Blog

Mu gihe cya Jenoside, Abatutsi bakoraga mu Ruganda rw'Icyayi rwa Gisakura bagerageje kwihisha mu cyayi no mu nzu z'uruganda, abari abayobozi barwo na bamwe mu bayobozi ba Perefegitura ya Cyangungu na Komine Kagano, babasaba kuva aho bihishe babizeza kubarindira umutekano nyamara bahise bashyirwa mu modoka z'uruganda bajyanwa kuri paruwasi bicirwayo.

Mu gikorwa cyo kwibuka aba bakozi kuri uyu wa 8 Kamena 2024, Umuyobozi w'Uruganda rw'Icyayi rwa Gisakura, Kanyesigye Emmanuel yavuze ko kwibuka ari inshingano ya buri wese kugira ngo urumuri rw'icyizere n'ubudaheranwa rutazigera ruzakomeze kumurikira abariho n'abazabakomokaho, bikomeze bibe uruhererekane ibihe byose.

Ati 'Aya mateka yacu nubwo ashaririye ntazigera na rimwe yibagirana. Dukomeze kuyavomamo imbaraga zo gukomeza kubaho neza kugira ngo duheshe ishema abacu, duhora twibuka kandi tubabwire ngo ntabwo muzazima duhari.'

Kanyesigye yavuze ko ubwo Jenoside yakorwaga hari ibihugu byari bifite ububasha n'ubushobozi bwo kuyihagarika, ariko ko bitigeze bigira ubushake bwo kuyihagarika ihagarikwa n'Inkotanyi.

Ati 'Ndashimira ubutwari ntagereranwa bw'ingabo zari iza FPR-Inkotanyi, ziyobowe na Perezida Paul Kagame, dushimira cyane kandi tuzahora dushimira. Bitanze mu buryo budasanzwe, batabara abicwaga, ari nako bahanganye n'umwanzi n'Interahamwe'.

Abatutsi bakoraga mu ruganda rw'icyayi cya Gisakura bahigishijwe imbwa, bicwa umugenda abandi bicirwa mu ishyamba rya Nyungwe ku buryo n'ubu bamwe muri bo imibiri yabo itaraboneka ngo ishyingurwe mu cyubahiro.

Mukarusine Olive, wabaga muri uru ruganda kuko ariho umugabo we yakoraga, avuga ko umugabo we yishwe tariki 13 Mata 1994 amusigira abana bane barimo uwari ufite ukwezi kumwe, agashimira ubuyobozi bw'uruganda ko butahwemye kumuba hafi mu rugendo rutari rworoshye rwo kongera kwiyubaka.

Ubuyobozi bw'uruganda buhamya ko buzakomeza gufasha abarokotse Jenoside yakorewe Abatutsi baba abarukoramo n'abakora hanze yarwo.

Umuyobozi w'Akarere ka Nyamasheke, Mupenzi Narcisse yavuze ko kimwe mu bintu bikomeye Jenoside yasenye ari ubumwe bw'Abanyarwanda, ashima ko Inkontanyi zashyizeho Leta y'ubumwe ikubaka ubumwe bw'Abanyarwanda, ikanasubiza abantu uburenganzira n'ubwisanzure bari barambuwe.

yagaragaje ko urubyiruko rufite umukoro wo gutanga umusanzu mu kurwanya abashaka gusubiza igihugu mu mateka mabi cyanyuzemo.

Ati 'Amateka mabi yabayeho y'ubutegetsi bubi hari urubyiruko rutayazi, kandi ni rwo rwagize amahirwe yo kwiga, rukwiye kuyiga rukayamenya, rukadufasha kurwanya umwanzi ushaka kudusubiza muri ya mateka mabi'.

Abayobozi mu nzego zitandukanye bafashe mu mungo uru ruganda mu kwibuka abakozi barwo bishwe muri Jenoside bazira ko ari abatutsi

Umuyobozi w’Uruganda rwa Gisakura, Kanyesigye Emmanuel yashimye ingabo zahoze ari iza RPA zitanze zitizigama zigahagarika Jenoside

Munyanshoza Dieu donnee yafashije mu kwibuka mu ndirimbo abari abakozi b’uruganda rw’icyayi rwa Gisakura

Mukarusine Olive, warokoye muri uru ruganda ashimira uruganda rukomeje kumuha hafi nyuma y’uko umugabo we warukoragamo yishwe muri Jenoside

Meya Mupenzi yashimiye Inkotanyi ko nyuma yo guhagarika Jenoside zashyizeho Leta buri wese yisangamo

Abakozi n’abaturiye uruganda bifatanyije narwo mu kwibuka abakozi barwo bishwe muri Jenoside

Pst Dr. Rutayisire yari mu kiganiro cyagenewe urubyiruko rusaga 1500 rwo mu turere twose tw'igihugu rwitabiriye Igihango cy'Urungano kuri uyu wa 8 Kamena 2024, hibukwa ku nshuro ya 30 urubyiruko rwazize Jenoside yakorewe Abatutsi.

Yagaragaje ko itorero ry'igihugu ryahozeho mbere y'ubukoloni ryafashaga abana b'Abanyarwanda kwiyumva nk'abana b'igihugu.

Pst Dr. Rutayisire yageze mu mashuri abanza mu 1965, ndetse mu gihe cyose Abatutsi barahagurutswaga, n'Abahutu bagahagurutswa bagamije kubiba urwango mu bana bakiri bato.

Ati 'Hari ubwo abantu bavuga ngo twe ntitwari tuzi icyo twari cyo, abo ni abo muri za 1970. Kuko nk'ubwo twebwe bo muri za 1960 nk'ubwo njye mu 1965 sinari kuyoberwa uwo ndi we twaramaze iminsi twirukanka,twihisha mu 1961, mu 1963 papa bakamwica ntabwo wari kumbwira ngo sinzi uwo ndi we.'

'Twari tubizi kuko twebwe amateka yari yaratwigishije ko hari abahigwa hakaba n'abahiga ukamenya ngo uriya ni umuhutu, uyu ni umututsi kandi n'abana bakabikubwira. Ndibuka ko twajyaga dutaha tuvuye ku ishuri ugasanga ku migwegwe yose, kuva iwacu kugera ku ishuri hari kilometero enye ku migwegwe hose habaga handitseho. Njye na mushiki wanjye unkurikira twari abahanga mu ishuri ugasanga ku migwegwe handitseho ngo ziriya nzoka zo kwa Karasira tuzazica.'

Yavuze ko mu isomo ry'uburere mboneragihugu abigishaga ibisobanuro by'amabara y'ibendera ry'igihugu babihuzaga no kubiba urwango hagati y'Abahutu n'Abatutsi.

Pst Dr. Rutayisire yasobanuye ko mu gihe cyo kuririmba indirimbo yubahiriza igihugu hari igice ataririmbaga kirimo amagambo avuga ngo 'nshimira abarwanashyaka.'

Ati 'Nazunguzaga umunwa ngo batamenya ko ntari kuririmba, ariko nashoboraga nte gushimira abantu bishe data?'

'Gusenyuka k'ubunyarwanda, barabanje bavanaho inkingi zatugiraga Abanyarwanda binjizamo sisiteme ituma tutiyumva mu bunyarwanda, bamwe bakibona mu moko, bamwe bakaba abanyamahanga abandi bakaba abenegihugu, bakabyigisha mu ishuri, bakabishyira mu bikorwa barangiza na politike ikabishimangira.'

Yagaragaje ko mu 1983 yari yarasoje amasomo ya kaminuza ari n'umwarimu muri kaminuza ariko bamwirukanayo bamujyana kwigisha mashuri y'icyiciro rusange (Tronc Commun), ubuyobozi bwayo bugashaka kumuhagararaho ariko icyemezo cyari cyanditseho ko yirukanywe kubera bivuze ku mpamvu za Leta birangira ahavuye.

Yagaragaje ko yaba repubulika ya mbere n'iya kabiri zose zari zaramunzwe n'ivangura n'amacakubiri asaba urubyiruko kwirinda ingengabitekerezo ya jenoside aho iva ikagera.

Rev Pst Dr. Antoine Rutayisire yabwiye urubyiruko ko mu ndirimbo yubahirizaga igihugu no mu ibendera hari harimo byinshi bitanya Abanyarwanda

Urubyiruko rwitabiriye Igihango cy’Urungano rwashimye ibyo igihugu cyagezeho

Kuri iki Cyumweru tariki 09 Kamena 2024 ku rusengero rwa Elanayo Pentecost Blessing, habereye umuhango wo kubatiza Abakristo bashya barimo Dj Drianne uzwi cyane mu myidagaduro. Ni igikorwa cyayobowe na Rev Prophet Ernest Nyirindekwe.

DJ Brianne akimara kubatizwa, yaganiriye n’itangazamakuru, avuga ko yumva yuzuye umunezero kandi akaba yishimiye cyane kuba ari butangire kujya afata igaburo ryera.

Yahishuye ko kubatizwa kwe byashimishije cyane umubyeyi we utari umufitiye icyizere ko biza gukunda akagera aho abatirizwa.

Ati: 'Mama yishimye cyane ngo byamunejeje kuba byibuze mfite itorero mbarizwamo.'

Mu bihe bitandukanye Dj Brianne yagaragaye mu bikorwa byo gufasha abatishoboye binyuze mu muryango yatangije witwa Brianne Foundation.

Dj Brianne ni Umunyamakuru wa Isibo Radio imwe mu zigezweho mu mujyi wa Kigali inashamikiye kuri Isibo TV nayo yamaze kuryubaka mu myidagaduro.

Nyina wa DJ Brianne yishimiye kuba umukobwa we abonye aho abarizwa mu bijyanye no gusenga DJ Brianne uri mu bari n’abategarugori bari mu bihe byiza mu myidagaduro nyarwanda, yamaze kuba icyaremwe gishya yakira Yesu Kristo nk’Umwami n’Umukiza we

Itangazo rya Minisiteri y'Ububanyi n'amahanga mu Rwanda ryagagaraje ko Minisitiri Dr. Vincent Biruta yakiriwe kuri uyu wa 8 Kamena 2024.

Uyu mugabo wamwakiriye yamenyekanye muri Politike y'Isi nka Hassanal Bolkiah ariko amazina yiswe n'ababyeyi ni Kebawah Duli Yang Maha Mulia Paduka Seri Baginda Sultan Haji Hassanal Bolkiah Mu'izzaddin Waddaulah ibni Al-Marhum Sultan Haji Omar 'Ali Saifuddien Sa'adul Khairi Waddien, Sultan dan Yang Di-Pertuan Negara Brunei Darussalam.

Umwami Hassanal Bolkiah ibni Omar Ali Saifuddien III aheruka mu Rwanda mu 2022 ubwo we na bagenzi bari bitabiriye inama ya CHOGM yabereye mu Rwanda

Minisitiri Dr Vincent Biruta kandi wagiriye uruzinduko muri iki igihugu yanaganiriye na mugenzi we, Dato Erywan Pehin Yusof.

Ibiganiro abaminisitiri bombi bagiranye byibanze cyane ku kongera kureba uko imikoranire hagati y'ibihugu byombi yatangijwe mu 2020 ihagaze, ndetse no kurebera hamwe inzego nshya z'imikoranire nk'uko byatangajwe na Minisiteri y'Ububanyi n'Amahanga mu Rwanda.

Brunei ni igihugu gito giherereye ku kirwa cya Borneo muri Aziya y'Amajyepfo, kizengurutswe na Malaysia n'inyanja y'u Bushinwa.

Kugeza ubu igihugu kiyobowe na Sultan Hassanal Bolkiah umwe mu bagabo batunze agafaranga gatubutse kuri iyi si ya Rurema kandi bivugwa ko abaho mu buzima budasanzwe.

Ubukungu bw'iki gihugu bushingiye ku musaruro w'ibikomoka kuri Petiroli na gazi kandi kikaba igihugu cya mbere gikize ku birebana n'umusaruro ku buryo abaturage binjiza amafaranga menshi.

Gituwe n'umubare munini w'abayisilamu kuko ari nayo mahame kigenderaho ya 'Sharia' bakaba bakoresha ururimi rw'Icyongereza ku bwinshi nubwo ururimi gakondo ari Malay.

Icyo gihugu cyashyize imbaraga cyane mu guteza imbere urwego rw'uburezi n'ubuvuzi ku buryo bitangirwa ubuntu ku baturage kandi igihugu cyashoye ku buryo bufatika mu kubaka izo nzego mu myaka myinshi ishize.

Zimwe mu nzego zacyo ziteye imbere zirimo ikoranabuhanga no guhanga ibishya, uburezi, ubukerarugendo, ubuzima, ubucuruzi n'ishoramari, umutekano n'ibindi bitandukanye impande zombi zashima gukoranamo.

Ubwo Minisitiri Dr Vincent Biruta yakirwaga na Sultan wa Brunei

Aba bayobozi bagiranye ibiganiro

Harebwe ku mikoranire y’impande zombi