Blog

Police FC irusabukura imyitozo kuri uyu wa Mbere ariko ikaba igomba gukorwa mu muhezo , bifitanye isano n’uko ari abakinnyi benshi ba yo batarahagera.

Kuri uyu wa Mbere tariki ya 10 Kamena 2024 ni bwo Police FC itangira imyitozo yitegura umwaka w’imikino wa 2024-25, ni imyitozo ibera kuri Kigali Pele Stadium.

Nk’ikipe izahagararira u Rwanda mu mikino Nyafurika ya CAF Confederation Cup, igomba gutangira imyitozo hakiri kare kugira ngo abakinnyi bamenyerane.

Ni imyitozo igomba kuba mu muhezo nta muntu n’umwe wemerewe kuyireba bitewe n’uko hari ibyo iyi kipe ivuga ko batarashyira ku murongo.

Muri byo ISIMBI yabashije kumenya ni uko abakinnyi ba yo bose izakoresha bataraboneka barimo n’abashya iheruka kugura.

Police FC iheruka gusinyisha rutahizamu ukomoka muri Nigeria, Ani Elijah wakiniraga Bugesera FC, hari kandi Joackiam Ojera wahoze muri Rayon Sports.

Police FC ikaba iri mu biganiro n’abandi bakinnyi batandukanye ndetse ikaba itarama kuganira n’abo izongerera amasezerano.

Police FC yegukanye igikombe cy’Amahoro cya 2023-24 ikaba ari yo izahagararira u Rwanda mu Mikino Nyafurika ya CAF Confederation Cup.

Kuva muri Kamena 2023 mu Karere ka Nyabihu habaruwe abana b'abakobwa babyaye imburagihe 87, aho umubare munini w'abana babyaye bakunze kugira ibibazo by'imirire mibi bitewe n'ubuzima butoroshye ababyeyi babo bahura nabwo.

Uwiduhaye Furaha wabyaye afite imyaka 17, yavuze ko akimara kubyara umuryango we wamutoteje cyane kugeza ubwo yumvise umwana yabyaye atakimukunda.

Ati 'Byatumye ntakunda uwo nabyaye kuko nabonaga ari we soko y'uruhurirane rw'ibibazo ndimo, kumwitaho birananira arwara bwaki nanjye sinasigara. Iyo ababyeyi batatweretse urukundo natwe ntitubasha kwita kubo tubyaye, bikabaviramo kugwingira.”

Nyiramahirwe Seraphine we wabyaye afite imyaka 16 yagize ati “Namaze kubyara iwacu ntibiyakira, mpinduka ikibazo mu muryango, uwanteye inda na we aranyihakana burundu, ibibazo birandenga sinabona ibyo umwana akeneye nk'imbuto, ibikomoka ku matungo n'ibindi. Hari n'abo birenga bakabata bakigendera, umwana nk'uwo ahita agwingira. Abenshi ni ubu buzima twiberamo.”

Umuyobozi w'Akarere ka Nyabihu wungirije Ushinzwe Imibereho Myiza y'Abaturage, Simpenzwe Pascal, yemeza ko ibibazo nk'ibi bihari, gusa ngo bakomeje gukora ubukangurambaga bwo kwigisha ababyeyi kwita ku bana bose kimwe.

Yagize ati “Ikibazo cy'abana babyarira iwabo bagahura n'ibibazo bibakomerera mu miryango ibatoteza turagifite. Akenshi abo babyara bagira ibibazo by'imirire mibi n'igwingira, aha twegera ababyeyi babo tukabigisha kwakira ibyabaye ku bana babo.”

“Tubasaba kutabatererana ahubwo bakabigisha kutabisubiramo, natwe nk'ubuyobozi tukabafashiriza mu miryango yabo, bamwe bagasubira ku ishuri, abandi bakigishwa imyuga bigatuma bigarurira icyizere bakita ku bana babo.”

Imibare n'ubushakashatsi bwakozwe mu Karere ka Nyabihu mu mezi atandatu ashize, yagaragaje ko abana bafite imirire mibi n'igwingira bageze kuri 35,1%, aho ku isonga mu bitera iki kibazo, harimo umubare munini w'abangavu babyariye iwabo bagahura n'ibibazo by'ubuzima bibakomereye, amakimbirane mu miryango n'ibindi.

Imibare y'Ikigo cy'Igihugu cy'Ibarurishamibare, NISR, yagaragaje ko mu 2023 abangavu bafite imyaka iri hagati ya 10 na 19 babyaye bagera kuri 19,406 mu gihugu hose.

---

Babigarutseho kuri uyu wa 08 Kamena 2024 mu gikorwa cyo kwibuka ku nshuro ya 30 Jenoside yakorewe Abatutsi. Ni umuhango wabimburiwe n'urugendo rwo kwibuka rwahereye ku cyicaro gikuru cya Kaminuza ya UTAB berekeza ku Rwibutso rwa Jenoside rwa Gisuna.

Umuyobozi Mukuru wa UTAB, Padiri Munana Gilbert yavuze ko muri iri shuri harimo urubyiruko rwiyemeje guhangana n'abahakana bakanapfobya Jenoside yakorewe Abatutsi bifashishije imbuga nkoranyambaga, ashimangira ko ari urugamba bazakomeza kugeza ingengabitekerezo ya jenoside icitse burundu.

Yagize ati “UTAB nka Kaminuza turabanza kwihanganisha abarokotse Jenoside yakorewe Abatutsi tukaba tubafata mu mugongo, kubaha umwanya ndetse n'agaciro. Twabuze Ababyeyi, abana, inshuti n'abaturanyi, niyo mpamvu tutazakomeza kwihanganira uwashaka kugarura amacakubiri wese, Jenoside yabaye ntizagaruke ukundi”.

Padiri Munana yagaragaje ko nta burezi bushobora gutangirwa aho ubumwe n'ubuzima bw'abantu bibangamiwe.

Ati “Tugomba kwamagana twivuye inyuma imizi n'amashami yose ahembera ingengabitekerezo ya Jenoside. Turashima by'umwihariko abagize uruhare mu guhagarika no kurokora Abatutsi bahigwaga bakarokoka bigizwemo uruhare n'ingabo zahoze ari iza RPA bahagarariwe na Nyakubahwa Paul Kagame”.

Musenyeri Musengamana Papias, Umushumba wa Diyosezi Gatolika ya Byumba yasabye barokotse Jenoside yakorewe Abatutsi kudaheranwa n'agahinda kuko bafite amaboko n'igihugu kibakunda, bityo bagomba kubaho bizeye ko Imana yabarokoye izakomeza kubarinda ikibi.

Umuhuzabikorwa wa AERG muri UTAB, Imenagitero Byiringiro Salomon yavuze biyemeje kubaka igihugu kizira amacakubiri, binyuze mu guhangana n'abahakana n'abapfobya Jenoside yakorewe Abatutsi.

Umuyobozi wa Ibuka mu karere ka Gicumbi, Kamizikunze Anastase yagaragaje ko abagize uruhare mu kwica Abatutsi haba abashoye ibitekerezo, amafaranga, imitungo no gukora ubwicanyi bagomba kumenya ko ibyo bakoze atari byo, ko bagomba kwisubiraho.

Senateri Kanyarukiga Ephrem yavuze ko kuva 1959 abakoloni basenye umubano n'urukundo Abanyarwanda bahoranye.

Ati “Mu mitima yacu harimo ibintu bibiri, harimo agahinda kenshi, ariko harimo no gushima Inkotanyi zahagaritse Jenoside, kurokora ntabwo batoranyaga bafataga buri umwe ufite ikibazo bakamwitaho, harabaye ntihakabe twibuke twiyubaka Jenoside ntizagaruke ukundi”.

Igikorwa cyo kwibuka cyaranzwe n' Ubutumwa butandukanye bugamije kwamagana Jenoside n'igisa nayo, udukino twakozwe n' Abanyeshuri ba UTAB AERG Imenagitero berekana uburyo hateguwe ivangura mu 1959 hakabaho amacakubiri kugeza mu 1994 hishwe abarenga miliyoni mu minsi 100.

---

Guhera tariki 8 Kamena 2024 kugeza uyu munsi ku Cyumweru mu karere ka Huye na Gisagara haberaga irushwana ry'iminsi ibiri ryo kwibuka Alphonse Rutsindura wabaye umwarimu mu ishuri rya Petit Seminaire Virgo Fidelis de Butare.

Uyu mwarimu by'umwihariko yari umutoza w'ikipe ya Volleyball y'iki kigo ndetse akanagira n'uruhare mu iterambere ry'uyu mukino mu Rwanda. Rutsindura yitabye Imana yishwe muri Jenoside yakorewe Abatutsi mu 1994.

Iyi mikino y'uyu mwaka yakinwaga ku nshuro yayo ya 20, amakipe 50 niyo yari yitabiriye, akaba yari agabanyije mu byiciro bitandukanye. Hari harimo amakipe akina mu cyiciro cya mbere mu Rwanda mu bagabo n’abagore, ibigo by'amashuri yisumbuye, icyiciro rusange, abanza ndetse no mu bakanyujijeho mu mukino wa Volleyball. 

Ejo amakipe yakinnye yishakamo agera ku mikino ya nyuma ubundi uyu munsi aba aribwo ikinirwa muri Petit Seminaire Virgo Fidelis de Butare.

Mu cyiciro cy’abagabo, REG niyo yegukanye igikombe cyayo cya mbere cya Memorial Rutsindura 2024 itsinda Gisagara VC, amaseti 3-2. Iyari ifite igiheruka ni Police VC ikaba itaritabiriye.

APR VC niyo yegukanye umwanya wa 3 itsinze Kaminuza y’u Rwanda, Ishami rya Nyarugenge amaseti 3-0.

Mu cyiciro cy’abagore ikipe ya RRA niyo yegukanye igikombe itsinze APR VC amaseti 3-1 (13- 25; 25-16 25-2;25-21). Ikipe ya East African University WVC yegukanye umwanya wa 3 itsinze Wisdom amaseti 3-0.

Mu mashuri yisumbuye ikipe ya GSOB niyo yegukanye igikombe itsinze Petit Séminaire Virgo Fidels amaseti 3-2. Mu cyiciro rusange ( O LEVEL), umwanya wa mbere wegukanywe na GSOB itsinze Petit Seminaire Virgo Fidelis de Butare amaseti 3-2

Mu batarabigize umwuga ASEVIF niyo yegukanye umwanya wa mbere itsinze Relax VC amaseti 3-1.

Umuhanzikazi w’Umunya-Canada Celine Dion, yagarutse ku buryo yiyumvaga ubwo indwara ya “Stiff Person Syndrome” yari imugeze habi, n’uburyo yagize ingaruka zikomeye ku buzima bwe.

Mu kiganiro Celine Dion yagiranye na NBC News yo muri Leta Zunze Ubumwe z’Amerika, yavuze ko yumvaga ameze nk’aho hari umuntu uri kumuniga, ku buryo guhumeka byamugoraga kandi akababara mu mpfundiko no mu mbavu.

Celine Dion yavuze ko iyi ndwara ikimufata yumvaga ameze nkabo bari kumuniga

Uyu muhanzi w’imyaka 57 yagaragaje ko kubera uburyo iyo ndwara kuyikira bigoye, ari kwiga kubana nayo n’uko azakomeza gahunda ze zose ntacyo byishe.

Iyi ndwara ya Stiff Person Syndrome ikaba yaramufashe mu mpera za 2022 bituma ibitaramo yari afite byo kuzenguruka Isi abisubika.

Ubwo yari arembye, umuvandimwe we Claudette niwe wakunze kugenda atanga amakuru ye, aho yigeze no kuvuga ko byashoboka ko Celine atazongera kuririmba, ariko amaze koroherwa yavuze ko azakomeza kuririmba ndetse agasubukura n’ibitaramo bye.

Yavuze ko ari kwiga kubana n'iyi ndwara kuburyo mu gihe cya vuba azagaruka mu muziki

Mu gitondo cyo kuri iki Cyumweru tariki 09 Kamena 2024, ni bwo hakinwe isiganwa rya Kigali International Peace Marathon. Iri siganwa ryakinwaga ku nshuro ya 19, ryitabiriwe n’abantu basaga ibihumbi icumi (10,000) bari bavuye mu bihugu bisaga 34.

Iri siganwa ngarukamwaka, ryakinwe mu byiciro 3 bitandukanye, harimo icyiciro cya Full Marathon kingana n’ibirometero 42, icyiciro cya Half Marathon kingana n’intera ya Kirometero 21, ndetse na Run for peace ingana na Kirometero 10 abantu bakina bishimisha.

Abasiganwa bahagurukiraga kuri BK Arena bagaca Gishushu, kuri MTN, Baho Hospital, KCC Round about, Umubano Hotel, USA Ambassador’s residence bakanyura kuri KBC, bakomereza ku kabindi, bagahinguka primature round about, bakagaruka KBC Rugando, KCC, bagahinguka ku Gishushu, bagera Chez Londo, Zigama CSS, Regina pacis, bakajya kuri Simba ya Kimironko, bakagaruka kuri BK Arena. 

Abantu birutse Full Marathon bazengurutse muri uyu muhanda 2 mu gihe abakinnye Half Marathon bahanyuze inshuro imwe.

Mu basiganwa Full Marathon, Korir Laban Kpngetich ukomoka muri Kenya niwe wevugukanye iri siganwa aho yakoresheje amasaha abiri iminota 16 n’amasegonda 6, akurikirwa na Kiplagat Cornelus Kibet Mengich Moses aza ku mwanya wa 3. Umunyarwanda waje hafi ni Hitimana Noel waje ku mwanya wa 6 ndetse akurikirwa na Nizeyimana Alexis wabaye uwa 7.

Mu bagore, Joan Kipyatich yabaye uwa mbere akoresheje amasaha 2 iminota 33 n’amasegonda 27, Maseret Abebayehu aza ku mwanya wa 2, Florence Chepsoi aza ku mwanya wa gatatu.

Abanyarwanda bari bamaze iminsi batitwara neza gusa gusa kuri iyi nshuro babonye imidari 

Mu cyiciro cy’abirutse half Marathon mu bagabo, Langat Francis yaje ku mwanya wa mbere akoresheje isaha imwe iminota 4 n’amasegonda 5, Langat Leonard Kipkoech aza ku mwanya wa 2 Mutabazi Emmanuel aza ku mwanya wa 3, naho Muhitira Felicien aza ku mwanya wa 5 nk’undi munyarwanda waje hafi.

Mu bagore: Moseti Winfridah Moraa yaje kuba uwa mbere akoresheje isaha imwe iminota 12 n’amasegonda 50, Cheruiyot Vivian Jepkogel aza ku mwanya wa kabiri, Imanizabayo Emeline yaje ku mwanya wa 3 ndetse Uwizeyimana Jeanne Gentille aza ku mwanya wa 4.

Ibihembo ku bitwaye neza

Muri buri cyiciro hahembwe abakinnyi 8 ba mbere, aho muri Full Marathon umukinnyi wa mbere yahawe ibihumbi 20 by’amadorari, uwa 8 ahabwa igihumbi.

Mu basiganwe muri Half Marathon, uwa mbere yahawe ibihumbi 5 by’idorari, mu gihe uwa 8 yahawe amadorari 400.

Minisitiri wa Siporo Aurore Mimosa mu bitabiriye Kigali International Peace Marathon 

Ange Kagame yasiganwe mu birometero 10