Blog

Ni inkuru yamenyekanye mu ijoro ryo ku wa 26 Nzeri 2024, aho uyu Yankurije wari utuye mu Mudugudu w'Akabuga, Akagari k'Icyeru, mu Murenge wa Mukura, yapfuye mu masaha ashyira saa mbili z'ijoro, nyuma yo gutambuka inzoka yari yitambitse hafi y'umuryango.

Amakuru avuga ko ngo akimara kuyitambuka ngo yahise acika intege,ibyaje no kumuviramo urupfu.

Abaturanyi ba Nyakwigendera bavuze ko iyi nzoka yari yiriwe itambatamba mu rugo, ngo abantu bakagerageza kuyirukana ariko ikongera ikagaruka.

Ndayisenga Narcisse, wari ucumbitse mu rugo rwa nyakwigendera akaba yanakoranaga ku kigo kimwe cy'ishuri na Yankurije,yabwiye IGIHE ko uwo mubyeyi yavuye ku kazi ku mugoroba ameze neza, agahita ajya gusengana na bagenzi be mu rugo rw'umuturanyi we na we bakoranaga.

Nyuma yo kuva mu masengesho nka saa saa mbili z'umugoroba,yaratashye nabwo ameze neza, ariko ageze mu rugo atambuka inzoka yari iri hafi y'umuryango atayibonye.

Ati 'Yamuritse itoroshi abona arayitambutse,ahita abwira abana ngo 'ya nzoka ndayibonye',maze kuva ako kanya atangira gucika intege ubwo, ahita yitura hasi ni ryo jambo yavuze gusa. Kubera ko nanjye nabaga muri urwo rugo ancumbikiye, aza narabyumvise, anitura hasi narabyumvise. Abana batabaje, nanjye mpita mbyuka njya kureba, koko nsanga amaze gupfa batangiye kumwegeranya.''

Ndayisenga, yakomeje avuga ko uyu mubyeyi bigaragara ko iyi nzoka baba bari bayimuteze kuko ngo uyu nyakwigendera yari afite amakuru ko ihari

Yakomeje avuga ko bahise bamujyana kwa muganga, mu Bitaro bya CHUB, muganga nawe amupimye yemeza ko koko yapfuye.

Abakekwaho ayo marozi basagariwe n'abaturage barakubitwa bikomeye bashaka kwihorera.

Bivugwa ko mu masaha y'igicamunsi cyo ku wa 27 Nzeri 2024, haje umupfumu agaragaza bamwe mu baturanyi ba nyakwigendera ko ari bo bamuterereje amarozi.

Ibi byateye uburakari bwinshi abaturanyi harimo n'abanyeshuri bagiye bigishwa na nyakwigendera maze batera urugo rwa Bimenyimana barabakubita cyane,banabicira ihene ebyiri, gusa baza gutabarwa na Polisi.

Abasagariwe n'abaturage bahise bajyanwa mu Bitaro bya Kabutare.

Umuvugizi wa Polisi y'Igihugu mu Ntara y'Amajyepfo, SP Emmanuel Habiyaremye, yagize ati ' Abaturanyi ba nyakwigendera bo bizera ko yarozwe, ari nayo mpamvu ku wa 27 Nzeri 2024, saa kumi n'imwe z'umugoroba,bateye mu rugo rwabo barakomeretsa bikomeye,banabicira ihene ebyiri.''

Yongeyeho ko Polisi yahise itabara igahosha ako kavuyo ikarokora abashoboraga kuhicirwa,ndetse ikaba yanafashe umwe mu bacyekwa guteza ako kavuyo mu gihe hagishakishwa abandi babigizemo uruhare.
Amakuru IGIHE ifite ni uko iperereza ryatangiye ngo hamenyekane intandaro y'urupfu rwa nyakwigendera.

Nyakwigendera Yankurije asize umugabo n'abana babiri.

---

Iyi nama yabaye ku wa 28 Nzeri 2024 yateguwe n'Ishyirahamwe ry'abahanga mu guteza imbere ibikoresho by'ubuvuzi (International Federation for Medical and Biological Engineering: IFMBE), Ishami rya Afurika.

Ihuje abayobozi b'amahuriro y'abo bahanga mu gukora, kwita no kubungabunga ibyo bikoresho yo mu bihugu byo muri Afurika.

Mu byaganiriweho harimo kurebera hamwe uko ayo mahuriro ahagaze, uko yafatanya mu kuziba ibyuho bihari no kubyaza umusaruro amahirwe ari muri urwo rwego.

Mu Rwanda abahanga muri urwo rwego babarizwa mu Ishyirahamwe 'Rwanda Association of Bio-Medical Engineers' rihagarariwe mu rwego rw'amategeko na Eng. Manzi Martin.

Rigizwe n'abanyamuryango barenga 100, rigakorana na Minisiteri y'Ubuzima mu kwita ku bikoresho byo kwa muganga, ibipfuye bigasanwa ariko bakagira n'uruhare mu igenamigambi ryabyo no kungura ubumenyi.

Aba bantu ni ingenzi cyane mu bitaro kuko ari bo baba bita ku mashini zikomeye zifashishwa mu buvuzi, bareba ko zikora neza, ndetse nk'iyo zigize ikibazo wenda umuntu bari ku mubaga, ni bo bihutira kureba ikibazo kibaye, ubundi hifashishijwe ubuhanga bwabo bagakosora ikibazo umuntu agatabarwa.

Ikindi ni uko niba igihugu kiguze ibikoresho bikomeye ndetse bihenze, haba hagomba kuboneka ababyitaho babizobereye ariko b'Abanyarwanda na cyane ko ibyo bikoresho biba bigura menshi.

Manzi ati 'Ni na bwo bufatanye dushaka gufatanya byisumbuye na leta bigakorwa ku bikoresho byaguzwe byose, tukamenya ko igikoresho kiramutse gipfuye twahamagara Abanyarwanda bakagikora, ariko bikanabungwabungwa bihoraho bitari ukuza baje gukiza ibyafuye gusa.'

Yavuze ko ubu mu Rwanda nta buke bw'abo bakozi bita ku bikoresho buhari, ariko ikibazo kikaba kubashyira mu mirimo mu nzego za leta kandi bakenewe.

Ati 'Usanga hanze bahari ndetse benshi, ariko mu bitaro ukabona ni bake nka babiri mu bitaro byose. Aha ni ha handi usanga ibikoresho bititabwaho mu buryo bukwiriye. Ni ikintu cyagakwiriye kwitabwaho.'

Umunyamabanga Mukuru wa IFMBE muri Afurika, Umunya-Ghana, George Boadu wagaragaje ko mu gihe abakozi batongerewe ubumenyi bya bikoresho bishobora kuba ibibazo kurusha ibisubizo.

Ati 'Nawe tekereza nk'umuntu ukoresheje kiriya cyuma gikangura umutima nabi, akagiha amakuru atari yo, aho kuwukangura kizawushwanyaguza. Kongera ubumenyi ni ingingo ibihugu bikwiriye kwitaho.'

Ku ngingo y'uko Afurika ihora inyuma mu gukora ibikoresho byo kwa muganga, Boadu yavuze ko habaye ubushake n'ubufatanye ntacyo uyu mugabane utageraho, kuko ufite abaturage, umutungo n'ubundi bushobozi bwo gukora ibikoresho burahari.

U Rwanda rumaze gutera intambwe mu guteza imbere ibikoresho by'ubuvuzi aho n'Ikigo Nyafurika cy'icyitegererezo mu gukora ibikoresho by'ubuvuzi (Center of Excellence in Biomedical Engineering and E health: CEBE) cya Kaminuza y'u Rwanda.

Mu Ukuboza 2023 mu cyanya cy'inganda huzuye inyubako nshya igeretse gatanu, CEBE ikoreramo, aho igice cya mbere cyayo cyuzuye gitwaye miliyoni 21$ (arenga miliyari 27 Frw y'ubu), icya kabiri kizatwara byibuze hagati ya miliyoni 25$ na miliyoni 30$, hagamijwe gushyira imbaraga mu kongerera inzobere mu bijyanye n'ikorwa ry'ibikoresho by'ubuvuzi.

Umuhate w'u Rwanda mu guteza imbere ubuvuzi washimwe n'umwe mu bayobozi ba IFMBE witwa Marc Nyssen, woherejwe kugira ngo azahure urwo rwego muri Afurika na rwo rugire imbaraga nk'uko mu Burayi hameze.

Yagaragaje ko kuri uyu mugabane nta nganda zikora ibyo bikoresho zihari bitari uko bitashoboka ahubwo hari abatinya gushoramo imari n'ubufatanye buke.

Yashimiye u Rwanda ruri kugerageza gutekerereza hafi Afurika yose binyuze mu gushinga ibigo nka CEBE, kagaragaza ko niruhozaho, intego yo kuba igicumbi cya Afurika mu buvuzi itazatinda.

---

N'ubwo bimeze bityo, imibare y'abagore mu nzego z'imirimo ya tekiniki mu turere n'imirenge nk'abayobozi b'inzego z'imirimo n'indi muri rusange ibasaba gukora cyane baracyari bake, ndetse n'Inama y'Igihugu y'Abagore (NWC) ivuga ko agabore bagerageza gusaba aka kazi ari 28% mu gihe abagabo barenga 70%.

Ibi byatangarijwe mu Nteko Rusange ya 3 y'Urunana rw'Abagore mu Nzego z'Ibanze,yateranye i Muhanga ku wa 27 Nzeri 2024.

Umwe mu bagore bakora mu nzego z'ibanze ku rwego w'akarere, waganiriye na IGIHE, yavuze ko n'ubwo Leta yakoze ibishoboka byose igashyiraho uburyo bworohereza umugore gukora neza akazi ke, hakiri birantega nyinshi, ziri no mu bituma abenshi batinya kuza mu kazi nk'ako avuga ko akora.

Yagaragaje ko Leta yacumye amasaha yo gutangira akazi, aho umubyeyi ava mu rugo yamaze gutegura abana bagiye ku ishuri, ikiruhuko cyo kubyara kikaba cyariyongereyeho ibindi byumweru, ariko kandi hakaba hakirimo ibindi bihato bituma bamwe mu bagore bazibukira iriya mirimo.

Ati “Nk'iyo umugore yonsa umwana w'amezi ane cyangwa atanu, igituza kiba kiremereye, kwirirwa utonkeje,umutwe urakurya, ukaba wanahinda umuriro. Mu gihe uri umuyobozi rero ukirirwa mu nama uhagaze wigisha ukaza gutaha nijoro wananiwe,ni ikibazo gikomeye rimwe na rimwe abo mukorana batanaha agaciro.''

Kimwe mu bindi bibagora hazamo no kuba basiga abana babo bakiri bato bakerekeza mu kazi, aho usanga bamwe bakora ariko imitima ikiri mu rugo batekereza abana basize.

Ati “Mu gihe hari amarerero mu nganda z'icyayi, n'ahandi ndetse numvise ko no muri perezidansi rihari, ubona bikwiye ko no mu bindi bigo bya Leta amarero ahagera,umuyobozi wonsa akajya yonsa umwana we mu cyumba cyabugenewe, kuko naho dukorera haba hari ibyumba, bityo tutazarwaza bwaki kandi ari twe ba mbere bo gutanga urugero.''

Ashingiye kuri ibi byose,uyu mugore abiheraho asaba abagabo bakorana n'abagore mu nzego zose z'ibanze, kugira umutima wumva kandi ureba kure bakajya bibuka inshingano ziremereye bashiki babo bagira hanze y'akazi gasanzwe, bityo bakaborohereza mu mikorere no mu bufatanye buhoraho, kugira ngo barangize neza ishingano zabo.

Minisitiri w'Uburinganire n'Iterambere ry'Umuryango, Uwimana Consolée, yavuze ko Leta yagiye ishyiraho uburyo bworohereza umugore mu kazi bijyanye n'izindi nshingano agira zirimo no kubyara kandi ko n'abandi bakorana baba ababago n'abakoresha nabo bakwiye kubigenza batyo.

Ati “Hari uburyo buhari bwagenwe, iyo umugore atwite, ahabwa uruhushya akajya kwipimisha, yabyara agahabwa amahirwe yo konsa mu kiruhuko,ndetse n'abakoresha baba babizi ko bagomba kuborohereza kugira ngo bubahirize izo gahunda , kandi n'imiterere y'umugore numva abantu bose bamaze kuyimenya kandi bagomba kubaha no kumva imiterere yabo.''

Minisitiri Uwimana yasabye abagore bari mu buyobozi gusohoza neza inshingano zabo bigatinyura bagenzi babo bacyitinya, bityo nabo bakabona ko bishoboka.

---

Ubwo Iran iheruka kohereza Ingabo muri Liban, byari mu 1981. Icyo gihe, izo ngabo nizo zatangije umutwe wa Hezbollah, Iran ikomeza kuwubaka no kuwushoramo akayabo ifite intego yo kuwifashisha mu guhangana na Israel.

Icyakora magingo aya, bisa n'aho uyu mutwe waciwe intege cyane, nyuma y'uko abayobozi bakuru hafi ya bose bishwe, kimwe n'abakomando bayobora amatsinda mato y'abarwanyi, benshi bagizweho ingaruka n'igitero simusiga cyagabwe ku byombo bakoresha.

Israel yavuze ko idateze guhagarika ibitero kuri Hezbollah, ibivuze ko izakomeza kuyihangamura mu minsi iri imbere, ku buryo uyu mutwe ushobora kubura ubushobozi bwawo bwo kwihagararaho muri rusange.

Benshi rero bari kwibaza niba Iran yiteguye kurebera, ikareka umutwe yubatse mu myaka irenga 30 ugasenywa mu gihe gito. Impungenge z'uko Iran ishobora kwinumira zishingira n'ubundi ku buryo yitwaye mu bitero byabanje.

Nasrallah siwe muyobozi ukomeye wishwe ku ruhande rw'abakorana na Iran. Muri Nyakanga uyu mwaka, Umuyobozi wa Politiki mu mutwe wa Hamas, Ismail Haniyeh, yiciwe i Tehran muri Iran, birangira ntacyo icyo gihugu gikoze mu kwihorera mu buryo bufatika.

Amwe mu makuru avuga ko Iran iri gutegura ingabo zayo, cyane ko iki gitero gishobora kuba cyari umurongo utukura, kandi mu gihe Hezbollah yasenywa nk'uko byagenze kuri Hamas, Iran ntacyo yaba isigaranye, ari nayo mpamvu nta gisobanuro gifatika ifite mu kureka Israel igasenya Hezbollah.

Umuyobozi w'Ikirenga wa Iran, Ali Khamenei, bivugwa ko yatumije inama y'abasirikare bakuru nyuma gato y'urupfu rwa Hasrallah. Ibyavugiwemo ntibizwi, gusa benshi bemeza ko bifitanye isano n'uburyo Iran igomba kwihorera.

---

Ni igikorwa yakoze ku wa 27 Nzeri 2024 ubwo u Rwanda rwizihizaga Umunsi Mpuzamahanga wahariwe ubukerarugendo.

Abagenerwabikorwa bemerewe inguzanyo kugeza ku bihumbi 100$ (arenga miliyoni 133 Frw) badasabwe ingwate ndetse uyihawe akazajya yishyura inyungu ya 9%.

Ni ibintu bidasanzwe kuko mu bisanzwe inguzanyo zitangirwa ku nyungu iri hagati 17%-19% ariko kuko iyi banki ishaka guteza imbere uru rwego rugashorwamo imari, ni yo mpamvu yagejeje kuri ibyo biciro.

I&M Bank Rwanda Plc, izafatanya na Mastercard Foundation na Banki y'Amajyambere y'u Rwanda mu ishyirwa mu bikorwa rya 'Kataza'.

Umuyobozi Ushinzwe ibijyanye n'ubufatanye muri I&M Bank Rwanda Plc, Gertrude Majyambere ati 'Ayo ni amahirwe akomeye abagore n'urubyiruko babonye. Akarusho ni uko dushaka kujya no mu byaro, abafite imishinga y'ubukerarugendo ibarizwayo bagafashwa kuko imishinga twafashije mu myaka ishize, imyinshi yari mu Mujyi wa Kigali.'

Mu bisabwa ngo umuntu abe yaba umugenerwabikorwa wa 'Kataza' harimo kuba afite umushinga uri mu bijyanye n'amahoteli n'ubukerarugendo umaze byibuze imyaka iri hagati y'ibiri n'itatu ukora.

Abo ni nk'abafite za restaurant, abatanga cyangwa bagatunganya ikawa, abategura ibirori, abafite ibigo by'ubukerarugendo, ubugeni n'imideli, abakora ubukerarugendo bushingiye ku iyobokamana n'imikino n'ibindi.

Ikindi umuntu aba agomba kuba ari umwari, umutegerugori cyangwa urubyiruko ruri munsi y'imyaka 35, hakarebwa ibyo umushinga we winjiza niba ushobora kubyara inyungu, uko ukora n'ibindi bigaragaza ko ushoboka, ukaba watanga akazi ku bagore n'urubyiruko.

Umuyobozi Mukuru w'Ishami ry'Ubukerarugendo mu Rugaga rw'Abikorera, Yves Ngenzi yavuze ko gufasha imishinga ikizamuka mu bukerarugendo ari ikintu cy'ingenzi cyane kuko ifite uruhare runini mu guteza imbere urwo rwego.

Ati 'Nk'ubu mu bigo by'ubukerarugendo nk'ibitembereza ba mukerarugendo ibyiza bitatse u Rwanda, 80% byabyo ni iby'abafite imishinga mito n'iciriritse. Ni benshi cyane bagira uruhare runini mu guteza imbere uru rwego.'

Umuyobozi w'Ishami ry'Ubukerarugendo mu Rwego rw'Igihugu rw'Iterambere, RDB, Rugwizangoga Michaella yagaragaje ko ubukerarugendo bukomeje gutezwa imbere aho mu 2023 bwinjije miliyoni 620$ bingana n'inyongera ya 30% ugereranyije na 2022 ndetse n'iya 126% ugereranyije no mu myaka ya Covid-19.

Rugwizangoga yavuze ko u Rwanda rwishimira kuba mu bakomeje guteza imbere urwo rwego, harimo abagore n'urubyiruko bakaba ari na bo bitezweho kuba inkingi mwamba mu bukerarugendo bw'ahazaza.

Ati 'Ni yo mpamvu binyuze mu mishinga itandukanye nka 'Kataza', izafasha mu guteza imbere iyo mishinga n'abaturage badasigaye. Uyu munsi turi kubona umumaro wo kubakira ubushobozi abagore n'urubyiruko kuko bagira uruhare mu iterambere ry'ubukerarugendo n'amahoteli binyuze mu guhanga udushya.'

Uretse 'Kataza', I&M Bank ku bufatanye na Mastercard Foundation na bwo mu myaka itanu ishize yari iri gushyira mu bikorwa bene uwo mushinga wiswe Hanga Ahazaza, aho wafashije imishinga mito n'iciriritse 123, yahanze imirimo 1000.

Icyakora wahuye n'imbogamizi zitandukanye zirimo inyungu yari hejuru kugeza kuri 19%, ubumenyi budahagije bwo kwihangira imirimo, kubura ingwate n'ibindi.

Izo mbogamizi ni zo zashingiweho mu gutegura 'Kataza' kugira ngo ibyo byuho bizibwe

---

Ni igikorwa cyabaye kuri uyu wa Gatandatu tariki ya 28 Nzeri 2024, mu muganda rusange wabereye muri iyi pariki.

Cyasoreje Inama Mpuzamahanga ya AFSA2024, yari imaze iminsi ibera i Kigali, aho abahanga mu rwego rw'ibimenyetso bya gihanga bikoreshwa mu butabera n'abandi bafite aho bahurira na rwo bo hirya no hino muri Afurika no ku Isi, bari bamaze igihe baganirira iterambere ry'uru rwego muri Afurika.

Ni ku nshuro ya mbere iyi nama yari ibaye kuko Ikigo Nyafurika cya AFSA [African Forensic Science Academy] cyayiteguye cyahawe icyicaro mu Rwanda mu 2023.

Iyi nama yaranzwe n'ibyiciro bitatu aho mu cyiciro cya mbere abakiri bato barenga 200 bahuguwe mu bijyanye no gutegura ibimenyetso bya gihanga bishingiye ku bumenyi.

Iicyiciro cya kabiri cyaranzwe no guhura kw'inzobere zaturutse ahatandukanye ku Isi mu kuganira ku mbogamizi, ibyuho, amahirwe n'ahazaza h'uru rwego muri Afurika, icya nyuma kiba icyo gutera ibi biti mu muganda rusange.

Dr. Antonel Olckers wongeye gutorerwa kuyobora Ikigo Nyafurika cya AFSA [African Forensic Science Academy] muri iyi nama, yavuze ko bashimishijwe no gutanga umusanzu kuri gahunda ya guverinoma.

Ati 'Icy'ingenzi si ugukora inama gusa ahubwo ni uko hari icyo dusiga kizaramba. AFSA ni ikigo kigitangira gifite gusa amezi 19, bivuze ko ibi biti tuzakurana. Ahanini dushyira imbere ubukorerabushake iki gikorwa kikaba gihuza neza n'uwo murongo.'

Umuyobozi Mukuru wa RFI, Dr. Charles Karangwa, yavuze ko iki gikorwa gifitanye isana n'umuco Nyarwanda.

Ati 'Ibi biti twateye aha bifite icyo bivuze kuko uko uyu muryango uzajya ukura ni na ko ibi biti na byo bizajya bikura. Impamvu twahisemo kubikora muri ubu buryo ni uko u Rwanda rwahisemo kurengera ibidukikije kugira ngo turwanye ihumanywa ry'ikirere tunahumeke umwuka mwiza.'

'Ibiti gakondo bifite aho bihuriye n'umuco Nyarwanda. Ibi biti bifite icyo bivuga mu muco wacu 'umurinzi urinda igihugu' badufashije rero kurinda igihugu cyacu guhumanya ikirere.'

Yavuze ko 'Iki gishanga gifite umwihariko kuko ari igishaka giterwamo ibiti bya gakondo mu rwego rwo kugaragaza uburyo igihugu cyiyemeje gusigasira umurage.'

Pariki ya Nyandungu igizwe n'ibice bitanu, bibiri bibanza ni ahantu h'igishanga ariko hari ibyatsi n'ibiti bifasha mu kuyungurura amazi mabi ava ku misozi. Ibindi bitatu ni byo bisurwa byanashyizwemo inzira zireshya n'ibilometero 10 zagenewe abanyamaguru n'abakoresha amagare.

Amafoto: Shumbusho Djasiri & Habyarimana Raoul

---

Ni mu mikino yo ku munsi wa Gatandatu wa shampiyona yakinwe kuri uyu wa Gatandatu taliki ya 28 Nzeri 2024 Saa kumi zuzuye.

Kuri Stamford Bridge, Chelsea yari yakiriye Brighton mu mukino watangiye wihuta cyane aho umupira wavaga ku izamu rimwe ujya ku rindi. Ku munota wa 7 gusa ikipe ya Brighton yafunguye amazamu ku gitego cya Georginio Rutter ku mupira yahawe na Carlos Baleba.

Nyuma yo gutsindwa Chelsea yatangiye gushaka uko yakwishyura maze ku munota wa 21 gusa Cole Palmer aza kukibona ku mupira mwiza yahawe na Nicolas Jackson.

Umusore w’Umwongereza wari wahiriwe n’uyu mukino, Cole Palmer yatsinze igitego cya 2 ku munota wa 28 kuri penariti yari ivuye ku ikosa Georginio Rutter yakoreye Jadon Sacho ari mu rubuga rw’amahina.

Ku munota wa 31 Cole Palmer yongeye kunyeganyeza inshundura kuri kufura nziza yateye umunyezamu wa Brighton, Robert Verbugeggen ntiyamenya uko byagenze.

Nyuma y’iminota 2 Brighton nayo yanyeganyeje inshundura ku gitego cyatsinzwe na Carlos Baleba ku makosa yakozwe n’umunyezamu wa Chelsea, Robert Sanchez atanga umupira nabi ahita awifatira awutereka mu nshundura.

Ku munota wa 41 Cole Palmer yateretsemo igitego cya 4 ku mupira yahawe na Jadon Sacho ahita anakora amateka yo kuba umukinnyi wa mbere utsinze ibitego 4 ari wenyine mu gice cya mbere muri Premier League.

Mu gice cya kabiri byasaga nk’aho Chelsea yarangije umukino gusa abakinnyi bayo barimo Nicolas Jackson na Cole Palmer bagiye barata uburyo bwashoboraga kuvamo ibindi bitego. Umukino warangiye Chelsea yegukanye intsinzi y’ibitego 4-2.

Chelsea yahise ijya ku mwanya wa gatatu n’amanota 13 naho Brighton yo ijya ku mwanya wa 8 n’amanota 9.

Undi mukino wakinwaga kuri iyi saha ni uwo Arsenal yari yakiriyemo Leicester City kuri Emirates Stadium. Uyu mukino warangiye ikipe y’abarashi itsinze ibitego 4-2 mu buryo bugoranye.

Ni ibitego byatsinzwe na Gabriel Martinelli ku munota wa 20 ahawe umupira na Jurrien Timber, Leandro Trossard ku munota wa 45+1 ahawe umupira na Gabriel Martinelli n’uwa 90+4′ ahawe umupira na Bukayo Saka ndetse na Kai Havertz ku munota wa 90+9. 

Ni mu gihe ibitego bya Leicester City byo byatsinzwe na James Justin ku munota wa 47 ahawe umupira na Facundo Buonanote no ku munota wa 63 ahawe umupira na Wilfred Ndidi.

Ikipe ya Arsenal yahise ijya ku mwanya wa 2 n’amanota 14 mu gihe Leicester City yo yagiye ku mwanya wa 16 n’amanota 3.

Cole Palmer yanditse amateka mashya yo kuba umukinnyi wa mbere utsinze ibitego 4 mu gice cya mbere muri Premier League 

Arsenal yatsinze Leicester City ibitego 4-2 

Ni imibare yatangajwe ku wa 27 Nzeri 2024 ubwo u Rwanda n'Isi byizihizaga Umunsi Mpuzamahanga wahariwe ubukerarugendo.

Biragoye kuvuga ubukerarugendo ngo wibagirwe amahoteli, kuko nyuma yo gusura ibyiza nyaburanga bitatse igihugu runaka, ababikora baba bakeneye kuruhukira ahantu heza no guhabwa serivisi zinoze.

Mu Rwanda icyo kintu cyitaweho cyane kuko nko mu myaka itanu ishize, u Rwanda rwabaruraga ibyumba ibihumbi 10, ibyumvikana ko mu gihe kitarenze amezi 60 byiyongereyeho ibindi ibihumbi 15.

Umuyobozi Mukuru w'Ishami ry'Ubukerarugendo mu Rugaga rw'Abikorera, Yves Ngenzi yavuze ko ari intambwe ikomeye cyane bateye mu kongera umubare wa za hoteli zakira ba mukerarugendo basura u Rwanda.

Ati 'Ibyo ni ibirarwamo gusa. Hari ibindi byinshi bitabarwa. Nk'ibifatirwamo amafunguro ntitubibara. Ubona ko biri ku muvuduko uri hejuru. Tubarira mu byumba hoteli zifite kugira ngo tumenye uko turi gutera imbere.'

Uyu muyobozi yatangaje ko bakomeje gukora cyane kugira ngo nibura mu myaka itanu iri imbere, mu Rwanda hazabe habarurwa ibyumba by'amahoteli ibihumbi 35.

Mu mwaka ushinze ubukerarugendo bwinjirije u Rwanda miliyoni 620$. Muri gahunda yo kwihutisha iterambere mu cyiciro cyayo cya kabiri (NST2) bikitegwa ko mu 2029 ubukerarugendo buzinjiriza igihugu miliyari 1.1$.

Ngenzi ati 'Ibyo byumvikana neza ko tugomba kongera ibikorwa, amahoteli akiyongera, serivisi dutanga zikiyongera, tukongera inama twakira, n'ibindi byinshi. Niyo mpamvu twiyemeje ko tuzongera ibyumba by'amahoteli ibihumbi 10 mu myaka itanu iri imbere.'

Kugeza ubu Ishami ry'Ubukerarugendo ribarizwamo ibigo 1,360 n'amahuriro arindwi y'ubukerarugendo butandukanye.

Ni umubare munini cyane kuko mu myaka itanu ishize, ibyo bigo byabarirwaga muri 450, ndetse Ngenzi akavuga ko hari n'umubare munini utariyandikisha muri iryo shami rya PSF.

Ati 'Uru ni urwego ruri gutera imbere. Kera ubukerarugendo bwarasuzugurwaga ariko urebye amafaranga bwinjiza ni menshi cyane. Ubu ubukerarugendo bwahanze imirimo ibihumbi 165, iyo turebye ababukoramo.'

Ngenzi agaragaza ko iyo ari imirimo myinshi cyane kuko yihariye 10% by'imirimo yose ihangwa mu gihugu ibyara inyungu ukuyemo iy'ubuhinzi n'ubworozi.

Uretse kongera ibyumba by'amahoteli ibihumbi 10, Ngenzi agaragaza ko mu myaka itanu iri imbere bazakora ibishoboka ngo bateze imbere ibikorerwa mu Rwanda hagerwa ku ntego iguhugu cyihaye y'uko bizajya byiziyongera kuri 13% buri mwaka, no kuzamura ishoramari ry'abikorera rikagera kuri miliyari 4,6$ mu 2029 rivuye kuri miliyari 2,2$ mu 2024.

Ngenzi yavuze ko bizajyana no guteza imbere by'umwihariko ubukerarugendo bushingiye ku nama, ubushingiye ku iyobokamana no kongera ibintu byo gusura bikaba byinshi, ku buryo amafaranga abakerarugendo basiga mu Rwanda azarushaho kwiyongera.

Abajijwe uko ubukerarugendo bw'imbere mu gihugu bwihagije, ha handi uru rwego rudashobora guhungabana mu gihe abakerarugendo baturuka hanze y'igihugu bagabanuka, Ngenzi yavuze ko biri ku rugero rwiza ariko bidahagije.

Ati 'Nk'ubu nko gusura ingangi ni 1,500$ ku banyamahanga. Abanyarwanda bayatanga ni bake. Hari ibiciro ku Banyarwanda ariko ku mafaranga twifuza kwinjiza ntitwayageraho abanyamahanga bataje. Ni yo mpamvu ahubwo dushaka gukurura Abanyafurika bakiyongera mu gusura u Rwanda.'

Yongeyeho ati “Iyo mishinga izajyana no kubakira ubushobozi abari muri urwo rwego cyane cyane mu bumenyi, abakiri mu mashuri bagahabwa imenyerezamwuga cyane ko twabonye ko 30% by'abarihabwa babona akazi.”

Ni imishinga izajyana no kubakira ubushobozi abafite imishinga mito n'iciriritse kuko igira uruhare runini mu iterambere ry'urwego bijyanye n'ubwinshi bwayo.

Nk'ubu ibigo by'ubukerarugendo nk'ibitembereza ba mukerarugendo mu Rwanda, 80% byabyo ni iby'abafite imishinga mito n'iciriritse, ibigaragaza uburyo icyo cyiciro gikwiriye gukurikiranwa by'umwihariko.

Umuyobozi w'Ishami ry'Ubukerarugendo mu Rwego rw'Igihugu rw'Iterambere, RDB, Rugwizangoga Michaella yavuze ko uko ubukerarugendo bw'u Rwanda butera imbere ari na ko Abanyarwanda cyane cyane abaturiye ibyanya bisurwa bazamurirwa ubuzima.

Ati 'Dufite gahunda yo gusangira ibyavuye mu bukerarugendo n'abaturage aho 10% by'agaciro k'ikiguzi cya tike yinjiriweho muri parike, ajyanwa mu mishinga nko kubaka imihanda, ibitaro, amashuri n'ibindi. Iryo 10% si iry'umusoro ahubwo ni iry'agaciro k'ibyinjijwe mu gusura ibyanya nyaburanga.'

Yavuze ko ubu hamaze gufashwa imishinga 1000 ndetse hamaze gutangwa arenga miliyari 12 Frw ku baturage, agashimangira ko ari ibintu bizakomeza uko urwego rutezwa imbere.

Imibare igaragaza ko abantu barenga miliyoni 1,4 basuye u Rwanda mu 2023, bikaba biteganyijwe ko bazikuba kabiri mu 2029, bikanajyanishwa no kongera ibyerekezo sosiyete itwara abantu n'ibintu mu kirere ya RwandAir igeramo.

Amafoto ya zimwe muri Hoteli zo mu Rwanda

Ubwiza bwa One&Only Nyungwe

One&Only Gorilla's Nest

Bisate Lodge

Classic Resort Logde

Cleo Lake Kivu

Emeraude Kivu Resort iri ku nkengero z'Ikiyaga cya Kivu

Hôtel des Mille Collines

Mythos Boutique Hotel

Radisson Blu Hotel & Kigali Convention Centre

Rose Apart Hotel

Lake Kivu Serena

Four Points by Sheraton

Singita Kwitonda Lodge

The Retreat by Heaven

UMVA Muhazi

---

Rayon Sports yabonye amanota y’umunsi wa 5 wa shampiyona yakuye i Rubavu itsinze Rutsiro FC igitego kimwe ku busa.

Ni umukino wabaye kuri uyu wa Gatandatu tariki ya 28 Nzeri 2024 kuri Stade Umuganda, ni umukino Rayon Sports yashakaga gutsinda ku kabi n’akeza.

Iminota 45 y’umukino yarangiye nta kipe ibashije kureba mu izamu ry’indi amakipe ajya kuruhuka ari ubusa ku busa.

Mu ntangiriro z’igice cya kabiri, ku munota wa 50 Rayon Sports yaje kubona igitego cya mbere cyatsinzwe na Iraguha Hadji ku ishoti rikomeye yatereye inyuma y’urubuga rw’amahina.

Iraguha Hadji akaba atishimiye iki gitego ahubwo yahise asaba imbabazi kuko yari atsinze ikipe yamushyize ku itara Rayon Sports ikamubenguka. Iki gitego ni cyo cyatandukanyije impande zombi.

Indi mikino yabaye AS Kigali yatsinze Muhazi United 2-1, Musanze inganya na Marines 1-1. Ejo hashize Bugesera yanganyije 0-0 na Gasogi United, Mukura VS itsindwa na Gorilla FC 3-1.

Ejo Kiyovu Sports izakira Amagaju FC, Vision FC yakire Police FC ni mu gihe Etincelles FC izakira Police FC.