Blog

Ni ikoranabuhanga rishya rizanywe mu bwikorezi bwo mu kirere kuko iryari rihari ryari irifasha indege gutangira kugwa umupilote nta ruhare abigizemo.

Ni ikoranabuhanga Embraer yagaragarije i Farnborough, agace gaherereye i Hampshire mu Bwongereza, ahari kubera imurikabikorwa mpuzamahanga ku bijyanye n'ibikoresho byifashishwa mu bwikorezi bwo mu kirere.

Ryiswe 'Embraer Enhanced Takeoff System cyangwa E2TS mu mpine, Embraer ikaba irizanye nk'intwaro kirimbuzi ku nganda bahanganiye isoko nka Boeing n'izindi.

Umuyobozi Mukuru wa Embraer ushinzwe ubucuruzi, Arjan Meijer ati 'E2TS izafasha mu bijyanye no kugabanya amavuta indege zikoresha, kugabanya imyuka ihumanya indege zohereza mu kirere, ryongere n'intera indege igenda.'

Yavuze kandi ko rizananoza uburyo bwo kugenda n'ibindi ku buryo 'twumva ko bizashimisha abakiliya bacu n'ababagana.'

E2TS ituma umupilote atagira uruhare kugira ngo indege yikure ku butaka ifata ikirere.

Icyakora abapilote baba bari hafi aho bakurikirana buri kimwe cyose kugira ngo mu gihe haba habaye ikibazo wenda iryo koranabuhanga ripfuye n'ikindi cyabaho, bahite bafatiraho bagakoresha uburyo busanzwe.

Uretse ibyo kandi, Embraer igaragaza ko E2TS izongera ibilometero 643 indege ifite iryo koranabuhanga ku byo yashaka kumara mu kirere.

E2TS ifanafasha indege kuba yahagurukira ku mihanda migufi kabone nubwo yaba ifite imizigo myinshi.

Biteganyijwe ko iryo koranabuhanga rizatahwa mu mpera za 2025, ku ndege nshya iki kigo kizaba cyakoze n'izisanzwe zihari nk'uko Business Insider ibitangaza,

Uruganda kandi ruri gushyiramo ikoranabuhanga rizafasha indege za Embraer E2 gutwara ibintu byinshi.

Rwanavuguruye 'salon' z'izo ndege ku buryo mu nshya hazongerwamo imyanya ine, ibizatuma yiyongeraho miliyoni 4,5$ mu myaka 15 iri imbere ku kigo kizaba kiyikoresha.

Iyi ndege yitwa Embraer E195-E2. Mu 2024 yari yajyanywe i Farnborough mu Bwongereza mu imurikabikorwa ry’ibikoresho byifashishwa mu kogoga ikirere. Yafotowe na Pete Syme wa Business Insider

Nyuma yo kwitaba telefone nyinshi zimbaza amakuru y’insegero naba nzi basengeramo kuri iki Cyumweru, natekereje iyi nkuru. Kumenya aya makuru ntibyari byoroshye kuko hari abapasiteri wahamagaraga babona ko ari umunyamakuru ushaka, telefone bakayirya urwara. Ntiwabarenganya muri iyi minsi kuko imitima ya benshi muri bo irahagaze.

Mu baganiriye na InyaRwanda tutari buvuge amazina, bavuze ko basuwe n’inzego zishinzwe iri genzura, bagatangarizwa ko bakomeza gusenga nk’ibisanzwe ariko bagasabwa kugira ibyo bakosora bicye baburaga birimo nk’umurindankuba, gukora neza soundproof, n’ibindi. Abakristo bafungiwe insengero, batubwiye ko bazajya gusengera mu zindi zitafunzwe.

Muri Kigali hafunzwe ahanini insengero nshya z’amashami zari zikiyubaka ariko inyinshi mu zimaze igihe ntabwo zagizweho ingaruka n’iri suzuma rya RGB. Gusa hari nka Kiliziya yafunzwe yari imaze imyaka myinshi. Zimwe mu nsengero z’amatorero akomeye nazo zarafunzwe aho twavugamo nka ADEPR Gihogwe, n’Itorero Umuriro wa Pentekote mu Rwanda.

Icyakora Itorero Umuriro wa Pentekote mu Rwanda ntabwo ryafunzwe kubera ibijyanye n’inyubako ahubwo ryazize impamvu zitandukanye zifitanye isano n’imiyoborere yaryo yanenzwe na RGB. Mu byo RGB yagendeyeho ifunga iri Toero harimo “Gucamo ibice no kubiba amacakubiri n’amakimbirane by’urudaca mu bakristo bagize Itorero ku buryo bibabuza umudendezo n’ituze;

Kuba zimwe mu nyigisho z’Itorero ziyobya abaturage zikabakangurira kutitabira zimwe muri gahunda z’Iterambere ku buryo bugira ingaruka mbi ku baturage; Kuba Itorero ridafite zimwe mu nzego ziteganywa n’amategeko bityo amategeko akaba atubahirizwa muri iri Torero ndetse n’ubuyobozi bukaba bwaracitsemo ibice;

Kuba Ubuyobozi bw’Itorero butujuje ibisabwa biteganywa n’Itegeko rigenga imiryango ishingiye ku myemerere; Kuba Itorero hari bimwe rigenderaho biri mu mategeko ngenga-mikorere bidateganyijwe mu mategekoshingiro”.

Menya zimwe mu nsengero wasengeramo kuri iki Cyumweru

ADEPR Nyarugenge

ADEPR Remera

ADEPR Gatenga

CLA Nyarutarama

St Michelle – Nyarugenge

St Famille – Nyarugenge

Regna Pacis – Remera

Restoration Church Masoro [Kwa Masasu]

AEBR Kacyiru [Baptiste Church]

Foursquare Gospel Church – Kimironko

Noble Family Church [Kwa Mignonne]

Zion Temple Gatenga [Kwa Gitwaza]

EAR Remera [Kwa Rutayisire]

EAR Kibagabaga

EAR St Etienne [Biryogo]

Bethesda Holy Church Gisozi

Grace Room Ministry – Good Shepherd Nyarutarama

UCC Niboye & Gikondo [United Christian Church]

New Life Bible Church – Kicukiro

Healing Centre Church – Remera

Itangazo rya RGB ryo kuwa Kane tarik 01 Kanama 2024, rivuga ko hari kugenzurwa iyubahirizwa ry’amategeko n’amabwiriza agenga imiryango ishingiye ku myemerere. Ni gahunda iri gukorwa na RGB ku bufatanye n’izindi nzego za Leta.

Bimwe mu bishingirwaho muri iri genzura, harimo kureba ko urusengero rufite ibyangombwa by’iyandikwa bitangwa na RGB, icyemezo cy’imikoranire n’Akarere mu gihe hafunguwe ishami, kureba niba inyubako y’urusengero yujuje ibisabwa biteganywa n’amategeko agenga imiturire y’aho ruherereye;

No kureba niba abayobozi bafite impamyabumenyi cyangwa impamyabushobozi mu by’iyobokamana (Theology) ku rwego ruhagarariye umuryango no ku rwego rw’umuryango rufite izindi rukuriye.

RGB iti “Muri iri genzura, aho bigaragara ko hari insengero n’imisigiti bitubahiriza ibiteganywa n’itegeko ndetse n’amabwiriza agenga imiryango ishingiye ku myemerere, birahagarikwa”.

RGB ivuga ko inzego bireba zizakomeza gufatanya n’abayobozi b’amadini n’amatorero mu kubaka iterambere rirambye hubahirizwa ibiteganywa n’amategeko n’amabwiriza agenga imiryango ishingiye ku myemerere ndetse no kugira imikorere n’inyubako byujuje ibisabwa n’amategeko.

Insengero zirenga 5,600 zimaze gufungwa mu gihugu hose

Amakuru avuga ko mu Mujyi wa Kigali hamaze gufungwa insengero 783, mu gihe Intara y’Iburasirazuba ari yo ifite insengero nyinshi zafunzwe zigera ku 2040 mu nsengero 3736 zagenzuwe. Iyi mibare ishobora kwiyongera kuko iyi Ntara ibarizwamo insengero 4154 bivuze ko insengero 418 zitari zakagenzuwe ubwo iyi mibare yatangazwaga.

Mu Ntara y’Amajyepfo hafunzwe insengero 582, mu Ntara y’Amajyaruguru hafunzwe insengero 1253 inyinshi zikaba ziri mu Karere ka Gicumbi gafitemo 318 zafunzwe. Intara y’Iburengerazuba hamaze gufungwa insengero 1393 mu gihe iyi Ntara ifite insengero zirenga ibihumbi bitatu. Si insengero gusa zafunzwe ahubwo n’ubuvumo bwose bwarafunzwe.

Umuyobozi Mukuru w’Urwego rw’Igihugu rw’Imiyoborere (RGB) Dr. Usta Kayitesi yatangarije The New Times ko “Leta yafashe ingamba ku ikwirakwira ry’inzu zo gusengeramo” nyuma yo kubona ko hakiri insengero zangiritse “ndetse zidafite isuku.”

Minisitiri w’Ubutegetsi bw’Igihugu Jean Claude Musabyimana ubwo yaganiraga n’Ikigo cy’Igihugu cy’Itangazamakuru, RBA, yavuze ko zimwe mu nsengero zafunzwe zirimo n’aho ugera ugasanga abantu barahasengera bihoraho ariko nta rusengero ruhari.

Uyu muyobozi yatanze ingero z’abasengera ku misozi, mu buvumo, mu bitare, mu mashyamba n’ahandi avuga ko rimwe na rimwe hateza impanuka, harenze 108 mu gihugu “ndetse hakunda gushyira n’ubuzima bw’abantu mu kaga”.

Yahumurije abakristo ababwira ko iri genzura riri gukorwa ku bw’umutekano wabo. Aragira ati: “Ntabwo biri gukorwa kugira ngo bagire uwo babuza gusenga, ahubwo ni ukugira ngo umutekano wabo ndetse n’ituze ry’abahasengera rikorwe neza”.

Igitego kimwe rukumbi cya Muderi Akbar cyafashije Gasogi United gutsinda umukino wa gicuti yakinaga na Jamus FC yo muri Sudani y’Epfo ikinamo abakinnyi babiri hahoze muri Rayon Sports, Paul Gomis n’Umurundi Mvuyekure Emmanuel utakandagiye mu kibuga.

Gasogi United yakinaga umukino mpuzamahanga wa gicuti na Jamus FC yo muri Sudani y’Epfo imaze iminsi mu Rwanda aho irimo kwitegurira CAF Confederation Cup, ni umukino wabereye ku kibuga cya Bugesera.

Mu minota ya mbere y’umukino wabonaga amakipe yombi akinira mu kibuga hagati cyane ariko nta mahirwe afatika arema kugeza ku munota wa 16 ubwo Gasogi United yabonaga igitego cya mbere.

Hari ku burangare bw’ubwugarizi bwa Jamus maze Muderi Akbar yafashe umupira mu rubuga rw’amahina aha Kabanda Serge umupira mwiza ariko ateye bawukuramo gusa waje ugarukira Muderi Akbar nta kindi uyu murundi yakoze uretse gushyira umupira mu rushundura kiba kiranyoye.

Gasogi United wabonaga yamaze kwinjira mu mukino irimo irusha Jamus, ku munota wa 27 Muderi Akbar yongeye kugerageza ishoti rikomeye ariko umunyezamu awushyira muri koruneri itagize icyo itanga.

Jamus yaje kubona amahirwe akomeye ku munota wa 36 ku mupira Yahann Paulino yahinduriye Ebon Malish asabwa gushyira mu izamu ariko ateye umunyezamu Dauda awukuramo.

Muri iyi minota wabonaga Jamus igerageza kurema uburyo bw’ibitego ariko igice cya mbere cyarangiye ari 1-0.

Mu gice cya kabiri Jamus yari yakoze impinduka ishyiramo Paul Gomis wahoze muri Rayon Sports, wabonaga irimo ishaka kwishyura cyane igitego yatsinzwe na Gasogi United mu gice cya mbere ariko ubwugarizi n’umunyezamu ba Gasogi United babyitwaramo neza.

Amahirwe ya mbere Gasogi United yabonye mu gice cya kabiri ni ku munota wa 76 ubwo Mugisha Joseph yazamukanaga umupira akawuhindura neza ariko Niyongira Danny yatera mu izamu bagahita bawukuramo.

Jamus yagerageje kwishyura iki gitego biranga maze umukino urangira ari 1-0.

Igitego cya Muderi Akbar

Bishimira igitego cya Muderi Akbar

Wari umukino uryoheye ijisho

Marc Govin ukina ku ruhande rw’iburyo muri Gasogi United yugarira

Muderi Akbar ahanganiye umupira na Emmanul Maku

Harerimana Abdalaziz yinjirana mu rubuga rw’amahina kapiteni wa Jamus, Benjamin Taka

Ebon Malish na Muderi Akbar

Perezida wa Gasogi United, Kakooza Nkuriza Charles

Perezida w’abafana ba Gasogi United ku Isi, Angeli Mutabaruka

Azam FC yahaye Perezida Kagame iyi mpano kuri uyu wa Gatandatu mu birori by’Umunsi mukuru wahariwe ikipe ya Rayon Sports uzwi nk’Umunsi w’Igikundiro [Rayon Day] biri kubera i Nyamirambo muri Kigali Pelé Stadium.

Ubwo Azam FC yari ihawe umwanya ngo yerekane abakinnyi bayo izakoresha mu mwaka utaha w’imikino, Umuvugizi wayo Hasheem Ibwe yavuze ko bakunda Perezida Kagame bitewe n’imiyoborere myiza ndetse n’umubano mwiza u Rwanda rufitanye na Tanzania. 

Yahise avuga ko hari impano bamugeneye bitewe n’ukuntu ateza imbere ibikorwa bya siporo, maze umuyobozi wa Azam FC, Abdulkarim Amin Popati ahita ashyikiriza umwambaro w’iyi kipe umuyobozi wa Rayon Sports, Uwayezu Jean Fideli wanditseho P Kagame mu mugongo.

Umukuru w’Igihugu cy’u Rwanda akunze gushimirwa na benshi bitewe n’ukuntu ateza imbere ibikorwa bya siporo dore ko no mu minsi yashize na Perezida w’u Bufaransa, Emmanuel Macron yamushimiye avuga ko n’abandi bakwiriye kumufataho icyitegererezo.

Ikipe ya Azam FC iri bukine umukino wa gicuti na Rayon Sports ndetse ni nawo mukino urasoza ibirori by’Umunsi w’Igikundiro wa 2024.

Umuyobozi wa Azam FC ubwo yashyikirizaga umuyobozi wa Rayon Sports impano bageneye Perezida Kagame 

45+3″ Igice cya mbere kirarangiye

45″ Uumusifuzi yongeyeho iminota 3 gusa kugirango igice cya mbere kirangira

35' Fei Toto agerageje uburyo bugana mu izamu ku mupira muremure watewe na Adolf ariko Omar aramubangamira umupira ujya hanze.

33' Rayon Sports ihushije ikindi gitego ku mupira wa kufura itewe na Bugingo Ackim, Nsabimana Aimable ashyiraho umutwe, umupira umunyezamu Mohamed Mustafa awujabura mu izamu bigoranye awushyira muri koroneri

27' Gning Omar ahawe ikarita y'umuhondo ku ikosa akoreye Franck Tiesse.

17″ Rayon Sports ihushije igitego cyari cyabazwe ku mupira uzamukanwe na Iraguha Hadji mu kuboko kw’iburyo, awukata neza ashaka Bbaale washyizeho umutwe arebana n’izamu umupira ujya hanze

15″ Azam FC ihushije igitego ku mupira Fei Toto afatiye mu rubuga rw’amahina ashota ishoti rikomeye umunyezamu wa Rayon Sports awushyira muri koroneri

09″ Rayon Sports ibonye koroneri ya mbere ku mupira uzamukanwe na Harina Niyonzima myugariro wa Azam FC ashyiraho umutwe umupira ujya hanze, gusa koroneri itewe nabi ntiyagira icyo ifata.

Abakinnyi 11 Rayon Sports yabanje mu kibuga

Khadime Ndiaye

Muhire Kevin

Ombolenga Fitina

Bugingo Hakim

Nsabimana Aimable

Gning Omar

Iraguha Hadji

Niyonzima Olivier

Charles Bbaale

Niyonzima Haruna

Aruna Madjaliwa

Abakinnyi 11 Azam FC yabanje mu kibuga

Mohammed Mustafa

Lusajo Mwaikenda

Yannick Bangala

Fuentes Mendoza

Adolf Ntasingwa

Gibril Sillah

James Akaninko

Blanco Jhonier

Feisal Abdallah

Frack Tiesse

18:26″ Umukino uratangiye. Reka twongere tubahe ikaze nshuti bakunzi ba InyaRwanda mu mukino uri guhuza Rayon Sports na Azam FC

18:21″ Umukino utinze gutangira kubera amatara ya sitade ataraka yose nderse urumuri ruhagije kugirango umukino ukinwe rukaba rutaragera.

18:15″ Amakipe yombi avuye mu rwambariro mu kanya gato cyane umukino ukaza kuba utangiye.

18:11″ Aho tugeze aha, Kigali Pele Stadium ku kigero cya 95% yamaze kuzura aho umufana wa Rayon Sports ari hose yishimwe

17:55″ Amakipe yombi asubiye mu rwambariro, akaba ari bugaruke umukino utangira

17:30″ Amakipe yombi yinjiye mu kibuga aho aje kwishyushya

Mu ijambo rya Perezida wa Rayon Sports yatangiye ashimira Umukuru w’igihugu cy’u Rwanda ku ruhare agira mu iterambere ry’umupira w’amaguru mu Rwanda ndetse no mu mahanga.

Yakomeje ashimira ikipe ya Azam FC ku buryo yemeye kwitabira Rayon Day, ndetse asoza yifuriza abitabiriye Rayon Day kureba umukino mwiza

17:17″ Hakurikiyeho ijambo rya Perezida wa Rayon Sports ndetse nyuma y’iri jambo harakurikiraho igikorwa Nyamukuru cy’umukino uhuza Rayon Sports na Azam FC

Haruna Niyonzima niwe watangiye yerekanwa

Wasiri yinjiye mu kibuga yambaye umupira wa Azam FC izahura na APR FC

16:38″ Rayon Sports igiye kwerekana abakinnyi izakoresha mu mwaka w’imikino 2024-25. Ni igikorwa kigiye kuyoborwa n’abanyamakuru 2 Mugenzi Faustin na Wasili.

Aba banyamakuru binjiye mu kibuga mu buryo budasanzwe aho Wasili yinjiye yambaye umwenda wa Azam FC naho Faustin yaje yambaye igishura cy’ubururu mu gihe ipantaro n’ishati ari umweru.

16:34″ Platini ashoje gutaramira abakunzi ba Rayon Sports ndetse n’abakunzi b’umupira w’amaguru muri rusange bitabiriye Rayon Day

Platini yamanutse ku rubyiniro ari kumwe n’abaririmbyi bishimiwe n’abafana cyane

16:20″ Umuhanzi Platini agiye ku rubyiniro aho yari ategejwe na benshi. Uyu muhanzi akunze kwiyemerera ko ari umufana wa Rayon Sports

Fei Toto Umukinnyii wa Azam udasanzwe ndetse akaba umukinnyi witezwe kuri Rayon Day

16:14″ Ikipe ya Azam FC ishoje kwerekena abakinnyi. Azam FC yatangiye iki gikorwa iha impano umukuru w’igihugu cy’u Rwanda Perezida Paul Kagame aho bamugeneye umupira wa Azam FC wanditseho Kagame.

Impano ya Perezida Paul Kagame yakiriwe na Perezida wa Rayon Sports, Uwayezu Jean Fidele

Muri iki gikorwa kandi, abafana ba Rayon Sports na Azam FC bahanye igihango ko ubwo Azam izaza gukina na APR FC bazayifana ntacyo bitayeho ibintu byashimishije ubuyobozi bwa Azam FC cyane.

Ubuyobozi bwa Azam FC nabwo bwemeye ko buzazanira abakunzi b’iyi kipe imyenda bazambara kuri uwo munsi.

15:30″ Azam FC ubu niyo ifashe umwanya aho batangiye kwerekana abakinnyi bayo izakoresha mu mwaka w’imikino 2024/25.

Tubibutse ko Azam FC izacakirana na APR FC mu ijonjora rya mbere rya CAF Champions League

Bushali yataramiye abafana ba Rayon Sports mu ndirimbo zirimo Kugasima, Kurura yakoranye na Juno, Nimwebwe, Bermuda ndetse n’izindi

DJ Brianne nawe yasusurukije abitabiriye Rayon Day ndetse akaba ari umwe mu bavangamuziki bagezweho mu Rwanda

15:10″ Umuhanzi Bushali agiye ku rubyiniro ndetse akaba ariwe muhanzi ubimburiye abandi bahanzi kugaragara ku rubyiniro.
Abafana ba Rayon Sports beretse urukundo rudasanzwe Perezida w’umuryango wa Rayon Sports Uwayezu Jean Fidele

Gahunda ya Rayon Day uko iteye

Kuva 10:00 am-11:45 am hari hateganyijwe akarasisi kagana kuri sitade. 12:00 pm gufungura imiryango. Kuva 12:00 – 14:00 pm hari imyidagaduro irimo n'abakora siporo n'ababyina gakondo. Kuva 14:00- 14:45 kwerekana ikipe ya Rayon Sports y'abagore

Kuva 14:45 – 15:00 pm umuziki ndetse Bushali akaba aribwo aributaramire abafana. Kuva 15:00 – 15:45 kwerekana abakinnyi ba Azama FC. Kuva 15:45 – 16:00 Umuhanzi Platini araba ataramira abafana.

Kuva 16:00 – 16:45 Kwerekana abakinnyi ba Rayon Sports. Kuva 16:45 – 17:00 haratambuka ijambo rya perezida wa Rayon Sports. Kuva 17:00 – 18:00 amakipe araba ari kwishyushya. 18:00 pm umukino nyamukuru uhuza Rayon Sports na Azam FC nibwo utangira. 18:50 – 19:00 haratarama abana b'umuryango wa Sherrie Silver. Umukino urarangira 20:00. Kuva 20:00 – 20:30 haratangwa ibihembo, ubindi hasoze umuziki kuva 20:30 kugera 21:00 pm

InyaRwanda iguhaye ikaze ku munsi w'igikundiro ugizwe n'ibikorwa byinshi bihagarariwe n'umukino ugomba guhuza Rayon Sports na Azam FC. Rayon Day ni umunsi ngarukamwaka utegurwa n'ikipe ya Rayon Sports, aho uyu munsi uba utegura umwaka w'imikino ku buryo bwemewe.

Uyu munsi uba ugizwe n'ibikorwa bitandukanye birimo abahanzi basusurutsa, abafana ba Rayon Sports, kwerekana abakinnyi ikipe izakoresha ku makipe abiri Rayon Sports na Rayon Sports y'abagore.

Uyu munsi kandi ukunze kugaragaraho umukino uhuza Rayon Sports n'indi kipe byumwihariko ikunze kuba ari iyo hanze y'u Rwanda. Kuri iyi nshuro rero ikipe ya Rayon Sports yatumiye ikipe ya Azam FC yo muri Tanzania, ikaba ikipe izahagararira iki gihugu.

AMAFOTO: Ngabo Serge- InyaRwanda.com

VIDEO: Eric Munyantore- InyaRwanda.com