Blog

Ishimwe Gloria wo mu Karere ka Huye yatangiye gutinyuka akiga muri Kaminuza ishami ry'Ubukungu.

Yatangiye kwiyumvamo kuzikorera ku giti cye aho gutegereza kuzashakisha akazi atazi naho kazaturuka.

Ibyo byatumye atangira kuzigama amafaranga make yakomoraga kuri buruse ihabwa abanyeshuri biga muri Kaminuza y'u Rwanda afite intumbero zo kuzabona igishoro.

Uwo ni umwe mu rubyiruko rwavutse nyuma ya Jenoside yakorewe Abatutsi.

Ishimwe Gloria w'imyaka 27 yagaragaje ko yishimira kuba u Rwanda rutanga amahirwe ku bantu bose rutarobanuye hashingiwe ku nkomoko yabo.

Kuri ubu afite umushinga muto wo gukora ibikomoka ku ifarini ndetse no gutanga amafunguro yihuse mu Karere ka Huye.

Yagize ati 'Natangiye nkiga muri Kaminuza kuko nibazaga niba nanjye nindangiza nzajya njya gusaba akazi. Nubwo ubu bikorwa mu buryo bw'ikoranabuhanga naravuze nti sinabikora gutyo ahubwo naratekereje mbona hari icyo nanjye nakikorera.'

Yakomeje ati 'Mu mafaranga nahabwaga yo kwitunga nkavuga ngo reka nitere icyuma rimwe na rimwe, aho nari gusohoka mbikeho make nimba narikugura amapantaro abiri reka ngure imwe kugira ngo ngere ahantu nzagera ho gushyira mu bikorwa cya gitekerezo cyanjye cyo kwikorera.'

Nyuma yo kurangiza Kaminuza, Ishimwe yagannye Banki Duterimbere asaba inguzanyo y'ibumbi 500 Frw aguramo ifuru yo gukora imigati n'ama-cake ngo kuko yabonaga ko akenerwa cyane muri uwo mujyi.

Ati 'Nabonaga ama-Cake y'ubukwe dukoresha tuyakura i Kigali ndavuga ngo ntibikwiriye reka natwe twihangire ibyacu. Naratangiye ndakora gahoro gahoro.'

Nyuma yaje kujya mumarushanwa yatsindiyemo miliyoni 10 Frw ndetse aza no kujya muri Youthconekt atsindira izindi miliyoni 4.5 Frw zatumye arushaho kwagura ibikorwa bye.

Ishimwe yagaragaje ko imiyoborere myiza u Rwanda rwimakaje yatume atinyuka nk'umwana w'umukobwa akiteza imbere kandi ko abona inyungu zabyo.

Kuri ubu afite abakozi 15 avuye ku bakozi babiri gusa yatangiranye nabo ndetse umusaruro wariyongereye kuko yatangiriye ku biro bitanu kuri ubu akaba ageze ku gukora nibura ibiro 50 by'ifarini buri munsi.

Ishimwe Gloria yagaragaje ko kwihangira imirimo byagize uruhare mu guteza imbere n'urundi rubyiruko rugenzi rwe kuko mu bakozi yakoreshaga yahisemo kwishyurira amashuri yisumbuye babiri bari barayacikirije.

Yagaragaje ko nubwo akorera mu Karere ka Huye yifuza kwagura ibikorwa bye mu turere twa Nyaruguru na Gisagara cyane ko igihugu gikomeje kwagura ibikorwaremezo biborohereza mu ngendo.

Umutangabuhamya, Ishimwe Gloria mu bwuzu n’ibyishimo byinshi, nk’umwe mu rubyiruko, wabashije kwiteza imbere abikensha imiyoborere imyiza ya @rpfinkotanyi idaheza Abari n’Abategarugori. #MamaUrwagasabo #Amatora2024 pic.twitter.com/WYAkmjuxlN

— Mama Urwagasabo Tv (@Mamaurwagasabo1) June 27, 2024

Ku wa 14 Kamena nibwo Komite nshya y'ubuyobozi bw'inama y'ubutegetsi ya ASSAR yatangiye imirimo yayo aho izayobora mu gihe cy'imyaka itatu.

Andrew Kulayige usanzwe ari Umuyobozi wa Britam Insurance Rwanda ni we watorewe kuyobora iyi komite, akaba yungirijwe n'Umuyobozi wa Sanlam Life Insurance, Jean Chrysostome Hodari.

Umuyobozi wa BK Insurance Alex Bahizi yatorewe kuba Umunyamabanga naho Dianah Mukundwa uyobora Sonarwa Life Insurance atorwa nk'Umubitsi.

Kulayige aje gukorera mu ngata Annie Nibishaka, Umuyobozi wa Old Mutual Insurance wari uyoboye iryo huriro mu gihe cy'imyaka itatu ishize.

Nibishaka yashyize imbaraga muri gahunda zirimo izigamije kongerera ubushobozi abakora mu rwego rw'ubwishingizi binyuze mu mahugurwa yatanzwe hifashishijwe inzobere mu bihe bitandukanye.

Himakajwe ikoranabuhanga mu mitangire ya serivisi zimwe z'ingenzi zitangwa n'uru rwego hanashyirwa imbaraga mu bukangurambaga bugamiije kwigisha Abanyarwanda akamaro k'ubwishingizi.

Mu Kiganiro na IGIHE, Kulayige yashimye icyizere yagiriwe, ashima n'ubuyobozi bucyuye igihe ku kazi bwakoze, avuga ko yizeye kuzatanga umusanzu we mu kuzamura urwego rw'ubwishingizi mu Rwanda.

Yavuze ko komite y'Ubuyobozi bushya bwa ASSAR ifite gahunda yo gukomeza gukorana n'ibigo by'ubwishingizi mu guteza imbere serivisi bitanga hagamijwe kuzamura umubare w'ababukoresha.

Ati 'Tumaze imyaka ihagije muri iri soko ariko Abanyarwanda bagerwaho n'ubwishingizi baracyari munsi ya 2% bigaragaza ko tugifite urugendo, mu ngamba dufite hakaba harimo gukomeza gukorana n'ibigo bitandukanye kugira ngo dukomeze kwagura ibikorwa na serivisi dufite ku isoko.'

Kulayige yagaragaje ko kuzamura umubare w'Abanyarwanda bakoresha ubwishingizi bishingiye ku kubanza gukemura imbogamizi zihari zijyanye n'ubumenyi buke babufiteho.

Ati 'Kugira ngo twagure isoko ry'ubwishingizi, ni ugukomeza kwigisha no gukorana n'abafatanyabikorwa batandukanye kugira ngo Abanyarwanda bose bamenye akamaro bufite.''

Uyu muyobozi yagaragaje ko kuba abantu badafite amakuru ahagije kuri serivisi z'ubwishingizi bigikoma mu nkokora iterambere ry'urwo rwego.

Yashimangiye ko hari ingamba zafashwe na ASSAR mu gukemura izo mbogamizi zirimo gukora ubukangurambaga hifashishijwe imiyoboro itandukaanye mu kwigisha ibijyanye n'ubwishingizi ku buryo mu gihugu hose bazaba bafite ababahagarariye bashobora gusobanurira abaturage ibirebana n'ubwishingizi.

Ati 'Ufite abantu bafite amakuru kandi bazi ibijyanye n'ubwishingizi birafasha cyane kwagura isoko ryabwo.'

Yagaragaje ko uretse gukangurira Abanyarwanda bose ibyiza by'ubwishingizi hari na gahunda zo gukorana n'abanyeshuri basoje za Kaminuza ku buryo buri Munyarwanda asobanukirwa ibirebana n'ubwishingizi.

Mu bindi yagaragaje bizashyirwamo imbaraga harimo kwimakaza ikoreshwa ry'ikoranabuhanga muri serivisi zitangwa ndetse no gushishikariza ibigo by'ubwishingizi kuyoboka urwego rw'ubuhinzi n'ubworozi nka rumwe mu rutunze Abanyarwanda benshi.

Ubwishingizi mu buhinzi n'ubworozi ni rumwe mu rwego rudakunze kuyobokwa n'ibigo by'ubwishingizi nubwo imyumvire y'abaturarwanda ikomeje kuzamuka muri urwo rwego.

Kugeza ubu Guverinoma y'u Rwanda igaragaza ko abaturage babwitabiriye kuko habarurwa nibura abahinzi 568.563 n'aborozi 85.398 bishingiwe.

ASSAR yibumbiyemo ibigo 12 by'ubwishingizi birimo icyenda bitanga ubwishingizi rusange na bitatu biri mu bwishingizi bw'ubuzima.

Ubuyobozi bw'Inama y'ubutegetsi bwa ASSAR butorwa n'Inama y'ubutegetsi igizwe n'abayobozi b'ibigo by'ubwishingizi byigenga mu Rwanda uko ari 12.

Ishyirwa mu bikorwa rya gahunda z'iri huriro umunsi ku munsi rikurikiranwa n'Umuyobozi Mukuru wa ASSAR ari we Denise Rwakayija uyoboye iri huriro kuva 2020.

Andrew Kulayige usanzwe ari Umuyobozi wa Britam Insurance Rwanda ni we watorewe kuyobora iyi komite

Umuyobozi Mukuru wa ASSAR ari we Denise Rwakayija uyoboye iri huriro kuva 2020

Umuyobozi wa BK Insurance Alex Bahizi yatorewe kuba Umunyamabanga

Umuyobozi wa Sanlam Life Insurance, Jean Chrysostome Hodari

Dianah Mukundwa uyobora Sonarwa Life Insurance yatorewe kuba Umubitsi

Polisi ya Male, Umurwa Mukuru w'iki gihugu giherereye mu Majyepfo y'u Buhinde, ku wa 27 Kamena 2024, yavuze ko Shamnaz Ali Saleem yatawe muri yombi mu mpera z'icyumweru gishize, ari kumwe n'abandi bantu babiri bafatanyije muri uwo mugambi.

Abo bose bategetswe kuba bafunzwe by'agateganyo mu gihe iperereza ritomoye kuri bo rigikomeje, icyakora polisi ntiyeruye neza ko bakurikiranyweho 'Ubupfumu bugambiriye kugirira nabi Perezida Muizzu' nk'uko bikomeje kugarukwaho mu bitangazamakuru bitandukanye.

Mu mategeko y'Ibirwa bya Maldives ntabwo ubupfumu ari icyaha nshinjabyaha ariko ubufatiwemo afungwa amezi atandatu agenwa n'amategeko akaze ya Sharia, cyane ko iki gihugu gifite umubare munini w'Abayisilamu. Iyo bifite aho bihuriye no kugirira nabi Umukuru w'Igihugu ingaruka zishobora kwiyongera.

Ikindi ni uko muri iki gihugu abaturage bagikora iyo migenzo mu guha umugisha inshuti no kuvuma abanzi.

Nko mu 2012 habayeho ikibazo, polisi irasa abaturage bari bashyigikiye uwari Perezida w'iki gihugu Mohamed Nasheed, bashinjwa ko bateye 'isake y'umuvumo' ku bayobozi bari bashyizweho bashya.

Umunyamabanga wa Leta muri Minisiteri y'Ibidukikije w'Ibirwa bya Maldives witwa Fathimath Shamnaz Ali Saleem yatawe muri yombi nyuma yo gukekwaho kwijandika mu bikorwa by'ubupfumu

Ni ingendo RwandAir yatangije muri Kamena umwaka ushize, aho indege zayo zijya i Paris inshuro eshatu mu cyumweru. Ni ingendo zabaye umuhuza mwiza hagati ya Afurika n'u Burayi aho abo mu Burasirazuba, Uburengerazuba, Amajyepfo ndetse na Afurika yo Hagati baca i Kigali bagiye i Paris.

Iyi sosiyete ni yo yonyine muri Afurika ikora ingendo zerekeza i Paris nta handi ihagaze bigafasha Abanyafurika benshi koroherwa no kwererekeza mu bice binyuranye by'u Burayi banyuze mu mujyi wa Paris ufatwa nk'uw'amateka kuri uriya mugabane.

Muri iki gihe kingana n'umwaka gishize RwandAir yakoze ingendo zirenga 150 zerekeza i Paris ndetse n'abagenzi ijyanayo bakomeza kwiyongera ariko biba akarusho cyane muri ibi bihe by'imyiteguro y'imikino Olympique izabera muri uwo Mujyi, kuko biteganyijwe izatuma umubare w'abagenzi RwandAir ijyana i Paris wiyongera.

Abanyafurika benshi berekeje muri iyi mikino baciye i Kigali kugira ngo boroherwe n'urugendo.

Umuyobozi wa RwandAir mu Bufaransa, Higiro Deogratias, yavuze ko iyi sosiyete ikomeje kubona isoko ry'ingendo zigana i Paris kandi ko ari n'umusanzu mu kubaka ubuhahirane ku rwego rw'Isi.

Ati 'Dutewe ishema no gutera iyi ntambwe ikomeye ndetse n'ingendo za RwandAir hagati ya Paris na Kigali zikomeje kugenda neza. Iki cyerekezo cyabaye ingenzi cyane mu kwagura imigenderanire yacu n'ibindi bice by'Isi kandi bigaragaza uburyo turajwe ishinga no gutanga serivise ntagereranywa z'ingendo ku bakiliya bacu.”

Yakomeje avuga ko isoko mu Bufaransa rikomeje kwaguka kuri iyi sosiyete ndetse ko yabaye ikiraro ku nyungu ibihugu byombi bihuriyeho haba iz'ubucuruzi, ubukererugendo ndetse no gusangira ibijyanye n'umuco.

Indege ya RwandAir iva i Kigali buri wa Kabiri, buri wa Kane na buri wa Gatandatu saa 00:50 za mu gitondo ikagera ku Kibuga cy'Indege cya Charles de Gaulle i Paris saa 09:30 za mu gitondo uwo munsi.

Mu ngendo zigaruka RwandAir iva i Paris saa 09:30 z'ijoro buri wa Kabiri, buri wa Kane, na buri wa Gatandatu ikagera i Kigali mu Rwanda, saa 06:00 za mu gitondo bukeye bwaho.

Abagenzi ba RwandAir kandi bahabwa uburyo bunoze bwo gutwara imizigo aho abagenda mu myanya isanzwe bemererwa imizigo ibiri buri umwe ufite ibiro 23 naho mu myanya y'icyubahiro bakemererwa imizigo itatu na yo umwe ufite ibiro 23.

RwandAir ni imwe muri sosiyete z'ubwikorezi bwo mu kirere zikura ku muvuduko ushimishije ndetse ikabifatanya no kuzamura ubukerarugendo bw'u Rwanda. Ifite indege 14 zijya mu byerekezo 24 ku mugabane wa Afurika, u Burayi no mu Burasirazuba bwo Hagati.

RwandAir imaze kuba ubukombe mu ngendo zihuza Abanyafurika n'Umujyi wa Paris

Umwaka urashize RwandAir itangiye kwerekeza i Paris nta handi inyuze

Umurundi Rayon Sports yari itegereje, Rukundo Abdoul Rahman ukinira Amagaju FC yamaze kugera mu Rwanda aho aje gusinyira iyi kipe imyaka 2.

Uyu mukinnyi wari usigaranye amasezerano y’umwaka umwe mu ikipe y’Amagaju FC, yemeye kuba yamugurisha muri Rayon Sports.

Nubwo ibyo agomba gutangwaho bitavugwaho rumwe, gusa ni hagati ya miliyoni 15 na 20 z’amafaranga y’u Rwanda.

Nyuma y’uko amakipe yombi yumvikanye, icyari gisigaye ni uko umukinnyi na we aza agasinyira Rayon Sports gusa ntibyahise bikunda kuko yari mu biruhuko i Burundi.

Bagiye bamutumaho inshuro nyinshi ndetse bikavugwa ko agiye kuza ntaze, amakuru avuga ko hari n’igihe ubuyobozi bwa Rayon Sports bwari bugiye no kubivamo.

Kera kabaye uyu musore akaba yamaze kugera mu Rwanda mu gitondo cyo kuri uyu wa Gatanu tariki ya 28 Kamena 2024, aho nta gihindutse agomba guhita ashyira umukono ku masezerano y’imyaka ibiri akinira Rayon Sports.

Rukundo Abdoul Rahman yageze mu Rwanda kurangizanya na Rayon Sports

Nyampinga w’u Rwanda 2012, Kayibanda Aurore yemeje ko yamaze kwimukira mu Rwanda aho aje gufatanya n’abandi kubaka igihugu cyamubyaye, ni nyuma y’imyaka myinshi atuye muri Leta Zunze Ubumwe za Amerika.

Uyu mukobwa uvuka i Huye, ari mu Rwanda aho yaje gutegura ubukwe bwe na Gatera Jacques, aho byahuriranye n’ibihe by’amatora ya Perezida wa Repubulika y’u Rwanda azaba mu kwezi gutaha kwa Nyakanga, akaba ari mu itsinda ry’ibyamamare birimo kwamamaza Perezida Kagame.

Miss Kayibanda Aurore akaba yaraje n’ibye byose aho atazasubira muri Leta Zunze Ubumwe za Amerika nubwo we n’umugabo we Jacques Gatera ari ho basezeraniye imbere y’amategeko ariko bahisemo kuza gutura mu Rwanda.

Ubukwe bwa bo bukaba buteganyijwe tariki ya 15 Kanama 2024 bukaba buzabera mu Rwanda.

Agiye kubana na Gatera nyuma y’uko mu mpera z’umwaka wa 2014 nibwo byatangiye kuvugwa ko Miss Mutesi Aurore ari mu rukundo na Mbabazi Egide.

Icyo gihe ntibigeze babihakana cyangwa ngo bihishire kuko akenshi wasangaga amafoto yabo ku mbuga nkoranyambaga bari kumwe, barebana akana ko mu jisho ndetse banabwirana amagambo meza y’urukundo.

Ku wa 1 Werurwe 2018 hagiye hanze amakuru yemeza ko Mutesi wabaye Nyampinga w’u Rwanda mu 2012 yambitswe impeta y’urukundo na Egide Mbabazi bari bamaze igihe kirekire bakundana.

Egide yambikiye Miss Mutesi Aurore impeta y’urukundo muri Pariki ya Grand Canyon iherereye i Las Vegas muri Leta ya Nevada.

Aba bombi bahanye isezerano imbere y’amategeko ku wa 29 Nyakanga 2018 ku nkombe z’inyanja mu Mujyi wa Portland muri Leta ya Maine, bemeranya kubana nk’umugabo n’umugore.

Muri Gashyantare 2021 nibwo Kayibanda yemeje ko yatandukanye n’uwari umugabo we, Mbabazi Egide.

Aurore Kayibanda n’umugabo we bahisemo kuza gutura mu Rwanda

Uwase Muyango Claudine akaba umwe mu bagore bazwi cyane mu myidagaduro, yavuze ko ashyigikiye Perezida Kagame mu matora azaba mu kwezi gutaha kubera ko ari umuntu urenze.

Ibi yabigarutseho ejo hashize ku wa Kane ubwo umukandida wa FPR Inkotanyi, Perezida Kagame yari yagiye i Huye kwiyamamazayo.

Muyango usanzwe ari n’umugore w’umunyezamu wa AS Kigali, Kimenyi Yves ni umwe mu byamamare biherekeza Perezida Kagame aho ajya kwiyamamaza hose.

Mu kiganiro kigufi yahaye ikinyamakuru ISIMBI, yavuze ko azaherekeza Perezida Kagame mu Ntara zose aho azajya kwiyamamaza.

Ati “nzamuherekeza ahantu hose, nzamuherekeza mu Ntara zose aho azajya kwiyamamaza tuzaba turi kumwe.”

Abajijwe impamvu ari we yahisemo gushyigikira, nta kuzuyaza yavuze ko ari umuntu urenze ibikorwa bye byivugira.

Ati “Ni umuntu wa danger (urenze) sinshaka kubitekereza, ararenze, Mana yanjye ararenze.”

Perezida Kagame akaba akomeje ibikorwa byo kwiyamamaza ni mu gihe amatora azaba tariki ya 15 Nyakanga 2024.

Muyango Claudine umugore wa Kimenyi Yves, yavuze ko azashyigikira Perezida Kagame mu Ntara zose azajyamo