Blog

BasiGo yatangaje ko igeze kuri iyi ntambwe nyuma y'amezi umunani itangije ibikorwa byo gutwara abantu muri Kigali hifashishijwe izi bisi, nk'uburyo bw'igerageza.

Abagenzi iki kigo gitwara biganjemo abo mu bice bya Kabuga, Remera, Nyanza, Kicukiro, Bwerankoli, Nyabugogo, Karama, Kimironko na Kanombe.

Mu Ukuboza mu 2023 nibwo abakoresha imodoka rusange mu ngendo zabo za buri munsi mu Mujyi wa Kigali batangiye kugenda mu modoka nini zikoresha amashanyarazi mu buryo bwuzuye. Ni uburyo Guverinoma y'u Rwanda yizeye ko buzafasha mu gukemura burundu ikibazo cy'ingendo ku baturage by'umwihariko abatuye muri Kigali.

Izo bisi zatangiye gukorera mu byerekezo bitandukanye mu Mujyi wa Kigali, zingana nk'izindi zari zisanzwe zitwara abagenzi muri Kigali [hamenyerewe izizwi nka Yutong], ariko umwihariko w'izi ni uko zikoresha amashanyarazi.

BasiGo ivuga ko 'Intego yo gushyira izi bisi mu muhanda ari ukuzikorera igerageza ry'ibijyanye n'ubushobozi bwa tekinike zifite, uko zitwara mu mihanda y'i Kigali kugira ngo bigenderweho hagenwa ibijyanye na gahunda yo gutangira kuzikoresha mu bucuruzi iki kigo gisanzwe gikora bwo kuzikodesha.'

Muri iri gerageza BasiGo ikorana n'ibigo bisanzwe bizobereye mu byo gutwara abantu muri Kigali, birimo Kigali Bus Service (KBS) na Royal Express.

Nyuma y'iri gerageza biteganyijwe ko BasiGo izashyira mu mihanda ya Kigali bisi 200, mu gihe kitarengeje amezi 18 iri gerageza rirangiye, hagamijwe gukemura burundu ikibazo cy'ingendo kimaze iminsi kigaragara muri uyu mujyi.

Mu gihe uyu mushinga uzaba watangiye gushyirwa mu bikorwa neza, ntabwo BasiGo izinjira mu byo gutwara abagenzi, ahubwo izajya ikodesha izi bisi zayo ibigo bisanzwe biri muri ubu bucuruzi.

BasiGo yatangaje ko Abanyarwanda bakiriye neza bisi zayo zikoresha amashanyarazi

Itegeko rigenga abantu n'umuryango ryasohotse ku wa 30 Nyakanga 2024, riteganya ko umwana uvutse ku bashyingiranywe mu gihe babana aba ari uw'umugabo wa nyina. Ku bana bavutse hifashishijwe ikoranabuhanga, umugabo agomba kuba yemera ko ubu buryo bwo kororoka bwifashishwa.

Gusa hashize iminsi abantu bajya impaka ku ngingo yo gupimisha n'ibipimo by'uturemangingo ndangasano (ADN) ku bagabo bakeka ko abana bafite atari ababo, hakaba n'abasanze koko barabyawe n'abandi.

Imibare igaragaza ko abasabye iyi serivisi bagiye biyongera uko imyaka igenda yigira imbere kuko mu mwaka wa 2022/2023 yasabwe n'abagabo 780, mu gihe 2021/22 bari 599, bavuye kuri 424 bariho mu 2020/21 ndetse na 246 mu 2019/20.

Ingingo ya 284 y'iri tegeko igaragaza ko umugabo ashobora kwihakana umwana mu gihe yavutse hashize iminsi 300 nyuma y'urubanza rwemeza kuba ahantu hatandukanye mu gihe cy'urubanza rw'ubutane cyangwa rwo gutana by'agateganyo.

Iyo kandi umugabo agaragaje ko mu gihe kiri hagati y'umunsi wa 300 n'umunsi wa 180 ibanziriza ivuka ry'umwana hari impamvu yatumye atabonana na nyina w'umwana na bwo ashobora kumwihakana.

Indi mpamvu ni uko umugabo yaba atarigeze 'yemera kororoka hifashishijwe ikoranabuhanga cyangwa iyo agaragaje ko umwana atavutse hifashishijwe ikoranabuhanga.'

Impamvu nshya igaragara muri iri tegeko ni iy'uko umugabo ashobora kwihakana umwana igihe 'byemejwe n'ibipimo by'uturemangingo ndangasano cyangwa ibindi bimenyetso bya gihanga.'

Itegeko ryari risanzweho ryateganyaga ko umugabo aramutse yerekanye ko umugore we yasambanye byamubera intandaro yo kwihakana umwana wavutse.

Umugore na we ashobora kwihakana umwana 'iyo agaragaje ko atari we wamubyaye. Akoresha uburyo bwose bwemewe n'amategeko.'

Inzego zitandukanye zigira inama abagize umuryango Nyarwanda ko kwihutira gupimisha uturemangingo ndangasano atari byiza kuko bigira ingaruka zikomeye ku bana mu gihe basanze uwafatwaga nk'umubyeyi wabo atari we.

Kuva mu mwaka w'ingengo y'imari wa 2021/2019 kugera mu mwaka wa 2022/2023, Ikigo cy'u Rwanda cy'Ibimenyetso bishingiye ku Bumenyi n'Ubuhanga bikoreshwa mu Butabera, RFI cyafashije gukemura ibibazo bishingiye kuri ibyo bimenyetso bigera ku 37.363.

Kuri ubu igiciro ku muntu umwe ushaka gupimisha ADN ku buryo butihutirwa ni 89.010 Frw, muri icyo gihe ibisubizo biboneka mu minsi itarenze irindwi (iyo yabaye myinshi). Iyo byihutirwa ushaka kubona ibisubizo mu masaha 24, ku muntu umwe ni 142.645 Frw.

ADN nibwo buryo bwonyine bwemejwe bwo kumenya ukuri ku bashidikanya isano bafitanye n’abana

Uyu munsi wahariwe ikipe ya Rayon Sports uzwi nk’Umunsi w’Igikundiro wabaga ku nshuro ya 5 kuva utangiye kubaho. Wabaye bwa mbere mu 2019 gusa mu 2020 ntiwaba bitewe n’icyorezo cya COVID-19 cyari mu Rwanda.

Uyu munsi ukorerwaho ibintu bitandukanye birimo kwerekana abakinnyi bashya iyi kipe izakoresha no kubaha nimero bazambara, abafatanyabikorwa bashya, guhemba abafana bitwaye neza ndetse no gukina umukino wa gicuti ariko abantu  baba banategereje kureba udushya turi bukorwe.

Muri iyi nkuru tugiye kugaruka ku dushya 5 twabaye ku Munsi w’Igikundiro wa 2024 ndetse tutazava no mu mitwe ya benshi;

5. Abatoza b’ikipe ya Rayon Sports berekanywe bambaye bya Kinyarwanda 

Nk’uko bimeze no mu y’indi mico no mu biranga umuco w’u Rwanda harimo n’imyambarire. 

Ku munsi w’ejo ubwo Perezida wa Rayon Sports, Uwayezu Jean Fideli yerekanaga abatoza babo b’ikipe y’abagore, bari bambaye imyambaro ya Kinyarwanda bakenyeye ndetse banafite inkoni mu ntoki ,ibintu bisanzwe bimenyerewe cyane mu bukwe.

Benshi bagize ngo niko bigenze ku ikipe y’abagore gusa ariko no mu bagabo niko byanze kuko aba batoza barangajwe imbere na Robertinho nabo binjiye mu kibuga bakenyeye bya Kinyarwanda ndetse bafite inkoni mu ntoki,ibintu wabonaga biryoheye amaso.

4.Imyambarire ya Faustinho 

Umunyamakuru usanzwe ukorera Isibo TV & Radio, Mugenzi Faustin uzwi nka Fustinho, yari umushushyarugamba ku munsi w’ejo ku wa Gatandatu ku munsi w’Igikundiro. 

Icyo ntabwo aricyo cyabaye inkuru kubera ko asanzwe abikora ndetse akanabikora neza dore ko no mu mwaka ushize yari afite inshingano nk’izi ahubwo icyabaye inkuru ni uburyo yari yambaye.

Faustinho usanzwe umenyereweho guhanga udusha yari yambaye umwitero w’ubururu ,ipantalo ,ishati n’inkweto z’umweru ndetse n’ingofero y’ubururu ubona ari ibintu byamusabye kubitegura igihe kinini,bijyanye kandi biryoheje ijisho.

3. Muhire Kevin yinjiye mu kibuga aherekejwe n’irobo

Bimwe mu bintu byatanguranye muri Kigali Pelé Stadium ni uburyo Muhire Kevin yinjiye mu kibuga aherekejwe n’irobo nyuma y’uko yari ahamagawe ngo yerekanwe,ahabwe nimero azambara mu mwaka utaha w’imikino ndetse anahabwe igitambaro cya Kapiteni.

Iyi robo wabonaga ari ndende yari imuri inyuma ninayo yazanye igitambaro yambitswe nka kapiteni. Ibi ntabwo bisanzwe mu mupira w’amaguru w’u Rwanda kuko ubundi bimenyerewe i Burayi akaba ariyo mpamvu byatunguye benshi ndetse bikagaragaza ko Rayon Sports yari yateguye uyu munsi mu buryo budasanzwe kandi budashidikanywaho.

Muhire Kevin ufatwa nk’umwana w’ikipe yongereye amasezerano y’umwaka 1 muri Rayon Sports. Uyu mukinnyi yabanye na yo mu bihe bitandukanye birimo n’ibyiza dore ko yageranye nayo muri 1/4 cya CAF Confederation Cup ndetse akanatwarana na yo igikombe cya shampiyona cya 2018/19.

2. Haruna Niyonzima yinjiye mu kibuga  nk’Umwami

Haruna Niyonzima yasubiye muri Rayon Sports nyuma y’imyaka 19 ayivuyemo, akaba yarasinye amasezerano y’umwaka 1 muri iyi mpeshyi. 

Uyu mukinnyi ku munsi w’ejo ni umwe mu bari bategerejwe n’abafana cyane ndetse ni nawe wakiriwe bwa mbere muri Kigali Pelé Stadium gusa yinjiye mu kibuga mu buryo budasanzwe ubwo yahari ahamagawe ngo yerekanwe ndetse anahabwe nimero azajya yambara.

Yinjiye mu kibuga ahetswe  nk’Umwami ubona ko ari ibintu bishimishije ndetse bikagaragaza ko ari umukinnyi mukuru kandi wubashywe muri Rayon Sports.

Ubwo yari mu kiganiro n’itangazamakuru,Haruna Niyonzima yavuze ko ubu buryo yakiriwemo bwamushimishije cyane bityo ko afitiye ideni Rayon Sports.

1. Azam FC yageneye Perezida Kagame impano 

Ikipe ya Azam FC yo muri Tanzania yakinnye umukino wa gicuti na Rayon Sports, yageneye impano Perezida wa Repubulika y’u Rwanda, Paul Kagame.

Ubwo iyi kipe FC yari ihawe umwanya ngo yerekane abakinnyi bayo izakoresha mu mwaka utaha w’imikino, Umuvugizi wayo Hasheem Ibwe yavuze ko bakunda Perezida Kagame bitewe n’imiyoborere myiza ndetse n’umubano mwiza u Rwanda rufitanye na Tanzania. 

Yahise avuga ko hari impano bamugeneye bitewe n’ukuntu ateza imbere ibikorwa bya siporo, maze umuyobozi wa Azam FC, Abdulkarim Amin Popati ahita ashyikiriza umwambaro w’iyi kipe umuyobozi wa Rayon Sports, Uwayezu Jean Fideli wanditseho Kagame mu mugongo.

Umukuru w’Igihugu cy’u Rwanda akunze gushimirwa na benshi bitewe n’ukuntu ateza imbere ibikorwa bya siporo dore ko no mu minsi yashize na Perezida w’u Bufaransa, Emmanuel Macron yamushimiye avuga ko n’abandi bakwiye kumufataho icyitegererezo.

“>

“>

AMAFOTO: Serge Ngabo-InyaRwanda

Video: Munyantore Eric-InyaRwanda

Ikibazo cyo kubura urubyaro ni kimwe mu bihangayikisha imiryango mishya iba yashinzwe ndetse mu Bitaro bya Gisirikare bya Kanombe, 15% by'abagana serivisi zijyanye n'indwara z'abagore, baba bafite ibi bibazo.

Bahita bitabaza uburyo bw'ikoranabuhanga buzwi nka 'In Vitro Fertilization' (IVF), ndetse mu minsi mike ishize hari abarenga 20 ibi bitaro byafashije gutwita binyuze muri iyi nzira bategereje kubyara.

Abashakanye kandi bashobora kwitabaza IVF bitewe n'ibibazo by'umugabo, birimo kugira intanga nke mu masohoro, intanga zigenda gake cyane ngo zigere ku igi ryarekuwe, izitujuje ubuziranenge bivuze ko zikoze mu buryo budatuma habaho umwana, izidakuze n'ibindi.

Na ho iyo umuntu agiye gutwitira undi (Surrogacy) bikorwa hafatwa intanga z'umugore n'umugabo zigahurizwa muri laboratwari hanyuma igi rigashyirwa muri nyababyeyi y'undi mugore agatwitira ba nyirazo.

Itegeko rigenga abantu n'umuryango ryasohotse ku wa 30 Nyakanga 2024 riteganya ko abashyingiranywe bashobora kororoka mu buryo busanzwe cyangwa mu buryo bw'ikoranabuhanga hagati y'umugabo n'umugore.

Igika cya kabiri cy'ingingo ya 279 kivuga ko 'Kororoka mu buryo bw'ikoranabuhanga k'umugabo n'umugore bashyingiranywe bishobora gukorwa kandi hagati yabo n'undi muntu bagiranye amasezerano hakurikijwe amategeko abigenga.'

Iri tegeko kandi riteganya ko umwana uvutse ku bashyingiranywe mu gihe babana, nta wundi wakwitwa Se uretse umugabo wa nyina.

Ni mu gihe nyina w'umwana ari uwemeza ko yamubyaye. Icyakora, nyina w'umwana wavutse hifashishijwe uburyo bw'ikoranabuhanga 'ni uwanditse mu masezerano yerekeranye no kororoka hifashishijwe uburyo bw'ikoranabuhanga.'

Uburyo bwo gutwitira undi bwatangijwe mu 1986 ubwo havukaga umwana wa mbere hakoreshejwe ubwo buryo. Bwahise butangira kwamamara mu bihugu cyane cyane ibyateye imbere aho nko muri Leta Zunze Ubumwe za Amerika ku mwaka havuka abana bagera kuri 750 hakoreshejwe ubwo buryo.

Inkuru bijyanye: Urukiko rwa Nyarugenge rwemeje amasezerano imiryango ibiri yagiranye, umwe ukemera gutwitira undi

Abantu bashobora kugirana amasezerano n’umubyeyi akabatwitira umwana akazaba uwabo mu gihe amaze kuvuka

Byabereye mu kagari ka Mataba Umurenge wa Shangi mu karere ka Nyamasheke ku wa 3 Kanama 2024.

Kuri uyu wa Gatandatu nibwo Pasiteri wo mu itorero Méthodiste Libre au Rwanda yabatije uwo musore n'abandi 28, bigeze saa yine za mu gitondo yakira inkuru y'incamugongo ko umwe mu babatijwe yarohamye mu Kiyaga cya Kivu.

Abizera bashya bamaraga kubatizwa bajyaga mu nzu guhindura imyenda, ariko Iradukunda wari ufite uwamuherekeje mbere yo kujya guhindura imyenda yasubiye mu Kivu kwiyuhagira no koga mu gihe ategereje ko umubatizo urangira ari naho haje guhita arohama.

Uwari wamuherekeje ni we watanze amakuru ko Iradukunda yarohamye, abazi koga bajya mu Kivu kumushakisha ntibamubona.

Pasiteri wabatizaga yagiye ku Rwego rw'Igihugu rw'Ubugenzacyaha RIB muri kariya gace gutanga amakuru kugira ngo harebwe niba nta burangare bwabayeho.

Iradukunda Anastase yakomokaga mu karere ka Huye mu Ntara y'Amajyepfo, akaba yakoraga akazi ko mu rugo mu murenge wa Shangi mu karere ka Nyamasheke mu Ntara y'Iburengerazuba.

Birumvikana ko nawe wakabaye utangazwa n'uyu Mubumbe udasanzwe, icyakora iby'aya matsiko ntibyenda gushira, kuko umuntu wa mbere ashobora kuzakandagiza ikirenge kuri Mars nko mu myaka icumi iri imbere, akishyura atari munsi y'ibihumbi 200$ mu rugendo rushobora kugera kuri kilometero miliyoni 54.6, ubwo ni igihe Isi na Mars byegeranye cyane.

Nta gushidikanya ko ibi bizagora benshi, icyakora nk'uko Umunyarwanda yabivuze, 'ubuze inda yica umugi.'

Iyi niyo mpamvu tujyanye muri Wadi Rum cyangwa se mu Kibaya cy'Ukwezi, Ubutayu bufite ishusho ijya gusa neza neza n'Umubumbe wa Mars ku buryo na filime wabonye zigaragaramo uyu Mubumbe nka 'Transformers: Revenge of the Fallen', 'The Last Days on Mars,' 'The Martian na 'Red Planet', amashusho yazo yafatiwe muri ubu Butayu.

Aha nanjye nahakandagije ibirenge, mbanza kugira ngo ndi kurota.

Si Ubutayu bunini cyane kuko bungana na kilometero kare 720, bukagira ubutaka bujya gutukura, burimo ibitare by'amabuye birimo ibyabayeho mu myaka miliyari 4.6, neza neza nyuma gato y'uko iturika ryatangije Isanzure ribayeho (Big Bang).

Ni ahantu hari imisozi miremire, kuko nk'umusozi wa Jebel Rum ufite uburebure bwa metero 1,754 z'uburebure. Gusa nubwo ari Ubutayu, harimo n'ibimera bike, bimwe bishobora kwihanganira ubushyuhe budasanzwe bwo mu Butayu.

Ikidasanzwe kuri iyi misozi n'ibitare, ni uko bidahagaze gusa, ahubwo bibitse amateka adasanzwe kubera ibishushanyo biyiriho. Ni ibishushanyo byashyizweho ahanini n'abantu bazwi nk'Aba-Nabatéens babaye muri ubu Butayu no mu nkengero zaho kuva mu kinyejana cya kane mbere ya Yesu.

Mu Gitabo cya Matayo Igice cya Kabiri, umurongo wa mbere, hagira hati 'Yesu amaze kuvukira i Betelehemu mu gihugu cy'i Yudaya ku ngoma y'umwami Herode, haza abanyabwenge baturutse Iburasirazuba bajya i Yerusalemu, barabaza bati…'

Nubwo Bibiliya itemeza neza niba aba banyabwenge bari Aba-Nabatéens, abashakashatsi benshi bagaragaje ko iki gice cyavugwaga cyo mu Burasirazuba, ari iki cya Wadi Rum cyari gituyemo Aba-Nabatéens aho bari banafite imbaraga cyane mu bijyanye n'ubucuruzi, dore ko ari nabo bahanze Umujyi wa Petra.

Aba rero bagize uruhare runini mu gushushanya bimwe mu bishushanyo birenga ibihumbi 25 bishushanyije ku mabuye n'ibitare biri muri ubu Butayu. Byiganjemo ibijyanye n'imihigo, umuco ndetse n'ibindi bitanga amakuru y'imibereho yo muri ibyo bihe.

Igihugu cy'Abanyamahoro bifitemo umuco wo kwakira abashyitsi

Mu bandi bahabaye bakanashushanya kuri bya bitare harimo abo mu bwoko bw'Aba-Thamudiques n'Aba-Safavides, aba bakaba ari amwe mu moko y'Abarabu yo hambere.

Aha hantu kandi hatuye Aba-Bédouins ari nabo bahabaye nyuma ndetse n'ubu bakaba bagihari, ndetse akaba ari nabo tugiye kwitsaho cyane.

Impamvu ni uko Aba-Bédouins ari bo mutima wa Jordanie nyirizina. Nibura hagati ya 40% na 45% by'abatuye iki gihugu, ni abafite inkomoko muri ubu bwoko. Ibi kandi ntibiri mu mpapuro gusa, ahubwo ushobora kubisanisha n'ubuzima busanzwe bwa buri munsi.

Muri rusange, Jordanie ni kimwe mu bihugu bifite abaturage babayeho mu mahoro adasanzwe. Nk'ubu iki gihugu gituranye na Iraq ndetse na Syria, ibihugu byazahajwe n'intambara ndetse byugarijwe n'inkurikizi zayo, zirimo urugomo, ubwicanyi, ubujura budasanzwe, icuruzwa ry'abantu n'ibiyobyabwenge n'ibindi.

Ibi ariko ntibigera muri Jordanie kuko ari kimwe mu bihugu birimo amahoro mu Burasirazuba bwo Hagati, ibituma kibasha kwita ku zindi gahunda z'iterambere. Nk'urugero, Jordanie ni kimwe mu bihugu bifite abaganga benshi mu Burasirazuba bwo Hagati, aho nibura gifite abaganga 27 ku baturage ibihumbi 10. Qatar na Leta Zunze Ubumwe z'Abarabu, ibihugu bikize cyane kuyirusha, nibyo biri imbere muri ako gace.

Nibura buri mwaka, iki gihugu cyakira abanyeshuri ibihumbi 30 biga iby'ubuvuzi, mu gihe cyinjiza miliyari 1$ aturutse mu bantu bajya kwivurizayo, kikinjiza miliyoni 280$ aturuka mu bikoresho by'ubuvuzi cyohereza mu mahanga mu gihe urwego rw'ubuvuzi muri rusange, rugira uruhare rungana na 3.2% by'umusaruro mbumbe w'icyo gihugu, ukabakaba miliyari 50$.

Kwakira neza abakerarugendo, yaba abaje kwivuza cyangwa gusura ibyiza nyaburanga, ni kimwe mu bigize umuco w'abaturage ba Jordanie.

Aba-Bédouins twigeze kugarukaho, ni abantu bafite umuco wo kwakira abandi neza. Mu muco wabo, ni abantu baranzwe n'ubucuruzi kuva kera, bagakora n'indi mirimo yiganjemo ubuhigi.

Iyo Umu-Bédouins yananirwaga wenda agiye nko mu bucuruzi kure y'iwabo, icyo yakoraga ni ugushaka urugo ruri hafi aho, ubundi akinjiramo.

Uwamwakiriye ntiyashoboraga kumubaza ikimugenza cyangwa icyamubayeho, ahubwo yamuhaga ifunguro ndetse n'aho kurambika umusaya. Nibura ku munsi wa gatatu, mu gihe umushyitsi atibwirije ngo abivuge, nibwo noneho nyir'urugo yashobora gusaba umushyitsi gusobanura ikimugenza, cyangwa se icyamudindije mu rugendo rwe.

Ikindi kiri mu muco w'aba bantu ni ugusangira. Kera iyo Umu-Bédouins yicaga inyamaswa runaka, yahamagaraga abaturanyi n'abandi bantu bakayisangira kugeza ishize, dore ko nta buryo bwariho icyo gihe bwo kubika inyama igihe kirekire, kandi bakaba bari banatuye ahantu hashyuha cyane, bigoye ko wabika inyama iminsi myinshi itarangirika.

Uyu muntu wafashe umuhigo yabaga yizeye ko na we ejo azatumirwa kujya kurya ahandi bityo bityo, ku buryo wasangaga nta muntu ufite umuco wo kwikubira utuntu twe, ahubwo abantu bakabaho basangira muri rusange, ari nako basangiza abandi badafite ubushobozi bwo kwibonera umuhigo.

N'uyu munsi iyo ugeze muri Jordanie, urugwiro wakiranwa rutandukanye n'urusanzwe ruboneka ahandi, kuko abantu baho bahora baseka, bakaba abantu batuje badasakuza cyane.

Reka twigarukire ku ifunguro!

Urumva kugendagenda ubwo Butayu ku zuba, bijya kugera saa sita neza neza mu nda byanze, ari nako bagize batya baraturembuza, batwereka aho twicara ngo twice isari.

Ibyo kurya ntacyo dupfa, ku buryo rwose nashatse ahantu heza hari butume nezererwa uwo mwanya nari ngiyemo. Hagati y'imisozi ibiri miremire ihurira hejuru ku buryo izuba ritakugeraho, niho narambije ntegereza ifunguro.

Iryo nakiriye ni iryitwa 'Mansaf' gusa ikibabaje ni uko ntabona uko ngusobanurira uburyohe bwaryo mu gihe utarariryaho, kuko rwose nagize ngo ni ibitangaza biri kumbaho, birandenga.

Ni ifunguro rigizwe n'umuceri ushobora gutekwa mu buryo butandukanye, rimwe ukaza usa n'umweru cyangwa se umuhondo bitewe n'ibirungo byashyizwemo. Uyu muceri uba uriho inyama y'intama, inyama iryoha cyane.

Izi nyama ziba zitekewe mu isosi y'amata y'intama, ubwo hejuru hagashyirwaho imboga nke ndetse n'ubunyobwa buke.

Ibyago nagize ni uko igifu cyambanye gito, neza neza nashatse kwibera nk'ingamiya narebaga imbere yanjye, ngo mfate ifunguro ryinshi ku buryo nari kuzarikoresha mu gihe kirekire kiri imbere.

Umunyenga w'ingamiya watumye nitekerezaho

Nyuma yo gufungura, naricaye ndiyumvira, bwa mbere mu mateka mbasha gusobanukirwa ya mvugo 'y'akaryoshye kadahora mu itama'. Mu gihe nari nkiri kwibaza niba uwavumbuye iyo nteruro bwa mbere yarabitewe na 'Mansaf,' nibwo nabonye ingamiya imbere yanjye integereje, bati 'haguruka yewe ibyiza biri imbere,' n'uko ndasindagira no ku mugongo wayo ngo Ba!

Mu by'ukuri kenshi dutekereza ko umunyenga ari nko kugenda mu modoka ku muvuduko wo hejuru cyane, wiruka cyane ukatakata amakoni uvuza amahoni mbega byacitse, kandi sinaguseka kuko nanjye ni uko nabyumvaga.

Gusa umunsi nicaye ku mugongo w'ingamiya natangiye kwitekerezaho, nibaza impamvu umunyenga nawumvaga muri ubwo buryo bw'umuvuduko gusa.

Uvuga aba atarabona koko, reka mbabwire ko umunyenga w'ingamiya ukwiriye kuzaharanira kuwumva, ataba wowe wenda akazaba umwana wawe.

Iyi ni inyamaswa itihuta, yigendera gake cyane imeze nk'iri kubyina akaririmbo gatuje, ahanini bitewe n'uburebure bwayo bushobora kugera kuri metero ebyiri cyangwa zirenga, ndetse n'uburemere kuko iyakuze neza ishobora kugeza kuri toni y'ibiro, uretse ko inyinshi zigeza ku biro biri hagati ya 400 na 700.

Hari impamvu Aba-Bédouins babanye n'ingamiya mu myaka irenga ibihumbi bitatu, ni uko ari inyamaswa ifite imbaraga, ikihanganira ubuzima bugoye bw'ubutayu, ikaba ishobora kuramba kuko ishobora kumara imyaka 40, kandi ikaba yitonda cyane, ari nako ishobora kwikorera ibintu biremereye.

Aba-Bédouins bo bakubwira ko ubuzima butari gushoboka mu Butayu iyo izo nyamaswa zitaza kubana nabo.

Ni inyamaswa ituje, irakureka ukayurira rwose nta rwaserera, ubundi igatangira igakora urugendo rugana aho uyiyobora. Ubwo buryo iba igendamo, yizunguza hirya no hino gake gake, bituma wumva igisobanuro nyacyo cy'umunyenga koko, ari nayo mpamvu nawe mbikwifurije.

Ifunguro ritekerwa mu buvumo ndarigutuye

Ntawamenye uburyo amasaha yisunitse akagera ubwo ijoro ritangira kudutwikira, hagati aho ubwo mu nda kandi byari byongeye kwanga, ni uko bati 'mwegere hino mufate ifunguro ry'ijoro.'

Mu ba mbere nari namaze kwicara aho batweretse, mu mutwe nari nkitekerereza 'Mansaf', gusa burya hari ibihugu bigira indyo nyinshi kandi zitandukanye, bikaba akarusho kuko zinaryoha zose.

Numvise aho bavuga indyo gakondo yo muri Jordanie, itekwa bijya kumera nk'uko abasekuru baho batekaga. Birumvikana ko iby'udushya bitancika, ubwo narashamadutse nditanguranwa ndayisaba nshishikaye, bati 'humura ikitabuze mu rutoki ni amakoma.'

Iri ni ifunguro batekera mu buvumo bw'umucanga, aho bacukura umwobo, bagashyiramo icyo twagereranya n'isafuriya nini, uretse ko ubona ijya kumera nk'ingunguru. Munsi yayo, bashobora gushyiramo amakara cyangwa ibindi bitanga ubushyuhe, ubundi bagashyiramo indi safuriya cyangwa ikindi kintu kirimo ibiryo ubundi bakabitaba muri wa mwobo, bakarenzaho umucanga babitwikiriye neza, ibiryo bikamaramo amasaha nk'atatu.

Ubu buryo bw'imitekere buzwi nka 'zarb', aho ushobora kubugereranya n'ifuru y'uyu munsi. Ifunguro rivuyemo naryo, rikunze kuba ari inyama ivanzemo imboga n'ibindi birungo.

Ubu buryo iyi ndyo itekwamo buyiha umwimerere, bugatuma iryoha kandi ikaba ifite umwihariko. Narafunguye ndijuta, nshimira Imana na Leta y'u Rwanda itwagurira amarembo n'andi mahanga, tukaba twahatemberera byoroshye tukamenya uko abandi batuye Isi babayeho.

Biragahoraho!

Ni urugendo rwabaye rurerure, ruba rwiza cyane. Sinayavuga ngo nyamare, reka mbe nsubitse ubundi na we bizakuzindure, unyarukiyo dore nta Visa bisaba akanyoni katagurutse ntikamenya iyo bweze!

Andi mafoto

Ku wa 10 Kanama 2024 ni bwo Israel Mbonyi azataramira abakunzi be muri Kenya gusa byari byitezwe ko agera muri iki gihugu ku wa 03 Kanama 2024 gusa byaje kurangira bidakunze.

Byatumye atabasha kwitabira ubutumire yari afite mu rusengero rwa Jubilee Christian Church [JCC] rwa Bishop Allan Kiuna nk’uko byari byatangajwe ko azagutaramira abahasengera.

Rev Kathy Kiuna ni we wari wasangije abakurikirana uru rusengero ubutumwa bwerekana ko Israel Mbonyi azabana nabo muri JCC.

Amakuru yatangajwe na bimwe mu binyamakuru bikomeye i Nairobi, akaba ari uko iyi gahunda yakomwe mu nkokora no kuba Israel Mbonyi yarahinduye gahunda zo kugera i Nairobi.

Mutala Mukosia uri mu bari gutegura igitaramo cya Israel Mbonyi yagize ati'Hari impamvu zitari ziteganyijwe zabaye ntabwo Israel Mbonyi yageze i Nairobi ku wa 03 Kanama 2024 nk’uko byari biteganijwe, azahagera kuwa 06 Kanama 2024.'

Mukosia yakomeje avuga ko ari ukwihangana ku bari bategereje kumubona ku matariki yari yatangajwe ariko yongera kubibutsa ko gahunda nyamukuru ari ku wa 10 Kanama 2024 kuri Ulinzi Sports Complex.

Byitezwe ko Israel Mbonyi azagirana ikiganiro n'itangazamakuru ndetse akagenda aganira n'abakunzi be mu biganiro bitandukanye by'ibitangazamakuru bikomeye.

Uyu muhanzi aherutse gutangaza ko yiteguye guha ibyishimo bisendereye abakunzi be muri iki gihugu bamukunze biruseho mu ndirimbo Nina Siri.

Iyi ndirimbo kuva yajya hanze ku wa 26 Kamena 2023 imaze kurebwa inshuro Miliyoni 55.Israel Mbonyi ategerejwe mu gitaramo cy’amateka i Nairobi aho afite abakunzi benshiAbakunzi ba Israel Mbonyi bagiye bahaguruka bakaza mu Rwanda mu bitaramo by’uyu muhanzi mu bihe bitandukanyeIsrael Mbonyi azagera i Nairobi ku wa 06 Kanama, ahataramire ku wa 10 Kanama ahave ku wa 11 Kanama 2024