Blog

Byabereye mu Mujyi wa Rwamagana hafi ya sitasiyo ya Engen ahari umuferege munini upfundikiye ureshya na metero 100. Uyu musore yaguye muri uyu muferege ahagana saa Sita akurwamo ahagana saa Saba n'igice.

Bamwe mu bari bahari ubwo uyu musore yajyaga muri uwo muferege babwiye IGIHE ko yagiyemo ubwo umugabo w'umukire yaparikaga imodoka telefone nto ikamucika ikagwamo. Uyu musore hamwe n'undi mwana biyemeje kuyikuramo bakoresheje ibiti abahemba 500 Frw. Hasigaramo batiri uwo mugabo arayireka arigendera.

Umwe ati 'Nyuma umukire yahebye arigendera, uriya musore rero ucuruza isambusa abwira umwana ngo ajyemo aramuhemba, umwana arabyanga ahitamo kwigiramo ngo ayikuremo. Yamanutse agiye kuvamo biranga no gusubira inyuma biranga.'

Undi mugabo wabibonye yavuze ko uyu musore ucuruza isambusa ari we wigiriye inama yo kujya muri uwo muferege kugira ngo akuremo batiri isanzwe igura 2500 Frw ngo azayigurishe.

Ati 'Yagiyemo turindira ko avamo biranga ni ko guheramo kuriya. Isomo nkuyemo ni uko ushobora gukurikirana ibintu biri ahantu habi ukaba wahagwa, abantu dukwiriye kumenya ubwenge tugashakishiriza mu bintu bizima.'

Nyuma y'isaha n'igice uyu musore yamaze muri uyu muferege igice kimwe kiri hejuru ikindi kiri hasi. Hitabajwe Polisi y'Igihugu yaje isenya igice cy'uwo muferege gikora kuri kaburimbo ubundi imukuramo ari muzima.

Dukuzumuremyi nyuma yo gutabarwa na Polisi y'Igihugu yayishimiye ndetse anashimira Imana yamutabaye akava mu muferege ari muzima. Yavuze ko yagiyemo aziko byoroshye ariko nyuma yo gukora urugendo rurerure yinjiramo akanakuramo batiri kuvamo byagoranye cyane.

Ati 'Imana ibahe umugisha baramfashije, nibazaga ukuntu ndibuvemo bikanshanga Imana ishimwe rero yo ibikoze.'

Bamwe mu baturage bari bashungereye ubwo bakuragamo uyu musore bashimiye Polisi y'Igihugu ku butabazi bwa vuba yakoze, kuko bamukuyemo nyuma y'iminota mike hakagwa imvura nyinshi.

Dukuzumuremyi yari yahezemo hitabazwa Polisi

Dukuzumuremyi yavuye mu muferege afite na batiri yari yinjiyemo agiye gushaka

Wabonye se uburyo ahitamo gukura indirimbo ye ku rubuga rwe Youtube, akavuga ko yarezwe n’abantu. Cyangwa se akaza mu itangazamakuru ashinja mugenzi we kumwiba indirimbo muri studio, mbese ubuzima ibyamamare bibamo ni amayobera gusa, biri no mu mpamvu inzego zishinzwe ubutabera, kenshi zigorwa no gutahura niba koko ibyo barimo ari ibyaha cyangwa se ari ‘showbiz’ nk’uko ubizi.

Ingero ni nyinshi z’ibintu byagiye bivugwa kuri iyi ‘mihanda’ (mu mvugo z’ubu) abantu bagatekereza ko ibiri gukorwa ari ‘agatwiko’ (mu mvugo z’ubu), ariko wasesengura ugasanga ni ibikorwa byuzuye urwango, gutesha agaciro ikiremwamuntu, no gukoresha imvugo zihembera urwango.

Hari abagiye bafata ijambo, bakavuga mu izina abantu bababwiye ko bazabica. Abandi bakavuga ko muri telefoni zabo babitsemo amashusho n’amafoto by’urukozasoni by’umwe mu bantu uzwi, kandi ko ayashyize hanze rubanda itakongera kumugirira icyizere.

Ubwo Yago yatangiraga gukora ibiganiro n’ibikorwa bigaragaza ko yahemukiwe n’abo yahaye Inka, inzego zibishinzwe zatekerezaga ko ari ‘agatwiko’ nk’uko bisanzwe bimenyerewe muri ‘Showbiz’.

Ariko, uko iminsi yicumaga babonye ko ibyo agambiriye birenze ibyo yatangazaga mu biganiro. Ariko kandi bari batinze gufata icyemezo, ahanini binaturutse ku kuba hari abantu bagiye babona bashwana ku mbuga nkoranyambaga, babaganiriza, bakavuga ko babikoze mu rwego rwo guteguza indirimbo yabo.     

Umuvugizi w’Urwego rw’Igihugu rw’Ubugenzacyaha (RIB), Dr Murangira B. Thierry avuga ko bagiye babona ibintu byinshi ku mbuga nkoranyambaga bakumva ko rimwe na rimwe biri gukorwa n’ibyamamare mu mutaka w’agatwiko nk’uko byari bisanzwe bigenda, ari nayo mpamvu kenshi bagiye badatera intambwe yo kubikumira, ariko kandi hari n’ibyaha bisaba ko nyirabyo atera iya mbere agatanga ikirego.

Ati “Ibintu byo ku mbuga nkoranyambaga ni ibintu byo kwitondera. Hari aho, rimwe na rimwe wabonaga abantu bari gutukana, ukabona ko bari gutukana, wabegera ugiye kubagira inama ukabona bishobora kubyara andi makimbirane. 

Abantu bakakubwira bati, Oya! ni ‘beef’ (agatwiko) tuba twashyizeho nk’abantu b’abahanzi bo muri ‘showbiz’ tuba tugira ngo abakiriya bacu bongere batwibuke, ariko ikigambiriwe ni uko hari indirimbo tugiye gusohora, babiziranyeho.”

Akomeza ati “Ngo hari ukuntu nyine ibi bintu bya ‘showbiz’ abantu b’abahanzi b’abasitari kugirango nyine babanze biyibutse abantu babanza kurema ‘beef’ noneho ubwo imbuga nkoranyambaga zikavuga, abafana babo bakongera bagakanguka, bagahita basohora indirimbo.”

Yavuze ariko ko ikibabaje ari uko abateguza iriya ndirimbo iyo imaze gusohoka, ntibasubira inyuma ngo babwire abafana babo ko ibyo bakoraga byari ‘agatwiko’ bateguza indirimbo yabo. Avuga ko hari abafana bakomeza gutekereza ko ibyo babonye cyangwa se basomye ari ukuri.

Murangira yavuze ko kuba imbuga nkoranyambaga zitanga amafaranga ku bantu bazikoresha cyane, bidakwiye gutuma batwarwa ngo birengagize indangagaciro.

Yanavuze ko Yago atangira kugaragaza ihangana hagati ye na bagenzi be yavugaga ko bamuhemukiye batekerezaga ari agatwiko.

Ati '[…] Ubundi iki kibazo cyatangiye tugira ngo ni 'showbiz' ya myidagaduro, ariko tuza gusanga, tuza kubona ko hari abatangiye kurenga umurongo ubaganisha mu byaha, tubona bamwe batangiye kugana mu gukora ibyaha byeruye.'

Itegeko rivuga ko 'Umuntu wese, ubizi, wifashishije mudasobwa cyangwa urusobe rwa mudasobwa atangaza amakuru y'ibihuha ashobora guteza ubwoba, imvururu cyangwa ihohotera muri rubanda cyangwa ashobora gutuma umuntu atakarizwa icyizere, aba akoze icyaha.' 

Iyo abihamijwe n'urukiko, ahanishwa igifungo kitari munsi y'imyaka itatu ariko kitarenze imyaka itanu n'ihazabu y'atari munsi ya miliyoni 1Frw ariko atarenze miliyoni 3Frw.

Dr Murangira B. Thierry yatangaje ko kenshi ibyamamare byitwikira 'agatwiko', ku buryo inzego zidahita zitahura ko ibyo bari gukora ari ibyaha biri kubera ku mbuga nkoranyambaga

Igishushanyo mbonera cyamaze kuboneka ndetse abafite ubushobozi bwo kubaka bijyanye nacyo kuri ubu bemerewe guhabwa ibyangombwa by'ubwubatsi.

Green City ni umushinga w'iterambere uzaramba kandi uhendutse, ukazaba ugizwe n'inyubako zitangiza ibidukikije kandi zikoresha ingufu zisubira, ibyakoreshejwe bikongera kubyazwa umusaruro kandi zubatswe n'ibikoresho byakorewe imbere mu gihugu.

Hakurikijwe igishushanyo mbonera, hagiye hagaragazwa ibyiciro by'inyubako zigomba kubakwamo zirimo inzu ndende, inzu zigeretse, inzu ngari yaturwamo n'imiryango myinshi, amashuri, ibitaro, isoko n'inganda.

Umuyobozi ushinzwe igenamigambi mu Mujyi wa Kigali, yagaragaje ko byatekerejwe ko abasanzwe batuye muri ako gace batari bakwiye kugumamo kuko bitazasaba ibya mirenge kugira umuntu abashe kubaka inzu ijyanye n'igishushanyo mbonera.

Ati 'Twifuza ko twakubaka inzu ziciriritse mu bushobozi bw'abantu bahatuye ndetse n'abazahatura ku buryo abahatuye uyu munsi bakomeza bakahatura.'

Muhirwa yagaragaje ko bijyanye n'igishushanyo mbonera buri wese azajya areba icyagenewe gukorerwa aho afite ubutaka, yaba afite ubushobozi akabisabira ibyangombwa.

Igishushanyo mbonera kigaragaza ko imiterere y'inzu zizubakwa bijyanye n'uburebure bwazo, byagiye bigenwa hashingiwe ku mihanda migari, aho iziri hafi y'imihanda zigomba kuba ndende ugereranyije n'izegereye hafi y'igishanga kizaba cyaratunganyijwe neza.

Nubwo hakenewe ko abatuye muri uwo mudugudu bawugumamo kugeza ubu, bizasaba ko buri wese ajyanisha ibikorwa bye n'igishushanyo mbonera.

Umuyobozi wa Kigali Green City Company, Karimba Basil, yabwiye IGIHE ko gahunda igamijwe atari ukwimura abaturage basanzwe batuye muri kariya gace.

Birumvikana ko hari ushobora kubura ubushobozi bujyanye n'ibiteganyijwe ariko Umuyobozi w'Umujyi wa Kigali wungirije ushinzwe Ibikorwa remezo, Dusabimana Fulgence, yagaragaje ko hari abazemererwa kubaka inzu mu byiciro kugera yuzuye.

Ati 'Hari uburyo umuntu ashobora guteganya inzu izarangira ifite ibyumba bitatu, ugahera ku cyumba kimwe uko ubushobozi bugenda buza, ukaba warateganyije aho icya kabiri kizajya n'icya gatatu. Ibyo ni ibintu bishobora gufasha umuturage w'amikoro make kugira ngo adahezwa muri uyu mujyi kuko dukeneye abantu b'ingeri zose.'

Ibyo ariko ntibizakuraho ko hari abashobora kwimurwa biturutse ku hazanyura cyangwa hazashyirwa ibikorwaremezo bikenewe muri uwo mujyi nk'imihanda, amashuri, ibitaro n'ibindi.

Mu gutuza abantu benshi nk'uko biteganyijwe ko aka gace nibura hazaturamo abarenga ibihumbi 200 birasaba imbaraga z'abikorera bazubaka imidugudu ihendukiye buri wese.

Abafite amikoro make bashobora kwemererwa kubaka inzu mu byiciro

Ibyo bijyana kandi n'ibyo guhugwa ha handi umuntu wakundaga kurya indyo runaka iyo atwite bihinduka akayanga urunuka, amavuta yakundaga kwisiga akamubangamira aho ayumvise hose akamokorwa.

Hari ubwo wumva ibinezeza umugore utwite ubusanzwe abantu badakunda cyangwa bafata nk'umunuko ukaba wakwibaza niba arwaye cyangwa ari amayeri bikakuyobera.

Umwe mu baganiriye na RBA witwa Muhoza Gaudence we yavuze ko mbere atakundaga urusenda icyakora amaze gutwita yumvishe ashaka kururigata buri mwanya, atarubona bikaba ikibazo.

Mutesi Jeanne d'Arc we mu gihe yari atwite yumvaga ashaka inyama zokeje, ha handi yabaga nta mafaranga afite akajya guhagarara aho zokerezwa akumva umwuka wazo irari ryashira agataha.

Gusa ngo ibintu byarahindutse ubwo inda yari igeze mu mezi atanu yumva ashaka umwuka wo mu musarane.

Uyu muturage wo mu Mujyi wa Kigali arakomeza ati 'Ibyo byo gukunda inyama byavuyeho inda igeze nko mu mezi atanu numva umwuka wo mu musarani ni wo unguye neza. Nkajyamo nkamaramo nk'iminota ibiri ngasohoka.'

Uretse Mutesi mugenzi we witwa Mukabaranga Collette we ngo yikundiraga kunywa ibintu bikonje cyane cyangwa akarya itaka ryavumbuwe n'umuswa.

Ati 'Niriraga utuntu tw'udutaka. Urabona hariya umuswa wibumbiye, kariya gataka uko kaba gahumura. Waragendaga ku biti mu gihe cy'imvura ukaba wahungura ha handi umuswa uba wahumbitse ukazana iryo taka ukarishyira ku isahani ukajya unyunya ugacira.'

Icyakora abahanga mu by'ubuvuzi bagaragaza ko ibyo bifitanye isano n'imihindagurikire y'umubiri ha handi akenera ibyo atari akeneye mbere yo gutwita cyangwa akagira ibyo azinukwa yakundaga ataratwita.

Umuganga uvura indwara z'abagore, Dr Gatsinga Jean Dieudonné, agaragaza ko iyo umuntu atwite akenera ibintu byinshi, icyakora umubiri ukaba ufite ubushobozi bwo kubitanga, utabikora hakabaho inyota y'ikintu gifite bimwe akeneye.

Dr Gatsinga agaragaza ko niba umuntu akeneye imyunyu runaka hari ibiyifite umubyeyi abitwarira yabibona kwa kugikenera kukavaho.

Ati 'Dufate nk'itaka. Kenshi habamo ubutare. Ushobora gutwarira urubuto utari usanzwe urya kubera ko rurimo ikintu umubiri wawe ukeneye ariko udafite.'

Icyakora uyu muhanga mu by'ubuvuzi agaragaza ko ari byiza kugana muganga mu gihe umuntu yatwise akararikira ikintu rubaka, akagirwa inama z'uko akomeza kwitwara, hanarebwa ko icyo yatwariye kitakwangiriza ubuzima.

Dr Gatsinga agaragaza ko iyo umubyeyi yatwariye ikintu cyakwangiriza ubuzima bwe, umuganga ashobora kureba icyagisimbura cyifitemo ibikigize byari muri cya kindi yatwariye bwa mbere ubundi ubuzima bugakomeza.

Abagore batwite bagirwa inama yo kujya kwa muganga mu gihe bumvise bashaka ikintu kidasanzwe kugira ngo harebwe niba kitakwangiriza ubuzima

Uyu mugizi wa nabi bikekwa ko ari Umusirikare wa RDC, uwo mu Ihuriro rya Wazalendo cyangwa umurwanyi wa FDLR yateye uru rugo mu rukerera rwo kuri uyu wa 5 Nzeri 2024, aturutse mu kibaya gihana imbibi n'u Rwanda.

Ubwo yageraga kuri uru rugo, yagerageje kwiba inka za Mfitumukiza, ariko nyuma yo kumwumva yatabaje, abaturage baramutabara, uyu mugizi wa nabi asubira muri iki kibaya yaturutsemo yiruka.

Bivugwa ko mu rwego rwo gutera ubwoba abanyerondo bagiye gutabara Mfitumukiza kugira ngo batamufata, yirutse arasa mu kirere. Icyuma kimeze nk'inkota yari afite cyo yagitaye aho.

Umuyobozi w'akarere ka Rubavu, Mulindwa Prosper, yatangarije IGIHE ko uwateye urugo rwa Mfitumukiza ari umuturage washakaga kwiba.

Ati “Ni umuturage waje kwiba. Yaje kwiba avuye ahitwa mu Kibaya ariko ntacyo yabashije kwiba kuko abaturage bacu bamutesheje, aranabacika. Wenda ikidasanzwe ni uko yari yaje yitwaje intwaro. Muri uko kuducika yarashe, ariko nta muntu yigeze arasa. Yarashe ahari ari gukanga kugira ngo abone uko acika abaturage, ahibagirirwa igikoresho kimeze nk'inkota.”

Meya Mulindwa yabajijwe imiterere y'ahantu uyu mujura yaturutse, agira ati “Ni umupaka nyine w'ubutaka, abantu baba bareba mu Rwanda. Ntabwo ari kure ariko ntabwo hatuwe, harimo ubutaka butagira ubugenzura. Ni igisambu kiri aho gusa.”

“Ntabwo [kwinjira] biborohera, nuko aba yitwikiriye ijoro kandi nabwo aba yabigize umushinga, akareba uko azinjira ariko twahashyize ingamba zikaze, ntabwo umuntu yatwinjirira mu buryo bumworoheye. N'iyo yari kuzitwara, ntiyari kuziheza kuko ni hanini ku buryo umuntu atakwambukana inka ngo azigeze mu kindi gihugu, abantu bamureba.”

Ku gicamunsi cya tariki ya 29 Kanama 2024, na bwo uwo bikekwa ko ari umusirikare wa RDC yarashe inzu y'umuturage mu karere ka Rubavu, amena ibirahuri byayo, yangiza n'igipangu.

Icyo gihe Rugomboka Daniel utuye hafi y'umupaka muto (Petite Barrière) yabwiye IGIHE ko nta muntu n'umwe uyu muntu yakomerekeje.

Ati 'Uriya musirikare yaje arasa amasasu menshi, yafashe inzu duturanye, ibirahure byo ku madirishya byamenetse ndetse aya masasu yangije ku gipangu no ku bikuta.'

Kuva umubano w'u Rwanda na RDC wazamba mu 2022, mu bice byegereye umupaka humvikanye kenshi abitwaje intwaro bagerageza guhungabanya umutekano w'abatuye mu karere ka Rubavu. Aba barimo abo ubuyobozi bw'iki gihugu cy'abaturanyi cyemera ko ari abasirikare bacyo.

Umuyobozi wa Diviziyo ya gatatu y'ingabo z'u Rwanda, Gen Maj Nkubito Eugène, mu kiganiro yagiranye n'abikorera bakorera i Rubavu, yasobanuye ko impamvu ibikorwa nk'ibi by'ubushotoranyi ari uko ingabo z'u Rwanda zidafite ububasha hakurya y'imipaka.

Yagize ati 'Hakurya y'imipaka ni ahantu tudashinzwe gukurikirana ibyaho no kugira uko tubigena. Barabyigenera uko babishaka. Ni yo mpamvu inshuro nyinshi uzumva hariyo abaturwanya, ukumva hariyo FDLR.'

Gen Maj Nkubito yavuze ko nubwo haba ibikorwa bito byo guhungabanya umutekano w'i Rubavu bituruka muri RDC, ingabo z'u Rwanda zifite ubushobozi bwo guhangana na byo, zikabitsinda.

Yabigarutseho kuri uyu wa 5 Nzeri 2024, mu kiganiro kigaruka ku miyoborere y'ibihugu yagejeje ku bakuru b'Ibihugu na za Guverinoma bateraniye mu nama ihuza u Bushinwa na Afurika (FOCAC) iri kubera i Beijing kuva ku wa 4-6 Nzeri 2024.

Yaherekejwe n'itsinda ririmo Minisitiri w'Imari n'Igenamigambi, Yussuf Murangwa; Minisitiri w'Ubuzima Dr Sabin Nsanzimana na Minisitiri w'Ububanyi n'Amahanga, Olivier Nduhungirehe.

Perezida Kagame yagaragaje ko imiyoborere Abaturage b'u Bushinwa bishyiriyeho mu 1949, ari yo yatumye bashobora guhangana n'ubukene, inzara n'ibindi ubu igihugu cyabo kikaba kiri ku isonga mu bukungu.

Ati 'Mu myaka isaga 70 ishize, Abashinwa bashyize hamwe mu guteza imbere igihugu cyabo bakigeza ku isonga mu bukungu bw'Isi. Imiyoborere myiza yashyizweho nta gushidikanya ko yabaye zingiro ry'iyi ntambwe itagereranywa yatewe.”

“Gusa kugira ngo imiyoborere ibe myiza bisaba ko igomba kubakirwa ku ndangagaciro n'ibyo abaturage bifuza kugeraho. Ntikwiye kuba imiyoborere utegetswe n'ikindi gihugu.'

Perezida Kagame yavuze ko urugendo rw'u Bushinwa mu kurandura ubukene, iterambere no kwimakaza ikoranabuhanga bitanga amasomo menshi mu rugamba rw'iterambere Afurika imazemo imyaka myinshi.

Yagaragaje ko u Bushinwa bugaranira ko ibihugu byose bitera imbere, atanga urugero kuri gahunda yo kubaka imihanda n'inzira zihuza u Bushinwa, Afurika n'u Burayi yatangiye mu 2013 yatanze umusaruro ukomeye ku rwego rw'Isi, igirira akamaro u Bushinwa, Afurika n'u Rwanda rudasigaye.

Ati 'U Bushinwa bwagaragaje ubushake bwo guharanira iterambere ridasiga ibindi bihugu, binyuze mu kubahana no guharanira inyungu rusange. Ubu bufatanye bwatumye umubano w'u Bushinwa na Afurika urushaho kuba mwiza, haba mu kubaka ibikorwa remezo, guhanga ibishya mu byerekeye siyansi no guharanira amahoro n'umutekano ku mugabane wose.'

Nta buryo bumwe bw'imiyoborere bwabera ibihugu byose

Perezida Kagame yavuze ko nyuma ya Jenoside yakorewe Abatutsi mu 1994, u Rwanda rwize amasomo menshi arimo no kuba nta buryo bumwe bw'imiyoborere bubaho bubereye ibihugu byose.

Ati 'Nta buryo bumwe bw'imiyoborere bubereye bose bubaho. Buri gihugu gikwiye kwishyiriraho uburyo bw'imiyoborere bujyanye n'imibereho n'ubudasa bw'amateka yacyo, n'icyerekezo cyacyo.'

'Nyuma ya Jenoside yakorewe Abatutsi mu 1994, Abanyarwanda twagombye kongera gutekereza no kubaka ubukungu bw'igihugu cyacu, imibereho n'umusingi wa politike twifashishije uburyo bwo kwishakamo ibisubizo kugira ngo tubashe kwikemurira ibibazo byacu.'

Yagaragarije aba bakuru b'ibihugu ko hakozwe gahunda zigamije guteza imbere ubumwe n'iterambere, zishyigikiwe n'imiryango itandukanye n'abayobozi banyuranye.

Hanashyizwe imbaraga mu guteza imbere ingeri zinyuranye z'ubukungu by'umwihariko ikoranabuhanga, ubukerarugendo no guteza imbere inganda, hanashyirwaho uburyo bwo korohereza abantu gukora ishoramari.

Perezida Kagame yahamije ko 'kwegereza ubuyobozi abaturage byatumye inzego z'ibanze zacu zikora neza, bituma abaturage bihabwa serivisi neza kandi bagira uruhare mu bibakorerwa”.

Yashimangiye ko urugendo rwo kwigira rwatumye imishinga ibyara umusaruro ikomoka mu bufatanye bw'u Rwanda n'ibihugu by'inshuti yiyongera, biba umwihariko ku Bushinwa n'ibihugu byo muri Afurika.

Yashimye ubufatanye buhamye buri hagati y'impande zombi bwigaragariza mu gufashanya kubona iby'ibanze bikenewe, guhahirana no gusangira ubumenyi.

Perezida Kagame yanavuze ko nubwo ibibazo byugarije Isi bigenda byiyongera ariko hari n'amahirwe arushaho kuboneka, ku buryo umubano w'u Bushinwa na Afurika uzakomeza kuba mwiza kandi ugatanga umusaruro kurushaho.

Ati 'Kuva FOCAC yatangira twungukiye mu bucuruzi, ubufatanye mu by'inganda n'ubufatanye bushingiye ku baturage bigaragaza imbaraga z'ubufatanye hagati y'ibihugu.'

Umubano w'u Bushinwa n'u Rwanda umaze imyaka 53. Kuva mu 2003 kugeza mu 2023, imishinga y'Abashinwa 118 ifite agaciro ka miliyoni 959,7 z'Amadolari ya Amerika yinjiye mu Rwanda, iha akazi abantu 29.902.

Mu 2022 gusa, imishinga y'Abashinwa 49 ifite agaciro ka miliyoni 182 z'Amadolari yinjiye mu Rwanda. Muri uwo mwaka, u Rwanda rwohereje mu Bushinwa ibicuruzwa bifite agaciro ka miliyoni 102 z'Amadolari.

Perezida Kagame yahamije ko Afurika yiteguye gukomeza urugamba rw'iterambere ishingiye ku nkingi z'iterambere umutekano no guharanira impinduka zigamije iterambere ridaheza.

Gusa ngo ibi bizagerwaho mu gihe abayobozi mu nzego zitandukanye z'ibihugu bahora bazirikana ko hakenewe imiyoborere myiza kandi bagafashanya guharanira gukora ibyo abaturage babategerejeho.

Perezida Kagame yageze mu Bushinwa tariki 3 Nzeri 2024, aho yari yitabiriye inama ya FOCAC

Abakuru b’ibihugu bya Afurika bari kuganira n’u Bushinwa ku ngingo zijyanye n’ubufatanye bugamije iterambere ry’impande zombi

Perezida Kagame yagaragaje ko nta gihugu gikwiye gutegeka ikindi uburyo bw’imiyoborere cyakurikiza

Ifoto ya Ndayishimiye Eric Bakame, umutoza w’abanyezamu ba Bugesera FC afite inyundo muri Kigali Pelé Stadium yatunguye benshi.

Ni ifoto yafashwe ejo hashize ku wa Gatanu tariki ya 4 Nzeri 2024 muri Kigali Pelé Stadium ku mukino wa gicuti Bugesera FC yatsinzemo Kiyovu Sports 1-0.

Ni ifoto yakwirakwiye ku mbuga nkoranyambaga mu gitondo cyo kuri uyu wa Kane benshi bibaza aho iyi nyundo yayikuye n’icyo yari yaje kuyikoresha.

ISIMBI yagerageje kuvugisha Bakame ariko ntibyakunda kuko atabonekaga ku murongo wa telefoni.

Umwe mu bantu bo muri Bugesera FC yabwiye ISIMBI ko iyo nyundo ntayo Bakame yazanye ahubwo bayisanze muri Stade iri ku ntebe y’abasimbura (bench).

Iyi nyundo bikekwa ko yahasizwe n’abantu bakoraga muri Stade, Bakame yahise ayifata ari nako yatangiye gusezerereza Kiyovu Sports ko yaje yakaniye aho yanazanye inyundo.

Bakame n’inyundo muri Stade

Benshi banyotewe no kubona ikipe y’igihugu itsinda umusubirizo, gusa muri iyi minsi bisa n’aho yatangiye kwiyunga n’abanyarwanda nyuma y’igihe kinini ibababaza. Uyu munsi tugiye gusubiza amaso inyuma turebe bimwe mu bihe by’ingenzi by’ikipe y’igihugu ndetse n’aho izina ‘Amavubi’ ryakomotse.

Igihugu cyabonye Ubwigenge tariki ya 1 Nyakanga 1962. Ishiyirahamwe ry’umupira w’amaguru mu Rwanda 'FERWAFA’ ryashyizwe mu 1972. Ryaje kwemezwa nk’umunyamuryango w’Impuzamashyirahamwe y’Umupira w’Amaguru ku Isi 'FIFA’ ndetse n’Impuzamashyirahamwe y’Umupira w’Amaguru muri Afurika 'CAF’ mu 1976.

Umukino wa mbere uzwi n’aya mashyirahamwe u Rwanda rwawukinnye tariki ya 29 Kamena 1976 aho rwatsinzwe n’u Burundi 6-2 mu mukino wabereye muri Gabon.

Ntabwo byoroshye kuba wabona amateka y’ikipe y’igihugu Amavubi, muri iyi nkuru ISIMBI yagerageje guhuza bimwe mu byanditswe biri mu bubiko ndetse inavugana n’umwe mu bakiniye ikipe y’igihugu bwa mbere, tugiye kubagezaho amavu n’amavuko y’Amavubi ndetse na bimwe mu bigwi byayo.

Bwa mbere ikipe y’igihugu ihamagarwa byari mu 1964 ariko byari ugukora imyitozo gusa, harimo abakinnyi nka Butare, Hardi, Kamatari, Rutanga Pierre, Nshimyumurwa Denis.

Yongeye guhamagarwa mu 1970, irimo abakinnyi nka Runyinya, Mbaraga, Nshimyumurwa, Donat, Kamatari, Ngezi, nabwo byari ugukora imyitozo gusa.

Nk’ibisanzwe usanga amakipe y’ibihugu aba afite andi mazina azwiho(nicknames), akenshi agenda yisanisha n’imyamaswa z’inkazi mu kugaragaza ubukana bw’ikipe yabo, inyamaswa zifite icyo zisobanuye mu muco wabo cyangwa ikindi kintu gifite ubusobanuro cyane kuri icyo gihugu, nka Uganda yitwa 'Uganda Cranes(Imisambi ya Uganda)’ iyo urebye mu ibendera ry’iki gihugu harimo umusambi, Tanzania ni 'Taifa Stars(Inyenyeri z’igihugu)’ Cote d’Ivoire yitwa 'Les Éléphants
(Inzovu)’ n’andi menshi.

U Rwanda rwahisemo kwitwa Amavubi, agakoko gato k’inigwa habiri ariko kagira ubukana, akenshi ubwumva iyo kakudwinze.

Iyo ubajije abantu ntabwo bakubwira umwaka nyirizina, ikipe y’igihugu yahawe akabyiniriro k’Amavubi, izina ryafashe kugeza n’uyu munsi.

Kanamugire Aloys wakiniye ikipe y’igihugu yahamagawe bwa mbere igiye gukina amarushanwa mu 1976, yabwiye ISIMBI ko nabo batazi aho icyo gitekerezo cyavuye ariko icyo gihe babwiwe na Minisiteri ko batanze itangazo mu baturage ngo batange izina ryakwitwa ikipe y’igihugu, bagatoranyamo Amavubi.

Yagize ati 'mu by’ukuri kuvuga ngo iryo zina ryavuye he kuko icyo gihe nanjye nari nk’iri umukinnyi, ariko ibyo nagiye numva ntangiye gukora muri iyo Minisiteri, ni itangazo ryatanzwe mu baturage bavuga ngo buri wese arebe izina yakwita ikipe y’igihugu, batanze amazina menshi ariko nyuma yaho bemeza ko ikipe izitwa Amavubi, bambwiye ko uwaritanze impamvu yarihisemo ari uko Amavubi adwinga ntashireyo, aradwinga agashira ariko ejo hakaza andi nayo akadwinga. Icyo nicyo gisobanuro bampaye.'

Amavubi 1978: Abahagaze uhereye ibumoso, Dusange Jean Pierre, Mugemana, Kassim, Dr Ndagijimana Emmanuel, Bayingana, Ntacyabukura Sabbit, Rugirangoga na Runuya. Abicaye ni; Kirenga Louis, Minani, Habantake, Alfred, Kamali, Enos Gatari, Kanamugire Aloys na Baruwani Suedi

Bwa mbere ikipe y’igihugu yahamagawe igiye gukina amarushanwa hari mu 1976, yari igiye gukina amarushanwa yo muri Afurika yo hagati(central African football competition) ryabereye muri Gabon, yatozwaga n’umudage Otto Pifster, bamwe mu bakinnyi bahamagawe icyo barimo Bapfakurera Alfred, Kamatali, Ndiramiye Gabon, Antoine wa Nyanza, Karenzi, Aloys Kanamugire, Deo Kanamugire, Nshimyumurwa, Rutanga, Nyinyoli, Donat, Mike, Jumapili, Barabwiriza Runyinya n’abandi.

Iri rushanwa ni naryo rigaruka mu bihe bibi u Rwanda rwatsinzwemo ibitego byinshi mu mateka yayo, uretse kuba baratsinzwe n’u Burundi 6-2 mu mukino wabo wa mbere, batsinzwe na Cameroun 5 — 0, tariki ya 7 Nyakanga 1976, rutsindwa na DR Congo icyo gihe yari Zaire, hari tariki ya 12 Nyakanga 1976.

Ibi byiyongera ku bitego 5-0 Amavubi yatsinzwe na Tunisia tariki ya 10 Mata 1983 mu gushaka itike y’igikombe cy’AfurikaTunisia.

Kubera Jenoside yakorewe Abatutsi muri Mata 1994, u Rwanda rwisanze mu bihe bitatumaga rwashyira umutima kuri ruhago, ndetse na nyuma ya Jenoside byafashe imyaka kugira ngo rwisuganye ari nacyo gihe Imisambi ya Uganda yayadonze inshuro 5 zose nta rubori rw’Ivubi rwabashije kuyihamya, hari tariki ya 1 Kanama 1998.

Mu gushaka itike y’igikombe cy’Isi cyo mu 1998 u Rwanda rwakuwemo na Tunisia mu ijonjora rya mbere, icya 2002 rwakuwemo Cote d’Ivoire mu ijonjora rya mbere.

Bimwe mu bihe byiza bitibagirana u Rwanda rwagize, harimo kuba Rwanda B yaregukanye irushanwa rihuza ibihugu byo ku karere ka Afurika y’Iburasirazuba n’iyo hagati(CECAFA) mu 1999, hari nyuma yo gutsinda ku mukino wa nyuma Kenya ibitego 3-1 bya Ndindiri Mugaruka, Nshizirungu Hubert Bebe na Ndizeye ni mu gihe Kenya yatsindiwe na Kimuyu.

Icyo gihe u Rwanda rwari rufitemo amakipe 2, Rwanda A na Rwanda B, impamvu ni uko igihugu cyabaga cyakiriye cyahabwaga amahirwe yo kugiramo amakipe 2.

Rwanda B yegukanye CECAFA: Uhereye iburyo abahagaze, umunyezamu Ishimwe Claude, Batu Jean, Ndindiri Mugaruka na Gishweka Faustin, abapfukamye ni; Sibo Abdul, Munyaneza Djuma, Habimana Sostene, abicaye; Rusanganwa Fredy Ntare, Mupimbi Yves, Nshizirungu Hubert Bebe na Muronda Jean Pierre

Igitego cy’umutwe cya Jimmy Gatete ku mupira wari uvuye kuri Ntaganda Elias, cyahesheje u Rwanda intsinzi imbere ya Ghana kuri Stade Amahoro tariki ya 6 Nyakanta 2003 ndetse ruhita rubona itike y’igikombe cy’Afurika cya 2004 cyabereye muri Tunisia, akaba ari nacyo gikombe rukumbi u Rwanda rwitabiriye, ndetse benshi bakurikirana umupira w’amaguru bemeza ko ari byo byishimo bikomeye cyangwa intsinzi ikomeye Amavubi yagize.

Muri iki gikombe cy’Afurika ntabwo u Rwanda rwabashije kurenga itsinda A rwari rwisanzemo, rwasoje ku mwanya wa 3 n’amanota 5, nyuma ya Guinea ya kabiri yari ifite 5, Tunisia yari ifite 7 ni mu gihe DR Congo yasoje n’ubusa iri ku mwanya wa nyuma.

U Rwanda rwatangiye rutsindwa na Tunisia 2-1 Ziad Jaziri ku munota wa 27 na Francileudo dos Santos ku munota wa 57 nibo batsindiye Tunisia ni mu gihe u Rwanda rwatsindiwe na Joao Rafael Elias ku munota wa 32.

Umukino wa kabiri rwanganyije na Guinea 1-1, Karim Kamanzi ni we watsindiye Amavubi ku munota wa 93 yishyura igitego cya Aboubacar Titi Camara wari watsinze ku munota wa 49.

Amavubi yasoje itsinda atsinda DR Congo igitego 1-0 cya Said Abed Makasi ku munota wa 74.

Mu gushaka itike y’igikombe cy’Isi cya 2006, Amavubi yatsinze Namibia mu ijonjora rya mbere ariko isoza ku mwanya wa nyuma mu cyiciro cya 2 inyuma ya Angola, Nigeria, Gabon, Zimbabwe na Algeria.

Ibitego byinshi Amavubi yatsinze mu mateka yayo hari tariki ya 13 Ukuboza 2007 Dar es Salaam muri CECAFA ubwo batsindaga Djibouti 9-0, Karekezi Olivier yatsinzemo 2, Ahmed Abdi yitsinze igitego, Kamana Bokota Labama atsinda 3, Roger Tuyisenge atsinda 1, Elias Uzamukunda atsindamo kimwe na Hegman Ngomirakiza na we yatsinze 1.

Tariki ya 10 Nzeri 2019 Amavubi yatsinze Seychelles 7-0 mu mu ijonjora ry’ibanze ryo guashaka itike y’igikombe cy’Isi cya 2022, Jacques Tuyisenge na Meddie Kagere buri umwe yatsinze 2, Djihad Bizimana, Yannick Mukunzi na Hakizimana Muhadjiri buri umwe atsinda 1.

Amavubi yakinnye igikombe cy’Afurika cya 2004, iyi yakinnye umukino ufungura na Tunisia. Uhereye ibumoso abahagaze ni; Nkunzingoma Ramazan (goalkeeper), Bizagwira Leandre, Ndikumana Kataut, Said Abed, Karekezi Olivier na Nshimiyimana Eric. Abicaye ni; Ntaganda Elias, Nshimiyimana Canisius, Mbonabucya Desire, Manamana na Sibomana Abdul

Uretse igikombe cya CECAFA cyo mu 1999 Rwanda B yegukanye, Amavubi amaze kugera ku mukino wa nyuma wa CECAFA inshuro 5 zose ariko ntarabasha kwegukana iki gikombe, aho muri 2003 igikombe cyabereye muri Sudani, Amavubi yatsinzwe na Uganda ku mukino wa nyuma 2-0, 2005 cyabereye mu Rwanda, Amavubi atsindwa na Ethiopia ku mukino wa nyuma 1-0, 2007 cyabereye muri Tanzania maze u Rwanda rutsindwa na Ethiopia ku mukino wa nyuma kuri penaliti 4-2, ni nyuma y’uko bari banganyije 2-2.

2009 Amavubi yongeye gutsindirwa ku mukino wa nyuma na Uganda 2-0, igikombe cyabereye muri Kenya, 2011 ku nshuro ya 3 Uganda yatsindiye Amavubi ku mukino wa nyuma wa CECAFA, amakipe yombi yanganyije 2-2 aho ibitego by’Amavubi byombi byatsinzwe na Kagere Meddie, bageze muri penaliti Uganda itsinda 3-2, yari yabereye muri Tanzania, 2015 yabereye Ethiopia, Uganda n’Amavubi nizo zageze ku mukino wa nyuma nabwo Uganda itwara igikombe itsinze 1-0.

Umusaruro w’ikipe y’igihugu Amavubi ntabwo ari mwiza ugereranyije n’ibihugu by’ibituranyi nka DR Congo yegukanye igikombe cy’Afurika cyo mu 1974 ndetse kujya muri iki gikombe yabigize akamenyerero.

Uganda yasoje ku mwanya wa kabiri mu gikombe cy’Afurika cyo mu 1978 ndetse kwitabira igikombe cy’Afurika kuri yo si inkuru, biba inkuru iyo itagiyeyo. Hari u Burundi, Tanzania ndetse na Kenya nazo zisa nk’aho zirimo kugenda zisiga u Rwanda.

Ibi akenshi iyo urebye usanga bishingira ku kuba nta gahunda ihamye ihari yo gutegura ndetse no kwimakaza umuco w’iterambere rya ruhago rishingiye ku bana cyane ko igihe bateguwe batanze umusaruro nk’aho 2011 bitabiriye igikombe cy’Isi cy’abatarengeje imyaka 17 muri Mexique.

Muri 2014 u Rwanda rubuze itike y’igikombe cy’Afurika cya 2015 nyuma yo gutsinda Congo Brazaville ariko bagasanga Daddy Birori hari andi mazina akiniraho muri Congo, u Rwanda rwacitse ku muco wo guha abakinnyi baturuka mu bindi bihugu ubwenegihugu ngo bakinire u Rwanda, aho n’umukuru w’igihugu, Perezida Kagame yigeze kubigarukaho avuga ko kugura abakinnyi ubazana mu ikipe y’igihugu uretse no mu Rwanda nta n’ahandi byigeze biba igisubizo bityo ko bikwiye guhinduka ahubwo hagashyirwa imbaraga mu gutegura.

Perezida Kagame ni kenshi yagiye agaragaza ko ashyigikiye y’igihugu Amavubi ariko yo ikamutenguha, kugeza aho yanasabye ko gukina babireka bakajya bakurikirana iby’aho babizi.

Kuva mu 1930 igikombe cy’Isi kibaye bwa mbere kugeza mu 1994 Amavubi ntabwo yigeze yitabira iki gikombe, 1998, 2002 na 2006 yaviriyemo mu ijonjora ry’ibanze, 2010 yageze mu ijonjora rya nyuma ariko ntiyahirwa, 2014 yarenze ijonjora ry’ibanze gusa, 2018 ntiyakinnye ijonjora ry’ibanze ariko yaviriyemo mu cyiciro gikurikiyeho ikuwemo na Libya ku bitego 4-1.

Mu gikombe cy’Afurika cyatangiye mu 1957, Amavubi yatangiye gushaka itike yacyo mu 1982 aho yaviriyemo mu ijonjora kimwe no mu 1984. Yongeye kugaruka mu 2000 aviramo nabwo mu ijonjora kimwe no mu 2002. 2004 Amavubi yabonye itike y’igikombe cy’Afurika, kimwe rukumbi yitabiriye, kuva icyo gihe kugeza ku gikombe cy’Afurika cya 2021 kizakinwa muri Mutarama 2022 ntabwo Amavubi arongera kubona itike yacyo, uretse icya 2015 yari yabonye itike ariko agakurwamo kubera umukinnyi(Daddy Birori) wakiniraga ku byangombwa bitandukanye.

Amateka agaragaza ko Haruna Niyonzima ari we mu mukinnyi umaze gukinira ikipe y’igihugu y’u Rwanda imikino myinshi y’amarushanwa nta ya gishuti irimo, aho kuva muri 2006 ahamagawe bwa mbere kugeza uyu munsi amaze gukina imikino 105, muri yo mikino ari kumwe n’Amavubi batsinze imikino 33, banganya 25 batsindwa 47, binjije ibitego 102 binjizwa 125, muri ibyo bitego afitemo 6 aho aheruka gutsinda igitego tariki ya 26 Ugushyingo 2012 muri CECAFA yabereye Uganda, u Rwanda rutsinda Malawi 2-0, harimo igitego cye, akaba ari ku mpuzandengo ya 43.33%.

Hagiyemo n’imikino ya gishuti Karekezi Olivier ni we ufite imikino myinshi aho afite 134 mu gihe Haruna ari 133 nk’uko ububiko bw’umwe mu banyamakuru b’imikino mu Rwanda, Nkusi Denis uzwi nka Mtangazaji bubigagaragaza

Ububiko bw’uyu munyamakuru kandi bugaragaza ko, Karekezi ari we watsindiye Amavubi ibitego aho yayitsindiye ibitego byinshi ni Olivier Karekezi watsinze ibitego 38 mu mikino 134 yayikiniye.

Haruna Niyonzima ni we umaze gukinira Amavubi imikino myinshi

Olivier Karekezi ni we watsindiye Amavubi ibitego byinshi

Umusaruro w’Amavubi muri iyi minsi ntumeze neza