Blog

Raporo y'Urwego rw'Ubucamanza mu Rwanda yerekana ko mu mwaka wa 2022/2023 inkiko z'u Rwanda zemeje ko gatanya za burundu 3075 zatanzwe ku bashakanye byemewe n'amategeko mu Rwanda.

Kimwe mu bigenga amasezerano yo guhana gatanya mu buryo bwumvikanweho ni uko mushobora kuyihabwa mumaranye nibura imyaka ibiri musezeranye mu buryo bwemewe n'amategeko. Mukora amasezerano yanditse y'ubutane bwumvikanyweho mukayasinyira imbere ya noteri, ndetse bikaba byiza muyakoze muri kumwe n'umunyamategeko kugira ngo mutayakora nabi ugasanga atemewe n'urukiko.

Umunyamategeko Me Munyentwali Maurice, abinyujije mu kiganiro cyitwa Amategeko Yacu kinyura ku Rubuga rwa YouTube, agaragaza ko ubu bwoko bwa gatanya ari bwo budateza ibibazo byinshi birimo no gutakaza imitungo, ugereranyije n'ubumenyerewe ko umwe mu bashakanye abanza kurega mugenzi we asaba ko batandukana bakabanza kuburana mu nkiko.

Ati ''Ni byiza ko mubikora mu mahoro aho kugira ngo mujye kugigira, mujye guhangana, mujye gutakaza imitungo mutangire kuba mushobora no kwicana, mwahitamo bikagira inzira niba kubana byanze, mukabyumvikanaho mugatandukana. Burya abantu basobanutse ntabwo bajya mu byo guhangana cyane, barumvikana bakavuga bati 'twakundanye tubyumvikanaho, niba byanze ntabwo duhatiriza'.''

Mu bindi bikubiye mu masezerano yanditse y'icyo kirego cy'ubutane bwumvikanweho, ni uko mushyiramo ku mwembi mwemeye gutandukana mu bwumvikane, n'ingingo irebana n'abana.

Iyo ntabo mufitanye mubyandikamo, mwaba mubafitanye mugasobanura uzabarera yaba se cyangwa nyina, cyangwa se mugahitamo undi wabarera na we mukamushyiramo.

Muramutse mufite abarenze umwe mushobora no gushyiramo niba bamwe muri bo bazarerwa na se abandi bakarerwa na nyina, mwanashaka mukavuga ko bazajya bamarana na nyina igihe runaka, ikindi bakakimarana na se.

Iyo mumaze kugaragaza uzarera abo bana, mushyiramo n'ibizabatunga n'uko bizajya biboneka, yaba amafaranga na yo mugashyiramo umubare wayo n'uzayatanga, konti azajya anyuzwaho n'itariki azajya ashyirirwaho.

Mugomba kandi gusobanura iby'uko abo bana bazishyurirwa amashuri ndetse n'uzabikora, uko bazavuzwa, n'ibindi byose biberekeyeho. Iki kirego cy'ubutane bwumvikanyweho iyo kimaze kunozwa, abagitanga baba bashobora kukijyana mu rukiko ruherereye mu gace baheruka gutura mo bwa nyuma babana.

Ikindi ugomba kumenya ni uko kuba ari ikirego cy'ubutane bwumvikanweho bidasobanuye ko cyitubahiriza inzira zose ngo kibe cyakwihutishwa, kuko mugomba kunyura no mu mihango yose yo kunga abashaka gutandukana.

Muri yo harimo kujya imbere y'umucamanza akabagaragariza ingaruka zo gutandukana mukamubwira niba mushobora kwisubiraho cyangwa se niba mukomeje gahunda yo gusaba gatanya, akabaha amezi atatu yo kujya kubitekerezaho, nyuma mugasubira yo mwaba mugikomeye ku gutandukana mugahita muhabwa umunsi w'inama ntegurarubanza.

Iyo muri iyo nama mwumvikanye ku gutandukana kwanyu, Umwanditsi w'Urukiko abikorera raporo akayiha umucamanza, kugira ngo ahite abifataho icyemezo kirangiza urubanza ndetse mukagitegurirwa bidatinze, bikanemezwa ko rurangiye burundu.

Reba ikiganiro kigaruka kuri gatanya yumvikanyweho hagati y'abashakanye mu Rwanda

Jordanie igihugu gitatswe n'amateka, umuco, ndetse n'ubwiza nyaburanga karemano. Imijyi nka Petra ibitse amateka adasanzwe, Ubutayu bwa Wadi Rum, Inyanja ya Dead Sea, n'imisozi myinshi ibereye ijisho ni bimwe mu bikurura ba mukerarugendo.

Iyi ni inkuru y'ibihe byiza nagiriye muri Petra.

Mu 2023 wonyine, iki gihugu cyakiriye abakerarugendo miliyoni esheshatu, aho abarenga miliyoni imwe basuye uyu Mujyi uzwi nka 'The Red-Rose City' kubera uburyo ugaragara.

Izina Petra rituruka ku ijambo ry'ikigiriki 'Petros', risobanuye urutare, ndetse abahanga mu mateka bavuga ko Umujyi wa Petra ari umwe mu mijyi yabayeho mbere y'indi ku Isi, aho bivugwa ko wabayeho muri 321 mbere y'Ivuka rya Yesu.

Mu 1985, Umujyi wa Petra washyizwe mu Mujyi ndangamurage n'Ishami ry'Umuryango w'Abibumbye rishinzwe Uburezi, Ubumenyi n'Umuco (UNESCO)

Petra kandi yubatsemo ibituro birenga 1000 by'abami ndetse n'abakomokaga ibwami, aho kuri ubu iri mu mijyi itabarijwemo abami benshi ku Isi.

Na Bibiliya iwugarukaho, aho mu gitabo cy'Abami ba Kabiri, Igice cya 14, umurongo wa 7 havuga hati 'Amasiya amarira ku icumu Abedomu ibihumbi icumi mu Kibaya cy'Umunyu, atera Umudugudu wa Sela arawigarurira. Kuva ubwo witwa Yokitēli kugeza na n'ubu.'

Sela ivugwa, ni ijambo ry'igiheburayo risobanuye urutare, akaba ari yo Petra y'ubu.

Uburyo Petra iba igaragara iyo uri kuyirebera kure

Mu gitabo cyo Kubara igice cya 20, umurongo wa 11 naho hagaragaza ko ubwo Mose n'iteraniro ry'Abisirayeli ryageraga mu Butayu bwa Zin, bakicwa n'inyota, Mose yahawe inkoni ayikubita ku gitare kivusha amazi. Benshi bemera ko aha havugwa muri iyo nkuru, ubu ari Petra.

Urugendo rugana Petra uvuye mu Murwa Mukuru wa Jordanie, Amman, rushobora gutwara amasaha atatu mu modoka yihuta, cyane ko nta modoka nyinshi ziba ziri mu mihanda iri hanze y'Umurwa Mukuru, dore ko ibice binini ari Ubutayu budatuwe kandi iki gihugu ubwacyo kikaba kidatuwe n'abantu benshi ugereranyije n'ubuso bwacyo.

Nahagurutse ahagana saa tatu z'igitondo, ubwo iby'amatsiko ntitwabigarukaho kuko nari nashize.

Mu nzira yose ijisho riba ryahagorewe. Mbega Igihugu mbega ubwiza! Nararebye ndatangara, ndiyongeza ndizihirwa, imisozi irambaraye mu butayu irandangaza, ndinda ngera iyo ngiye ntasinziriye na risa, kandi ubundi njye n'urugendo ntidutana n'ibitotsi.

Va kuri bya bindi iminota itavaga aho uri mu ishuri, kuri iyi nshuro amasaha atatu yanshiye mu myanya y'intoki, njya kubona mbona twasesekaye i Petra kare, ngononwa, nsohoka mu modoka nerekeza aho twagombaga gufatira amatike yo gusura 'The Treasury', inzu bivugwa ko yakoreshwaga mu kubika inyandiko z'ibwami, nubwo abandi bavuga ko yatabarizwagamo abami.

Ngana kuri the Treasury, nanyuze mu nzira ifunganye cyane, izwi nka 'The Siq,' aho nakoze urugendo rwa kilometero imwe ndi rwagati mu nkuta ndende cyane, zubakishije amabuye cyangwa se ibitare bifite uburebure burenga metero 70.

Inzira ya The Siq’ muri Petra by Night, aha aba ari mu masaha y’ijoro

Reka mbabwire inkuru mbarirano iratuba, gusa iyo uri hagati y'izi nkuta ushobora kumva utariho kuko uburebure bwazo, ubwiza n'imyaka zimaze zihagaze, bituma wumva ubirijwemo neza neza.

Iyo uri umunyabwoba ushobora kugenda wihuta, utanguranwa no gusohoka muri iyi nzira idasanzwe, gusa iyo ushoboye kwirengagiza ibyo byose, ugira amahirwe yo guca muri iyi nzira ureba neza ubwiza bwayo, ugasoza uru rugendo ufite inkuru yo kubara.

Ijoro ryaho ndarigutuye muvandimwe! Ni ijoro nk'ayandi ryijimye, icyakora mbere y'uko umwijima uganza, hari uburyo bacana 'bougie' zishyirwa mu nzira yose ya 'The Siq' zigatanga urumuri, mu by'ukuri uhageze uri kumwe n'umukunzi wawe, nibwo wasobanukirwa neza ibi ndi kukubwira.

Mu mpera z'iyi nzira, ubwo uba uri kwegera the Treasury, izi 'bougie' zirushaho kuba nyinshi, ari nako zirushaho gutuma ahantu haba heza kurushaho. Uku gucana izi 'bougie', hagashyirwamo indirimbo z'umuco wabo, bikajyana no kuziririmba, ni bimwe mu bikurura ba mukerarugendo baza gusura aka gace. Iki gikorwa muri rusange kizwi nka 'Petra by Night.'

Kugera kuri The Treasury, twahasanze umusaza uririmba va kuri bimwe byo kubeshyabeshya. Uburyo aririmba umuco w'iwabo, akabikora amasaha menshi afite ishyaka, akabikorana akanyamuneza n'urugwiro, bigusigira umukoro wo kwibaza icyo uzakora ngo ukundishe abandi iby'iwanyu.

Abakerarugendo bari kwerekwa The Treasury bayitegeye

Imiterere y’inyubako ya The Treasury

Bimwe mu bice bigize The Treasury

Iyi nyubako yubatswe mu bitare birebire

Byinshi kuri 'The Treasury'

Ni inyubako ifite metero 40 z'uburebure, yubatswe mu kinyejana cyabanjirije Ivuka rya Yesu, ikagira inkuta zigizwe n'ibishushanyo ndetse n'ibibumbano bifite ubusobanuro bwihariye.

Nta muntu uzi impamvu y'iyubakwa ryayo, gusa inzobere mu mateka zivuga ko yari urusengero, cyangwa ububiko bw'inyandiko z'ibwami, n'ubwo hari abavuga ko ari ho abami batabarizwaga, ndetse bikaba bivugwa ko Umwami w'Aba-Nabate, Aretas IV, ari ho atabarijwe.

Imiterere y'iyi nyubako iratangaje cyane kuko ni inzu igeretse kabiri, igice cyo hasi kiriho inkingi zikomeye cyane ndetse n'umuryango. Abantu benshi batangazwa n'uko imbere muri Al-Khazneh nta kintu kirimo usibye utwumba duto cyane, ari nayo mpamvu bamwe bavuga ko yari igituro cy'abami.

Al-Khazneh ifite uruhare runini mu ruhando rwa sinema muri Amerika kuko filime nyinshi zizwi zifashishije iyi nyubako mu mikinire yazo. Izo zirimo nka Indiana Jones and The Last Crusade yakinwe mu 1989, Transformers: Revenge of the Fallen yakinwe muri 2009, Passage to India yakinwe mu 1984, n'izindi.

Ibishushanyo biri ku nyubako ya The Treasury

Ugana ku musozo w’inzira ya The Siq, imbere y’inyubako ya The Treasury, ni uku uba ubona bougie zacanwe

Imiterere y’inyubako ya The Treasury

Bimwe mu bice bigize The Treasury

Iyi nyubako yubatswe mu bitare birebire

Ibishushanyo biri ku nyubako ya The Treasury

Imiterere ya The Treasury

Imiterere y’inyubako ya The Treasury

Imiterere y’ubutayu bwo muri Jordanie, aha ni mu nzira uva mu tugana kuri The Siq

Amafoto: Scovia Annaise Uwizeye Kambabazi

Yamenyeshejwe ko yegukanye igikombe kuri uyu wa Gatanu tariki 26 Nyakanga 2024, nyuma y'igihe cyari gishize zerekanwa mu bice bitandukanye mu rwego rwo guhitamo ihiga izindi muri buri cyiciro buri umwe yari ihatanyemo.

Hanifashishijwe kandi Akanama Nkemurampaka. Filime 'Igihuku' ya Bora Shingiro yabashije gutwara igikombe mu cyiciro cya 'Best Woman Short', nka filime ngufi ibara inkuru y'umugore

Mu kiganiro na InyaRwanda, Bora Shingiro yavuze ko iki gikombe yegukanye ari indi ntambwe yateye mu rugendo rwe rw'ubuzima.

Ibi bihembo byari bihatanyemo filime zirenga 500 zo mu bihugu birenga 20 byo ku Isi. Bora Shingiro ati 'Muri rusange kwegukana iki gikombe ni intambwe nini kuri njyewe, kandi nizeye ko n'ubundi atari hariya birangiriye, kuko urugendo rwanjye rwa Cinema ntabwo rurarangira. Ndacyafite urugendo, kuko inzozi zanjye muri Cinema ni ukugera kure hashoboka, ndabona rero nyiganayo, mbese biracyaza.'

Akomeza ati 'Ntabwo ari ishema ryanjye gusa, ahubwo ni ishema ku gihugu muri rusange ndetse n'abantu bose twakoranye.'

Yavuze ko byari bigoranye kwegukana kiriya gikombe, ariko atekereza ko kuba ifite umwihariko w'uko igaruka ku mugore, ari byo byamufashije gutwara igikombe. Ati 'Ni ibyishimo kwishimirwa. Ni intsinzi rusange, twagakwiye kwishimira.'

Bora Shingiro yavuze ko umuhango wo gutanga ibi bihembo uzaba muri Nzeri 2024, ndetse yasabye abategura ibi bihembo kuzajya muri Amerika 'kwifatira igikombe kuko byanshimisha kurushaho'.

Uyu musore yumvikanishije ko iki gikombe agicyesha ku rukundo akunda Cinema, bituma buri gihangano akoze, agikorana umutima ushaka. Ati 'Ariko kandi habaho no kugira abajyamama beza, bagushyigikira. Navuga ko rero urugendo rwanjye rukomeje, ndi mu itangira ryoswe, kuko mba numva kure hashoboka ngomba kuzahagera.'

Bora yavuze ko yegukana iki gikombe, mu gihe yatangiye gukora filime mbarankuru (Documentary) kuri iyi filime ye yise 'Igihuku'. Ati 'Ni cyo cyari icyifuzo nyirizina, nabanjye kugaragaza igitekerezo cyari gituye muri njye, mbishyira hanze abantu babasha kubyumva. Muri iki gihe rero ndi gutegura filime ndende ivuga ku mateka yacu.'

Filime ye ‘Igihuku’ yubakiye ku rugendo rw’umwana w’umukobwa n’umuryango we bahungiye muri Kiliziya Gatolika mu gihe cya Jenoside yakorewe Abatutsi mu 1994. Bari bizeye y’uko Imana izabatara.

Ariko baje gusanga ahantu bafataga nk’ahantu hera, ariko hiciwe abatutsi benshi mu bice bitandukanye by’u Rwanda.

Bora Shingiro aherutse kubwira InyaRwanda ko yandika iyi filime yashakaga kugaragaza ko muri iki gihe hakenewe uruhare rw’amadini mu isanamitima.

Ati “Kuko twashenguwe cyane n’uruhare rw’amadini muri Jenoside yakorewe Abatutsi. Turabakeneye kugirango bubake sosiyete Nyarwanda.”

Uyu musore yavuze ko aya mafaranga yahawe azayifashisha mu gutegura filime ye ngufi yatangiye gukoraho.

Filime ye ‘Igihuku’ yerekanwe bwa mbere mu iserukiramuco nyafurika rya sinema ribera muri Amerika rizwi nka Silicon Valley African Festival, muri Nyakanga 2019. 

Bora Shingiro ari mu byishimo bikomeye nyuma y’uko filime ye yegukanye igikombe muri Amerika 

Bora yavuze ko iki gikombe yegukanye cyamuteye imbaraga zo gukomeza gukora ibikorwa bishamikiye kuri Cinema  

Filime ye ‘Igihuku’ iherutse kwegukana igikombe muri ‘Mashariki African Film Festival’

Byabaye kuri uyu wa Gatandatu tariki 27 Nyakanga 2024 mu murenge wa Byumba, Akagali ka Kibali, biturutse ku bufatanye iyo Diyosezi ifitanye n'indi yo muri Leta Zunze Ubumwe za Amerika muri Colorado.

Abaturage batishoboye bahawe amatungo arimo inka, abatuye nabi bahabwa amabati, ubwishingizi bwo kwivuza n'ibindi.

Musenyeri wa Diyosezi ya Byumba mu Itorero Angilikani, Ngendahayo Emmanuel, yavuze ko byakozwe mu rwego rwo kunganira Leta mu bikorwa biharanira imibereyeho myiza y'abaturage.

Yavuze ko atari ubwa mbere babikora kuko muri Kibali bahubatse Ikigo nderabuzima cya Ruhenda n'ikibuga cy'umupira w'amaguru aho abana bidagadurira.

Yavuze ko bazakomeza kubikora kuko n'ijambo ry'Imana ribisobanura ko 'Roho nzima itura mu mubiri muzima'.

Bamwe mu baturage bahawe iyi nkunga, bagaragaje ko kuba Itorero rya Angilikani ryabatekerejeho rikagira ibyo ribagenera, ari iby'igiciro cyinshi.

Mundorere Jeannette worojwe inka yagize ati ' Babonye nta tungo nari ntunze hanyuma bararingenera. Bigiye kumpindurira ubuzima kuko ngiye kujya mbona ifumbire yo guhingisha, inka nibyara abana banjye babashe kubona amata.'

Yakomeje agira ati 'Mbere nahuraga n'imbogamizi kuko nahingaga nta fumbire mfite bigatuma ntasarura ndetse no kugura amata sinabonaga ubushobozi bwo kuyagura bitewe n'uko ahenze.'

Basabire Angelique,ufite abana batatu na we yahawe inka avuga ko ubuhinzi bwe bugiye kuvugururwa akajya akoresha ifumbire akeza, kandi abana bakanywa amata.

Umunyamabanga Nshingabikorwa w'umurenge wa Byumba, Ngezahumuremyi Théoneste yashimiye imikoranire hagati ya Leta n'Itorero Angilikani by'umwihariko Paruwasi ya Byumba.

Ati 'Mu rugendo turimo rwo kuvana abaturage mu bukene, twashimira ko nk'Itorero rikora ubuvugizi hakabasha kuboneka abafatanyabikorwa kugira ngo bunganire abaturage mu kwiteza imbere, bakabasha kuzamura imibereho yabo.''

Abakiristo b'Itorero Angilikani ryo muri Colorado bazwi nka Colorado Springs, batera inkunga Diyosezi ya Byumba guhera mu 2007.

Abahawe inka biyemeje kwiteza imbere haba mu mibereho myiza n’ubukungu

Abahawe amabati bishimiye ko bagiye gutura neza

Hari abahawe amatungo magufi nk’intama n’ihene

Hatanzwe inkunga zitandukanye

Musenyeri Ngendahayo Emmanuel yavuze ko nk’itorero bazirikana ko bafite uruhare mu guteza imbere imibereho myiza y’abaturage

Abakiristo bo muri Colorado bijeje ko bazakomeza gufasha abo muri Diyosezi ya Byumba

Abato bakoze siporo

Urubyiruko rwitabiriye

Abakiristo bo muri Colorado bamaze igihe batera inkunga Diyosezi ya Byumba

Ni umukino wakinwe kuri uyu Wa Gatandatu Saa Cyenda kuri Stade Ubworoherane.

Umukino watangiye ikipe ya Musanze FC ariyo ihererekanya umupira bitewe nuko wabonaga abasore ba Rayon Sports bari kugorwa n’ikibuga.

Umukino wakomeje Rayon Sports nayo inyuzamo ikagera imbere y’izamu binyuze ku bakinnyi bayo barimo Rukundo Abdoulhaman, Iraguha Hadji ndetse na Ishimwe Fiston gusa kurekura amashoti agana my izamu bikaba ibibazo dore ko ba myugariro ba Musanze FC bahitaga babambura umupira mu buryo buboroheye.

Ku munota wa 29 ikipe ya Musanze FC yaje gufungura amazamu ku mupira waruzamukanywe na Buba Hydara yiruka aragenda awushyira mu nshundura.

Igice cya Mbere cyarangiye ikipe ya Musanze FC igikomeje kuyobora n’igitego 1-0.Mu gice cya kabiri amakipe yombi yaje akora impinduka mu kibuga ariko Rayon Sports aba ariyo itangirana imbaraga ubona ko ishaka igitego cyo kwishyura.

Ntabwo byatinze kuko ku munota wa 50 yahise ikibona gitsinzwe na Bugingo Hakim ku ishoti yararekuriye ku ruhande rw’ibumoso n’ubundi aba anyuraho.

Nyuma yo kwishyura Rayon Sports n’ubundi yakomeeje kwiharira umupira ndetse ikanasatira cyane dore ko ikibuga cyari cyabagoye mu ntangiriro basaba n’abakimenyereye noneho.

Ku munota wa 56 Adam Bagayogo yinjiye mu rubuga rw’amahina acenga maze myugariro wa Musanze FC amukorera ikosa bituma umusifuzi atanga penariti yahise iterwa na Ishimwe Fiston ayitereka mu nshundura igitego cya 2 cya Rayon Sports kiba kirabonetse.

Ku munota wa 70 Adama Bagayogo w’imyaka 20 akaba akomoka muri Mali benshi banatingiye kwita zahabu ya Rayon Sports,yafashe umupira yongera gucenga nkuko bisanzwe maze arekura ishoti ari mu ruhande rw’ibumoso riragenda rijya mu izamu igitego cya 3 kiba kirabonetse.

Umukino warangiye Murera itsinze ibitego 3-1,uba umukino wa 2 wa Gicuti itsinze nyuma yuko kuwa Gatatu nabwo yatsindaga Amagaju FC ibitego 3-1.

Ishimwe Fiston na bagenzi be bishimira igitego cya 2 yatsinze 

Bugingo Hakim na bagenzi be bishimira igitego cya 1 yatsinze 

Abakinnyi ba Rayon Sports bishimira igitego cya 3 cya Adama Bagayogo 

Babu wa Musanze FC yishimira igitego yatsinze 

Abakinnyi 11 ba Rayon Sports babanje mu kibuga 

Abakinnyi 11 ba Musanze FC babanje mu kibuga 

Abasifuzi basifuye uyu mukino 

Abakinnyi ba Rayon Sports bari ku ntebe y’abasimbura 

Adama Bagayogo yiruka agiye kwishimira igitego cya 3 yatsinze 

Umutoza wa Rayon Sports, Robertinho yakiranwe urukundo kuri Stade Ubworoherane 

Robertinho ntabwo yigeze atoza uyu mukino ahubwo yawukurikiranye yicaye muri Stade 

Kuri State Ubworoherane hari ibinyobwa bya Skol, abafana ntabwo bishwe n’icyaka

AMAFOTO: Ngabo Serge-InyaRwanda