Blog

Kuri uyu wa Kane tariki ya 12 Nzeri 2024 nibwo Abakandida Senateri biyamamarije mu Karere ka kayonza aho biyamamarije imbere y'inteko itora igizwe n'abantu 53 bo muri aka Karere.

Abakandida Senateri bari kwiyamamariza mu Ntara y'Iburasirazuba barimo Bideri John Bonds, Nambaje Aphrodise, Urujeni Angeline, Nsengiyumva Fulgence ndetse na Dr Alvera Mukabaramba. Uko ari batanu hazatorwamo batatu bazinjira mu Nteko Ishinga Amategeko umutwe wa Sena bahagarariye Intara y'Iburasirazuba.

Buri mukandida Senateri yahawe iminota cumi n'itanu avuga imigabo n'imigambi bye n'ibyo yifuza kubafasha nibaramuka bamugiriye icyizere. Kandida Senateri Bideri John Bonds niwe wahawe umwanya bwa mbere asobanurira inteko itora ko yari asanzwe ari Umusenateri kandi ko baramutse bongeye bakamugirira icyizere yiteguye gukomeza gufatanya n'abandi mu kubaka igihugu.

Kandida Senateri Nambaje Aphrodise niwe wabaye uwa kabiri, yasobanuye ko yabaye umwarimu, aba umunyamakuru imyaka itandatu, aba Umuyobozi w'Akarere ka Ngoma imyaka icyenda. Yavuze ko baramutse bamugiriye icyizere yiteguye gufatanya n'abandi gushyiraho amategeko meza.

Kandida Senateri Urujeni Angeline yahawe umwanya nawe asobanura ko yabaye umubyaza mu bitaro bya Gahini igihe kinini, yavuze ko kandi kuri ubu yanabaye umwarimu mu ishuri ry'ubuganga riri muri aka Karere. Yasabye buri wese kumugirira icyizere kugira ngo afatanye n'abandi mu Nteko Ishinga Amategeko umutwe wa Sena.

Kandida Senateri Nsengimana Fulgence niwe wakurikiyeho asobanura ko yabaye Perefe wa Perefegitura ya Gitarama.

Yavuze ko yakoze imirimo itandukanye irimo kuba umukozi wa Minisiteri y'Ubuhinzi n'Ubworozi ashinzwe ubuhinzi hirya no hino cyane cyane mu bihingwa birimo umuceri n'ibigori.

Yavuze ko yabaye Umunyamabanga wa Leta muri Minisiteri y'Ubuhinzi n'Ubworozi, akaba yari asanzwe ari Umusenateri.

Kandida Senateri Dr Alvera Mukabaramba niwe wasoje, yavuze ko yabaye mu Nteko Ishinga Amategeko umutwe wa Sena ya mbere yagiyeho mu 2003, aza kuba Umunyamabanga wa Leta muri Minisiteri y'Ubutegetsi bw'Igihugu mu gihe cy'imyaka umunani. Yavuze ko kuri ubu amaze imyaka 25 ari mu nzego za Politike ubwo bunararibonye akaba aribwo yifuza gukoresha muri Sena.

Umuyobozi wa Komisiyo y'Igihugu y'Amatora mu Ntara y'Iburasirazuba, Kayiranga Frank, yavuze ko muri iyi Ntara nubwo bafite Abakandida Senateri batanu hazavamo batatu gusa.

Yavuze ko mu turere dutandatu bamaze kujyamo igikorwa cyo kwiyamamaza kiri kugenda neza byerekana ko n'igikorwa cy'amatora kizagenda neza.

Ati 'Turabasaba kuzinduka bakahagerera ku gihe bakaza bitwaje Indangamuntu site z'itora ni ku biro bya buri Karere. Tuzanatora Abasenateri bahagarariye amashuri makuru na za Kaminuza, turabasaba rero ko bazaza kare tugatora kare kugira ngo twese tubigiremo uruhare.'

Inteko itora mu Ntara y'Iburasirazuba igizwe n'abantu 394 barimo abagize Inama Njyanama z'imirenge n'abagize Inama Njyanama z'uturere karere twose. Biteganyijwe ko amatora azaba tariki ya 17 Nzeri 2024.

Abakandida Senateri batanu nibo bari kwiyamamariza mu Ntara y'Iburasirazuba

Kandida Senateri Bideri John Bonds yasabye abagize Inteko itora kumushyigikira nk’uko babikoze ubushize

Nambaje Aphrodise yavuze ko nagirirwa icyizere agatorwa azashyira imbere ubunararibonye yakuye mu nzego z'ibanze

Dr Alvera Mukabaramba yavuze ko nibamugirira icyizere azababera intumwa nziza

Nsengiyumva Fulgence yavuze ko ubunararibonye yakuye mu buyobozi bamugiriye icyizere yabwifashisha mu gukomeza gutanga umusanzu ku gihugu

Kandida Senateri Urujeni Angelina yavuze ko natorwa azifashisha ubunararibonye yakuye mu bitaro agafatanya n'abandi gushyiraho amategeko meza

Ni inkunga yatanzwe binyuze mu mushinga w'uyu muryango witwa 'Sustainable Agriculture for Economic Empowerment' watangijwe kuri uyu wa 12 Nzeri 2024 ubwo hanatangizwaga ku mugaragaro igihembwe cy'ihinga cy'umuhindo.

Byabereye muri Rulindo mu Murenge wa Bushoki mu Gishanga cya Bahimba gihingwamo na Koperative yitwa COVAMABA igizwe n'abarenga 3000 bahinga ku buso bwa hegitari 327.

Ni igishanga gikora ku mirenge itanu y'Akarere ka Rulindo kikaba gihingwamo ibirayi, ibishyimbo, imboga n'ibigori ari na byo bizahingwamo ku buso bunini muri iki gihembwe.

Ibikoresho byatanzwe ni amagare 120, toni 50.4 z'ifumbire ya DAP na Urea, imbuto y'ibigori ingana na toni 6.3 moto yo mu bwoko bwa Lifan imwe ndetse n'imiti yica udukoko.

Inyongeramusaruro aba bahinzi bahawe zizabafasha kongera umusaruro mu bwiza no mu bwinshi mu gihe moto izabafasha gutwara umusaruro cyangwa ifumbire bitewe n'ubunini bw'igishanga bahingamo.

Amagare 120 bahawe azafasha abafashamyumvire ba Koperative COVAMABA kubasha kugera ku bandi bahinzi mu buryo buboroheye.

Uyu mushinga watanzwemo iyi nkunga uzamara imyaka ibiri ukorera mu turere twa Rulindo na Nyagatare mu makoperative ane y'ubuhinzi.

Perezida wa Koperative COVAMABA, Habumuremyi Wellars yavuze ko inkunga bahawe ije ari igisubizo ku bahinzi kandi igiye kubafasha kongera umusaruro wabo no kuwubonera isoko.

Ati 'Twari dufite abahinzi bamwe b'abakene bagorwaga no kwigondera inyongeramusaruro kandi iyo ifumbire ikoreshejwe ku kigero cya nyacyo ni bwo yeza cyane. Uretse icyo kibazo cy'igishoro, twagiraga n'ikindi cyo kubura isoko rihamye. Twishimiye ko uyu mushinga uzajya uduha imbuto n'ifumbire kandi unatugurire umusaruro'.

Habumuremyi yongeyeho ko nk'abahinzi bazungukira cyane mu mahugurwa y'ubuhinzi Solid'Africa ibaha ndetse no kubarinda ibihombo by'amasoko adahamye kuko iyo koperative iherutse no kwamburwa agera kuri miliyoni 27 Frw n'abaguze umusaruro.

Umuyobozi w'Umushinga 'Sustainable Agriculture for Economic Empowerment' Kwizera Fred yavuze ko ikigamijwe ari ugufasha abahinzi gukuraho imbogamizi z'ibanze umuhinzi ahangana na zo.

Ati 'Abahinzi bakunze kugorwa no kubona inyongeramusaruro, isoko n'ubumenyi. Twarabibazaniye kugira ngo turebe uburyo byabazamura mu mwuga wabo n'ubukungu bwabo'.

Yongeyeho ko uyu mushinga wibanda ku bahinzi b'ubushobozi buke ndetse biganjemo abagore aho witezweho kongera 40% ku musaruro w'ibyo bahinga, kazamura ubukungu bwabo ho 61% kandi ukagabanya 20% by'umusaruro wangirika.

Umuyobozi Mukuru wa Solid'Africa, Ndoli Patrick yavuze ko uyu muryango wishimiye kwagurira ibikorwa byawo mu buhinzi kandi ko witeze intambwe ikomeye uzageza ku bahinzi ku bufatanye na bo n'abandi bafatanyabikorwa batandukanye.

Umuryango Solid'Africa washinzwe mu 2010 ukaba usanzwe ugaburira abarwayi bakennye mu bitaro bitandatu byo mu Mujyi wa Kigali buri munsi, ndetse ukagaburira abanyeshuri bo mu bigo bibiri by'amashuri bagera ku 8000 ifunguro rya ku manywa.

Ukora kandi ubukangurambaga ku mirire myiza ahantu hatandukanye ndetse ubu ukaba winjiye no mu buhinzi.

Abahinzi bagaragaje aho bageze bongera umusaruro

Igishanga cya Bahimba gihingwamo imyaka itandukanye

Uwo mushinga watangirijwe rimwe n’igihembwe cy’ihinga cy’umuhindo

Habumuremyi Wellars yavuze ko inkunga bahawe ije ari igisubizo ku bahinzi kandi igiye kubafasha kongera umusaruro wabo no kuwubonera isoko

Mu nyongeramusaruro bahawe harimo n’ifumbire

Iki gikorwa cyitabiriwe n’abayobozi batandukanye

Umuyobozi Mukuru wa Solid’Africa, Ndoli Patrick yavuze ko uyu muryango wishimiye kwagurira ibikorwa byawo mu buhinzi kandi ko witeze intambwe ikomeye uzageza ku bahanzi

Amwe mu magare abahinzi bahawe

Amakuru dukesha Village Urugwiro avuga ko ibiganiro bya Perezida Kagame na Albert Bourla byabaye kuri uyu wa Kane tariki 12 Nzeri 2024.

Ku ruhande rw'u Rwanda ibi biganiro byanitabiriwe na Minisitiri w'Ubuzima, Dr Sabin Nsanzimana ndetse n'Umuyobozi Mukuru w'Urwego rw'Igihugu rw'Imiyoborere, Dr. Doris Uwicyeza Picard.

Baganiriye kuri gahunda y'amasezerano yatangijwe n'uru ruganda izwi nka 'An Accord for a Healthier World'. Igamije kugeza kuri bose kandi mu buryo bungana serivisi z'ubuvuzi.

Today at Urugwiro Village, President Kagame received Dr @AlbertBourla, Chairman and CEO of Pfizer Inc @pfizer, and his delegation. They discussed partnership on 'An Accord for a Healthier World' meant for equitable access to high-quality, safe and effective healthcare solutions. pic.twitter.com/qHsRy73wLI

— Presidency | Rwanda (@UrugwiroVillage) September 12, 2024

Banyuze muri iyi gahunda Pfizer ifite intego yo gufasha abantu miliyari 1,2 bo mu bihugu 45 bikennye kubona inkingo n'imiti ikora.

Mu 2022 U Rwanda rwabaye igihugu cya mbere cyatangiye kubyaza umusaruro aya masezerano rwashyizeho umukono arwemerera guhabwa imiti y'Uruganda rwa Pfizer ku mafaranga nk'ayo ku kiranguzo, rwatangiye gukoresha uwa Paxlovid uvura COVID-19.

Perezida Kagame yakiriye Albert Bourla uyobora Pfizer

Ku ruhande rw'u Rwanda ibi biganiro byanitabiriwe na Minisitiri w'Ubuzima, Dr Sabin Nsanzimana ndetse n'Umuyobozi Mukuru w'Urwego rw'Igihugu rw'Imiyoborere, Dr. Doris Uwicyeza Picard

Inzira za bisi nini zitwara abagenzi zizafasha mu koroshya urujya n'uruza ndetse n'umuvundo w'ibinyabiziga byatumaga abakoresha uburyo bwa rusange mu ngendo batinda mu mihanda.

Ntirenganya Emma-Claudine yabwiye The Newtimes, ko gushyiraho inzira zagenewe bisi zitwara abagenzi gusa, ari umwe mu mishinga migari ya guverinoma izafasha mu gukemura ibibazo by'ingendo.

Yagaragaje ko bishobora gutuma abantu bahitamo gukoresha imodoka zitwara abantu mu buryo bwa rusange kurusha uko bakoresha izabo bwite kuko bizagabanya igihe umuntu amara ategereje bisi kikava ku minota 30 kikagera kuri 15.

Ati 'Mu mezi atandatu tuzatangira gukora igererageza ry'inzira zihariye za bisi zitwara abantu mu buryo bwa rusange, aho ibice by'imihanda bizajya biharirwa bisi zitwara abagenzi mu masaha baba ari benshi [peak hours].'

Bitewe n'imiterere y'Umujyi wa Kigali usanga amasaha abagenzi baba ari benshi ari mu gitondo guhera saa 6:00-10:00 ndetse na nimugoroba kuva saa 17:00-22:30.

Umujyi wa Kigali wagaragaje ko uri gushyiraho ibikorwaremezo bizawufasha mu gukora igeregeza kuri uwo mushinga.

Biteganyijwe ko igeragezwa ryabyo rizahera ku muhanda uva mu Mujyi-Rwandex-Sonatubes-Giporoso, bikazakomereza ku mihanda wo mu Mujyi-Kimironko n'umuhanda wo mu Mujyi-Kicukiro.

Umujyi wa Kigali ukomeje gushyira imbaraga mu kubaka ibikorwaremezo by'imihanda ishobora kwifashishwa nk'uwa Kimicanga-Kacyiru-Golf Course-Nyarutarama ushobora kwifashishwa n'abatuye Kibagabaga, Kimironko na Remera berekeza mu Mujyi.

Hari undi muhanda uri inyuma y'ahahoze ari Sports View Hotel uteganye na Stade Amahoro-Kagara-Baho Hospital-Nyarutarama ndetse n'umuhanda wa Kabeza-mu Itunda-Busanza ushobora gufasha abavuye muri Kanombe, Niboyi n'ahandi batanyuze mu muhanda mugari.

Mu bindi Umujyi wa Kigali uteganya gukora mu birebana no guteza imbere ubwikorezi rusange, ni ukubaka gare ya Nyabugogo ishobora kuzura mu 2027 aho biteganyijwe ko izatwara ari hagati ya miliyoni 100$ na 150$.

Hari kandi undi mushinga wo gukoresha utumodoka two mu kirere, Umuyobozi w'Umujyi wa Kigali, Dusengiyumva Samuel, aherutse gutangaza ko inyigo yawo yarangiye kandi ko uri mu bizakorwa mu myaka itanu iri imbere.

Umujyi wa Kigali urateganya gukora igerageza ry’inzira zahariwe bisi zitwara abagenzi mu mezi atandatu ari imbere

Ubwo yagiranaga ikiganiro na Televiziyo yo muri Mozambique, Gen Maj Kagame yasobanuye ko ubu ibice bigenzurwa n'Ingabo z'u Rwanda bitekanye.

Ati 'Navuga ko ibintu bimeze neza mu bice byose tugenzura. Abantu baragenda nta nkomyi.'

Kuva mu ntangiriro za Kanama, hagiye havugwa imirwano hagati y'inzego zishinzwe umutekano n'ibyihebe mu mashyamba yo mu duce twa Mucojo mu Karere ka Macomia.

Ibyo bikorwa byo guhashya ibyihebe bivugwa ko byaberaga mu bilometero 100 uvuye mu Mujyi wa Mocímboa da Praia, bikifashishwamo intwaro zikomeye zirimo imodoka z'intambara mu gutahura aho ibyihebe byihishe.

Ati 'Turi gukora cyane kandi twabashije guca intege umwanzi. Twabashije kumwirukana mu ishyamba rya Catupa, muri Massalo no mu bice bya Mucojo. Hari ibindi bikorwa bigikomeje ariko icyo navuga ni uko umutekano uri mu biganza byacu.'

Cabo Delgado ni agace kigaruriwe n'ibyihebe kuva mu 2017. Kuva mu myaka itatu ingabo z'u Rwanda zagerayo, ibintu byasubiye mu buryo.
Gen Maj Alex Kagame wasoje ubutumwa bwe muri Mozambique, ni umwe mu basirikare bakuru bagize uruhare mu rugamba rwo kubohora igihugu. Yinjiye mu gisirikare mu 1987, bivuze ko afite ubunararibonye bw'imyaka 36.

Yasimbuwe na Gen Maj Emmy Ruvusha wageze muri Mozambique ku wa 20 Kanama 2024 yerekwa ibice byose Inzego z'Umutekano z'u Rwanda zifite mu nshingano birimo Mocimboa da Praia, Chinda, Palma, Afungi, Pundanhar, Macomia, Ancuabe na Pemba.

Gen Maj Alex Kagame ubwo yahererekanyaga ububasha na mugenzi we Gen Maj Ruvusha

Iki kimenyetso gishyizwe ku cyicaro gikuru cya Loni mu gihe hari guterana Inteko Rusange ya 79 y'uyu muryango. Cyashyizwe mu busitani buherereye mu gice cy'iburengerazuba kuri iki cyicaro cya Loni.

Iki kimenyetso cy'urumuri rw'icyizere kiriho ubutumwa bugira buti 'Jenoside yakorewe Abatutsi mu Rwanda mu 1994, Twibuke twiyubaka'.

Iki kibumbano kandi ni ikimenyetso cy'umuhate w'u Rwanda mu bikorwa bigamije gukumira Jenoside, ndetse kigashimangira intego yarwo mu kurwanya ingabitekerezo ya Jenoside, abayihakana n'imvugo zibiba urwango.

Melissa Fleming uri mu bakozi b'Umuryango w'Abibumbye yavuze ko 'Ikimenyetso cy'urumuri rw'icyizere rwo kwibuka kizahora cyaka nk'ikintu kigaragara gifasha umuryango mpuzamahanga ndetse n'abantu benshi basura Umuryango w'Abibumbye, kwamagana no guhangana n'imvugo zose zibiba urwango.'

Ambasaderi w'u Rwanda muri Loni, Ernest Rwamucyo yavuze ko 'Urumuri rw'icyizere rwo kwibuka ni ikimenyetso cy'amahoro, ubutabera n'ubumwe, indangagaciro ziza imbere mu gukira ibikomere kwacu n'umuhate wacu mu bijyanye n'ubumwe n'ubwiyunge.'

'Iki kibumbano kibumbatiye igisobanuro gikomeye bitari ku Banyarwanda gusa, ahubwo no ku muryango mpuzamahanga mu bya dipolomasi. Ni ikimenyetso cy'inshingano dufite nk'abadipolomate n'abahagarariye umuryango mpuzamahanga dufite mu gukumira ubwicanyi. Uru rumuri rutwibutsa kugira icyo dukora igihe cyose tubonye ibimenyetso by'urugomo, kugira ngo amasomo u Rwanda rwasize duharanire ko atibagirana.'

Iki kibumbano ni cyo kimenyetso cya mbere gihoraho gishyizwe ku cyicaro cya Loni mu kunamira abazize Jenoside yakorewe Abatutsi mu Rwanda mu 1994.

Ku Cyicaro cya Loni hashyizwe ikibumbano cy'urumuri rw'icyizere mu kwibuka abishwe muri Jenoside yakorewe Abatutsi

Ikipe y’igihugu ya Handball y’abatarengeje imyaka 20 izahura na Maroc muri 1/4 mu gikombe cy’Afurika.

Iki gikombe kirimo kubera muri Tunisia, u Rwanda rwageze muri 1/4 nyuma y’uko ejo rwatsinze Libya mu mukino usoza itsinda rya 2 ibitego 43-36.

U Rwanda rwari rwatsinzwe imikino 2 ya mbere ya Algeria na Tunisia rukaba rwarahise rugera muri 1/4.

Muri 1/4 rukaba rugomba guhura n’ikipe y’igihugu ya Maroc aho umukino uzaba ku wa Gatatu tariki ya 13 Nzeri 2024.

Ejo Amavubi azakina na Pyramids

Yavuze ko kuri ubu bitewe n'impinduka zigaragara mu mikorere, ubumenyi umuntu afite ari bwo bufite akamaro kurusha ibikubiye mu mpamyabumenyi ye.

Ni ingingo yagarutseho kuri uyu wa Gatatu tariki ya 11 Nzeri 2024, mu mahugurwa yari yateguwe na I&M Bank (Rwanda) Plc, yateguriwe abayobozi b'abakozi mu bigo bitandukanye bikorana n'iyi Banki.

Yari ajyanye n'uburyo bwo guhangana n'impinduka zigaragara mu mikorere ya none, zirimo n'ikoranabuhanga rishya rigenda ryaduka n'ibindi.

Aya mahugurwa yibanze ku kongerera ubumenyi aba bayobozi mu bijyane no kwisanisha n'izi mpinduka mu guharanira iterambere rirambye ry'ibigo bakorera.

Dr. Lanre Olusola, yagaragaje ko ibikorwa by'abayobozi bigira ingaruka zikomeye mu kazi no ku bakozi. Yasobanuye ko guhindura imikorere y'ikigo runaka hagamijwe iterambere bitari uguhindura amategeko cyangwa guha akazi abakozi bashya, ahubwo ko kumenya ibitekerezo no guha agaciro inyunganizi z'abo bakoresha ari ingenzi.

Ikindi cyagarutsweho ni imikorere y'iki gihe, aho yagaragaje ko abakoresha bakwiye kwita ku musaruro w'abakozi babo kuruta gushyira imbaraga mu kubasaba kuba mu biro kuko byagaragaye ko bishoboka ko abantu bakorera mu ngo.

Dr. Lanre Olusola, yashishikarije abayobozi b'abakozi gushyira imbaraga mu mahugurwa y'abo.

Ati 'Mu kongerera abakozi ubushobozi bizatuma bagira imbaraga zo gukemura ibibazo byabo bwite. Ibi bishobora guteza imbere umuco wo gutekereza byagutse no gufata inshingano.'

Aya mahugurwa yabaye mu gihe hashize iminsi mike ubuyobozi bwa I&M Bank (Rwanda) Plc buhuriye mu mwiherero, hagamijwe gusuzumira hamwe imikorere ya banki no kureba uko yarushaho guhuzwa n'ibyifuzo by'abakiliya.

Umuyobozi Mukuru wa I&M Bank (Rwanda) Plc, Benjamin Mutimura, yagaragaje ko mu mezi make ari imbere 50% by'ubumenyi buhari ubu butazaba bugikenewe ku isoko ry'umurimo, bityo hakwiye izindi mbaraga mu kujyana n'igihe.

Ati 'Ikintu kimwe maze kubona ni uko byinshi bigenda bihinduka. Tugomba kuzirikana ko 50% by'imirimo ihari ubu itazaba ihari mu myaka ya vuba ahubwo hakenewe kwihugura ku bumenyi bushya. Hamwe n'ikoranabuhanga hazaba hari utuzi dushya tutazi ubu, igikurikira ni ukumenya uko wakitegurira kuzakira ibyo utazi ariko bizaza.'

Yashimangiye ko nk'abayobozi b'abakozi mu bigo bitandukanye, bakwiye kureba ibikenewe mu kazi ka buri munsi bakabijyanisha n'ibigezweho ku isoko ry'umurimo.

Ati 'Impamvu y'uyu munsi ni ukureba ibishya bigezwego ku isoko, iterambere riri mu bijyanye n'akazi, n'ibindi. Ni ukureba ni gute ibyo byose twabyinjiza mu kazi kacu.'

Benjamin Mutimura, yahamije ko kwinjiza izi mpinduka mu kazi, bishimangira intego yo kureba ko ibyo bakora byaramba kandi bikagira ingaruka nziza ku baturage.

Imwe mu nkingi z'iterambere rirambye za I&M Bank (Rwanda) Plc, harimo guhindura imibereho y'abaturage bangana na miliyoni 2 mu myaka itatu iri imbere.

Umuyobozi Mukuru wa I&M Bank, Benjamin Mutimura, yagaragaje ko mu mezi make ari imbere ubumenyi buhari ubu butazaba bugikenewe ku isoko ry'umurimo, bityo hakwiye izindi mbaraga mu kujyana n'igihe

Impuguke mu bijyanye n'igenamigambi ry'ibigo no guhugura abakozi muri Afurika, Dr. Lanre Olusola, yagaragaje umumaro w’ubumenyi bw’umuntu ku isoko ry’umurimo mu bihe bya none

Hagaragajwe ko hakwiye kwita ku musaruro w'abakozi kuruta gushyira imbaraga mu kubasaba kuba mu biro

Hafashwe umwanya wo kumurika itsinda rya bamwe mu bakozi ba I&M Bank (Rwanda) Plc

Aya mahugurwa yibanze ku kongerera ubumenyi abayobozi b’abakozi mu bijyane no kwisanisha n’impinduka ku isoko ry’umurimo mu guharanira iterambere rirambye

Aya mahugurwa yabaye mu gihe hashize iminsi mike ubuyobozi bwa I&M Bank (Rwanda) Plc buvuye mu mwiherero wari ugamije gusuzumira hamwe imikorere ya banki

Abari bafite ibibazo bahawe umwanya wo kubaza

Amafoto Niyonzima Moses

Umudage Torsten Frank Spittler utoza ikipe y’igihugu Amavubi, mu mezi 10 amaranye iyi kipe, yari amaze gutuma icyizere kigaruka mu bakunzi ba ruhago mu Rwanda.

Ubwo u Rwanda rwari rumaze kugwa miswi na Nigeria mu gushaka itike y’Igikombe cya Africa AFCON ya 2025, umutoza Torsten Frank Spittler yibukije abanyarwanda ko kuba yarahisemo gusinya amasezerano y’umwaka umwe, ari uko ari wo yashakaga kumara atoza umupira w’amaguru hanyuma akabihagarika.

Frank Spittler yagize ati: “Nkigera hano bambajije igihe namara mbabwira ko nshaka umwaka umwe kuko inkweto zanjye ziri kugenda zisaza ahubwo nzishima nizibasha kugeza mu Ukuboza. 

Kuva yatangira gutoza ikipe y’igihugu y’u Rwanda “Amavubi”, Torsten Frank Spittler uretse umukino wa Benin yatsindiwe muri Cote d’Ivoire, nta wundi mukino aratsindwa. Mu mikino y’amarushanwa uyu mutoza yakinnye, yatsinze Afurika y’Epfo na Lesotho, naho amakipe nka Libya, Nigeria na Mozambique anganya nu Rwanda. 

Mu gushaka itike y’Igikombe cy’Isi cya 2026 kizabera muri Leta Zunze Ubumwe za Amerika, Canada na Mexico, Frank Spittler n’Amavubi ni aba mbere mu itsinda H ririmo amakipe y’ibigugu nka Nigeria, Afurika y’Epfo, Benin, Mozambique na Lesotho.

Mu gushaka itike y’Igikombe cya Africa AFCON ya 2025, nabwo Amavubi ya Torsten Frank Spittler nubwo afite amanota abiri mu itsinda D, yihagazeho yanga gutsindirwa muri Libya,  yanga no gutsindirwa i Kigali na Nigeria aho amakipe yombi yaguye miswi. 

Kugeza ubu mu gushaka itike y’Igikombe cya Africa AFCON ya 2025, u Rwanda ni urwa Gatatu n’amanota 2, Benin ya Kabiri ifite amanota 3, Nigeria ya mbere ifite amanota 4, Libya yo ifite inota rimwe. 

Mu gihe byose bisa nk’aho byashobokaga ko u Rwanda rwajya mu gikombe cy’Isi cyangwa mu gikombe cya Afurika, umutoza wari uri kubihirimbanira ari we Torsten Frank Spittler yatangaje ko asigaje amezi abiri gusa mu Rwanda. 

Torsten Frank Spittler namara gusezera ku Amavubi, ikipe y’igihugu y’u Rwanda ishobora kuzasubira mu bihe bibi nk’ibyo yagiyemo guhera tariki 15 Mutarama 2015, ubwo abanyarwanda bamenyeshwaga ko umutoza Stephen Constantine yatandukanye n’ikipe y’igihugu, akerekeza gutoza u Buhinde. 

Ku bwa Stephen Constantine, nabwo u Rwanda mu mupira w’amaguru rwari rufite umwuka mwiza nk’uwo ku bwa Trosten Frank Spittler. 

Ubwo yageraga mu Rwanda, umukino we wa mbere, Stephen Constantine yatsinze ikipe y’igihugu ya Libya ibitego bitatu ku busa, ubwo bashakaga itike yo kujya mu gikombe cya Afurika, byari biteganyijwe ko cyari kubera muri Morocco, kikaza kubera muri Guinea Equatorial kubera icyorezo cya Ebola cyavugwaga muri Morocco. 

Umukino wa kabiri yatoje ikipe y’igihugu y’u Rwanda ‘Amavubi’, wari umukino wa gicuti wahuje u Rwanda na Gabon. Icyo gihe Gabon yari yanamanuye i Kigali intwaro nka Pierre-Emerick Aubameyang wari umeze neza muri Brussia Dortmund, ariko ibyo ntabwo byakanze Stephen Constantine kuko yatsinze Gabon igitego kimwe ku busa cya Jacques Tuyisenge. 

Nyuma y’ibyumweru kimwe, Stephen Constantine n’Amavubi ye bagiye muri Gabon yari igifite Pierre-Emerick Aubameyang, ayisigira impamba y’igitego kimwe ku busa, igitego cyatsinzwe na Medie Kagere. 

Nyuma yo kwahuranya Gabon inshuro ebyiri, Stephen Constantine yikojeje muri Congo Brazzaville mu mikino yo gushaka itike y’Igikombe cya Africa AFCON, ntabwo yahiriwe kuko u Rwanda rwatsinzwe na Congo Brazzaville 

Nubwo Stephen Constantine yari yatsindiwe muri Congo Brazzaville, yatashye akubita agatoki ku kandi, nuko na Congo igeze mu Rwanda ayitsinda ibitego bibiri ku busa, abifashijwemo na Ndahinduka Michael (Bugesera) Na Meddie Kagere. 

Nyuma y’uko amakipe yombi yari agize ibitego bibiri, u Rwanda rwasezereye Congo Brazzaville muri Penaliti. Ibyo gukomeza ku Rwanda ntabwo byajemo amahirwe, kuko rwagonzwe n’ikibazo cy’uko rwakinishije umukinnyi ufite ibyangobwa bibiri nuko Congo Brazzaville, ikomeza mu gikombe cya Afurik ityo ariko itashoboye gutsinda u Rwanda. 

Izo ntsinzi zisukiranyaga gutyo, zarangiranye n’igenda rya Stephen Constantine mu 2015 aho ikipe y’Igihugu y’u Rwanda ‘Amavubi’ yatangiye gutsindwa umusubirizo. 

Nyuma yo kugenda kwa Stephen Constantine, u Rwanda twatojwe n’abatoza batandukanye nka Johnathan McKinstry, Mashami Vincent, Carlos Alós Ferrer, Antoine Hey n’abandi batigeze bahabwa amasezerano, gusa ibyishyimo byarabuze, ahubwo amarira aba yose ku bakunzi b’ikipe y’igihugu ‘Amavubi’. 

Biraca amarenga ko Ikipe y’igihugu y’u Rwanda ‘Amavubi’, ishobora gusubira mu bihe yari imazemo imyaka icyenda byo kujya itsindwa umusubirizo. Ndetse bikongera kugora ishyirahamwe ry'umupira w'amaguru mu Rwanda ‘FERWAFA’, kongera kubona umutoza mwiza uri ku rwego rwa Torsten Frank Spittler cyangwa  Stephen Constantine. 

Hasabwa iki? 

Abashinzwe gukurikirana ikipe y’igihugu y’u Rwanda “Amavubi”, barasabwa kwicara bakaganiriza umutoza, bakamwumvisha ibyiza byo kuba mu Rwanda. Bakwiriye kandi gushaka uko yahabwa ibishoboka byose birimo no kongera amasezerano ariko agakomeza inzira y’intsizi ari kuyoboramo ikipe y’igihugu y’u Rwanda “Amavubi”. 

Torsten Frank Spittler utoza Amavubi aherutse gutangaza ko atazakomeza akazi ko gutoza 

Hari impungenge ko nyuma y’igenda rya Torsten Frank Spittler ikipe y’igihugu y’u Rwanda ‘Amavubi’ izasubira hasi mu mikinire

Mu gihe gito amaze mu Rwanda, umutoza Torsten Frank Spittler yatsinze ibihugu bikomeye harimo na Afurika y’Epfo 

Torsten Frank Spittler yari amaze gufasha abakinnyi b’abanyarwanda kwizamurira icyizere mu kibuga 

Kugenda kwa Torsten Frank Spittler bishobora gushyira u Rwanda mu kaga nk’ako rwagiyemo Stephen Constantine akimara kugenda 

Ubwo yatozaga u Rwanda, Stephen Constantine, ibihugu yarabitsinze karahava