Webrwanda Backend

Blog

  • Barcelona yandagaje Real Valladolid, iyitsibura ibitego 7 – YEGOB #rwanda #RwOT

    Ikipe ya FC Barcelona yakomeje kwerekana ko iteye ubwoba muri La Liga uyu mwaka, nyuma yo kwandagaza Real Valladolid ibitego 7-0 mu mukino wabereye kuri Estadi Olímpic Lluís Companys kuri uyu wa Gatandatu. Uyu mukino wabaye uwa kane FC Barcelona itsinda muri iyi shampiyona y'uyu mwaka, bituma ikomeza kuyobora urutonde rwa shampiyona, aho ubu ifite amanota 12 mu mikino ine.

    Raphinha, rutahizamu w'umunya-Brazil, yigaragaje mu buryo bukomeye muri uyu mukino, atsinda ibitego bitatu (hat-trick) bwa mbere mu mateka ye ya ruhago. Uyu mukinnyi yafunguye amazamu ku munota wa 16, asubira mu kibuga mu gice cya kabiri aho yatsinze ibindi bitego bibiri, birimo n'igitego cya kane na cya gatanu cy'ikipe ye. Uyu mukino wabaye amahirwe kuri Raphinha wo kwerekana ko ashobora kuba umwe mu bakinnyi b'ingenzi muri Barcelona, nyuma yo guca mu bihe byari bitoroshye kuva yagera muri iyi kipe.

    Robert Lewandowski yongeye kubonera igitego FC Barcelona ku munota wa 20, nyuma y'iminota ine gusa Raphinha afunguye amazamu, naho Jules Koundé atsinda igitego cya gatatu mu minota y'inyongera y'igice cya mbere, cyinjijwe mu izamu rikomeye cyane ku munyezamu wa Valladolid.

    Muri iki gice cya kabiri, ikipe ya Real Valladolid yakomeje kugorwa cyane n'umukino w'ikipe ya Barcelona, aho Dani Olmo na Ferran Torres batsinze ibindi bitego byatumye umukino urangira ari ibitego 7-0. Muri uyu mukino, Lamine Yamal yongeye kugaragaza ubuhanga bwe mu gusatira izamu, atanga imipira ibiri yavuyemo ibitego, mu gihe yakiniraga imbere hamwe na Lewandowski na Raphinha.

    Muri rusange, iyi ntsinzi ya FC Barcelona yatumye abakunzi b'iyi kipe bongera kwizera ko bafite ikipe ishobora kongera kuba ku rwego rwo hejuru mu Burayi. Ibi bishingirwa ku buryo bwimbitse bwo gukina ndetse no gutambutsa imipira byagaragajwe n'iyi kipe mu gice cy'ibanze cy'uyu mwaka wa shampiyona.

    Nyuma y'iyi ntsinzi, FC Barcelona izasura Girona mu mukino utaha nyuma y'akaruhuko k'imikino mpuzamahanga, mu gihe Real Valladolid izahura na Celta Vigo.

    Uburyo bw'imikinire: Trio y'ubusatirizi bwa Barcelona iteye ubwoba

    Nyuma y'uyu mukino, benshi baribaza niba ubusatirizi bwa FC Barcelona bwaba bugiye kuba bumwe mu buteye ubwoba kurusha ubundi ku mugabane w'u Burayi. Raphinha, Lewandowski na Yamal bose bagize uruhare mu gutsinda ibitego, aho Raphinha yatsinze bitatu, Lewandowski agatsinda kimwe, naho Yamal akagira uruhare mu gutanga imipira yavuyemo ibitego bibiri.

    Iyi trio y'abakinnyi ifite umuvuduko, imbaraga, n'ubuhanga, aho bigaragara ko izahanganira bimwe mu bikombe  bikomeye mu gihe kizaza, cyane cyane ko ifite Yamal ukiri muto ufite n'ingufu zo kwiruka, ndetse na Raphinha na Lewandowski bafite ubunararibonye mu kibuga.

    Umukinnyi w'umukino — Raphinha (FC Barcelona)

    Raphinha yakoze ibidasanzwe muri uyu mukino, atangiza uburyo bwo gutsinda ibitego, agatsinda ibitego bibiri byihuse mu gice cya kabiri, bituma yuzuza hat-trick ye ya mbere. Uyu wahoze ari rutahizamu wa Leeds United kandi yatanze umupira wavuyemo igitego cya karindwi, muri uyu mukino ugaragaza ubuhanga buhanitse. Abakinnyi b'inyuma ba Valladolid ntibashoboye guhangana na Raphinha kubera umuvuduko we, ubuhanga n'ubushishozi mu kibuga.

    Source : https://yegob.rw/barcelona-yandagaje-real-valladolid-iyitsibura-ibitego-7/

  • Nico Williams yaciye impaka ku hazaza he – YEGOB #rwanda #RwOT

    Nico Williams, rutahizamu w'ikipe ya Athletic Club Bilbao, yagize byinshi avuga ku hazaza he mu kiganiro aheruka kugirana na DAZN. Mu magambo ye, Nico yagaragaje ko yifuza kuguma muri Athletic Club, ariko kandi akagaragaza ko adashobora guhakana ibyerekeye amakipe akomeye amwifuza. Yagize ati: 'N'umutima wanjye uba muri Bilbao, ariko ntawe umenya ibizaba mu minsi iri imbere.'

    Nico yongeraho ko kuba amakipe akomeye amwifuza ari ikintu kiza, ariko ko icy'ingenzi kuri we ari ugukomeza gukinira Athletic, cyane cyane muri iki gihe bifuza gutanga umusaruro muri shampiyona no mu marushanwa yo ku mugabane w'u Burayi. Yavuze kandi ko ibirebana n'amasezerano ye bishobora gutunganywa n'umuhagarariye, ariko ko we ubwite yifuza gukomeza gukinira ikipe ye muri iyi shampiyona y'u Burayi.

    Ibi byatumye benshi bibaza ku hazaza ha Nico muri Athletic Club, kuko hari amakuru avuga ko ashobora kuba akinirwaga n'andi makipe akomeye, cyane cyane FC Barcelona. Ariko kandi, Nico yagaragaje ko agikomeje ku ntego ye yo kwitangira Athletic Club, ikipe yakuze akunda.

     

    Source : https://yegob.rw/nico-williams-yaciye-impaka-hazaza-he/

  • Rwamagana: Ibyihariye ku miyoborere mishya y'Amasite igaragara mu Mudugudu w'Akinteko – #rwanda #RwOT

    Amasite ni agashya abaturage bo muri uyu Mudugudu bishyiriyeho kugira ngo bibafashe mu kwikemurira ibibazo batarindiriye kubigeza ku muyobozi w'Umudugudu.

    Umuyobozi wa Site n'umwungiriza we baba bayobora Amasibo atanu aho Isibo imwe bayihaye ingo icumi. Umuyobozi w'Isibo atanga raporo ku muyobozi wa Site na we agatanga raporo ku muyobozi w'Umudugudu.

    Uyu Mudugudu ugizwe n'ingo zirenga 300 ubarizwamo abayobozi b'Amasite batandatu n'abungiriza babo bagira uruhare mu kumenya ibibazo by'ingo 50 ziba ziri muri buri site. Abaturage babita Abayobozi b'Umudugudu bungirije.

    Habumugisha Isaie uyobora Site ya Manene, yavuze ko afite Amasibo atanu, buri mugoroba ngo ahabwa raporo n'Umuyobozi w'Isibo ku kuntu mu Isibo ye umutekano wiriwe n'ibibazo byahagaragaye. Ibibazo ngo akunze gukemura ni ibijyanye n'amakimbirane hagati y'abashakanye kuko ibindi by'ubujura usanga Mutwarasibo yabikemuye.

    Ati 'Iyo hari ikibazo kitunaniye cyangwa tubona kigoranye dukora raporo tukakigeza ku muyobozi w'Umudugudu hanyuma tukajyayo na ba bantu tukagishakira igisubizo. Ibi byatumye nta bibazo byinshi bigaragara mu Mudugudu wacu, yewe no mu Kagari ntabwo bajya bakira ibibazo byacu byinshi kuko ibyinshi turabyikemurira.'

    Umuyobozi w'Umudugudu w'Akinteko, Twagirayezu Daniel, yavuze ko Umudugudu we ubarizwamo ingo 312 ku buryo gushyiraho Site byamufashije kumenya amakuru ya buri rugo umunsi ku munsi.

    Ati 'Amasite twashyizeho yadufashije cyane mu kumenya amakuru y'abaturage. Ubuyobozi bw'Isibo ni sawa ariko nkanjye gufata Amasibo atanu nkayahuza nkashyiraho umukuru wa Site uhagarariye ingo 50 ni byiza cyane kuko wa muyobozi w'Isibo atanga raporo ku muyobozi wa Site bigatuma twese dufatanyiriza hamwe.'

    Twagirayezu yavuze ko kandi iyi miyoborere yatumye abaturage bose bashyira hamwe biyubakira ibiro by'Umudugudu bya mbere, Akarere kabaha kanashyiramo Ivuriro ry'Ibanze. Kuri ubu banubatse ibindi biro by'Umudugudu bishya inzu yari isanzwe bayirekera Ivuriro ry'Ibanze kugira ngo rikoreremo ryisanzuye.

    Umuyobozi w'Akarere ka Rwamagana, Mbonyumuvunyi Radjab, yavuze ko buri muyobozi wese afite umwanya wo guhitamo ikimufasha gusubiza ibibazo by'abaturage. Yavuze ko nkuko mu Mudugudu w'Akinteko bahisemo gucamo Amasite n'abandi bayobozi bemerewe kubikora bagakoresha abaturage b'inyangamugayo.

    Ati 'Icyangombwa ni uko uburyo bwose washyiraho abaturage ari bo babuhitamo kuko nibo biba bigiye gufasha. Iki ni igitekerezo cyiza twanashishikariza n'abandi kubikora aho kugira ngo Umukuru w'Umudugudu ayobore Umudugudu munini wenyine yanagira abamwungirije bamufasha.'

    Yavuze ko hari n'indi midugudu yashyizeho imboni zo mu midugudu zireberera ingo eshatu bashinzwe kureba ibihakorerwa byose bagatanga raporo ku muyobozi w'Isibo cyangwa uw'Umudugudu.

    Kuri ubu abaturage bo mu Mudugudu w'Akinteko batangije konte y'Umudugudu imaze kugeraho ibihumbi 260 Frw, barifuza kandi kuzagira koperative y'Umudugudu wabo ikazajya ikora ibikorwa by'ubuhinzi n'ibindi byinshi bitandukanye.

    Umuyobozi w'Akarere ka Rwamagana afungura ibiro bishya by'Umudugudu

    Ibiro bishya by'umudugudu w'Akinteko

    Umuyobozi w'Umudugudu w'Akinteko, Twagirayezu Daniel yavuze ko uburyo bw'Amasite bwamufashije gukurikirana no gukemura ibibazo by'abaturage

    Source : http://igihe.com/amakuru/u-rwanda/article/rwamagana-ibyihariye-ku-miyoborere-mishya-y-amasite-igaragara-mu-mudugudu-w

  • APR FC yatsinze Marines Chidiebere Nwobodo yiyereka abafana #rwanda #RwOT

    APR FC yakinnye umukino wa gicuti na Marines FC iyitsinda 2-1 bya Tuyisenge Arsene na Victor Mbaoma.

    Ni umukino wabaye kuri uyu wa Gatandatu tariki ya 31 Kanama 2024 kuri Stade Ikirenga i Shyorongi.

    Umutoza wa APR FC yari yakinishije benshi mu bakinnyi batahabwaga amahirwe mu mikino yatambutse nka Chidiebere Nwobodo Johnson wakinaga umukino we wa mbere muri APR FC.

    Uyu mukinnyi wakinnye iminota yose 90, uretse umupira yatanze wavuyemo igitego, yanaremye uburyo butandukanye benshi bibaza impamvu ari wo mukino
    we wa mbere.

    APR FC yabonye igitego ku munota wa 13 cyatsinzwe na Tuyisenge Arsene ku mupira yari ahawe na Chidiebere Nwobodo Johnson.

    APR FC yaje kubona igitego cya kabiri cyatsinzwe na Victor Mbaoma ku munota wa 47 kuri penaliti ku ikosa ryari rikorewe Godwin Odibo.

    Marines FC yaje kubona igitego cy’impozamarira cyatsinzwe Mbonyumwami Taiba kuri penaliti ku ikosa yari akorewe na Taddeo Lwanga.

    Nwobodo (urimo hagati) yiyeretse abakunzi ba APR FC

    Source : http://isimbi.rw/siporo/article/apr-fc-yatsinze-marines-chidiebere-nwobodo-yiyereka-abafana

  • Arsenal FC iburiye amanota atatu imbere ya bafana bayo – YEGOB #rwanda #RwOT

    Mu mukino wa mbere w'umunsi wa gatatu wa shampiyona y'u Bwongereza, Arsenal yanganyije na Brighton ibitego 1-1 mu mukino wabereye kuri Emirates Stadium i Londres, mu Bwongereza.

    Arsenal yafunguye amazamu mu gice cya mbere, ubwo Kai Havertz yatsindaga igitego cya mbere, cyahaye icyizere abafana bayo bari bitabiriye uyu mukino. Nyamara, mu gice cya kabiri, Joao Pedro wa Brighton yaje kwishyura iki gitego, ashyira amakipe yombi ku rwego rumwe.

    Ibintu byarushijeho kugora Arsenal ubwo umukinnyi wayo w'imbere mu kibuga, Declan Rice, yahawe ikarita ya kabiri y'umuhondo bituma yerekwa ikarita itukura, bikayiviramo gukina ari abakinnyi icumi. Iyi karita itumye Rice azabura mu mukino ukomeye wa 'North London Derby' izahura na Tottenham Hotspur.

    Arsenal yarangije shampiyona y'umwaka ushize iri ku mwanya wa kabiri, inyuma ya Manchester City ho amanota abiri gusa. Uku kunganya ni igihombo kuri Arsenal, cyane cyane ko bateganya guhura na Tottenham Hotspur mu mukino uzaba ukomeye cyane mu cyumweru gitaha. Brighton na yo ikomeje kwerekana ko ari ikipe ikomeye muri iyi shampiyona nyuma yo gutsinda Manchester United 2-1 mu cyumweru gishize.

    Source : https://yegob.rw/arsenal-fc-iburiye-amanota-atatu-imbere-ya-bafana-bayo/

  • Gasabo: Polisi yameneye mu ruhame litiro 3500 z'inzoga zitujuje ubuziranenge – #rwanda #RwOT

    Abafashwe ni abagabo batatu n'umugore umwe, bafatiwe mu cyuho bazicururiza mu tubari duherereye mu Mudugudu wa Birembo, Akagari ka Ngara, mu Murenge wa Bumbogo, ahagana Saa Kumi n'Imwe za mu gitondo ku wa Kane tariki ya 29 Kanama 2024.

    Umuvugizi wa Polisi mu Mujyi wa Kigali, CIP Wellars Gahonzire, yavuze ko gufatwa kwabo byagizwemwo uruhare n'abaturage batanze amakuru.

    Ati 'Abaturage bahaye amakuru Polisi ikorera muri uriya murenge ko aba bantu uko ari bane bafite utubari bacururizamo inzoga bikorera zitujuje ubuziranenge. Habayeho kugenzura biza kugaragara ko amakuru yatanzwe ari impamo, mu bikorwa byateguwe bifatirwamo bane bari bafite bose hamwe litiro 3500, ndetse mu tubari tubiri muri two hafatirwa imashini zikinishwa urusimbi zizwi ku izina ry'Ibiryabarezi eshanu, abaje kuhanywera bakinaga rwihishwa mu masaha ya nijoro bwamara gucya bakabihisha.'

    CIP Gahonzire yavuze ko kenshi ahantu hacururizwa bene izo nzoga zitujuje ubuziranenge, hakunze kugaragara urugomo rurimo gukubita no gukomeretsanya ndetse rimwe na rimwe bikaba byabyara n'imfu.

    Ati 'Bitewe n'ingaruka tugenda tubona ziterwa n'izi nzoga, Polisi yakajije umukwabu wo gufata abazikora n'abazicuruza kugira ngo bahanwe banabere abandi akabarore.'

    Yaburiye buri wese uzi ko azikora cyangwa azicuruza n'uwateganyaga kubijyamo ko ashatse yabireka kuko igikorwa cyo kubafata gikomeje hirya no hino mu Mujyi wa Kigali ku bufatanye n'izindi nzego n'abaturage.'

    Yasabye abanywa izi nzoga kuzireka kuko zigira ingaruka ku buzima bwabo bitewe n'ibyo bazikoramo, asaba kandi abaturage kujya bihutira gutanga amakuru aho bazibonye ndetse ashimira ababigizemo uruhare rwatumye ziriya zifatwa zitaragurishwa.

    Iteka rya Minisiteri y'ubuzima riteganya urutonde n'ibyiciro by'ibiyobyabwenge rishyira ibinyobwa byose bicuruzwa bidafite icyangombwa cy'ubuziranenge mu cyiciro cy'ibiyobyabwenge byoroheje.

    Ingingo ya 263 mu itegeko riteganya ibyaha n'ibihano muri rusange, ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge aba akoze icyaha.

    Iyo abihamijwe n'urukiko ahanishwa igifungo kitari munsi y'imyaka 7 ariko kitarenze imyaka 10 n'ihazabu y'amafaranga y'u Rwanda atari munsi ya miliyoni 5 ariko atageze kuri miliyoni 10 ku byerekeye ibiyobyabwenge byoroheje.

    Mu Karere ka Gasabo Polisi yameneye mu ruhame litiro 3500 z'inzoga zitujuje ubuziranenge

    Source : http://igihe.com/amakuru/u-rwanda/article/gasabo-polisi-yameneye-mu-ruhame-litiro-3500-z-inzoga-zitujuje-ubuziranenge

  • MTN yatangije 'Recharge and Win', gahunda izatangirwamo ibihembo bya miliyoni zirenga 200 Frw – #rwanda #RwOT

    Kwitabira ubu bukangurambaga bisaba kugura ipaki yo guhamagara cyangwa iyo gukoresha kuri internet nk'uko bisanzwe, ubundi umuntu agahabwa ibihembo.

    Ibyo bisobanuye ko uko umuntu agura ama-unites inshuro nyinshi ari na ko ubikora azaba yongera amahirwe yo kwegukana ibihembo byinshi.

    Ibihembo biri mu buryo bubiri. Ubwa mbere bujyanye n'ibihembo by'amafaranga kuva ku bihumbi 10 Frw kugeza ku gihembo nyamukuru cya miliyoni 5 Frw kizahabwa abanyamahirwe babiri.

    Ikindi cyiciro kigizwe n'ibihembo bitari amafaranga bizahabwa abagize uruhare muri ubwo bukangurambaga birimo ingendo zo muri kajugujugu ku bufatanye na Akagera Aviation.

    Birimo kandi guhabwa za moto, amagare, ibikoresho bitanga umuriro uturuka ku mirasire y'Izuba, telefone zigezweho n'ibindi nk'ama-unites yo guhamaga n'ayo gukoresha kuri internet.

    Ni amahirwe MTN Rwanda yashyizeho hagamijwe gufasha Abaturarwanda gukomeza imirimo yabo no kuba hafi y'inshuti n'abavandimwe babo ariko bakanabihemberwa.

    Nta paki yihariye yashyizweho, ahubwo ni izisanzwe, uko ugura ama-unites uhita ujya mu irushanwa, ndetse bikareba abari mu bice byose by'u Rwanda.

    Umuyobozi ushinzwe Serivisi zihabwa Abakiliya n'ibijyanye n'ikoranabuhanga muri MTN Rwanda, Rosine Dusabe yavuze ko icyo gikorwa kigaragaza uburyo bahora batekerereza abakiliya babo ibibateza imbere.

    Yavuze ko iki kigo cy'itumanaho cyiyemeje guhuza abaliliya babo n'inshuti n'abavandimwe zabo, ariko ubikoze akanagira izindi nyungu abona zituruka muri ibyo bihembo.

    Ati 'Turakangurira abakiliya bacu bose gukomeza kugura ama-unites bakabona iminota yo guhamagara inshuti n'abavandimwe babo, bagura n'ama-unites yo kujya kuri internet. Uretse kuba hafi y'inshuti n'abavandimwe abakiliya bacu bazabona n'ibihembo bindi byiyongera.'

    MTN Rwanda kandi yatekereje no kubakira ubushobozi abayihagarariye mu bice bitandukanye by'igihugu (agents), aho na bo igiye kubashyiriraho ibihembo bya buri cyumweru.

    Umu-agent wese uzajya agurisha cyangwa akarenza ama-unites ya 3000 Frw azajya ashyirwa mu banyamahirwe bazajya batsindira ibihembo bitandukanye birimo guhabwa moto n'ibihumbi 100 Frw.

    MTN Rwanda izabashyira mu byiciro bijyanye n'intara bakoreramo, abatsinze bajye batoranywa buri cyumweru, hahembwe abanyamahirwe 10.

    Dusabe ati 'Aba-agent bacu ni inkingi ya mwamba mu iterambere ry'ikigo cyacu. Bagira uruhare rukomeye mu kugeza ku bakiliya serivisi zacu zose. Dushaka kububakira ubushobozi ariko tunabashimira iyo mirimo yo kuduhuza n'abakiliya bacu bakora.'

    MTN Rwanda ni kimwe mu bigo bikomeye ku isoko ry'u Rwanda mu bijyanye n'itumanaho na cyane ko imaze imyaka igera kuri 26 ikorera mu Rwanda.

    Ni nako abafarabuguzi bayo bakomeje kwiyongera kuko igihembwe cya mbere cy'uyu mwaka, cyarangiye ku wa 31 Werurwe 2024 cyasize ifite abafatabuguzi barenga miliyoni 7,4.

    MTN Rwanda yatangije gahunda ya ‘Recharge and Win’ yo kugura ama-unites ugahabwa ibihembo bitandukanye

    Aba-agent ba MTN Rwanda na bo baributswe, uzajya acuruza ama-unites angana/arenga 3000 Frw azajya ahembwa ibirimo moto, ibihumbi 100 Frw n’ibindi

    Source : http://igihe.com/amakuru/u-rwanda/article/mtn-yatangije-recharge-and-win-gahunda-izatangirwamo-ibihembo-bya-miliyoni

  • Intumwa za RDC zashinje Senateri Uwizeyimana kwambara Costume yaguzwe mu mabuye yibwe – #rwanda #RwOT

    Ni inama yabaye ku wa 26 na 27 Kanama. Usomye imyanzuro y'inama, nta na hamwe harimo izina ry'u Rwanda, gusa ku munsi wayo wa mbere, rwagarutsweho cyane kubera Intumwa za Repubulika Iharanira Demokarasi ya Congo, zongeye gukoresha umwanya zari zihawe, mu kugaragaza ko ibibazo igihugu cyabo gifite biterwa n'u Rwanda.

    Raporo ku mutekano yamuritswe igaragaza ko Uburasirazuba bwa Congo ari agace kadatekanye, kandi ko iki gihugu kibarizwamo imitwe yitwaje intwaro irenga 120 igira uruhare mu gukongeza amakimbirane n'imvururu mu karere.

    Ivuga uko ibintu byari byifashe hagati ya Mutarama na Kamena 2024, ko Ingabo za RDC zaburijemo ihirikwa ry'ubutegetsi bwa Tshisekedi muri Gicurasi 2024 kandi ko ari amakuru yatanzwe n'inzego nkuru z'iki gihugu.

    Abantu bitwaje intwaro bateye ingo z'abayobozi bakuru mu gihugu ndetse raporo ivuga ko bafashe igice gito cy'Ibiro by'Umukuru w'Igihugu mu Murwa Mukuru, Kinshasa. Muri ibyo bikorwa, ngo abantu batatu barishwe, abandi 50 barafungwa.

    Abagize iri huriro bavuze ko ku wa 3 Nzeri 2023, Guverinoma ya RDC yaciye iteka rigamije guhuriza hamwe abarwanyi batandukanye muri FARDC, kugira ngo barwanye umutwe wa M23.

    Raporo ivuga ko mu bagiye muri iryo huriro, harimo n'Ingabo z'u Burundi ndetse n'abarwanyi b'umutwe wa FDLR wagize uruhare muri Jenoside yakorewe Abatutsi. Ivuga ko umutwe wa Wazalendo watumye ibintu bidogera mu Burasirazuba bwa Congo.

    Ibiganiro byahinduye isura, RDC ishinja u Rwanda

    Umwe mu Badepite bari bahagarariye RDC mu nama, Boniface Kabanda Matanda, yavuze ko ikibazo cy'amakimbirane muri RDC giterwa n'u Rwanda, ko gukomeza gushakira igisubizo i Luanda na Angola ari uguta umwanya.

    Abari mu nama, by'umwihariko Intumwa z'u Rwanda, bavuze ko kuba RDC ibona ko nta gisubizo kizava mu biganiro bya Luanda na Nairobi, bigaragaza ko nta bushake iki gihugu kiri gushyira mu gushaka umuti.

    Amashusho yashyizwe hanze na Televiziyo ya NTV yo muri Uganda, agaragaza Matanda agira ati 'Amakimbirane yo muri RDC areba ibihugu bibiri aho kimwe ari igishotoranyi, ari cyo u Rwanda.'

    Anagaragaza Senateri Uwizeyimana atishimiye ibyo Intumwa za RDC zari ziri kuvuga, kugeza n'aho asaba Perezida wayo guhagarika izo mvugo zidafite ishingiro.

    Muri iyi nama, byasaga n'aho ibihugu byinshi byayitabiriye, byumva neza umuzi w'ikibazo cyo mu Burasirazuba bwa RDC cyane ko hari Delegasiyo y'Inteko zo muri ICGLR yari iherutse gukorera urugendo mu Burasirazuba bwa Congo, igasura inkambi ku buryo yari ifite amakuru ya nyayo.

    Intumwa ya RDC yageze n'aho ivuga ko ibyo Monusco yatangaje ko M23 ifite intwaro nyinshi atari byo. Umwe mu bari bitabiriye, yasubije ko izo ntwaro zigurwa na Leta ya Congo, ikaziha imitwe yitwaje intwaro, M23 ikaziyambura.

    Depite Kabanda yabwiye Senateri Uwizeyimana ko ikote yambaye ryaguzwe mu mabuye y'agaciro yibwe muri Congo

    Impaka mu cyumba cy'inama zarakomeje, bigera n'aho Depite Kabanda wari uhagarariye Inteko ya RDC, azamura ibirego bisanzwe by'uko ngo u Rwanda rwiba amabuye muri Repubulika Iharanira Demokarasi ya Congo.

    Bivugwa ko yageze n'aho arengera, abwira Senateri Uwizeyimana Evode ko n'ikote yambaye, agomba kurisubiza kuko ngo ryaguzwe mu mafaranga yavuye mu mabuye y'agaciro yibwe muri Congo.

    Nyuma y'ayo magambo, Senateri Uwizeyimana yahise asaba ijambo avuga ko delegasiyo ya Congo itangiye gutandukira, asaba uyoboye inama guhagarika impaka zidafite umumaro no gukoresha imvugo zidakwiriye ku muntu uhagarariye igihugu mu nama.

    Delegasiyo ya RDC yari igizwe n'abantu barenga batanu.

    Ihuriro ry'Abadepite bo mu bihugu byo muri ICGLR ryitabirwa n'abo mu bihugu 12 binyamuryango. Ibyo ni Angola, u Burundi, Repubulika ya Centrafrique, Repubulika ya Congo, RDC, Kenya, Uganda, Sudani y'Epfo, Sudani, Tanzania, Zambia n'u Rwanda.

    Mu bindi byavugiwe muri iyo nama, harimo nk'aho Intumwa za RDC zavuze ko Gen Makenga uyobora umutwe wa M23 atari Umunye-Congo, ko ari Umunyarwanda, gusa ngo abari bitabiriye bamubaza uko yageze mu Ngabo za FARDC.

    Zavuze kandi ko nta muntu n'umwe wo muri M23 w'Umunye-Congo abari bitabiriye basubiza ko kugira ngo ibyo bishoboke, byasaba ko imyanzuro y'Inama y'i Berlin yaciye imipaka yaseswa.

    Byageze n'aho uwari uyoboye inama atangira kwima ijambo Intumwa za RDC, avuga ko atari inama y'ibihugu bibiri.

    Senateri Uwizeyimana yabwiye abari mu nama, ko RDC ibona ikibazo ko ari M23 gusa yirengagiza indi mitwe irenga 240 yitwaje intwaro. Yatanze inama ko niba RDC iticaranye na M23 ngo ibibazo bikemuke, bijyanye n'umusanzu utangwa n'ibindi bihugu binyuze mu masezerano ya Luanda na Nairobi; amaherezo hazavuka na M24 cyangwa M25 kuko igisubizo cy'intambara cyashyizwe imbere kidashoboka.

    Yavuze ko atumva ukuntu intumwa za Leta ya RDC zivuga ko ibiganiro bya Luanda na Nairobi bitazatanga umusaruro, kandi iki gihugu kikibyitabira. Kuri we, ngo ni ukutagira ubushake mu gukemura ikibazo.

    Mu yandi magambo adafite gihamya yavuzwe n'Intumwa za RDC harimo ko ngo Inteko Ishinga Amategeko y'u Rwanda iherutse gutora umwanzuro wemerera Perezida Kagame gushoza intambara kuri RDC; ibintu byamaganiwe kure n'abari mu cyumba.

    Boniface Kabanda Matanda ni umwe mu badepite bari bahagarariye RDC mu nama y’abagize Inteko zishinga Amategeko zo muri ICGLR

    Source : http://igihe.com/amakuru/u-rwanda/article/intumwa-za-rdc-zashinje-senateri-uwizeyimana-evode-kwambara-costume-yaguzwe-mu

  • Nifuzaga kwifotozanya nawe none twakoranye in… – #rwanda #RwOT

    Iyi ndirimbo yise 'Niko biri' yanaririmbyemo Hervis Beatz usanzwe ari Producer. Papa Cyangwe avuga ko ayimaranye igihe kinini muri studio, ariko ko bitewe n'uko aba afite imishinga myinshi muri studio iyi ndirimbo yatinze gusohoka.

    Yabwiye InyaRwanda ko iyi ndirimbo yatangiye gukorwa mu mwaka wa 2023, kandi ko bitewe n'uko Elvis ari we wakoze amajwi y'iyi ndirimbo byarangiye nawe ayiririmbyemo.

    Hervis Beatz niwe waririmbye inkikirizo (Chorus) y'indirimbo 'Ibaze mpfuye', 'Tujye gusenga' n'izindi. Papa Cyangwe ati 'Naramubwiye ashyiramo 'Chorus' birangira ari umushinga wanjye nawe, ariko ubwo nashyiragamo igitero cyanjye, numvise ko haburamo igitero cy'undi muntu, ntekereje neza nsanga hari umuraperi tutarakorana ariwe Riderman.'

    Akomeza ati 'Numvise rero n'ubutumwa bwarimo, nasanze Riderman ariwe wakwisangamo cyane. Icyo gihe nahise mbwira Producer Hervis Beatz ampa umushinga w'iriya ndirimbo nyoherereza Riderman kugirango numve niba hari icyo yadufasha.'

    Papa Cyangwe yavuze ko byafashe umunsi umwe kugirango Riderman aririmbe muri iyi ndirimbo, kandi ntibari bahuye mbere yahoo. Ati 'Niwe muntu wantunguye mu mikoranire. Ibaze koherereza indirimbo umuntu ku mugoroba, ku munsi ukurikiyeho akakoherereza amajwi yamaze gukora indirimbo yose. Ni wo mushinga wantunguye, n'iyo ndirimbo nakozeho mu buryo bwihuse kandi vuba.'

    Uyu muraperi avuga ko iyi ndirimbo 'ari imwe mu zifite icyo zisobanuye kuri njye'. Kandi avuga ko hari byinshi yigiye kuri Riderman 'nk'uburyo akunda akazi ke n'ukuntu aca bugufi'.   

    Ati 'Ni umuraperi ugira gahunda, haba mu buryo bwo gukora 'Audio' ndetse no ku munsi wo gufata amashusho 'Video' yahagereye igihe. Ni umuntu ujya mu kintu ukabona yabigize ibye. Ni imwe mu ndirimbo ifite ikintu kinini ivuze kuri njye.'

    Papa Cyangwe yavuze ko yakuze akunda Riderman mu buryo bukomeye, kandi yahoraga yifuza kuzatunga ifoto bari kumwe 'none birenze ifoto dukoranye indirimbo'.

    Ati 'Navuga ko ari zimwe mu nzozi ziri kuba impamo zanjye. Namwigiyeho byinshi cyane, ikindi namwigiyeho guca bugufi cyane. Ndamushimira cyane, ko yanshyigikiye cyane, ku buryo bigoye kubona uko namushimira. Ni umuntu mwiza bitandukanye n'uko ubitekereza, Imana ijye imuha umugisha.' 

    Umuraperi Papa Cyangwe yatangaje ko agiye gusohora indirimbo 'Niko biri' yahuriyemo Riderman na Hervis

    Papa Cyangwe yavuze ko iyi ndirimbo yatangiye ayikorana na Hervis gusa

    Papa Cyangwe yavuze ko yakuze yifuza gufata ifoto ari kumwe na Riderman, none byageze ku gukorana indirimbo

    Papa Cyangwe yavuze ko iyi ndirimbo ayitezeho guhindura amateka ye mu muziki

    Papa Cyangwe yaherukaga gusohora indirimbo yahurijemo abagize itsinda rya Tuff Gang 

    KANDA HANO UBASHE KUMVA IKITANYISHE YA PAPA CYANGWE

    “>

    Source : https://inyarwanda.com/inkuru/146430/nifuzaga-kwifotozanya-nawe-none-twakoranye-indirimbo-papa-cyangwe-yarotoye-inzozi-kuri-rid-146430.html

  • Byagenze bite ngo Mangwende akurwe ku rutonde rw’Amavubi agasimbuzwa Ishimwe Christian? #rwanda #RwOT

    Umutoza w’ikipe y’igihugu Amavubi, Frank Spittler yashyize hanze urutonde rw’abakinnyi azifashisha ku mikino ya Libya na Nigeria batarimo Imanishimwe Emmanuel Mangwende wari wahamagawe.

    U Rwanda ruzakina na Libya muri Libya tariki ya 4 Nzeri 2024 na Nigeria i Kigali tariki ya 10 Nzeri 2024 mu gushaka itike y’igikombe cy’Afurika cya 2025 kizabera muri Maroc.

    Uyu munsi nibwo yerekeza muri Libya aho umutoza yamaze gushyira hanze abakinnyi 25 azifashisha muri iyi mikino yombi, ni mu gihe yari yarahamagaye 36.

    Mu bakinnyi basigaye harimo na Niyonzima Olivier Seif wa Rayon Sports utagize amahirwe yo kwisanga ku rutonde rwa nyuma.

    Undi mukinnyi ni Imanishimwe Emmanuel Mangwende ukirimo gushaka ibyangombwa bimwemerera gukinira no gukorera muri Cyprus mu ikipe ye nshya ya AEL Limassol.

    Yahise asimbuzwa Ishimwe Christian wa Zemamra Renaissance yo muri Maroc, ntabwo yari yahamagawe.

    Abakinnyi bazakina na Libya na Nigeria

    Source : http://isimbi.rw/siporo/article/byagenze-bite-ngo-mangwende-akurwe-ku-rutonde-rw-amavubi-agasimbuzwa-ishimwe-christian