Blog

Umuvugizi w’Urwego rw’Igihugu rw’Ubugenzacyaha (RIB), Dr. Murangira Thierry, yatangaje ko umunyamakuru akaba n’umuhanzi Nyarwaya Innocent wamenyekanye nka Yago Pon Dat, yahunze mu gihe yakurikiranwagaho ibyaha biremereye.

Yago wari umaze iminsi ahanganye na bamwe mu bakoresha imbuga nkoranyambaga, aherutse gutangaza ko ahunze u Rwanda, asobanura ko yabitewe n’abashatse kumwica.

Yagize ati 'Rwanda nkunda, nguhunze ntakwanga ahubwo mpunze agatsiko k’abashatse kunyica mu myaka ine ishize, nkataka ariko ntawanyumvise n’umwe.'

Tariki ya 31 Kanama 2024, Yago yashyize ku muyoboro we wa YouTube videwo ndende itaravuzweho rumwe, yumvikanamo urutonde rw’abantu bafitanye amakimbirane, barimo abanyamakuru, abahanzi n’ibindi byamamare.

Mu kiganiro cyatambutse ku muyoboro wa Primo Media Rwanda, kuri uyu wa 3 Nzeri 2024, Dr. Murangira yatangaje ko ubwo Yago yahungaga, RIB yari yaratangiye kumukurikiranaho ibyaha biremereye birimo kubiba amacakubiri n’ivanguramoko.

Yagize ati 'Yago yarahamagawe, arabazwa, yongera gushyira videwo hanze, videwo yarimo amagambo wumva arimo amacakubiri, aganisha ku macakubiri n’ivangura, arabazwa, arakurikiranwa. Muri cya gihe rero ibimenyetso byegeranywaga, ni bwo twagiye kumva, twumva na we aravuze ngo yarahunze.'

Dr Murangira yakomeje ati 'Ahunze yari agikurikiranwa. Kuko abonye ko atangiye kubazwa ku byaha biremereye nka biriya by’ivangura, yahise agenda. Gusa ikigaragara ni uko aho ari ubona ko yagumye gukora ibindi biganiro na byo ubona biganisha ku byaha.'

Yago yavuze kenshi ko arwanywa n’agatsiko k’abantu barimo bagenzi be bahuje umwuga. Dr Murangira yasobanuye ko uyu munyamakuru na we afite akandi gatsiko yise 'Big Energy’.

Umuvugizi wa RIB yibukije abantu “nka Yago” bakorera ibyaha hanze ko ukuboko k’ubutabera ntaho kutagera, abagira inama yo gukorera mu nzira nziza aho guhindura imbuga nkoranyambaga umuyoboro wo kubika urwango n’amacakubiri.

RIB yari ikurikiranyeho Yago ibyaha bikomeye

Mu Ugushyingo 2017 ni bwo Umujyi wa Kigali watangaje ko ufite gahunda yo kuvugurura bigezweho Gare ya Nyabugogo.

Uyu mushinga wagombaga gushyirwa mu bikorwa na Sosiyete itwara abantu n'ibintu ya RFTC kuri miliyari 45 z'Amafaranga y'u Rwanda. Gusa nyuma Umujyi wa Kigali waje gutangaza ko uwo mushinga uzaterwa inkunga na Banki y'Isi.

Ubwo yari mu kiganiro n'abanyamakuru kuri uyu wa 3 Nzeri 2024, Meya Dusengiyumva yavuze ko Umujyi wa Kigali ushishikajwe no kuvugurura gare ya Nyabugogo ku buryo mu myaka itanu iri imbere izaba ikoreshwa ari ahantu hasa neza.

Ati 'Inyigo yo gukora Gare ya Nyabugogo irarangira muri uku kwezi kwa 10, turizera ko muri iyi myaka itanu izasiga iriya Nyabugogo yubatswe, ivuguruye ku buryo hazaba ari ahantu hazima abantu bashobora kuba bafatira imodoka zijya hirya no hino bikadufasha no kugenda tugabanya uburyo abantu bakoresha imodoka zabo.'

Meya Dusengiyumva yavuze ko mu mishinga bafite harimo no guteza imbere uburyo bwo gutwara abantu n'ibintu hakoreshejwe imodoka zikoresha amashanyarazi.

Ati 'Muri uyu mwaka tugiye kujyamo tuzashyira imbaraga cyane muri bisi zikoresha amashanyarazi harimo no gushyira ibikorwa remezo hirya no hino mu Mujyi ahantu hashobora gucaginga izo modoka'

'Twifuza kugeda tuvugurura uburyo twongera imodoka zitwara abantu mu buryo bwa rusange, dukoresha imodoka z'amashanyarazi ariko dushyiraho no kuba abantu babona aho bongereramo amashanyarazi, ikindi ni uko tuzareba uko twagira uburyo bwihariye bisi zanyuramo, hari gahunda tugiye gushyira mu bikorwa vuba aha yitwa 'dedicated bus line' ariko ntabwo ari yo yonyine kuko twifuza ko abantu bakoresha imodoka rusange bazajya bagira uburyo buboroheye bunoze butuma bazajya bagenda bihuta kurusha uko abandi bantu bagenda n'izindi modoka.'

Hazanubakwa imihanda ireshya na kilometero 100 ndetse hanozwe amasangano y'imihanda ku buryo ibikorwa byo gutwara abantu n'ibintu birushaho kugenda neza.

Amasangano y'imihanda azanozwa ni agaragaramo umuvundo mwinshi w'ibinyabiziga.

Utumodoka two mu kirere

Mu 2021 abashoramari b'Abafaransa bageze mu Rwanda bagirana ibiganiro n'inzego zitandukanye ku mushinga wo gushyira utumodoka dutwarwa n'imigozi yo mu kirere twari twitezweho kuvana abantu mu gace kamwe tubajyana mu kandi bikoroshya ingendo.

Uyu mushinga wamaze igihe usa n'uwasinziriye kuko nta cyigeze kiwukorwamo mu myaka yashize ariko Meya Dusengiyummva yahamije ko ubu bagiye kuwubyutsa.

Ati 'Hari umushinga umaze igihe ariko ariko inyigo yawo yarangiye wo gushyiraho imodoka bita 'cable cars' izo ni imodoka zigenda ku mugozi na zo zizadufasha kugenda tugabanya uburyo abantu bakoresha imodoka zo ku butaka zinakenera gukoresha ibijyanye na lisansi.'

Gare ya Nyabugogo yafunguwe mu 1998 ntikijyanye n’igihe u Rwanda rugezemo

Ubushakashatsi bwashyizwe ahagaragara mu mpera z’ukwezi gushize n’ikigo cya Politiki gishinzwe ingufu muri kaminuza ya Chicago (EPIC) muri Amerika, kivuga ko kwiyongera kwangiza ikirere bigabanya imyaka yo kubaho igihe cyo kubaho. 

Ubushakashatsi bw'ubuzima bwiza bw'ikirere (AQLI) bwakorewe mu Buhinde, aho PM2.5 (ibintu bito bifite micrometero 2,5 cyangwa munsi ya diameter) ari 40 µg / m³ ugereranyije buri mwaka, byavumbuye ko 40% by'abaturage baho bahumeka umwuka wanduye.

Ishami ry’Umuryango w’Abibumbye ryita ku Buzima (OMS) ryerekana impuzandengo ya 5 µg / m³ buri mwaka nk’ibisanzwe.

Raporo yerekanye ko kugabanya umubare wa PM2.5 kugira ngo wuzuze umurongo ngenderwaho wa OMS bishobora kongera igihe cyo kubaho cy'abatuye mu Buhinde imyaka hafi ibiri.

Umujyi wanduye cyane mu Buhinde ni Dehli, ufite impuzandengo ya PM2.5 ya 84.3 µg / m³, nk’uko raporo ya AQLI yabitangaje mu 2022.

Nk'uko iyi raporo ibigaragaza, Dehli iramutse yujuje amabwiriza ya OMS, icyizere cy’ubuzima bw’abaturage bayo miliyoni 18.7 gishobora kwiyongera mu myaka hafi umunani.

Byongeye kandi, raporo yerekanye ko guhura n'igihe kirekire cyanduye bikabije bigabanya igihe cyo kubaho cy'umuntu ugereranyije n'imyaka 3.6, mu gihe imirire mibi igabanya imyaka 1.6, itabi ku myaka 1.5, n'amazi meza n'isuku bitagira umutekano amezi 8.4. Ibi bigaragaza ko guhumeka umwuka mubi byangiza kurusha kunywa itabi n’imirire mibi.

Impungenge z’Isi yose

Raporo yashyizwe ahagaragara n’ikigo gishinzwe ikirere (SOGA) yerekanye ko ihumana ry'ikirere riza ku mwanya wa kabiri mu biza bibangamira Isi.

Raporo ya SOGA yashyizwe ahagaragara ku ya 19 Kamena, yerekanye ko, usibye miliyoni z'abantu babana n'indwara z'ubuhumekero zidakira, ihumana ry'ikirere ryahitanye abantu barenga miliyoni umunani ku Isi mu 2021.

Byongeye kandi, raporo yasanze abana bari munsi y'imyaka irindwi bashobora kwibasirwa cyane n'ingaruka ziterwa n'umwuka w'ikirere, hamwe na asima n'izindi ndwara zifata ibihaha. Abana bagera ku 700.000 bapfuye bazize igihe kinini bahuye n'umwuka wanduye, 70% muri bo kubera umwanda wo mu ngo uturuka mu guteka mu ngo hamwe n'ibicanwa byanduye. 

Nubwo ibihugu 94 byashyizeho ibipimo byacyo bya PM 2.5, hafi kimwe cya kabiri cyananiwe kubyubahiriza. Hagati aho, ibihugu 158 byananiwe gushyiraho amahame na gato.

Ubu butumwa, Minisitiri w'Intebe Dr Ngirente yabutanze ubwo yatangizaga ku mugaragaro Inama Nyafurika yiga ku Biribwa (Africa Food System Forum), kuri uyu wa Kabiri, tariki ya 3 Nzeri 2024.

Ni inama iri kubera i Kigali ku nshuro ya kabiri yiga ku iterambere rya Afurika, ikaba yitabiriwe n’abarenga 5000 barimo abayobozi mu nzego zitandukanye, abikorera mu rwego rw'ubuhinzi, abashakashatsi n'abandi.

Mu byo Minisitiri Ngirente yagarutseho biterwa no kudashyira imbere ubuhinzi, harimo amafaranga akoreshwa mu kwita ku ngaruka ziterwa n'ibura ry'ibiribwa, zirimo uburwayi, kugwingira kw'abana, amakimbirane n'ibindi bitandukanye.

Minisitiri w'Intebe Dr Ngirente yagaragaje ko abana bo muri Afurika barenga 32% bari munsi y'imyaka itanu bugarijwe n'ibibazo by'igwingira mu gihe ku rwego rw'Isi, abana bagwingiye ari 22%.

Ati: 'Icyongeye kuri ibyo, abaturage bacu barenga 20% bafite ibibazo byo kubura ibiribwa. Ibi bisobanuye ko abaturage batanu ba Afurika batabasha kubona ibiribwa bihagije kugira ngo bagire ubuzima bwiza.'

Minisitiri w'Intebe, Dr Edouard Ngirente, yashimangiye ko Umugabane wa Afurika ukeneye ubuhinzi burambye, bufite icyerekezo kandi butanga ibisubizo haba ku kwihaza mu biribwa, kurwanya igwingira mu bana no kuzamura ubukungu rusange bw'uyu mugane.

Yongeyeho ko ibihugu bya Afurika bikeneye kugira ubuhinzi buhamye, aho umusaruro wabwo ukwiye kongererwa agaciro ndetse ibi bihugu bigakemura ikibazo kibikomereye cy’umusaruro wangirika nyuma y’isarura.

Minisitiri w’Intebe, Dr Edouard Ngirente yagaragaje igihombo Afurika iterwa no kwirengagiza ubuhinzi harimo n’ikibazo cy’igwingira ry’abana 

Shuwa Dilu ni imwe muri filime zakozwe na Zacu Entertainment ikora filime zitandukanye zirimo izikunzwe cyane zinyura kuri Televiziyo y’u Rwanda “RTV” nka City Maid, Indoto, Seburikoko, Ejo si Kera ndetse no kuri Zacu Tv nka Ishusho ya Papa na The Bishop's Family.

Ni filime igaragaramo abakinnyi bakomeye mu ruhando rwa sinema nyarwanda cyane cyane muri filime z'urwenya (Comedy) ari bo Gratien Niyitegeka ukina yitwa Superi, Ramadhan Benimana ukina ari Waxi, ndetse na Eric Nsabimana ukina yitwa Londoni.

Abakunzi b’iyi filime y’urwenya bagiye kuryoherwa kurushaho kuko igiye kugaragaramo undi mukinnyi w’icyamamare muri sinema nyarwanda ari we Kayitankore Ndjoli uzwi nka Kanyombya uzagaragara muri Season ya kane y’iyi filime.

Mu kiganiro na inyaRwanda, Umuyobozi Mukuru wa Zacu Entertainment, Nelly Wilson Misago, yavuze ko “Shuwa Dilu” ari filime y’urwenya 100% bityo “gufata umukinnyi nka Kayitankole w'umu 'Legend' tukamuzanamo numva ari ngombwa cyane”.

Yavuze ko atari uyu mukinnyi gusa ahubwo ko bazakomeza gahunda biyemeje yo guhuza abakinnyi ba filime b’ibyamamare n’abakinnyi ba filime bashya. Ati “Nka ‘Producer’ wa Shuwadilu, numva tuzakomeza kugenda duhuza abakinnyi bakomeye bamaze igihe muri sinema ndetse n’abashya”.

“Shuwa Dilu” ni seri ivuga ku buzima bw'abasore batatu Superi, Waxi na Londoni bakodesha inzu kugira ngo bagabane igiciro cy'ubuzima bwa Kigali buhenze. Gusa buri umwe aba afite imyitwarire itandukanye n'iyundi.

Superi ni we uba ari umuyobozi w'urugo, mu gihe Waxi we aba akora akazi k'ubukomisiyoneri, mu gihe Londoni we aba ari umukozi wabo wo mu rugo, ukunda gukora amakosa menshi.

Iyi filime yayobowe na Niyoyita Roger, hakaba hategerejwe igice cyayo cya kane (4th seasons). Yasamiwe hejuru na cyane ko yamamajwe bikomeye na Canal+ nyiri Zacu Tv yakoze iyi filime. Ni filime yuzuye urwenya, ikaba yarakinywe n'ibyamamare muri sinema mu Rwanda, akaba ari n’imwe mu mpamvu abanyarwanda benshi bayikunze cyane.

Yatangiye kwerekanwa tariki 17/06/2024 kuri Zacu Tv igaragara kuri Canal+ shene ya 3, na 38. Itambuka buri munsi kuwa Mbere kugera kuwa Gatanu saa Moya z'ijoro, igasubiraho na saa Tatu n’igice z’ijoro. Abakunzi ba sinema barasabwa kugura ifatabuguzi rya Canal+ kugira ngo bakomeze kureba ibice byose by’iyi filime nta na kimwe kibacitse!.

Ibyihariye kuri ‘Kayitankole’ ugiye kugaragara muri “Shuwa Dilu”

Mu kiganiro yagiranye na RTV mu 2020, Kanyombya yavuze ko yakuriye muri Repubulika Iharanira Demokarasi ya Congo, ndetse ko iri zina ari ho yarikuye akora urwenya. Yavuze ko n'abo mu muryango we bazi gutera urwenya, kandi ko yabaga ari mu bakinnyi b'imena b'urwenya iyo babaga bagiye gukina imikino bahabwaga n’aba Padiri muri Congo.

Yavuze ko yatangiye urugendo rwa filime nyuma y'ijambo rya Perezida Paul Kagame, aho yasabye abaturarwanda kwihangira imirimo. Yatangiye gukina filime byeruye mu 2001-2002 abanjirije abandi bose, bashoboraga kuba bafite igitekerezo cy'uko bakora filime ziri ku rwego nk'urwo muri Leta Zunze Ubumwe za Amerika.

Yavuze ko yagiye yigira byinshi ku bakinnyi bo muri Nigeria, byanatumye ahitamo abakinnyi b'igara rito nka we. Avuga ko icyo gihe yari yaramaze kuva mu Ingabo z'u Rwanda [yinjiye mu gisirikare mu 1992] kandi ko nta mashuri ahagije yari afite yari kumufasha gushaka akazi, bituma atangira gutekereza ku cyo yakora cyamwinjiriza amafaranga.

Yakomeje avuga ko yahuje imbaraga n'abo bari bavanye ku rugamba rwo kubohora u Rwanda, ndetse ngo abo mu bihugu bitandukanye nko mu Burundi, Congo, Nigeria, Cameroon n'ahandi barabashimiye bavuga ko bagize uruhare rukomeye mu iterambere rya cinema nyarwanda. Avuga ko filime yabubakiye amazina ari iyitwa 'Haranira kubaho', ndetse ngo mu buryo bw'amafaranga binjije macye yabafashije kubaho.

Uyu mukinnyi wa filime ufite amashuri yisumbuye gusa, avuga ko iyo ataza gukina filime ubu yakabaye ari umushoferi cyangwa ari dogiteri uvura abantu, kuko yabikoreye amahugurwa.Yavuze ko iyi filime yabashije kwikorera imishinga ya filime yabo bwite, ndetse bituma amenya buri kimwe gikenerwa kugira ngo filime ibe yubakitse koko!.

Kayitankore yamaze kugera muri “Shuwa Dilu” ikinamo abakinnyi b’ibikomerezwa muri sinema

Niyitegeka Gratien yahaye ikaze Kayitankole muri filime “Shuwa Dilu”

“Shuwa Dilu” itambuka kuri Zacu Tv igaragara kuri Canal+ shene ya 3 na 38

REBA AGACE GAHERUKA KUNYUZWA KURI YOUTUBE MU MEZI 2 ASHIZE

Umushinga 'GREATER' ugamije kwimakaza ikoreshwa ry'ingufu zisubira binyuze mu burezi, aho abarimu n'abanyeshuri bongererwa ubumenyi hagamijwe gufasha abaturage gusonanukirwa akamaro k'izo ngufu.

Uhurije hamwe kaminuza enye zo mu Rwanda n'enye z'i Burayi zigisha amasomo ajyanye n'ingufu zisubira ukaba uzamara imyaka itatu kugeza mu 2025.

Mu nama yahuje abagenerwabikorwa b'uyu mushinga kuri itariki ya 2 Nzeri 2024, Umuyobozi Mukuru wungirije ushinzwe amasomo n'amahugurwa muri IPRC Tumba, Dr. Muhirwa Alexis yavuze ko kongera ubumenyi kuri izi ngufu muri iri shuri rikuru byatangiye gukorwa.

Yagize ati 'Tumaze kohereza abarimu batatu i Burayi bagiye mu cyiciro cya mbere. Turi gutegura icyiciro cya kabiri kizaba kirimo abantu barindwi harimo abarimu n'abanyeshuri kugira ngo n'abari ku ntebe y'ishuri na bo babashe kunguka ubumenyi'.

Aba boherezwa i Burayi bahabwa amasomo y'igihe gito banakorera ingendo shuri muri kaminuza ziri muri uwo mushinga bakahakura ubumenyi baza gukoresha hano mu Rwanda. Ni na ko bigenda ku baturuka muri izo kaminuza z'i Burayi baza mu zo mu Rwanda kwigira ku mikorere n'imyigishizirize y'ibijyanye n'ingufu zisubira.

Umwe mu barimu ba IPRC Tumba baherewe ayo masomo i Burayi, Hirwa Jean Luc yavuze ko bafite umushinga wo kwegera abaturage bakabasobanurira ingufu zisubira binyuze mu kubaka ikigo gikoreshwamo izo ngufu kibaha umuriro w'amashanyarazi ariko kinatangirwamo amakuru ku buryo bazasonukirwa akamaro k'izo ngufu kuko bazaba bazikoresha.

Iki kigo kizubakwa mu Mudugugu wa Muyanza mu Karere ka Rulindo.

Umuhuzabikorwa wa 'GREATER, Prof. Paolo Giampolini yavuze ko u Rwanda ari igihugu gikataje muri gahunda yo guha abaturage bose amashanyarazi kandi harimo n'akomoka ku ngufu zitangiza ibidukikije.

Ibyo ngo ni byo byatumye izo kaminuza zishyira hamwe kugira ngo zongere ubumenyi kuri izo ngufu kandi zegere n'abaturage zibasobanurire akamaro kazo binyuze mu bigo bizubakwa na buri kaminuza muri enye zo mu Rwanda ziri muri uyu mushinga.

Ubuyobozi bwa IPRC Tumba butangaza ko bwongereye umubare w'ababyeshuri biga iby'ingufu zisubira bava hagati ya 20 na 30 buri mwaka bagera kuri 150 kugira ngo babashe kuza ku isoko ry'umurimo bafashe mu cyerekezo cy'Igihugu cyo guha umuriro abaturage bose kandi utangiza ibidukikije.

Minisiteri y'Ibikorwaremezo igaragaza ko u Rwanda rugeze ku gipimo cya 54% by'ingufu zisubira zikoreshwa ziganjemo izituruka ku zuba n'izituruka mu mazi.

Dr. Muhirwa Alexis yavuze ko kongera ubumenyi ku ngufu zisubira muri IPRC Tumba byatangiye gukorwa

Baganiriye ku buryo bwo guteza imbere ingufu zisubira mu Rwanda

Prof. Paolo Giampolini yavuze ko u Rwanda ari igihugu gikataje muri gahunda yo guha abaturage bose amashanyarazi kandi harimo n'akomoka ku ngufu zitangiza ibidukikije

Kuri uyu wa Mbere tariki ya 2 Nzeri, nibwo Minisitiri Biruta na mugenzi we wa Jordanie, Mazin Abudullah Al Farrayeh, bakurikiranye umuhango wo gusinya amasezerano y'ubufatanye, yashyizweho umukono na IGP Namuhoranye na Maj. Gen. Abeidallah A. Maaytah, Umuyobozi ushinzwe umutekano rusange muri Jordanie.

Uyu muhango witabiriwe kandi na Ambasaderi w'u Rwanda muri Jordanie, Urujeni Bakuramutsa.

Amasezerano yashyizweho umukono akubiyemo ubufatanye mu kubaka ubushobozi mu bijyanye n'amahugurwa, guhanahana amakuru n'ubunararibonye, n'ubufatanye mu zindi ngeri z'ibikorwa by'umutekano nko kurwanya iterabwoba, icuruzwa ry'abantu n'ibiyobyabwenge, ibyaha bikorwa hifashishijwe ikoranabuhanga n'ibindi bitandukanye.

Inzego z'umutekano z'u Rwanda na Jordanie zigiye gufatanya mu birimo kurwanya iterabwoba

Kuri uyu wa Mbere tariki ya 2 Nzeri, nibwo Minisitiri Biruta na mugenzi we wa Jordanie, Mazin Abudullah Al Farrayeh, bakurikiranye umuhango wo gusinya amasezerano y'ubufatanye