Ku Musaraba, Ndanyuzwe, Hari Impamu na Agasambi.

Mu mwaka wa 2023 Mbonyi yatangiye kwagura uburyo bw'imikorere atangira kuririmba mu giswahili. Ni ibintu byamuhiriye guhera kuri Nina Siri yabaye agatangaza kuva yayishyira hanze kuwa 26 Kamena 2023.

Ibitaramo bye biritabirwa byo ku rwego rwo hejuru ku buryo hari nubwo abantu bahagera bagataha babuze aho bajya

Iyi ndirimbo yinjije Israel Mbonyi mu ruhando rw'abaririmbyi bakoresha igiswahili bihagazeho muri Afurika y'Iburasirazuba ndetse atangira kugwiza igikundiro mu bihugu bitandukanye nka Tanzania na Kenya.

Mu kiganiro uwahoze ari Visi Perezida wa Kenya Kalonzo Musyoka aheruka kugirana na TV47, yumvikanye avuga ko yumvaga Israel Mbonyi ari umunya-Tanzania kubera igikundiro indirimbo ze zimaze kugwiza muri iki gihugu.

Kalonzo ati: 'Nahoze ndeba uyu musore muto Israel Mbonyi, ni umunyarwanda ariko aririmba nk'umunya-Tanzania. Afite inganzo ihambaye ubwo yaririmbaga Nina Siri.'

Nyuma ya Nina Siri kandi Israel Mbonyi yakomeje gushyira hanze izindi ziri mu Giswahili nka Nitaamini, Sikiliza n'izindi. Yigeze gutangaza ko bitari cyera azashyira hanze Album iri mu rurimi rw'Icyongereza.

Israel Mbonyi amaze kuba ikimenyabose kubera igitaramo ngarukamwaka akora cyitwa Icyambu Live Concert kibera muri BK Arena.

Inshuro amaze kugikora, abantu barakubise buzura iyi nyubako. Byitezwe ashobora kuzaba umuhanzi wa mbere nyarwanda wujuje Amahoro Stadium izaba yakira abagera ku bihumbi 60.

Israel Mbonyi amaze gutaramira mu bihugu bitandukanye yaba muri Afurika no hanze yayo

Kuva yatangira umuziki, amaze kwegukana ibihembo bitandukanye birimo Groove Awards Rwanda yibitseho mu mwaka wa 2017, mu mwaka wa 2023 kandi ari mu bahataniye African Entertainment Awards USA.

Amaze kwegukana kandi ibihembo binyuranye bindi nka The Choice Awards, Kiss Summer Awards, Isango na Muzika Awards.

Mbonyi amaze gutaramira mu bihugu bitandukanye birimo Tanzania, Burundi, Israel, Canada ndetse mu mpeshyi afite igitaramo muri Belgium aho azaba ataramiye ku nshuro ya Kabiri. Azahava yerekeza muri Uganda.

Nk'umuhanzi uririmba indirimbo zo kuramya no guhimbaza Imana, mu bintu ashyira imbere harimo isengesho no gusoma Bibiliya.

Imyaka 10 agiye kuyuzuza amaze gufata imitima y’abafana n’abari hanze y’imipaka y’uRwanda

Higeze gucicikana ifoto uyu musore ari kumwe n'umukobwa w'ikizungerezi kugeza ubu benshi bemeza ko ari umukunzi we nubwo nta kintu we ku giti cye yigeze abivugaho.

Nubwo bigoye kumenya imitungo y'ibyamamare mu Rwanda, ariko uyu mugabo ari mu bahanzi bivugwa ko bafite ubutunzi bwo hejuru. Ikinyamakuru cya Gikristo kitwa Paradise giherutse kumushyira ku mwanya mbere mu baramyi bakize cyane mu Rwanda.

Abafana baturutse muri Kenya baje mu gitaramo cya Israel Mbonyi byitezwe ko mu kinyacumi cya Kabiri agiyemo azaca agahigo akuzuza Amahoro Stadium Israel Mbonyi akora indirimbo zikora ku mitima y’abantu mu byiciro bitandukanye aha yasuhuzanyaga na Perezida Kagame

KANDA HANO UREBE INDIRIMBO ZA ISRAEL MBONYI SIKILIZA AHERUKA GUSHYIRA HANZE

 

Abantu barabyibuka cyane rwose nk’ibyabaye ejo ndetse amwe mu mafoto n’amashusho agaragaza Bruce Melodie, uwari umukunzi wa The Ben ndetse amufata nka mukuru we yigiraho byinshi, ariko umunsi wabaye umwe ingimbi iba ibaye umugabo kugeza ubu imyaka ibaye ine agaragaza ko uwo yakundaga ubu bahanganye kandi rwose bimaze kujya mu mitwe ya benshi.

Bruce Melodie nk’umuhanzi watangiye umuziki awusangamo bakuru be, hari aho amahitamo yamuganishaga ndetse hari n’abahanzi yakundaga. 

Dushingiye ku by’amakuru ya hafi y’uyu musore avuga ndetse tukareba na bimwe mu bimenyetso byaba bibitswe na murandasi, Bruce Melodie yakundaga cyane inganzo ya The Ben n’ubwo n’ubu utavuga ko atakiyikunda ahubwo akaba yarafashe kwiyambura iyo sura bitewe no guhabwa serivisi mbi n’uyu yafatiragaho urugero.

Muri 2017 by’umwihariko ubwo The Ben yataramaga mu gitaramo cya “East African Party’ abahanzi bari bamuherekeje bari barimo Bruce Melodie. Muri 2020 kandi nabwo ubwo uyu muhanzi yagarukaga mu Rwanda mu gitaramo cyo gutangira umwaka n’abakunzi ba muzika, n’ubundi cya ‘East African Party’ nabwo Bruce Melodie yari ari mu bahanzi bamufashije gutaramira abanyarwanda.

Bruce Melodie ntiyahwemaga kugaragara ko ari umukunzi wa The Ben

Bruce Melodie yacishagamo agafata agafoto k’urwibutso iyo yabaga yahuye na The Ben

Icyakora kuva muri uyu mwaka byatangiye guhinduka. Ku ikubitiro si Bruce Melodie watangije iyo mpinduramatwara ahubwo abafana be bari batangiye kuba benshi ndetse ubwo yabaga ari mu bihe byiza, ni bwo The Ben na mugenzi we Meddy bafatwa nk’impanga mu muziki batangiye gusa n’abacika intege.

Kuva muri 2020 abakunzi ba Bruce Melodie batangiye gufatirana izo ntege nke za The Ben na Meddy bari bayoboye, batangira kubona no kuvaga ko uyu muhanzi yaba yaramaze kugera ku rwego nk’urwabo. Aha niho hari hagiye gutuma uwari inshuti ahinduka umwanzi.

Muri iki gihe umuhanzi The Ben yahamagaye Bruce Melodie nk’umuhanzi wari uhagaze neza icyo gihe kugira ngo bakorane indirimbo banarusheho guteza imbere umuziki Nyarwanda.

Bruce Melodie yakiriye telefoni n’amashyushyu menshi ndetse yitabisha amagaru asanga The Ben muri Studio ari hamwe na Made Beats. Ubwo Bruce Melodie yageraga aho The Ben yari ari, yahasanze Made Beats ndetse na Zizou Alpacico.

Bruce Melodie nk’uko aherutse kubitangaza, yasanze The Ben arimo gukina ‘Play station’ na Zizou Alpacino, ahita asanga Made Beats muri studio batangira gukora ku ndirimbo bategereje The Ben.

Aba bombi bakoze indirimbo, Bruce Melodie ashyiramo igitero ariko bakoze kuri The Ben wari wamuhamahaye akomeza kwikinira wa mukino.

Ibi byabaye ubugira kabiri, Bruce Melodie arataha hanyuma ategereza ko wenda hari umunsi The Ben azongera kumuhamagara akamubwira icyavuye muri wa mushinga yamuhamagarizaga.

Ibi ku ruhande rwa Bruce Melodie yabifashe nk’agasuzuguro k’indengakamere. Amakuru agera ku InyaRwanda avuga ko Bruce Melodie yahise asiba nimero ya telefoni y’uyu muhanzi, areka no kumukurikira ku mbuga nkoranyambaga n’ahandi ndetse ahiga guhangana nawe bigiye kure.

Umwe mu bantu ba hafi ya Bruce Melodie, yaduhishuriye ko ari ho havuye imvugo yo kwita ‘Abanebwe’ The Ben na Meddy.

Muri 2021 ni bwo ku mbuga nkoranyambaga hasakaye amajwi ya Bruce Melodie avuga ko adakwiriye kugereranwa na The Ben na Meddy kuko ari abanebwe we akaba ari umukozi cyane.

Aya majwi yarasakaye cyane, akwira hose, abafana be bamwe bavuga ko ari mu kuri mu gihe abakunzi ba The Ben na Meddy bo bamurakariye cyane, bakavuga ko ibyo yakoze ari ukurengera, ataragera ku rwego rwabo. Aha ihangana ryari ryamaze kwerurwa.

Uwaganirije InyaRwanda yagize ati “Erega ariya majwi wumvishe Bruce Melodie yita Meddy na The Ben abanebwe, ntabwo yabivugiye ubusa. Bruce kuva Ben yamuhamagara ngo bakore indirimbo ntibayikore yarababaye ni nawe yashakaga kubwira ahubwo ni uko akenshi The Ben ajyana na Meddy mu bintu byinshi”.

Iyi nzigo yarakuze kugera ubwo Bruce Melodie abifashijwemo na Made Beats, bakuye amata ku munwa The Ben muri 2022 ubwo yari yabonye umushoramo imari, Coach Gael, akaza kwisanga yahinduye uruhande arimo gukorana na Bruce Melodie no kugeza ubu.

Nk’aho ibyo bidahagije, Bruce Melodie yahize gukubita agakoni ku nda The Ben, umunsi bahuriye mu gitaramo!

Mu mwaka wa 2023 ni bwo ku mbuga nkoranyambaga hasakaye amagambo ya Muyoboke Alex asaba ko aho kugira ngo hage hahoraho intambara y’amagambo hagati ya The Ben na Bruce Melodie, bakwiye gukora igitaramo cy’ihangana ‘Battle’ hanyuma hakagira uwemeza undi.

Aya magambo yasamiwe hejuru na benshi ndetse na Bruce Melodie avuga ko icyo gitaramo kibaye, yamubakubitira agakoni kunda. Kugeza ubu ni gake Bruce Melodie yakora ikiganiro kikarangira hatajemo izina The Ben kandi mu buryo bwo guhangana cyangwa bwo kunnyegana.

Umwaka ushize wa 2023 ni bwo The Ben yavuze kuri Bruce Melodie. The Ben yavuze ko abona hadakenewe ‘Battle’ ahubwo bakwiriye guhabwa igitaramo cyabo cyo kunga imbaraga aho kuzitatanya. Yanaboneyeho asaba Leta kubaha stade Amahoro akaba ari ho icyo gitaramo cyabera.

Mu ntangiriro za Gashyantare 2024 aba bahanzi bombi bahuriye muri Rwanda Day yabereye muri Leta Zunze Ubumwe za America muri Washington DC. Bruce Melodie yavuze ko yahuye na The Ben bagahoberana biratinda.

Uwavuga ko iyi ntambara y’amagambo yabo yagize umumaro ntiyaba abeshye kuko kugeza ubu urwego rwa Bruce Melodie rwarazamutse cyane ndetse benshi banemeza ko kugeza ubu ari we uyoboye umuziki nyarwanda n’ubwo ari ingingo iburanwaho kenshi.

Iby’iyi ndirimbo yabaye imbarutso yo gushondana, yo irengero ryayo ni Made Beats warimenya kuko niwe wari wayitangiye, gusa amakuru avuga ko iyi ndirimbo yari yatangiwe yaje guhabwa Bruce Melodie akayikoramo iyindi ku giti cye.

Bruce Melodie yabaga uwa mbere mu nkwifuriza The Ben isabukuru y’amavuko nziza, akamwita umwami

Bruce Melodie yasuzuguwe na The Ben bituma amaramariza kutongera guhuza umubano

The Ben yahamagaje Bruce Melodie ngo bakore indirimbo ahageze ntiyamwitaho

Kugeza ubu Bruce Melodie na The Ben barebana ay’ingwe