Blog

Ni amahugurwa y'iminsi itanu ari kubera i Kigali ku Kicaro cya Polisi kuva kuri uyu wa 16 Nzeri. Ari kwibanda ku ihohoterwa rishingiye ku gitsina ndetse n'irikorerwa abana.

Abaforomo n'abaforomakazi bayitabiriye bavuze ko basanzwe bafasha abahuye n'ihohoterwa ariko ko bagiraga imbogamizi y'ubumenyi buke mu byo kubungangabunga ibimenyetso bikenerwa n'ubutabera.

Uwomusabe Adrie ukorera ku Bitaro by'Akarere ka Nyanza yavuze ko abaforomo akenshi ari bo bakira bwa mbere uwahohotewe ariko ko bagira imbogamizi yo kudasobanukirwa amategeko akurikizwa mu kurenganura uwahuye n'icyo kibazo, akaba yizeye kunguka ubwo bumenyi.

Nizeyimana Jean Damscène ukorerea ku Bitaro bya Gisenyi mu Karere ka Rubavu yagize ati 'Twakoraga ariko uburyo bwo kubika ibimenyetso twari tubifiteho ubumenyi budahagije.Twiteze kuzakura muri aya mahugurwa ubumenyi buzafasha ubugenzacyaha kubona amakuru yose akwiye'.

Mutoni Merab ushinzwe kurwanya ihohoterwa rishingiye ku gitsina muri RBC yavuze ko ibikorwa byo gufasha abahuye n'iryo hohoterwa kwa muganga bikorwa ariko hakaba hakenewemo ubumenyi bwisumbuye.

Yongeyeho ko ari gahunda izakomeza kugira ngo buri muganga agire ubushobozi buhagije ku ihohoterwa bityo abashe gufasha uwahuye na ryo mu buryo bwihuse.

Ati 'Ikifuzo cy'Igihugu ni uko abaganga bose bagomba kugira ubumenyi bungana kugira ngo igihe cyose uwakorewe ihohoterwa bamufashe nta hantu ahagaze'.

Yakomeje ati 'Uwahohotewe iyo ageze kwa muganga baramwakira bakamufasha bakamuha imiti imurinda kwandura indwara zandurira mu mibonano mpuzabitsina n'irinda gusama ibindi bagakomeza nyuma'.

Munyankindi Monique uhagarariye Umuryango Haguruka mu buryo bw'amategeko, yavuze ko nk'umuryango uharanira uburenganzira bw'abagore n'abana ubona hari icyuho mu kubungabunga ibimenyetso bya gihanga ku wahohotewe ari na yo mpamvu wafatanyije na RIB mu gutanga ubwo bumenyi.

Ati 'Hari igihe ujya muri 'dossier' y'uri mu rukiko ugasanga umuntu yakorewe ihohoterwa kandi bizwi bigaragara ariko bajya kureba bagasanga ibimenyetso byafashwe ntibagaragaza ko koko yamufashe ku ngufu. Hari ibimenyetso biba bigomba kurebwa nk'uturemangingo ndangasano bigahuzwa bikuzuzanya kugira ngo wa muntu ahabwe ubutabera'.

Umuvugizi wa RIB, Dr. Murangira B. Thierry yavuze ko amahugurwa yateguwe mu rwego rwo gufasha abakora kwa muganga kuzuza inshingano zabo neza mu gufasha uwahohotewe yaba umwana cyangwa umukuru.

Yavuze ko kandi ari inshingano za buri wese kugira ngo ubutabera butangwe neza ku wahohotewe yaba abaturage, inzego z'ubugenzacyaha, abaganga n'abandi.

Ku ruhare rw'abaturage yabasabye kwirinda gusibanganya ibimenyetso ku wakorewe ihohoterwa rishingiye ku gitsina kuko hari abajya barekurwa mu nkiko kuko ibimenyetso byasibanganyijwe kandi icyaha baragikoze.

Ati 'Ikintu cya mbere uwahohotewe agomba gukora ni ukwihutira kujya kuri Isange One Stop Center, kuri Sitasiyo ya RIB cyangwa iya Polisi imwegereye bya bimenyetso ataragira icyo abihinduraho. Si ngombwa kubanza koga kuko iyo ugiye koga cyangwa ukuyemo imyenda wari wambaye uba usibanganyije ibimenyetso. Ntabwo ari igisebo bazagufasha kandi bakugirire ibanga ndetse bagufashe kubungabunga bya bimenyetso'.

Yavuze ko abo baforomo bazunguka ubumenyi bwisumbuye ku buryo bwo kubangabunga ibimenyetso bya gihanga ku wahohotewe.

Ati 'Mu kubungabunga ibimenyetso hari uburyo butatu bw'ingenzi. Hari uko bikusanywa bitandukanye n'ibindi bintu, kubibika neza kugira ngo mu rukiko ntibizashidikanyweho ndetse hakaba n'uko bibikwa kuko si nk'uko ubika ibindi bintu bisanzwe'.

Ibyiciro byabanje by'ayo mahugurwa byahuguwemo abadogiteri 48 n'abandi baforomo ndetse iyi gahunda ikaba izakomeza ku baganga bose uko amikoro aboneka.

Abakozi ba RIB basobanuriye abaforomo uburyo bwo kungabunga ibimenyetso

Mutoni Merab ushinzwe kurwanya ihohoterwa rishingiye ku gitsina muri RBC yavuze ko ibikorwa byo gufasha abahuye n’ihohoterwa kwa muganga bikorwa ariko hakaba hakenewemo ubundi ubumenyi

Abahuguwe ni abaforomo baturutse mu bitaro by’uturere

Ni imibare yo kuva mu 2021 kugeza mu 2024 hagati, aho mu mwaka w'ingengo y'imari wa 2021/2022 abana 5,143 bakorewe ihohoterwa naho mu 2022/2023 hahohoterwa 5,296 mu gihe mu 2023/2024 hahohotewe abagera ku 5,058.

Abo bana bahohotewe muri iyo myaka itatu ishize bose hamwe ni 15,497 muri abo abagera kuri 14,234 bakaba ari abasambanyijwe.

Indi mibare ku ihohoterwa ryakorewe mu ngo mu myaka itatu ishize, igaragaza ko abarikorewe bose hamwe ari 26,637 harimo abagera ku 9,841 bahohotewe mu 2021/2022, abagera ku 9,807 bahohotewe mu 2022/2023 mu gihe abagera ku 6,989 ari bo bahohotewe mu 2023/2024.

Muri ibi byaha ibiza ku isonga ni uguhoza ku nkeke hagati y'abashyingiranywe byakorewe abagera ku 11,152, gukoresha umutungo w'urugo ku buryo bw'uburiganya byakozwe n'abagera ku 4,592 ndetse no gukubita cyangwa gukomeretsa ku bushake byakozwe n'abagera ku 4,531.

Umuvugizi wa RIB, Dr. Murangira B. Thierry avuga ko kuba hari ubwiyongere bw'imwe mu mibare bitavuze ko abakora ibyo byaha ari bo biyongereye ahubwo ko abantu bari kurushaho kudaceceka ihohoterwa.

Ati 'Iyo dukoze isuzuma nka RIB dusanga ikigenda kiyongera ari ubumenyi bw'abantu. Ubumenyi buriyongera umuntu akamenya ko iyo akorewe icyaha arenganurwa kuko za nzego ari buregere ziri bumwakire. Icyo gihe mu mibare bishobora kwiyongera ariko mu by'ukuri icyaha ubwacyo atari cyo kiyongereye'.

Ibi Dr. Murangira asobanura ko bishimangirwa no kuba hari abantu bamaze kumenya ko kuvuga ko umuntu yahohotewe atari kirazira ahubwo ko ari ugaharanira uburenganzira bwabo bakarenganurwa.

Yongeyeho kandi ko ihohoterwa rikorerwa abana kuri ubu ryabaye icyaha kitungwa kandi kidasaza. Ni ukuvuga ko nta kwiyunga gushoboka ku wahohoteye umwana kandi igihe cyose yafatirwa yashyikirizwa ubutabera akaryozwa ibyo yakoze.

Dr. Murangira yasabye abantu kudaceceka ihohoterwa kandi kandi mu byiciro byose kuko inzego zishinzwe kurenganura abahohotewe zitagenewe abagore cyangwa abana gusa ahubwo ari bantu bose harimo n'abagabo cyangwa abana b'abahungu bahohoterwa muri iyi minsi.

Dr. Murangira B. Thierry yasabye abantu bose kudaceceka ihohoterwa iryo ari ryo ryose

Hansi Flick yavukiye mu gace ka Heidelberg mu Budage. Yavutse ku itariki 24 Gashyantare, 1965. Nyina ni Traudel Flick naho se ni Hansi Flick Snr.

Hansi Flick mu bwana bwe yari yarihebeye umuziki n’umupira w’amaguru. Rimwe umuryango we waje kumujyana mu mujyi wa Muchkenkoch wari mu gace ka Mückenloch aho yari agiye gukurikirana umuziki n’umupira w’amaguru yari yarihebeye.

Ati: “Navuye mu gace navukiyemo, nari ngiye gukurikirana ibyo gukina umupira w’amaguru ndetse n’umuziki, kuko narabikundaga cyane. Nkigera aho nari ngiye kwiga, bansabye ko nakurikirana ikintu kimwe, ubwo kuva ako kanya mba ngiye mu mupira w’amaguru.”

Ababyeyi ba Hansi Flick ntabwo bari abakene ndetse ntabwo bari abakire bo ku rwego ruhambaye, gusa babonye ubushobozi bwo gushyigikira umuhungu wabo mu rugendo rwo gukina umupira w’amaguru yari yahisemo.

Ubwo yari afite imyaka 6 y’amavuko ni bwo Hansi Flick yatangiye gukina umupira w’amaguru, awutangirira mu bakiri bato muri BSC Mückenloch, ahigira umupira kuva mu 1971 kugera mu 1976.

Mu 1976, akimara gutandukana na BSC Mückenloch, yahise yerekeza muri SpVgg Neckargemünd ayikinira kugera mu 1981. Mu 1981, yavuye muri SpVgg Neckargemünd, ajya muri SV Sandhausen aho yayikiniye kugera mu 1983.

Nubwo yakinaga muri SV Sandhausen y’abato, mu 1982 Hansi Flick yatangiye kujya ahabwa umwanya no mu ikipe y’abakuru akayikinira. Mu 1983, yazamuwe muri SV Sandhausen nkuru, ubwo ayikinira kugera mu 1985. 

Hansi Flick wari umaze kugaragaza ubuhanga budasanzwe mu kibuga hagati, mu gihe yamaze kuri SV Sandhausen yayikiniye imikino 69 ayitsindira ibitego 8.

Mu 1985, Bayern Munich yari imaze kubona ubuhanga budasanzwe bwa Hansi Flick wakiniraga SV Sandhausen, nuko iramugura, ayikinira kugera mu 1990. Mu gihe Hansi Flick yamaze akinira Bayern Munich, yayitsindiye igitego 5 mu mikino 104 yayikiniye.

Mu 1990 Hansi wari umaze kugira imyaka 25 y’amavuko, yavuye muri Bayern Munich ajya muri FC Coln ayikinira kugera mu 1993. Muri FC Coln yakinnye imikino 44, atsinda igitego kimwe gusa.

Mu 1993 kugera mu 1996, yari muri Victoria Bammental afite amasezerano nk’umukinnyi, ariko ntabwo yigeze ajya mu kibuga ngo akine ahubwo yifashishwaga nk’umutoza wungirije.

Kuva mu 1996, ikipe ya Victoria Bammental noneho yahaye Hansi Flick akazi ko kuyitoza nk’Umutoza mukuru, ako kazi agakora kugera mu mwaka wa 2000.

Guhera mu 2000 yerekeje muri TSG Hoffenheim ayitoza kugera muri 2005. Kuva muri 2005, yongeye kugaragara nk’Umutoza mukuru muri 2019 kugera mu 2021 ubwo yatozaga FC Bayern Munich.

Kuva muri 2001 kugeza muri 2023, Hansi Flick yatozaga ikipe y’igihugu ya y’u Budage, gusa yari yaranabayemo Umutoza wungirije mu myaka ya hagati ya 2005 na 2018.

Guhera mu mpeshyi ya 2024 ni bwo Hansi Flick yatangajwe nk’Umutoza mushya wa FC Barcelona, ajya gusimbura Xavi Hernandez wari umaze kwirukanwa.

Ubwo Hansi Flick yageraga muri FC Barcelona, benshi bibajije niba azabasha gutoza FC Barcelona yari yabuze amafaranga yo kongerera abakinnyi nka ba Ilkay Gundogan basubiye muri Manchester City.

Barcelona FC yari yarabuze kandi amafaranga yo kugura Nico Williams, gusa bikavugwa ko Hansi Flick ari umutoza umenyereye gukorera mu makipe akennye.

Ku munsi wa Gatanu wa shampiyona ya Esipagne “Laliga”, FC Barcelona itozwa na Hansi Flick yatangiye guca amarenga yo gutwara iki gikombe. Mu mikino itanu amaze gutoza FC Barcelona muri Laliga, yose barayitsinze.

Muri iyi mikino yongeye kwibutsa abakunzi ba Barcelona FC ibihe bagiranye na Pep Guardiola mu buryo bwo gukina neza no gutsinda ibitego byinshi mu mukino. Mu mikino itanu ya Laliga, Hansi Flick amaze gutoza FC Barcelona, bazigamye ibitego 13, mu gihe mukeba Real Madrid ifite ibitego 7.

Mu gihe Hansi Flick yahesha FC Barcelona ibikombe bikomeye, si ubwa mbere yaba yabigezeho kuko yatwaye ibikombe nka Bundesliga muri Bayern Munich. Muri 2014, yatwaranye igikombe cy’Isi n’ikipe y’igihugu y’u Budage, icyo gihe yari Umutoza wungirije.

Mu bindi bikombe Hansi Flick yatwaye harimo UEFA Champions League ya 2019 muri FC Bayern Munich, yatwaye FIFA Club World Cup, UEFA Super Cup, byose abitwarana na Bayern Munich. Muri 2019 yatowe nk’Umutoza mwiza ku isi mu bagabo.

Hansi Flick ari kongera kugarura igitinyiro cya FC Barcelona 

Hansi Flick ni we mutoza utaratakaza inota rimwe muri shampiyona ya Esipagne 2024-25.

Hansi Flick afite ubuhanga budasanzwe mu gutwara ibikombe birimo na UEFA Champions League yahesheje Bayern Munich 

Ni ku nshuro ya Karindwi bakoze iki gikorwa ngarukamwaka cyo gufasha imiryango itishoboboye mu rwego rwo gushimira igihugu amahirwe kidahwema guha urubyiruko.

MC Brian yizera ko amahirwe igihugu kimuha afatanyije n'inshuti ze, bakwiye kuyakoresha mu guhindura ubuzima bw'abandi. Uyu mugabo azwi cyane muri iki gihe, binyuze mu bikorwa byo kuyobora imikino ya Basketball, kuba umushyushyarugamba mu mikino y'umupira w'amaguru, muri Volleyball n'ahandi.

Akusanya inkunga binyuze mu bukangurambaga bise 'One for One Campaign', hanyuma bagahitamo Akarere batangamo ubwisungane mu kwivuza buri mwwaka.

MC Brian yabwiye InyaRwanda, ko mu nshuro zirindwi (7) zishize bakora ibi bikorwa, bamaze bamaze gutanga Mutuelle de santé 1350 zifite agaciro ka 4,050,000 Frw. Kandi batanze ihene 15 ku miryango 15 mu Karere ka Bugesera.

Mu gihe cy'icyorezo cya Covid-19 kandi batanze ibiribwa ku miryango 10. Akomeza ati 'Byonyine kumva ko ufashije abantu bagera kuri 700 kwivuza umwaka wose niyo batabikubwira biba ari igikorwa cyo gutanga ubuzima.'

Yungamo ati 'Ikindi n'uko hari abana babaga ku muhanda twigishije tukanabasaba kuva ku muhanda ubu barangije ishuri bakaba ari na ba rwiyemezamirimo.'

Mu kiganiro n'itangazamakuru, Umuyobozi w’Akarere ka Gicumbi Nzabonimpa Emmanuel, yashimye MC Brian n'inshuti ze ku bw'umutima wo gufasha, ndetse n'ubwisungane mu kwivuza 700 bahaye abaturage bo muri kariya karere.  

Yavuze ati 'Icya mbere ni ugushimira, gutanga bujya ni ku mutima, rero mu Karere tuba dufite abaturage bafite ubushobozi bwo kwishyura 'Mutuelle de Sante' ariko tukagira n'abandi bayabona bigoranye, ndetse n'ababona ibice bakananirwa kuzuza umusanzu wose. Rero, turagirango tubashimire by'umwihariko kuba badufashije guha abaturage Mutuelle de santé zigera kuri 700.'

Yavuze ko mu gutanga ubu bwisungane mu kwivuza, harebwe ku byiciro byari bifite imbogamizi mu kubona ubwishyu. Ati 'Twishimira ko bahawe ubuzima umwaka wose, hamwe n'ingamba zifatwa na Leta binyuze muri Minisiteri y'Ubuzima, gushyiraho amavuriro yegera abaturage, tuzi neza ko umuturage agomba kuba afite ubwisungane, ubu rero twibwira ko abantu 700 bose bazarangiza uyu mwaka, rwose ntuwarwara yajya kwivuza kuko afite 'Mutuelle de santé'.

Meya Nzabonimpa yavuze ko ibyakozwe na MC Brian n'inshuti ze ari 'urugero rwiza no ku bandi' kandi biri mu murongo w'Umukuru w'Igihugu, aho Umuturage agomba kuba mu isonga mu bimukorerwa.

Ati 'N'abandi bafite ubushobozi, bafite aho bahurira […] Kuba babashije gufasha abaturage bari bafite imbogamizi yo kwivuza, bakaba babafashije ni ishimwe rikomeye. Turabashimira, kandi dushishikariza n'abandi kujya bagira umutima ufasha.'

Meya Nzabonimpa [Ubanza iburyo] yashimye MC Brian n'inshuti ze kubyo bakora ndetse nibyo bunguka badahwema gushyigikira abadafite ubushobozi

Meya Nzabonimpa yashimye MC Brian n'inshuti ze ku bwo gutekereza ku Karere ka Gicumbi, abizeza ubufatanye muri byose

 

Ni ku nshuro ya Karindwi bakoze igikorwa cyo gufasha, ariko ni ku nshuro ya Gatatu batanze 'Mutuelle de santé' 

Mc Brian yatangaje ko bamaze gutanga 'Mutuelle de santé' 1350 zifite agaciro k'arenga Miliyoni 4 Frw

MC Brian n'inshuti ze ziganjemo urubyiruko bakora iki gikorwa ngaruka mwaka mu rwego rwo gukomeza gushyigikira umuryango Nyarwanda

Ikigonderabuzima cya Karwasa giherereye mu Murenge wa Cyuve mu gihe icya Shingiro kiri mu Murenge wa Shingiro. Byombi nta ruzitiro bifite, ibituma ababigana n'abagenderera ingo bituranye binjirira aho babonye.

Uwimanimpaye Stephanie utuye aho hafi yavuze ko ikibazo kirushaho gukomera kubera ko aho wanyura hose winjira mu kigo nerabuzima, bituma n'abana birirwa bahakinira.

Ati 'Buri wese yinjiramo uko yishakiye, bitewe n'uko kirangaye. Abana birirwa bakiniramo umupira, ari na ko abashumba na bo baragiriramo amatungo.'

Iraguha Samson we yavuze ko nko mu gihe abarwayi barimo kuvurwa usanga abana burira amadirishya bakabarunguruka.

Umukozi mu Kigo Nderabuzima cya Karwasa witwa Uwase Alice we yavuze ko hari n'impungenge ko abana bahavogera bashobora gukurizamo uburwayi.

Ati 'Tujya tugira abana baducunga ku jisho bakinjiramo bakiba ibikoresho birimo n'ibiba byakoreshejwe mu kuvura abarwayi. Bishobora no gukurizaho kubakururira indwara zandura.'

Umuyobozi w'Ikigo Nderabuzima cya Shingiro, Mushimiyimana Ernest yahamije ko kidatekanye bitewe n'inzira nyabagendwa abaturage bahanzemo.

Ati 'Inzira abahanyura bahaciye zirenga nka 15. Nta rembo kigira twavuga ko rigenewe kunyurwamo n'abakigana, buri wese anyura aho abonye. N'iyo washyiraho uburyo bwo gukumira abaca muri izo nzira zose biragoye kubishobora.'

Yakomeje ati 'Dufite ingero z'ibikoresho byinshi byagiye byibwa n'abajura bacunga abarinzi ku ijisho kandi n'ubu izo mpungenge turazihorana.'

Mushimiyimana avuga ko hari hatekerejwe kuba icyo kigo nderabuzima cyashyirwaho abarinzi hose babuza abantu kunyuramo uko bishakiye ariko basanga ubushobozi bwo guhemba abantu bangana gutyo bigoye kububona.

Umuyobozi w'Akarere ka Musanze, Nsengimana Claudien hamamije ko icyo kibazo kiri mu bigomba gukorwaho igihe bagura ibigo nderabuzima.

Yagize ati 'Tugenda twagura inyubako za bimwe mu bigo nderabuzima tuzongerera ibyumba bivurirwamo no kuvugurura inyubako zishaje, kandi uwo mushinga urakomeje, na cyane ko hari nk'ibyubatswe muri ubwo buryo bikanazitirwa.'

Meya Nsengimana ariko ntagaragaza igihe ibyo bizakorerwa. Ati 'Ngendeye nko ku rugero rw'Ikigo Nderabuzima cya Kabere kiri mu byo duheruka kuvugurura mu buryo bugezweho, bitanga icyizere ko n'ibindi bitarazitirwa na byo igihe kizagera bigakorwa.'

Yavuze ko iby'uruzitiro kuri ibi bigo nderabuzima bizitabwaho mu ngengo y'imari y'imyaka iri imbere kuko mu yatangiye gukoreshwa muri Nyakanga 2024 nta mafaranga yabyo ateganyijwe.

Ikigo Nderabuzima cya Karwasa ni kimwe mu bidafite uruzitiro i Musanze

Gahunda yiswe 'Igitondo cy'isuku' yatangiye mu 2022 mu Turere twose tw'Intara y'Amajyepfo, igamije gufasha abaturage kurangwa n'isuku yok u mubiri, imyambaro mu rugo, ahamukikije n'aho akorera.

Ubuyobozi bw'Intara y'Amajyepfo buvuga ko Iyi gahunda hari byinshi yagezeho birimo kuzamura imyumvire yo kwikorera isuku badategereje ko umuganda rusange ugera.

Mu bikorwa bibandaho harimo gutema ibihuru bikikije aho abantu bakorera no ku mihanda, gusibura imiyoboro y'amazi, gutoragura amashashi n'amacupa aho byajugunywe n'ibindi.

Hiyongeraho itunganywa ry'ubusitani ku mihanda itandukanye, gutera ibiti by'imitako ndetse no gushyiraho udusanduku dushyirwamo imyanda.

Ku rundi ruhande ariko, hari bamwe mu batuye mu Ntara y'Amajyepfo bavuga ko iyi gahunda yabaye akamenyero mu bice bimwe na bimwe, abayijyamo bakayikora nko kwifotoza, ntitange umusaruro yatangiye yitezweho.

Umunyamabanga Nshingwabikorwa w'Intara y'Amajyepfo, Nshimiyimana Vedaste yavuze ko igitondo cy'isuku cyarenze kuba gahunda isa nk'umuganda usanzwe gihinduka ishuri ry'isuku.

Ati ''Gahunda yatangiye ari uguhurira ahantu hateranira abantu benshi, kandi n'ubu ni ko bigenda, tukajya nk'ahatangirwa serivisi, tugafatanya n'abakozi bahari, tukahakora isuku, ariko twarangiza tukaniga.''

'Ubu ibigenda bikorwa ni ukunoza ibikoresho tujyana, inyigisho dutanga ku isuku, gufatanya n'abantu bamenyereye isuku, kuko tugitangira nta n'abakozi bashinzwe isuku n'isukura twagiraga, hamwe na bo bagiye batwereka ibyuho byarimo, ubu rero byagiye bizamuka.''

Gitifu Nshimiyimana yongeyeho ko iyi gahunda yabaye n'uburyo bwo gusangira ubunararibonye ku isuku aho 'nk'abagiye ku mashuri bigisha abakora mu gikoni uko bategura amafunguro afite isuku, dore uko umwenda w'ukora mu gikoni ukwiye kuba usa, uko amazi abanyeshuri banywa atunganywa,…''

Igitondo cy'isuku kiba buri wa Kabiri w'icyumweru mu turere twose tw'Intara y'Amajyepfo, aho abaturage bahura kuva saa Kumi n'Ebyiri kugeza saa Mbili za mu gitondo, bagakora isuku ahantu hatandukanye.

Visi Meya w’Akarere ka Nyanza ushimnzwe imibereho myiza y’abaturage,Kayitesi Nadine, aha yari yifatanije n’abaturage mu gitondi cy’isuku.

Muri Gashyantare 2022, ni bwo Guverineri w’Intara y’Amajyepfo Kayitesi Aice, yatangije ‘Igitindo cy’isuku’ ku mugaragaro.

Mu gitondo cy’isuku abaturage bakora isuku ahabakikije.

Iyi gahunda ikorwa mu Ntara hose. Aha ni muri Gisagara, muri santere ya Save.

Iyi gahuda natanze umusanzu mu gutunganya ubusitani hirya no hino mu Ntara.

I Nyamagabe naho iyi gahunda yabafashije guteza imbere ubwiza bw’umujyi wabo bongera ubusitani ku nkengero z’imihanda.

Byafashije guhashya umwana, n’ubwo kuri ubu ngo hari aho bitari bigiorwa neza.

Guverineri Kayitesi Alice, asibura umuyoboro w’amazi mu iteme muri gahunda y’igitondo cy’isuku.

Iyo nteko igizwe n'abagize Biro y'Inama Njyanama z'Imirenge ya buri Karere kagize Intara cyangwa Umujyi wa Kigali, n'abagize Inama Njyanama z'Uturere dufite ubuzima gatozi n'abagize Inama Njyanama y'Umujyi wa Kigali.

Mu bice bitandukanye amatora yabereye ku biro by'uturere uretse Umujyi wa Kigali watoreye ku biro byawo.

Guhera Saa Tatu za mu gitondo amatora yari atangiye aho hari gutoranywa abagomba kwinjira muri Sena y'u Rwanda muri manda y'imyaka itanu. Muri buri cyumba gitorerwamo harimo abantu bane bayoboye amatora.

Muri bo harimo umuhuzabikorwa w'icyumba cy'itora ari na we ufite inshingano zo guhuza no kuyobora imirimo y'itora; kuyobora abaseseri; kwakira no gukurikirana imikoreshereze y'ibikoresho by'itora; kuyobora no guha ibisobanuro abaje gutora n'izindi. Harimo kandi abaseseri batatu bafasha mu migendekere myiza y'amatora.

Perezida wa Komisiyo y'Igihuhu y'Amatora, Oda Gasinzigwa, yatangaje ko ibikorwa by'amatora biri kugenda neza kandi ko bizeye ko abagize inteko itora babikorana ubushishozi mu guhitamo abinjira muri Sena y'u Rwanda.

Nyirasafari yongeye gutorwa

Bitewe n'imiterere y'imitegekere y'Igihugu, Umujyi wa Kigali hatorwa Umusenateri umwe, Intara y'Amajyaruguru babiri, Amajyepfo batatu, Iburengerazuba batatu n'Iburasirazuba batatu.

Saa 13:25 ku rwego rw'Umujyi wa Kigali amatora yari arangiye ndetse habarurwa amajwi y'ibyavuye mu matora nk'uko amategeko abiteganya.

Nubwo Komisiyo y'Igihugu y'Amatora ari yo ifite ububasha bwo gutangaza ibyayavuyemo, ubwo babaraga amajwi mu cyumba cy'itora, Nyirasafari wari usanzwe ari Visi Perezida wa Sena y'u Rwanda ni we wahize abandi.

Mu bantu bagize inteko Itora mu Mujyi wa Kigali, hitabiriye amatora 115. 114 muri bo batoye neza n'aho ijwi rimwe riba impfabusa.

Nyirasafari yahize abandi n'amajwi 63, akurikirwa na Mfurankunda Provda wagize 28, Katusiime Hellen agira 13, Nkubito Edi-Jones agira 10 n'aho impfabusa iba imwe.

Ku bijyanye no kuba Umujyi wa Kigali, utora Umusenateri umwe gusa, Meya Dusengiyumva Samuel, yagaragaje ko nta mpungenge bikwiye guteza.

Ati “Inteko Ishinga Amategeko mu nshingano zayo ireba igihugu cyose, Umujyi wa Kigali rero ni rumwe mu nzego ifite kandi haba muri Sena ndetse n'abadepite baduhagarariye neza ku buryo buhagije kuko iyo dufatanyije ibisubizo biraboneka. ibibazo abaturage bari bafite bigakemuka.”

Nk'umwe mu bagize inteko itora yagaragaje ko batoye neza kandi abaturage badakwiye kugira impunge ku bo bari buhitemo.

Biteganyijwe ko ku mugoroba wo kuri uyu wa Mbere tariki ya 16 Nzeri 2024, Komisiyo y'Igihugu y'Amatora itangaza by'agateganyo ibyavuye muri ayo matora.

Ku wa Kabiri tariki ya 17 Nzeri 2024 biteganyijwe ko hazatorwa abasenateri babiri bava mu mashuri makuru na Kaminuza bya Leta n'ibyigenga.

Abagize inteko itora bazindukiye mu matora

Gutora ryari ibanga, kuko wamaraga gutora urupapuro ukarushyira mu gasanduku kabugenewe

Ni amatora yitabirwa n’abahagarariye abaturage bagize inama njyanama z’imirenge n’uturere

Abatora batondaga umurongo hagatora umwe umwe

Mu cyumba cy’itora babanzaga kureba ko uje gutora ari kuri Lisiti akabona guhabwa urupapuro rw’itora

Abayobozi muri Komisiyo y’Igihugu y’Amatora bakurikiranye uko iki gikorwa kiri kugenda mu Mujyi wa Kigali

Mu cyumba cy’itora cy’Umujyi wa Kigali

Perezida wa NEC, Oda Gasinzigwa yagaragaje ko amatora ari kunyura mu mucyo

Nyuma yo gutora bahise babara amajwi

Mu kubara amajwi abakozi bayoboye amatora babikorana ubushishozi

Uko mu Mujyi wa Kigali amatora yagenze

Meya Dusengiyumva Samuel, atora umusenateri uzahagararira Umujyi wa Kigali ayoboye

Komiseri muri Komisiyo y’Igihugu y’Amatora, Carine, agaragaza ibyavuye mu matora muri icyo cyumba ariko asaba abatoye gutegereza ko NEC itangaza by’agateganyo

Mu 2024, umusaruro mbumbe witezweho kwiyongera ku rugero rwa 6,6% bitewe n'umusaruro wa serivisi n'uw'inganda ndetse no kuzahuka k'umusaruro w'ibikomoka ku buhinzi.

Muri rusange mu gihembwe cya kabiri, umusaruro mbumbe wiyongereyeho 9,8% nyuma y'uko wari wiyongereyeho 9,7% mu gihembwe cya mbere cy'umwaka. Mu byiciro by'ubukungu, nk'ubuhinzi bwiyongereyeho 7%, inganda ziyongeraho 15% ndetse na serivisi ziyongeraho 10%.

Mu buhinzi, umusaruro w'ibihingwa ngandurarugo wiyongereyeho 8% bitewe n'umusaruro mwiza w'igihembwe cya mbere cy'ihinga cy'umwaka wa 2024. Umusaruro w'ibihimbwa byoherezwa mu mahanga wagabanutseho 6% ugereranyije n'igihembwe cya kabiri cya 2023.

NISR isobanura ko imwe mu mpamvu yatumye ibyoherezwa mu mahanga bigabanuka mu buhinzi, ni uko umusaruro w'ikawa wagabanutse bitewe n'uko byinshi mu biti by'ikawa bishaje, ubu hakaba hariho gahunda yo gutera ibishya.

Mu nganda, mu izamuka ry'umusaruro uruhare runini rungana na 18% rushingiye ku musaruro w'imirimo y'ubwubatsi ndetse n'izamuka rya 17% ry'umusaruro w'inganda zitunganya ibintu bitandukanye. Gusa umusaruro w'amabuye y'agaciro wagabanutseho 2% ugereranyije n'igihembwe cya kabiri cya 2023.

Mu bijyanye na serivisi, umusaruro w'ubucuruzi budandaza n'uburanguza, wiyongereyeho 10%, uw'ibikorwa by'ubwikorezi wiyongeraho 9% bitewe ahanini n'ubwikorezi bwo mu kirere bwiyongereyeho 25%. Umusaruro w'amahoteli na restaurant wiyongereyeho 20%, umusaruro wa serivisi z'ikoranabuhanga n'itumanaho wiyongeraho 33%, mu gihe uwa serivisi z'ibigo by'ubwishingizi wiyongeyeho 10%.

Umukino ubanza w’ijonjora rya kabiri rya CAF Confederation Cup mu guhatanira kujya mu matsinda, Al Ahli Tripoli ya Manzi Thierry yanganyijemo na Simba SC, buri ruhande ntirwishimiye uko umukino wagenze.

Ni umukino wabaye ejo hashize ku Cyumweru tariki ya 15 Nzeri 2024 ubera muri Libya, Al Ahli ni yo yari yakiriye.

Manzi Thierry wari mu kibuga akina iminota yose, amakipe yombi yanganyije ubusa ku busa nta kipe yabashije gutera mu izamu ry’indi.

Al Ahli ikaba itishimiye imisifurire aho ishimangira ko yibwe n’umusifuzi wari mu kibuga hagati, Umunya-Botswana Thabang Ketshabile, ivuga ko igomba no kumurega muri CAF nyuma yo kumatangaza nk’umukinnyi mwiza w’umukino ibinyujije ku mbuga nkoranyambaga za yo.

Si ibyo gusa kuko na Simba SC na yo itishimiye uko abafana b’iyi kipe bayifashe, amashusho yafashwe agaragaza umukino urangiye abakinnyi ba Simba SC birukira mu rwambariro bahunga amacupa barimo guterwa n’abafana.

Umukino wo kwishyura uteganyijwe ku Cyumweru gitaha tariki ya 22 Nzeri 2024 muri Tanzania ikipe izatsinda ikazahita ijya mu matsinda ya CAF Confederation Cup.

Manzi Thierry yakinnye iminota yose

Mu bikorwa by'ivugabutumwa bikorwa mu Rwanda hari abatekera imitwe abayoboke bababeshya ko hari ibitakangaza babakorera birimo kubavura indwara zitandukanye bikagera n'aho bamwe bahasize ubuzima.

Ubwo Perezida Kagame yagezaga ijambo ku bitabiriye amasengesho yo gusengera igihugu kuri uyu wa 15 Nzeri 2024, yagaragaje ko hari umuvugabutumwa wigeze gukusanya abantu benshi abajyana ku musozi ngo agiye kubarangira umuti wa SIDA, abagaburira itaka.

Ati 'Indwara ya SIDA ikimara kumenyekana, yica abantu bandi bayirwaye haboneka abantu nk'abo ariko nibuka umwe wajyanye abantu ahantu benshi ariko, mu bihumbi ababwira ko afite umuti wayo barahurura. Uzi umuti yabahaga? Igitaka.'

Yavuze ko abantu bose bagiye batonda umurongo barya itaka ng oni umuti wa SIDA nyamara ari ibinyoma gusa.

Ati 'Yacukuye umusozi bakajya batiyura ibitaka bakarunda aho buri wese akajya ku murongo bafite ikiyiko, buri wese akarya kuri icyo gitaka. mbese Imana yamurangiye ahantu hari igitaka gikiza iyo ndwara abantu bajya ku murongo. Muracyari muri ibyo?'

'Ubu abantu bazajya baduhamagara badutondeshe umurongo, ejobundi Covid nigaruka baturishe ibitaka ngo baradukiza ariko bitewe n'uko uwo muntu afite ubushobozi yahawe n'umwuka wera'

Perezida Kagame yagaragaje ko no mu Rwanda hakiri abantu bashuka abandi ngo babayoboke bazabageza ku Mana, bakabajyana mu buvumo, mu biti no mu bitare ngo ni ho bashobora kubonanira n'Imana.

Ati 'akababwira ngo mugende nimugera iyo kure wumva umwuka utangiye guhera ubwo uraba wageze mu wundi mwuka, bigakorerwa abantu magana, ibihumbi hirya no hino mu gihugu'

Yanavuze ku bavugabutumwa bavuga ngo bashaka guca karande yo mu muryango bikabaviramo gutandukanya imiryango, ni ukuvuga abana na ba nyina, abashakanye n'abandi bafitanye amasano.

Ati 'Niba hari n'ahandi byabaye hano mubyemerera iki koko?'

Yananenze ababwira abandi ko batagomba kujya kwivuza ngo bazabavura bakire, agaragaza ko abantu bakwiriye gukoresha ubwenge Imana yabahaye aho kugendera mu kigare cy'ababayobya.

Ati 'Abantu twese Imana yaduhaye ubwonko ngo dutekereze. Erega yabuguhaye ngo nihagira umuntu ukubwira ikintu kibi cyangwa uguha ikintu kibi ubanze ubaze. Koresha ubwonko unabaze uti ariko ibi bintu umbwira ni ibiki?'

Mu Rwanda hari amadini n'amatorero arenga 345, icyakora habariwemo n'imiryango iyashamikiyeho bihita bigera kuri 563. Ku wa 22 Kanama 2024 hahagaritswe amatorero n'amadini 43 kubera kutuzuza ibisabwa.

Insengero zagenzuwe mu Rwanda zirenga ibihumbi 14, na ho izirenga 9800 zarafunzwe kubera kutuzuza ibisabwa, 336 muri zo zikaba zigomba gusenywa.

Perezida Kagame yavuze ko abavugabutumwa bayobya abantu bababeshya ibitangaza

Abayobozi batandukanye bari mu masengesho