Blog

Mu myaka ye ya nyuma muri Paris Saint-Germain, Kylian Mbappé ni umwe mu bakinnyi bahembwaga amafaranga menshi ku Isi nyuma ya Cristiano Ronaldo na Lionel Messi.

Nubwo yavuye muri Paris Saint-Germain ariko no muri Real Madrid azakomeza guhembwa amafaranga menshi kuko niwe mukinnyi uzajya ufata agatubutse kurusha abandi bakinnyi bose.

Aya mafaranga Kylian Mbappé amaze gukorera ayakoresha mu bikorwa byinshi birimo n’ibikorwa by’ubugiraneza ariko kuri ubu agiye kuyashora mu kugura ikipe afatanyije n’abo mu muryango we nk’uko ibinyamakuru byo mu Bufaransa bibitangaza.

Ni ikipe ikina shampiyona y’icyiciro cya Kabiri mu Bufaransa yitwa Stade Malherbe Caen yanyuzemo mugenzi we bakinana mu Ikipe y’igihugu, NG’OLO Kante hagati ya 2013 na 2015 Mbere y’uko yerekeza muri Leicester City.

Abaherwe b’Abanyamerika bari bashoye imari muri iyi kipe yakinaga mu cyiciro cya mbere ariko bikarangira imanutse mu cya kabiri mu mwaka w’imikino wa 2018-29 bagiye kuyikuramo akaba ariyo mpamvu kuyigura bishoboka.

Kylian Mbappé ashobora kugura Stade Malherbe Caen nyuma yuko akiri muto muri 2012 yari yarashatse kumusinyisha mu ikipe y’abato ariko bikarangira ahisemo kwigira muri AS Monac.

Ibikorwa byo kwiyamamaza kuri Paul Kagame byari bimaze ibyumweru bitatu, byasojwe kuri uyu wa Gatandatu tariki 13 Nyakanga 2024 kuri Site ya Gahanga mu Karere ka Kicukiro. Ni ibikorwa byatangiye ku wa 22 Kamena 2024, bigera kuri Site 18 hirya no niho mu gihugu, aho ibihumbi by'abanyamuryango bari bacyereye kumwakira.

Umuryango FPR-Inkotanyi wagiye utangaza imibare y'abanyamuryango babaga bitabiriye kuri buri Site Paul Kagame yiyamamarijeho. Urugero, Musanze bavuze ko abari bahateraniye barenga ibihumbi 350, ari nayo mpamvu mu gukora igiteranyo cy'abitabiriye, habayeho kugaragaza ko uwo mubare urenga.

InyaRwanda yasubije inyuma amaso ikusanya imibare y'abantu bitabiriye ibikorwa byo kwiyamamaza kwa Paul Kagame, isanga barenga Miliyoni 4,320, 000. Ushingiye ku mibare yatanzwe na FPR-Inkotanyi, ukagereranya, ni abantu barenga Miliyoni 4.5.

Akarere ka Musanze ni ko kaza ku mwanya wa Kabiri mu kugira abantu benshi bitabiriye, kuko gafite abantu ibihumbi 350. Ni naho Paul Kagame yahereye ibikorwa byo kwiyamamaza.

Ngororero niyo iri ku mwanya wa nyuma mu kugira abantu bacye bitabiriye, kuko imibare igaragaza ko hitabiriye abantu ibihumbi 100.

Ibikorwa byo kwiyamamaza kuri Paul Kagame byatambukaga imbonankubone ku muyoboro wa Youtube wa FPR-Inkotanyi. Byatangiye iyi shene ifite abantu barenga ibihumbi icyenda (9,000) bayikurikira (Subscribers), ariko basoje bageze ku bantu barenga ibihumbi 56.

Paul Kagame yiyamamarije muri: Kicukiro, Musanze, Rubavu, Ngororero, Muhanga, Nyarugenge, Kirehe, Huye, Nyamagabe, Rusizi, Nyamasheke, Karongi, Kayonza, Nyagatare, Bugesera, Gicumbi, Gakenke na Gasabo.

Ashingiye ku bwitabire bw'abantu bari mu Karere ka Kicukiro, Paul Kagame yavuze ko ari ikimenyetso cy'uko ariho ibirori byari gusoreza koko!

Ati 'Icyo navugiraga rero ko bigoye kumenya aho mpera n'aho nsoreza ibyo kubabwira, biragaragara ko hano hari aho gusorezwa uru rugendo rw'ibyumweru bitatu. Ndabashimiye cyane, ukuntu mwaje muri benshi, benshi cyane ariko si ubwinshi bw'imibare gusa, ni ikimenyetso cy'ibikorwa nabyo byinshi kandi bizima.'

Yavuze ko iyi mibare ari ikimenyetso 'Cy'u Rwanda rwasubiranye rukaba urw'Abanyarwanda bose hamwe'. Ati 'Reka mbishyire mu Kinyarwanda cy'umugani, ibyari inyeri byabaye inyanja. Ni yo mpamvu benshi batabyumva neza cyane cyane abanyamahanga.'

Paul Kagame yanasubije abavuga ko imibare y'abitabira ibikorwa byo kumwamamaza ari imihimbano. Ati 'Ntabwo wahimba ubumwe, ntiwahimba ibyishimo, ntiwahimba imibare nk'iyi yaje, ntiwahimba abahora baza buri munsi, ugomba kuba uri umusazi. 

Ariko n'uko guhimba niba kubaho, njye mpora mbabwira nti bo bakugerageje, ko babuze abantu. Ntabwo ushobora guhimba amajyambere, ntushobora guhimba ibintu ibyo ari byo byose. Nta n'ubwo wahimba kuba FPR.'

Imibare y'aho Paul Kagame yagiye yiyamamariza mu bihe bitandukanye:

Ku wa 22 Kamena 2024, ni bwo Paul Kagame yatangiye ibikorwa byo kwiyamamaza ahereye kuri Site ya Busogo mu Karere ka Musanze mu Majyarugu y’u Rwanda. Icyo gihe ibikorwa byitabiriwe n’abantu ibihumbi 350.

Urugendo rwe rwakomeje mu Karere ka Rubavu kuri Site ya Gisa mu Burengerazuba bw’u Rwanda, ku wa 23 Kamena 2024. Icyo gihe ibikorwa byitabiriwe n’abantu ibihumbi 250.

Ku wa 24 Kamena 2024, yiyamamarije kuri Sitade ya Ngororero mu Karere ka Ngororero. Imibare igaragaza ko ibikorwa byitabiriwe n’abantu 100,000. Icyo gihe yaniyamamarije mu Karere ka Muhanga kuri Site ya Shyogwe ahari abantu.

Ku wa 25 Kamena 2024, Paul Kagame yiyamamarije kuri Sitade ya Rugarama mu Karere ka Nyarugenge, ahari abantu 300,000.

Ku wa 27 Kamena 2024, yiyamamarije kuri Sitade ya Huye, ahari abantu 300,000. Yaniyamamarije kuri Site ya Nyagisenyi mu karere ka Nyamagabe ahari abantu 120, 000.

Ku wa 28 Kamena 2024, Paul Kagame yiyamamarije kuri Sitade ya Rusizi ahari abantu 160,000.

Ku wa 29 Kamena 2024, yakomeje ibikorwa bye byo kwiyamamaza ku kibuga cya Kagano mu Karere ka Nyamasheke ahari abantu 200,000.

Ni mu gihe ku wa 30 Kamena 2024 yiyamamarije kuri Site ya Mbonwa mu Karere ka Karongi ahari abantu 170,000.

Paul Kagame ku wa 2 Nyakanga 2024, yakomeje ibikorwa bye byo kwiyamamaza yiyamamariza ku kibuga cya Kirehe mu Karere ka Kirehe ahari abantu 200,000.

Ku wa 6 Nyakanga 2024, yiyamamarije mu Karere ka Bugesera kuri Site ya Kindama ahari abantu 260,000.

Ni mu gihe ku wa 7 Nyakanga 2024, yiyamamarije mu Karere ka Nyagatare ahari abantu barenga 300,000, aniyamamariza mu Karere ka Kayonza ahari abantu 280,000.

Ku wa 8 Nyakanga 2024, Paul Kagame yiyamamarije kuri site ya Murange mu Karere ka Gicumbi ahari abantu barenga 250,000.

Ni mu gihe, ku wa 11 Nyakanga 2024, yiyamamarije kuri Site ya Nyarutovu mu Karere ka Gakenke ahari abantu barenga 200,000.

Ni mu gihe, ku wa 12 Nyakanga 2024, yiyamamarije kuri Site ya Bumbogo mu Karere ka Gasabo ahari abantu barenga 300,000.

Ni mu gihe yasoreje urugendo rwe mu Karere ka Kicukiro, kuri uyu wa Gatandatu, tariki 13 Nyakanga 2024, ahari abantu barenga ibihumbi 400 [400,000] nk’uko bigaragaza n’imibare yatanzwe n’umuryango FPR-Inkotanyi.

Paul Kagame yiyamamarije mu Karere ka Kicukiro ahari hateraniye abantu barenga ibihumbi 400

Kagame yavuze ko ntawe ushobora kubeshya ibyishimo n'ubwitabire bw'abantu bashyigikiye FPR-Inkotanyi 

Ku wa 11 Nyakanga 2024, Paul Kagame yiyamamarije mu Karere ka Gakenke

Ku wa 7 Nyakanga 2024, Kagame yiyamamarije mu Karere ka Kayonza

Ku wa 6 Nyakanga 2024, Kagame yiyamamarije mu Karere ka Bugesera

Ku wa 27 Kamena 2024, Paul Kagame yaganiriye n’ibihumbi by’abantu i Huye

Ku wa 28 Kamena 2024, Paul Kagame yari mu Karere ka Rusizi

Ku wa 23 Kamena 2024, Kagame yiyamamarije muri Rubavu

Ku wa 22 Kamena 2024, Paul Kagame yatangiriye ibikorwa byo kwiyamamaza mu Karere ka Musanze

Ku wa 25 Kamena 2024, Paul Kagame yiyamamarije mu Karere ka Nyarugenge

Ubwo Paul Kagame yiyamamarizaga mu Karere ka Gasabo, ku wa Kane tariki 22 Nyakanga 2024

Ab’i Kigali ntibigeze bategereza ko inkoko ibabera ingoma kuko ntibigeze baryama, bayiraye ku ibaba bategereje Umukandida wabo, Paul Kagame. Ubwo byari bigeze mu masaha y'urukerera, Abayisilamu bitabiriye igikorwa cyo kwamamaza Paul Kagame, babanje gusenga.

Bose intero ni 'uwaduhaye amata, akaduha imihanda, amashuri, amavuriro n'ibindi bikorwa by'iterambere, na twe ntacyo twamwima’.

Ubwo yasesekaraga kuri Site ya Gahanga, Kandida-Perezida Paul Kagame yakiranwe urugwiro rudasanzwe, ahari hateraniye imbaga y'abaturage basaga ibihumbi 400 baje kumwakira ku munsi usoza ibikorwa byo kwiyamamaza.

Mu ndirimbo zirimo Ogera, Thank you Kagame, Azabatsinda Kagame, Tumutora Niwe n'izindi, yanyuze mu baturage agenda abasuhuza, na bo bamwereka urukundo, bazamura amabendera hejuru, bamubwira bati 'ni wowe, ni wowe, ni wowe'.

Abahagarariye imitwe ya Politiki ifatanyije na FPR-Inkotanyi kwamamaza Umukandida-Perezida Paul Kagame ndetse n'indi mitwe ifatanya n'uyu Muryango mu kwamamaza Umukandida ku mwanya w'Umukuru w'Igihugu n'abo ku mwanya w'Ubudepite, nabo bari babukereye kuri Site ya Gahanga, aho bagiye kwifatanya na FPR Inkotanyi.

Kandida-Perezida Paul Kagame yabwiye imbaga y'abaturage yaje kumwakira kuri Site ya Gahanga muri Kicukiro ko kuba baje ari benshi bifite icyo bisobanuye.

Yagize ati: 'Icyo navugiraga rero ko bigoye kumenya aho mpera n'aho nsoreza ibyo kubabwira, biragaragara ko hano hari aho gusorezwa uru rugendo rw'ibyumweru bitatu. Ndabashimiye cyane, ukuntu mwaje muri benshi, benshi cyane ariko si ubwinshi bw'imibare gusa, ni ikimenyetso cy'ibikorwa nabyo byinshi kandi bizima.'

Umukandida wa FPR Inkotanyi ku mwanya wa Perezida w’Igihugu, Paul Kagame yasubije abavuga ko imibare y'abitabira ibikorwa byo kumwamamaza ari imihimbano. 

Mu ijambo rye yagize ati: 'Ntabwo wahimba ubumwe, ntiwahimba ibyishimo, ntiwahimba imibare nk'iyi yaje, ntiwahimba abahora baza buri munsi, ugomba kuba uri umusazi. Ariko n'uko guhimba niba kubaho, njye mpora mbabwira nti bo bakugerageje, ko babuze abantu. Ntabwo ushobora guhimba amajyambere, ntushobora guhimba ibintu ibyo ari byo byose. Ntan'ubwo wahimba kuba FPR.'

Kandida-Perezida Paul Kagame yavuze ko kuba Abanyarwanda benshi baba bahuriye hamwe mu bikorwa byo kumwamamaza, bivuze ko bose bahuriye ku mugambi umwe wo kubaka u Rwanda.

Ati: 'Ubu bwinshi n'icyabazanye hano ni cyo bivuze, ni umugambi umwe, Abanyarwanda bahuriye ku mugambi umwe, kubaka igihugu cyabo ntawe usigaye inyuma ndetse ubumwe bundi ikibugaragaza ni ukubona ab'imitwe yindi ya politiki, ifite ukundi batekereza bahuza na FPR na yo ifite ukundi itekereza, tukajya hamwe.'

Yakomeje avuga ko kuba abaturage benshi baje kumwakira no kumwamamaza, bisobanuye urugendo rw'imyaka 30 ishize yo kubaka u Rwanda rw'Abanyarwanda bose kandi bunze ubumwe.

Ati: 'Mu by'ukuri, iyi mibare ni ikimenyetso cy'u Rwanda rwasubiranye rukaba urw'Abanyarwanda bose hamwe. Ndetse, reka mbishyire mu Kinyarwanda cy'umugani, ibyari inyeri byabaye inyanja. Ni yo mpamvu benshi batabyumva neza cyane cyane abanyamahanga.'

Kandida-Perezida Paul Kagame yavuze ko gushyira hamwe nk'Abanyarwanda ari byo byatumye bubaka igihugu kikava ku kantu gato kibaka kigeze aho kiba ikintu kinini cyane.

Yagize ati: 'Ndetse tuzaba uko dushaka kuba ntabwo ari uko umuntu wundi uwo ari we wese, yashaka kutugenera uko tuba. Ibyo rero ntabwo ari njyewe ubyumva uko, ntabwo ari FPR ibyumva gusa, ni mwese n'utari FPR n'utari njye. 

Umugani nabaciraga w'inyeri yabaye inyanja, ni cyo bivuze. Mu myaka 30 bitangira, cyari ikintu gito ariko ubu aho bigeze ntawe utabibona, urwo rugendo rwacu aho rutugejeje rwo kuba Abanyarwanda bamwe, bo kubaka igihugu cyabo kibabereye ndetse ntan'undi duhutaje.'

Kimwe mu byakunze kugaragara mu bikorwa byo kwamamaza Umukandida wa FPR Inkotanyi, Paul Kagame, ni uguha urubyiruko umwanya wo kugaragaza impano zarwo, haba abahanzi, abavanga imiziki ndetse n'abashyushyarugamba.

Abahanzi bagezweho mu Rwanda barimo Bwiza, Riderman, Bushali, Kivumbi King, Ndandambara, Dr Claude n’abandi nibo basusurukije abitabiriye ibikorwa byo kwamamaza Kandida-Perezida Paul Kagame kuri Site ya Gahanga.

Hashimangiwe ko mu myaka irindwi ishize, abatuye Akarere ka Kicukiro n’Umujyi wa Kigali muri rusange, ari abahamya b’ibyagezweho mu mibereho myiza. Site y’i Gahanga muri Kicukiro niyo umukandida wa FPR Inkotanyi yasorejeho ibikorwa bye byo kwiyamamariza kongera kuyobora u Rwanda mu myaka itanu iri imbere.

Paul Kagame wa FPR Inkotanyi yasubije abavuga ko imibare y’abitabiriye ibikorwa byo kwiyamamaza kwe ari imihimbano

Site y’i Gahanga muri Kicukiro yaciye agahigo kuko abasaga 400,000 aribo bitabiriye ibikorwa byo kwamamaza Kandida-Perezida Paul Kagame

Ibyishimo byari byose i Gahanga

Urubyiruko rwaje ku isonga mu kugaragaza ko rwishimiye ibikorwa byo kwiyamamaza kwa Perezida Kagame byasorejwe i Gahanga 

Uwo muvugabutumwa yabigarutseho mu kiganiro cyihariye yagiranye na IGIHE, nyuma yo kwitabira ibikorwa byo kwiyamamaza by'umukandida wa FPR Inkotanyi Paul Kagame byabereye mu Karere ka Gakenke.

Pasiteri Akim Mbarushimana yagaragaje ko nubwo abanyamadini batemerewe kwamamaza, we yasobanukiwe Paul Kagame n'Umuryango wa FPR Inkotanyi nyuma yo gusoma no gusobanukirwa neza Bibiliya.

Ati 'Nasobanukiwe neza Kagame ndi gusoma ijambo ry'Imana, nasanze na Yesu yaraturutse mu muryango wa Yuda. Ni intare yo mu muryango wa Yuda. Ni intare yo mu muryango wa Yuda. Byanteye imbaraga zo kuza gushyigikira icyo umukandida wacu Chairman Paul Kagame yagejeje ku Rwanda imyaka yose.'

Yagaragaje ko uburyo Paul Kagame yahagaritse Jenoside yakorewe Abatutsi n'uburyo yatumye urubyiruko ruhabwa amahirwe byatumye Abanyarwanda bagira umutekano usesuye.

Yagaragaje ko ijambo ry'Imana rivuga ko abantu bagomba gushyigikira abakoze neza bityo ko na we yiyemeje gushyigikira Paul Kagame.

Yagaragaje ko bitewe n'urukundo akunda Paul Kagame adatinya no kuba yajya mu rusengero yambaye umwenda uriho ibirango by'Umuryango wa FPR Inkotanyi cyangwa bya Paul Kagame.

Ati 'Uko ubona nambaye gutya, nkiva ahangaha ndagenda mbwirize nanambaye ntya, ntabwo duhagarariye ku idini cyangwa ku ishyaka ahubwo ijambo ry'Imana riravuga ngo nibamenya ukuri, ukuri niko kuzababatura, ni ngombwa kumenya ibyo Kagame yakoze muri iki gihugu akaba n'intumwa Imana yatuzaniye.'

Yifashishije ingero nyinshi zo muri Bibiliya yagaragaje ko n'Imana yemeza ko abaturage bakwiye gushyigikira abayobozi kandi ko usengera igihugu akwiye no gushyigikira abayobozi bayobora neza.

Ku birebana n'Umuryango wa FPR Inkotanyi yagaragaje ko hari impamvu zituma ayishyigikira kuko yasanze ari umuryango ubumbatiye nibura impano eshanu zitangwa n'Imana kandi ko bakwiye gushyigikira ukuri.

Ati 'Intare iri muri Bibiliya ni byiza rero gushyigikira uwo Imana yashyigikiye, twebwe turamuhagaririye, mbwiye abanzi n'abankunda ni byiza gutora ukuri. Kagame yatugejeje kuri byinshi natwe ab'itorero turasenga mu mutekano, ni byiza ko abakirisitu dushyigikira ukuri Imana yashyigikiye kuko twebwe ntitwafunga umuryango Imana yadufunguriye.'

Biteganyijwe ko ibikorwa byo kwiyamamaza ku bakandida perezida n'abakandida depite bisozwa kuri uyu wa Gatandatu tariki ya 13 Nyakanga 2024.

Mu Kiganiro yagiranye n'ikinyamakuru Newsweek, ku wa Kane tariki ya 11 Nyakanga 2024, ubwo hasozwaga inama y'ibihugu binyamuryango by'umuryango w'ubwirinzi no gutabarana, NATO, Perezida Erdogan, yavuze ko ibitero 'nkana' bya Israel, byibasiye ibikorwaremezo by'abasivili muri Gaza bigize ibyaha by'intambara, mu gihe Israel yo ibyihakana yivuye inyuma.

Ati 'Ubwicanyi bukorerwa inzirakarengane mu bitaro aho baba bagiye kwivuriza, mu mbangukiragutabara, ku masoko, mu bigo bitangirwamo ubutabazi bw'ibanze, n'ahandi hantu hagizwe ah'umutekano ni ukuvogera bikabije uburenganzira bwa muntu.'

Perezida Erdogan, yavuze ko Amerika yirengagije nkana ibi byaha Israel ikorera abaturage ba Gaza, ikarenga ikabagenera inkunga n'ubundi bufasha.

Ati 'Muri iki gihe, ni nde uzafatira Israel ibihano kubera ko yarenze ku mategeko mpuzamahanga? Icyo ni cyo kibazo nyacyo kandi ntawe ugisubiza.'

Kuva intambara yatangira hagati ya Israel na Gaza, Türkiye yahise ihagarika ibikorwa by'ubuhahirane na Israel.

Minisiteri y'Ubuzima muri Gaza, yatangaje ko kuva intambara yatangira, ubuzima bw'abarenga ibihumbi 38 bumaze kuhatikirira.

Perezida Erdogan, yakomoje no ku ntambara iri hagati y'u Burusiya na Ukraine, avuga ko abayobozi bo mu Burengerazuba bw'Isi, bahitamo inzira zishobora guteza akaga mu izina ryo guhosha amakimbirane, ibishobora gutuma afata indi ntera.

Ati 'Imyifatire ya bamwe mu bayobozi bo mu Burengerazuba ku Burusiya yokongeje umuriro gusa, ibi byaviriyemo ingaruka mbi Ukraine.'

Uyu mugabo avuga ko igisubizo ku ntambara yo muri Ukraine gikwiye kuba 'amahoro arambye yagerwaho binyuze mu biganiro.'

Perezida Türkiye, Recep Tayyip Erdogan, yavuze ko Perezida wa Amerika, Joe Biden, na guverinoma ye birengagiza nkana ibyaha by'intambara Israel iri gukora muri Gaza

Dr Vincent Biruta yabigarutseho ubwo hasozwaga ibikorwa byo kwiyamamaza ku mukandida watanzwe n'Umuryango wa FPR Inkotanyi, Paul Kagame kuri uyu wa 13 Nyakanga 2024.

Dr Vincent Biruta yagaragaje ko imitwe ya Politiki uko ari umunani ari yo PSD, PL, PSR, UDPR, PDI, PDC, PPC na PSP yahisemo gushyigikira Paul Kagame, yahisemo neza kuko mu minsi ishize bari mu bikorwa byo kwiyamamaza basanze abaturage nabo barabirangije.

Ati 'Twasanze Abanyarwanda barabirangije kuko aho twagiye hose, ibi nibyo bagendaga batubwira aho twanyuraga hose, batubwira ngo turashima ibyo tumaze kugeraho bishingiye kuri demokarasi, imiyoborere myiza kandi bagaragaza hari ibindi byinshi bateganya mu myaka itanu iri imbere.'

Dr Vincent Biruta yagaragaje ko ku wa 15 Nyakanga 2024, Abanyarwanda bazabyina intsinzi ku mugoroba nyuma yo gutora umukandida wabo Paul Kagame ku mwanya w'Umukuru w'Igihugu.

Ati 'Ku wa mbere tuzatora ariko tuzanatsinda. Tuzatsinda ndetse cyane. Ubwo rero ngira ngo mu masaha ya nimugoroba ku wa Mbere, tuzaba twatangiye ibirori twizihiza intsinzi. Twese kandi mu guhugu hose bizaba ari ibirori.'

Yavuze ko abanyamahanga bazababazwa n'ibizava mu matora, bakwiriye kubyihanganira kuko amahitamo areba Abanyarwanda.

Ati 'Hari abandi nabo bazaba biteguye gutanga amanota, ariko ntabwo turi abanyeshuri babo nta n'ubwo twabagize abarimu bacu, bazabyihorere amanota atangwa n'Abanyarwanda kandi bazayatanga menshi.'

Yakomeje avuga ko 'Bazumve ko ibyo turimo ntabwo ari ugushaka gusa na bo, si ugushaka kugenda nka bo, si ukugendera ku muco wa bo, ibyo turimo ni ibireba u Rwanda bikareba n'Abanyarwanda. Abanyarwanda rero ibyo batugaragarije ni uko bahisemo Paul Kagame ngo akomeze ayobore iki gihugu akigeze ku majyambere yifuza, yubakiye ku bumwe kandi bose batere imbere ntawe usigaye inyuma'

Yagaragaje ko Abanyarwanda bimakaje Politiki ishyira imbere amacakubiri bakorera hanze y'u Rwanda bakwiye kubivamo bakaza kwifatanya n'abandi mu guteza imbere igihugu no kwimakaza ubumwe n'iterambere ridaheza.

Ati 'Hari bamwe tujya turirimba ngo byari byabananiye ariko ubu ngubu bwo byarabayoboye, bazaba bari mu byabo baganya, ariko nta kundi twabigenza icyo twabagiramo inama ni uko bagaruka bakadusanga kuko ibyo tuvuga ni ubumwe bw'Abanyarwanda, amajyambere y'u Rwanda n'imibereho myiza y'Abanyarwanda bose. Ibyo ntabwo bikomeye bashyize mu gaciro badusanga tukagendana.'

Yagaragaje ko gahunda ari ugutora Paul Kagame hanyuma bagatsinda amatora ku kigero cyo hejuru.

Ati 'Uvanye igikumwe ku gipfunsi byaba bikiri igipfunsi? Ibyo rero ntabwo dushobora kubikora. Igikumwe ku gipfunsi twitorere Perezida wacu. Tuzabishimangira ku wa Mbere.'

Biteganyijwe ko Abanyarwanda bazatora Umukuru w'Igihugu n'Abadepite 53 ku wa 14 Nyakanga 2023 ku baba mu mahanga na 15 Nyakanga ku bari imbere mu gihugu ndetse na 16 Nyakanga 2024 ku badepite b'ibyiciro byihariye.

Perezida w’Ishyaka rya PSD, Dr Vincent Biruta yihanangirije abakomeza kwigira abarimu ba Demokarasi

Cardinal Kambanda, yavuze ko iri shami rizatanga umusanzu mu kongera umubare w'abaforomo n'ababyaza bakenewe mu gihugu kandi bari ku rwego rushyitse, ndetse rinakomeze kuzuzanya na politiki ya leta yo guha ingufu urwego rw'ubuzima.

Ibi yabigarutseho kuri uyu wa Gatanu tariki ya 17 Nyakanga 2024 ubwo yafunguraga iri shuri, igikorwa cyabimburiwe na misa y'igitambo gitagatifu cy'ukarisitiya cyabereye kuri kiliziya ya St Famille.

Cardinal Kambanda, yagize ati 'Hano hazaha amahirwe abaforomo n'ababyaza b'i Kigali kandi hazaha n'amahirwe abanyeshuri basorezaga i Ruli kuko ibitaro byiza biri hafi yabo, abaganga beza baba i Kigali ubu rero hano ni Icyiciro cya Kabiri cya Kaminuza mu gihe i Ruli ari icya mbere.'

Ishuri rikuru ry'ubuforomo n'ububyaza rya Ruli, ryatangijwe nyuma yishyirwaho ry'ibitaro bya Ruli. Icyo gihe iri shuri ryatangaga uburezi bwo ku rwego rw'amashuri yisumbuye, nyuma rizamurirwa urwego rishyirwa ku urwa kaminuza, ritangira gutanga impamyabumenyi z'icyiciro cya mbere cya kaminuza.

Kugeza magingo aya hamaze gutanga impamyabumenyi muri iri shuri inshuro zirindwi.

Cardinal Kambanda yavuze ko haje icyifuzo cy'uko hatangira gutangwa impamyabumenyi z'icyiciro cya kabiri cya kaminuza, iyi gahunda ikaba yaratangijwe umwaka ushize.

Kuri ubu muri gahunda ya Leta yo kongera abaforomo n'ababyaza, bisaba ko abahari bakiyongera byibuze inshuro enye, akaba ariyo mpamvu hafashwe umwanzuro wo kuzana ishami rya RHIH, i Kigali.

Iri shami rizajya ryakira abaforomo barangije icyiciro cya mbere, bafite imirimo inyuranye mu mavuriro yo muri Kigali, no mu nkengero zayo, n'abandi bashaka kongera ubumenyi bijyanye no kuzuzanya na politiki y'igihugu no kongera umubare wabo ariko bari no ku rwego rushyitse.

Ibi bivuze ko i Ruli, hazajya hatangirwa amasomo y'icyiciro cya mbere cya kaminuza, mu gihe ku ishami ry'i Kigali hazajya hatangwa amasomo y'icyiciro cya kabiri cya kaminuza, y'ubuforomo n'ububyaza.

Cardinal Kambanda, yavuze ko ishami rya Ruli mu gihe rimaze rikora, ryatanze umusanzu ukomeye cyane, kandi urugendo rugikomeje mu gutanga umusanzu w'ibikenewe mu rwego rw'ubuzima.

Ati 'Abanyeshuri bacu ntibazongera kugarukira ku cyiciro cya mbere, bazakomeza no mu cya kabiri bafite ubumenyi bwagutse. Ikindi Leta irasaba ko abaforomo n'ababyaza bikuba inshuro enye, kuza hano rero ni ukugira ngo twongere umubare w'abaforomo n'ababyaza.'

'Icya mbere ni uburezi bufite ireme kuko abaforomo n'ababyaza ni akazi gasaba impuhwe, urukundo, n'umutima mwiza. Ahandi babyita kwakira neza abakiliya ariko umurwayi we aba afite umwihariko kuko ugiye muri hoteli aba ashaka kwidagadura ariko umurwayi aba atabaza.'

Nk'uko ikoranabuhanga rikomeje kwigarurira igice kinini cy'ubuzima bwa buri munsi, Cardinal Kambanda, yavuze ko muri iri shuri amasomo menshi azajya atangwa ryifashishijwe.

Mu nshuro zirindwi iri shuri rimaze gushyira abanyeshuri ku isoko ry'umurimo, abaforomo 871 n'ababyaza 68 bamaze gushyikiririzwa impamyabumenyi muri RHIH ifite icyicaro gikuru mu Ntara y'Amajyaruguru, Akarere ka Gakenke, Umurenge wa Ruli.

Iri shami riherereye mu Karere ka Nyarugenge, ahazwi nka St Paul

Arikiyepisikopi wa Kigali, Antoine Cardinal Kambanda, akaba n'umuyobozi w'Ikirenga w'Ishuri rikuru ry'ubuforomo n'ububyaza, Ruli Higher Institute of Health- RHIH, yafunguye ku mugaragaro ishami rya Kigali

Ubwo bamwe mu banyeshuri batahaga ishami rishya bazajya baherwamo amasomo

Bimwe mu bikoresho bizajya byifashishwa mu gutanga amasomo byamaze kuhagezwa

Arikiyepisikopi wa Kigali, Antoine Cardinal Kambanda, hamwe n’abandi bayobozi b’iri shuri, ubwo basuraga ibyumba by’amashuri

Amwe mu masomo azajya akurikiranwa hifashishijwe ikoranabuhanga

Yabigarutseho mu gihe habura amasaha make ngo ibikorwa byo kwiyamamaza ku bakandida bisozwe.

Oda Gasinzigwa yagaragaje ko ibikorwa byo kwiyamamaza byatangiye ku wa 20 Kamena 2024 bikaba byasojwe kuri uyu wa 12 Nyakanga 2024 muri rusange byagenze neza.

Ati 'Turashimira abakandida kubera ko ibyo twaganiriye muri rusange byagenze neza, bariyamamaje bakurikiza amabwiriza bakoze ibijyanye n'ibyo Komisiyo y'igihugu y'amatora yasabaga. Ntihabura rimwe na rimwe wenda umukandida umwe akavuga ko hari ikitagenze neza ariko icyo twari twubatse ni uko haramutse hari ikibazo cyaboneka babimenyesha komisiyo.'

Hari amwe mu mashyaka n'imitwe ya politiki yagiye agaragaza ko yahuye n'ibibazo byakomye mu nkokora ibikorwa byabo byo kwiyamamaza nka PS Imberakuri mu Karere ka Gicumbi na Green Party mu Karere ka Ngoma ndetse na Rulindo.

Perezida wa NEC yagaragaje ko ibikorwa nk'ibyo bito bito Komisiyo yabyakiriye, ariko agaragaza ko bishimira ko muri rusange ibikorwa byo kwiyamamaza byagenze neza.

Ati 'Ibikorwa bito bito barabimenyeshaga tukaganira na bo tukanaganira n'inzego zibishinzwe bigakemuka kandi nabo barabyishimira. Nta kibazo kidasanzwe kitabonewe igisubizo.'

Mu kiganiro n'Itangazamakuru Perezida w'Ishyaka riharanira Demokarasi no kurengera ibidukikije, Green Party, Dr Frank Habineza, yagaragaje ko agereranyije ibikorwa bye byo kwiyamamaza n'ibyo mu 2017 uyu mwaka byagenze neza kandi ko yiteguye gutsinda amatora.

Dr. Frank Habineza yerekanye ko hari aho bitagenze neza nko mu turere twa Ngoma na Rulindo ariko ko bitababujije gukomeza ibikorwa byabo byo kwiyamamaza.

Perezida w'Ishyaka riharanira Demokarasi n'Imibereho myiza y'Abanyarwanda, Dr Vincent Biruta na we yagaragaje ko ibikorwa byo kwiyamamaza muri iryo shyaka byagenze neza ndetse ko n'imikoranire hagati yabo n'inzego z'ibanze yari ntamakemwa.

Ku rundi ruhande Perezida w'Ishyaka PS Imberakuri, Mukabunani Christine mu Kiganiro yagiranye n'abanyamakuru cyagarukaga kw'ishusho y'ibikorwa bye byo kwiyamamaza yagaragaje ko byagenze neza nubwo hari aho yahuye n'ibibazo ariko atari henshi.

Yagaraje ko aho yahuye n'imbogamizi yabimenyesheje Komisiyo y'Igihugu y'Amatora kandi ko yizeye ko ababigizemo uruhare bazabibazwa.

Ibikorwa byo kwiyamamaza birasozwa kuri uyu wa Gatandatu tariki ya 13 Nyakanga 2024 saa 23:59.

Biteganyijwe ko ku wa 14 Nyakanga Abanyarwanda batuye mu mahanga bazatora Umukuru w'Igihugu n'Abadepite 53, abari imbere mu gihugu bazatora ku wa 15 Nyakanga mu gihe ibyiciro byihariye birimo abagore, urubyiruko n'abafite ubumuga bazatorwa ku wa 16 Nyakanga 2024.

Perezida wa NEC, Oda Gasinzigwa, yashimye uko ibikorwa byo kwiyamamaza byagenze

Mu Buhinde, inkuru ni imwe iri kuvugwa mu binyamakuru byose. Iyo nta yindi, n'iy'ubukwe bw'umwana w'umuherwe witwa Mukesh Ambani. Ubu bukwe, bwakangaranije imbuga nkoranyambaga, bitewe ahanini n'amafaranga yabushowemo ndetse n'ibyamamare byabwitabiriye.

Ubu bukwe bwa Anant Ambani na Radhika Merchant bwatanzweho akayabo ka Miliyoni 600 z’Amadorali, bwitabiriwe n’abantu 800 batumiwe biganjemo ibyamamare byaturutse impande n’impande ku isi.

Ibirori byatangiye mu ijoro ryakeye ryo ku wa Gatanu tariki 12 Nyakanga, bikaba bikomeje kuko biteganijwe ko bizasozwa kuri tariki 14 Nyakanga 2024. Ku ikubitiro, byitabiriwe n’andi ma-couple arenga 50 ndetse n’inshuti n’abavandimwe barimo abayobozi bakomeye mu Buhinde ndetse n’ibyamame muri Sinema na muzika by’iki gihugu.

Ibi birori byatangiriye mu Mujyi wa Mumbai ahazwi nko kuri JIO World Convention Center. Priyanka Chopra wabaye Nyampinga w’Isi mu 2000 n’umugabo we Nick Jonas bazwi cyane muri Sinema y’iki gihugu, bari mu bitabiriye ubu bukwe. Umukinnyi wa filime, John Cena, Shah Rukh Khan n’umufasha we, n’abandi nabo ntibahatanzwe.

Nyuma y’abarimo Rihanna na Justin Bieber bamaze kuririmba mu bukwe bw’umwana w’umuherwe mu Buhinde witwa Mukesh Ambani, ubu hatahiwe Rema wishyuwe miliyoni $3, ni ukuvuga asaga Miliyari 3 Frw ngo azaririmbe indirimbo ye ‘Calm Down’ ikomeje guca ibintu hirya no ku Isi muri ubu bukwe.

Kuva tariki 12 Nyakanga 2024, nibwo ubu bukwe bwa Anant Ambani n’umukunzi we Radhika Merchant bwatangiye, kugeza tariki 14 Nyakanga 2024, aho biteganyijwe ko n’umuhanzikazi Adele agomba kuririmbamo.

Ni ubukwe bwitabiriwe n'ibyamamare birimo umunyamidelikazi Kim Kardashian, abayobozi bakomeye mu Bwongereza n’abandi. Byumwihariko n’abaherwe nka Bill Gates na Jeff Bezos biteganijwe ko bazabutaha.

Aka kayabo k’amafaranga yahawe Rema gatangajwe, nyuma y’uko mu ntangirizo za Nyakanga byari byatangajwe ko Mukesh Ambani yari mu biganiro n’umuhanzikazi Beyonce ngo azaze kuririmba mu bukwe bwe nyamara ngo ntibyabasha gucamo bitewe n’uko yamucaga amafaranga menshi agera kuri Miliyoni 15 z’Amadolari.

Mu Ukuboza 2023, nibwo Anant Ambani yambitse impeta umukunzi we, naho ibirori biteguza ubukwe bwabo nyirizina bitangira muri Werurwe uyu mwaka, byitabirwa n’abatumirwa 1,200 barimo Ivanka Trump n’umuherwe Mark Zuckerberg.

Se w’umukwe ni umuherwe Mukesh Ambani, akaba ari umuyobozi mukuru wa Reliance Industries, naho nyina akaba yitwa Nita Ambani, umugiraneza w’icyamamare mu Buhinde.

Mukesh w’imyaka 67 y’amavuko, yamaze guha abana be bashyingiranwe impano ya miliyoni 80 z’Amadolari, n’inzu nini y’ibyumba 10 iherereye i Dubai ku kibaya kihariye.

Umugeni nawe ntiyoroheje kuko akomoka mu muryango w’umuganga Viren Merchant na Shaila Merchant nabo bazwi cyane muri iki gihugu.

Anant na Radhika bose bafite imyaka 29 y’amavuko bakuze ari inshuti zikomeye, batangira gukundana baciye akenge mu 2017. Urukundo rwabo barushyize ahagaragara mu 2018, nyuma y’uko basoje amashuri yabo muri Kaminuza za Brown University na New York University.

Reba uko umunsi wa mbere w’ubukwe wari wifashe mu mafoto:

 












Mu Buhinde ni ibicika abashushanya bashushanyije, imitako ni yose ku bw’ubu bukwe

Bamwe mu bakunzi, abayobozi ba Rayon Sports bifatanyije n’abaturage b’Umujyi wa Kigali by’umwihariko Akarere ka Kicukiro kwamamaza umukandida wa FPR Inkotanyi, Paul Kagame mu matora y’umukuru w’igihugu ateganyijwe ku wa Mbere.

Uyu munsi wari umunsi wa nyuma wo kwiyamamaza kuba Perezida w’u Rwanda mu myaka 7 iri imbere, amatora yo akaba azaba ku wa Mbere tariki ya 15 Nyakanga 2024.

Umukandida wa FPR Inkotanyi, Perezida Paul Kagame ibikorwa byo kwiyamamaza yabisoreje mu Karere ka Kicukiro i Gahanga.

Ni igikorwa kitabiriwe n’abaturage benshi baje gushyigikira Perezida Kagame k’umunsi wa nyuma we wo kwiyamamaza.

Barangajwe imbere n’umunyamabanga w’iyi kipe, Patrick Namenye abakunzi ba Rayon Sports na bo bari babukereye kujya kwamamaza umukandida wa FPR Inkotanyi.

Uretse umunyamabanga, hari na Claude Muhawenimana ukuriye abafaba b’iyi kipe waje yakenyeye ubona ko aberewe, hari n’abandi bafana benshi.

Si ubwa mbere baje gushyigikira Perezida Kagame kuko ubwo yajyaga kwiyamamaza mu Magepfo i Huye nabwo bari bagiye ari benshi.

Umunyamabanga wa Rayon Sports, Patrick Namenye na Muhawenimana Claude akaba perezida w’abafana b’iyi kipe, bari mu b’imbere

Bari bitwaje icyapa cyanditseho ngo “Ni wowe”

Abakunzi ba Rayon Sports bari benshi babukereye