Blog

Ni amakuru Polisi y'u Rwanda yatangaje kuri uyu wa 28 Kanama 2024 ibinyujije kuri X.

Yagize iti 'Turamenyesha abantu ko kubera impanuka yabereye i Shyorongi, umuhanda Kigali- Musanze wabaye ufunzwe by'agateganyo.'

Nyuma y'amasaha make, Polisi yatangaje ko uwo muhanda wongeye kuba nyabagendwa.

Mu gihe umuhanda wari ufunzwe by'agateganyo, abawukoresha bari bagiriwe inama yo gukoresha Kigali-Rukomo-Gicumbi-Base.

Mu Rwanda, impanuka zo mu muhanda ziza mu bintu 10 bihitana ubuzima bw'abantu benshi, aho mu mwaka ushize wa 2023, izigera kuri 700 zatwaye ubuzima bw'abantu.

Minisiteri y'Umutekano yagaragaje ko ibinyabiziga biza ku isonga mu guteza impanuka, biyobowe na moto zihariye 25% by'impanuka zose ziba, amagare 15%, amakamyo manini 13% mu gihe amakamyo mato yihariye 10% by'impanuka ziba, naho bisi zitwara abagenzi zikiharira imibare isigaye.

Iyi minisiteri kandi yagaragaje ko impamvu ziteza impanuka mu muhanda zirangajwe imbere no kutagabanya umuvuduko aho byihariye 37%.

Gutwara ikinyabiziga nabi byihariye 28% no gutwarira ibinyabiziga mu ruhande rutari rwo bingana na 13%.

Kunyuranaho mu buryo butari bwo byihariye 8%, mu gihe kudahana intera ihagije byihariye 6% naho ubusinzi bukaba bufite 3%.

Umuhanda Kigali-Musanze ntukiri nyabagendwa kubera impanuka yabereye i Shyorongi

Ni ingingo yagarutseho kuri uyu wa Kabiri tariki ya 27 Kanama 2024, ubwo Minisiteri y'Uburezi, MINEDUC yatangazaga amanota y'abanyeshuri bakoze ibizamini bya Leta bisoza amashuri abanza n'ibisoza icyiciro rusange, mu mwaka w'amashuri wa 2023/2024.

Aya manota yatangarijwe ku Cyicaro cy'Ikigo cy'Igihugu Gishinzwe Uburezi bw'Ibanze, REB giherereye i Remera.

Mu busanzwe hari uburyo butatu umwarimu ashobora kunyuramo asaba guhindurirwa ikigo, burimo kuba abarimu babiri bagurana, kuba abarimu basimburanwa mu karere no kuba abarimu bava mu karere kamwe bajya mu kandi.

Muri uyu mwaka abarimu basabwe kugurana babiri babiri [paires] zari 73, izari zijuje ibisabwa zari 49 kandi kugurana bigenda neza. Bivuze ko muri iki cyiciro abari bemerewe kugurana 100% bose bafashijwe bigakunda.

Ku bijyanye n'abarimu bimukaga imbere mu karere hari hakiriwe ubusabwe bw'abarimu 856 muri bo harimo 498 bujuje ibisabwa, aho 343 ari bo bafashijwe kwimurirwa ku bigo bari basabye.

Ku bijyanye no kwimuka umwarimu ava mu karere kamwe ajya mu kandi, ubusabe bwari bwakozwe n'abarimu 2,235 muri bo 1,226 ari bo bonyine bujuje ibisabwa mu gihe 751 ari bo babashije kubonerwa umwanya barimurwa abandi kugeza ubu imyanya ikaba itaraboneka.

Minisitiri w'Uburezi, Twagirayezu Gaspard, yagaragaje ko kwemeza ubusabe bw'abarimu bwo kwimurwa bigomba gukoranwa ubushishozi kugira ngo hirindwe amakosa amwe n'amwe.

Ati 'Aha icyo nakongeraho dukurikije imibare tugenda tubona nk'urugero akarere kamwe abarimu 272 basabye kukajyamo mu gihe muri ako karere abarimu 48 bonyine ari bo gusa basabaga kuvamo.'

'Bivuze ko mu gihe cyo kwimura hari igihe umwarimu asabwa kwimurwa ariko twareba tugasanga imyanya ntayihari cyangwa tugasanga harimo n'aho tuba dufite imibare myinshi y'aho bashaka kuva ariko abajyayo ari bake. Ubwo rero tugomba kwicara tukareba imyanya iri buboneke n'itari buboneke.'

Minisitiri Twagirayezu yavuze ko iyi gahunda ikomeje kwitabwaho ari na ko abarimu bashya bagenda bahabwa imyanya mu mashuri hirya no hino mu gihugu yaba abo mu mashuri y'incuke kugera mu ayisumbuye.

Minisitiri w'Uburezi, Twagirayezu Gaspard, yavuze ko hari abarimu basaba kwimurirwa mu tundi turere cyangwa mu yandi mashuri ntibikunde

Minisiteri y’Uburezi yashyikirije ibihembo abanyeshuri bahize abandi mu bizamini bisoza amashuri abanza n’icyiciro cya mbere cy’ayisumbuye. Abahawe ibihembo ni batanu ba mbere mu mashuri abanza ndetse na batanu ba mbere mu cyiciro rusange cy’amashuri yisumbuye.

Igiraneza Lucky Fabrice wigaga mu Ishuri rya The Pioneer School riherereye mu Karere ka Bugesera, yabaye uwa mbere mu gutsinda neza ibizamini bya Leta by'amashuri abanza.

N’akanyamuneza kenshi, Fabrice ufite inzozi zo kuzaba Minisitiri cyangwa umusirikare yagize ati: “Ndi kumva nishimye, kuba nisanze ndi uwa mbere mu gihugu. Narize, nkora igishoboka, ababyeyi baramfasha, ku kigo nabo baramfasha, abarezi, inshuti zanjye na zo tukajya dukorana, nyine ku bw’amahirwe ndakora nza gutsinda. Ibanga nakoresheje ni ukwiga cyane mpozaho.”

Yakomeje abwira barumuna be bakiri bato ko ‘amasomo adakomeye ahubwo ari bo bakomeye,’ abasaba kumva ko byose bishoboka kandi bakiga bashyizeho umwete.

Uwa kabiri yabaye Igeno Alliance kuri Irerero Academy mu Karere ka Kamonyi mu gihe uwa Gatatu ari Ikirezi Remezo Benitha wigaga kuri Ecole Autonome de Butare.

Terimbere Ineza Alia Ange Stevine wigaga muri Lycée Notre-Dame de Cîteaux, yabaye uwa mbere mu gutsinda neza ibizamini bya Leta bisoza Icyiciro Rusange cy'amashuri yisumbuye mu Rwanda.

Ati: “Njyewe navuga ko mbikesha Imana kuko niyo yashyize mu nzira zanjye ababyeyi beza bakandihirira, bagakora icyo bashoboye cyose kandi bakaba bakunda uburezi. Nshaka kuzaba umuganga uvura indwara zo mu mutwe, kandi nifuza kuzafasha aho nkomoka hagahinduka ahantu hakomeye.”

Yakurikiwe na Tuyisenge Denys Prince wo ku Ishuri rya Hope Hevens wabaye uwa kabiri mu gihe Twarimitswe Aaron wo kuri Ecole Secondaire Kanombe (EFOTEC) yabaye uwa gatatu.

Abeza Happiness wigaga kuri Fawe Girls School Gisozi, yabwiye InyaRwanda ko yishimye cyane kandi ko ibanga ryamufashije kugera kuri iyi ntsinzi ari 

Ati: “Ndumva nishimye, ntabwo byari byoroshye. Ibanga ryari ukwiyizera, no gukora cyane kandi tugasenga Imana ariko mbere na mbere tukagira ikinyabupfura.Ubwo natsinze uko byagenda kose barampa amasomo nahisemo, ngomba nayo kuyakora cyane kugira ngo nayo nzayatsinde neza ngere ku cyo nifuza.”

Rujorampunzi Felicien, ni umubyeyi w’umwe mu bana batsinze neza mu cyiciro rusange cy’amashuri yisumbuye. Aganira na InyaRwanda, yavuze ko yishimye intambwe umuhungu we w’imfura yateye kuko ahora amwifuriza, ariko na none yumvikanisha ko abishimira Imana.

Yagize ati: “Mbere ya byose turashima Imana, Imana niyo nkuru, ariko na none dufite n’ibyishimo mu buryo bugaragara. Kumva yuko mu gihugu cyose umwana wawe yabaye uwa gatatu, ni igitangaza, ni imirimo ikomeye cyane y’Imana.”

Uyu mubyeyi yavuze ko kuba umwana we avuka mu muryango urimo amahoro kandi wizera Imana nabyo byamugashije kugera ku ntsinzi, atangaza ko amwifuriza ibyiza biruseho kandi ko azakomeza kumufasha kugera kuri ejo hazaza heza.

Muri rusange ababyeyi bafite abana bahembwe uyu munsi, bashishikarije bagenzi babo guha abana ubwisanzure bakabasha kwiga batekanye, bakabashakira umwanya uhagije wo kubaganiriza no kubakurikirana bakabashyigikira mu masomo yabo.

Abanyeshuri batsinze bahembwe, kandi bafite icyizere cyo kugera ku nzozi zabo

Kanda hano urebe amarangamutima y’abanyeshuri batsinze neza n’ubutumwa bwatanzwe n’ababyeyi

Kuri ubu abayobozi 466 ni bo bamaze kugezwa mu bigo binyuranye hirya no hino mu Gihugu. Mu busanzwe amashuri abanza adafite icyiciro cy'amashuri yisumbuye yagiraga abayobozi bakuru gusa batagira ababungirije. Minisitiri Twagirayezu yatangaje ko iyi gahunda yo kugena abazajya babunganira mu mirimo izatuma ibyo bakora birushaho kugenda neza.

Yabigarutseho kuri uyu wa Kabiri tariki ya 27 Kanama 2024, ubwo Minisiteri y'Uburezi, MINEDUC yatangazaga amanota y'abanyeshuri bakoze ibizamini bya Leta bisoza amashuri abanza n'ibisoza icyiciro rusange, mu mwaka w'amashuri wa 2023/2024.

Aya manota yatangarijwe ku Cyicaro cy'Ikigo cy'Igihugu Gishinzwe Uburezi bw'Ibanze, REB giherereye i Remera.

Minisitiri w'Uburezi, Twagirayezu Gaspard, yagize ati 'Aha ndumva ari ikintu kiza kuko ni ubwa mbere bitangiye kuba mu buryo bungana gutya.'

Ku rundi ruhande, mu rwego rwo gukomeza kwitegura neza umwaka utaha w'amashuri, Minisiteri y'Uburezi ikomeje gahunda yo gutanga akazi ku barimu bashya.

Kugeza ubu abarimu 754 bashya bamaze gushyirwa mu mashuri y'incuke mu gihe mu mashuri abanza hamaze gushyirwa mu myanya abarimu bashya 1,506 muri bo harimo abarimu basanzwe 1,026 n'abayobozi b'amashuri 14.

Mu mashuri yisumbuye abarimu 1,449 bashya ni bo bamaze gushyirwa mu myanya, muri bo harimo abarimu 1,125 mu gihe abandi 87 ari abakora mu buyobozi bw'ishuri n'abandi bayobozi bungirije bashinzwe amasomo n'abandi bashinzwe imyitwarire bagera kuri 237.

Minisitiri w'Uburezi, Twagirayezu Gaspard, yagize ati 'Iki ni igikorwa kigikomeje kunozwa kugira ngo abarimu bashyirwe mu myanya hanyuma bazatangire kwigisha mu gihe umwaka w'amashuri uzaba utangiye.'

Ikigo cy'Igihugu gishinzwe Ibizamini n'Ubugenzuzi bw'Amashuri NESA, giherutse gutangaza ko umwaka w'amashuri wa 2024/2025 uzatangira ku wa 9 Nzeri 2024.

Ni igihembwe cya mbere kizaba kirimo n'abasoje amashuri abanza binjiye bwa mbere mu mashuri yisumbuye, hamwe n'abasoje icyiciro rusange bazaba bimukiye mu mwaka wa kane w'ayisumbuye.

Itangazo NESA yashyize ahagaragara rivuga ko 'Abanyeshuri biga bacumbikirwa bazatangira gusubira ku mashuri gutangira igihembwe cya mbere guhera tariki 6-9 Nzeri 2024.'

Minisitiri w’Uburezi, Twagirayezu Gaspard, yatangaje ko iyi Minisiteri irimbanyije igikorwa cyo gushyiraho abayobozi bungirije ku bigo by'amashuri abanza

Mu myaka mike ishize, Leta ya Uganda yavuguruye ndetse inagura umuhanda uhuza Umujyi wa Mbarara na Kabale, ari nawo ukomeza ugana mu Rwanda.

Ni umuhanda mwiza gusa Perezida Yoweri Museveni yababajwe n'uko atabonaga umusaruro ukwiriye ku ishoramari wakozweho. Awugarukaho, yanenze Abanya-Uganda, avuga ko batabyaza umusaruro ibikorwaremezo bishya mu kwiteza imbere, mu buryo bw'urwenya avuga ko uwo muhanda ukoreshwa mu 'gukwirakwiza ibihuha' aho gutwara ibicuruzwa.

Icyo gihe ntabwo iryo Jambo rye ryakiriwe neza na bose, gusa ucukumbuye neza ntubura kubona ukuri mu byo yavugaga. Uretse iyo mihanda yubatswe, hirya no hino mu gihugu hashyizwe ibikorwaremezo by'amashanyarazi gusa ikwirakwira ryayo ntabwo byatumye havuka inganda nto n'iziciriritse nk'uko byateganywaga.

Ibintu bibiri byonyine byungukiye mu iyubakwa ry'ibyo bikorwaremezo ni insengero n'utubari, ndetse n'imisigiti hamwe na hamwe.

Ibi kandi si umwihariko wa Uganda gusa, ahubwo ni inkuru rusange muri Afurika. Mu bihugu byinshi byo munsi y'Ubutayu bwa Sahara, ntushobora gukora urugendo rurerure unyura mu byaro n'imijyi mito, ngo ubure kugenda wumva urusaku rw'imiziki mu maduka n'utubari, ari nako uhura n'abantu benshi, cyane cyane urubyiruko, bari aho ku mihanda bazenguruka ariko nta kintu bafite cyo gukora.

Inkengero z'imihanda usanga zikikijwe n'insengero, yaba izihamara igihe gito n'iziharamba, inyigisho z'abavugabutumwa zumvikana hirya no hino. Kuva ku wa Gatanu na weekend yose, umuziki karundura uba wumvikana kugera bukeye, kandi ubwo inyigisho nazo zikomeza ubudahagarara.

Mu bihugu by'Amajyaruguru ya Afurika, aho insengero n'utubari atari byinshi, naho usanga bijya kumera kimwe. Imiziki imena amatwi iba ivuza ubuhuha, kandi ubwo abagabo bato n'abakuru bicaye ku nkengero z'imihanda banywa icyayi n'ikawa, ari nako batumura itabi ku karubanda.

Ibijyanye no kubaka inganda zikora amasaha 24 ku yandi ni inzozi zitari hafi kuba impamo, mu gihe insengero n'utubari ari byo bikoresha umuriro w'amashanyarazi n'imihanda yatwegerejwe byubakwa hirya no hino muri Afurika.

Ejo bundi i Kibera mu Mujyi wa Nairobi, aha hakaba agace k'amanegeka ka mbere kanini muri Afurika, muri buri bilometero 2,5 by'umuhanda wa gari ya moshi utarakoreshwaga cyane icyo gihe, ku Cyumweru washoboraga kuhasanga insengero 50, hagati y'urusengero n'urundi harimo intera itarenze metero 10.

Nigeria, igihugu cya mbere gituwe cyane muri Afurika kikaba na kimwe mu bifite ubukungu bunini kuri uyu Mugabane, cyari kizwiho kugira insengero ziruta ubwinshi bw'ibitaro, amashuri ndetse n'inganda byose ubiteranyirije hamwe. Hari n'abatebya bavuga ko kuba ubukungu bwa Nigeria butakiri ubwa mbere bunini muri Afurika, bishobora kuba bifitanye isano n'ubwiyongere budasanzwe bw'insengero n'imisigiti.

Gusa ibi bitandukanye cyane n'uko ibintu bimeze mu Bushinwa, igihugu cyohereza muri Afurika byinshi mu byo dukoresha mu ngo zacu. Bamwe mu Banyafurika bajya kurangura muri icyo gihugu, bakunze gushyikira mu Mujyi wa Guangzhou usobanurwa 'nk'iguriro ry'inganda zo mu Ntara ya Guangdong iyoboye izindi mu kohereza ibicuruzwa byinshi mu mahanga, aho yuzuyemo amaguriro acuruza ibikoresho byose watekereza, kuva ku byo mu gikoni kugera ku bikoreshwa mu modoka.'

Uyu Mujyi niwo utuyemo Abanyafurika benshi muri icyo gihugu, babarirwa hagati y'ibihumbi 20 n'ibihumbi 100. Gusa nk'uko abo Banyafurika babivuga, kenshi bakunze gutemberera mu mijyi mito y'u Bushinwa aho baba bagiye gushaka ibicuruzwa bihendutse kurushaho, rimwe na rimwe ku kigero cya 50% ugereranyije n'ibicururizwa i Guangzhou.

Ibyo babona ku mihanda bagana muri ibyo byaro, ni ishusho itandukanye cyane n'ibyo ubona muri Afurika. Mu rugendo, ugenda uhura n'inganda nto aho abagabo n'abagore baba bari kudoda imyenda, bakora ibikoresho bito birimo nk'uburoso, ibisokozo, udupapuro duto n'ibindi byinshi.

Kuko u Bushinwa ari igihugu gituwe n'abaturage benshi batemera Imana, biragoye kubona urusengero ku nzira.

Gusa ntabwo ibijyanye n'imyizerere bisobanura neza iri tandukaniro. Mu myaka ya mbere y'iyaduka ry'inganda mu Burayi bw'Abakirisitu, ibyo wabonaga mu byaro n'inkengero z'imijyi ntaho bitaniye n'ibyo ubona mu Bushinwa. Mu Burayi wahasangaga abakora ibijyanye n'ubugeni, ibishushanyo, imitako, ibikoresho by'umuziki n'ibindi byinshi.

Mu bihugu nk'u Butaliyani, igihugu cya cyenda gifite ubukungu bunini ku Isi ugendeye ku musaruro mbumbe wacyo, n'uyu munsi usanga ibyo bihangano n'ubugeni bikigize igice kinini cy'ubukungu.

Ishoramari ryakozwe mu bikorwaremezo mu Bushinwa, ryatumye havuka inganda bityo hongerwa umusaruro ku kigero Abanyafurika tudashobora kwiyumvisha.

Mu gihe abandi bateje imbere inganda zibyara umusaruro, muri Afurika usanga ubucuruzi bushingiye ku Mana burusha imbaraga ibindi bikorwa biteza imbere ubukungu mu kwigarurira amarangamutima y'Abanyafurika, igihe cyabo, amafaranga yabo, ibikorwaremezo bubaka ndetse n'imbaraga zabo, aho bigoye kubona urundi rwego rw'ubukungu rukurura Abanyafurika nk'uko insengero zibigenza.

Mu ntangiriro za Kanama, u Rwanda rwahagaritse insengero zirenga ibihumbi bine zirimo n'imisigiti mike, ndetse n'ahantu harenga 100 h'ubuvumo, hasengerwaga mu buryo butemewe. Aha hantu hose hahagaritswe kubera kutubahiriza amabwiriza ateganyijwe, arimo no kuba hatari hari uburyo bwo kugenzura urusaku ruhaturuka. Ibi byatumye insengero zose zifungwa muri rusange zirenga 5.600 mu myaka itandatu ishize.

Perezida Paul Kagame yakomoje ku buryo izi nsengero zikoreshwa mu nyungu z'abaziyobora, agaya insengero zikura amafaranga mu baturage mu buryo butaboneye, anagaragaza ko izi nsengero zigira uruhare mu gukenesha Abanyarwanda kandi ko zikwiriye gutanga umusoro nk'ibindi bikorwa byose by'ubucuruzi mu gihe zitahindura imyitwarire.

Gusa gusimbura insengero n'utubari bizaba urugamba rukomeye ugereranyije n'umwanya byombi bifite ku marangamutima y'Abanyafurika. Ubibonera nko mu buryo abafite ibyo bikorwa bihutira gufatirana amahirwe azanwa n'iterambere ry'imijyi mishya ndetse n'ubwiyongere bw'abaturage, aho usanga babegereza ibikorwa byabo kurusha uko za guverinoma zibegereza ibikorwa by'iterambere.

Mu gihe uruhare rw'umuryango mu burere no kwita ku bawugize ruri kugenda rucyendera uko iterambere ryaguka hirya no hino mu mijyi ya Afurika, Abanyafurika benshi batagira akazi, bakeneye ahantu handi habahumuriza cyane cyane iyo bari guhura n'ubuzima butoroshye bwo mu mijyi.

Ibi kenshi binajyana n'uko usanga inzozi z'urubyiruko rw'Abanyafurika rwagize amahirwe yo kwiga no gukurira mu bihugu bifite ubukungu buzamuka neza, zitaragezweho nk'uko rwabyifuzaga.

Ibi byerekanwa n'imibare y'ubushomeri. 60% by'Abanyafurika ni urubyiruko ruri munsi y'imyaka 25, ariko abadafite akazi bikubye kabiri abarengeje imyaka 25 badafite akazi. Mu mpera za 2023, 60% by'urubyiruko rw'Abanyafurika ntabwo rwagiraga akazi.

Mu gihe nta kazi gahari, ikindi kintu cyiza urwo rubyiruko rwagira ni icyizere cy'uko ejo ibintu bizagenda neza, ari nabyo insengero zitanga cyane.

Insengero ntizisengesha abantu gusa, zinafasha Abanyafurika bari mu bihe bigoye, nk'abari mu bukene n'abandi, kubaho muri ubwo buzima no kwiyakira. Ibi ni kimwe n'uko bigenda ku marushanwa nka Premier League nayo agira urwo ruhare.

Insengero kandi zitanga icyizere cyane mu buryo bwagutse, zikanamenya kugikoresha mu gushaka amafaranga, binyuze mu kugaragaza ko Imana izahemba abatanga amafaranga n'impano zihenze ku bavugabutumwa babo hano ku Isi.

Iyo bigeze ku kwiyegereza abaturage ndetse no gucuruza icyizere mu bantu, ni nk'aho amadini akina mu cyiciro cya mbere za guverinoma za Afurika zigakina mu cyiciro cya gatatu, dore ko zitanashobora kubyaza umusaruro umugisha zifite.

Wibaze ko guverinoma nyinshi muri Afurika, Umugabane ufite umugisha wo kugira umutungo kamere mwinshi, zananiwe kuwubyaza inyungu, ahubwo ugasanga bikorwa n'ibigo by'ubucuruzi mu Burayi na Aziya.

Iyo izo guverinoma zigira ubushobozi bwo kubyaza amafaranga umugisha zitunze, nk'uko insengero zibigenza, zikayakoresha mu guteza imbere abaturage, byashoboka ko izo nsengero zikama abaturage n'utubari dusakuza ijoro ryose bitari kubaho. Ahari wenda za nganda nto ziri mu nkengero z'imihanda yo mu byaro by'u Bushinwa, zanabaho ku nkengero z'imihanda yo muri Afurika.

Insengero ziganje henshi muri Afurika

Ubwo hatangazwaga amanota y'ibizamini bya Leta kuri uyu wa 27 Kanama 2024, Minisitiri w'Uburezi, Gaspard Twagirayezu yagaragaje ko mu biga mu mashuri abanza batsinze ku kigero cya 96,8% bivuze ko hari abanyeshuri 6,492 bangana na 3,2% batsinzwe ibizamini, bisobanuye ko bazasibira, basubiremo ikizamini umwaka utaha.

Muri abo banyeshuri batsinzwe ibizamini harimo abakobwa 3375 bagize 52% mu gihe abahungu bagize 48%.

Uretse abatsinzwe ibizamini ariko hari n'abandi banyeshuri 1,143 bari biyandikishije nk'abagomba gukora ibizamini ariko bikaba badahari, abandi bakabikora nabi (ntibakore nibura bibiri bya gatatu by'ibizamini byose) bigatuma amanota yabo atabarwa.

Imibare ni ryo somo riyoboye mu yatsinzwe n'abanyeshuri aho abaritsinzwe ari 56,643 aho bangana 28,06% by'abakoze bose, Icyongereza cyo abagitsinzwe ni 18,880 bagize 9.35% by'abakosowe neza muri iryo somo.

Mu cyiciro rusange cy'amashuri yisumbuye abanyeshuri batsinze ku kigero cya 93.8%. Muri iki cyiciro abatsinzwe ni 8,912 barimo abakobwa 6,241 n'abahungu 2,671.

Muri icyo kiciro isomo ry'Ubugenge ni ryo abanyeshuri batsinzwe cyane ku kigero cya 60.3%.

Raporo ya Minisiteri y'Uburezi ya 2022/2023 igaragaza ko imibare y'abanyeshuri babonye amanota yo kwimuka bava mu mwaka umwe bajya mu wundi bagabanyutse bava kuri 77% mu 2022 bagera kuri 75.7% mu 2023.

Ku rwego rw'igihugu abasibira bavuye kuri 14.3% bagera kuri 19.1% mu 2023. Mu mashuri abanza ho imibare y'abasibira yaratumbagiye iva kuri 24.6% igera kuri 30.2%.

Abarenga ibihumbi 15 batsinzwe ibizamini bya Leta mu 2023/2024

Uwavuga ko igisobanuro cy'ayo magambo birikumvwa neza na Igiraneza Lucky Fabrice wanikiye bagenzi be bakoranye ibizamini bya leta bisoza amashuri abanza bangana na 202.020, na Telimbere Ineza Alia Ange Stevine wabaye uwa mbere mu cyiciro rusange cy'amashuri yisumbuye ahigitse abarenga ibihumbi 143, ataba abenye.

IGIHE yaganiriye n'abo bana ndetse n'ababyeyi babo, bagaragaza ibanga ryatumye uyu munsi bari kuvugwa impande n'impande z'igihugu.

Nka Igiraneza Lucky Fabrice yize muri Pioneer School, ishuri ryo mu Karere ka Bugesera.

Uyu mwana w'umuhungu ukomoka mu Murenge wa Gashora ufite imyaka 12 y'amavuko, yavuze ko kuba yabimburiye abandi ari umusaruro w'uko yabiharaniye.

Ati 'Tugitangira mu mwaka wa gatandatu w'amashuri abanza ibiruhuko byose twarabyize. Mu mpera z'icyumweru na bwo tukiga mbese buri gihe tugahora kwiga tugira ngo tuzarebe ko byibuze twagera ku ntego twari twihaye.'

Ni urugendo yafashijwemo n'ababyeyi be n'abarimu, agafatanya na bagenzi be ariko akibuka ko no kuruhuka ari ingenzi.

Avuga ko yatsinze Icyongereza, Imibare n'Ubumenyi rusange, akagaragaza ko gahunda ye ari ugukomeza muri uwo mujyo wo guhora imbere y'abandi mu mitsindire, ikinyabupfura no kwicisha bugufi.

Ati 'Ngiye gushyira imbaraga mu masomo kugira ngo nzakomerezeho. Nindangiza kwiga nzafasha n'abandi bana ku buryo imibare y'abatsinda iziyongera.'

Nk'umwana wahize abandi, mu bigo yiguza kwigaho birangajwe imbere na Ntare Louisenlund School, Ecole des Sciences de Byimana, Groupe Scolaire Officiel de Butare cyangwa Ecole des Sciences de Musanze.

Akanyamuneza kari kose no ku mubyeyi wa Igiraneza witwa Munyaneza Jean Claude, ushimira igihugu gikomeje kwimakaza uburezi bufite ireme, abarezi babaye hafi umwana, ubuyobozi bw'ishuri n'umwana wumviye inama yahawe.

Ati 'Ni ibintu twishimiye. Iyi ntsinzi ni umusaruro w'uko twashatse ibikoresho byose byagombaga kumufasha kwitwara neza, ubushobozi bwaba buke tukitabaza n'ikigo kugira ngo hatagira igikoma mu nkokora umugambi we.'

Telimbere Ineza Alia Ange Stevine wahize abandi mu cyiciro rusange cy'amashuri yisumbuye, yize muri Lycée Notre Dame de Citeaux, ikigo kibarizwa mu Karere ka Nyarugenge.

Telimbere nubwo yakoranye umuhati mu bizamini bya leta, kuba uwa mbere mu gihugu ni ibintu byamutunguye kuko yizeraga ko hari abandi bagombaga kuba begukanye uwo mwanya.

Ati 'Icyakora ni ibyishimo bikomeye kuri njye. Nishimye cyane birandenga. Ndanashimira Imana, ikigo n'ababyeyi banjye. Ibanga ni uko nize ndanasenga byose bijyana n'amahirwe.'

Telimbere yavuze ko uyu musaruro yagezeheho wamugaragarije ko ashobora kugera ku kintu kinini mu gihe yabishyiraho umuhate.

Ati 'Binyeretse ko nshobora kugera ku kintu kinini cyane nk'uko umusaruro uri kugenda ubigaragaza.'

Uburezi bw'umwana w'umukobwa ni imwe muri politiki u Rwanda rushaka guteza imbere, nko guca ya myumvire nkene y'uko umukobwa ari wa wundi wirirwa afasha umubyeyi we mu rugo agaharira musaza we akajya kwiga.

Ni n'ingingo na Telimbere yizereramo na cyane ko umusaruro yagize ari urugero rw'ibishoboka.

Ati 'Kuba ndi umukobwa runaka akaba umuhungu, ntabwo ari byo bituma ntsinda cyangwa ngo we atsinde. Twese turashoboye. Uko wakoze ni byo biguhesha icyubahiro. Nta mpamvu yo kwiheba ngo uri umukobwa, ibintu birashoboka.'

Nk'abandi bose Telimbere yizera ko mu buzima byose bishoboka, ariko abaye ari we wihitiramo icyo yaba yumva yaba umuganga wita ku bantu bahura n'ibibazo bitandukanye cyane cyane indwara zifata ubwonko.

Akanyamuneza ka Telimbere ni na ko umubyeyi we witwa Beatrice Mukarutesi yagaragaje.

Uyu mubyeyi utuye mu Karere ka Muhanga yavuze ko yishimira umuhati w'umwana we n'abamuteye imbaraga kugira ngo abe yarageze kuri uwo musaruro.

Ati 'Telimbere akunda ibintu bijyanye no gufasha abafite ubumuga bwo mu mutwe ari yo mpamvu ashaka kuzaba muganga. Ibi bigaragaza umusaruro w'imbaraga leta yashyize mu guteza imbere uburezi bw'umwana w'umukobwa. Natwe tuzamufasha uko dushoboye.'

Mu mashuri abanza, abakoze ibizamini ni 202.021 barimo abakobwa 111. 249 n'abahungu 90.772.

Abakobwa batsinze ku kigero cya 97%, mu gihe abahungu batsinze ku kigero cya 96.6%.

Mu cyiciro rusange cy'amashuri yisumbuye abahungu batsinze ku kigero cya 95.8%, mu gihe abakobwa batsinze ku kigero cya 92% mu bizamini byakozwe n'abanyeshuri 143227, barimo abakobwa 79.933 n'abahungu 63.294.

Igiraneza Lucky Fabrice wabaye uwa mbere mu gihugu mu bizamini bya leta bisoza amashuri abanza

Igiraneza Lucky Fabrice wabaye uwa mbere mu gihugu mu bizamini bya leta bisoza amashuri abanza yigaga muri Pioneer School, ishuri ryo mu Karere ka Bugesera

Telimbere Ineza Alia Ange Stevine wahize abandi mu cyiciro rusange cy'amashuri yisumbuye, yize muri Lycée Notre Dame de Citeaux

Abana batanu bahize abandi mu bizamini bya leta bisoza amashuri abanza bifotozanya na Minisitiri w’Uburezi, Gaspard Twagirayezu

Abanyeshuri batanu bahize abandi mu Cyiciro Rusange cy’Amashuri yisumbuye na bo bifotozanyije na Minisitiri w’Uburezi, Gaspard Twagirayezu ubwo yari amaze kubahemba

Abo banyeshuri bose ni bo bahize abandi mu bizamini bya leta bisoza amashuri abanza n’Icyiciro Rusange cy’amashuri yisumbuye

Amafoto: Kwizera Moses

Minisitiri w’Uburezi, Twagirayezu Gaspard yavuze ko muri rusange imibare, ubugenge, ubutabire, n'ibinyabuzima, ari amwe mu masomo abanyeshuri batatsinze ku kigero gishimishije, bityo ko ariyo akeneye  gushyirwamo imbaraga.

Ati “Bigaragaza ko hari aho tugomba gushyira imbara zihariye. Bivuga ko iyo turebye ibi bizamini ntabwo tuba tureba amashuri gusa cyangwa abanyeshuri, ahubwo natwe tuba twireba. Niyo mpamvu tuba twakoze iyi mibare kugira ngo turebe aho abanyeshuri bacu batsinze neza n’aho tugomba gushyira imbaraga.”

Yakomeje avuga ko ingamba bafashe mu guhangana n’iki kibazo, ari ugukomeza gufasha abarimu haba mu mahugurwa no mu mfashanyigisho, ndetse no gukomeza gukurikirana uko bihagaze umunsi ku wundi.

Si ibyo gusa, kuko hazanakomeza kuvugururwa imyigishirize, abarimu nabo bakomeze guhugurwa mu buryo bwose, ari nako hongerwa ibikoresho bikenewe kugira ngo amasomo ya siyansi akomeze gutera imbere mu Rwanda.

Akomoza ku cyishimirwa kugeza ubu, Minisitiri Twagirayezu yagize ati: “Gusa icyo twishimira ni uko, uko imyaka igenda yigira imbere, tugenda tubona ko uko abanyeshuri bakora bigenda bisa neza kurushaho.”

Yashimangiye ko hari icyizere ko n’ayo masomo abanyeshuri badatsinda neza, Minisiteri ikomeje kongeramo imbaraga kugira ngo abayatsinda biyongere ‘cyane cyane ko siyansi n’imibare ari ibintu by’ingenzi cyane mu buzima bw’uyu munsi.’

Minisitiri w'Uburezi, Twagirayezu Gaspard, yagaragaje ko abanyeshuri bo mu mashuri abanza batsinze imibare ku kigero cya 71,9%. Mu bijyanye na siyansi abanyeshuri batsinze ku kigero cya 99,5%, mu Kinyarwanda batsinda kuri 99,5%, Icyongereza batsinda kuri 90,7%.

Ibi bitangajwe nyuma y'iminsi mike Perezida Kagame yakiriye itsinda ry'abanyeshuri b'Abanyarwanda biga mu mashuri yisumbuye bitabiriye amarushanwa y'imibare, arimo iryo ku Mugabane wa Afurika n'iryo ku rwego mpuzamahanga, abashimira ko bitwaye neza.

Perezida Kagame ubwo yakiraga aba banyeshuri muri Village Urwugwiro, yababwiye gukomeza gushyira imbaraga mu masomo yabo kugira ngo azabagirire akamaro n'Igihugu muri rusange.

Ati 'Iri rushanwa rirerekana ko mu bakiri bato bacu twifitemo ubushobozi bwo kubona ibisubizo byinshi by'ibibazo dufite.''

Muri uyu mwaka, u Rwanda rwanditse amateka yo kwegukana umudali wa Zahabu, uwa mbere rwegukanye muri PAMO 2024, yasorejwe muri Afurika y'Epfo muri iki Cyumweru.

Uyu mudali wegukanywe na Denys Prince Tuyisenge, uri mu banyeshuri batandatu bitabiriye aya marushanwa. Icyo gihe, yagaragaje ko umudali yegukanye ari ingenzi mu myigire no gukabya inzozi ze zo kuzaba enjeniyeri.

Uyu munsi rero, nabwo Tuyisenge yaje ku rutonde rw'abanyeshuri batanu ba mbere batsinze neza mu Rwanda mu cyiciro rusange cy'amashuri yisumbuye (Tronc Commun).

Akimara kwegukana iyi ntsinzi yagize ati: 'Byanteye imbaraga numva nakomeza kwiga cyane kugira ngo nzagere kuri byinshi, ndifuza kuzaba umu enjeniyeri kandi imibare ni inkingi yabyo.'

Mu batsinze bava mu mwaka wa gatatu w'amashuri yisumbuye uko ari 137052 muri bo aboherejwe mu mashuri y'ubumenyi busanzwe bagize 52.8%, aboherejwe mu mashuri ya tekinike imyuga n'ubumenyi ngiro ni 40.5%, mu gihe aboherejwe mu mashuri nderabarezi TTC ari 4.7%, aboherejwe mu ibaruramari bagize 1.8% naho abazajya kwiga amasomo arebana no kwita kuri gahunda z'amashuri y'incuke ni o.2%.

Minisiteri y’Uburezi iri kuvugutira umuti urambye ikibazo cyo kuba abanyeshuri badatsinda neza amasomo y’imibare n’ubugenge