Umukunzi wa Rayon Sports, Habiyakare Saïdi yabwiye umuyobozi wa Gasogi United Kakooza Nkuriza Charles [KNC] ko bashaka kumutsinda agahurwa umupira w’amaguru.

Ni nyuma y’uko KNC atangaje amagambo akomeye kuri Rayon Sports avuga ko ku wa Gatandatu ari ubukwe bazacyura umugore wa bo, avuga ko bamwe mu bahoze bayobora iyi kipe bari barahunze ariko igihangange Gasogi kibagaruye cyane ko bakusanyije amafaranga yo gufasha kwitegura uyu mukino.

Ni umukino w’umunsi wa 4 wa shampiyona y’icyiciro cya mbere mu Rwanda umwaka w’imikino wa 2024-25 Gasogi United izakiramo Rayon Sports ejo saa 19h00′ kuri Stade Amahoro.

Mu kiganiro City Sports, Habiyakare Saïdi usanzwe uba muri Amerika, yamubwiye ko agasozi ka Gasogi kadafite ikipe yahangana na Rayon Sports.

Ati “Nk’uko nabikubwiye ko nkwemera nka perezida wagerageza kuba waryoshya ibirori ariko uri umuperezida utagira ikipe, na we urabizi ko ako gasozi ka Gasogi katagira ikipe yahangara ikipe y’ikigugu nka Rayon Sports, urimo uripima mu bidakunda.”

“Nabikubwiye inshuro nyinshi reka mbigusubiriremo, iyo twahagurutse ntushobora kudutsinda, narabikubwiye cya gihe turi muri Fine FM utangaza ko nyuma yo ku wa Mbere tuzabonana, ku wa Mbere urahunga, uvuza induru ahantu hose uca ibikuba ngo wibwe.”

Yavuze ko na shampiyona y’umwaka ushize ijya gutangira nabwo yabivuze ariko nabwo baramutsinda, akaba atumva ahantu uyu munsi akura imbaraga zo kuvuga ko bazatsinda.

Yavuze ko Gasogi United atari ikipe ihatanira shampiyona ahubwo ari ikipe iza gufasha izindi muri shampiyona.

Ati “Ntabwo wakigereranya n’ikipe y’ikigugu, ikipe ya we ni akana, izo ni ikipe ziza gufasha izindi muri shampiyona, ntabwo ari ikipe iza gukinira shampiyona.”

Yakomeje avuga ko bagiye kumutsinda bagatuma ahurwa umupira w’amaguru akaba yanasesa Gasogi United.

Ati “ubu rero tugiye kuguhuza umupira, buri uko uhuye na Rayon Sports iyo kipe ya we urayisesa, usezera muri shampiyona cyangwa ukayisesa, ku wa Mbere noneho ushobora kuyisesa burundu butazagaruka kuko ibyo uzabonesha amaso ya we, tugiye kuhuza umupira w’amaguru.”

Yunzemo ati “twari twakuretse ni wowe ubizanye, tegereza ku wa Mbere uzaba uhari, ntuzayisese cyangwa ngo wirukane abakinnyi, uzihangane ube umusiporutifu.”

Yavuze ko intsinzi yose bazayibona batazabazwa uko yaje igomba kuba ari intsinzi.

Ati “ujya kugura inyama muri busheri (butchery) ntabaza uko inka yabazwe, natwe intsinzi yose ni intsinzi ntitubazwa uko yabonetse. Ntuzampunge ndashaka ko uzansobanurira uburyo ndi ibandi.”

Bagiye guhura Gasogi United iyoboye urutonde n’amanota 7 mu gihe Rayon Sports ari 11 n’amanota 2.

Saïdi yavuze ko bazangisha KNC umupira

KNC na we yahize gutsinda Rayon Sports

Izi mudasobwa zigezweho za Desktop zo mu bwoko bwa i7 ya nyuma igezweho zishobora kwakira murandasi mu buryo bwose, yaba iy'umugozi cyangwa inziramugozi, ni inkunga yatanzwe n'Umuryango Rwanda Health Initiative for Youth and Women igamije gufasha abakenera serivisi z'ubuzima bw'imyororokere.

Ubu buryo bw'ikoranabuhanga buzajya bukoreshwa ku bakenera serivisi z'ubuzima bw'imyororokere, umurwayi azajya agana ikigo nderabuzima kimwegereye yakirwe n'umukozi uhakorera amusuzume yandike muri mudasobwa ifite ikoranabuhanga na murandasi byo ku rwego rwo hejuru.

Aha azajya aba ari gukorana n'umuganga uri ku Bitaro na we arebe ayo makuru nabona hari ibindi bikenewe asabe umuforomo kubikora cyangwa yivuganire n'umurwayi uri kwivuza maze amwandikire imiti wa muforomo bari gukorana abone kuyiha umurwayi.

Ibi bizatuma umurwayi avurirwa hafi bidasabye ko atakaza umwanya n'amafaranga ajya ku bitaro ahubwo avurirwe ku kigo nderabuzima kandi abikorewe n'umuganga w'inzobere imbona nkubone.

Bizafasha kandi abaforomo bo mu bigo nderabuzima kongera ubumenyi kuko bazajya bigira ku baganga b'inzobere, hiyongereho kubika amakuru y'umurwayi mu buryo bw'ikoranabuhanga no kumukurikirana mu kwivuza kwe byorohe.

Umuyobozi wungirije w'Ishami ry'Ubuvuzi mu Bitaro bya Ruhengeri, Dr Nizigiyimana Jean Claude, yavuze ko bajyaga bahura n'imbogamizi kuko abarwayi bajyaga batinda kubageraho ariko ubu buryo bugiye kubafasha kujya babakurikiranira ku mavuriro abegereye.

Yagize ati “Twari dufite imbogamizi z'uko abarwayi bajyaga batinda kutugeraho cyangwa ngo bafashirizwe ku bigo nderabuzima batarinze kugera hano, hakiyongeraho n'amafaranga batakazaga mu ngendo n'umwanya, ariko ubu iri koranabuhanga rigiye kujya ritworohereza gufasha abarwayi batavuye ku bigo nderabuzima. Murumva ko bizatuma dufasha abarwayi benshi.”

Umuyobozi w'Umuryango Rwanda Health Initiative for Youth and Women, watanze iyi nkunga, Dushimeyezu Evangeline, yavuze ko bazakomeza gukorana na Minisiteri y'Ubuzima mu kongerera abaforomo ubumenyi bwo gukoresha iri koranabuhanga agasaba ibigo byazihawe kuzibungabunga no kuzibyaza umusaruro.

Mu bushakashatsi bwakozwe n'Umuryango utari uwa Leta IMRO (Ihorere Munyarwanda Organisation) uharanira uburenganzira bwa muntu wibanda ku buzima bw'imyororokere no kurwanya SIDA, mu ntangiriro z'uyu mwaka werekanye ko kuba abana b'abakobwa bari hasi y'imyaka 19 batoroherezwa mu guhabwa serivisi z'ubuzima bw'imyororokere bituma hari abatwara inda zitateganyijwe bityo iyi serivisi ikazagira icyo ibigabanyaho.

Ubuyobozi bw’Ibitaro bya Ruhengeri bwashyikirijwe mudasobwa buzasangira n’ibigo nderabuzima byabyo

Ibitaro bya Ruhengeri n’ibigo nderabuzima 14 nibyo byahawe mudasobwa zizifashishwa mu buzima bw’imyororokere

Ikigamijwe ni ugutanga umusanzu mu iterambere ry'umuziki no gufasha abadukurikira kuruhuka no kunogerwa n'impera z'icyumweru. Kuri iyi nshuro abahanzi batandukanye bakoze mu nganzo batanga ibihangano bishya.

Kuri ubu, abahanzi nyarwanda baba abakora umuziki usanzwe ndetse n'abakora uwo kuramya no guhimbaza Imana bose bakoze mu nganzo.

Imwe mu ndirimbo nshya zasohotse muri iki cyumweru zo kuramya no guhimbaza Imana, ni iyitwa 'Mukiza,' ikaba ari iy'umuhanzikazi Tonzi.

Tonzi avuga ko Imana iramutse imwishyuje ku byiza yamukoreye, “sinabona icyo nishyura”, akaba ari yo mpamvu buri mwaka ku isabukuru ye ashyira hanze indirimbo nshya.

Tariki 18 Nzeri ni wo munsi yizihizaho isabukuru y’amavuko.Afata Isabukuru ye nk’umunsi udasanzwe mu buzima ndetse inshuro nyinshi akora ibirori bikomeye akishimana n’inshuti n’umuryango.

Mu kiganiro na imInyaRwanda, Uwitonze Clementine yavuze ko inganzo y’indirimbo yise “Mukiza” ari ubuzima bwe bwa buri munsi abanamo n’Imana.Ati “Imana ya mbereye umukiza, rero ni ishimwe ndetse ni umuhigo nahaye Imana ko uko ntangiye uwundi mwaka ku isabukuru yanjye nzanjya ntura Imana yanjye indirimbo nyishimira.”

Indi ndirimbo nshya, ni iyitwa 'Do It' y'itsinda ryitwa J-Sha rigizwe n'abakobwa b’impanga bize umuziki ku Nyundo bakoranye na Andy Bumuntu, ndetse n'izindi ziryoheye amatwi.

Dore urutonde rw'indirimbo 10 InyaRwanda yaguhitiyemo zakwinjiza neza muri weekend:

1. Do It — J-Sha ft Andy Bumuntu

“>

2. Bizima — Ish Kevin

“>

3. Marry Me – Edouce Softman

“>

4. Uyu – Yampano

“>

5. Bwe Bwe Bwe (Remix) – Bruce The 1st ft Kivumbi King, P-Fla, Juno Kizigenza, Green P, B-Threy, K8 Kavuyo

“>

6. Saa Cyenda — Serge Iyamuremye

“>

7. Mukiza — Tonzi

“>

8. C'est Ton Jour — Aline Gahongayire

“>

9. Ndashimira Yesu — True Promises

“>

10. Zadubayi — Yee Fanta

“>

Yabitangaje mu ijoro ryo kuri uyu wa Kane tariki 19 Nzeri 2024, ubwo yari mu gace kazwi nka “Meet Me Tonight” gafatiye ku gitaramo cy’urwenya kizwi nka Gen-Z Comedy cyabereye muri Kigali Conference and Exhibition Village ahazwi nka Camp Kigali.

Ni ubwa mbere uyu muyobozi yari atanze ikiganiro muri ibi bitaramo biba kabiri mu kwezi. Ikiganiro cye kibanze ku kugaragaza ibyo Umujyi wa Kigali uteganyiriza abawutuye, ariko kandi anitsa ku ruhare rw’ubuhanzi mu gutumwa umujyi wa Kigali umenyekana ku ruhando mpuzamahanga.

Uretse Fally Merci ubaza ibibazo umutumirwa, na buri wese ukurikiranye iki gitaramo aba afite uburenganzira bwo kubaza ikibazo ashaka bigendanye n’umurongo w’umutumirwa.

Ubwo yari ahawe ijambo, umunyamakuru akaba n’umuhanzi Luwano Tosh wamenye nka Uncle Austin, yabwiye Meya Samuel Dusengiyumva ko ashingiye ku byo abona, haracyakenewe inzu zagenewe ubuhanzi gusa. 

Yatanze urugero avuga ko kuba igitaramo nk’iki kibera muri Camp Kigali, atari ho cyakabereye, kuko usanga n’amajwi asohoka nabi, ndetse rimwe na rimwe bigatuma abantu batabona ibyo baba bishyuriye neza.

Yanagaragaje ko inzu nyinshi abahanzi bakoreramo, usanga bafite amasaha batagomba kurenza ahanini bitewe n’uko inzego zivuga ko hari amasaha batagomba kurenza mu rwego rwo kwirinda urusaku rwa nijoro.

Mu gusubiza, Meya Samuel yavuze ko ashingiye ku makuru afite ndetse n’ibyo nawe yibonera ubuhanzi bwateye imbere kuko bitandukanye n’uko byari bimeze mu myaka itambutse.

Ati “Ubona umuziki mu Rwanda yaba urwenya n’ibindi bikorwa by’ubuhanzi biri kugenda bitera imbere, twababwira y’uko rero dufite gahunda y’uko muri iyi myaka itanu hari icyo tuzakora kugira ngo tubone ibikorwaremezo bifasha abahanzi.” 

Yavuze ko uretse kubaka ibi bikorwaremezo, hazanashyirwaho uburyo bworohereza abahanzi kugira ngo babashe kubikoresha, kuko hari ibihari byubatswe ariko usanga abahanzi batisangamo, ahanini bitewe n’uko bihenze.

Arakomeza ati “Kandi bigurika. Kuko hari ibihari ariko mugaragaza ko bihenze cyane kubigeraho, turabizi, tujya tubiganiraho, ariko icyo turashaka kugikuraho.”

Uyu muyobozi w’Umujyi wa Kigali, yavuze ko n’ubwo bimeze gutya ariko hari ibikorwa byamaze kubakwa harimo nka Imbuga City Walk, Canal Olympia ku i Rebero n’ahandi.

Ati “Mu gihe dushaka ahandi, wa mugani nk’uko wabivugaga hafunze, hashobora kugabanya urusaku, ariko aho ngaho mwahakoresha, ariko nagusezeranya ko muri iyi myaka itanu hari icyo tuzabikoraho, kandi uzakibona.”

Muyoboke Alex wabaye umujyanama w’abahanzi bakomeye mu Rwanda, yashimye cyane Meya Samuel Dusengiyumva ku bwo gushyigikira abahanzi, kandi yagiye abigaragaza mu bihe bitandukanye.

Yavuze ko yemeranya n’ibyavuzwe na Uncle Austin, kuko abahanzi bamaze igihe kinini basabwa kubakirwa inyubako n’ibindi bikorwaremezo bigenewe ubuhanzi gusa.

Muyoboke Alex washinze Decent Entertainment, yavuze ko ababarizwa muri Siporo bubakiwe Sitade Amahoro, bubakirwa BK Arena ‘badutiza batugaraguza agati’.

Arakomeza ati “Nk’abahanzi dukeneye ahantu twajya dukorera ibitaramo, ndetse n’abahanzi bagakora ibitaramo cyane, kuko ntibagira aho bakorera ni nayo mpamvu ibitaramo biba ari bicyeya, kuko bitegurwa n’abategura ibitaramo cyangwa n’abandi babahaye amafaranga macye”

Yagaragaje ko n’ahitwa ko ari ho abahanzi bakorera ibitaramo hahenze cyane ku buryo ihema rimwe Fally Merci akoreramo igitaramo cya Gen-Z Comedy yishyura Miliyoni 3 Frw. Ati “Simpamya ko ayo mafaranga ayakuramo. Mudutubare.” 

Meya Dusengiyumva Samuel yabwiye abahanzi ko muri manda y'imyaka itanu hazubakwa inyubako zijyanye n'igihe kandi zifasha abahanzi gukora ibikorwa byabo bisanzuye

Dusengiyumva yavuze ko mu gihe hakiri gutegurwa uko hashyirwaho ibindi bikorwaremezo by'ubuhanzi, abahanzi bakwiye kwifashisha ahandi harimo na Canal Olympia 

Dusengiyumva yavuze ko ubuhanzi bwateye imbere bityo bakwiye gushyigikirwa mu nguni zose

Fally Merci [Uri ibumoso] waganiriye na Meya Samuel Dusengiyumva mu gitaramo Gen-Z Comedy

Ahmed wamamaye nka Papa Buryohe TV yitabiriye iki gitaramo cya Gen-z Comedy

 

Umukinnyi wa filime wamenyekanye nka 'Madederi' muri filime 'Papa Sava' yitabiriye iki gitaramo 

Umunyarwenya Rusine Patrick n'umugore we Iryn bari muri iki gitaramo gihuza umubare w'umuntu w'urubyiruko

Umubano mwiza w'u Rwanda na Indonesia washimangiwe n'uruzinduko Perezida Paul Kagame aheruka kugirira muri iki Gihugu, aho yari yitabiriye inama igihugu na Afurika.

Mu ntangiriro z'uku kwezi kwa Nzeri nibwo Perezida Kagame yagiriye muri Indonesia ndetse anagirana ibiganiro na Joko Widodo.

Mu kiganiro na IGIHE, Ambasaderi w'u Rwanda muri Indonesia, Sheikh Abdul Karim Harerimana , yavuze ko uru ruzinduko rwa Perezida Kagame rushimangira umubano ibihugu byombi bifitanye.

Ati 'Umubano hagati y'u Rwanda na Indonesia watangiye mu 2006 kandi uratera imbere. Muri Kamena 2024 Ambasade yacu yatashywe ku mugaragaro. Hasinywe n'amasezerano y'imikoranire atatu. Muri uku kwezi kwa Nzeri hasinywe andi masezerano y'imikoranire hagati y'Urugagaga rw'Abikorera na MoU hagati ya PSF n'urw'abikorera muri Indonesia, KADIN. Kuba nyakubahwa Perezida Kagame yaritabiriye iriya nama, ni ikindi kimenyetso cy'uko umubano w'ibihugu byacu byombi ukomeza gutera imbere.'

Yakomeje avuga ko hari impamvu nyinshi zatumye Perezida Kagame atumirwa muri iyi nama ariko zose zubakira ku cyubahiro afite bitewe n'ibintu bitandukanye yakoze.

Ati 'Ni umukuru w'igihugu wubashywe cyane ku Isi na Indonesia irimo. Bumvaga atabura muri iriya nama ya IAF kuko bazi ko ibitekerezo bye byubaka biba bikenewe. Yarishimiwe cyane kandi ijambo rye ryakiranywe uburemere rikwiye.'

Abajijwe niba hari uruzinduko Perezida wa Indonesia yaba ateganya kugirira mu Rwanda, Sheikh Abdul Karim Harerimana yavuze ko bitaremezwa neza, gusa u Rwanda rufite icyo cyifuzo.

Ati 'Ubu Indonesia iri mu nzibacyuho. Uwatorewe kuyobora igihugu mu matora yabaye muri Gashyantare 2024 azajya mu nshingano mu Kwakira 2024. Ubwo ibintu nibimara kujya mu buryo nibwo tuzamenya ibizakurikira. Cyakora icyifuzo cyo kirahari.'

Ni ubwa mbere bibayeho ko u Rwanda rugira Ambasaderi ufite icyicaro muri iki gihugu, kuko muri Indonésie rwari rusanzwe ruhagarariwe na Ambasaderi ufite icyicaro muri Singapore.

Ubwo yitabiraga iyi nama, Perezida Paul Kagame yatangaje ko ku butegetsi bwa Joko Widodo wa Indonesia yashyize imbaraga mu gukorana na Afurika n'u Rwanda by'umwihariko ku buryo umusaruro wabyo uzaba uwo kwishimirwa na buri wese.

Ati 'Wabaye inshuti y'ukuri. Binyuze mu gukorana nawe, hashyizweho umusingi uhamye kandi sinshidikanya ko hagiye kugaragara umusaruro ufatika twese tuzishimira.'

Joko Widodo w'imyaka 63, yagiye ku butegetsi kuva mu Ukwakira 2014. Abarizwa mu ishyaka rya Indonesian Democratic Party of Struggle.

Mu 2022 ni bwo Perezida Paul Kagame yaherukaga muri Indonesia, aho yari yitabiriye Inama y'Abakuru b'Ibihugu 20 bikize ku Isi, G20.

Umukuru w'Igihugu yabonanye na mugenzi we wa Indonesia bagirana ibiganiro byibanze ku hazaza h'ubutwererane bw'impande zombi n'uburyo bwo gushimangira umubano mu bya dipolomasi hagati y'u Rwanda na Indonesia.

Muri Kamena 2024, u Rwanda na Indonesia byasinye amasezerano arimo ay'imikoranire hagati y'ibihugu byombi yo gusangizanya ubunararibonye mu bya politiki no gukuraho visa ku badipolomate n'abafite pasiporo za serivisi.

Mu ntangiriro za Nzeri 2024, Perezida Kagame yasuye Indonesia yitabiriye inama ihuza iki Gihugu na Afurika

Ambasaderi w'u Rwanda muri Indonesia, Sheikh Abdul Karim Harerimana, yatangaje ko umubano w'ibihugu byombi ugenda urushaho gutera imbere ku buryo n'u Rwanda rufite n'icyifuzo cy'uko Perezida w'iki Gihugu yazarugiriramo uruzinduko