Blog

Icyakora nubwo bimeze bityo, Umuryango Nyarwanda watsinze igitego gikomeye cyane cyo kongera kwiyubaka, ubumwe n'ubwiyunge bugashyirwamo imbaraga ndetse bigatuma ibikorwa by'iterambere bishoboka muri rusange.

Uru rugendo ni imwe mu ngingo zagarutsweho mu Nama Mpuzamahanga igamije kurebera hamwe uburyo u Rwanda rwabashije kwiyubaka, uruhare rw'ubumwe n'ubwiyunge muri uru rugendo, uruhare rw'ubutabera ndetse n'uburyo bwo gukomeza gushyigira amahoro nk'ipfundo ry'imibereho myiza.

Ni Inama yateguwe yateguwe n'Umuryango ugamije kurwanya Jenoside ku Isi, Aegis Trust, ku bufatanye na Kaminuza y'u Rwanda, Kaminuza ya Tufts, Minisitiri y'Ubumwe n'Inshingano Mboneragihugu n'abandi bafatanyabikorwa.

Minisitiri w'Ubumwe bw'Abanyarwanda n'Inshingano Mboneragihugu, Dr. Jean-Damascène Bizimana, niwe watangije iyi Nama ku mugaragaro, avuga ko u Rwanda rwateye intambwe ifatika mu rugendo rw'Ubumwe n'ubwiyunge, ashimangira ko nyuma ya Jenoside yakorewe Abatutsi, u Rwanda rwahisemo kutihorera.

Ati 'Nyuma yo guhagarika Jenoside, Abanyarwanda banze kwihorera, bahitamo ubumwe, ubutabera bugamije kubaka ndetse no kubana, ndetse bari baranyuze mu bihe bigoye cyane bitewe na Jenoside yakorewe Abatutsi n'ibikomere yasize.'

Yongeyeho ati 'Twahisemo gukosora amakosa yakozwe mu bihe byashize, atari uko byari byoroshye, ahubwo byari ngombwa kugira ngo twiyubakire Igihugu kitubereye, kibereye inshuti zacu n'Isi muri rusange.'

Ubukana bwa Jenoside yakorewe Abatutsi bwatumye abatuye Isi bongera kwibuka ubushobozi bwa muntu mu gukora ibyaha, icyakora nanone ubushobozi bw'Abanyarwanda bongeye kubana nyuma y'ayo mateka akomeye, ni ikimenyetso cy'ubushobozi bwa muntu mu kwiyubaka, nk'uko Umujyanama wihariye w'Umunyamabanga Mukuru wa Loni ushinzwe kurwanya Jenoside, Alice Wairimu Nderitu, yabigarutseho.

Ati 'Hashize imyaka 30 kuva Jenoside yakorewe Abatutsi ihagaritswe. Ibi bitwibutsa ubushobozi abantu basanzwe bashobora kwigiramo bwo gukora ikibi, ariko nanone bikatwibutsa ubushobozi bwa muntu mu gukira ibikomere no kugana inzira y'ubumwe n'ubwiyunge.'

Yatanze urugero rw'imiryango yasuye, agasanga yarababariye abayiciye muri Jenoside, asobanura ko urwo rwego rw'ubumwe n'ubwiyunge bigira u Rwanda isomo ku yandi mahanga, ati 'U Rwanda ni icyitegererezo ku rwego rw'Isi, ndetse ni igisobanuro cy'ubumwe n'ubwiyunge bwuzuye.'

Yashimangiye ko ibi ari umusaruro w'uburyo u Rwanda rwahisemo kwishakamo ibisubizo, nyuma yo gutereranwa n'amahanga, ati 'Ubwo u Rwanda rwatereranwaga n'amahanga, rwafashe icyemezo icyemezo cyo kwifashamo ibisubizo, rushyiraho uburyo bw'ubumwe n'ubwiyunge ku buryo twese tuza kubwigiraho uyu munsi.'

Umuyobozi Mukuru wa Kaminuza y'u Rwanda, Prof. Kayihura Muganga Didas, yavuze ko iyo abantu barebereye akarengane, bituma karushaho gukaza umurego, ashimangira ko 'Ntidukwiriye guhagarara ngo turebere akarengane aho ari ho hose, kuko bizatuma gakwirakwira aho ari ho hose.'

Ambasaderi wa Suède, Johanna Teague, yagarutse ku masomo amahanga akwiriye kwigira ku Rwanda, anagaragaza impungenge z'uburyo intambara zikomeje kuba hirya no hino ku Isi kandi zikamara igihe kirekire, kandi ibi bikaba ari ikibazo gikomeye ku mutekano w'Isi muri rusange.

Minisitiri w’Ubumwe bw’Abanyarwanda n’Inshingano Mboneragihugu, Dr. Jean-Damascène Bizimana, niwe watangije iyi Nama ku mugaragaro

Umujyanama wihariye w'Umunyamabanga Mukuru wa Loni ushinzwe kurwanya Jenoside, Alice Wairimu Nderitu, yavuze ko kwiyubaka u Rwanda ari urugero rw’uko ubumwe n’ubwiyunge bushoboka

Umuyobozi Mukuru wa Kaminuza y'u Rwanda, Prof. Kayihura Muganga Didas, yavuze ko iyo abantu barebereye akarengane, bituma gafata umurego

Antoine Cardinal Kambanda ni umwe mu bitabiriye iyi Nama

Ambasaderi wa Suède, Johanna Teague, yagarutse ku masomo amahanga akwiriye kwigira ku Rwanda, anagaragaza impungenge z’uburyo intambara zikomeje kuba hirya no hino ku Isi

Umuyobozi Mukuru wa Aegis Trust, Freddy Mutanguha, yari yitabiriye iyi Nama Mpuzamahanga

Iyi Nama yari yitabiriwe n’abantu batandukanye baturutse hirya no hino ku Isi

Amafoto: Niyonzima Moise

Ni igikorwa SKOL yanyujije muri gahunda izwi nka 'FXB Musambira Village Program' igenewe gufasha abaturage bo muri aka gace kuva mu bukene no kwita ku buzima.

Iki gikorwa cyabaye ku nshuro ya gatatu, SKOL Brewery yatanze amabati yo kubaka ubwiherero busukuye n'indobo zitunganyirizwamo amazi meza yo kunywa.

Nyiri uruganda rwa SKOL Brewery Ltd, Thibault Relecom, yavuze ko bazakomeza kugira uruhare mu iterambere ry'abanyarwanda.

Ati 'Tugomba kumenya neza ko iyi miryango yabonye ubufasha bwose ikeneye. Ntabwo ibi bikomeza gusa umubano wacu na FXB ahubwo binagaragaza umuhate mu kugira uruhare mu buzima bw'abaturage. Bigaragaza ko ejo ari heza mu gihe dukomeje gushyira hamwe.'

Umuyobozi w'Akarere ka Kamonyi, Dr Nahayo Sylvère yashimye SKOL Brewery na FXB Rwanda ku ruhare bagira mu guhindura ubuzima bw'abatuye i Musambira.

Ati 'Turashimira uruganda rwa SKOL Brewery ku bikorwa badufashamo kandi twizeye ko bizakomeza. Abahawe ibikoresho by'isuku n'ubwubatsi turabasaba kuzabikoresha neza bakabyitaho kugira ngo bizabagirire umumaro.'

Yashimye by'umwihariko FXB Rwanda itagarukira mu kubitanga gusa ahubwo inakurikira ikamenya uko bikoreshwa no kubibungabunga.

Umuyobozi wa FXB Rwanda, Kayitana Emmanuel yashimye iyi gahunda ahamya ko izakomeza kubaho ndetse anashima abaturage bakoresha neza ubufasha bahabwa bityo bikabihindurira ubuzima.

Abahawe ibi bikoresho bagaragaje ko bizabagirira umumaro mu buzima bwabo kuko hari bagenzi babo babonye ko ubuzima bwahindutse.

Imiryango 100 yo mu Murenge wa Musambira yahawe ibikoresho by’isuku n’ubwubatsi

Nyiri uruganda rwa SKOL Brewery Ltd, Thibault Relecom yavuze ko barajwe inshinga no kugira uruhare mu iterambere ry’abanyarwanda

Ibikoresho SKOL Brewery Ltd yahawe imiryango 100 y’i Musambira

Umuyobozi wa FXB Rwanda, Kayitana Emmanuel yashimiye abaturage bakoresha neza ubufasha bahabwa bukabahindurira ubuzima

Abayobozi bakuru bashyikiriza abaturage inkunga bagenewe na SKOL Brewery Ltd

Umuyobozi w'Akarere ka Kamonyi, Dr Nahayo Sylvère yashimye SKOL Brewery na FXB Rwanda ku ruhare bagira mu guhindura ubuzima bw'abatuye i Musambira

Imiryango 100 y’i Musambira yahawe ibikoresho by’isuku n’ubwubatsi

Amafoto: Kwizera Hervé

Muri Volleyball, Police VC yatsinze APR VC amaseti 3-1 ihita igera ku mukino wa nyuma w’igikombe cyo Kwibohora (Liberation Cup 2024) ni mu gihe mu bagore APR WVC yageze ku mukino wa itsinze Ruhago WVC.

Habanje umukino w’abagore wahuje APR WVC na Ruhango WVC warangiye ikipe y’Ingabo z’Igihugu amaseti 3-0 (25-13, 25-20 na 25-13). Ku mukino wa nyuma izahura n’izakomeza hagati ya RRA na Police WVC.

Hahise hakurikiraho umukino w’abagabo wahuje Police VC na APR VC, umukino utari woroshye.

APR yatangiye umukino isa n’ihuzagurika, Police VC yayitsinze amanota 3 ya mbere ariko nayo ihita itsinda abiri, amakipe yakomeje kugendana akubana ariko Police VC iri imbere.

APR yaje kuyifata ubwo bari bageze ku nota rya 14, gusa Police VC yahise ishyiramo ikinyuranyo aho yahise itsinda andi manota 3 APR itaratsinda.

Ibifashijwemo n’abarimo kapiteni wa yo Kanamugire Prince baje gukuramo aya manota ariko n’ubundi Police ikomeza kuyijya imbere. Police VC yaje gutsinda iseti ya mbere ku manota 25-23.

Kimwe n’iseti ya mbere, Police yayoboye iseti ya 2 aho yagize amanota 15 APR ifite 11, ibifashijwe n’abakinnyi ba yo nka Niyodushima Samuel na Rwahama, APR yakuyemo iki kinyuranyo aho bagejeje amanota 17-17, APR yahise inajya imbere na yo iyobora umukino kugeza itwaye iseti ku manota 25-23.

Police yari hejuru yaje gutsinda iseti ya 3 ku manota 25-22, ihita igira amaseti 2-1. Police VC yaje no gutsinda iseti ya 4 amanota 25-19. Police ku mukino wa nyuma izahura n’izatsinda ejo hagati ya REG na Kepler

Ejo hateganyijwe imikino 2 uwo mu bagore RRA izakinamo na Police ni mu gihe mu bagabo REG VC izesurana na Kepler.

APR WVC yageze ku mukino wa nyuma

Abayobozi ba Police bishimira intsinzi

Ni ibirori byabaye kuri uyu wa Kane tariki 25 Nyakanga 2024, bibera i Rabat muri Maroc, byitabiriwa n'abasaga 200 barimo abayobozi bakuru ba Maroc, ba Ambasaderi bahagarariye ibihugu byabo muri Maroc, abikorera ku giti cyabo, imiryango itari iya leta, urubyiruko rw'Abanyarwanda biga muri Maroc, abafatanyabikorwa ndetse n'inshuti z'u Rwanda.

Ambasaderi w'u Rwanda mu bwami bwa Maroc, Umutoni Kazimbaya Shakilla, yashimye ingabo zahoze ari iza RPA zari zirangajwe imbere na Perezida Kagame, kuba zarahagaritse Jenoside yakorewe Abatutsi mu 1994, bigafungura amarembo yo kubaka igihugu bundi bushya.

yavuze ko gutorwa kwa Perezida Paul Kagame ku bwiganze bw'amajwi menshi bishimangira icyizere Abanyarwanda bafitiye 'uwabayoboye mu iterambere muri iyi myaka 30 ishize Jenoside ihagaritswe'

Ambasaderi Umutoni Kazimbaya Shakilla, yavuze kandi ko iyo ntsinzi ari ikimenyetso cy'ubumwe bw'Abanyarwanda ndetse n'icyerekezo cyo gukomeza inzira y'iterambere bahisemo.

Minisitiri w'Inganda n'Ubucuruzi muri Maroc, Riyad Mezzour, wari wifatanyije n'Abanyarwanda muri icyo gikorwa, yashimangiye umubano mwiza uri hagati y'u Rwanda na Maroc, ashimira u Rwanda intambwe rumaze gutera mu kwiyubaka kubera imiyoborere myiza.

Minisitiri Ryad yagize ati 'U Rwanda igihugu cy'imisozi igihumbi, urebye amateka yarwo yihariye ukareba uburyo rwabashije kwiyubaka, nta gushidikanya ko ari inkuru muri Afurika yose y'ibyiza byagezweho.'

Minisitiri Riyad, yagaragaje kandi ko igihugu cya Maroc gishimishijwe no kuba Perezida Paul Kagame yarongeye gutorerwa kuyobora u Rwanda, aboneraho kumwifuriza ishya n'ihirwe muri manda y'imyaka itanu agiye kuyoboramo Abanyarwanda.

Muri ibi birori, Itorero Icyeza cy'Indatwa ry'urubyiruko rw'Abanyarwanda baba muri Maroc, ni ryo ryasusurukije ababyitabiriye, mu mbyino za gakondo zinogeye ijisho.

Abarimo abayobozi bakuru ba Maroc, ba Ambasaderi bahagarariye ibihugu byabo muri Maroc, bari babukereye muri ibi birori

Ibi birori byabereye i Rabat byitabiriwa n'abasaga 200

Ambasaderi w'u Rwanda mu bwami bwa Maroc, Umutoni Kazimbaya Shakilla, yavuze ko gutorwa kwa Perezida Paul Kagame ku bwiganze bw'amajwi menshi bishimangira icyizere Abanyarwanda bakimufitiye

Minisitiri Riyad, yagaragaje ko igihugu cya Maroc gishimishijwe no kuba Perezida Paul Kagame yarongeye gutorerwa kuyobora u Rwanda

Ambasade y'u Rwanda mu bwami bwa Maroc ifatanyije n'Abanyarwanda baba muri icyo gihugu yizihizaga imyaka 30 ishize u Rwanda rwibohoye

Bamwe mu bitabiriye ibi birori harimo urubyiruko rw'Abanyarwanda biga muri Maroc

Itorero Icyeza cy'Indatwa ry'urubyiruko rw'Abanyarwanda baba muri Maroc, ni ryo ryasusurukije abari bitabiriye ibi birori

Uyu mugabo w'imyaka 55 utuye mu Mudugudu wa Biti, Akagari ka Remera, Umurenge wa Nyamabuye, bivugwa ko ubwo yari atashye mu rukerera ahagana saa kumi zo kuri uyu wa 26 Nyakanga 2024, yakomeje itabi igishirira kikagwa mu byatsi byumye hafi y'uruzitiro rw'urugo rwe rugafatwa n'inkongi y'umuriro.

Umunyamabanga Nshingwabikorwa w'Umurenge wa Nyamabuye Nshimiyimana Jean Claude, yemeje aya makuru, avuga ko uyu mugabo yitwikiye urugo abitewe n'ubusinzi bukabije.

Yagize ati “Byabaye mu rukerera mu gitondo kuko twebwe ubuyobozi mu mudugudu bwamugezeho nka saa kumi n'imwe. Ibyo yakoze byakomotse ku itabi yanywaga agashirira karahagwa kuko turi mu mpeshyi harafatwa,. Natwe tuhagera twasanze yatangiye kuhizimiriza.”

Yakomeje avuga ko bitakozwe ku bushake ahubwo ari nk'impanuka yahuriranye n'ubusinzi.

Yatwitse urugo rwe kubera ubusinzi no kunywa itabi

Yabibwiye abasore n'inkumi b'Abanyarwanda barenga 50, baturutse mu bihugu by'u Bubiligi, Canada, Amerika, Uganda, u Bwongereza, Côte d'Ivoire, na Australia, bagize icyiciro cya kane kirimo kwiga amateka y'u Rwanda by'umwihariko urugamba rwo kubohora igihugu no guhagarika Jenoside yakorewe Abatutsi mu 1994.

Basobanuriwe uko ingabo za RPA zari ziyobowe na Maj. Gen. Fred Gisa Rwigema zatangiye urugamba tariki 1 Ukwakira 1990 zinyura ku mupaka wa Kagitumba uhuza u Rwanda na Uganda, kugeza apfuye agasimburwa na Maj. Gen. Paul Kagame wari muri Amerika.

Bageze i Gikoba ahari indake Maj. Gen. Paul Kagame yabayemo kuva muri Nyakanga 1991 kugeza muri Kamena 1992, basobanuriwe uko urugamba rwatangiye ari ibitero shuma, ruhinduka imirwano yo guhangana imbonankubone nyuma.

Gen (Rtd) James Kabarebe yaberetse ko hari urubyiruko rwinshi bari mu kigero kimwe bagiye ku rugamba bamwe banahasiga ubuzima, bityo ko abakiriho bakwiye gukomereza ku bikorwa byo guteza imbere u Rwanda kuko urugamba ari cyo rwari rugamije.

Ati 'Ni urundi rugamba, urwo tugezeho ubu ni urwo guteza imbere ubukungu n'imibereho myiza kandi aha ni ho umusanzu wanyu ukenewe cyane. Aho muba mu Burayi, Amerika, Canada n'ahandi muri kuhakora iki? Ni iki uzazanira igihugu cyawe? Muzakora iki ngo mwunganire ibyo twakoze mu guteza imbere iki gihugu?'

'Uwo ni wo mukoro mufite kuko u Rwanda rugomba gukomeza gutera imbere, hari benshi basize ubuzima hano, ntabwo muzi umubare w'urubyiruko nkamwe bashyinguye hano n'aho muri gutambuka hari amaraaso y'urubyiruko rungana namwe, rero kugira ngo bataba barapfiriye ubusa musabwa gukomereza ku cyo bapfiriye. Bapfiriye iterambere ry'iki gihugu kandi aho ni ho mwitezwe gutanga umusanzu wanyu.'

Turagara Arnauld w'imyaka 26, yabwiye IGIHE ko impamvu nk'urubyiruko bahisemo kujya gusura igihugu cyabo ari ukugira ngo basobanukirwe amateka yacyo bamenye aho kiva n'aho kigana, bazanagire uruhare mu iterambere ryacyo.

Ati 'Afande [Gen. (Rtd) Kabarebe] yadusobanuriye uko urugamba rwo kubohora igihugu rwari rumeze, turumva ari amasomo akomeye azafasha urubyiruko kumenya icyo u Rwanda rwifuza, aho rushaka kugera kandi bizatuma na bo bagira umwete wo gushyira imbaraga mu byateza u Rwanda imbere.'

Uyu musore yagaragaje ko igihe cyose bibutse aho Perezida Kagame yabaye ari ku rugamba rwo kubohora igihugu bibatera imbaraga bigatuma n'aho bari gucika intege bakomera.

Sandra Kabandana uri mu bategura iki gikorwa yavuze ko baba bagamije gufasha urubyiruko rw'Abanyarwanda ruba hanze kumenya amahirwe ari mu Rwanda ngo ruzayabyaze umusaruro.

Yahamije ko nta muntu ukwiye gutegereza kugira imyaka 40 ngo abone gukora ibiteza imbere igihugu.

Kabandana kandi yijeje ko nyuma yo kubona ukuri kw'amateka y'u Rwanda bakomeza kurwanya abahakana n'abapfobya Jenoside yakorewe Abatutsi banyuze ku mbuga nkoranyambaga.

Bahereye ku mupaka wa Kagitumba aho urugamba rwatangiriye mu 1990

Muri ibi biti ni ho Maj. Gen. Fred Gisa Rwigema yatangiye amabwiriza y’urugamba mu minsi ibiri ya mbere ingabo za RPA zikimara kwambuka umupaka

Urubyiruko ruba muri diaspora rwasobanuriwe amateka y’urugamba rwo kubohora igihugu rwabereye i Gikoba ahiswe ‘Agasantimetero’

Iyo urubyiruko rwibutse aho Perezida Kagame yari ari mu rugamba rwo kubohora igihugu birwongerera imbaraga

Ni igitaramo cyitwa “Intsinzi Summer Concert” kizaba ku Cyumweru tariki 04/08/2024 mu Ngoro y’Umuryango FPR-Inkotanyi mu karere ka Huye. Kizarangwa n’indirimbo zitandukanye z’intsinzi, izirata u Rwanda ndetse n’izihimbaza Imana “dushimira Imana aho igejeje u Rwanda” nyuma y’uko ingabo zari iza RPA zihagaritse Jenoside yakorewe Abatutsi mu 1994.

Mu kiganiro na InyaRwanda, Umuyobozi wa Voce Dolce Group, Mukazera Marie Christelle, yakomeje adutangariza ko muri iki gitaramo bazaririmba n’indirimbo zibyinitse, “mbese buri munyarwanda wese azibonamo”. Ni igitaramo batumiyemo Beatha Musengamana wamamaye mu ndirimbo “Azabatsinda Kagame” ivuga ibigwi Perezida Paul Kagame.

Ni indirimbo yagize igikundiro mu bihe byo kwamamaza Perezida Kagame, bituma isubirwamo n’abahanzi b’ibyamamare barimo Butera Knowless, Bwiza, King James, Bushali, Alyn Sano, Ariel Wayz na Chris Eazy, mu murishyo wavugijwe na Pastor P. Igitaramo cya Voce Dolce ni cyo cya mbere gikomeye Beatha agiye kuririmbamo iyi ndirimbo.

Voce Dolce igiye gukora igitaramo cy’amateka mu Ntara y’Amajyepfo ni bantu ki?

Voce Dolce (bisobanuye Les Voix Douce/Amajwi atuje), igizwe n’urubyiruko rukorera umuziki mu Ntara y’Amjayepfo mu Karere ka Huye. Ni itsinda ryatangiye ku italiki ya 10/10/2020, rikaba rigizwe n’abaririmbyi bageze kuri 15 basengera muri Kiliziya Gatolika, baririmba kandi bakanakora umuziki mu buryo bugezweho kandi mu njyana zose.

Nubwo rimaze imyaka ine gusa ndetse rikaba rifite indirimbo nke zigera kuri zirindwi gusa, iri tsinda rimaze kuba ubukombe dore ko ryiyambazwa henshi mu Rwanda mu bikorwa bikomeye ndetse ryitabiriye amarushanwa nyafurika (African Chorale and Gospel Champions, ACGC Music) yabereye muri Kigali mu 2022.

ACGC yitabiriwe n’amakorali atandukanye aturutse mu Rwanda, Afrika y’Epfo, Ghana na Nigeria. Yabereye i Kigali mu Rwanda kuva ku taliki 23/03/2022 kugeza tariki 28/03/2022. Voce Dolce Group yaserukanye isheja muri iri rushanwa mpuzamahanga ndetse ikaba yaregukanye umwanya wa 3 mu gice cy’amarushanwa.

Uretse kwitabira irushanwa rya ACGC 2022, bamaze gukora ibitaramo bibiri ari byo “Summer Concert 1st Edition” yabaye muri 2022 na “Summer Concert 2nd Edition” yabaye muri 2023. Bahimbaje Missa zitandukanye ndetse n’ubu barakomeje. Ni itsinda ryagutse mu bikorwa kuko bitabira ubukwe, ikiriyo, gukora ‘Musique band’ cyangwa igisope n’ibindi.

Voce Dolve Group mu ntego ifite harimo kuzamura urwego rwa muzika mu gihugu cy’u Rwanda by’umwihariko mu karere ka Huye nk’Akarere kamwe mu turere dufite imijyi yunganira Kigali. Ibi bikaba bizagerwaho hibanzwe cyane ku kuzamura impano za muzika mu bato kandi bidashingiye ku idini runaka.

Abara inkuru y’urugendo rwabo mu muziki, Umuyobozi wa Voce Dolce Group, Mukazera Marie Christelle, yagize ati “Twatangiye turi 6 ariko kubera kwagura ibikorwa no gutegura ibitaramo bitandukanye twongera umubare ubu turi 15 twese hamwe”.

Yagaragaje ko magingo aya bitoroshye kwinjira muri iri tsinda, ati “Kuzamo ntabwo amarembo yuguruye nk’uko tubimenyereye mu makorali asanzwe kuko twifuje gukora itsinda rito rishoboye ariko binaterwa n’umwanya tubona kuko dukora n’indi mirimo itandukanye”.

Voce Dolce Group kugeza ubu ifite indirimbo zirindwi (7), ariko iziri kuri Youtube channel yabo yitwa ‘Voce Dolce Group’ ni enye (4) zirimo “Nyina wa Jambo” na “Singizwa” ari nazo zamenyekanye cyane. Izindi ndirimbo ni izo bagiye basubiramo z’abahanzi batandukanye.

Imishinga bafite harimo kuzamura impano z’abana haba mu miririmbire n’imicurangire ndetse no kuzamura urwego rw’imiririmbire “natwe ubwacu turifuza kuzagera ku rwego rwiza ku buryo Isi ibimenya atari mu Rwanda gusa”. Aba baririmbyi bo guhangwa amaso banafite gahunda yo gukozakorera igitaramo mu Mujyi wa Kigali, bitari kera.

 Doce Dolce Group bagiye gukora igitaramo cy’imbaturamugabo cyo kwishimira ibyiza u Rwanda rwagezeho nyuma ya Jenoside yakorewe Abatutsi

Ni itsinda rigizwe n’abaririmbyi b’abahanga b’amajwi azira amakaraza

Voce Dolce Group bateguye igitaramo cy’uburyohe bazaririmbamo indirimbo zisingiza Imana n’izirata u Rwanda

Beatha Musengamana bamwe bita ‘Azabatsinda Kagame’ yatumiwe mu gitaramo cya Voce Dolce Group

Huye igiye kuberamo igitaramo gikomeye “Intsinzi Summer Concert”

REBA INDIRIMBO “NYINA WA JAMBO” YA VOCE DOLCE GROUP

REBA INDIRIMBO “SINGIZWA MARIYA” YA VOCE DOLCE GROUP