Blog

Ni mu mukino wo ku munsi wa mbere wa shampiyona y’icyiciro cya mbere mu Rwanda wabaye kuri uyu Wa Kane Saa Cyenda kuri Stade mpuzamahanga ya Huye

Abakinnyi 11 ba Mukura VS babanje mu kibuga:

Sebwato Nicholas

Rushema Chris

Vincent Adams

Obedi Uwumukiza

Ntarindwa Aimable

Jordan Nzau Dimbumba

Niytonizeye Fred

Hakizimana Zuberi

Iradukunda Elie Tatou

Agyenin Mensah

Abakinnyi 11 ba Gasogi United babanje mu kibuga;

Dauda Ibrahima Baleri

Muderi Akbar

Nshimiyinana  Govin

Udahemuka Jean de Dieu

Muhindo Collin

Hakiziamana Adolphe

Ngarambe Sadajdi

Niyongira Danny

Harerimana Abdelaziz

Malipangou Theodore Christian Yawanendj

Baloukoulou Syntrick

Ikipe ya Gasogi United niyo yatangiye ihererekanya umupira ubona Mukura VS yo ikina nkaho itaziranye itakaza umupira bya hato na hato.

Gasogi United yakomeje gukina neza ndetse ikanoba uburyo bwashoboraga kuvamo igitego nk’aho yabonye kufura nziza ku ikosa ryari rikorewe Malipangou gusa ntiyagira icyo itanga.

Mukura VS yaje gukanguka  maze ku munota wa 12 Agyenim  Mensah azamukana umupira acenga agiye kwinjira mu rubuga rw'amahina myugariro wa Gasogi United Hakizimana Adolphe  amutereka hasi, umusifuzi atanga kufura yatewe na Vincent Adams  ishyirwa muri koroneri.

Umunya-Ghana  Mukura VS yasinyishije muri iyi mpeshyi Agyenim Mensah yakunze kuzonga abakinnyi ba Gasogi United akanakorerwaho amakosa menshi ari nabyo byaviriyemo Hakizimana Adolphe guhabwa ikarita y'umuhondo nyuma y’uko yari amutegeye mu kibuga hagati.

Ku munota wa 30 Gasogi United yafunguye amazamu ku ishoti ryari rirekuwe maze umunyezamu Nicolas Sebwato ntiyafata umupira ngo awugumane bituma wifatirwa na Harerimana Abdelaziz awutereka mu nshundura.

Nyuma yo gutsindwa Mukura VS yatangiye gushaka uko yakwishyura ikanarema uburyo nk’aho Obedi Niyomukiza yahinduye umupira mwiza imbere y'izamu ashaka Jordan Nzau Ndimbuba gusa ba myugariro ba AS Kigali baba maso.

Ku munota wa 39 Afhamia Lotfi utoza Mukura VS yakoze impinduka mu kibuga akuramo Jordan Nzau Ndimbumba wari wagize ikibazo cy'imvune hajyamo Nisingizwe Christian. Igice cya Mbere cyarangiye Gasogi United ikomeje kuyobora.

Mu gice cya Kabiri Mukura VS yari ifite akazi ko gushaka uko yakwishyura yaje mu gice cya Kabiri igikomeje kurushwa.Ku munota wa 52 Gasogi United yaribonye igitego cya Kabiri ku mupira mwiza Malipangou yarabonye ari imbere y'izamu ariko Nicolas Sebwato aratabara awumukura ku kirenge.

Ku munota wa 62 Mukura Vs yakoze impinduka havamo Hakizimana Zubel ,Ntarindwa Aimable na Obedi Uwumukiza  hajyamo Muvandimwe Jean Marie Vianney ,Irumva Justin na Nsabimana Emmanuel .

Nyuma yo gukora impinduka mu kibuga bamwe mu bakinnyi nka Vincent Adams waruri gukina nka nimero 3 yagiye mu mwanya we mu kibuga hagati atangira gukina afasha gusatira bituma Mukura VS noneho itangira gukina neza ndetse inarema uburyo imbere y'izamu.

Ku munota wa 74 Nicholas Sebwato yatabaye Mukura VS ku ishoti ripima amatoni  ryari rirekuwe na kapiteni wa Gasogi Unite Muderi Akbar. Umukino ubura iminota mike ngo urangire Iradukunda Elie Tatou yazamukanye umupira acenga yinjira mu rubuga rw'amahina agiye kurekura ishoti ryashoboraga kuvamo igitego maze ba myugariro ba Gasogi United baratabara bashyira umupira muri koroneri.

Umukino warangiye Gasogi United yegukanye amanita 3 ya mbere itsinze Mukura VS igitego 1-0.

KNC mu byishimo nyuma y’uko ikipe ye ya Gasogi United itsinze 

Harerimana Abdelaziz watsinze igitego cya 1 muri shampiyona y’icyiciro cya mbere mu Rwanda ya 2024/25

Abakinnyi ba Gasogi United bishimira igitego 

Abakinnyi 11 ba Mukura VS babanje mu kibuga 

Abakinnyi 11 ba Gasogi United babanje mu kibuga 

Bamwe mu bafana ba Mukura VS bari mu Stade 

Rutahizamu w’umugande wategewe na Kiyovu Sports, Emmanuel Arnold Okwi yamaze gusinyira AS Kigali.

Ni inkuru yatangaje benshi ubwo ku mugoroba wo kuri uyu wa Kane yasinyiraga AS Kigali amasezerano y’umwaka umwe mu gihe yari yitezwe muri Kiyovu Sports.

Ku wa Gatandatu w’icyumweru gishize ni bwo perezida wa Kiyovu Sports, Nkurunziza David yemereye abakunzi ba Kiyovu Sports ko agomba kugarura Emmanuel Okwi ndetse no muri iryo joro yaje kuhagera.
Byari byitezwe ko ahita asinya ndetse yagombaga gutangira imyitozo ku wa Kabiri w’iki cyumweru ariko ntiyatangiye.

ISIMBI yagerageje gushaka amakuru ndetse iza kumenya ko habayemo kwibeshya mu mibare y’amafaranga bari bemereye Okwi.

Okwi yaje yumvikanye na Kiyovu Sports ibihumbi 15 by’amadorali ni ukuvuga agera kuri miliyoni 21 z’amafaranga y’u Rwanda.

Bivugwa ko ubwo Okwi yari ageze mu Rwanda, bamwe mu bantu bari hafi ya perezida wa Kiyovu Sports, Nkurunziza David bamugiye mu matwi bamubwira ko ibyo bihumbi 15$ ari miliyoni 15 Frw ndetse ari yo agomba guhabwa Okwi ndetse azayamera kuko nta yindi kipe imushaka.

Uyu rutahizamu w’Umugande yahise abyamaganira ko ndetse ko agiye guhita asubira muri Uganda. Byasabye ko perezida wa Kiyovu yongera kwegeranya abajyanama be n’abamuri hafi bemera guteranya amafaranga abura ndetse bivugwa ko yamaze kuboneka.

Bitunguranye AS Kigali yari yamaze kumenya uko ikibazo cye kimeze, yahise imuganiriza ndetse akaba yamaze gusinyira iyi kipe y’Abanyamujyi.

Okwi yamaze gusinyira AS Kigali

U Rwanda rushyira imbaraga mu kwimakaza ikoranabuhanga mu ngeri zose by'umwihariko mu burezi nk'urwego rutegurirwamo abazagira uruhare mu iterambere rirambye ry'igihugu.

Nubwo gahunda yamamaye cyane ari ya mudasobwa ku banyeshuri, abarimu na bo bazikenera bakora ubushakashatsi, bategura amasomo ndetse aho bafite ibikoresho by'ikoranabuhanga bihagije zifashishwa mu kwigisha.

Ikirenze kuri ibyo banazifashisha mu kuzuza amanota n'andi makuru y'abanyeshuri mu ikoranabuhanga kugira ngo inzego z'uburezi ziyabonere igihe.

Imibare ya Mineduc yo mu mwaka w'amashuri wa 2022/2023 igaragaza ko abarimu n'abayobozi b'amashuri bafite mudasobwa bageze kuri 43,576 bavuye ku barenga ibihumbi 24 mu 2021/22, bigaragaza ubwiyongere bwa 43.5%.

Iyi raporo igaragaza ko mudasobwa imwe ikoreshwa n'abarimu bane bo mu mashuri abanza, mu gihe mu mashuri yisumbuye imwe ikoreshwa na babiri. Muri TVET, L1-L5 buri mwarimu afite mudasobwa ye ariko byagera ku bigisha muri Polytechnic abarimu batatu bagasaranganya mudasobwa imwe.

Muri Gicurasi 2024, Umuyobozi Ushinzwe ishyirwa mu bikorwa ry'imishinga mu Rwego rw'Igihugu rushinzwe Uburezi REB, Shyaka Emmanuel yabwiye IGIHE ko bari mu nzira zo gutanga isoko ryo kugura mudasobwa ibihumbi 25 zizagenerwa abarimu bo mu mashuri abanza gusa.

Ati 'Zizahabwa abarimu kugira ngo bashobore gukora ubushakashatsi, gutegura amasomo yabo neza no kuyatanga. Zizahabwa abarimu bose bo mu mashuri abanza kandi bose bamaze guhugurwa ku ikoreshwa ry'ikoranabuhanga mu myigire n'imyigishirize.'

Amashuri afite ibyumba by'ikoranabuhanga (smart classroom) mu cyiciro cy'abanza ni 20.3%, mu yisumbuye yigisha amasomo rusange ni 45.3% mu gihe muri TVET ni 36.0%. Ni mu gihe 59.5% by'amashuri yose ari yo afite internet.

Biteganyijwe ko izo mudasobwa zizagurwa muri Kanama 2024 zikazifashishwa mu mwaka w'amashuri wa 2024/2025 bakazatangira kuzikoresha.

Abarimu bigisha mu mashuri abanza barenga ibihumbi 67, gihe muri rusange abigisha mu mashuri yose mu Rwanda barenga ibihumbi 138.

Abarimu bo mu mashuri abanza basangira mudasobwa imwe ari bane

Dr Munroe yari umwanditsi w'ibitabo ukomeye n'umwarimu wazengurutse mu bihugu byinshi atoza abantu guhindura imyumvire, imiyoborere, kwikorera, itangazamakuru, iyobokamana n'ibindi.

Mu kwizihiza ibikorwa bye hazibanzwa ku birimo izo nyigisho yakundaga gutanga.

Kumwibuka we n'umugore we hazirikanwa ibikorwa byabo bizabera mu Mujyi wa Kigali kuri 'Piscine' ya Park Inn by Radisson Kigali ku wa 06 Nzeri 2024 guhera Saa Kumi n'Ebyiri z'Umugoroba kugeza Saa Yine. Uwitabiriye yishyure ibihumbi 40 Frw.

Ku munsi ukurikiyeho ku wa 07 Nzeri 2024 hazabaho ibiganiro byiswe 'Purpose-Driven Success Brunch', aho abazitabira bazahabwa inyigisho zitandukanye zirimo uko babaho ubuzima bufite intego kandi bakabasha kubujyanisha n'ibirimo umuryango, ubucuruzi ndetse n'iterambere ry'umuntu ku giti cye.

Aha ho abazitabira bazishyura ibihumbi 30 Frw, mu gihe uzitabira iminsi yose azagabanyirizwa akishyura ibihumbi 60 Frw.

Biteganyijwe ko mu bazitabira ibi bikorwa harimo imfura ya Dr. Myles Munroe na Ruth Ann Munroe, Charisa Munroe-Wilborn akaba Umuyobozi Mukuru w'Umuryango 'The Dr Myles & Ruth Munroe Foundation' washinzwe hagamijwe gusigasira ibigwi by'ababyeyi be, akaba ari no mu bazatanga ibiganiro muri iki gikorwa.

Umugabo wa Charisa Munroe-Wilborn, Destry Wilborn washinze Umuryango Men of Purpose(MOP) ufasha abana b'abahungu kuvamo abagabo bafite intego, na we azitabira iki gikorwa.

Mu bandi bazakitabira harimo Charlie Masala uhagarariye umuryango Munroe Global muri Afurika na wo washyiriweho gusigasira ibikorwa bya Dr. Myles Munroe. Hari kandi na Hubert Sugira Hategekimana benshi bamaze kumenya mu bijyanye no kwigisha imibanire, akaba yarigishijwe na nyakwigendera Dr Myles Munroe.

Sugira kandi ni n'Umuyobozi wungirije w'Umuryango Mpuzamahanga, International Third World Leaders Association (ITWLA), washinzwe na Dr Myles Munroe mu myaka ya 1980.

Ushaka kwiyandikira mu bazitabira yahamagara kuri 0784442919.

Dr. Myles Munroe ukomoka muri Bahamas n'umugore we, Ruth Ann Munroe bamaze imyaka 10 bishwe n'impanuka y'indege

Mu Rwanda hagiye kwibukirwa Umunyabigwi Dr. Myles Munroe n'umugore we bamaze imyaka 10 bapfuye

Mu myaka ibiri ishize nibwo Akarere ka Rwamagana kemereye urugaga rw'Abikorera ku rwego rw'Intara ikibanza bakubakamo ahantu hajya habera imurikagurisha mu buryo bahoraho, byanaba ngombwa hakanakorerwa ibindi bikorwa byabinjiriza amafaranga.

Ni nyuma y'uko PSF yari yagaragaje ko nibura buri mwaka itanga miliyoni 120 Frw yo kubaka ahantu haba hari bubere imurikagurisha ryasozwa ibyo bari bubatse bakabisenya.

Umuyobozi w'Urugaga rw'Abikorera mu Ntara y'Iburasirazuba, Nkurunziza Jean de Dieu, ubwo yaganiraga n'itangazamakuru ku myiteguro y'imurikagurisha ry'iyi Ntara rizatangira tariki ya 17 Kanama 2024, yavuze ko imyiteguro igeze kure kandi ko bashaka gutangira gukusanya amafaranga yo kubaka ahantu iri murikagurisha rizajya ribera mu buryo buhoraho.

Yagize ati 'Turimo turatekereza ko twakubaka ahazajya habera imurikagurisha mu buryo buhoraho kuko ibi bikorwa dukora umunsi ku munsi bidutwara amafaranga menshi kandi tukabisenya. Turimo turavugana na bagenzi bacu kandi barimo barabyumva turashaka kwegeranya ubushobozi nk'abikorera kugira ngo twubake, ntekereza ko bitazatinda kuko tuzajya twubaka gake gake.'

Nkurunziza yavuze ko nibamara kubyemeranywa bose mu nama bazahita batangira gushaka uko ibikorwa byo kubaka byatangizwa ariko kuri ubu ngo haracyari ibiganiro kandi biganisha aheza.

Yavuze ko kandi nibura buri mwaka iyo bari gutegura ibikorwa by'imurikagurisha bakoresha ingengo y'imari ya miliyoni 120 Frw arimo ayubaka ahakorerwa imurikagurisha, gukururayo umuriro, gushyiraho ihema, kubaka uruzitiro n'ibindi byinshi byose bisenywa iyo imurikagurisha risojwe.

Kuri ubu biteganyijwe ko imurikagurisha ry'Intara y'Iburasirazuba rizitabirwa n'abamurika barenga 300 barimo Abanyarwanda n'abanyamahanga. Rizatanga akazi ku bantu 400 biganjemo urubyiruko. Biteganyijwe ko ritazangira tariki ya 17 Kanama risozwe tariki ya 3 Nzeri 2024.

Nkurunziza yavuze ko gukodesha ihema, kuzitira ahari bubere imurikagurisha n'ibindi byinshi bubaka bibatwara miliyoni 120 Frw kandi bigasenywa

Umuyobozi wa PSF mu Ntara y'Iburasirazuba yavuze ko bagiye gutangira gukusanya amafaranga yo kubaka ikibanza bahawe ku buryo hajya habera imurikagurisha

Harerimana Abdel Aziz bakunda kwita Rivaldo wa Gasogi United ni we watsinze igitego gifungura shampiyona ya 2024-25 ni mu mukino ikipe ye yatsinzemo Mukura VS.

Uyu munsi ni bwo shampiyona y’icyiciro cya mbere mu Rwanda umwaka w’imikino wa 2024-25 watangiye aho habaye imikino 3.

I Huye, Mukura VS yari yakiriye Gasogi United mu mukino utari woroshye waje kurangira Gasogi United itsinze igitego 1-0.

Ni igitego cyatsinzwe na Harerimana Abel Aziz ku munota wa 32 kiba igitego gifungura shampiyona ya 2024-25 kuko ari cyo cyabonetse mbere y’ibindi.

Kuri Kigali Pelé Stadium, Gorilla FC yari yakiriye Vision FC yari ikizamuka mu cyiciro cya mbere.

Igice cya mbere Gorilla FC ni yo yabonye amahirwe ariko ntiyayabyaza umusaruro. Mu gice cya kabiri Vision FC yagerageje gusatira ariko umunyezamu Gad akuramo imipira ikomeye ya Ndekwe Felix.

Ku munota wa 5 w’inyongera, Mugunga Yves yaje gutsindira Gorilla FC igitego umukino urangira ari 1-0.

Undi mukino wabaye ni uwo Bugesera FC yakiriyemo Amagaju FC banganya ubusa ku busa.

Rivaldo ni we watsinze igitego gifungura shampiyona

Iri soko rya Karubamba risanzwe rirema ku wa Gatatu no ku wa Gatandatu. Abarikoreramo basigaye baryuzura bamwe bakabura aho bakorera bakajya gukorera hanze mu muhanda, ku buryo bibangamira abawunyuramo kuko abacuruzi n'abaguzi baba bawufunze.

Rudasingwa Robert ucuruza ibitoki, yavuze ko impamvu bacururiza hanze mu muhanda ari uko isoko risa nk'iryuzuye abantu ku buryo abaje gucuruza ibitoki nyuma batabona aho babishyira bagahitamo gucururiza mu muhanda.

Ati 'Isoko dufite ni rito bibaye byiza twabona ahantu heza hagari natwe ducuruza ibitoki tukabona aho tugurishiriza. Hano hatubana hato tukaza hanze tugafunga imihanda abantu bakabura uko batambuka. Turasaba ubuyobozi kudushakira ahantu hakwagukira isoko kuko natwe byadushimisha.'

Niyokwizerwa Saphina we yavuze ko iyo ubuyobozi bubasanze inyuma bari kuhacururiza bubahana, atanga urugero ko mu minsi ishize baciwe amande y'ibihumbi 23 Frw bazira gucururiza inyuma y'isoko kandi ngo byose biva ku kuba abantu baba babaye benshi bakaryuzura.

Niyokwizerwa yasabye ubuyobozi kubafasha iri soko rya Karubamba rikagurwa cyangwa se bamwe mu bacuruza ibintu runaka bagashakirwa ahandi bakorera hisanzuye ngo kuko aho bari basanganwe bagurishiriza ibiribwa habaye hato cyane.

Umuyobozi w'Akarere ka Kayonza, Nyemazi John Bosco, yavuze ko ikibazo cy'iri soko bakizi ndetse batangiye kugishakira ibisubizo bafatanyije n'ubuyobozi bw'abikorera.

Ati 'Murabizi ko ririya soko risanzwe rikora ariko bigaragara ko ryagutse kuko muri kiriya gice cya Karubamba hakunze kwera intoki nyinshi. Icyo turimo kureba ni uburyo dushobora kuba twaryagura ku buryo abacuruza ibitoki babona aho bakorera hahagije, icyo rero nicyo twumva gikomeye twavuga.'

Meya Nyemazi yavuze ko barimo gukorana n'abikorera kugira ngo babashe kubona igisubizo kirambye cyo kuryagura. Ubuyobozi burateganya kandi gushaka ikibuga cyitaruye abacuruza ibiribwa bazajya bakoresha ku munsi w'isoko kugira ngo abacuruzi be gukomeza gucururiza mu muhanda.

Isoko rya Karubamba riremwa n'abaturage barimo abo mu Mirenge ya Gahini, Rukara na Murundi n'ahandi henshi. Ibi bituma rikunze kubarizwamo abaturage benshi baba baje guhaha ndetse n'abaje kugurisha benshi.

Bamwe mu bacuruza ibitoki barasaba ubuyobozi kubashakira aho bakorera kuko igice bahawe gukoreramo ari gito

Abacuruzi bavuga ko gucururiza inyuma y'isoko babibahanira bagasaba guhabwa aho bakorera hisanzuye

Gucururiza mu muhanda ngo bituma bawufunga

GCR ni ikigo mpuzamahanga gikorera muri Afurika y'Epfo, gifite itsinda rinini muri Afurika ritanga ibitekerezo by'ingirakamaro ku bijyanye n'imari mu nzego zitandukanye.

Amanota GCR itanga, ahera kuri 'D' nk'inota rya nyuma ry'ikigo cy'imari cyangwa banki ikora mu buryo butanoze kandi ntigikurikize gahunda z'igihe cyagenwe, naho inota rinini rikaba AAA rihabwa uhiga abandi mu gutanga neza serivisi runaka za banki ugereranyije n'abandi mu gihugu akoreramo.

Urwego rwa AAA ku nguzanyo y'igihe kirekire rugaragaza ko BRD ifite ubukungu bukomeye, inkunga ikomeye ituruka ku bashoramari bayo, imiyoborere inoze, ndetse n'uruhare rwayo rw'ibanze mu guteza imbere imibereho myiza y'Abanyarwanda.

Uku kuguma ku rwego rwiza bigaragaza icyizere mu bushobozi bwa BRD bwo gukomeza kugira ubukungu bukomeye no kwihanganira ibibazo by'imari mu gihe kirekire. Iki ni igikorwa gikomeye gituma BRD iba ikigo cya mbere mu isoko ry'imari ry'u Rwanda kibonye amanota akomeye nk'aya.

Itangazo rya GCR ryo kuri uyu wa 13 Kanama 2024 rigaragaza ko BRD ari yo banki rukumbi ibashije kugera kuri uyu mwanya mu bigo by'imari n'amabanki bikorera mu Rwanda.

Yanahawe kandi inota rya A1+ ry'igihe gito (A1+ short-term rating), bigaragaza imiterere myiza ya BRD mu rwego rw'amafaranga agenewe ibikorwa byihutirwa ndetse n'ubushobozi bwayo bwo kuzuza inshingano z'igihe gito mu buryo bwihuse.

Iri nota ryerekana umuhate wa banki wo kubungabunga urwego rwo hejuru rw'ubunyangamugayo n'ubushobozi bwo gucunga ingaruka zishingiye ku mari.

Umuyobozi Mukuru wa BDR, Kampeta Pitchette Sayinzoga yatangaje ko guhabwa aya manota bigaragaza umuhate iyi banki ishyira mu kubaka urwego rw'ubukungu rwizewe kandi bagahangana n'ibibazo bitandukanye.

Yagize ati 'Guhabwa inota rya AAA rihekejwe no kuba wihagazeho muri rusange na A1+ mu mikorere y'igihe gito ni icyemeza ko BRD ihagaze neza mu bukungu n'umuhate wacu muri gahunda z'iterambere ry'u Rwanda. Nk'ikigo cya mbere ku isoko [ry'u Rwanda] giteye iyi ntambwe, binyuze mu nkunga ihoraho y'abanyamigabane bacu, twizeye gukomeza kugira uruhare mu mishinga y'iterambere hirya no hino mu gihugu.'

Ubuyobozi bwa BRD buhamya ko uyu mwanya bashyizweho ubatera imbaraga zo gukomeza gushakisha amafaranga imbere mu gihugu no ku rwego mpuzamahanga, bagakomeza kugira uruhare mu bikorwa by'iterambere.

Banki y'Amajyambere y'u Rwanda ibaye iya kabiri ihawe inota nk'iri mu zo bikora kimwe muri Afurika, nyuma ya Banki y'Iterambere ya Nigeria na yo yigeze guhabwa AAA mu gihe cyashize.

BRD ihamya ko izakomeza gutanga serivisi zigamije gushimangira iterambere rirambye binyuze mu gutera inkunga imishinga izana udushya n'ubufatanye bubyara inyungu nk'uko bigaragara mu cyerekezo 2050.

BDR yashinzwe mu 1967. Yashinzwe igamije gushyigikira iterambere ry'ubukungu bw'igihugu binyuze mu gutanga amafaranga y'inguzanyo ku mishinga y'igihe kirekire mu bice by'ingenzi by'ubukungu. Igenda igira uruhare rukomeye mu gutera inkunga imishinga ituma u Rwanda rwiyubaka, by'umwihariko mu bikorwa remezo, ubuhinzi, inzu ziciriritse, n'ubucuruzi bwambukiranya imipaka.

BRD yiyemeje kugira uruhare muri gahunda zigamije iterambere rirambye kandi ikomeje guhanga udushya mu bijyanye no gutanga ibisubizo by'imari bihura n'icyerekezo cy'u Rwanda 2050.