Blog

Umunya-Mali ukinira APR FC, Mahamadou Lamine Bah agomba kumara byibuze ibyumweru bibiri hanze y’ikibuga kubera imvune.

Uyu mukinnyi ukina afasha abataha izamu, yagize imvune y’akagombambari (Cheville) mu mukino w’umunsi wa 5 wa shampiyona.

Lamine Bah akaba yaravunikiye mu mukino wa Etincelles FC wabaye ejo hashize ku Cyumweru kuri Stade Umuganda.

Yavuye mu kibuga ku munota wa 50 kubera imvune asimburwa na Tuyisenge Arsene.

Amakuru ISIMBI yamenye ni uko Lamine Bah yagize ikibazo cy’akagombambari ariko bidakomeye cyane ariko akaba atagomba kugaruka mu kibuga mbere y’ibyumweru bibiri.

Mahamadou Lamine Bah ukomoka muri Mali yasinyiye APR FC muri Nyakanga 2024 avuye muri Olympique Béja yo muri Tunisie.

Lamine Bah agomba kumara hanze byibuze ibyumweru bibiri

Amakuru avuga ko iminsi ibiri APR FC yamaze i Rubavu aho yakiniye umukino w’umunsi wa 5 wa shampiyona na Etincelles, yishyuye amafaranga y’u Rwanda miliyoni 8 aho yari icumbitse.

Iyi kipe y’Ingabo z’Igihugu yahagarutse i Kigali ku wa Gatandatu mu gitondo yerekeza i Rubavu aho yakinnye na Etincelles ku munsi w’ejo hashize ku Cyumweru amakipe yombi akanganya 0-0.

APR FC ikaba yari icumbitse muri Serena Hotel y’i Rubavu, ni ho yaraye ku wa Gatandatu cyane ko ku Cyumweru nyuma y’umukino yahise igaruka i Kigali.

Amakuru ISIMBI yamenye ni uko APR FC yasigiye iyi hoteli amafarangana y’u Rwanda miliyoni 8 bigendanye na serivisi z’iyi hoteli yakoresheje harimo kurya no kuryama.

Muri rusange impera z’icyumweru gishize zasize Stade Umuganda yakiriye umukino wa APR FC na Etincelles ndetse na n’uwa Rayon Sports na Rutsiro FC yinjije miliyo ni 16 Frw.

Bivugwa ko APR FC yasize i Rubavu byibuze miliyoni 8 Frw

Mu Rwanda, uru ni urwego rufatiye runini igihugu kuko nko mu gihembwe cya mbere cy'uyu mwaka rwari rwihariye 25% by'umusaruro mbumbe, mu gihe mu gihembwe cya kabiri cy'uyu mwaka rwiyongera ku rugero cya 7%.

Abahanga mu by'ubuhinzi bagaragaza ko gushyira ingufu mu buhinzi bugamije ubucuruzi ari ingenzi kuko byakomeza kuzamura urwego rw'ubuhinzi bikanagira uruhare mu kongera ibyoherezwa mu mahanga.

Bagaragaza ko ibi bitari kugerwaho neza kubera ko hakiri imbogamizi nyinshi zirimo nk'iz'abahinzi batabona inyungu bagakwiye kubona ugereranyije n'ibyo bashoye, ndetse no kuba ibiciro by'ibiribwa bihenda cyane ugereranyije n'ibyo abantu binjiza.

Prof. Ken Giller wagiye akora ubushakashatsi ku buhinzi mu Rwanda, yagaragaje ko ikibazo cy'ubwinshi bw'ibyo abahinzi bashora ugereranyije n'inyungu babona ku musaruro wabo, Guverinoma y'u Rwanda igomba kugishakira umuti.

Ati 'Ndabizi ko u Rwanda rukura amavuta muri Aziya, bigahita bigora abahinzi bahinga ibivamo amavuta hano kuko bibasaba kubigurisha ku giciro cyo hasi cyane. Ndatekereza ko hagomba gushyirwaho uburyo bwo kugenzura amasoko kugira ngo Abanyarwanda batangire guhingira u Rwanda.'

Yagaragaje ko kimwe mu bisubizo cyaba gufata ingamba zo kuzamura imisoro y'ibikomoka ku buhinzi biva mu mahanga ari na ko ubuhinzi bukorerwa mu gihugu burushaho kwitabwaho.

Prof. Ken Giller, yavuze ko abakora ubuhinzi bugamije ubucuruzi bagomba kwibumbira mu makoperative kugira ngo biborohere kugera ku masoko yagutse no kugera kuri serivisi z'imari mu buryo bworoshye.

Uruhare rw'amashuri

Mu minsi ishize Ishuri Rikuru ry'Ubuhinzi n'Ubworozi butangiza ibidukikije [Rwanda Institute for Conservation Agriculture, RICA], ryashyikirije impamyabumenyi abanyeshuri 81 bari bahasoreje amasomo.

Ni icyiciro cya kabiri kuko muri Kanama 2023, ari bwo icyiciro cya mbere cy'abanyeshuri 75 bahasoreje amasomo.

Mu banyeshuri 75 basoreje kwiga mu 2023 muri iri shuri, 93% muri bo bamaze kwinjira mu kazi mu nzego zitandukanye zijyanye n'ubuhinzi mu gihe abandi bakomeje amasomo.

Umuyobozi Mukuru wa RICA, Dr. Ron Rosati, yavuze ko intego ari ukubaka ubushobozi 'Abantu babashe kugura ibyo kurya byiza kandi ku giciro gito, abahinzi bacu babone inyungu nyinshi, kandi ibyo bikorwe mu buryo burambye.'

Yavuze ko iri shuri ribinyujije muri gahunda rifite, hari abakozi baryo boherezwa gukorana n'abahinzi, bakabigisha ubuhinzi bugezweho kandi butangiza ibidukikije ku buryo bushobora kubazanira inyungu nyinshi.

Ati 'Dufite n'ikindi gice cyita ku bushakashatsi bwibanda ku gushakisha uburyo bwiza bwo kunoza ubuhinzi bubungabunga ibidukikije bukanongera inyungu y'abahinzi kandi bigakorwa mu buryo butabateza ibyago byinshi.'

'Ubu buhinzi kandi buzagabanya ibyo bashora kandi bwongere umusaruro wabo. Nibagurisha byinshi, bazabona amafaranga menshi yo kwishyura amashuri, imyambaro, kwivuza n'ibindi byose by'ingenzi mu buzima bwabo.'

Impuguke muri uru rwego zigaragaza ko leta ikwiriye gushishikariza banki z'ubucuruzi gushaka ibisubizo biri mu bibazo by'ubukungu bw'ibihugu bya Afurika, ubuhinzi bukaba mu by'ibanze.

Prof. Ken Giller, yagaragaje ko leta ikwiye kuzamura imisoro y’ibiribwa biva mu mahanga ari na ko hongererwa urwego rw’ubuhinzi imbaraga

Umuyobozi Mukuru wa RICA, Dr. Ron Rosati, yavuze ko bakorana n’abahinzi mu kwimakaza ubuhinzi bubongerera inyungu kandi burengera ibidukikije

Muri gahunda ya Guverinoma yo kwihutisha iterambere, NST2, byitezwe ko urwego rw’ubuhinzi ruzajya ruzamuka ku kigero cya 6% ku mwaka, umusaruro ukaziyongeraho 50% mu myaka itanu iri imbere

Ikoranabuhanga ni imwe mu ntwaro ziri kwihutisha iterambere rirambye ariko hari bamwe mu rubyiruko n'abakuru barikoresha mu buryo butaboneye, burimo n'ibikorwa bisenya umuryango mugari.

Ubwo yari mu Nama rusange ya 23 y'Inama y'Igihugu y'Abagore kuri uyu wa 30 Nzeri 2024, Perezida w'Inteko Ishinga Amategeko Umutwe w'Abadepite, Kazarwa Gerturde, yatangaje ko abagore bagira uruhare runini mu iterambere ry'igihugu, ariko hakiri n'ibyo bagomba kwitaho ngo umuryango urusheho gutekana.

Ati 'Ni umwanya wo gutekereza tukaganira ku nzitizi, ku bibazo byugarije imiryango yacu ari byo bigira ingaruka ku gihugu no kuba bishobora kuba byadindiza iterambere ry'igihugu muri rusange tugahera aho rero twiha intego ndetse dufata n'ingamba z'icyo twakora.'

'Natanga ingero nke za bimwe mu bibazo numva dukwiriye kwitaho by'umwihariko. Hari ikoreshwa ry'imbuga nkoranyambaga mu rubyiruko rwacu. Ni iterambere ry'ikoranabuhanga ariko ritagombye nanone kuba ikibazo. Dukwiriye kwiga uburyo duhangana n'ingaruka zaryo cyane cyane ko rimwe na rimwe byabangamira n'umuco wacu, tukaba rero tugomba kugira uburyo bwo kubihuza nta kibangamiye ikindi.'

Perezida w'Inama y'Igihugu y'Abagore, Nyirajyambere Belancille, yahamije ko haba mu rubyiruko ndetse n'abakuze hari aho ikoranabuhanga rikoreshwa nabi ariko bagiye gutangira gushyira ingufu mu gutuma umuryango urinda abana gukoresha telefoni bakiri bato.

Ati 'Tugiye gufatanya, turebe ngo ese ni ryari umwana akwiriye guhabwa telefoni, afite imyaka ingahe? Ndetse n'ababyeyi bakavuga ngo uyu mwanya turi gukoresha telefone, turi gukora akazi kuko ikoranabuhanga ni ryiza ariko iyo urikoresheje nabi ritanga umusaruro udakwiye.'

Yagaragaje ko abagize umuryango bakwiye kugena umwanya wihariye wo gukoresha ikoranabuhanga kandi bakanagena umwanya wo kuganira.

Ati 'Umuryango ukwiye kuba uganira. Ntabwo tuba dukwiye kuganira turi kuri telefone, ngo mpamagare papa, umwana avugishe mama ari uko abicishije kuri telefone. Dukwiye gufata umwanya tukaganira n'imiryango yacu ni bwo tuzashobora kubaka umuryango ushoboye kandi utekanye.'

Ibyavuye mu ibarura rusange bigaragaza ko Abanyarwanda barenga 65% ari urubyiruko.
Imibare igaragaza ko mu 2024 abantu barenga miliyari 5.3 ku Isi [bangana na 66% by'abayituye] bakoresha internet.

Ku mugabane wa Afurika umubare w'abakoresha internet ugeze kuri 43%, bigaragaza ukwiyongera gukomeye kuko mu myaka 20 ishize abaturage 2% gusa by'abari bawutuye ari bo bonyine bakoreshaga internet.

Perezida w’Inteko Ishinga Amategeko umutwe w’Abadepite Kazarwa Gerturde yagaragaje ko ikoreshwa ry’imbuga nkoranyambaga rikwiye guhagurukirwa

Abahuzabikorwa b’Inama y’igihugu y’Abagore baturutse mu nzego zitandukanye kuva ku Karere kugeza ku rwego rw’igihugu bahuriye mu nama rusange

Bararebera hamwe ibyo bazakora mu mwaka wose bagamije iterambere ry’umunyarwanda

Biyemeje guharanira iterambere ry’umuryango

Amafoto: Kwizera Remy Moses

Ikibazo cy'abangavu baterwa inda kiri mu bihangayikishije cyane ahanini bitewe n'umubare ugenda wiyongera, ndetse umubare munini ukagaragaza ko ababateye inda ari abantu bakuru bubatse.

Nko mu 2023 abangavu bafite imyaka iri hagati ya 10 na 19 babyaye bagera kuri 19,406. Mu mezi atandatu ya mbere ya 2024, abangavu batewe inda barenga ibihumbi 10. Barimo abatarengeje imyaka 14, bagera kuri 50.

Imibare igaragaza ko mu 2017, abangavu batewe inda zitateganyijwe bari 17.331, umubare wazamutse cyane mu myaka yakurikiyeho bagera ku 23.622 mu 2019 mu gihe mu 2020 bari 19.701, bigeze mu 2021 baba ibihumbi 23.534.

Minisitiri Consolée Uwimana ubwo yari mu nama rusange 23 y'Inama y'Igihugu y'Abagore kuri uyu wa 30 Nzeri 2024 yagaragaje ko abayobozi b'abagore bakwiye kugira uruhare mu guhashya ikibazo cy'ihohoterwa rishingiye ku gitsina rikorerwa abana.

Ati 'Ntabwo byumvikana kandi kubona umugabo atera abana inda akabikora rimwe, kabiri, gatatu turi aho tubizi, duturanye tumuzi. Ibi birababaje. Ntiwibuke ko nawe ufite umwana w'umukobwa urera. Urabyiruye, uyu murozi umunsi umwe nawe ashobora kukugeraho. Uhishira rero umurozi akakumara ku rubyaro.'

Yavuze ko ibi byose bibaho nyamara abari mu nzego zitandukanye z'abagore barimo abayobozi batandukanye ku buryo bamwe bajya mu muryango bagakemura ikibazo kimwe birengagije ko hari n'ibindi bibazo byugarije umuryango.

Ati 'Icyaha cyo gusambanya abana ntabwo gikorerwa abana b'abakobwa gusa, n'abana b'abahungu barahohoterwa. Aba bantu tubagaragaze bahanwe.'

Minisitiri Uwimana yahamije ko bitari bikwiye gukomeza kubona hari imiryango itagira ubwiherero, bikamara imyaka irenga 10.

Ati 'Ntabwo byumvikana ko dushobora kumara imyaka irenga 10 tuvuga abantu badafite ubwiherero, ugasanga akarere kahize, mu bijyanye n'ubwiherero tuzakora 200. Barahiga 200 mu bwiherero ibihumbi bitanu bafite bakavuga ngo ni bwo bushobozi akarere gafite.'

'Ndagira ngo tubifate nk'umuhigo ba mutima w'urugo ntabwo tuzabikora twenyine ariko tuzafatanya n'abandi duhige umuhigo wo kugira icyo dukora.'

Abakoresha abana bataye ishuri bahwituwe

Minisitiri Uwimana yagaragaje ko muri iki gihe hari ikibazo cy'abana bata ishuri ugasanga hari abayobozi batabimenye cyangwa n'ababimenye ntibabyiteho.

Ati 'Ntibyumvikana ko dushobora kumva umwana yataye ishuri ntitubimenye cyangwa twanabimenya ugasanga ahubwo tugira uruhare mu kumukoresha iwacu mu ngo. Ibyo na byo numva ba mutima w'urugo dufite icyo twabikoraho.'

Yanavuze ko bitumvikana kubona abana bagwingiye, 'Tukavuga ngo turava kuri 30% tujye kuri 20%, tuve kuri 20% tujye kuri 10%. Umuntu wagwingiye ingaruka turazizi, turi guteza igihombo igihugu dute? Ntabwo tuzagutuma kugaburira umuntu, ariko kumenya ko umuntu arwaye, afite imirire mibi ukamugeza kwa muganga biragoranye? Nta mafaranga yawe ushoyemo ariko tugire uko kumva ari ibintu tugize ibyacu.'

Imibare y'ubushakashatsi bwa gatandatu ku bwiyongere n'ubuzima bw'abaturage mu Rwanda, RDHS, bwa 2020 igaragaza ko igipimo cy'igwingira mu bana cyari kuri 33% kivuye kuri 38% mu 2015.

Muri gahunda ya Guverinoma y'imyaka itanu harimo ko igipimo cy'igwingira ry'abana bari munsi y'imyaka itanu kizava kuri 33% kikagera munsi ya 15%.

Raporo ya Minisiteri y'Imari n'Igenamigambi igamije gufasha umuturage gusobanukirwa ingengo y'imari, igaragaza ko amafaranga yagenewe guhangana n'ikibazo cy'igwingira ry'abana yiyongereye mu mwaka wa 2024/2025.

Minisitiri Uwimana yagaragaje ko bidakwiye kubona umwana ata ishuri umuyobozi akaba ari we ufata iya mbere mu kumukoresha mu rugo

Abagore bayoboye abandi mu Nama y’Igihugu y’Abagore basabwe guhangana n’ihohoterwa rishingiye ku gitsina

Amafoto: Kwizera Remy Moise

Umuhanzi Nyarwanda, Juno Kizigenza yamaze kwinjira no muri Sinema aho yahereye kuri filime ya Muzika izajya inyura kuri Zacu TV.

Ibi byatangajwe na Zacu TV inyuraho filime Nyarwanda ikaba igaragara kuri CANAL+, hari mu gikorwa cyo kumurika imishinga ya 2025.

Ni ibirori byabaye tariki 27 Nzeri bikitabirwa n’abantu b’ingenzi zinyuranye, harimo abakinnyi ba filime nyarwanda, abayobozi ba CANAL+ na ZACU TV, ndetse n’abafatanyabikorwa banyuranye.

Cédric Pierre-Louis, umuyobozi ushinzwe gahunda n’ibiganiro bya ZACU TV, yagaragaje ko muri 2025, ZACU TV ifite gahunda zo gukora imishinga izaba igizwe ahanini n’inkuru z’urubyiruko, ndetse ku nshuro ya mbere mu Rwanda, bakaba bagiye gukora filime na seri ziganjemo inkuru z’umuziki ari na yo umuhanzi Juno Kizigenza azagaragaramo

Ati 'Mu gihe ZACU TV yitegura kwizihiza imyaka ibiri ishize ibayeho, twishimiye ko imishinga inyuranye twamurikiye Abanyarwanda bayikunze. Mu gihe tumurika imishinga y’umwaka mushya, twishimiye ko ku nshuro ya mbere, abakurikira ZACU TV, bazaryoherwa na filime zivuga ku nkuru z’urubyiruko, ndetse na muzika.'

Si ibyo gusa kandi kuko Cédric Pierre-Louis yatangaje ko ZACU TV iherutse gusinyana amasezerano na NBC Universal, imwe muri sitidiyo zikomeye i Hollywood, aho ku nshuro ya mbere, Abanyarwanda bagiye gukurikira zimwe muri filime zabiciye bigacika hirya no hino ku Isi, 100% ziri mu Kinyarwanda.

Umuyobozi mukuru wa ZACU Entertainment, sitidiyo ya CANAL+ GROUP itunganya filime nyarwanda zinyuranye, Wilson Misago, yatangaje ko ashimishijwe no kuba seri ya Seburikoko igiye kugaruka by’umwihariko mu ishusho nshya kuri ZACU TV.

Ati 'Inshuro nyinshi nagiye mbisabwa n’abantu banyuranye, bambaza niba ntateganya kongera gukora seri ya Seburikoko. Ubu nishimiye ko abakunzi b’iyi seri bagiye kongera kuyibona mu isura nshya kuri ZACU TV, ndetse ikaba izaba iherekejwe n’indi mishinga inyuranye ZACU Entertainment isanzwe itunganya.'

Sophie Tchatchoua, umuyobozi wa CANAL+ RWANDA yavuze ko atewe ishema n’intambwe shene ya ZACU TV imaze kugeraho, atangaza ko abakiliya b’iki kigo gicuruza amashusho bakunda kureba cyane ZACU TV, ndetse ko iyi shene yashyizweho kugira ngo irusheho guteza imbere inkuru zakorewe mu Rwanda.

Sophie yakomeje ashimangira ko abantu badakwiye kugira impungenge zo gucikwa na gahunda ZACU TV, asoza yibutsa abakunzi ba sinema nyarwanda ko imishinga yose ZACU TV imurika, bashobora kuyireba igihe cyose bifashishije APPLICATION CANAL+.

ZACU TV ni shene ubusanzwe iboneka ku miyoboro ya 3, 38 ndetse na 390 kuri dekoderi za CANAL+, kuva ku ifatabuguzi ry’ibihumbi 5,000 RWF rizwi nka 'IKAZE.’

Juno Kizigenza yinjiye muri Sinema

Umuyobozi wa Zacu Entertainment, Wilson Misago yagaragaje ko Seburikoko igiye kugaruka mu isura nshya

Cédric Pierre-Louis, umuyobozi ushinzwe gahunda n’ibiganiro bya ZACU TV, yagaragaje imishinga ya 2025 harimo na filime izkinwamo na Juno Kizigenza

Sophie Tchatchoua, umuyobozi wa CANAL+ RWANDA, yatangaje ko atewe ishema n’intambwe shene ya ZACU TV imaze kugeraho

Bamwe mu bakinnyi ba filime zitambuka kuri ZACU TV bari bahari

Bigaragaje imbere y'ibihumbi by'abantu mu ijoro ryo kuri iki Cyumweru tariki 29 Nzeri 2024. Ni ubwa mbere bari batamiriye muri kiriya gihugu, biturutse mu bufatanye abategura iserukiramuco 'Ubumuntu' bagiranye n'abategura 'World Culture'.

Umubano wabo wagutse cyane muri Nyakanga na Kanama 2024, Ubwo binyuze muri Mashirika bateguraga iserukiramuco 'Ubumuntu' mu kwizihiza imyaka 10 bogeza ubumuntu ku Isi, ryabereye ku Rwibutso rwa Jenoside rwa Kigali ruherereye ku Gisozi.

Binyuze muri Mashariki hashinzwe itsinda ry'urubyiruko ryiswe 'Generation 25' rigizwe n'abasore n'inkumi bavutse nyuma ya Jenoside yakorewe Abatutsi, bakina imikino inyuranye igaragaza uburyo Abanyarwanda bongeye kubana binyuze mu bumwe n'ubwiyunge.

Iri tsinda rya Generation 25 ribarizwamo abahanzi banyuranye barimo nka Peace Jolis na Lydia. Bari bamaze iminsi  babarizwa muri uriya Mujyi uzwi cyane muri Pakistan, kubera intambara zinyuranye zahabereye.

Karachi ni Umurwa Mukuru wa Pakistan, utuwe n'abantu barenga Miliyoni 20 ushingiye ku mibare itangwa na Banki y'Isi. Uri ku mwanya wa 12 ku Isi mu Mijyi minini ku Isi. Ni mu gihe muri rusange, Pakistan utuwe n'abaturage barenga Miliyoni 235.

Mu kiganiro na InyaRwanda, Peace Jolis yavuze ko yishimiye gutaramira muri iki gihugu nubwo baririmbye nyinshi mu ndirimbo ziri mu rurimi rw'Ikinyarwanda ariko banyuzagamo bagasobanura mu zindi ndimi zatumye abantu babasha kumva neza ubutumwa.

Ati 'Nishimye cyane birenze! Abantu nabo bishimye cyane. Ndabaririmbira mu rurimi batumva ariko ukabona bari kubyumva. Twataramye u Rwanda, byari ibintu byiza cyane.'

Iri serukiramuco ryahuje ibihugu bitandukanye byo ku Isi. Ryaranzwe n'ibitaramo by'abahanzi, ikinamico. Peace Jolis ati 'Urebye ni uruvange rw'ubuhanzi bahurije hamwe, hari abantu b'abanyabugeni n'abandi bakora ibikorwa by'ubuhanzi. Ni iserukiramuco rero ryagutse.'

Iri serukiramuco ritegurwa n'umuryango Arts Council of Pakistan, rikitabirwa n'abahanzi barenga 450 baturuka mu bihugu bitadukanye byo ku Isi birenga 40.

Hope Azeda watangije Mashirika ari nayo itegura Ubumuntu Arts Festival, yabwiye InyaRwanda ko bacanye umucyo muri iri serukiramuco ryabereye muri Pakistan kandi 'Kuri twe ni iby'agaciro cyane. Iyi niyo mpamvu y'imikino dutegura kugira ngo dusakaze amahoro n'icyizere mu bantu'.

Akomeza ati 'Tubwira abantu ko nyuma y'ibyabaye, ibyakubaho byose, hari umucyo, ejo hazaza ni heza kuri wowe. Buriya kugira ngo habe umucyo ni uko umwijima uba uhise. Iyo ufite ubushake bw'imbaraga bwo gushaka amahoro urayabona, buriya iyo ushaka ikintu n'umutima wawe.'

Yavuze ko bakozwe ku mutima no gutaramira mu gihugu nka kiriya 'ahabereye intambara zikomeye'. Ndetse mu kujya ahabereye iri serukiramuco bagiye baherekejwe n'inzego z'umutekano.

Ariko kandi 'Kuba twabashije kubasangiza umukino ufite amateka y'u Rwanda, arimo guharanira amahoro, ubwiyunge, ubumwe, mbese dusize tuhateye imbuto kandi tuzi ko izera.'

Hope Azeda yavuze ko hari umugabo wo muri Turkiya wamubwiye ko 'nyuma yo kubona uyu mukino yatumye imyumvire yanjye ku Rwanda ihinduka.'

Yavuze ko iyi mikino bakora binyuze mu itsinda 'Generation 25' ribarizwamo urubyiruko rwavutse nyuma ya Jenoside, iba igamije kwerekana uko umuntu yarenga ikibi, agaharanira ubumwe n'ubwiyunge.

Hope Azeda yavuze ko ibihumbi by'abantu babasabye kuzakomeza kugaruka muri Pakistan gukina uyu mukino. Bahuriye ku rubyiniro n'abantu bo mu bihugu bitandukanye barimo abo muri Afurika y'Epfo, Sri Lanka, Cosovo n'abandi.

Hope asobanura ko binyuze mu bihangano byabo bazakomeza guhamagarira abatuye Isi kwimakaza ubumuntu Uretse umukino bagaragaje muri iri serukiramuco, Hope Azeda yanatanze ibiganiro byagarutse ku ngingo zinyuranye zirimo ubuhanzi, ikinamico n'ibindi.

Nyuma ya Pakistan, Mashirika bategerejwe mu gihugu cy'u Bufaransa mu iserukiramuco 'Renaissance Theater' rizaba ku wa 18 na tariki 19 Ukwakira 2024, rizahuza abantu banyuranye batuye mu bihugu bitandukanye byo mu Burayi.

Ambasaderi wa Pakistan mu Rwanda, Naeem Ullah Khan, aherutse kuvuga ko biteguye gukomeza gutera inkunga iserukiramuco 'Ubumuntu' kandi ko bazajya batumira abahanzi banyuze muri iri serukiramuco. Ati 'Turi kwizihiza imyaka itatu tumaze mu Rwanda, igihugu cyacu n'iki dufitanye ubuhahirane n'igihango.'

Abasore n'inkumi babarizwa muri 'Mashirika' bahawe igikombe cyihariye nyuma yo kwitwara neza mu iserukiramuco 'World Culture' ryabereye muri Pakistan

Hope Azeda washinze Mashirika Creative and Performing Arts Group ndetse akaba n'Umuyobozi wa Ubumuntu Arts Festival yakira igihembo bahawe nyuma yo gukina umukino wakoze ku mitima ya benshi

Binyuze mu itsinda bise 'Generation 25', Mashirika yagaragarije abanya-Pakistan uko Abanyarwanda bongeye kunga ubumwe, kandi bagasakaza amahoro ku Isi hose


Mashirika ibarizwamo Peace Jolis yasangije abanya-Pakistan uko u Rwanda rwongeye kwiyubaka nyuma ya Jenoside yakorewe Abatutsi



Iri Serukiramuco ryabereye mu Mujyi wa Karachi, uzwi cyane ku Isi binyuze mu ntambara zinyuranye zahabereye ndetse no kuba utuwe n'abantu barenga Miliyoni 20 Igikombe cyahawe 
Hope Azeda yahawe ishimwe ku bw’uruhare rwe mu gusakaza amahoro ku Isi no gutegura neza Mashirika
Mashirika yahawe igikombe ku bwo kwitwara neza muri iri serukiramuco bitabiriye ku nshuro ya mbere



Abanya-Pakistan n’abandi bitabiriye iri serukiramuco basabye ko Mashirika izongera kubataramira

Umunyarwenya Twahirwa Ravanelly wamamaye cyane nka 27ravanelly binyuze ku rubugwa rwa TikTok yinjiye itorero ‘Inganzo Ngari’ ribyina imbyino gakondo riri mu yakomeye hano mu Rwanda.

Aganira na ISIMBI, Ravanelly yatangaje ko yishimiye iyi ntambwe yateye yo kwinjira muri iri torero nyuma y’imyaka itatu atangiye kubyina imbyino gakondo nk’umwuga.

Uyu musore yatangiye kwiga kubyina imbyino gakondo mu 2019 cyane ko ari ibintu yakundaga, gusa aza kubyinjiramo byimbitse mu 2021 nyuma ya Covid 19.

Ravanelly avuga ko ari ibyishimo bikomeye kuri we kwisanga muri iri torero, ndetse ko ari itorero akunda kandi yakuze yifuza kujyamo.

Ati “Ni ibintu byanejeje kwisanga mu ‘Inganzo Ngari’ kuko n’itorero nkunda kandi nifuzaga kujyamo kuva kera.”

Ravanelly yahishuye ko gukundana umuco gakondo no gushaka kumenya byinshi ku muco ari byo byatumye yiga kubyina imbyino gakondo, amazina y’inka n’ibindi.

Ati “Nisanze nkunda umuco gakondo cyane cyane, n’uko rero nshaka uburyo ngomba kubyiga nkabimenya (Kubyina), natangiye niga amazina y’inka nkoresheje igitabo cya alex Kagame ndetse no kuba umusangiza w’amagambo (MC) gusa mbura ubunyigisha neza, ariko kubera ko ku ishuri habagamo itorero ndijyamo ni uko natangiye kubyiga.”

Itorero Inganzo Ngari ni rimwe mu matorero abyina imbyino gakondo akomeye mu Rwanda, rikaba rimaze kwigarurira imitima ya benshi.

Ravanelly yinjiye mu Itorero Inganzo Ngari

RUKUNDO Sulaiman / ISIMBI.RW