Blog

Iki kiganiro cyabereye muri Indonesia mu gitondo cyo kuri uyu wa 2 Nzeri 2024 cyayobowe na Perezida Widodo.

Ibiro by'Umukuru w'Igihugu, Village Urugwiro, byatangaje ko 'Muri iki gitondo i Bali, Perezida Kagame yahuye n'abandi bakuru b'ibihugu na za guverinoma mu kiganiro cy'ubufatanye bw'abafatanyabikorwa benshi, IAF2024, kiyobowe na Perezida Joko Widodo.'

Ibiro by'Umukuru w'Igihugu kuri uyu wa 1 Nzeri 2024 byatangaje ko Perezida Kagame yageze muri Indonesia, kugira ngo yitabire iyi nama. Ni inama yahuriyemo n'abandi bakuru b'ibihugu byo muri Afurika barimo Umwami Mswati III wa Eswatini, Nana Akufo-Addo wa Ghana na Emmerson Mnangagwa wa Zimbabwe.

Umukuru w'Igihugu yaherekejwe n'abayobozi barimo Minisitiri w'Ubucuruzi n'Inganda, Prudence Sebahizi n'Umuyobozi Mukuru w'Urwego rw'Igihugu rushinzwe iterambere, Francis Gatare.

Guverinoma ya Indonesia igaragaza ko muri iyi nama, abakuru b'ibihugu baganira ku buryo bwo kubyaza umusaruro amahirwe aboneka muri iki gihugu na Afurika, cyane ko hari byinshi impande zombi zihuriyeho.

Mu gushimangira ubu bufatanye, biteganyijwe ko Guverinoma ya Indonesia igirana n'ibihugu bya Afurika amasezerano afite agaciro ka miliyari 3,5 z'amadolari ya Amerika. Ni amafaranga azifashishwa mu guteza imbere inzego zirimo ubucuruzi ndetse n'ubuzima.

Ku bucuruzi, Perezida Widodo kuri uyu wa 2 Nzeri yabwiye abakuru b'ibihugu bagenzi be ati 'Ubufatanye buri hagati ya Indonesia na Afurika bwongereye igipimo cy'ubucuruzi mu buryo bufatika ndetse n'amasezerano mu bucuruzi.'

U Rwanda rufitanye na Indonesia amasezerano y'ubufatanye yo gusangizanya ubunararibonye mu bya politiki no gukuraho visa ku badipolomare na pasiporo z'akazi, yashyizweho umukono muri Kamena 2024.

Perezida Kagame yitabiriye inama y’ubufatanye ya Indonesia na Afurika

Inama yahuje Perezida Widodo n’abakuru b’ibihugu byo muri Afurika

Mugisha Bonheur Casemiro na Ishimwe Anicet bombi banyuze mu ikipe ya APR FC, babonye amakipe mashya mu cyiciro cya mbere muri Tunisia.

Bonheur yari asoje amasezerano ye muri Al Marsa yo muri Tunisia akaba ariko yari yahisemo kudamomezanya na yo.

Mbere yo guhagurukana mu Rwanda n’ikipe y’igihugu yerekeza muri Libya, yari yavuze ko mu minsi ya vuba abantu bazamenya aho azerekeza.

Amakuru avuga ko abifashijwemo na Ben Moussa wahoze atoza APR FC, yamaze kurangizanya na Stade Tunisien ikina mu cyiciro cya mbere muri Tunisia.

Si we wenyine kuko amakuru avuga ko uyu mutoza yanaboneye ikipe Ishimwe Anicet ya Olympique Beja na yo ikina mu cyiciro cya mbere muri Tunisia.

Mugisha Bonheur Casemiro yerekeje muri Stade Tunisien

Ishimwe Anicet yerekeje muri Olympique Beja

Umutoza w’ikipe y’igihugu Amavubi, Frank Spittler yavuze ko Kigali – Tripoli, ari urugendo rwabagoye cyane aho bamaze isaha irenga ku kibuga cy’indege bangiwe gusohoka.

Ku wa Gatandatu w’icyumweru gishize tariki ya 31 Kanama 2024, Amavubi yahagurutse mu Rwanda yerekeza muri Libya aho afite umukino n’iki gihugu ku wa Gatatu mu gushaka itike y’igikombe cy’Afurika cya 2025.

Amavubi akaba yaragezeyo ejo hashize ku Cyumweru ndetse anakora imyitozo ya mbere, ni imyitozo yakoreye ku kibuga cya Alnhar.

Umutoza w’ikipe y’igihugu, Frank Spittler yavuze ko rwari urugendo rugoye aho bamaze amasaha 24 ntakuryama, baza no kwangirwa gusohoka ku kibuga cy’indege cya Tripoli International Airport.

Ati “Amasaha 24 nta kuryama, isaha ku kibuga cy’indege batwangiye gusohoka, mu by’ukuri ni ibihe bigoye cyane kuri buri umwe ariko tugomba guhangana na byo, twakoze imyitozo yorohereje uyu munsi.”

Yunzemo ati “Muri rusange ntabwo ibintu bimeze neza ariko twari tunabizi kuva mbere nta kibazo.”

Ibi byose byatewe n’uko batashakaga ko GPS z’abakinnyi, camera z’abanyamakuru zinjira mu gihugu cya bo.

Ibi byaje kwiyongeraho ko umukufi umuntu ufata amashusho (videographer) w’ikipe y’igihugu, Muhire Eric yari yambaye wari uriho umusaraba, na we bamusaba kuwukuramo kuko ari mu gihugu cy’abayisilamu.

Amavubi arakora imyitozo uyu munsi n’ejo ni mu gihe umukino ari ku wa Gatatu. Nyuma y’umukino azahita agaruka mu Rwanda kwitegura umukino wa Nigeria uzaba tariki ya 10 Kanama 2024 kuri Stade Amahoro.

Amavubi ntiyorohewe n’urugendo rwa Kigali – Tripoli

Umutoza yavuze ko rwari urugendo rubagoye cyane

Inyigisho z'iyobokamana n'amadini anyuranye zinjiye mu Rwanda mu gihe kimwe n'ubukoloni mu 1900, amadini akagira imikoranire ya hafi n'abayobozi b'abakoloni.

Ubukirisitu bwahise bukwira mu Banyarwanda ku buryo bwihuse kuko yaba Kiliziya Gatolika n'andi madini, yabaga afite ibishya aha abaturage birimo imyambaro, amashuri n'ubuvuzi.

Gusa n'ubu muri Gereza zo mu Rwanda hafungiye abakoze Jenoside yakorewe Abatutsi bahoze cyangwa bakiri mu madini atandukanye yakoreraga mu Rwanda mu 1994.

Minisitiri Dr. Jean Damascène Bizimana ubwo yari mu kiganiro Urubuga rw'Itangazamakuru kuri uyu wa 1 Nzeri 2024, yagaragaje ko ubwicanyi bwose bwabayeho mu Rwanda bwabaga bufitanye isano n'iminsi mikuru ya Kiliziya Gatolika, ndetse bukagirwamo uruhare n'abayoboke b'amadini atandukanye.

Ati 'Nta bwicanyi na bumwe bwabaye mu Rwanda budafite abanyamadini baburi inyuma banabuteye, duhereye mu 1959 n'imyaka yose. Ibyo rero bigomba gutuma twisuzuma n'uyobotse idini akabanza akavuga ati iri dini ngomba kurifasha no gukosora amateka ryateye'

Minisitiri Dr Bizimana yavuze ko mu 1959, Abatutsi batangiye kwicwa ku munsi mukuru w'Abatagatifu bose, 'ubwo ntangiye mbereka ko n'ubwicanyi bwagiye bunahuzwa n'iminsi mikuru ya Kiliziya.'

Yanavuze ko mu 1963 ubwicanyi bwabaye ari kuri Noheli.

Ati 'Tuvuge nk'i Mururu, ubu ni mu karere ka Rusizi abakirisitu bari mu misa abicanyi babategereje hanze n'imihoro, bavuye mu misa babatwara bajya kubica. Abakirisitu bica abandi. Muri Jenoside yakorewe Abatutsi mu 1994, byatangiye mu cyumweru cya Pasika, (Icyumweru Gitagatifu). Nta kuntu rero umunyedini uwo ari we wese yakwirengagiza ayo mateka.'

'Hari ikintu bita gutekereza, gushungura, kwitegereza. Abayoboke rero, rwose gusenga ni uburenganzira bwemewe n'Itegeko Nshinga ariko umuyoboke wese agomba gusobanukirwa ayo mateka, akayareba akanayigiraho akayavanamo amasomo.'

Yanagaragaje ko hari amadini amwe yashinzwe n'abantu usanga bafite amadosiye y'ibyaha bya Jenoside bakurikiranyweho, abandi bafite inyigisho zuzuye urwango n'amacakubiri bityo ko badakwiye kujya kugira insengero cyangwa ngo bigishe Ijambo ry'Imana no ku mbuga nkoranyambaga.

Ati 'Dufite abantu b'ababwirizabutumwa n'abihayimana bigisha irondabwoko ku buryo bugaragara, bigisha urwango, ivangura.'

Yatanze urugero kuri Padiri Fortunatus Rudakemwa uba muri Canada wigishiriza kuri YouTube 'yigisha ibyo yita amateka atagoretse ariko ni Parmehutu ya yindi yuzuye inarusha abaparmehutu ubwabo. Arwanya ubumwe bw'Abanyarwanda, arwanya ubwiyunge umuntu nk'uwo kandi akabikora yambaye ya cravate y'umweru bambara.'

Ati 'Dufite n'abandi bihayimana bakoze Jenoside bagahungira mu mahanga bagashinga idini, ugasanga barashaka n'abayoboke mu Rwanda. Dufite idini ryitwa Philadelphia ryashinzwe n'umuntu wakoze Jenoside uba mu Bubiligi agashaka abayoboke aha no mu buryo butemewe ariko agakomeza no kuyobya abandi. Itegeko rya mbere ryo mu y'Imana ni ukubaha ubuzima bw'undi kuko Imana ni yo yaremye imuntu. Umuntu wishe nta kintu aba agifite aha abandi. Umuntu wakoze Jenoside ntacyo aba agifite rwose.'

Yavuze ko nubwo yaba ataratawe muri yombi 'twebwe ntibyatubuza kuvuga ngo uriya mubwirizabutumwa ntabwo ari intangarugero, afite ibyaha yakoze kandi biremereye atagomba gukomeza. Abo rero ntabwo dushobora kwemera ko Abanyarwanda n'abandi bose babakurikira.'

Gusa Minisitiri Dr Bizimana yahamije ko hari abakoze Jenoside babyicujije banabisabira imbabazi, ko bo byashoboka ko bagira inyigisho batanga.

Minisitiri Bizimana yasabye Abanyarwanda kujijuka no kumenya amateka y'amadini bayoboka, aho basanze yarakoze ibibi bakayafasha kubikosora.

Minisitiri Dr Bizimana yagaragaje ko nta bwicanyi babayeho mu Rwanda hatari abanyamadini babigizemo uruhare

Nyampinga w’u Rwanda wegukanye ikamba rya 2019, Iradukunda Elsa yongeye gushimangira urwo akunda umugabo we Prince Kid bamaze umwaka bakoze ubukwe nubwo kugeza uyu munsi batakibarizwa mu Rwanda.

Ni mu butumwa Miss Iradukunda yanyujije ku rukuta rwe rwa Instagram abwira umugabo we ko amukunda ubuziraherezo.

Ku wa 1 Nzeri 2023, ni bwo Miss Iradukunda Elsa na Prince Kid basezeranye imbere y’Imana bakanakira abari batumiwe mu bukwe bwa bo nyuma y’uko ku wa 31 Kanama 2023 Prince Kid yari yasabye anakwa Miss Elsa.

Kuri uyu wa 1 Nzeri 2024, mu kwizihiza isabukuru y’umwaka bakoze ubukwe, Miss Elsa yabwiye Prince Kid ko ari icyubahiro kuri we kuba amwita umugabo we ndetse amubwira ko amukunda cyane.

Ati “Umwaka umwe mbaye umugore wawe, umwaka umwe tubanye neza, umwaka umwe nkunzwe na we, bimpa icyubahiro kukwita umugabo wanjye, kuba ari wowe mbasha kubona buri gitondo uko mbyutse na buri joro, ndagukunda cyane kandi nkunda kumarana ubuzima ndi kumwe na we.”

Miss Elsa yasoje ubu butumwa asaba Imana kuba mu buzima bwa bo ndetse abwira Prince Kid ko amukunda urudashira

Ati “Imana ikomeze kuba mu buzima bwacu, rukundo n’ahazaza. Isabukuru nziza y’urushako, ngukunda ubuziraherezo, urudashira.”

Miss Iradukunda Elsa na Prince Kid ubu ntibakibarizwa mu Rwanda ndetse ntawe uzi aho baherereye kuko nyuma y’ukwezi kumwe gusa bakoze ubukwe, Urukiko Rukuru rwakatiye Ishimwe Dieudonné uzwi nka Prince Kid, igifungo cy’imyaka itanu rumuhamije ibyaha byo gukoresha undi imibonano mpuzabitsina ku gahato no gusaba cyangwa gukora ishimishamubiri rishingiye ku gitsina.

Kuva urukiko rwakatira Prince Kid ntiyongeye kugaragara mu Rwanda we n’umugore we Miss Iradukunda Elsa ndetse hari hashize amezi arenga 10 nta n’umwe ugira icyo atangaza ku mbuga nkoranyambaga zabo.

Miss Iradukunda Elsa yarase amashimwe Prince Kid bamaze umwaka barushinze

RUKUNDO Sulaiman / ISIMBI.RW

Yabigarutseho ku wa 31 Kanama 2024 ku Ngoro y'Umuryango FPR Inkotanyi mu Ntara y'Amajyepfo iherereye mu Karere ka Nyanza, mu Murenge wa Busasamana, mu busabane bw'abanyamuryango bahagarariye abandi mu Turere twose tugize Intara y'Amajyepfo, bishimira uko amatora yagenze.

Chairperson w'Umuryango FPR Inkotanyi mu Ntara y'Amajyepfo, Kayitesi Alice, yongeye kwibutsa abanyamuryango ko intego ya Perezida Paul Kagame bashyigikiye, ari ugushyira 'Umuturage ku isonga'; avuga ko nabo bakwiye kugera ikirenge mu cye.

Kayitesi yavuze ko abanyamuryango bari mu nshingano z'ubuyobozi ari bo biraro bihuza Perezida Kagame n'umuturage wo hasi, bityo ko bakwiye guhagarara neza bagabafasha mu rugendo rw'iterambere yabemereye.

Yongeye gutsindagira ko bakwiye kuva mu mvugo gusa n'impapuro ahubwo bakihatira gukora.

Ati 'Ndabibutsa ko mudakwiye kugira umuhigo musibiza none ngo reka mbanze nkore 'paper' nini hanyuma nzabishyire mu bikorwa ejo, ahubwo icyo dutekereje nimureke tugikore.''

Uwihoreye Marie Jeanne, umunyamuryango wa FPR Inkotanyi wo mu Karere ka Muhanga, yavuze ko bishimiye kuba abakandida bamamaje baratowe cyane bakegukana intsinzi, anongeraho ko binabaha inshingano ziremereye zo gufasha Perezida watowe gushyira mu bikorwa ibyo yemereye abaturage yiyamamaza.

Ati 'Muri iyi manda y'imyaka itanu iri imbere, twiteguye gutanga uruhare rwacu mu gutanga serivisi nziza kugira ngo umuturage na we aho ari abone ibimugenewe, yishimire kugira icyo ageza ku gihugu kuko ibyo azaba akeneye ku gihugu azaba yabibonye.''

Umunyamuryango wa FPR Inkotanyi mu Karere ka Kamonyi, Kayitana Emmanuel, yavuze ko biteguye gutanga umusanzu mu gukemura ibibazo by'abaturage.

Ati 'Dufite imishinga myinshi yo gukura abaturage mu bukene mu turere dutanu mu Majyepfo. Icyo ni igikorwa tugomba gufasha Nyakubahwa Perezida wa Repubulika kugira ngo abaturage bazamure imibereho bave mu buken.'

Muri ubu busabane kandi, abanyamuryango ba FPR Inkotanyi mu Ntara y'Amajyepfo banishimiye ibindi byagezweho birimo ingoro enye z'umuryango zuzuye hirya no hino mu turere zirimo iya Gisagara, Kamonyi, Huye ndetse n'iy'Intara y'Amajyepfo, bashima iterambere zazanye mu rwego rwo kurimbisha ibice zubatsemo ndetse no kuba zarakemuye ikibazo cy'ibikorwaremezo aho ziherereye.

Chairperson wa FPR Inkotanyi mu Majyepfo yasabye abanyamuryo kwishimira ibyagezweho ariko banibuka ko urugamba rwo guteza imbere igihugu rugikomeje

Abanyamuryango ba FPR Inkotanyi mu Ntara y’Amajyepfo ubwo bari bateze amatwi impanuro

Abanyamuryango ba FPR Inkotanyi mu nzego zose mu Majyepfo bishimiye ibyo bamaze kugeraho

Kayitana Emmanuel, umunyamuryango wa FPR Inkotanyi mu Karere ka Kamonyi,yavuze ko biteguye kunganira Perezida Kagame mu kugera ku muturage ufite ibibazo bakabikemura

Uwihoreye Marie Jeanne, umunyamuryango wa FPR Inkotanyi wo mu Karere ka Muhanga,yavuze ko bagiye kurushaho gukora cyane

Inyubako ya FPR Inkotanyi y’Intara y’Amajyepfo isangiye n’Akarere ka Nyanza nayo iherutse kuzura itwaye asaga miliyari 3 FRW

Abarwanya u Rwanda muri ibi bihe bifashisha ikoranabuhanga bakaruvugaho ibinyoma, abandi bagakwirakwiza ibitekerezo bibiba urwango n'ingengabitekerezo ya Jenoside.

Barimo abakiri mu mashyamba ya Repubulika Iharanira Demokarasi ya Congo bari mu mutwe w'iterabwoba wa FDLR, n'abandi bari mu mahanga bigisha inyigisho z'urwango, bakanarahira ko bazasubira mu Rwanda bagashyiraho ubutegetsi bw'Abahutu.

Ambasaderi Dr Charles Muligande ubwo yari mu kiganiro Dusangire Ijambo kuri uyu wa 1 Nzeri 2024, yagaragaje ko ari ngombwa ko abantu bahora biteguye guhangana n'abarwanya u Rwanda, hamwe n'ababashyigikiye.

Ati 'Ibyo ni ngombwa ko duhora twiteguye kubirwanya. Turamutse turangaye tukabyihorera baroga kuko ni uburozi baba barimo batanga mu gihugu. Bashobora kugenda baroga bake bake amaherezo ugasanga n'ibyo twagezeho nubwo bishikamye, bikomeye, turangaye ntihabura ababihungabanya.'

'Ni ngombwa rero ko duhora turi maso, ibyo bavuga babeshya tukabibeshyuza, aba bantu bigisha ingengabitekerezo ya Jenoside, abantu bahora bapfobya Jenoside yabaye, abantu bahora banenga ubutegetsi bwacu n'icyiza dukoze cyose bakakinenga bakavuga ngo buriya hari ikindi kibyihishe inyuma, bya bindi ubura icyo unenga inka ukayinenga igicebe cyayo.'

Amb Dr Muligande yagaragaje ko abaturage bose by'umwihariko urubyiruko, bakwiriye gusobanurirwa gahunda zitandukanye z'igihugu kugira ngo na bo bashobore kurwanya abashaka gutanya Abanyarwanda.

Ati 'Urubyiruko dufite ni ngombwa ko rusobanurirwa neza, rugasobanukirwa 'Ndi Umunyarwanda', rugasobanukirwa amateka y'u Rwanda, ibyo u Rwanda rukora, Politike z'u Rwanda ku buryo bo kubera batuye mu Isi y'ikoranabuhanga, ni bo bazarwana urwo rugamba, byaba ngombwa bakegera abasaza bakabaganiriza noneho bakabona amasasu yo gukoresha.'

Amb Dr Muligande avuga ko no mu nzego za dipolomasi harimo abantu baba bifatanyije n'abarwanya u Rwanda ku buryo abadipolomate b'u Rwanda bagomba guhora bari maso 'ntitujye tugubwa gitumo na za raporo zishobora kudusubiza inyuma.'

Amb Dr Charles Muligande yavuze ko abarwanya u Rwanda baba bavuga ibirimo uburozi bishobora kwangiza bitarwanyijwe